|
هذه وصيتي
مرحبا شبيبة
بيجوز هاليومين يعزموني جماعة صحابي (هنن مو كتير صحابي ... بالحقيقة انا ما بعرفهم و هنن ما بيعرفوني غير من التقارير يللي الله يكسر ايدين يللي عم يكتبها) على سينما بيت خالتي احضر هنيك فيلم "نجوم الضهر" المشهور (بالالوان) بتعرفوها للسينما ما هيك ؟؟؟ سابع قبو بعد جهنم الحمرا .. فرع فلسطين لهلأ ما بعرف شو هيي التهمة ... بس بيقولوا انو محضرينلي يا ها من قبل ما اخلق مشان هيك ... قررنا مع ادارة اخوية انو نتخذ بعض الاجراءات الاحترازية في حال ضبوني الشباب ببيت خالتي و اللي ما بيحسب ما بيسلم باعتبار انو انا مراقب المنبر الحر، و مشرف اداري... قررت الادارة انو ازا صار ما صار ... ينحذف حسابي من منصة المشرفين يعني ازا صار ما صار ... رح يكون في مراقبين جداد ع المنبر و بتمنى من ياس انو يوافق على استلام المنبر هلأ لحتى كون منصف ... في شبين مخضرمين (رفضوا ذكر اسماءهم) واصل البل لدقنهم قبل ما يوصللي و في شبين قدما كتير كانوا بيناتنا من زمان و تركونا هدول مشي حالهم بلش الفيلم تبعهم يوم الخميس الماضي بس ما فيي احكي اكتر لأنو لسا مو مبين شي و انشالله هاليومين بيتوضح كل شي و انشالله خير هلأ وصيتي الكم (تقرأ في حال تعبّينا) للملحدين... يا ملحدين يا كفرة يللي ما تعرفوش ربنا اذكرونا بالخير كل ما تسمعوا فيروز و مارسيل خليفة للمؤمنين... ادعولنا شباب و صبايا ادعولنا الله يشيل عنا و عنكم و عن حبابكم ادعولنا الله يتوه طريقهم و ما يعرفولنا طريق لجماعة المعارضة عباية يا شباب عباية و خصوصي بنوتة عيونا زرقا ... خراس و سد بوزك هالكام يوم، الشغلة مو عنترة ... لازم حدا يضل برا مشان يتابع الاخبار لجماعة الموالاة لك نيالكم ما اهنا بالكم للمشرفين: انتوا احلى عيلة ممكن حدا يتعرف عليها خليكم ايد وحدة متل ما بعرفكم للحكيم: لا تواخزنا خيو ... وجعنالك راسك شكرا جزيلا على مساحة الحرية يللي وفرتها للشباب و الصبايا و سامحني على اخطائي و ازا خيبت املك لك دخيل رب سوريا ما احلاها amarta و دمتم للحرية :7asheesh: |
مع اني مافهمت شيء من الموضوع وكله ألغاز
بس الله يووفقك وين ماتروح صح اني اكرهك وانت تكرهني والكره متبادل فإذا لم اكره لماذا لاتكرهني وإذا كرهت تكرهني ههههههههه امزح بس والله بتصير لك وحشه والخناقه معك بتصير لها وحشه يعني صح انك قاعدلي بالمنتدى بس وناسه المهم والزبده لاتطول الغيبه ترا فيه خناقه جديده وانت المخصص فيها :> هههههههههههههههههههههه بالتوفيق انشاء الله |
:shock: :shock: :shock: :shock:
عم تحكي جد؟؟ لعمى والله ما بعرف شو بدي احكي خسارة فكرت الوضع بالفعل عم يتحسن:pos: :pos: كريمبو :cry: روح الله يوفقك انشالله بتنقص ايد كل واحد بمدها عليك وبينقطع لسان كل واحد بيحكي معك كلمة مو منيحة ما بعرف شو بدي احكي بس بالفعل انزعجت من هالخبرية الشي والوحيد اللي بدو قولو تفه على هيك حكومة وتفيه على هالزمن اللي صار فيه الواحد بيتعاقب لما يقول الحق |
توي افهم الموضوع
وأنا آسف جداً جداً جداً جداً على أخذي بالموضوع مزح طبعاً ماهو كله بس حبيت اني الطف الجو وأكرر أسفي مره ثانيه والله يوفقك وهذي كلمه حطها حلق بأذانك ( الحق مايضيع ) ودام الحق معك راح تآخذ حقك عن قريب أو عن بعيد الله يوفقك ويساعدك بمحنتك بتمنى لك كل خير وترجع لنا سالم غانم وأتمنى إذا كنت زعلان مني تسامحني :(:( دمت بكل ود وإحترام |
اقتباس:
اقتباس:
والله يا غالي مو هاممني غير شغلتين (طبعا بعد اهلي و الشغل) يعني مو هاممني الكرسي الاماني و لا الكبل الرباعي و لا الدولاب و لا شي من هدول مو هاممني غير الخازوق ... كل شي الا الخازوق (انشالله يكونوا بطلوا يستعملوه) و الشغلة التانية انو التنين يللي ممكن اتعبا معهم غلاااااااظ لك اغلظ من ابو انمار:p اقتباس:
و انا بوكرا رح اتصل مع كم واحد من رفقاتي ايام الدراسة (خوش انا دارس بمدرسة خاصة كان فيها كم ابن ضابط منهم واحد تخين كتير ... تاني اتخن واحد عنا) و بحجة اني عم عايدهم بحكيلهم القصة و منشوف شو بيصير و شكرا الك |
الاخ ///
عادي حبيبي ولا يهمك هوي هيك مواضيع بدها شوية الغاز و تأكد انو ما في ضغينة بيناتنا |
اقتباس:
يلعن دين عالبلد اللي ما عاد تنسكن انشالله بتنحل الله يكون معك اخرتهون عسيرة يعدمني حسون والله معو حق :( |
رجاءا الاعضاء يللي ساكنين جوات موزمبيق لا يعلقوا ع الموضوع
الحذر واجب |
له له !! والله زعلتني :cry: :cry:
انشالله يااااااااا رب يا كريم ما بيصير معك شي .. انشالله ما بيلاقولك لا تهمة ولا بطيخ ...وانشالله بتنقطع ايديهم ولساناتهم للي كانوا السبب .... وانشالله بترجعلنا سالم باذن الله ( جسديا ونفسيا ) :pos: امانة الله .. ابقى طمّنا عليك .. لا تخلينا نقلق كتيير :tears: ... والله المنبر بدونك ما حلو :سوريا: |
عن جد شي بيقرف..:aah:
و الله شايف عم نرجع لورا :jakoush: ع كل حال الله يكون معك يا أخ كريم وبتمنى تكون عم تهبطلنا قلبنا و بالأخير ترجع لأنك زينة المنبر الحر:king: وينك حتى لو رحت لا تزعل لأنك تركت أهلك أو شغلك .. برأيي لازم تفكر بشغلة وحدة بس ..هيي إنك ما تراجعت عن أفكارك و مبادءك، وضميرك مرتاح ، هاد مو خطاب ،أنا لما بخسر كتير وبربح شغلة وحدة بساويها أهم من كل شي بالدنيا الله يحميك يا بطل:سوريا: |
كريم ..
ما بعرف والله شو قلك .. انو رح نخسر صديق ولا رفيق ولا أخ رح نخسر شب من احلى شباب الأخوية و افهم شباب اخوية كريم اللي علمنا كتير .. و فهمنا كتير شغلات .. قبل ماتروح بدي تسامحني على كلشي .. و إذا غلطت بحقك شي نهار استوعبني و سامحني ... ماني مؤمن كتير بس رح ادعيلك من كل قلبي .. الله يكون معك يا كريم .. ويرد عنك كل بلا ... لأنك ما بتستاهل إلا كل خير ... و خليك عم تطلطل علينا .. لأنو انتي اخونا الكبير .. و دمت لسورية ودمت للحرية ودمتلنا احلى كريم وأحلى أخ ... |
الداخل مفقود والخارج مولود
الله يسترك |
اقتباس:
وقلنالك من زمان خليك بصف الموالاة ... ما قنعت ... ودمتم للحرية .. أي حرية هي وانت غير الرب ما رح يعرف أراضيك .. |
:frown: :frown: :frown: :frown: :frown: :frown: :frown:
كريــــ :blow:مــبــــوووووووووووو |
يا ترى مين احسن الزحفطون ؟؟؟
لما المرمطون ؟؟؟ في موزنبيق كل شيء جائز ليبقى الزاحفون على بطونهم إلى ما لا نهاية......... و سيبقى هناك أشخاص يقولون : للأعور اعور بوشو سموهم ما شئتوا ...........أبطال ...خونة ...عملاء ...صادقون ...... التاريخ لن ينكر احد المجد للشيطان.. معبود الرياح من قال (لا) في وجه من قالوا (نعم) من علم الإنسان تمزيق العدم من قال (لا).. فلم يمت وظل روحا أبدية الألم" |
يا حبيبي كمان شيطان؟؟
كريمبو بتمنالك الخير ويلي قلتو عن تشوف شباب تخان فأوعة ماتعملو لأنو هاد الشي الوحيد يلي بساعدك وأي خدمة أنا جاهز وانشالله خير |
تحية لمنبر أخوية الحر
تحية لهذا المكان الجميل الذي قضينا فيه اجمل أوقات تحية لجميع الزملاء من المعارضة و جزء من الموالة عاشت أخوية وعاش المنبر الحر ساحة للحوار الديمقراطي الحقيقي الحرية لشباب أخوية المعتقلين الحرية لجميع أصحاب الكلمة الحرة الحرية لجميع المعتقلين السياسين في سوريا الحرية لسوريا أذكرونا بالخير |
