|
صراع القوميات
القومية هل الموضوع تمت مناقشتو من قبل بالمنبر و لكن من مدة طويلة و الموضوع اللي انفتح حسيت انو ما اخد حقو من النقاش كما يجب القومية هي شعورنا بالأنتماء لأقليم أو وطن أو شي معين كا تعريف سوقي من غير ما نخوض بأمور التعاريف و المصطلحات الموضوع بعرف أنو شائك و متشعب جدا بس يعني اذا ما حكينا عنو و ضلينا ساكتين و كل واحد بيفتح سيرة القومية صار متآمر شو رح نستفيد؟ ما تعدد القوميات عنا واقع ملموس بسوريا مثلا في العرب و الارمن و الكراد و الشراكس و غيرها من القوميات الكتيرة بس يا ترى انتماء هالقوميات هوي لسوريا يعني كقومية سورية او لقومية تانية؟ و من ثم إنتماء العرب السوريين هوي للقومية العربية ككل اما بس لسوريا كبلد؟ هل صراع القوميات أمر محتوم و لا بد منو؟ أم أنو من الممكن تنصهر هالقوميات في قالب واحد؟ يعني لوين بدنا نوصل و هل رح يجي يوم ينشال فكر القومية من مخنا ؟ |
الحقيقة انو بسوريا وبالالبلاد العربية المجاورة المشكلة مو مشكلة قوميات فقط انما المشكلة هيي مشكلة الانتماءات الاثنية كمان.. ولحتى نشرح شو معناتا النتماء الاثني فينا نقول ببساطة هوي الانتماء لأي قومية أو عشيرة او دين او طايفة او منطقة جغرافية..وهادا الشكل من الانتماء منتشر بسورية والدول المجاورة لها بكثرة.. ويشكل الانتماء الاثني للمواطن السوري الهم الاكبر بحيث يأتي ولاؤه الاثني أولا ومن ثم ولاؤه للوطن لسوريا.. ويتضح للمتابع أن هذا الشكل من الانتماء ظهر واضحا بعد ال 1970 و اتضح أكثر فأكثر في العشرين سنة الاخيرة..
|
هلأ اذا بدنا نتساءل ليش ظهر الانتماء الاثني بقوة فينا نقول انو ظهر نتيجة شعور الناس بعدم كفاية الوطن لحمايتهون كمواطنين فيه .. وشعورهم بأنو العشيرة أو القومية الصغيرة او الطايفةاللي بينتمو الها هيي الحامية الاساسية وهيي الجدار الاحق بالاستناد عليه.. وهادا صار بعد النكسات والاحباطات والانكسارات اللي اثبتت الهون انو الوطن غير قادر على حمايتهون
|
الهوية هي البداية
أي أن الهوية التي يُعرف الإنسان بها نفسه هي أساس الأنتماء وهذا لا يعني أن لكل منا هوية محددة فأنا أعرف نفسي ضمن التعريف الأشمل من وجهة نظري فأقول أنا مسحية سورية أو سورية مسحية وبالتالي أعتمد على وجهة نظري في تعريف هويتي فعندما أقول سورية مسحية أعتبر أن سوريا والهوية السورية هي هويتي وبالتالي أشكل من خلالها قوميتي التي أواجه بها العالم "دول العالم الأخرى، القوميات" ولكن عندما أعرف نفسي داخل "سوريا" مقابل الطرف الأخر أي السوري المسلم أو السوري اليهودي أو السوري الكردي فأنا أضيق هويتي لأصبح مسحية وإذا ما جاء المريخيون إلى الأرض أعرف نفسي ضمن هويتي "الأرضية" وبالتالي تعتمد قوميتي على تعريفي لهويتي في أثناء وجود الأخر والذي لا يمكن تغيبه في أي لحظة على شرط أن لا تطغى هويتي الثانية "المسيحية" على هويتي الأولى "السورية" إذا كنت أعيش في وطن يجمع كافة الديانات مثلاً، وأي صراع إثني داخل الدولة هو في الواقع "فتنة" من باب فرق تسدّ |
بوافق ناي من ناحية سبب المشكلة... فعلاً بحس ظهور هالانتماءات سببه إحساس المواطن بتقصير وطنه بالإضافة إلى عدم إحساس المواطن بقدرة وطنه (بكافة عناصره) على استيعاب كافة المواطنين من جميع الانتماءات... مثال إذا حس السوري اليهودي بأنو غير مرحب فيه في سوريا وما عم ياخد كافة حقوقو وأنو في تفرقة بالتعامل معه مقارنة بالسوري المسلم مثلاً أو السوري المسيحي.. فحيركز على قصة انو يهودي أكتر.
وهالمشلكة مو بسوريا بس. متل ما ذكر قبل، المشكلة موجودة في الدول المجاورة... الأردن "بلدي"، يعاني من هالمشكلة بشكل فظيع ومن جميع النواحي.. القومية والدينية والطائفية والعشائرية والجغرافية، واذا في شي تاني ممكن تلاقي بالأردن. كمان، السعودية، العراق، لبنان بامتياز.... ولما بفكر بالموضوع أكتر بلاقي أنو معظم الدول "العربية" ازا مو كلها، تعاني من هالمشكلة بشكل واضح وصريح. في دول كتيرة متل امريكا مثلاً تجمع انتماءات عديدة ورغم هالشي بتمسك المواطن بأمركيتو... حتى لو كان من أصل إفريقي أو إسباني أو إلخ... بتلاقي بقول i'm american وبحاول يثبت حقو في هالمواطنة... ليش بهمو ينتمي لهالبلد؟ لكن، عنا مثلاً، يستغل الشخص اول فرصة ليبين لك أنو أصلو كذا أو دينو كذا إلخ... مؤكد أنو أصل المشكلة هو الانتماء إلى الوطن.. هاد ما بيعني أنو الشخص ينسى أصلو أو دينو أو طائفتو، ممكن يمارسه ويحافظ على تقاليده وعاداته لكن في إطار شخصي. أما هويته، فهو سوري أو أردني أو لبناني. |
اقتباس:
اللي بتعمق بالطوائف و العشائر بسوريا و ما شابه من حيث الخلافات و العنصرية في الأنتماء للقينا انو سوريا لازم تشعل نار بسبب كثرة هالخلافات انا معك من حيث انو الولاء بيتفرع تفرع مخيف عنا بسوريا و يمكن يأخر الأمر بيعود للوطن الأم و ذلك بسبب عدة عوامل منها التخلف الفكري و منها الفقر و منها الخوف و اهمها التعصب للتقاليد و الأعراف بشكل مزري و هالشي بينعكس على سير التطوير و التحديث للأسف بس ماني مستوعب فكرة انو سوريا قبل ١٩٧٠ كان الانتماء فيها غير بعد ال ١٩٧٠ . اقتباس:
العنصرية شي موجود بدم العرق البشري و هالشي بيعود لأنو مخنا اللي منستخدموا لتحليل احداث الحياة اليومية هوي نفسو المخ اللي خلانا نتأقلم مع ظروف العصر الحجي لحد هلئ العلم بيقول انو مخنا لسا ما انتقل لمرحلة الأنسان المتحضر. مع مراعاة انو الوضع عنا كمان بيخلي الواحد يحس العصر الحجري تقدم عا هوا العايشينو. راجع....:D |
اقتباس:
علا وا تجتمع جميع القوميات فى بوتقه واحده ليعاد سكبها و هيكلتها من جديد وهذا من المستحيل لا أحد منا ينكر هويته و الإنتماء لبلده ولو كان مغتصب أو مضطهد ببلاده هلأممكن الحكومات منذ نعومه أظافرنا تنمى هذا الشعور على إنو نحنا أمه واحده متل ما ذكرتى بالنسبه للأمريكين خليطهم مجموع بجواز واحد صحيح كلامك و بس عنا نحنا العرب ولو تم تجنيس أيه لاجئ أو بدون أو وثيقه معينه بيضل بيقول أنا كذا مجنس لنفترض سورى أو لبنانى أو أردنى بس يروح أمريكا أو أوربا مابيسترجى يفتخ فمه و يقول أنا أصلى كذا ولكن أحمل جنسيه ثانيه لأنهم بس ببلادنا بتطلع مراجلهم علينا وهذا بسبب الأحقاد و التاريخ و الغزوات لن نتعايش أبدا فى قوميه واحده نحنا مو خرجنا هاالحكى تبقى عندنا العقده النصريه سائده حتى الممات |
اقتباس:
ليش بسوريا لحد هلق في ملل و قوميات ما بتعطي لناس براتها يعني شو هالذنب العظيم ان تنين من قومية او ملة مختلفة تحابو؟ فيكي تشرحيلي؟ بعدين يا عزيزتي الواحد متي ما صار يفكر بشكل انو هوي يحمل هويتين الا ما يصير شي و تطغى الهوية الأولى عن التانية الشخص ما فيه يسوق سيارتين فما بالك قوميتين؟؟ ولا انو خلص هذا ما وجدنا اجدادنا له فاعلين اي حاجة بقى وسعو مستوى تفكيركن طلعو برات هالقوقعة عاد |
اقتباس:
|
اقتباس:
واللي بيجمع ابن العشيرة الفلانية من سوريا مع ابن نفس العشيرة من العراق هوي أكبر من اللي بيجمعو مع ابن عشيرة تانية سوري.. هادا بيأكد افلاس سوريا كدولة وعدم قدرتها حتى على تقديم وطن بأقل الاحوال لمواطنيها.. |
اقتباس:
ناي الألمان قبل ما يسويهن هتلر و يلغي فكر العنصرية عندون ليوجهو لمصلحة الشعب و يبيد و يحرق كل اللي ممكن يعكرو صفو الأنتماء كانو بيقدرو يصيرو متل ما صارو؟ الهنود غاندي وحدون برسالتو السامية و بالحب و السلام الاتراك معروف اتاتورك شو عمل و معروف الحكم التركي بأيامو الصينيين لولا الثورة الحمراء اللي عندون كان صعب يصيرو بس الصينيين ما وصلت التفرقة عندون للحدود اللي عنا ياها و الحكم بالصين برأيي هوي التجربة الأشتراكية الشيوعية الوحيدة التي نجحت بالعالم؟ بغض النظر عن الآراء اللي بتقول انو مو انسانيين يعني منوصل لنتيجة البشر ما بينصهرو بي بوتقة واحدة و قومية واحدة الا بالنار و الحديد حتى بتجربة غاندي اللي خلا الهنود يصفو مع بعض و لو بشكل غير مباشر هوي النار و الحديد اللي استخدموهن البريطانيين ضدون طيب السؤال اللي بيطرح نفسو، ليييش؟ ليش يا بشر؟ يا منفتحين؟ ليش ما عم تقدرو تخلصو من هالعقدة ليش ما عم نقدر نعبر المانيا طلعت من تحت الرماد متل طائر الفينيق متلها متل اليابان هيروشيما طلعت من قلب نار و دمار القنبلة الجحيمية النووية و نحن كل ماننا لورا و الأمثلة كتيرة طيب ليش؟ |
اقتباس:
والمحزن أكتر يتم التعامل عأساس انتمائنا لقومية أو دين ما اخترناهم بإرادتنا وإنما ورثناهم ومع هيك بتلاقيهم عم يتحكمو بحياتك كإنسان وبعلاقاتك وبكتير أشيا |
اقتباس:
هو محاربة الدولة للقومية لسورية و فرض القومية العربية ... يللي كتير ناس ما بآمنو فيها فصار كتير من الناس يفتشو عن انتماء يعنيلون أكتر |
اقتباس:
|
اقتباس:
و وجود انتماء للوطن بيلغي دور هالقيادات او عالاقل بيقلل من سيطرتها على المجموعات يلي بتتبعلها |
مافي شي اسمو قوية سورية و لا قومية عربية. اي نوع من القومية يلي عم ينفرض هون او عم تحاولوا تلاقوه هون هوي شيء اصطناعي بس لملائمة الظروف و حتى نحس حالنا عم نتمي لمحل... بينما الحقيقة انو "القوميات" الصحيحة بالنسبة إلنا كسوريين هي القوميات المدنية المناطقية و هادا شي معروف من فجر التاريخ
الشي يلي بيمشي مع الاكراد ما ضروري يمشي مع السوريين.. الطريقة الفرنسية و الألمانية ما ضروري تنطبق علينا ميزة سوريا من فجر التاريخ انها كانت دايما بتشكل ما يعرف ب city-police .. المصطلح غالبا موجود اكاديميا بشكل تاني بس انا ماني متأكد منو.. بس المعنى من هالمصطلح انو سوريا عبارة عن جماعات متعددة كل جماعة إلها مدينة و مملكة مبنية حوالين مدينة... دير الزور, البوكمال, حمص, صور, صيدا, اوغاريت, دمشق, يافا إلخ إلخ كل هالمدن كانت دايما عندها استقلال عسكري و اقتصادي و اداري و ديني.. في آلهة لحمص مختلفين عن آلهة لغير مدن ... ما كان في دين واحد و لا كان في بلدة مركزية وحدة بأي يوم من الأيام .. لما كان يحصل خطر خارجي كانت ببساطة هي المدن تتوحد و تتكاتف و بعدين ترجع كل وحدة لوحدها فيما بعد و هالشي استمر خلال الاف السنين و خلال كل الحقبات التاريخية يلي مرت فيها المنطقة.. التعصب المدني يلي منشوفو بسوريا اكبر بكتير من الموجود بغير مناطق و كان عائق حقيقي امام تشكيل دولة سورية واحدة.. بدليل انو فعلا بعمرو ما كان في شي اسمو سوريا كدولة وحدة و كانت دائما اما مدن و ممالك صغيرة او جزء من امبراطوريات.. لهلق في تاريخ و عداء بين هالمدن و صداقات بين مدن اخرى.. حمص و حماة.. القصة على ما يبدو طويلة جدا و إلها اسباب معينة بقى منجي هلق و منتطلع للموضوع و منشعر بالاحباط.. ليش يا ربي انا ماني حاسس بانتماء سوري او انتماء عربي... ليش عم حس حالي عم اغصب حالي غصب لحس بشعور معين و عم بحبش ليل نهار على صيغة تجمعنا كلياتنا... الجواب البسيط لأنو مافي هيك شي موجود على ارض الواقع و المحاولات يلي عم تحاولوها لإيجاد تفسير و بوتقة واحد تصهر الكل مع بعض رح تفشل لأنها فشلت انها تشوف ال Big Picture و تستخلص العبر من تاريخنا الطويل يعني نحنا عنا اطول تاريخ مسجل بالعالم و مع هيك ما عم نقدر نفهم مين نحنا و شو بدنا على كل حال ببساطة و خدوها مني من الآخر.. سؤال الهوية هو من الكماليات جدا جدا و ما بينطرح إلا لما تكون الدولة كبيرة و قوية و واصلة لمرحلة من الثقة بالنفس و التماسك لحتى تقدر تواجه هيك سؤال صعب.. متل ما هلق ساركوزي عم يطرح سؤال الهوية الفرنسية على الملئ... هالسؤال بتخيل الغرض منو حشك العناصر الغير فرنسية بموقف صعب اكتر منو تحديد فعلا شو يعني انك فرنسي... لانو واضح شو يعني فرنسي و فرنسا تاريخها كبير و بهوية و ثقافة و لغة معروفة اما بوضع متل وضعنا لما فوق المناطقية و المدنية صار عنا مستويات تانية متل الإثنية و العرقية و تعدد المذاهب و الأديان... و إضافة للجهل و الفقر و انعدام الحرية السياسية و حق تقرير المصير... فهيك أسئلة هي اسئلة دمارية اكتر منها اسئلة رح توصلنا لشيء اول شي علينا نشتغل على الاقتصاد و الأمن و الاستقرار و الحرية و العلم و المعرفة و هالقصص التافهة :pos: و بعدين لعيونكم إلكم مني لنخترع أحلى هوية قومية رح تكسح كل القوميات :lol: |
اقتباس:
نحنا مو متل الأتراك او الفرس او الروم.. عندنا شيء مميز ان كان بشع او حلو ما بعرف.. بس برأيي خلينا نتعامل معو حسب ما هوي و نحاول نستخلص منو العبر و نستفيد منو بدل ما نخسر يعني هلق مثلا سوريا حكومة مركزية جدا جدا بدمشق... النتيجة هي اهمال شبه كامل لمناطق كتيرة ما تصلحت إلا من فترة بسيطة... و كل منطقة الجزيرة و الصحرا مهملة و فقيرة مع انها هيي عماد الاقتصاد السوري فهي القمح و القطن و النفط و المراعي و الغاز و و .. ما بتمشي المركزية معنا و التعصب موجود و رح يستمر |
اقتباس:
يا سيدى إحترمتك والله كلامك 10/10 ويرحم والديك حكيت الزبده وأنا موافقك بكل كلمه بها الموضوع :clap: |
يعني 10/10 مو 100/100 :cry:
شكرا لمشاركتك :p:D |
اقتباس:
اقتباس:
اقتباس:
اوروبا دول و كل دولة فيهن مستقلة و الها لغتها و عاداتها و غيرها من الشغلا و بالرغم من هالشي متطورين و متعايشين شو يعني هني مستواهن الفكري ارقى أو أدنى من تفكير شعوب المنطقة؟ اقتباس:
اقتباس:
اقتباس:
و ما بيصير نخطط للسير بطريق مستقبلي قبل ما نخلص من عوائق الطريق الماشيين فيه .:D |
اقتباس:
|
اقتباس:
وقت صارت إسرائيل ... هالدولة القوية اللي مو قادر حدا يوقف بوجها... على أيّ أساس صارت؟ يهود من مختلف أنحاء العالم، جنسيات مختلفة، عادات مختلفة، ملامح حتى مختلفة... هلأ إلى متى رح تستمر إسرائيل المكونة من هاد الخليط؟ ما بعرف... لكن صرلهم أكتر من 50 سنة ولسا شغالين. الانسان بحاجة لينتمي لشي.. البعض بينتمو لبلد، البعض لفكرة، البعض لدين... إلخ وقلّة من اللامنتمين. وما بنقدر ننكر إنو الانسان مجبور ينتمي لشي وإلاّ... يعني حتى لو ما كان عندك انتماء لسوريا مثلاً، لكن ازا رحت قدمت لفيزا برا البلد، رح تعامل كسوري. ازا رحت تخطب بنت من برا بلدك، رح يسالوك من وين إنتا؟ ... هالشي رح يكون جزء من حياتك شئت أم أبيت. |
اقتباس:
ونفس الانتماء بالنسبة للعلويين العرب بالمنطقة الجنوبية من سوريا .. و بالنسبة لذوي الاول البلغارية بشمال غرب تركيا.. و سكان طرابزون يلي من اصل روسي.. هادا غير الشيشان والداغستان والقوزاق والأبخاز.. في كتير اتراك بيمتنعو عن شراء بضائع مستوردة فقط لأنو لازم يفيدو بلدهون.. لما بيروح الشب على العسكرية بيعملو حفلة متل العرس لأنو راح يخدم بلدو.. الانتماء بيعطي شعور بالأمان والحب والاستعداد لتقديم شي للبلد.. طبعا بس احكي عن الاتراك دايما بستثني الاكراد.. بمسألة الانتماء.. |
اقتباس:
ونفس الانتماء بالنسبة للعلويين العرب بالمنطقة الجنوبية من سوريا .. و بالنسبة لذوي الاول البلغارية بشمال غرب تركيا.. و سكان طرابزون يلي من اصل روسي.. هادا غير الشيشان والداغستان والقوزاق والأبخاز.. في كتير اتراك بيمتنعو عن شراء بضائع مستوردة فقط لأنو لازم يفيدو بلدهون.. لما بيروح الشب على العسكرية بيعملو حفلة متل العرس لأنو راح يخدم بلدو.. الانتماء بيعطي شعور بالأمان والحب والاستعداد لتقديم شي للبلد.. طبعا بس احكي عن الاتراك دايما بستثني الاكراد.. بمسألة الانتماء.. |
اقتباس:
|
اقتباس:
برأيي الديموغرافيا البشرية في حركة و تغير مستمر .. ... بس هادا ما بيلغي القوميات يللي هيي بالنهاية شعور بالانتماء |
تحياتي DARKNESS
ما فهمت ليش مو من الممكن التجربة الألمانية او الفرنسية او اليابانية او حتى السوفيتية مو من الممكن تتطبق عنا شو ناقصنا نحن مو قصة شو ناقصنا. انا ما قلت انو خصوصية منطقتنا بتعني انها أدنى من وضع المجتمعات التانية.. بس كل منطقة إلها خصوصيتها و ثقافتها و ضروري اخذ هالشي بالحسبان و مو محاولة تطبيق نفس التجارب تبع غير شعوب علينا.. الشعوب الالمانية و الفرنسية و اليابانية انا بشوف و بشكل تبسيطي انها homogeneous اكتر مننا بكتير يعني مثلا بألمانيا في اغلبية واضحة لملامح معينة و لدين بمذهب واحد و لغة وحدة.. هالشي مو موجود عنا ... اغلبيتنا هيي بالحقيقة اكبر الأقليات اكتر منها اغلبية ساحقة خاصة اذا بدك تفصل السنة بين عرب و اكراد و قوميات تانية اذا بدك هالميزة موجودة بكل العالم مو بس بسوريا اميركا عبارة عن ولايات و كل ولاية مستقلة حتي فيهن ولايات ما بتطيق التانية اوروبا دول و كل دولة فيهن مستقلة و الها لغتها و عاداتها و غيرها من الشغلا و بالرغم من هالشي متطورين و متعايشين شو يعني هني مستواهن الفكري ارقى أو أدنى من تفكير شعوب المنطقة؟ مثالك عن اميركا هو بالحقيقة بيدعم فكرتي ما بينقضها و هي انو الفيدرالية و اعطاء المناطق السورية (و بعدين العربية) المختلفة المزيد من الخصوصية و القدرة على التحكم بمصيرهم الاقتصادي و الاداري يمكن تكون ذات فائدة اكتر من مركزية الدولة يلي عنا ياها حاليا.. على كل حال هالحكي كتير نظري لانو بالاساس الدولة عنا تعبانة فوين بدنا نحكي بتوزيع السلطة على المحافظات.. بس هيك حكي نظري. بس متى صار هالشي و حست كل منطقة او مجموعة بشرية انها قدرانة تحافظ على خصوصيتها الثقافية و الاجتماعية و انو مواردها ما عم تروح بشكل غير عادل لغير مناطق.. وقتها بتصير "واثقة" بنفسها و قدرانة تشوف التشابه بينها و بين المناطق التانية و بيصير في عنا تفاهم و انسجام.. و ما عاد بيصير في خوف من الاندماج اكتر "بالوطن" و الانصهار ببوتقة اكبر.. لوضح الفكرة شوي انت مثلا عند أخ بالبيت بس في حالة انعدام بالعدل بتوزيع الموارد (مثلا لو عندكم ارض).. بالتالي كل يلي رح تفكر فيه هوي اوجه الخلاف بينك و بين اخوك و رح تتحول علاقة الأخوة لعلاقة كراهية لانو مافي عدل.. بينما في حال تحقق العدل عن طريق فصل المصالح (على المدى القصير).. هالشي رح يأدي لانو منطقيا مع الوقت رح يصير في تعاون بينك و بين اخوك مبني على احترام كل واحد للتاني و بيصير الاخ بيقدر يشوف النقاط الايجابية الموجودة عند اخوه و جاره بدل ما كان مركز على نقاط الاختلاف هالشي بينطبق على مجتمعاتنا لما نحنا عم نرفض نرجع لتاريخنا و ندرسه بشكل حقيقي و اكاديمي و نطرح النقاط السلبية يلي فيه قبل الايجابية... بالتالي كل مجموعة من البشر و كل مدينة رح تضل حاسة حالها مأكول حقها و مو معترف بماضيها او الالام يلي ممكن تكون لحقت فيها.. و تقريبا كل مجموعة عرقية دينية عنا اتعرضت للابادة و التنكيل بيوم من الايام من طرف من هالاطراف او على الاقل من طرف شبيه بأحد الاطراف (مثلا المسيحيين السوريين ما كان عندهم قوة عسكرية بس بالمقابل كان في بيزنطة و الصليبيين) بقى هالشي رح يتطلب اعادة النظر بكل تاريخنا و طرح اسئلة قوية و رح يصير في نقاشات حادة و اعادة تفكير بالخطوط الحمر و يمكن رح يصير في عنف.. كل هالشي حاليا انو يصير هو ضرب من الخيال العلمي بوضعنا الحالي و قبل تحقيق ثورة اقتصادية و علمية و فكرية مستحيل يصير... بالتالي ما منقدر نتوقع اننا رح نقدر نحل سؤال الهوية و القومية بالقريب العاجل... انك تحاول تلاقي قالب جاهز متل الإسلام او العروبة او كوننا سوريين.. فهالشي ما رح ينفع إلا كحل مؤقت القومية ببساطة ما رح تنفع مع شعوبنا لانها شعوب مختلطة كتير و الاستقلالية و القبلية متأصله فينا.. بس ممكن نطمح انو نخفف من الخلافات و نعطي كل مجموعة حقوقها الكاملة و بعدين منشوف لوين هالشي بياخدنا و بخصوص اوروبا.. وين شايفهم متعايشين؟ اتحادهم هو حل براغماتي لمواجهة الاقتصاد الاميركي و باقي الدول الصاعدة بس ما يعني انو مبني على اساسات قوية عند الشعوب.. بتخيل الفرنسيين لهلق ما بيطيقوا الألمان |
اقتباس:
القومية تبع مجموعة بتشوفها مجموعة تانية انها تعصب. الاسرائيلي بيشوف الفلسطيني متعصب.. طيب شو منكوي بالنار و منلجم بالحديد حتى نحل مشكلة فلسطين؟ كيف بدك تمحي الذاكرة بالعنف؟ هالشي بيأدي فقط لمزيد من التعصب و التمسك بالهوية |
اقتباس:
بخصوص اسرائيل ما حدا قال انهما متجانسين اساسا و عندهم مشاكل و اختلافات الدنيا بين متدينيين و علمانيين و بين اشخناز و إلخ.. بس وضع اسرائيل مختلف لانو محاطين باعداء وجوديين و لانو عندهم دعم دولي هائل.. بس في حال صار سلام فهي الأسئلة رح تطفو على السطح و رح يكون في اكيد مشاكل بالمجتمع الاسرائيلي |
اقتباس:
ما تنسى انو الافكار يلي نجحت بالماضي ما ضروري تكون افكار خالدة و لازم تتطبق بكل زمان و بكل عصر كون القومية كانت عامل مهم لنهضة بعض الدول و الدين مهم لدول اخرى.. ما يعني انو هالشي لازم يستمر الوضع السليم للبشر بالنهاية هو حالة من انعدام القوميات و الدول و الحدود.. هي الحالة يلي لازم نطمح إلها بس اكيد لحتى نقدر نوصل إلها لازم نمر بمراحل مهمة بالوسط على كل حال نحنا ما إلنا بغيرنا.. يصطفلوا.. نحنا بدنا بسوريا و العالم العربي حاليا |
اقتباس:
إذا اعتبرنا أنو القومية السورية فكرة مطروحة و نظرنا إلى تجارب شعوب أخرى ... رح نشوف أنو لدينا من مقومات النجاح ما هو كافي لإنجاح هالفكرة أما إذا اجيت لرأيي .. فالقومية السورية هي حقيقة قائمة حتى لو حوربت لفترات من الزمن .. و رح تضل سوريا قد ما طلعت قوانين لتحويلها لسورية اقتباس:
|
اقتباس:
و كيف يعني القومية السورية حقيقة ثابتة؟ هالكلام مبني على شو؟ ايمت كانت الدولة السورية و شو كانت حدودها و مين كانت عاصمتها؟ اذا بدك ترجع اكتر من 2000 او 3000 سنة حتى تلاقيلي دولة سورية فالأحسن بلا |
اقتباس:
اقتباس:
اقتباس:
ما فينا نخلي ولائهن للعلم و التقدم؟ لخير البشرية؟ أم أنو أحلامي طوباوية كتير؟ اقتباس:
نفرض جدلا انا بوذي بحقلي اسوي تمثال لبوذا و أمارس الطقوس البوذية و الذي منو بس مو أنو والله أقوم أعارض الكل لأنو ما بيحبو بوذا و يصير بدي أقاتل و أعلن حكم بوذي و سلطة و بطالب الكل يصير بوذيين هاد شي ما بيصير منجي هلئ لتطبيق الفيدرالية ببلادنا حسب المراقب السياسي الأنكليزي (ألبرت دايسي) لتشكل الفيدرالية في شرطين ١-أولهما هو وجود عدة دول "وثيقة الإرتباط ببعضها محلياً و تاريخياً وعرقياً او ما شابه يجعلها قادرة على ان تحمل- في نظر سكانها- هوية وطنية مشتركة. ٢-"الرغبة الوطنية في الوحدة الوطنية و التصميم على المحافظة على استقلال كل دولة في الإتحاد". من الشرط الأول نحن مرتبطين محليا ببلدنا لأنو عايشين فيه تاريخيا ما حدا في ينكر انو مو مرتبطين تاريخيا عرقيا ما فيني قول انو كلنا مرتبطين بس الأغلبية مرتبطة ما هيك؟ بس حدى بيؤمن بشي أسمو هوية وطنية مشتركة؟ طالما نحن عا مستوى سوريا اهل طرطوس ما بحبو أهل اللادقية أهل حلب ما بحبو الحموية و الحماصنة ما بحبو الشوام و المابعرف شو بيكرهو مدري مين .... طيب و بعدين؟ بالنسبة للشرط التاني في حدا بدو وحدة وطنية بعتقد انو نحن كسوريين ما حدا بحب والله انو نففصل عن بعض بأستثناء الحركات اللي عم تصير بالشمال مع اللي عم ينادو ب كرد ستان و اللي الله يسترنا من عواقبها اذا صارت منلاحظ من الحكي انو من الممكن تطبيق افيدرالية بس في ثغرات قاتلة منها عدم ادراك شي اسمو هوية وطنية و طغيان الهوية العرقية او المذهبية عليها و هالثغرة حلها شبه مستحيل لأنو ما أنت بمبدل لما في القلوب. لسا ما خلصت راجع...:D |
اقتباس:
اقتباس:
و كلامك ذهب على ماس بالنسبة لإعادة النظر و تخفيف الخلاف بكل شي اقتباس:
هالأساسات القوية هي اللي نحن لازم نطمحلها بعدين نحن مابدنا التعايش يكون مبني عال الأفكار البراغماتية و المجابهة الفكرية نحن لازمنا تعايش لخير و رقي البشر مو لمجابهة فكر تاني |
اقتباس:
هالكلام بعتبرو أعظم كلام انكتب بهالموضوع :D هالفكرة هي اللشي اللي لازم نطمحلو مع اني شايف انو ما رح تشوف هالفكرة الضوء بمستوى تفكيرنا الحالي |
اقتباس:
انت عم تحكي أنو تجارب الشعوب الأخرى .. ما رح تنجح عنا أنا عم قلك لا عنا هون كشعب سوري .. كتير أمور بتجمعنا .. أكتر من الشعب الهندي مثلاً .. أو الصيني (ما بظنك رح تسألني شو هالأمور لأنها واضحة ) اقتباس:
ايمتى كان العالم أمة واحدة ..؟ ايمتى ما كان في حدود بين الدول و الشعوب ..؟ إذا بدك ترجع لعصر الجمع و الإلتقاط يعني كذا مليون سنة لورا حتى تلاقي المجتمع المشاعي ... فالأحسن بلا |
اقتباس:
مَن سيصحح التاريخ؟ ومَن سيقرأه؟ وهل سيعالج هذا مشاعر جماعات كرهت بعضها سنين طويلة؟ صعب إني أتخيل أنو الانتماء مصلحة. وأنو الانسانية مرتبطة بدراسة الماضي والتاريخ وتصحيحهما. الانتماء شعور قد يتأثر ببعض العوامل.. لكنه يبقى شعوراً. أما الانسانية فتكون في أفضل أحوالها عندما نكون انسانيين رغم التاريخ المزور. أما إسرائيل .. ليسوا متجانسين ولديهم خلافات ... وضع إسرائيل مختلف، مو لأنو محاطين بأعداء فقط... بل لأنو عندهم هدف واحد... "دولة". وبناء على نظريتك كمان.. ازا كل جماعة إلها خصائص مميزة عن غيرها بدها تعمل ولاية، دولة، دويلة، فرح يصير عنا 10 أضعاف دول العالم. وبدنا نتعايش مع كل هالدول في أطر الصداقة. وهيك كمان، نجعل للجماعات الإرهابية كمان كيان، كونو هالجماعة في خصائص تميزها عن غيرها. وقبائل إفريقيا.. مو كلها متل بعضها... هالقبائل إلها عادات وتقاليد وطقوس مختلفة .... والطوائف... ثم أهل الشام بيختلفوا عن دير الزور وأهل حلب بيختلفو عن اللاذقية و... إلخ . دوامة ما بتنتهي... إنك تخلي نظريتك هدف على المدى الطويل .. مين بيكره يعيش ضمن بيئة مناسبة ومتجانسة في جو من الألفة والانسانية. (عن نفسي بحب التنوع والاختلاف)... لكن، بتخيل أنو هالنظرية حلم لا يمكن تحقيقه.. في نظام .. سيستم ... عم بيمشي بالعالم هلأ... ما بيتغير بسهولة، خلينا نجاريه بالأول بعدين بصير التغيير. بس اذا مع كل الانسانية اللي بنحكي فيها مو قادرين انو نتقبل سوريا كدولة أو الأردن كدولة أو زيمبابوي كدولة لأنها بتجمع بين بشر مختلفين ومتنوعين. فكيف رح نقدر نشتغل على هالدولة من جميع النواحي الاجتماعية، الاقتصادية الامنية ...الخ؟ فكيف رح نقدر نتعايش مع كل العالم؟ وكيف كدولة ممكن تتعايش مع دول أخرى في العالم؟ أنا مع إعادة دراسة الماضي وتصحيح التاريخ ومن وجهة نظر محايدة ... هالشي برأيي قد يكون عامل مساعد لكن مو هوي أساس المشكلة بس. التاريخ حصل والناس تشبعت منو متل ما هوي هلأ. وحتى ان صحح، فهل سيتقبل كل الأطراف المعنية ذلك؟ |
سياسة الأستيعاب هي افضل طريقة لمنع اقلية ما من التفكير بالأستقلال عن الدولة ...و بالعكس ....الحرمان من الحقوق و الظلم هو الدافع الأكبر للتفكير بالأستقلال .....يعني ما عم تنبلع معي كيف الأكراد يلي صرلون عايشين بسوريا سنيين طويلة كتير محرومين من الهوية السورية ...يلي هي اقل الحقوق يلي لازم ياخدوها ليحسو بأقل شعورمن المساواة على الأقل ...و بالوقت نفسو منطالبون انو ما يفكرو بالأستقلال ...!!! .... يعني ..لي بيعتقد انو القمع هو افضل وسيلة لمحاربة الأطماع الأنفصالية ( اذا بالأصل كانت موجودة )..بيكون عم يسلخ الجزيرة عن سوريا بأيدو ..... آجلا او عاجلا
و يلي جعل الأكترية تشعر و كأنها اقلية ...فما بالكون شو عمل بالأقليات .. |
اقتباس:
التجربة النازية شو رأيك فيها؟ بغض النظر عن الأجرام أو سفك الدم أو أي شي تاني فكر فيها كمبدأ حل عملي و تسريعي بس شو بتلاقي؟ يعني الشعوب اذا بدنا نخليها لنتفاهم غبر النقاش فبدها سنين و مئات السنين قبل ما تتفاهم هاد اذا تفاهمت بينما اذا جبرت العالم تنسى شي أسمو نزاع و خليتها تتطور غصب عنا فيها تقول لأ؟ اذا شجعتها و جبرتها بأنو بس تفكر بشغلة التفوق و التقدم ما رح يمشي حالها بهالحالة بيصير بدنا نكرر تجربة هتلر بس بدنا نتلافى أخطائها و هوي الغرور بالسلطة و التفوق يعني لازم يكون في نوع من المشاورة مو الأستئثار بالقرار و شغلات تانية الحديث فيها بيطول ... .:D |
اقتباس:
انو وين المقومات للقومية السورية و مشروع سوريا الكبرى؟ بعدين نحن عنا مقومات كافية؟ يا صديقي العنصرية رح تدبحنا و بدنا نجمع لبنان و سوريا و الأردن و ما بعرف مين بدولة؟ سوريا ما بتمتلك المقومات الكافية لتوصلنا للمرحلة اللي عم يفكرو فيه القوميين السوريين ترا نص اهل لبنان ما بيحبو السوريين و السوريين كمان نفس القصة و الأردنين عا اكتر فا بدك مشروع قومية سورية حلوة فكرة القومية السورية بس ما الها هالمقومات الكبيرة متل ما بيظن متبنيي الفكر القومي السوري اقتباس:
العالم ما كان أمة واحدة بس اللي ميزنا عن الأنسان الأول هوي التطور الفكري حاليا العقل المنفكر فيه هوي نفسو العقل اللي كنا نفكر فيه من أيام العصر الحجري و الأفكار اللي بيحملها هي نفسها الأفكار اللي خلتو يجتاز داك العصر بس نحن بعصر تغير فيه كل شيء عم نعيش ثورة بالتكنلوجيا و العلوم و كل ماننا عم نكتشف انو نحن صغار بهالكون و اديش هالكون عظيم و نتيجة هالتفكير عم تتبلور بمخنا فكرة وحدة الجنس البشري و انو اذا ضل كل شعب مقتنع بشغلة اسمها قومية فما رح نقدر ننتقل للمرحلة التانية من التطور البشر ما رح يقدرو هالشي و ما رح يصيرو امة واحدة الا اذا تعرضو لشي كارثة هائلة متل انو يهددنا خطر ضرب شي كويكب بأرضنا وقتها رح تلاقي العالم كلو صف مع بعضو لمواجهة هالخطر اللي بيهدد الأرض كا كل يعني بيهدد وجودنا و بهالحالة رح نتخلى عن شي اسمو قومية او شي اسمو خلاف انتمائي أو فكري |
| الساعة بإيدك هلق يا سيدي 02:54 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون