جايي ياسرسورة ومعي شوية سلال -- عبيتها من كروم آلهة الجمال
وجايبلك خصوصي الك عنقود شعر -- مقطف منضف مستوي وأكلو حلال

جون سعاده

شوفو عناقيد الزجل عالداليه -- تريات قد الروح عندي غاليه
كروم الزجل فيهاعرايش للجميع -- وأنتو لكم كل العريشه العاليه
جون سعاده

بهالمنتدى رح رش ورد على الجميع -- وخلي فصول المنتدى تبقى ربيع
ومتل القطيع منسرح بمرج الجمال -- ت يضل فينا الحب راعي للقطيع
جون سعاده

لما غرامك صار يرقصلي -- وصفى ورد أصفر يقصقصلي
بلشت آكل كرمك المجنون -- وماتركت من كتر الغزل خصله
جون سعاده

ياناطره عالكوع وحدك والمطر -- طايف كأنو الصين وقعت عاقطر
تاتعرفي بالحب لازم تنطري -- وياماع نفس الكوع محبوبك نطر
جون سعاده