[quote=krimbow]
و الشغلة التانية انو التنين يللي ممكن اتعبا معهم غلاااااااظ لك اغلظ من ابو انمار:p و الله أنا زي الأطرش في الزفه . وماني فاهم أي شي . بس ردود الزملا حسيت ان الموضوع قلب دراما . و فيه تلميح . لرعب . عموماً سيد krimbow نحنا تعملنا مع بعض من ورا الكيبورد . يجوز لو تقبلنا نخد بعض بالحضن . ماني فاهم بس اذا بتمر بظرف صعب الله يقويك و يجنبك كل شــــــر |
... أنا عم ينعصر قلبي كل مابسمع شب متل الفلة عم يحسب حسابات من هالنوع ...
بدل من لعن الظلام .. ياريت نحاول نساعد كريمبو ... أنا رح أبعت "اذا بدك" بشي طريقة اسم شخص داخل الفرع المذكور "كوني من رواده" وهالشخص محترم وانساني ... لا تسألني كيف هيك أنساني وبهيك مكان ؟ لأنو ما عندي جواب . بس مو معقول يكونو كل الناس حيوانات. هلق اذا قلتلون : "عرصا سيدي " ما بيسامحوك على اللي ما عملتو ؟؟؟ |
بحب اهدي هالرابط لأحلى كريم .. ولأحلى ابو النسيم ... :سوريا: :سوريا: :سوريا:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
انو مابعرف كريم بلكمتني العادة والي شي ساعة ماعم استوعب
ماعم اعرف شو قول بس من قلبي الله يحميك يااغلى اخ ويحمي كل واحد فيكون ياريت تكون عندي قوتكون وايمانكون موفق كريم وربي يحميك |
:shurup: :shurup: :shurup: :shurup:
|
الله لا يضرك يا كريم ولا يضر اي حدى من الشباب الطيبة الي معنا وانا رح صليلك وصلي للشباب مشان الله يبعد عنكن الاذى وولاد الحرام وترجعوا لاهليكن وللاخوية سالمين...يسوع يكون معكن ويحميكن...
|
:-) خيو نشاء الله ازمة وبتعدي على خير
ماعلى قلبك شر هوي بيكونو طالبينك لشي تاني بس انت محملها كتير |
قولتك يعني شفة متة او كاسة شاي
يعني متل العادة كريم ولايهمك |
مرحبا شبيبة ...
اول شي ميرسي الكم كلكم و انشالله تطلع سؤالين و كفين ع الماشي الشغلة ... لك و لبطتين كمان مو مشكلة بس الشغلة شكلها اكبر من هيك me2 صاحبك "الولهان من المخيم" و صاحبك " الحي ابقى من الميت" صاروا عند خالتهم بفرع اس تخ بخ لا هوي بري و لا هوي بحري و نفس الفرع (نفس الزلمة يللي ع شواربو نسر و 3 نجوم) طالب صاحبك "فاتح الاندلس السبع" و يا حزرك وين الفلم؟؟ الفلم انو صاحبك "ابو رياح" طالبينو ع بيناية بالمزرعة حد جامع الايمان (يمكن لأنو كافير حكير) هلأ جماعة المزرعة في خوش بوش بيناتنا و ممكن تمشي امورو لابو رياح بس باقي الشباب مو عرفانين شو بدنا نعمل معهم و اهاليهم ما عم يرضوا يتعاطوا معنا بنوب بنوب، ما عم ناخد منهم لا حق و لا باطل لك اصلا شو دخل هديك القرنة فينا ؟؟؟ |
هلأ بخصوص الاستمارات
طبعا بالنهاية القرار بيرجع الكم بس ازا بتتزكروا اول ما الواحد يسجل باخوية ... بيوافق على مجموعة من الشغلات ... منها انو ادارة الموقع غير مسؤولة عن الشغلات يلي بيكتبوها الشباب لك مجود ... فضيلنا شوي صندوق رسايلك |
بس بتعرفوا شغلة
هالشي كلو (من زاوية ضيقة) انتصار للحرية و انتصار للمنبر هاد دليل انو في عالم عم تقرا و في عالم عم تفهم و في عالم عم ترجف مؤخراتها و الشي الوحيد يللي بيرجف المؤخرات هوي الحقيقة مؤخراتنا رجفت من حقيقة الاقبية يللي عنا بس كمان مؤخراتهم رجفت من حقيقة الكلمة يللي عم نكتبها و دمتم للحرية :7asheesh: |
اقتباس:
ما خلو ولا قادمي يا سيدي متل ما قلت لو ما الحكي صحيح ما بيعملو هالشي |
الله يحمي كل شباب وصبايا الاخوية ويبعد الاذى عنهن...
|
الله يحميكون يا احلى شباب ويوفقكون ويبعد عنكن الاذى وولاد الحرام يارب
ومابقدر انا غير صليلكون وادعيلكون من كل قلبي |
... وبغد النظر عن افرازات الموقف الحالي وتداعياته .. وبغد النظر لما ستفضي به هال الحادثة و الوضع الراهن .. بحب قول لهال الشباب..
شكرا لأنّكم الحجر الأسود بكعبتنا شكرا لأنّكم نجمة صبح يسوعَـــنا شكرا لأنّكم في تاريخنــــــــــــــــا.. :سوريا::سوريا::سوريا: |
اقتباس:
اقتباس:
|
فضيتو... فضيتو .. سيند :(
|
Fadi وكلنا مع بعض مهما اختلفنا وقلوبنا عبعضها أصلاً ولولا هيك مابيصير يللي عم يصير المهم انو نكون سوا ونتحاور بلكي منوصل لنقطة التقتءنا يلي هية سورية بلدنا الحبيبة
|
أكيد.....
|
هل يعامل من يحب سوريا بهذه الطريقة يدعون أنهم يعملون من أجل سوريا ( اتحدث عن الـ 999 ) و هم يحاسبون من يعمل لأجلها يحاسبونهم لأنهم أبو أن يعملو مع أجهزتها في ما يدعون انه خير سوريا, ليس هذه بشيء جديد انما هو موجود منذ 35 سنة , دعو من يحب سوريا يعمل لأجلها لأنكم تعملون منذ عقود و لم تفعلة أي خير لأجلها , دعوهم يعملون بما يفضي ضميرهم و لكن كونوا على ثقة أنه ضمير نظيف , وضحت هنا أن الضمير نظيف لأنكم تعودتم ارتباط كلمة ضمير مع الندالة , ..........
هناك الكثير يقال و لكن ...... تحياتي يا مندوب الفرع .......... |
آخر التطورات
اول شي بحب طمنكم انو صاحبكم "ابو رياح" طلع سالم غانم شغلتو مرقت على خير ... سؤالين و كفين ع الماشي اما الشباب يللي معبايين ببيت خالتهم لسا ما في اخبار جديدة عنهم ، بس ..... و الله مو عرفان كيف خبركم شو صار يالله رح خبركم ياها دج هلأ بسياق تحرك الشباب لحتى يحتووا الموضوع، اتصلوا باكتر من جهة، لتنظيم حملة اعلامية حقوقية شعواء هلأ كيف بالزبط صار يللي رح قلكم عليه ما بعرف، بس يللي صار انو ..... انو وصلت القصة لعند خدام، و صار عندو علم فيها، و شكلو ناوي ينخ (من النخوة) و يتحرك لا حدا يسألني شو دخل هالمحورق بيللي عم يصير هاد يللي صار هلأ انا نصحت الشباب انو يقولوا "يستر على عرضك ... نحنا من غير دف عم نرقص" و من هالمنبر بعلن انو اي استخدام لهالمقوص لقضية الشباب هوي استغلال آلامهم بغاياتو الدنيئة هذا و سنوافيكم بالتفاصيل فور ورودها |
يا سلام
ما ناقص غير خدام لك هاد اوسخ من الوسخ لعمى لك يا كريمبو تاري ايدكون طايلة لعمى انا وين فايت هالفوتة |
اقتباس:
المصيبة بتلم:( |
| الساعة بإيدك هلق يا سيدي 14:26 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون