|
مرحبا شباب
بالنسبة للنقطة التانية فهيي موجودة بس مو ع الحليب البودرة ولا ع القمح يعني يللي بيتم رميو بالبحر هوي الكاكاو و البن يللي بتنتجهون البرازيل و يللي طبق هالطريقة أول مرة هيي اول حكومة برازيلية اشتراكية لحتى ما يموت الفلاح البرازيلي من الجوع يعني متل مو شايفين اسعار الكاكاو من غير شي بالأرض، و الفكرة أنو بعد تطبيق مشاريع اصلاح زراعي بالبرازيل و جر مياه الأمازون ع مناطق زراعة الكاكاو صار في فائض ضخم من انتاج الكاكاو و فوق هالشي عم تجيهون سنين فيها كتير مطر و مناخ ملائم للكاكاو قام ما عاد في أسواق لتصريف الانتاج (باعتبار انو الكاكاو مادة كمالية اكتر من غيرها) فهنين اضطروا يكبوا الكاكاو لأنو هيك هيك رح ينتزع اذا ضل عندون، فأحسن ما يدفعوا مصاريف تخزين صاروا يكبوا الكاكاو بالبحر انا معك انو في كتير ناس جوعانة بس عندون بالبرازيل كمان في كتير ناس جوعانة يعني الموضوع بي الجوعانيين و مادخل النظم الاقتصادية بالقصة كلها اقتباس:
يعني فعلا الموضوع متل موضوع البيضة و الجاجة تبعك، بس الاقتصاديين اتفقوا ع اصطلاح انو الاقتصاد هوي القاعدة و السياسة هي القمة يعني اتأكد انو 90% من سياسات بوش مثلا سببها اقتصادي و 10% فقط اخلاقي و اجتماعي و انتقامي و وقائي و ... الخ و بالغرب كل ما يقولوا كلمة "لندن" بيلحقوها بـ"حيث التجارة سياسة، والسياسة تجارة" و دمتم :D |
مرحبا مان
صح معك حق و الله الأدق أن أقول ان السياسة تتحكم بالقرارت الإقتصادية و ليس بكل النظام الإقتصادي... يعني هناك نظام اقتصادي عام للدولة و لكن أحداث السياسة اليومية و الانتخابات تؤثر على مدى تطبيق هذه القرارات بس فعلا متل قصة الجاجة و البيضة... بس مين الطاجة قولك هون؟ :confo: |
العولمة شيء جيد :frown:
الغزو الثقافي ( من الناحية السلبية للكلمة) ليس غزوا :confo: ما بحس توازن قوى العالم غير واقعي...... فيها نوع من اليأس من الواقع اصلاح سوريا وبناءا هدف كل مواطن سوري على ما اظن والايام قادمة والتغير قادم :hart: :hart: جيفارا :hart: :hart: |
اقتباس:
:gem: :gem: :gem: |
اسفة شباب عم رد ع فكرة قديمة بالوقت يلي صرتو انتو سابقيني باشواط ودخلتو بمواضيع كبيرة اكبر رجال السياسة و الاقتصاد ورجال القانون الدولي بيحكوا فيها وبالفو كتب ورغ هيك بكونو مش مقنعين انفسهم ولا مقنعين غيرهم وهون بقصد موضوع مين بيتحكم بمين الاقتصاد ولا السياسة ولا التكنولو جيا و سرعة تطورها يلي عم تخلق نمط جديد بالحياة ... المهم انو الفكرة يلي حكى عناHashtansht مش المهم شو الفكرة والعقيدة يلي بنؤمن فيها بكفي انو نكون انسانيين بمعنى الانسانية لحتى نرفض الظلم باي مكان بالعالم
جو سمعان غنية زياد الرحباني يلي بقول فيها(شو هالايام الي وصلنلا قال انو غني عم يعطي فقير كنو المصاري قشطت لحالا!!!! ع هيد نتفة وهيدا كتير!!!! ويلعن ابو الراسمالية ع ابو الملك حسين (عجبتني هاي) :sosweet: :gem: :gem: :gem: هييييييييييييي يلعن ابون كلن :hart: :hart: جيفارا :hart: :hart: |
مرحبا غيفارا
