أخوية

أخوية (http://www.akhawia.net/forum.php)
-   منبــر أخويـــة الحــــــر (http://www.akhawia.net/forumdisplay.php?f=15)
-   -   أمة عربية واحد! (http://www.akhawia.net/showthread.php?t=129336)

Dndoshy 18/09/2009 23:40

أمة عربية واحد!
 
أمة عربية واحدة..احدى شعارات حزب البعث العربي الاشتراكي يلي بتدعو للوحدة العربية

ويلي بتعتبر العرب كيان واحد من المحيط الى الخليج وبتقوم هالوحدة على عدة مقومات منها اللغة الواحدة والشعب الواحد والتاريخ المشترك والعادات والتقاليد المشتركة...

من حيث اللغة الواحدة فهالشي غير صحيح لأن الانسان يلي بعيش بمنطقة بلاد الشام ما بيفهم ولا كلمة عالانسان يلي بيحكي خليجي وكمان هالشي بالنسبة للانسان يلي بيحكي مغاربي

والشعب الواحد..وهالشي كمان غير دقيق لأن مثلا بسوريا موجودة عدّة شعوب وقومبات مثل الشركس والفينيق والأكراد والأرمن ونسبة العرب الهاجرين من شبه الجزيرة لسوريا مو كبيرة

والوطن العربي مؤلف من عدة أقاليم(اقليم بلاد الشام واقليم شبه الجزيرة واقليم مصر واقليم المغرب العربي)..وكل من الأقاليم مر عليه عدد من الأحداث الكبيرة المؤثرة ولم تكن مؤثرة على بقية الأقاليم مثل الاحتلال العثماني يلي دام حوالي أربعمئة سنة وما كان فيه تأثير ببلاد المغرب العربي متل التأثير يلي خلفه في بلاد الشام...

وحتى من حيث العادات والتقاليد فالعرب غير مشتركين بعاداتن مثل الدبكة اللبنانية-والسورية-يلي هي غير موجودة ببقية الدول العربية



فـ على أي أساس العرب أمة عربية واحدة!

Nay 19/09/2009 00:59

معاداة أهداف الثورة واضعاف الشعور القومي.. ممكن كمان نشر أخبار كاذبة.. 4 سنين على الاقل
ضبضب كاساتك من البار وجهزلي حالك:hashish:

abosleman 19/09/2009 01:10

اي معلم .. اي .. هي كذبة صنعا التاريخ
وبدك تصدق ... لك صدق يا زلمة وقفت على هيك ..

دخيلك ..

mblue 19/09/2009 01:26

في نقطة بدي احكي عنها لو كانت بعيدة شوي عن اساس الموضوع ...
ليش عم تعتبروا انه اللهجات هي لغات ؟
اللهجة مختلفة عن اللغة ... والاختلاف اللي انت ذكرته انه اهل الشام ما بيفهمو على اهل الخليج واهل مصر ما بيفهموا على اهل المغرب والخ ... هاد سبب اختلاف اللهجة مو اختلاف اللغة .
يعني اللغة العربية هي اللغة الفصحى ... واللي لما بدك تقول انه في ناس ما عم تفهمها فهاد الشي ناجم عن اندحار الفصحى مقابل اللهجات العامية واقتصارها على بعض المواقف الرسمية .( يعني حتى بالتلفزيون عم نشوف كتير قنوات عم تدعم التكلم باللهجة العامية حتى ضمن البرامج الرئيسية ونشرات الاخبار )
بقى الاختلاف هون هو اختلاف اللهجة اذا كنت عم تحكي انه الخليجي ما عم يفهم على الشامي وغيره .

abosleman 19/09/2009 01:36

عزيزي .. فعليا في عندك اختلاف باللغات
على اعتبار انو في قوميات موجودة .. ومتل ما ذكر الاخ بالبداية انو في عندك قوميات مختلفة
وهي القوميات إلها لغتها الخاصة .. وفيك تقول انو بعضن سكان اصليين ..

إذا انا غلطان خبرني

mblue 19/09/2009 01:45

اقتباس:

كاتب النص الأصلي : abosleman (مشاركة 1336323)
عزيزي .. فعليا في عندك اختلاف باللغات
على اعتبار انو في قوميات موجودة .. ومتل ما ذكر الاخ بالبداية انو في عندك قوميات مختلفة
وهي القوميات إلها لغتها الخاصة .. وفيك تقول انو بعضن سكان اصليين ..

إذا انا غلطان خبرني

صحيح وانا ما نكرت هالشي هاد ... بس هو ما كان عم يحكي عن اختلاف اللغات في نفس الارض ... هو كان عم يقول انه لغة عربية واحدة ... ولكن الخليجي فيها ما بيفهم على السوري ولا على المصري ولا على المغربي وصعب كل واحد منهم يفهم على "العربية" اللي بيحكي فيها الشخص التاني ، وما كان القصد على تنوع اللغات، لو كان القصد تنوع اللغات فنحن ببلد وحدة متل سوريا ممكن نكون خمسة واقفين مع بعض وكل واحد يحكي بلغة ما بيفهموها اللي واقفين جنبه .
انا الفكرة اللي بدي قولها انه نحن لازم يكون عنا تمييز بين اللغة واللهجة :D

اقتباس:

من حيث اللغة الواحدة فهالشي غير صحيح لأن الانسان يلي بعيش بمنطقة بلاد الشام ما بيفهم ولا كلمة عالانسان يلي بيحكي خليجي وكمان هالشي بالنسبة للانسان يلي بيحكي مغاربي

حلبي 19/09/2009 01:50

هاد شيئ عادي و عادي جداً

طبعاً أنا ضد الأجحاف بالقوميات الأخرى و هضم حقوقهم التعليمية في اللغة و ممارست التراث اللي بفتخرو فيه

لكن أريد التنويه الى أن الأمة الصينية ليست كلها صينيين و الأنكليز في المملكة المتحدة ليسو أنكليز يعني لازم يصيرو مليون دولة و كل ملة يصرلها مقعد في الأمم المتحدة

يعني الحزب يدعو الى الأمة العربية الوحدة فهذا هدف و من حق اي حزب أن يكون له هدف

فمثلاً الحزب القومي السوري يؤمن بأن قبرص تتبع الى بلاد الشام ضمن أهدافه اللي هي سوريا الكبرى

المهم التطبيق البعث جاء الى سدت الحكم في سنة 1963 الى الأن هل حقق هذا الهدف ؟؟؟؟؟؟؟

abosleman 19/09/2009 01:50

اتفق معك ... :deal:

بس هالشي مارح يغير الفكرة الاساسية بالموضوع ..

ورده بغداد 19/09/2009 02:08

الحزب من اول نشئته والى اليوم غلط

والدليل فشل في العراق ولبنان

وماعندو اي منجزات اتحققت من كلامو واهدافو

saman 19/09/2009 02:22

اقتباس:

كاتب النص الأصلي : mblue (مشاركة 1336318)
في نقطة بدي احكي عنها لو كانت بعيدة شوي عن اساس الموضوع ...
ليش عم تعتبروا انه اللهجات هي لغات ؟
اللهجة مختلفة عن اللغة ... والاختلاف اللي انت ذكرته انه اهل الشام ما بيفهمو على اهل الخليج واهل مصر ما بيفهموا على اهل المغرب والخ ... هاد سبب اختلاف اللهجة مو اختلاف اللغة .
يعني اللغة العربية هي اللغة الفصحى ... واللي لما بدك تقول انه في ناس ما عم تفهمها فهاد الشي ناجم عن اندحار الفصحى مقابل اللهجات العامية واقتصارها على بعض المواقف الرسمية .( يعني حتى بالتلفزيون عم نشوف كتير قنوات عم تدعم التكلم باللهجة العامية حتى ضمن البرامج الرئيسية ونشرات الاخبار )
بقى الاختلاف هون هو اختلاف اللهجة اذا كنت عم تحكي انه الخليجي ما عم يفهم على الشامي وغيره .

ازا القصة عاللغات .... هي في استراليين لغتهن انكليزي .. بس هني استراليين مو بريطانيين
وكزالك الاميركان
وفي تلت رباع دول افريقيا لغتها الفرنسي ... بس هني مو فرنسيين وولا حتى عالجنسية

بعمرق شفت حدا من هدول الشعوب قالوا عن حالهن .. امة انكليزية واحدة ... او امة فرنسية واحدة ؟ :?

mblue 19/09/2009 02:28

اقتباس:

كاتب النص الأصلي : saman (مشاركة 1336369)
ازا القصة عاللغات .... هي في استراليين لغتهن انكليزي .. بس هني استراليين مو بريطانيين
وكزالك الاميركان
وفي تلت رباع دول افريقيا لغتها الفرنسي ... بس هني مو فرنسيين وولا حتى عالجنسية

بعمرق شفت حدا من هدول الشعوب قالوا عن حالهن .. امة انكليزية واحدة ... او امة فرنسية واحدة ؟ :?

لا لا مو هيك قصدي ... يمكن انا غلطت حكيت بهي القصة هون ... القصد انه الاختلاف اللي انذكر فوق ماهو اختلاف لغة هو اختلاف لهجة ... مو اكتر من هيك

THE_unforgiven 19/09/2009 12:13

العرب أمة واحدة .. وقوم واحد .. (الأمة = القومية .. )
وبيجمعهن :"اللغة الواحدة والأرض الواحدة والتاريخ المشترك والعادات والتقاليد المشتركة والمصير والألام والآمال المشتركة "


اللغة الواحدة .. واللي هيي اللغة العربية ..
أكيد عم أحكي عن اللغة العربية الفصيحة واللي هي نفسا بكل الدول العربية .. للأسباب التالية .. :
- لها نفس الأحرف الأبجدية
- تكتب بنفس الطريقة ولها نفس القواعد
- لفظها موحد
أما اللغة العامية .. فهي بتختلف من دولة عربية إلى أخرى .. وبسبب اختلاف اللهجة (واللتي تتبع لمناخ وطبيعة المنطقة ولتاريخ شعب هذه المنطقة والظروف التي أدت إلى تشكيل هذه اللهجة .. )
ولكن بتبقى اللغة العربية .. مع اختلاف لهجاتها بين الدول العربية لغة واحدة ..
وبالتأكيد من الخطأ ان نقول هي غير مفهومة بين الدول ..ممكن أنو ينشأ بعض الإلتباس ببعض المفردات ..
ولكن بشكل عام بيقدر شخصين عربيين من دولتين مختلفين أنو يتفاهمو ويتحدثو بشكل طبيعي .. بدون أية مشاكل ..
مع العلم أنو بالدولة الواحدة .. ممكن ان يكون أكثر من لهجة ..
خود مثال بسورية .. عنا اللهجة الحلبية والدمشقية واللاذقانية والحمصية ولهجة أهل الجزيرة ..
وهالشي بسبب طبيعة المنطقة .. وكلنا منعرف انو اللهجة الداخلية تقيلة شوي .. بسبب صعوبة المناخ .. وقساوتو .. وبالعكس تماماً اللغة الساحلية ..
وعموماً .. هيي .. لغة عربية ..
فإذا .. العرب الهم لغة واحدة ..

الأرض الواحدة ..
الشعب العربي بيسكن عأرض الوطن العربي الممتدة من الخليج إلى المحيط الأطلسي ومن الفرات إلى هضبة الحبشة .. هي الحدود الطبيعية للوطن العربي بغض النظر عن الحدود السياسية ..
وهي نفسا من مئات السنين ....

التاريخ المشترك
فالعرب إلن تاريخ واحد .. وذكريات واحدة .. كلنا منذكر الإحتلال العثماني والصليبي والفرنجي ...
ماكان جزء من العرب عرضة للإستعمار وبس .. كل العرب كانو مع بعض .. عرضة للإستعمار ومازالوا ..

والعادات والتقاليد المشتركة

في تقاليد معروفة وموحدة بكل الدول العربية .. "وأكرام الضيف .. والشهامة .. الخ ."
كلها عادات وتقاليد انعرف فيا العرب وبتختلف عن العادات والتقاليد الخاصة بكل منطقة .. والتي هي بالأصل متفرعة عن العادات الموحدة .. وبتختلف عنها في طريقة تطبيق العادة ..
ف مثلا .. اكرام الضيف في سوريا .. بيختلف عن اكرام الضيف في مصر .. من حيث نوعية الطعام والأحداث التي تقوم ..الخ .. ولكن بيبقى الضيف مكرماً ..


والمصير والألام والآمال المشتركة
فالعرب الهم مصير واحد .. اينما كانوا .. وكيفما كانوا ..
فاستعمار دولة ... من الوطن العربي .. لايعني أن الهدف الدولة بذاتها .. بل كل الوطن العربي ..
والتاريخ .. مليء بالبراهين ..


في فرق بين الأمة والدولة والشعب ..
فمقومات الدولة "الأرض والشعب والسلطة "
وعملياً .. بالوقت الحالي .. العرب أرض واحدة .. ولكنا مجزأة سياسياً ..
وشعب واحد تاريخياً .. ولكن تجزأ إلى شعوب متفرعة عن الشعب الأساسي .. الها نفس السمة الأساسية .. بأنها عربية .. فمنقول .. " الشعب المصري .. السوري .. الجزائري .. " ولكن بالمجمل .. شعب عربي ..
مافينا نقول عن الشعب الفرنسي أنه عربي .. ولا لأي سبب من الأسباب ..
ومافيك لمجرد انو الشعب الأمريكي حكي انكليزي .. صار بريطاني .. البريطانيين والأميركيين .. مختلفين .. بالأرض وبالتاريخ وبالعادات وبكلشي .. مع انو بيشتركو باللغة .. بس كل واحد إلو قوانينو .. والأميركان أصلن بريطانيين ..
بس وقت اللي هاجرو البريطانيين ع اميركا .. تغيرت الأرض .. تغيرت القارة .. وشكلو حضارة جديدة وشعب جديد .. واستخدمو اللغة الإنكليزية .. وطوروها .. لتلائم طبيعة امريكا .. وصارت إذا بدك اسما لغة أمريكية .. مو انكليزية ..


أما السلطة السياسية .. فهي مختلفة من دولة عربية إلى أخرى .. مع انها كانت موحدة ايام الدولة الإسلامية ..

الدولة ممكن ان تحوي على أكثر من أمة .. سويسرا مثلا .. فيها عدة قوميات وأمم .. ولكنها دولة واحدة .. لهانظام واحد .. وعملة واحدة .. وقوانين تطبق على الجميع ..

فإذا العرب تاريخياً .. هم أمة واحدة .. ودولة واحدة .. وشعب واحد ..

أما حالياً .. فهم فقط امة واحدة .. وذلك بسبب الإستعمار والظروف التي سادت في القرن الماضي ..
فحتى القرن العشرين .. كان العرب دولة واحدة .. وأمة واحدة .. وشعب واحد .. ورح يبقى رمزياً هكذا .. حتى لو كان شكلياً غير ذلك ..

.
.
.
THE,unforgiven ... "

THE_unforgiven 19/09/2009 12:17

اقتباس:

ن مثلا بسوريا موجودة عدّة شعوب وقومبات مثل الشركس والفينيق والأكراد والأرمن
حبيب مصطلح شعوب .. غلط .. سوريا فيا شعب واحد هوي الشعب العربي السوري ..
ممكن يكون فيه قوميات تانية متل ماقلت كردية وأرمنية .. بس هودي اندمجو مع الشعب السوري تحت جناح الدولة ..
وسبق وقلت بردي الأول .. انو الدولة ممكن تحوي اكتر من قومية .. بس فيا شعب واحد .. مافي دولة فيا شعبين ..
عندك بأميركا مثلا .. في قوميات يهودية وعربية وأجنبية وافريقية .. وحيوانية ... وأشكال وألوان .. بس بالمجمل هيي دولة واحدة ..
..
.
.
المهم الخلاصة .. انو إذا عم تتشكل دول من عدة قوميات .. فهل بيكون تشكيل دولة عربية واحدة مجدداً .. من أمة واحدة .. هوي معضلة !؟

ابو نجبو 19/09/2009 14:05

اللي عمبيقارن بين العرب و انكلترا أو فرنسا أو أمريكا .....الوضع مختلف

القارّة الامريكية و مستعمرات الدول الاوربية كلها مبنيّة على استيراد بشر و زرعهون بدال السكّان الاصليين ....

فما في مجال للمقارنة بين الوضعين ....

ابو نجبو 19/09/2009 14:11

حلو مفهوم الدولة الواحدة الكبيرة الممتدة على مساحة كبيرة و ذات قدرات بشرية منتجة مصاحبة لثروات طبيعية هائلة...



بس لمّا بيتغير مفهوم الفرد ....ويصير ولائو لهالدولة ...مو لقبيلتو أو طائفتو أو أبناء دينو ....

لما بيتحول ولاء الفرد من الزعيم ...الشيخ ...قسيس .....للوطن




وهاد الشي شبه مستحيل يصير .....

Dndoshy 19/09/2009 18:38

اقتباس:

كاتب النص الأصلي : Nay (مشاركة 1336295)
معاداة أهداف الثورة واضعاف الشعور القومي.. ممكن كمان نشر أخبار كاذبة.. 4 سنين على الاقل
ضبضب كاساتك من البار وجهزلي حالك:hashish:

يي:i7raj:..كيف راحت عن بالي..:tears:
ليكو يا شباب :detec: هاد الموضوع مو من عندي:dunno:هاد من أفكار ناي وهي ابتزتي ميشان اكتبو :jakoush:

ritka 20/09/2009 01:23

بغض النظر عن كل الامثلة اللي كتبها دنوشي فوق .. و بغض النظر عن كوني مقتنعة فيها او لا.. و بغض النظر عن كل اللي قالو و رح يقولو انو تاريخ واحد ثقافة وحدة .. الخ الخ الخ

هالشي ممكن يكون مزبوط , و لو فرضنا جدلا انو صح مية بالمية .. هاد كلو ما بيهمني
بيهمني الواقع اللي عم نعايشو اليوم

وقت نصير امة بتوقف جنب بعض بالسراء و الضراء (نقف بالضراء ابدا ما بتعني مظاهرات و استنكار ..الى ما هنالك من اشيا زهقنا منها, و لكنها بتعني وقفة... حقيقية)
وقت نعطي الامتيزات اللي منعطيها لغير امم اقل ما فيها امتيازات اقتصادية (ع سبيل المثال لا الحصر) لبعض..
باختصار, وقت نطبق معنى امة وحدة نعيش سوا نوقف مع بعض ع الحلوة و ع المرة
وقتها و وقتها بس منصير امة عربية واحدة.. غير هيك "بطاطا"

دمتم .. بود:akh:

رجل من خيطان 26/09/2009 20:50

بدي أحكي عن اللغة شوي على كلامك لنصر دولة عربية لازم يكون عنا صفاء روحي وتنقية لتشعباتنا الفكرية يلي للأسف عم تنحدر رويداً رويداً لتوصلنا للتجزأة النهائية تحت رغبة دخيلة بعدم رؤيتنا ضمن بوتقة الأمة الواحدة يلي أذا بترجع للتاريخ بتتعرف عليها أكتر ...صديقي نقاشك لا يحمل إثباتات أو يمكن أن يعطينا أفادة ويلزمنا بتجزأتنا يلي بدأت من هنا ........ الأنقسامات الداخلية ........... لازم وضحلك شي نحنا لما بدنا نئول يا سوء يا شر رح نلائي أنو ما لازم نتعامل مع بعض كبشر أما نحنا لما نؤول يا محبة كلنا رح يكون ألنا لغة وحدة وتعال لألك مثال .... انا مطلع على شجرة لإحدى العيل الدمشقية القديمة ......... وملائي أنو في ألها فروع بتونس . فياريت لما بدنا نحكي عن أمة نحكي بشكل أثباتي وبوقائع يعني مو ضروري أدرس خليجي لصير أفهم على أبن عمي أذا بدنا نرجع للتاريخ أما هي الحدود فصدئني مو نحنا يلي حطينا بس هيك أحاديث رح أـساعد على أستمرار وأعذر تدخلي أنا لست حزبيا وإنما أنتمي لعروبتي جداً وأعتبر من في مصر وفي الخليج ............الخ أخوتي بالدم وهذا نهجي وعلى ما أظن أنني حر


الساعة بإيدك هلق يا سيدي 21:21 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.04780 seconds with 11 queries