|
اقتباس:
بالنسبه للتذكار ..فا انا بحب تتذكروني بكلمات هل الغنيه الي بتعبر عني وبتعنلي كتير قومي طلعي عالبال بِغيبتك نزِل الشتي قومي طلعي ع البال في فوق سجادة صلا والعم بيصّلوا قلال صوتن متل مصر المرا وبعلبك الرّجال ع كتر ما طلع العشب بيناتنا بيرعى الغزال وَدّيت مع راعي حماه يشفلي الطقس شمال قللي السني جايي هوا بيوَقّع الخَيّال ياريت ما سرجت الفرس ولا بْعَتْ هـ المرسال اما بالنسبه الك ولمثنى وابو ساره : من قلبي ورده ياسمين شامي لكل واحد فيكون ... وشكرا كتير ع الاستضافه الجميله .. اما بالنسبه لاسئلتك طارق ..فا كنت كتير قريبه لقلبي ولامست بمكان بقلبي كتير غميق ... يعطيكون العافيه احلى شباب :D..منورين |
اقتباس:
تاني شي .. بيقول زياد .. كل ما بتسألني كيفك .. بتذكر اني ما منيح .. فلا بقا تسألني كيفك .. وخلينا نسلم بالوما .. تالت شي .. اي هادا الشي بينطبق على علاء .. بينطبق وكتير .. لأنو علاء من النوع اللي ما بيحب هوي يتذكر شو وضعو .. يعني بتدايق لتلت ثواني .. من اي شي بحياتي .. بعدين بنساه فا بحب بعّد عني اي شي بيذكرني فيه .. طبعا اكيد انا ما رواء عطول .. بس رواء .. كلمة تفاديا للاسئلة .. اللي بنسئلا عطول وقت بجاوب انو ماني منيح بس هلأ دارجة موضة جديدة .. انو كل ما يسألني حدا كيفك .. قلو مبسوط .. يطلع هيك:shock: .. ويقلي ليش .. فا عم فكر ما رد على هالسؤال .. وريح حالي وريح البشرية:larg: |
علاء كتار من الناس بيقولوا اليوم وقت بتصير حرب مثلا حرب تموز او حرب غزة انو يا اخي شي مو جديد لا خلينا نضهر ونسهر ويعني لو قعدنا بالبيت وسكتنا ما رح تتحرر الارض
انت شو رايك ؟ |
وقبل ما اتركك مع مثنى بفقرة الانا بحب ابعتلك هالغنية
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
بس فيني فيدك .. انو عالحالتين ما رح يساوو شي .. لأنو الشعب العربي .. شعب عياط وزعاويط .. ما رح يعملو شي .. يعني بالله سؤال .. هلأ مين بيتزكر غزّة ؟ في مليون مثال تاني .. بس انا عم بحكي على غزّة .. لأنو للاسف لسا مستمر هادا الشي .. وقت الحرب .. ملايين الحملات .. وملايين البشر " وقفو .. وحكو .. وكتبو " تعاطفا مع غزّة .. انا بسهر ... وبروح .. وما بتفرق معي .. لأنو ببساطة فينك تقول .. نحنا كشعب عربي تعوّد عال " خوازيق " يعني منحسّ فيه اول ما يفوت .. بعدين عادي .. :D |
مسا الخير علاء برحب فيك مايسترو للحلقة التالتة ..
هلأ فقرة الانا.. علاء صرلك باخوية تقريبا سنتين شو اخدو منك هالسنتين وشو اعطوك؟ وهل ممكن مع الايام تعتبرهن سنين بس لتضيع وقت؟ بهالسنتين اي سنة كانت بالنسبة الك الافضل على الصعيد الشخصي ؟ واياها افضل على صعيد اخوية؟ |
علاء ردودك بالعادة بتكون فكاهيه واحيانا لا مبالية هل اسلوبك بالواقع بيختلف عن اسلوبك باخوية؟
وهالاسلوب كان من زمان ولا من بعد ما عرفت اخوية ؟ علاء شو احسن شي صار معك بالاخوية؟ شوفي موقف صار معك بالاخوية ما ممكن تنساه مع مرور الزمن..؟؟ علاء بحسك معظم الاوقات مش طايق حدا وكرهان كل شي .. حتى بحسك احيانا كرهان حالك وبحسك غريب الى حد ما ؟ شو بتقول بهالشي ؟ |
اقتباس:
لعيت كتير انا ما ؟:lol: |
اقتباس:
|
علاء انت اكتر من مرة بدلت اسمك هون ...
هل تغيير الاسم الو علاقة بتغيير الافكار - الحبايب - المواقف .... الخ شو تمثلك الامور التالية .. بصراحة الحياة الصراع من اجل البقاء الدراسة الاكاديمية الواسطة في حالة الشدة أخوية باخير موضوع الك .. قدمت نصائح للاخوة المواطنين ... نختار منها اقتباس:
تنصح المواطن ... بشغلات عن طريقة الكتابة الساخرة ... الى اي مدى تحب هذا الاسلوب الساخر بالكتابة و بالحياة العملية... وهل تلجئ له من تشوف صعب ايصال الفكرة مباشرة ؟ سؤال اختياري .. اذا تحب تكتب كم سطر شرح عن هذه النصيحة بالذات :lol: |
اقتباس:
انا عم بحكي بهالموضوع بالذات .. بلسان المسؤول .. طيب .. بالنسبة للسؤال الاختياري .. بعتذر عنو ابو سارة .. لأنو ازا حكيت .. رح بيّخا كتير .. طبعا لأنو متل ما حضرتك بتعرف .. انو ماني كتير شاطر بالحكي " الا عالمسنجر:p" فبلاها احسن وخليها ل" نية المواطن .. على امل انو واحد تكون نيتو .. ابشع من نيتي :p" |
اي علاء كيفك؟
حمص بالنسبة لعلاء هي شو تحديدا؟ لو انت اليوم ما كنت خلقان بهالبلد رح تتطبع باطباع البلد اللي انت فيه ؟ اليوم لشو بتحن من ايام طفولتك بحمص؟ |
هامش : مثبّت لهالشهر ....:D
|
شكرا مريوم
|
اقتباس:
|
علاء انت مع فكرة الرجال قوامون على النساء ؟
وهل بتشوف حالك بغياب والدك الله يرحمه انك رجال البيت |
اقتباس:
|
علاء بتخاف يندق الباب شي نهار وتعتقل لا قدر الله ؟
او بتمشي الحيط الحيط ويارب السترة ؟ ام انو مش خايف وقيمي ومبادئي اهم من اهم شي ؟ بدي منك تترك تذكار للبرنامج بيعبر عنك |
اقتباس:
بالنسبة للتذكار .. رح يكون بالرد اللي بعدو |
اهلا وسهلا فيك بالبرنامج
لانك ضيف كتير مميز وبتعرف معزتك عندي وعند الشباب رح نهديك هاللوغو  بيخولك انو بيحقلك تفوت باي وقت لبرنامجنا وتقول اللي بقلبك علاء ليون هارت تالت مايسترو معنا اهلا وسهلا فيك بنفسجة هي المايسترا المقبلة |
اقتباس:
لاتصعبو الاسئلة راسي واجعني:cry::cry::cry::cry: |
اهلا وسهلا فيكي بنفسجة او لموش .. المايسترا بحلقتنا اليوم ..
رح نبلش بفقرة الانا.. بداية كيف عرفتي اخوية ؟ وكيف شايفة اخوية هالايام وشو بتفرق عن قبل؟ لموش طب الاسنان كان من اختيارك؟ وكيف بتشوفي هالمهنة ؟ وليش الناس او المريضين بمعنى اصح بيكرهو دكاترة الاسنان؟ |
لموش انتي من الناس يلي على علاقات كتيرة باخوية_ماشالله عليكي بلا ما تقولي طرقنا عين:pos:_ كترة الاصدقاء برأيك منيحة اولا ؟
وهل بتحسي انو في اصدقاء بتعرفيهن ع النت بتحسيهن مش هالاصدقاء يعني ما بيعرفو معنى الصداقة الحقيقية او حتى ع الواقع؟ وهل اصدقاءك يلي من اخوية ممكن تفضليهن ع اصدقاء الك بالواقع؟ اكتر شخص بتحسيه قريب منك بأخوية من الشباب واكتر صبية بتحسيها قريبة منك باخوية من الصبايا؟ |
شو علاقة البنفسج مع لموش ؟؟ وليش البنفسج؟
لموش لو خيروكي بيوم من الايام انو تختاري قسم لتشرفي عليه اي قسم بتختاري ؟ وليش؟ |
اقتباس:
كيف عرفت اخوية: هاد ياسيدي كان عندي رفيق حمصي عم يشتغل بقطر عم يبحبش بهالغوغل متل المصروعقام طلع معو هالمنتدى قلي لما لما لك هاد منتدى حمصي ولك ليكي شوفي ما احلاه حمصي وربي حمصي وعطاني الرابط هالشب اسمو مستر حبوب مشاركاتو قليلة كتير بسبب شغلو المضغوط وبوجهلو الف تحية بالنسبة كيف شايفة اخوية هلايام فهيي ياصديقي بتتغير بتغير الاعضاء وثقافتون وطريقة تفكيرون اول فوتي على اخوية كان اهتمامي منصب على المنبر والسياسة وما كان شي يهمني غير المنبر وما كنت اعرف الا الاعضاء يلي بيكتبو بالمنبر وكان كتير بوقتا حامي وفيه اخد وعطا وبعدين رحت على غير اقسام وبصراحة انا ما عم شوف انو اخوية عم ترجع لورا او عم يتغير فيا شي جوهري كل القصة انو المنبر ما عاد متل ما كان اما باقي الاقسام فهيي شغالة ويلي عم يتغير بس اهتمامات الاعضاء ونوعيتون مش اكتر الدم المتجدد شي حلو وجيل ال2006 غير جيل ال2007 وغير جيل ال2009 وهكذا طب الاسنان: ياسيدي هاد انا دارسة قبل سنتين ارشاد نفسي وبعدين عايدة بكلوريا وكان مجموعي 230 علامةفاهاد المجموع بوقتا كان يدخلني اي فرع بدي ياه وبما انو المجموعة الطبية بالبلد عنا احسن شي (متل ما بيقولو) فا بابا كان بدو صيدلة وماما طب بشري فانا مشان مازعلون سجلت طب اسنان:lol::lol::lol: المهنة انسانية كاي مهنة طبية يعني بيكون فيها احتكاك مباشر مع ناس بيعانو الم معين بمكان معين وانا واجبي ساعد بايقاف هالالم ولما هالالم بيزول السعادة بتغمر حياتي ماديا هالمهنة كتير مربحة:lol: شغلا كتير كسيب والمرضى متوفرين دايما لان كل مريض عندو 32 سن وخود بقا وكمان هي مهنة متعبة جدا جدا ومع الزمن ممكن تسبب مشاكل صحية للطبيب:sick: اما ليش المرضى بيكرهو طبيب الاسنان فلعدة اسباب اولا وجع الاسنان من اكثر الاوجاع ازعاجا وبتكون النوبة الالمية فظيعة جدا وطبعا الفم وحساسيتو وريحتو يلي بيكون بالغالب من نخر الاسنان كتير بيسبب ازعاج للناس وبيادي لكرهون للطبيب التخدير والمعالجة السنية كتير مزعجة بغالب الاحيان والمريض بينزعج من صوت جهاز الحفر يلي بنستخدمو لفتح السن المنخور وشو بدك كمان حاج:lol: |
اقتباس:
لانها بتجيب وجع راس اولا وبتصير مضطر ترضي كمية كبيرة منون وخاصة اذا كنت طيوب كتير وما بتحب تزعل حدا فهي مشكلة كتير كبيرة رفقاتي من اخوية يلي بيعرفوني شخصي بيعرفو ليش عم احكي هيك انا من الناس يلي جابتلا الرفقة الكتيرة وجع راس كتير كبير وللاسف كل اصدقائي يلي باخوية غاليين عليي ومش قادرة ابعد عن حدا منون وكلون الون معزة خاصة بقلبي:cry: بدي قلك شي خطير جدا:lol: اذا مو 100 بالمية بقلك 99 بالمية من رفقاتي هنن من الانترنت ومن اخوية حصرا اخوية مجتمع مصغر عن مجتمع الواقع يلي عايشينو وبالنسبة الي رفيق النت بس شوفو على ارض الواقع ما عاد رفيق افتراضي انما واقعي وطبعا متل ما بتشوف على ارض الواقع اصدقاء بيعرفو شو يعني صداقة واصدقاء مابيعرفو من الكلمة الا اللفظ تبعا بتلاقي بالانترنت هيك شي وبرجع بقلك اغلب اصدقائي الواقعيين هنن من اخوية رفقاتي الشباب من اخوية يلي بشوفون دايما وبحسون اقرب الناس الي هنن (ظل جيفار _ فسحة امل) لاني دايما معون ومشاريعي معون بحكم قربون من مكان سكني وطبعا في كتار كتار غيرون لما مقربين كتير بس هالشباب موجودة معون دايما البنات بحس اكتر بنت قريبة عليي من اخوية هيي (ريمي) رغم انو ماشفتا ولا مرة بس بحكيا دايما |
اقتباس:
البنفسج البنفسج لاحكيلك قصتي مع البنفسج هاد ياسيدي كان عمري اربع سنين مدري خمس سنين لما كنت العب بالارض يلي حد بيت ستي وكان بالارض في عشبة هيك ما كنت شايفتلا اي معنى واجيت بدي اقلع هالعشبة على اساس شو انا عم نضف الارض من الاعشاب الضارة اجت ستي من وراي وقالتلي لاه شو عم تساوي ليش عم تخربي الوردة قلتلا تاتا شبكي انو وردة هي مافي وردة قامت تاتا بعدت الاوراق عن بعضا واذا بوردة بنفسجية اللون رائعة الشكل تظهر لي من بين الاعشاب قطفت تاتا وردة وقالتلي شوفي ما احلاها وشمي ريحتا عليها ريحة بتاخد العقل قالتلي تاتا اوعى تظني بشي انو ضار قبل ما تتاكدي ومن بعدا صار همي الوحيد اعتني بهالوردة وامنع حدا يقرب عليها البنفسجة يلي عند ستي صغيرة كتير وبتضل متخباية متل الخجلانة بين الاوراق شكلا جميل جدا وريحتا فيك تشما مرة وحدة بس بس هالمرة كفيلة تاخدك لعالم تاني تماما هالوردة بحسا بتجمع تناقضات كتيرة متلي جميلة وخجولة ريحتا عذبة وما بتنشم الا مرة وحدة بس:lol: متواضعة رغم انها بفعلا كبيرة ومظهرا بيعطي شكل حزين متلي تماما بس مستعدة تزرع السعادة بقلب مين بيشوفا ويشم ريحتا متلي:p:p وهي صورة البنفسجة يلي انا بشبهها:oops:  بالنسبة للقسم يلي بحب اشرف عليه فهو قسم الصالون او السقيفة الصالون المواضيع يلي بتنطرح فيه ثقافية اجتماعية وكتير بحب هالنمط من المواضيع والسقيفة بحسا احلى قسم باخوية فيك تحكي يلي بدك ياه وفيه تعبر وتحكي وبحس يلي بيكتبو فيا على درجة عالية من الثقافة على عكس مايبدو:D |
لموش سؤال اخير ..
شو موقع الحب بحياتك ؟ |
اقتباس:
الحب باشكالو المتعددة محور حياتي يعني ما بدي قلك ما بعرف اكره ما انا متلي متل اي انسان جواتو الحب والكره بس لما بحب بعطي للاخر ويلي بحبو يستحيل ارجع اكرهو هيدا بالمنطلق العام الحب يلي حسب ما فهمت بتقصدو انت حب امرأة لرجل فانا ياصديقي كان صار عمري 25 سنة ما كنت اعرف شو هالحب وكنت الله وكيلك مرتاحة وعين الله عليي:p قمت حبيت:frown: :oops::oops: شو بدك بالحكي الحب عالم تاني:sosweet::sosweet::sosweet: بيغير حياتك وبيقلبها فوقاني تحتاني هلق علاقتي بالشب خلصت للاسف:cry: بس هاد ما بيعني اني بطلت حبو لكن حبو صار شي تاني ذكرى كتير حلوة وذكرى كتير رائعة ما بنساها بحياتي وخاصة انو كان حبي الاول ومني الو احلى وردة للانسان يلي حرك قلبي من جوا:sosweet::sosweet: وبس خلاص:lol: شكرا مثنى:D |
منرحب بلموشتنا
لموش شو هي الاخلاق الانسانية بالنسبة الك وشلون تشوفي اللي قدامك انسان او عضو من جماعة معينة قبل ما يكون انسان ؟ من تشوفي طفل من الطبقة المسحوقة ... تحبي تساعديه بشكل حقيقي لموش كيف تشوفي علاقتك مع الله ؟ و شلون تشوفي حالك مؤمنة فيه و شلون ممكن تنعكس علاقتك مع الرب على علاقتك مع البشر الاخرين ؟ علاقتك بالاهل .. علاقة مميزة ؟ - لو اجاكي فرصة دراسة برا ... تروحي ؟ و شو اكثر تخصص بالاسنان جذبك و بودك تكملي ماستر فيه هيك خلصنا مع الجزئين الاول و التاني :lol: |
اقتباس:
بالنسبة للسؤال الاول الاخلاق الانسانية بالنسبة الي هيي باختصار كل خلق خلفيتو خيرة وطيبة ومحبة ومتسامحة يعني كل خلق ممكن تكون نتيجتو خير على الاخرين فهو خلق انساني وبيندرج تحت هالعبارة كتير من الاشيا يلي بنصنفا انها مش اخلاقية مثال على هالحكي الكره يعني الكره خلق غير حميد بينما لما حدا منا بيعبر عن كرهو للعدو يلي احتل ارضو بيصير هالنمط من الكره خلق حميد وانساني حبي لوطني خلق كريم وحبي للعدو خيانة بالنهاية الاخلاق الانسانية تتبع طبيعة المجتمع ومافي تعريف ممكن يختصر هالكلمة المطاطة احيانا بتكون الاخلاق الانسانية مصلحتنا الشخصية ونحنا بنكيفها حسب ما بنشوف الصح يلي ممكن يكون غلط بنظر مجتمع تاني :D:D بالنسبة لسؤالك عن الشخص كيف بنظرلو فانا بنظر للشخص كانسان بيمتلك حق اني احترمو وحبو حتى يثبت العكس انا عندي اصدقاء يمكن ما تتوقع من اي مجتمع واي تفكير واي توجه سياسي او ديني وفي منون تكفيريين بيعتبرو فكري كافر وانا كافرة ومع هيك اصدقائي وفي منون خصوم سياسيين وخود على اتجاهات وتخبيص وكل واحد منون الو خصوصيتو ومكانتو بقلبي والاحترام المتبادل هو محور حياتنا وطبعا الخير وعدم الايذاء بالنسبة للسؤال التاني :الطفل من الطبقة المسحوقة:cry: التعامل مع هيدا النوع من الاطفال كتير صعب كتير بشوف بحياتي اليومية اطفال عم يبيعو علكة وجرايد ويمسحو بلور سيارات او عم يشحدو مصاري مساعدة حقيقية مابعرف كيف بدي قلك كيف فيني ساعدو مرة حكيت طفل بياع جرايد بالكراج وسالتو ليش مانك بالمدرسة كان جوابو انو بابا بدو ياني بيع وجيب قدر معين من المصاري واذا ما جبتون ما بيخليني اتعشى :cry::cry: وقفت متل المسطولة امام هيك وضع وهيك حالة وغيرها كتير كل يلي قدرت اعملو اني اشتري جريدة منو:cry: حاليا عم شوف مسلسل اسمو قلوب صغيرة بيتطرق لهيك مجتمع ولهالاطفال وعم تابع بشغف اسلوب الممثلة بالتعاطي مع هالاطفال وعم جرب اتعلم :lol: علاقتي بالله: مممممممممممممممممممممم والله علاقتي بالله علاقة مطاطة كتير احيانا بحس حالي بحبو كتير واحيانا بحس انو ما بدي اسمع فيه:lol: يمكن وصلت لنتيجة انو قمة الايمان هي الالحاد الله كما افكر فيه هو الخير المطلق المجرد من كل قشر يعتريه الله ليس دكتاتورا ليجعلني اخنع له واعبده بطرق العبادة المتبعة حاليا وليس ساديا ليجوعني لارضائه علاقتي بالله مجردة من كل دين وبعيدة عن كل معتقد انا اؤمن بقوة خفية تحرك العالم على هذا النحو ما بعرف ماهية هالقوة لكنني مؤمنة بوجودها وبقدر سمي هالقوة (الله) انا مش بحاجة لوطد علاقتي بالله باني اتوسط حدا لانبي ولارسول ولا كتاب ولا ولي انا روح من الله وهالروح قادرة تحكي ربا بكل اريحية وهيك مرتاحة كتير بعلاقتي معو وايماني بانو الله هو خير مطلق خلاني اتعامل مع كل الناس بخير مطلق ومحبة مطلقة علاقتي بالاهل:مممممممممممممم كعلاقة اي ابنه باهلا ايام رواق خالص وايام خناق خالص وايام هدنة هلق شوي انا غريبة الاطوار بالبيت ونظرتي للدين بتخلي بابا متزاور مني كتير بس مع هيك ولامرة حسسني انو رح يفرض عليي شي ولا مرة حد من حريتي انا بنت بتفتخر انو تملك حرية كبيرة بالحياة كيف ما بدي علاقتي بوالدي مميزة جدا جدا بحمل طباعو نفسا رغم اني نقيضو دينيا بس هاد الشي ما بياثر على ارتباطنا ببعض (هلق شوي اخد على خاطرو كوني الوحيدة بالبيت يلي موصايمة وبذكر انو ابن عمي الصغير سالو سؤال قلو عمو ليش لما ما بتصوم اتطلع فيي بابا هيك وقلو لابن عمي هي لما طبوش مافيا تقعد بلا مته:lol::lol::p) السؤال الاخير فرصة دراسة اكيد بروح ولو كانت بجزر المالديف (رغم اني مابحب الدرس كتير بمل بسرعة:lol:) بس اذا صرلي ما بقصر وبحب اتخصص طب اسنان اطفال بحب كتير التعامل مع الاطفال والحكي والتسالي معون:lol::lol: |
مرحبا لمى
بين طرطوس واللادقية وبانياس وين بتحسي جالك ؟ من كتر ما قالولك الاعضاء عمتي بلشتي تحسي حالك عمة؟ بتخافي من الفقر؟ اذا طلبت منك تقولي شي لفقراء سوريا شو بتقولي ؟ |
لمى بهالفقرة احد الاعضاء وجهلك اسئلة ما منقدر نقلك اسمه الا بعد ما تجاوبي وهو حر بطرح الاسئلة
اقتباس:
|
اقتباس:
مليون مرة صرت قايلتلك اسمي لـمــــــــــــــــا بالالف الطويلة:jakoush: المهم:lol: لنبلش اجابات بين طرطوس والادقية وبانياس اكيد بحس بحالي باللاذقية وبدون ادنى تفكير حياتي على مدى 7 سنين كانت فيا وهال7 السنين هيي اجمل فترات حياتي اللاذقية ساهمت كتير بيلي انا فيه حاليا كل شبر منا الو معي ذكرى كل تفصيل فيا عايشتو شوارعا اسواقا محلاتا كافيترياتا سكنا الجامعي الكليات والاماكن الطبيعية يلي فيا يعني شو بدي احكيلك لاحكيلك :cry::cry::cry: الاعضاء وعمتي والله ياصديقي هالكلمة بتحسسني اني كبيرة:lol::lol: ومع هيك بحبا كتير الاعضاء بينادوني فيا يمكن لاني اكبر من غالبيتون سنا وفعلا صرت حس حالي عمة مسؤلة عن الجميع ولازم كون باي مشكل بين اي عضوين باخوية:lol: بذكر من فترة ضيعنا السيد سامان باللادقية وعلى شوي رح انزل دور بالمشفيات وبالشرطة:pos: هالكلمة الها وقع كتير حلو بحياتي :lol::lol: بخاف من الفقر؟؟؟! مممممممممم انا اصلا مولودة في بيئة فقيرة يعني اهلي الحمد لله عايشين وكافيا الله كنا بمرحلة من حياتنا كتير بنعاني من الفقر بابا كان يخاف منو مشانا يعني كان يخاف انو يجي يوم ما يلاقي شي يطعمينا ياه ومن هون كان خوفو من الفقر بس الحمد لله طول ما نحنا قادرين نامن احتياجاتنا الضرورية فانا ما بعتبر اني فقيرة درست وتعلمت لجابه الفقر (المادي) وهلق حالتنا الحمد لله تمام وما بتخوف:lol: الفقر العقلي مرعب جدا وحجث ولاحرج هيدا اخطر من الفقر المادي واشد وطأة وبصراحة انا ولامرة خفت من الفقر المادي انما بخاف دايما من الفقر العقلي لهيك بحاول قدر الامكان انو ماحس اني فقيرة عقليا لفقراء سوريا شوبقول: عمرو ما كان الفقر المادي عيب العيب انو نقعد ونلطم ونبكي ونحنا قادرين نركد ونشتغل ونامن لقمة عيشنا هي العدالة الالهية يلي خلقت لناس بتمون ملعقة دهب وخلقت ناس عالشقى والتعتير والركض كل النهار مشان لقمة خبز وصحن زيت بس بيكفيكون شرف انكون عم تسعو للقمة عيشكون ومابقدر قلكون اكتر من هيك:D:D |
عمتو بدي منك تتركي تذكار للبرنامج بيعبر عنك
نورتي البرنامج |
الليلة عبق المطر من استوكهولم رح يفوح وينتشر للشام وبغداد وعمان
selavi مايسترو الليلة اهلا وسهلا فيك لسهرة من سهرات المايسترو الغنية |
مسا الخير ورد
ورد شو اللي عم يمشي بدمك ليطلع هالتالق بالخواطر الرائعة؟ يقال ان الالم هو مصدر كل ابداع هل بتحس بالم وشو هالالم يلي ممكن يفجر منك ابداعات كبيرة؟ |
 صورتك بالملف اليوم كنت عم تقلي انو اوقات الصورة بتعبر اكتر عن الكلمة ياترى شو يلي حابب تقوله هون ؟ |
خليني ابدا معك بفقرة الانا وهون منحكي عنك انت عن عالمك عن اهتماماتك
فكرت شي يوم ليش انت هون بالحياة؟ هل انت راضي عن وين انت اليوم؟ بتقول عن حالك بملفك الشخصي : اجول اعماق مفصلة لأفصلها بتعقيد لاي عمق بحياتك وصلت ؟ ولاي تعقيد بدك توصل وبرايك بتشوف الحياة بتعقيد افضل؟ |
 هاد الانسان شو موقعه بحياة ورد؟ |
| الساعة بإيدك هلق يا سيدي 10:03 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون