|
اقتباس:
100 الف لك يا شيخ ما بدك تجيب ولاد و تعترن بالعيشة لما اللهم اني أسألك نفسي. يعني ليش طموح الشب انو يتجوز شو هاد هدف الحياة التكاثر بس:shock: صفينا شو منفرق عن اي مخلوقات دنيا تانية:shock: اذا ما راحت هالأفكار ما رح نتطور بنوب شو تعريفنا للمستقبل نحن ؟ الزواج بس. |
اقتباس:
أستخدمت الزواج كبديل عن مصطلح الارتباط العاطفي يلي هو مهم بحياتنا كبشر لأن الارتباط العاطفي شوي صعب ببلدنا خارج إطار الزواج لهيك الشباب بيطمح الو ... في حين بغير بلاد الزواج مش مهم لكن العلاقات العاطفية والمساكنة موجودة ويلي هي بتشبه الزواج ببلادنا لكن الفرق هو الشرعية القانونية أو الدينية الإنسان كائن اجتماعي وبالتالي بحاجة لعلاقات اجتماعية وأيضاً عاطفية وعندو غريزة الحياة "الايروس" وهي متصلة بالحب ولاحظ بسلم الحاجات عند موسلو العلاقات الأسرية والحب والعاطفة والألفة الجنسية بتجي قبل أشيا كتيرة :D |
اقتباس:
دخلك في شي غير العاطفة دهورنا الحب ما بأمن بهالكلمة بنوب |
اقتباس:
العاطفة هي ما يميّز الكائن الحي عن الآلة, هي وراء الترجمة والاختراع والابداع بأنواعه; الي ما بيعرف يحب مابيعرف يعمل شي :D |
اقتباس:
مدري شو صاير للعالم بهالبقعة!! شو نكبتهن ما كنت أعرف!! متمسحين؟ مضروب ع قلبهن؟ منوّمين مغناطيسياً! الله بيعرف؟! بدك نحكي عن الظروف الحياتية الـ*ـرائية؟.. ما منخلص لبكرة وفينا نلاقي مبررات لكل شي.. بس إنو خلينا نشوف شعوب تانية حوالينا.. ما كانوا أحسن منا.. من كذا سنة بس بتعرفي الصين كيف كانت من خمسين سنة بس؟ كام مليون حشاش كان فيها (بعد حرب الأفيون اللي عملتها إنكلترا عليها) مثلاً.. اليابان كيف طلعت بعد الحرب؟ وقامت من تحت قنبلتين نوويات؟ شايفة صور هيروشيما وناغازاكي اليوم؟ طيب إلمانيا؟ اللي ما كان في بيت بـ برلين إلو سقف بعد الحرب!! الثورة الصناعية اللي بدأت باختراع المحرك البخاري نهاية القرن التمنطعش.. أخدت مع إنكلترا 130 سنة.. بينما صارت بإلمانيا خلال 44 سنة.. وبالصين خلال 34 سنة طيب كيف؟ ما كانت ظروفهن أحسن منا.. أبداً.. التخلف والفقر (ع صعيد جمعي مش فردي) مشربكين ببعض.. ما فينا نخلص من وحدة طالما التانية موجودة.. ونحنا مشغولين بس بالفقر.. بس ما رح نطلع منو إذا ما اشتغلنا ع التنتين سوى إذا بدنا نحكي ع صعيد فردي.. كتار طلعوا من الفقر.. بس ما طلعوا من التخلف.. من هيك.. وضعنا بيخجّل.. نعم وهيدي مش من نظرة فوقية للناس والشعب.. أبداً.. بس لازم نعرف إنو في توك فينا نحنا.. مدري شو هو.. وما نركن لـ "الزعما عم يستغلوا الشعب.. والشعب معتّر".. مش مزبوطة هاي بس إنو لحالها.. مش مزبوطة.. من كل بز في شي معها.. أكيد يمكن في إشارات عم تطلع من الأرض.. توصل ع مخو للزلمة.. ويعكف.. لازم نبحش بالأرض.. نشوف شو بدنا نعمل.. ودق.. بيفتحوا.. سعيدة يابا.. ودعوس.. :) |
اقتباس:
|
اقتباس:
بفكر بـ بكرا بالمستقبل .. بالواقع .. باليوم بشبابنا اللي عم يكش دبان و بيتصنف لـ 3 اصناف: 1- "مشكووووووووووووووووووررر رررررررر :D:D:D" 2- شعارات ما بيطبق منها شي.. او يأس و يلعن عيشتي (حطيتهم بخانة وحدة عمدا) 3- عم يحاول يغير ع قدو ما اختلفنا.. الناس دايما بتفكر بالاولويات بشكل اساسي ولكن.. هالشي ما بيعطينا الحق انو نوقف و نركن ع جنب لحتى يتحسن وضعي و يصير فيني اقرا كتاب! هلا .. نسبة اللي بتغير بالمجتمع.. قدي؟ كونو ما حدا بيسمع فيهم ما بينفي انهم موجودين.. ولكن ما بينفي ايضا انهم مش منتشرين بالقدر الكافي لحتى نقول انو.. اي في ناس عم تغير هاي النسبة .. طبيعي تكون موجودة.. نسبة ضئيلة لو ما كانت موجودة مصيبة كتير.. بس وجودها ما بيرمز للوضع المنيح.. و الفرص الكبيرة لمستقبل زاهر.. الكل لازم يكون ايد بايد.. و الكل لازم يقتنع بحالو اولا.. مشان يصير في تغير ملموس :D اقتباس:
هو الشي الاساسي اللي ما فيك تستغني عنو.. و تتخيل انو رح يطلع معك شي.. ان ما حبيت الناس حواليك.. ان ما بيت الاشياء الحواليك لو ما حبيت الشمس ... الربيع .. لو ما حبيت اهلك.. لو ما حبيت حبيبتك لك احنا بلا حب ما منسوى يا مخلوق :fhair: اقتباس:
ليش انت مين؟ لك اي اي .. انت الشعب و الشعب انت ! ازا بدنا نمشي لقدام.. ما بدنا نخجل من حالنا بدنا نتصالح مع حالنا.. نلملمها متل ما هي.. نشكل منها شي جديد.. و نكفي فيها للامام :D |
النظام التربوي بالدول العربيه متل ماحكت ساندرا نظام فااااشل وبجدااااارة
انا بعلم بمدرسه ولاحظت هاد الشي المناهج كلها مناهج تعتمد على التلقين والحفظ مافيا ايا مجال للتفكير والابداع كلو حشوبحشو والهدف بالنسبه للطالب النجاح ومن المعلم يدرس هالمنهج ويينهيه حسب المواعيد المحددة وبيتحاسب على هاد الشي وبس بس تخرجت كان عندي شغلات كتير براسي اعملها بس اصطدمت بالواقع المنهج بيربط الايدين انو مافي مجال منوب الحصة بتكون ساعه الاربع والدرس مليااااااان معلومات مطلوب تلقيها ع الطلبه ويحفظوها مافي مجال نهائيا تحكي غير معلومات الدرس مافي مجال تحاور الطلاب تناقشهن تسألهن عن رأيهن بالمعلومات يلي سمعوها انو احفظ وبس غير هيك لاحظت المناهج مرتبطه بالماضي بشكل غريب انو حلو الواحد يفتخر بأمجادو بس انو كل شي بتحكي العالم العربي الفلاني شو اخترع والعلتاني شو ساوى وانو نحنا العرب كان النا الريادة بالعلم الفلاني أي وبعدين؟؟هلأ شو؟؟ انو خلص اكتفينا بهاي الشغلات وخلص ماعد في داعي نعمل شي ولانخترع مافي داعي نشغل مخنا ونفكر؟؟؟ لك حتى لاحظت شغله غريبه الطالب يلي بيكون نبيه وذكي وبيسأل وبيستفسر وبيشغل مخو وبدو يفهم هاد طالب مو طبيعي وبتمارس عليه كل انواع القمع والعلاج لحتى يسكت وماعد يفتح تمو ومايحرج الانسه بالفصل بأسئلتو يلي بلا طعمي عم نقتل بايدينا ايا مخ بيحاول يفكر وازا صدف ومخ مانقتل وكبر وحكى بيتكمم تمو من النظام او بيهرب برا وبيخلص يعني مقتول مقتول كبير ولا صغير المناهج بتغذي ثقافة التطرف والعنف والارهاب وكره الاخرعند الصغار وهاد الشي لاحظتو بنفسي ماعم تعلمهن ثقافة التسامح ماعم تعلمهن يتعاملو مع الاخر كانسان بغض النظر عن دينو وملتو وفكرو بتربي فيهن التعامل مع الاخر بفوقيه وانو نحنا الافضل وهنن كفار وغلط ونحنا الصح عم يكبرو سطحيين انانيين اتكاليين. غير المناهج الانظمة عودت شعوبها على الطاعه والانقياد والخضوع والاستسلام خلت شعوبها ع الاغلب طبقات كادحة وفقيرة وربطتهن بقيود الخوف والضعف والجهل والفقر والمرض والأمية حتى يضلو يسفقوا للحاكم ويهتفو باسمو ويسبحو بحمدو طمعا في ايا شي بيرميه الحاكم إلهن من فتات الاكل والمصاري والدواء. انوعم نحكي ونحكي وبس مافي شي فعلي عم بيصير صحي في ناس عندها الاستعداد والحماس للتغيير للافضل بس هدول قله والامكانيات مابتسمحلهن بهاد التغيير لزلك منضل نحكي ونحكي وخلص تصبحو على خير!!!!! |
اقتباس:
ما بعرف ليش ردي طالع عندي نصو :lol:, يعني عم يطلع اول كام كلمة بس ,, و ما بعرف ان كان طالع نصو عند الكل كمان.. الاخوية عندها تحشيشاتها شو بدك بالحكي :gem: قمت قلت لحالي برجع بحطو استحياطيا :D |
و الله انا بلشت إقلق فعلا.. شي مقلق
مو المقال يلي مقلقني .. هالمشاركات يلي مقلقتني.. و انا على فكرة قلقتي صعبة يعني بيصير معي اشمخرار بالوريد الأفعر و مو سهلة هه على كل حال.. يلي أقلقني هوي ليش ما حدا جاب سيرة الدين. الكل عم يلف و يدور و يحاول يلاقي سبب مقنع بس بصراحة مافي سبب مقنع اكتر من الدين الانسان العربي ما بيقرأ و لما بيقرأ بيقرأ عن الدين.. حتى الروايات يلي بيقرأوها هيي روايات دينية. الشعب السوري بعمرو ما فتح كتاب برات المنهاج الدراسي بس فجأة بخاويش القلب صار كتاب شيفرة دافنشي "كتابهم المفضل".. على اساس الواحد منهم عندو خمسين كتاب على القائمة و هادا المتصدر حاليا لما الإنسان العربي بدو يرفّه عن نفسه.. كمان بيلتحق بمؤسسات دينية.. بيروح و بيجتمع و بيقضي اسابيع يمكن عم يخيم و يلعب و يسمع محاضرات بلا طعمة لا بتقدم و لا بتأخر (اذا كان مسيحي).. و يمكن بيختم القران خمس ست مرات و بيروح بيحج اذا كان مسلم.. يعني انا بطفولتي لما اهلي احتاروا فيني انو شو لازم يعمل هادا الصبي نشاطات.. بعتوني على الاخوية مشان نقعد نلوّن و نلعب طابة و نسمع حصة ديانة بايخة و بلا طعمة .. و يا ريت منستفيد منها شي حقيقي كلو كلام سطحي كل طاقات الإنسان العربي موجهة نحو الدين.. ان كان بشكل رسمي او بشكل غير رسمي هي حكينا فوق عن الغير رسمي.. يعني هي هواياتنا الشخصية بس في توجهات رسمية من قبل المؤسسات الدينية. في تيارات دينية بتغضب عليك و بتكفرك اذا انت بتضيع وقتك بقراءة كتب "تافهة" بدل ما تكون قاعد عم تقرأ قران و تسبح الخالق هالهجمة الدينية و التشبث المرعب بخرافات نبذتها كل الشعوب المتحضرة من اليابان لأميركا عم تسبب تحجر عقلي و تكلّس بواسير دماغي الدين عم يعمل الإنسان العربي انسان نقوز و عصبي ما بيتقبل اي كلمة.. هلق انا و عم احكي رأيي اكيد بكون أكلت خمسين مسبة. مع انو هادا رأيي الطبيعي و انا حر فيه و حر اتمسخر كيف ما بدي .. بس الإنسان العربي بسبب التكوينة الطائفية القبلية هوي انسان لا ديمقراطي بذات نفسه (و بيقولولنا بدنا ديمقراطية) انا لازم روح ضب الجاجات بالبراد (مطبوخين مو أحياء يرزقون).. بس بظن الفكرة واضحة بدنا شوية تفتيحة ذهن و flexibility ذهنية بينا و بين انفسنا اول شي.. (قبل ما نحكي على رعاع الشعب).. لنقدر نحنا نتقبل انو حدا ينتقد الدين تبعنا و المقدسات تبعوتنا.. و بعدين منقدر نحلم بشوية انفتاح ثقافي و ثورة علمية اما ثورة علمية هيك جاهزة للإخوة المؤمنين ترباية المؤسسات الدينية فهادا مستحيل ما عم نحكي على إزالة الدين بالغصب.. بس على الأقل يفك عن رقبة العالم شوي و يكون متل ما المفروض يكون.. مجرد رأي شخصي ما بيحمل اي قدسية معينة |
والله شي بيبكي
الحقيقة مرررررررررررررررررررررررة وصعبة |
والله انا اللي اتضاعف قلقي مدري كم مرة
اللي بدو يحط الحق على التخلف واللي يقول السبب الفقر واللي قال الحب هو السبب وهلق صار الدين كانو مافي حدا من دولة متخلفة او فقير او عاشق او متدين قدر يعمل شيء ابدا بس بما اننا عم نحاول نلاقي اعذار وشماعات لسباتنا رح ضيف عذر كمان المناهج الدراسية وجدول الزمن وطريقة التدريس لانو وقت كان يجي على بالي افتح شي كتاب اقراه ما كنت اتراجع وقل لا لازم اقرا قرآن واختم ختمة زيادة الا برمضان اما باقي السنة فكنت بستخسر الوقت اللي اقرا فيه جريدة ولما يشدني مقال بخبيه وقول اقراه بعدين وقول لا لازم اعمل ملخصات للدروس الطويلة اللي ما كانت تخلص ولازم ارجع اكتب اللي عالوراق اللي عطونا ياها على وراق جديدة وحط وراها جدول وبيانات واستنتاجات الاعمال التطبيقية اللي عملناها تقريبي بمحلول عمرو اكبر من عمري وماعاد في شي يدل عليه غير الاسم المكتوب من برا دوام من السبت للجمعة من ساعة 8 الصبح للساعة 18 المساء والاجازة اسبوع كل تلات اشهر ونص الاساتذة مختلين عقليا او اخلاقيا او ... والله ما كنا نلاقي وقت لناكل مضبوط ولا لنراجع كفاية كيف يخطرلنا نقرا او نترجم او بعيد الشر نبدع ومع هيك رايي ان اللي بيتميز بيبئة ابداعية وكل الظروف متوفرة لراحتو الجسدية والنفسية وعندو كل الوسائل متاحة قدامو ما بعتبرو مبدع المبدع عن جد بيشق الحجر ويطالع ابداعو منو المسالة مسالة ايمان بقدرة العقل وتحدي لكل الظروف :D |
اقتباس:
يبدو انو عنجد انو الموضوع صار كل واحد يحط فكر معين من غير ما نشوف الحل عم نتطرق للمشكلة بس يعني خدوني عا قد عقلاتي المصديين خليني احكي عا مستوى المنتديات السورية ولا العربية كا منتدى اللي بيروح و بيكتب موضوع طويل عريض عن موضة بناطرين علي بابا و اصولها الفكرية و النمطية ما بيقدر بنفس هالوقت اللي اخدو هالموضوع يسوي موضوع عن الطاقة او عن اي شي بيفيد هالخلق اينو احسن الواحد يتعمق بالفكر الفلسفي الديالكتي للمفكر الما بعرف شو اسمو و تداعيات النظرية الجدلية في الارهاص الفكري في منطقية المطابقة ولا شرح بسيط مفهوم لكل المبادئ و لو انو انا مو من محبي الفلسفة و التمنطق متل ما قال فولتيير بالزمانات علماء الميكانيك قدمو للبشرية اكتر من ما قدمه الفلاسفة و علماء المنطق و حكيي مو يعني انو انا من مناهضي الحركات التمنطقية او المشاركات بنمط فلسفي بحت. بس لكل شي حدودو اذا ما بلشنا بحالنا ما حدا رح يبلش فينا الا شيء واحد مبلش فينا و نازل متل المنشار عالطالعة بياكل و النازلة بياكل و هوي التخلف التخلف دبحنا دبح دمرنا على الصعيدين التخلف الفكري و التخلف بالتحليل الفكري كمان |
اقتباس:
يعني بربك واحد بيسمع بأنفلونزا الخنازير لما بربطها بحديث مدري من وين ناكشو و بيستنتج انو من علامات يوم القيامة شو بيكون هاد؟ انو دين بيقللك تحلل هالتحليلات الخنفشارية؟ مبدأ انو الدين اساس الحياة يمكن مبدأ فاشل احلى مبدأ هوي الدين لله و الأرض للجميع يعني الأرض ككل كل هالكوكب مو انو القطعة اللي منحددها بحدود و منسميها وطن نحن كبشر وطننا الارض اللي نحن فيها بس مو بس الدين سبب تخلفنا االأمويين و العباسيين كان حكمن اسلامي بس كان في تخلف شي ايامن؟ لا لأنو الدين كان عندن غير عنا يعني؟ الشي اللي بيحد اذا الدين هوي سبب للتخلف او للتقدم هيي طريقة فهمو و تطبيقو |
في برنامج بيطلع على قناة المشرق اسمو قصة مدينة..انا حضرت حلقات عن مدن متل بانياس يبرود وغيرها.. بكل الحلقات بيلتقو مع اشخاص مميزين بالمدينة بيحكو عن مدينتهون بحرقة وبحزن عميق.. والملفت بالبرنامج انو بكل المدن بيقارن أهل المدينة بين وضع المدينة قبل ال 1970 وبين وضعها هلأ .. وبيتفاجأ المتابع أنو وضع المدن السورية الثقافي كان أفضل بما لا يقاس مع وضعها الحالي... انا بتمكنى تسألو أهاليكون عن الوضع الثقافي والسياسي بسوريا وقت كانو هني شباب . . وترجعو تعيدو النظر بأسباب تخلفنا وعدم اهتمام جيلنا المترافق مع فقدان امل واندثار احلام لابعد الحدود..
|
اقتباس:
ليش لانو متل ما اتفضلت بانيين جدران وسدود لغوية بينهم وبين الشعبي البسيط باصرارهم على استعمال مصطلحات مشخفرة كمان متل ماقلت يعني لما حدا مننا يتغلب على كل شيء ويقرر يمسك كتاب او يقرا مقال بتجي نوبة شقيقة قبل مايخلص اول فقرة مع انو المضمون مابيحمل شيء خارق للعادة كأن الثقافة هي رصيد الانسان من الكلمات المستثقفة والمتفلسفة وماعاد الها علاقة بمقدار فهم وتقبل الفكرة وتحويلها لشيء عملي اتدكرت مقولة يستطيع اي احمق ان يجعل الامور تبدو اكثر تعقيدا لكننا نبحث عن العبقري الذي يجعلها اكتر بساطة :D |
اقتباس:
بس بحب ألفت أنتباه الأخوى من ناحيت الدين بشكل عام و ليسى تحديد دين معين الدين يحظى بأهمية أكبر مما يجب لأسباب عديدة منها هناك ملايين الأسئلة يطرحها الأنسان و لا يجد لها جواب يشفي فضوله ألا في الدين أي أن علماء الميتافيذيقيا أو ما وراء الطبيعة لم يجدو أجوبة مقنعة للأنسان البسيط المحدود التفكير ثانياً و أتحدث عن تجربتي الشخصية في الحياة عندما أرى رجل كان من كبار الملحدين في حياته و في أواخر حياته أراه يقضي جل أوقاته في العبادة و حتى في الأعتكاف في بيوت العبادة ليسى بالسر هناك عالم معروف في العالم العربي و كان من القياديين في الحزب الشيوعي الأن هو من كبار علماء الدين و هو عضو في منظمة الموأتمر الأسلامي منير شفيق - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و هذا رابط عن مؤلفاته و تعريف به من الموسوعة الحرة من هذه التجارب لشجصية مثل منير شفيق تعطي دفع لأي أنسان للأقتناع بالدين على أنه مجيب على أسألة لم يتمكن العلماء من الأجوبة عليها و ببساطة ثانياً الدور الأجتماعي يلعب الدين دوراً كبيراً به حتى أن الحكومات تعجز عن تلبية المطالب للشعوب في الدور الأجتماعي مثل المساعدات التي يحصل عليها الناس من الأغنياء و الدين يلعب دوراً كبيراً في دفع الأغنياء لمساعدة الفقراء ثالثاً و هذا شيئ مهم الدين يردع الأنسان من التشبث في الأنانية و لو لم يؤمن بأن هناك موت و أنتقال الى عالم أخر لتنصب له المحكمة العادلة لتابع في الطغيان و أستغل كل شيئ ليحصل على ماتهوى نفسه رابعاً هناك شعور لدى الأنسان أنه محتاج لمن يسمع أنينه و مهما سمع له الناس يبقى في سره هناك أشياء لا يجب أن يعرفها أحد و يحتاج أن يتحدث بها فيخلو الى نفسه و يناجي ربه بالغفران لما أرتكبه من أخطاء و هكذا الدين حاضر في كل مكان و في كل شيئ من حياتنا اليومية و للأسف غياب الدور للنخبة ألبس الدين كل شيئ و حمله مالا طاقة له به و لذا نجد كثير و الكثير من الأخوى يقحمون الدين في أشياء نهى عنها الدين و يمكن أن يتشعب الموضوع الى مالا نهاية في هذا الخصوص أقول أن النخبة من علماء الأمة لم يأخذو بزمام الأمور لكي تتطابق الحياة اليومية مع ما يراه الأنسان العادي في أي كتاب يريد أن يقراء به هناك فجوة كبيرة بين العلم و ما يعيشه الأنسان في واقعنا الحالي أنا ألوم النخبة من العلماء هذا دورهم بل حق الناس عليهم أن يعلموهم و يدفعو بهم الى الأمام لكي يواكبو عصرهم |
ابدا ومستحيل ان يكون الدين سبب التخلف
بل العكس تماما |
بشارك Joe وبشدّة كمان بالاستغراب من عدم ذكر الدين وهوي برأيي السبب الرئيسي والأهم لمشاكل العالم العربي. وبكل كلمة قلتها طبعاً.... (عملت اقتباس صغير لأنو حاسس رح اسرح)
أصلاً ردّك أجا بوقتو، صرلي اسبوع عم حاول دوّر على بعض المعلومات بالكووكل العربي و90 بالمية من النتائج هيي مواضيع دينية!! مع أنو الي بدي ياه مالو علاقة بالدين :jakoush: فرح فش خلقي شوي اقتباس:
رح اطلع شوي عن الموضوع: بهالأيام صاير متل حالة استنفار بالميديا الألمانيّة بسبب دراسة صدرت عن منظّمة خاصة بدعم المشاريع الانمائية والمنح إلخ .. طلع معون أنّو 20 بالمية من الشباب الي عمرون 15 سنة عندون مشاكل بالحساب والكتابة بشكل صحيح، يعني بالمختصر ضعيفين بالمدرسة، وهالشي (إذا ماتمّ تخفيض هالنسبة) رح يسبب خسارة للدولة من هون لـ 80 سنة مقدارها 2,8 بليون يورو! يعني تقريباً 3 وجنبها 12 صفر. مثال حلو لتوضيح شو هية الخامة الأساسيّة لأي دولة، وأنّو السبب الرئيسي يلي خلّا هيك دول توقف عرجليها وتتقدم، ويلي من دونو ممكن ترجع للحضيض، هوي طاقة الشعب وكيف ووين عم يوظف هالشعب أو هالجيل طاقتو؟ ببلداننا من يوم يوما هالطاقة عم تنهدر عالدين!! الدين متحكم بالمجتمع وبعقول الناس بشكل فظيع، كم هائل من الدوغما، وما حدا يقول فلان/أو أنا عم اشتغل عحالي، أو فلان متدين وبنفس الوقت بروفسور ومن هالحكي. التقدم لازمو طاقة معظم الشعب، وهون لازم الواحد يحط ببالو كل طبقات الشعب و كيف عايشين، مهما كانو: أغنياء، أو يلي راكضين ليأمنو بيت للزواج أو يلي يادوب عم يعيشو وشوفو مدى التأثير السلبي للدين. مافي حضارة بالعالم اتطورت فجأة، دائماً كان الانسان (وهي من طبيعتو) يسعى من نفسو للتطوّر. فحتّى هالصفة الطبيعية قضى عليها الدين! لما تشوف شخص استسلم لواقعو وبيقلّك (هالحياة فانية مابتستحق نشقى، أهم شي الحياة الآخرة) شو معناه هادا؟ يعني وجودو البيولوجي وميّزة التفكير يلي بيتميّز فيها بيتجاهلا لأنو فكرة الآخرى بتحسسو بالاطمئنان. "الأمر بالمعروف والنهي عن المنكر" بتنشاف من ناحيتين: بشكل عام كونها نص ديني مقدّس هوي جزء من العقيدة بحياة الانسان المؤمن بيعتمد عليها -بالإضافة لغير نصوص- بعلاقتو مع الله، بس كمان فيني شوف كيف ممكن تعكس سيطرة الدين عالإنسان العادي على أرض الواقع(متل كتير أمور إلاهية بتتاخد بشكل مطاطي)، أي ويمكن كان هادا السبب الي خلى طباعة الكتب تتأخر بوصولها للعالم العربي بعد 300 سنة من اكتشافها! لما السلطان التركي منع استخدام هالتقنية (ممكن تمس قدسية النصوص والكتب المقدسة؟! )، الله أعلم، ومتل ما بتعرفو الطباعة خلت العلم والمعرفة ينتشروا بسرعة ولمتناول أغلبية الناس. بس اتطمنوا، الشوام هرّبوا بعدين هالاختراع عالشام وطبعوا كتب وما سألو عن السلطان... الحكومات ("أدوات الامبريالية") هنّي يلي خلونا نوصل لهالمستوى؟! ما لما الدين بيرسم كل تفاصيل حياة الناس معناها في شي مشترك بيربط الناس مع بعضها، رابط قوي ضمن هالمجموعة، وهوي الدين، وهي نقطة ضعف بتستغلها الحكومات لتتحكم فينا، بتعرف بشو رح نتعلق ولشو بنلجأ ورح نكون رضيانين إذا أخدت منّا كل الاشياء الأخرى. وهالظاهرة مانا حديثة. برأيي كل العوامل سببها بشكل مباشر أو غير مباشر هوي طريقة ممارسة الدين. حتى باللغة هالتأثير واضح "بما أنو انذكرت اللغة بالموضوع". اللغة العربية يعني منذ القدم هيي لغة قويّة ومن زمان كان ألها مكانتها، بس القدسيّة أو الصفة المقدسّة يلي نالتها اللغة العربية خلقت بالعالم العربي ظاهرة وجود لغتين: الفصحى يلي ممنوع المساس بها، والعاميّة. اللهجات العامية "يلي بنستعملها أكتر شي" بكل الأحوال غير مؤهلة لمواكبة التطور العلمي، والفصحى ضلت غير مرنة (لليوم) بسبب قدسيتها، بس طبعاً معظم الناس بتتقنها حتى لو انسان أمّي بيفهم لغة دينو. طيب شي حلو جداً. بس كأنّو في خلل أو مشكلة مو؟ يعني لو أخدنا مثلاً زلمة بالخمسينيات ما معو غير شهادة ابتدائي وبنعطيه أي نصّ ديني، رح يفهمو لأنو كل يوم عم يقرا فيه. بس اعطيه أي مقالة "مابنقول علمية" خلينا نقول ثقافة عامّة أو إرشادات طبيّة أو شي كتاب غير روائي/أمور حياتية فرح يقرا فيه شوي ويزتو عجنب لأنو مابيفهم كلّ المعلومات ويرجع يقرا اللغة يلي بيفهمها. هون رجعنا للبداية، التطور بدو خامة شعبية مناسبة، مزبوط ماعم نطلب من هالزلمة الخمسيني أنّو يتثقف ليترجم كتاب أو يخترع طيارة، بس عالقليلة لما يكون في عنّا نوعاً ما أساس مناسب عند الاغلبيّة ممكن النخبة بيوم من الأيام تقدر تحرّك المجتمع شوي شوي بشكل فعلي. مو شرط النخبة، ممكن أي فتيلة تعمل عملتها لما يكون في نضوج عامّ. وعلى قولة ناصر "كتار طلعوا من الفقر بس ما طلعوا من التخلف".. فيعني بجد بستغرب كتير لما بتعتبرو أنّو مشكلتنا بسوريا هيي الناس مو فاضية بسبب صعوبات الحياة والحالة الاقتصادية. يعني ماعم نحكي عن مشكلة قبيلة بشي دولة فقيرة عم تموت من الجوع و بحيث إذا تأمنلها خدمة حياتية وحدة (مي / ماشية/ زراعة) رح ترجع لحياتها الطبيعية! عم نحكي عن بلد المفروض ما بتلاقي فيه عيلة يادوب عم تعيش لأنها قررت تتكون من 12 شخص خلال 10 سنين:frown: عن بلد الناس فيه تاركة الدنية وماسكة السما :pos: متل ماقال joe، أنا كمان مابحكي عن زوال الدين، عم بحكي عن أسلوب التديّن. |
| الساعة بإيدك هلق يا سيدي 12:24 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
ولا عم حسها حقائق بتخجل .. عم اتفهم 