معك حق انوالمواضيع كبيرة بس هاد دليل اهتمامنا بالموضوع و انو نحنا مو آخدينو مسخرة يعني بدل ما تقولي لـjoe يعطيك العافية؟ فوق ما تعب لترجم الموضوع و شرحو؟ كان ببساطة فينو يحط اللينك و يقلنا يللي بدو يفهم شو صاير يدخل بعدين كل التجارب الاشتراكية بينت انسانية واضحة متل عين الشمس ..... و خصوصا بكوبا و كوريا الشمالية و الاتحاد السوفييتي و بولندا و بورما و الخمير الحمر و لعلمك الدول الرأسمالية هيي اكتر الدول انسانية (حتى للحيوان) و بعدا عن الظلم (بالنسبة لمواطنيها) اليوم يللي بدافع عن العولمة هيي الدول الفقيرة ويللي عم يقوم بمظاهرات ضد العولمة هنين مواطنين من دول رأسمالية، و الدليل المظاهرات يللي صارت بفانكوفر و سيدني و هانوفر و ....... بعد اجتماعات "منظمة التجارة العالمية" |
اقتباس:
الرأسمالية تعني اسمها , رأسمال , قيمتك تقدر بما تمللك , أو بما أنت قادر على الامتلاك... العدالة الاجتماعية في المجتمعات الرأسمالية معدومة أو شبه معدومة, و أنا هنا لاأتكلم عن غنى و فقر , اتكلم عن حقوق اساسية .... ضمان صحي مثلا تعليم مجاني بدون استغلال ( و أقصد بدون استغلال اسلوب المنح في الولايات المتحدة).... رأيي المتواضع أننا نظلم كوبا و بشدة.... كوبا أفضل من طبق الاشتراكية في العالم, و اتحدث عن الاشتراكية كنظام اجتماعي, اذا تركنا الحريات جانبا ( أعلم أنها جزء أساسي .... لكنني اتكلم الآن عن النظام الاجتماعي) لو قارننا كوبا بدولها المجاورة ( هايتي, جامايكا, بورتوريكو...) و أخص بالذكر آخر دولتين لأنهما دول ذوات ارتباط بالولايات المتحدة, لوجدنا أن وضع كوبا ممتاز , بل ممتاز جدا. كوبا ذات موارد اقتصادية ضعيفة جدا .... ومع ذلك تتمكن من العيش بكرامة نوعا ما رغم الحصار الحديدي الذي تفرضه الولايات المتحدة منذ أكثر من 40 عاما ( قانون جيمس بارلتون) .... في كوبا قد لا يعيش الناس برخاء.... لكن لا أحد يموت من الجوع في كوبا نظام ضمان صحي ممتاز جدا , حسب تقديرات منظمة الصحة العالمية فان نسبة الوفيات بين المواليد أقل بكثير من الولايات المتحدة, و تقترب جدا من نسب الدول الاسكندنافية !!! في كوبا التعليم مجاني , حتى التعليم الجامعي , و بجودة عالية جدا ( حلم أي طالب طب بشري في اسبانيا هو أن يكمل اختصاصه بكوبا ...) في كوبا رقي ثقافي رائع جدا , أدب , موسيقى , فنون .... حتى في مجال الرياضة ( قارن عدد ميداليات كوبا بأي دورة ألعاب أولمبية بدول أخرى بمثل عدد سكانها !!! تبقى النقطة السوداء في صفحة كوبا هي مسألة الحريات العامة , لكنها بلا شك أفضل حالا من أي دولة عربية................ تحياتي |
شكرا يا جيفارا على غنية زياد الرحباني... انا هلأ صابتني صحوة بالضمير و قررت انضم للحزب الشيوعي و اقتنعت انو الأيام قادمة بعد ما كنت مفكر انو الزمن رح يوقف :roll:
صديقي ياس كلمة رأس مال لا تعني المال أبدا و صدق أو لا تصدق و لكن المال ليس جزءا من رأس المال أبدا :!: رأس المال (Capital) هو الأجهزة و الأدوات و المصانع و الأرض.. و هناك ال human capital و هي القدرات البشرية... يعني مستوى تعليم الفرد و مدى كفائته المهنية و شطارته و المجتمع الرأسمالي يعامل الناس لا حسب ما لديهم من نقود في البنك, فهذه معلومة لا يمكنهم ان يعرفوها بدون علم الشخص.. و لكن حسب كفائته المهنية و مدى انتاجه. من هذه الناحية يكون الإنسان الأمريكي له رأس مال بشري أكثر من الإنسان الماليزي... فالإنسان الماليزي غير قادر على العمل مع الأجهزة المتطورة لأنها تحتاج دراسة و تدريب مهني غير متوفر لديه في كثير من الأحيان و لكن هذا لا يعني ان الإنسان الأمريكي أهم أو أثمن من الماليزي... لا يوجد هكذا معايير سوى عن الفاشية و القوميات المتطرفة... و لحسن الحظ ان أميركا كانت من قضى على هذه الفاشيات و خلص البشرية منها الرأسمالية لا تقدر الإنسان بقدر ما يملك... بل بقدر ما هو... هل هناك اعتراض على هذه الطريقة؟؟ عدالة اجتماعية معدومة او شبه معدومة؟؟؟ ماذا حصل حتى تقول هذا؟؟ كيف يعني هل يأتي ابن مسؤول أمريكي و يضرب مواطن أمريكي بدون سبب؟ هذا اسمه نقص في العدالة الإجتماعية و هذا لا يحدث في الغرب بل فقط في الأنظمة القديمة و العربية العدالة الإجتماعية ليس لها علاقة بالضمان الصحي! الضمان الصحي مطلب للجميع و لكن لا يوجد شيء مجاني في النهاية... تريد ضمان صحي؟ ادفع ضريبة... او تخلى عن حرياتك السياسية ... صدقني لا يوجد شيء بالمجان ابدا... شيء مقابل شيء... انا أفضل أن أعيش بحرية ثم كيف يعني تعليم مجاني بدون استغلال؟ هل تقوم أميركا بتشغيل طلاب المدارس العامة بالسخرة مثلا؟ الرجاء التوضيح؟؟؟ هل المنحة الدراسية استغلال ام تحفيز؟؟ |
اقتباس:
و أكيد أكيد هي الدول هيي يللي اخترعت الضمان الاجتماعي و التعليم بهي الدول كمان مجاني و الصحة عندون مجانية (ما عدا اميركا) و حتى بأميركا اذا صار معك مرض عضال (متل السرطان) و حتى لو ما كنت اميركي بتتعالج ع حساب الدولة انا بشتغل بالبورصة و أهم المؤشرات الاقتصادية يللي بتأثر ع اسعار الأسهم هيي تعويضات البطالة و بالفترة الأخيرة كان الصراع بين الاحتياكي الفدرالي الاميركي (البنك المركزي تبعون) و بين الكونغرس حول تغطية العجز الاميركي بالتعويضات الاجتماعية لأنها عبارة عن كتلة رهيبة من الاموال المدخرة الغير مستثمرة(هي الخناقة تبع الـnational security ) رح أشرحلك الموضوع شوي: اي دولة لما يصير في عندها عجز موازنة بتدين من دول تانية لتغطية العجز (و من جملة هالدول أميركا) طبعا بفوائد (أذون خزينة) آلان غرينسبان (رئيس الاحتياطي الفدرالي) اقترح انو بدل ما يتم تغطية العجز عن طريق الاستدانة الخارجية انو يستفيدوا من الاموال المجمدة كتأمينات اجتماعية بتغطية العجز و بالتالي الفائدة ما بتروح لبرا ...... بينما دول متل جامايكا و بورتوريكو و حتى الامارات والسعودية هي دول "نامية" وليست رأسمالية (نامية يعني يا أما بدها تصير رأسمالية يا أما اشتراكية) الفرق بين الغني و الفقير بالدول الرأسمالية يكاد لا يلاحظ (طبعا في فرق بنمط الحياة بس مقارنة بغير دول صغير كتير) قصدي انو كل شي فينو يعملو الغني بحياتو بالدول الرأسمالية فينو يعملو الفقير و كذلك الأمر بين المسؤول و المواطن العادي المشكلة أنو مع أول أزمة اقتصادية بالنظام الشيوعي انهار النظام بكل اركانو (سياسيا و اجتماعيا و اقتصاديا وعسكريا و .... ) اما النظام الرأسمالي على الرغم من تعرضو لكل الأزمات السابقة إلا انو ما زال موجود و حاليا هوي عم يعاني من أزمة خانقة بس الموضوع موضوع وقت لحتى يتعالج بعدين الحلو بهالنظام انو انهيار الجزء الاقتصادي ما بيعني ابدا انهيار باقي الأجزاء و انهيار الجزء السياسي قد يكون دعامة للجزء الاقتصادي او العسكري و الشي الحلو كمان الضمانات يللي بيقدمها النظام الرأسمالي ضد الوصول لمرحلة الامبريالية متل أزمة "بيبي بيل" تبع التلفونات و "مايكروسوفت" :D |
شكرا krimbow
:D |
اقتباس:
المنحة الدراسية الجامعية في الولايات المتحدة استغلال ............. وهالكلام موجايبو من عندي , حكي زملاءي الامريكان هون . الاقساط الجامعية بالجامعات الاميريكية عالية جداااا ........ في نظام منح للرياضيين وكذا , بس خلينا واقعيين , اذا شب من الطبقة الوسطى بأمريكا بدو يدرس طب مثلا.... القسط بأرخص جامعة لا يقل عن 25000 دولار سنويا............ اي بحياتو ما بيحلم يدرس اللي بيصير أنو بس هالشب يخلص ثانوي يجيه ضابط عالبيت, هيك زيارة...يعرض عليه الخدمة لمدة كذا سنة, و الجيش بيدفعلو الجامعة الفلانية, فرضا 3 سنين بندفعلك الجامعة الفلانية , خمس سنين بندفعلك جامعة أحسن...................و هيك !!! هاد شو اسمو؟؟ و انت لاحظ اعمار أغلب الجنود في العراق :wink: |
اقتباس:
Joe الله يخليك شو هالحكي؟؟؟ يا شيخ انا عايش بدولة رأسمالية و بعرف شو عم بحكي........... اي لو عندك مليون شهادة صعب جدا تتقدم..........اذا ما عندك "بابا" مليونير يا أما تدبر راسك بطرق أخرى ملتوية عم بحكي كطبيعة و أسلوب و سوية حياة , اتركلي آلان غرينسبان ع طرف هلق |
ع فكرة الكلام التاني ل krimbow ... :wink:
هلأ عندي مقابلة شغل مهمة دعولنا شباب... بس ارجع منكمل |
اقتباس:
المشكلة انو حتى بالنظام الاشتراكي ما دخل الشهادات بالارتقاء لا المادي و لا الاجتماعي نحنا بسوريا انفطمنا ع الاشتراكية مشان هيك منحبها.... بس الواقع المر انو الاشتراكية فشلت فشل ذريع (نتيجة ميل الانسان لعدم تحمل المسؤولية و طمعو الغريزي) هلأ نظام السوق نظام وحشي و اقرب لشريعة الغاب مزبوط، و انا كمان بفضل النظرية الاشتراكية، بس لازم نفتح عيوننا ع الواقع النظام الرأسمالي قام بكذا ثورة (تكنولوجية و اتصالات و مواصلات و بنوك و ....) و قدر يتغلب ع النظام الاشتراكي يللي بقي جامد غير قادر على مواكب تطور منافسه طالما بيعتمد النظام الاشتراكي على المركزية ما رح يقدر يلحق النظام الرأسمالي :D |
اقتباس:
فشل هذه التجارب لا يعني أن الرأسمالية ناجحة , و لا أتكلم عن نبوك و شركات , أتكلم على مستوى الأفراد , على مستوى الطبقة الوسطى فما دون ........... و بالنسبة للهجرة الى اميركا من كوبا .... فياصديقي هذا أمر حتمي , المال موجود في أمريكا , كوبا دولة فقيرة جدا بالموارد الطبيعية ( قصب سكر , تبغ , سياحة ... ) لكن رغم فقرها و الحصار المفروض عليها تستطيع أن تحافظ على حد أدنى لمستوى العيش , في كوبا لا أحد يمتلك بيتا كملكية شخصية , لكن لا أحد ينام في العراء أو تحت جسر مثلا.... في كوبا مهما كان الانسان فقيرا فانه يملك ضمانا صحيا جيد جدا مقارنة بالصحة العامة السورية... في اميركا شخص لا يملك الموارد المادية الكافية ليس لديه أي طريقة للعلاج لأن شركات الضمان الصحي هي عبارة عن شركات خاصة تؤمن معالجة طبية لقاء أقساط شهرية أو سنوية |
اقتباس:
وبالنسبة لجو خليني اوضحلك نقطة الظاهر انت ما فهمتها علي بغنية زياد الرحباني ......... زياد بهالغنية ما بيدعي حدا ليكون انساني ولا بقولو فتح عينيك وخلي ضميرك صاحي بالغنية في مقطع لو انت سامع الغنية كنت فهمت علي الي بقصدو بقول فيه(بقولوا من عرق جبينو طلع مصاري هالانسان لكان كيف هيدا وكيف ملاينو ولا مرة شايفينو عرقان) هاي نقطة بالنسبة للي بقول انو الانسانية انوجدت بالدول الراسمالية اسمحلي يعني اذا هاي الانسانية بنظرك فنحنا اشبعنا منها لانا شفنها بالعراق وفلسطين وافغانستان ومن قبل بفيتنام اولا خليني قلك ان الانسانية مفهوم ملك لشعوب الارض كلها وموجودة بكل انسان لكن النزعة الفرديةيلي بغذيها النظام الراسمالي والي هدفو الربح وتعظيم الربح فقط بخلي هالناحية تتوارى مع مرور الزمن وبالنسبة للمظاهرات الي طلعت باوروبا وخصوصا بريطانيا وايطاليا بتحدك ارجع للمواقع والصور وشوف مين الي طلع بالمظاهرات اعلام مين انرفعت وصور مين الاشتراكية لم تطبق كما يجب نعم سقط النظام باركانو الاقتصادي والسياسي لكن ىالفكرة مازالت موجودة وهي قابلة للتطوير مع الزمن ........... :hart: :hart: جيفارا :hart: :hart: |
اقتباس:
مان مستحيل تقنعني انو دولة بتقدر تقدم كل شيء ببلاش بدون مقابل... ما في شي مجاني مان في عندك طريقتين الدولة فيها تصرف مصاري على الشعب ببرامجها الخيرية و الإجتماعية و المجانية -تصادر الحريات العامة و الملكية الخاصة و تصير هي مالكة كل شيء بالبلد و تسطير على كل التجارات و و و - تبلش تطبع مصاري من البنك المركزي بجنون و بعد سنة بصير عندك تضخم اسعار بنسبة فوق الخمسين بالمية بالشهر ما في حل تالت الشغلة مانا سحر شريك معروف تماما كيف الإقتصاد بيمشي... يا بتخسر ملكيتك الخاصة و أي فرصة انك تصير غني و تستفيد من قدراتك الحقيقة و مهارتك و ذكائك... او استعد لمواجهة تقلب الأسعار و خربان البلد اقتصاديا (روسيا) بينما الحكام المسيطرين على كل موراد الدولة مبسطوين و لابسين فرو بالقصور صح في برامج بتدخل فيها على الجيش و الجيش بيتولى تعليمك حتى بكندا و كندا نص اشتراكية بس كمان في نظام المنح الدراسية للشاطرين... و الطالب الشاطر فعلا فعلا بتكون علاماته عالية و بيتقاتلوا عليه جامعات الطب بأميركا و يمكن يدرس ببلاش... مشان هيك ما يصير دكتور بأميركا إلا أحسن و أشطر ناس ما في عندك توزيع مقاعد طلابية للجميع هيك على العميانة... من وين لكن بيجي الإنتاج و الإبداع... من الإختصاص... لما الدولة تكون عرفانة تستغل الموارد البشرية بأفضل طريقة... مو تعامل الكل متل بعض... الجحش الما دارس كلمة بحياتو و العبقري ثم بأميركا كمان في نظام ال college و هادا بيدخله الطالب لمدة 4 سنين بدل الجامعة و بعدين بيدخل على الجامعة.. لانو أرخص بكتير و نفس الشي سلامات |
انا كأنسان عايش بروسيا التقيت مع كتير ناس كانو عايشين على ايام الاتحاد السوفيتي و راح اقارنلكون ببعض الامور يلي كانت و كبف حاليا
1-لكل مواطن الحق بالتعليم الكامل المجاني +راتب شهري لكل طالب حاليا الدولة بتتبنا عدد من الطلاب فقط بحدود 50% اما الباقي فمشكلتون مع 2-لكل مواطن بيت مجاني عند الزواج حاليا لأ 3-الرواتب كانت قليلة و لكن كل مستلزمات الحياة كانت موفرة بالمجان طعام شراب.... حاليا الرواتب اعلى و لكنها قليلة نسبيا(الكلام على طبقةالعمال من المجتمع) مقابل ترفيهات الحياة المتعددة(موضة ماكدونالدز....) 4-نسبة الفقراء (عمليا بدون ماوىاو طعام) شبه معدومة اما الان يوجد العديد الذين ينامون في الشارع والذين لديهم عمل بسيط فانهوم يعيشون على الخبز والماء 5-وسائل النقل كانت مجانية لكبار السن و مخفضة جدا للطلاب الان لأ 6-لكل مواطن لديه عمل تؤمنه الدولة هالان دبر راسك 7-الناحية العسكرية والانتاج العسكري كان متفوقا الان توجد مخططات للاسلحة ولكن لا توجد نقود 8-الاتحاد السوفتي كان يطعم ثلث العالم الان ماعم يطعمي حالو 9-ما كان عندون جينز ولا مسيقا راب او روك كان عندون سيمفونيات الان بالعكس وفي كتير شغلات بتبين الفرق بين الوضعين مع انوالحكم لحد الان متائثر بالنظام الاشتراكي و لو قليلا (من ناحية الدراسة) اقتباس:
و على فكرة يا شباب انا اؤمن بالديكتاتورية لأنو فيا قامت حضارات عظيمة (هادا راي خاص) |
| الساعة بإيدك هلق يا سيدي 10:37 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون