|
الحقيقة وسذاجة البديهيات
بدأت أقتنع تدريجيا أن النقاش مضيعة للوقت ونتائجه تقتصر على السخافة كونها لا تحمل أي فائدة تذكر وخصوصا في حال كانت الطاولة الجامعة للمتحاورين تتمثل بصفحة انترنت . الجميع يقع بفخ المثالية الأمر الذي يجعل كافة الأحاديث وكأنها تدور في سماء مدينة حلم بها افلطون يوما. الجميع يكره الكذب ويحتقر الكَذَبَة .. الجميع يطالب بتحرير المرأة ويعتبرها شريكا في المجتمع .. الجميع ينظر للعلم على انه منارة تنير درب الإنسان وسلاح يحمله على جنبه في مواجهة الحياة رمي النفايات بالطرقات مستنكر ومحتقر من الجميع ... حق المرأة في الدراسة والتعلم قيمة محبذة للكل الديمقراطية سر النجاح وحريّتي تنتهي عندما تبدأ حرية الآخر .. وما إلى هنالك من نقاط ومواضيع أصابنا " الملل " من تكرارها على مسامعنا بطرق تقليدية سخيفة . ببساطة أصبحت صفحات الانترنت دائرة حوار حول المثاليات . وبات الوصول إلى نقاش حقيقي يستند على آراء حقيقة " وليس منطقية ، فالحقيقة ليست بالضرورة بنت المنطق " ضربا من المستحيل سأسرح قليلا بتفكيري.. لو تعلّم أجنبي ما اللغة العربية واطلع على الانترنت سيضع في مخيلته صورة ولا أجمل لتلك البلدان الناطقة بالعربية فالجميع متعاون يقدر قيمة الفن والعلم والقانون .. ينبذ التخلف والكبرياء والحقد ... ينادي بالإنسانية وحرية التعبير ... أي صورة أجمل من هذه !! جميل أن نعلم ما يجب فعله وماهية الآراء السديدة الواجب اعتناقها وتبنيها .. لكن اي فائدة سنجنيها بالحديث في فلك الخيال غير المتصل بالواقع ؟ هل تعبر عن رأيك كما هو ، أم كما يفترض أن يكون ؟ هل أنت فعلا كما تكتب وكلمتك بنت لأفكارك ؟ هل تخجل من عرض أفكارك بتجرد وتفضل تبنّي فكرة تعجبك وتشعر أنها جيدة دون الحاجة للتقييد بها وبمضمونها ؟ لا ابحث عن أجوبة لهذه الأسئلة .. فمسبقا اعلم ما هي الإجابات البديهية أو المنطقية الواجب كتابتها هنا .. أملي أن تفكر بالتغيير ..فذلك أفضل لي من كتابة رد اعلم مسبقا مضمونه . |
اقتباس:
انو يا عمي نحنا قاعدين نقاش وخناق وبهدلة مع بعض ...وخصيصاً بالسياسة والقضايا الاجتماعية ... طيب انت عم تغيّر شي ؟؟ حاسس في تغير ولو بنسبة 0.0000000000001 % ؟؟؟؟؟:? ما بتوقع ! :pos: بالنسبة لاسئلتك ما رح جاوب غير عالسؤال الاول لانو الباقي اجوبتهن بديهية متل ما تفضلت بو طوني : 1 - ما بتوقع انو في فائدة ... هلأ بيجوز تكون فائدة ضئيلة جداً وهيي انو قناعاتك كان فيها خطأ(نسبي) وتم تصحيحها (كمان نسبياً ) .. عم قول نسبي .. لأنو مفهوم الصح والغلط بحياتنا نسبي جداً :pos: بالنشبة لأخر جملة (أملي أن تفكر بالتغيير) شو قصدك باتغيير .. نغير البديهيات .. نغير القناعات .. نغير البديهيات ... نغير الاسلوب ... ما عرفت شو قصدك بكلمة (التغيير ) بالتحديد ؟:? و :سوريا: |
اقتباس:
هذه مبادئي ان لم تعجبك فلدي غيرها :p البديهيات اسمها بديهيات فشو بدنا نغير بسماها :lol: التغيير يفترض يصير بالاسلوب وبأن الواحد يقتنع انه مافي حدا بده يقطعلك راسك اذا دافعت عن رأيك وحكيت الواقع وبعدت عن افلاطون ومدينته الفاضلة بردك :pos: اهلين ميرو :D |
اهم سبب بيخلي الواحد يدعي المثالي هو حب الشخص الاطراء والمدح
مثلا هون باخوية مشان تصير مثالي لازم:- 1- تسب الله 2- تبين انك ملحد بالرغم انو تلتترباعن مابيعرفو من الالحاد الا اسمو 3-تكون مع حقوق المرأة وتلعن سلسفيل الرجل 4-تلحمس للمشرفين والمشرفات الخ.......الخ..... وفي مشكلة كبيرة عمتصير هون انو لما بيجي واحد بيخالف احد العضاء لكبار باخوية وبيكون هالشخص مقتنع برايو والعضو العظيم عم يحاول يقنعو بس ماعميقتنع بيصير هداك العضو الي ماعميقتنع متخلف ومابيفهم والكل بينبذ هداك وبيصير مو من مستوى اخوية يعني باختصار (كل مين خالفني بالراي صار متخلف ومابيفهم) وهالشي موجود وماحد بيقدر ينكرو فهون منيجي لنقطة هامة انو لما يجي واحد يخالف شخص بيحمل الصفات اعلاه بتلاقي الكل قلب عليه وبلشو في تقطيع مثلا انت اخ اب طوني كم مرة بهدلت شخص خالفك بالرأي انت وغيرك كمان شكرا عالموضوع :D |
لووووووو عا هل الموضوع الطلقة هاد......حياتي أت.......يا رجول خلي الناس تفرغ عن الكبت الي عايشتو بل الحياة اليومية.....شو بدك تعريون من واقعون عايشين فيو.......سيدو بلكي الواحد ما بيئدر يعبر عن انسانيتو غير عن طريق النت......لانو بل الحياة اليومية القمع دابح سلف الي خلف بينا......وهاد شي بيصير معي وبلمسو خصوصي وئت انزل إجازة........غصب عن الي خلفني بدي ارجع اتقلم مع مجتمع محافظ.......يمكن هون بل الغربة مافي مين يقدر يقيد أفكاري...واخد حريتي بتعبير عن الي بدي يا......بس هونيك وئت برجع عا ارض الوطن في الف والف حساب بدي احسبون......مو كرمالي لاء ابداً كرمال اهلي ومجمتمع الي انا طلعت منو......وجد بتمنى انو ئدر كون هونيك متل هون.......بس أحيانا في اعتبرات بتفرض عليك تكون هيك.......ما بعرف انا شطحت شوي من الي ع تحكي فيو خيي بو طوني.....سامحني بس هاد الي طلع معي:D
|
اقتباس:
مين قال هالحكي ؟ :? مين قال انو المثالي بأخوية لازم يكون بيسب الله وملحد ... ومع حقوق المرأة وضد الرجال .. وفوق هيك ملحمس للمشرفين والمشرفات !:? يعني ازا كان الواحد مؤمن .. ومبين انو هوي مؤمن .. ومع حقوق المرأة بس مو ضد الرجل .. وبيحترم المشرفين والمشرفات وبيقدر تعبهن ... بس بدون ما يمسح جوخ ومن هالحكي بيكون مو مثالي بأخوية !:? اما نظرية طلعتلي فيها آخر هالزمن .. باينتك فهيم جداً ع فكرة ! :frown: |
موضوع المرأة المثقفة هوي الي اعطاني احساس مشابه .. ما أكثر المتحدثين عن التحرر والديمقراطية وهم في داخلهم عبيد للقوانين المجتمعية ويمارسون الارهاب الفكري بكل تفاصيل حياتهم على كل من حولهم . ما أكثر الأقنعة يا صديقي . مجتمعنا الحقيقي مجتمع من الأقنعة فما بالك بهذا المجتمع الالكتروني الذي لا يعلم به احد عن الاخر اي تفصيل من حياته . الكل ينتقد الفساد والرشوة و الاغلبية الساحقة مرتشية وفاسدة حتى النخاع . الكل يتحدث عن تخلف المجتمع والمجتمع هو نتاج هذا الكل . فالفرق بين ما هو نظري و ما هو عملي هو ما تراه على ارض الواقع بعد اغلاقك الانترنت او انفضاضك عن نقاش مع مجموعة من الناس . وظيفة النقاش هي التأثير الفكري على الاشخاص الذين يقرأون ويشاركون . فأنت تساهم من حيث تعلم ولا تعلم في تطوير طريقة تفكير هذا الآخر الذي ان علم طريقة التفكير الصحيح وطوّر اسلوب تفكيره سيكون أفضل فكرياً وبالتالي مع مرور الايام أفضل مجتمعياً . أنا شخص من الناس قد تغيرت كثير من قناعاتي هنا في صفحات هذا المكان واعني التغيير بكل معنى الكلمة . النقاش يطوّر الفكر ويؤدي لفائدة عامة . لا يمكن له ان يكون مضيعة للوقت . هاموش : حضرة جنابنا غير مستثنيين من كل الحكي الي كاتبو فوق . لا عم نظّر ولا زاود على حدا . |
اقتباس:
بس بصراحة انا مشكلتي مع مجتمعي ما بقدر صارحو بكتير شغلات يعني عنا عندهم قناعة بقانون الشرف وازا الواحد عرف اي شي عن بنتو لازم يدبحها وازا سمعو انو وحده اندبحت بضلو يسبو فيها مع انها ماتت انا بضل ساكته بس ما بقدر عارض يعني الخلاصة النت هو المكان اللي بقعد فيو من دون مكياج على طبيعتي |
هلق ابو طوني انت مبالغ شوي بالشغلة
يعني مو صحيح انو الكل او الغالبية عم تكون متل ما عم تحكي بالعكس تماما هلق باخوية حتى بتلاقي ناس لا مع تحرر المراة ولا يحزنون وبيدخلو الله بكلشي بس الفكرة انو هون في مجال تحكي فيه من دون ما يكون الرد فورا انو هيدا ملحد كافر وينشن عليك حرب كلامية وهيدا صار مع كتار بمنتديات تانية اضافة انو المنتديات الدينية يعني حدث ولا حرج وما بتوقع بيكون فيها كتير ناس من يلي عم تحكي عنون اميد في احيانا ناس بتحكي شي وبتعمل شي تاني تماما بس هي غالبا بتبين ضمن ردود تانية او لما بتتعامل معون بشكل شخصي |
اذا كان المشارك في النقاش يكتب المثاليات(كما يجب) وليس كما يعتقد فعلا فذلك يدل على اما خجله من افكاره او قناعته بعدم جديتها وان طرح افكاره المتخلفه شيء محرج فهذا امر جيد نوعا ما وان كان يعطي صورة مخالفة للحقيقة اوخادعة عن المجتمع ولكن قد نشعر بتغيير على المدى البعيد لان كثر التكرار (ان سمحتم لي) بعلم الحمار ولا بد في الاخر يتعلموا
|
اقتباس:
ومنكم نستفيد |
جوابي على الموضوع ...لصاحب الموضوع أقول ....كل إناء ينضح بما فيه ...و بالتالي اذا بدك تعتبر الآراء التي تسمعها على صفحات الأخوية هي انعكاس للواقع العربي ...هناك تكمن المشكلة ....لأن المشاركين هم جزء بسيط جدا ً جدا ً من المجتمع و فينا نعتبرهن الفئة المثقفة من المجتمع و هذا شيء إيجابي ...
يعني اذا بدنا نواجه كل الآراء و نكذبها و نوصفها بالشعارات و المثالية هيدا برأيي إجرام بحق صاحب الرأي و انت ليش متفاجئ بهل الآراء يا أخي إن خليت خربت .... أنا متأكد من إنو الشريحة يلي عما تتدلي بأراءها هون هي شريحة مثقفة و تتناول المواضيع بطرق عقلانية و لذا لا نستطيع أن نصف أراء الزملاء بالمثالية لمجرد أنها غير موجود على أرض الواقع لأنهم يشكلون خلية واحدة من جسد الأمة لا أكثر و برأيي يجب النقاش للإستفادة و الوصول إلى مجتمع متفكر يتقبل لغة الحوار و لو كان بهل العالم الإفتراضي |
اقتباس:
بس شوف غابي ما فيك تحكم عن مدري كم الف بني ادام بموضوع اذا كلو بدو يبيض وج و يقول ليكني انا ( سبوت لايت لهون شوي ) انا مع انو المرأة تتحرر و مع انو المرأة تشتغل و مع و مع و يمكن هوي بس ليخلص فتح نت بيمسك موبايل اختو بينبش فيه او اذا شافها ماشية مع واحد ما بخلي شي على شي بقا هلق هدول بدك تشوف منون كتير بس كمان هلق في عالم مزبوط عما تحكي و ذكرتني ب ( ناي لما كان عندها نفس الشعور بموضوع اغتصاب الزوجة يمكن ) و الأهم من هيك تعرف انو الانسان (البني ادام ) ما ببين معك الا ب 3 السفر و القمار بقا انو هون كلو بدو ينضف شخصيتو و يطلع هوي الحارق الخارق كسار الخواطر |
الله وكيلك درر يا ابو ويليم درر:lol: |
شعب ضليع بتبويس الشوارب و المجاملات للعظم ,,,هيك طبيعتنا ...
ثانيا ...كمان الواحد فينا بتلاقي بس بدو يكتب و حدا يسمعوا ..و هدا شي طبيعي جدا ,,يعني متل احيانا بتلاقي واحد عابيتباهى انو حذف رقم الفلاني او الفلانية من موبايلو ,,و هو بالحقيقة بدو من الله اي واحد بس يحكي معوا ,,,, ثانيا يا رجل ليش حامل السلم بالعرض ,,خلي الناس تحكي و تحس حالها مثالية شوي ,,,مو احسن ما يفرجوك قلة ادبون يعني لازم يكون شعار اخوية ...ما تجحّش !! محسوبك اجحش !! |
هلأ مزبوط في كتير ناس بتحط آراء مثالية ... و غالباً ما بكونو مقتنعين فيها ... و بتكون مجر عرض مثاليات
بس برأيي الشخصي .. مع الزمن عم تأثر فيهم هالأراء . و عم يبلشوا يتبنوها ( أو بعضها ) شوي شوي و عم تصير مسلّمات عم يآمنوا فيها و هادا شي إيجابي ... بس بدو وقت و بصراحة ... أنا عم شوف أغلب الاعضاء عم تتبلور أفكارون ( و يمكن تصرفاتون ) بعد فترة معينة بيقضوها بالمنتدى و ما بشوف نقاش المنتديات مضيعة للوقت أبداً |
اقتباس:
لو بتروح على منتديات عربية وخصوصا الخليجية متل (دمعة المابعرف شو وحب الجمل وسفينة الصحرا ومن هالحكي) كنت غيرت كلامك مية بالمية ميؤوس منن يارجل مرة فتت على منتدى من هالنوع وحطيت موضوع للنقاش مالقيت رد بيفش الخلق شي بيرفع الضغط مافي غير (مشكور) (لاتحرمنا من جديدك) (لاعدمنا اناملك) (جزاك الله خير) بقص ايدي اذا بتلاقو باي منتدى من هالمنتديات غير هالردود وخدلك من هالحكي بس أخوية غير شو بدنا بالحكي:larg: |
اقتباس:
ومن احد الفكر يلي عم حاول طبقها .. هيي فكرة حق الخصوصية ... انا وقت حكيت بالموضوع ما حكيت بمثلية .. بس بنفس الوقت ما حكيت بجرأة كاملة ... ما حسيت حالي اني عم احكي يلي عم ساويه انا فعلاً ... ومن خلال قرائتي لكتي من مشاركات الاعضاء شعرت بالتغيير .. وبصراحة ... صرت عم درّب حالي احتر هالحق (حق الخصوصية )اكتر واكتر ... انشالله ما حدا يشوف حكيي تنظير ومثاليات هالمرة .. لنو انا عم احكي الواقع :lol: بس صحيح نسيت علّق على فكرة انو نقاش المنتديات هوي مضيعة للوقت او لأ ... هلأ هون في نقطتين : 1- نقاش بمواضيع الها علاقة الفرد ومحاولة تغييرو لمجتمعو .. بشوف انو النقاش بهيك مواضيع في منها فائدة وفي تغييير نحو الافضل 2- نقاش بامور سياسية ومن هالحكي ! ما بتوقع انو في فائدة عم تطلع لما واحد يطلب قتال اسرائيل مثلاً وواحد ضد هالحكي ... يعني مثلاً متوقعين صوتكن يوصل .. متوقعين حدا يرد عليكن .. ويلا تعو نروح نقاتل اسرائل ؟؟! انا طرحت مثال .. وانتو طبقو امثلة على كيفكن على نفس النقطة و :D |
| الساعة بإيدك هلق يا سيدي 18:08 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
