|
بين دمشق والعالم
لفت نظري حديث العضو ابو حلب المتكرر عن السياسة الخارجية السورية في وقت تشهد فيه دمشق توترا مع عدد من الدول العربية والعالم لاسباب عدة
وفي وقت اخر تشهد فيه علاقات سوريا مع دول اخرى فترة غزل متبادل رغم انها كانت في مرحلة من المراحل من الكبائر في التعامل معها من المعروف ان السياسة الخارجية السورية تتعامل بمبدأ دبلوماسية الربع ساعة الاخيرة او كم يصفها احد الساسة اللبنانيين : سياسة لا لا لا نعم البعض اليوم يرى ان الخارجية السورية انهت فكرة العشيرة وبدات تتعامل بمبدأ المصلحة بينها وبين الغير والبعض الاخر يرى ان الخارجية تتعامل مع القضايا الخارجية على مبدأ الله محيي الثابت . كيف ترى السياسة الخارجية لسوريا؟ رجل من ورق |
سياسة اللعب مع الوقت وخاصة الوقت الضائع والاضافي بتوقع بتلخص السياسة السورية الخارجية ويلي برايي الى الان بينت انها فعالة لتحقيق الطبقة الحاكمة عنا اهدافها دون النظر انو اولاواخيرا شعب باكملو عم يتعرض لمنعكسات هالسياسة سواء اكانت ايجابية او سلبية.
الى الان ما اجت سياسة خارجية قادرة على التعاطي بتشعب وتضاد متل السياسة السورية ويلي شوي شوي عم تجني ثمار هيك سياسات . صوابية هيك اسلوب او عدمها هيي موضوع تاني . برايي انو تكلفتها عم اتكون باهظة على فئات كتيرة من الشعب السوري ومجدية على الصعيد الخارجي |
تحية
خليني احكي ضميري بغض النظر عن الظروف و الأوضاع الداخلية التي لا يمكن غض النظر عنها و بغض النظر عن التوقيت التي تتم فيه هالقصص و اللي كمان صعب الواحد يغض نظر عنها برأيي:انو السياسة الخارجية السورية ناجحة نسبيا (مشكور انشتاين) دعونا ننظر الى العالم من فوق يعني اقصدي من شي قمر صناعي منلاحظ انو كفة الميزان منزاحة حاليا بدون ادنى شك الى القطب الوحد حاليا يلي هوي اميركا و ولايتها الجديدة (نسيت شو اسمها ما عندي ياها بالقاموس:p) طيب منطلع على كافة المناطق الأخرى منشوف انو في مجموعة قوى عالمية جديدة قيد البناء بس سريعة بشكل لا يمكن ايقافه هالقوة الجديدة ممثلة بروسيا _الصين_الهند_جزء من كوريا_بعض الدول الوروبية هاي الدول يلي برأيي الشخصي انها قادرة على خلق توازن جديد بالعالم سوريا عم تبني معها علاقات خارجية جيدة جدا (ما بدي اطلع عن الموضوع بس برأيي انو الأزمة الاقتصادية العالمية يلي الكل بيعرف انو اميركا هيي سببها هدفها محاولة ايقاف النمو الهائل لدول العالم الأول الجديد)و السياسة الخارجية السوريا برأيي عم تعرف تتعامل مع الموضوع(لعفا نسينا ايران هلأ بيزعلوا الشباب) و ما حابب احكي عن العلاقات السورية العربية لأنو بستحي و بحبط كمان تحية:D |
من مصطلحات الخارجية السورية:
حق الرد في المكان الوقت المناسبين السلام العادل والشامل دورنا الوطني والقومي تعزيز العمل العربي المشترك والتضامن العربي |
اقتباس:
|
يعني بصراحة وبدون لف ودوران.........هلأ يمكن سياستنا الخارجية ناجحة نسبيا بس بدك تشوف ع حساب شو يعني نحنا مثلا قضينا حوالي 30 سنة نتاجر بالقضية الفلسطينية وبالسلام العادل والشامل وتحملنا البهدلة والتعتير كرمالها......وهلأ مستعدين نبيعون بقشرة بصلة -مع احترامي للقضية- كمان لأنو هنن باعو القضية ......... يعني كل هالوقت راح ع الفاضي ....... |
موضوع حلو ،
هلأ بالنسبة للعلاقات الخارجية ، فـ أنـا بشوف سـوريا بأغلب الأوقــات بتلعب الدور الذكي بسياستها الخارجية و بثوابت مواقفها إن كان شعباً أو حكومة .. هلأ بالنسبة للعزلة و المشاكل يلي صابت سـوريا خارجياً من فترة .. فـ هاد الشي يا جماعة مو يعني أنو سـوريا كانت على طريق خطاً .. لأ !! في شغلة بحب قولها "إن من إستباحت كرامته وفضت بكارته مستعد أن يفعل أي شيء لكي يسلب الآخرين ما فقده" وهاد هوه كان حال أغلب الدول العربية ضد ســوريا وللأسف طبعاً ، و المشكلة أنو عتبوا و قاطعوا سوريا لأنها تتحالف مع إيران لدرء الخطر الصهيوني !! وبكل صراحة .. بـ فترة العزلة نوعاً ما .. كنت جداً مستغرب من مقالات و مشاركات نُشرت على الإنترنت تكيل المدائح للأنظمة العربية التي تدور في الفلك الأمريكي بينما تصب جام تعليقاتها الحاقدة على سورية الدولة التي ما زالت تحاول المقاومة و الصمود رغم تكالب الغريب و القريب عليها. وبـ موضوع القمة العربية .. لكل الـ "زعماء" يلي ما حضروا القمة أثبتوا وبكل جدارة أنهم وكما قال الرئيس بشار الأســد فيهم أاشبها و أنصاف رجال ، قرارهم ليس بيدهم وإنما بأيدي الصهاينه والأمريكان. فـ لما بشوف كل هالأحداث ، وكل هالمواقف .. و تكالب القريب و البعيد على سـوريا .. بعتبر هالشي نقطة قوّة إلي كـ سـوري صامد .. صامد .. و ثابت .. وبالنهاية .. بالنهاية .. الغرب أتى إلى سـوريا .. و فـكت العزلة .. (هلأ ما بهمنا أنو صار يلي بدهن يصير .. ع قد ما بهمنا أنو صار بإرادة و مع مصالح و مكاسب و إحترام لـ سوريا) لأنو نحنا ما منجي بالعالي .. و لا منجي بالغصب .. نحنا دولة إلها سيادة والمفروض إحترام هالشي من هالمنطلق بالذات .. بخليني أشعر بالفخر كـوني سـوري ، ويا جماعة الخير صدقوني أنـا وين ما رحت بدول الغير عربية .. بلاقي حـُب عميق من قبل الشعب لـسوريا أمـا الشي السلبي يلي عم يتعرض إله الشعب السوري بكل مكان .. فـ هاد شي سياسي فقط! يعني أميركا بتقول ضيقوا ع السوريين .. أذناب أميركا شاطرين يقولوا أمرك ماما .. رح نضيّق آخر شي ، ما بحسن أجزم على أنو السياسة الخارجية دائماً على صواب .. لكن بأغلب الأوقات بشوف أنو سـوريا بتتعامل بذكاء و دهاء وحكمة ، و الأيــام رح ثبتت و رح تثبت هاد الشي. تحياتي , |
اقتباس:
كرامتنا انو ساركوزي يجي يشرب قهوة عنا؟ ازا هاي كرامتنا فما أرخصها من كرامة... وين المصالح؟ اذا عملنا بالنهاية ما هو مطلوب منا و أكتر كمان... و حاج يا زلمة مكاسب و احترام لأنو فوق ما عملنا شو بدنا لسى فوقها لساتنا محاصرين... و بحاجة "أنصاف الرجال" اللي عم تحكي عنهون.. لأنو بذكرك انو أكتر من مليون سوري عم يشتغلو بالبلاد المحكومة بـ "أنصاف الرجال", و هالشي لا يعني انو لازم ينمسحلهون جوخ لكن مانك قادر تعمل سياسية ناجحة (و السياسة الناجحة هيي انك ما تكون بحاجتون و ستين طز فيهون) عدا عن أنو في كتير رؤوس أموال مهرّبة من سوريا, لكبار مسؤولين, و عينك عينك و عالمكشوف, عم يروحو يستثمروها ببلاد "أنصاف الرجال" أخي أبو حلب من الآخر, لأنو ما بدي فوت بمعمعة طويلة ما رح يطلع منها طائل.. السياسة علم (أي أي علم) و متل كل علم.. اللي بالقدر يطلع بالمغرفة.. يعني ما بينفع تقلي السياسة الخارجية ناجحة لأنو يُفترض انو حفظت كرامتنا (بقول يفترض لأنو أنا ما شايف هيك شي), لما نتيجتها كانت كسرة عين و من العيار الثقيل.. فالشغلة مانا شغلة حفظ كرامة, لأنو اي حكومة تحترم حالا تكون كرامتا و كرامة شعبا أكبر بكتير من انو حتى ينحكى فيها, مفروغ منو هالشي, انما تكون سياسة ناجحة أو خاسرة, تبعا للنتائج, و النتائج واضحة و هيي انو عملنا المطلوب منا.. و اجو عطونا قطعة سكر مكافئة |
اقتباس:
هاد رايي الشخصي وبحترم كل الاراء الموجوده |
والله يا ساتو رايك في محله.........سياسة ناجحة ومبهرة كمان
|
في كتير سؤال عم يخطر ببالي انو ليش سياستنا الخارجية تتبلكم(كلمة ما بعرف من اي لهجة) لما بيصير في ازمة
متل وقت تقرير ميليس وغيره ؟ يعني في شي اسمه دبلوماسية الازمات وينها عنا؟ |
يا سيدي أنا اللي عم أقول انو نحنا عم نتاجر بالقضية ......مابعرف إذا في حدا تاني عم يقول متلي بس هاد رأيي
أنا ماقلت انو سياستنا الخارجية فاشلة ولا شي بس عم انو اللي ماسكين البلد عم يتاجرو بهالقضية ........... يعني كأنو لاحظت انو ما عدنا نحكي ع تلازم المسار ووحدة المصير وووو.... يعني هلا لما صارت مفاوضات غير مباشرة مع اسرائيل عن طريق تركيا ماكنا مستعدين انو نتخلى عن حماس والجهاد الإسلامي كرمال نعمل سلام مع اسرائيل ؟ و بقلك كمان انو هالشي ما كان راح يأثر ع علاقتنا مع إيران لأنو سلامنا مع اسرائيل هو ضمن اتفاقية اقليمية من ضمن بنودها النشاطات النووية الإيرانية واستعداد سوريا لتقديم ضمانات بهالخصوص........ وممكن تقلي انو انت يعني مقهور او محبط من الدولة لأنك مو واصل أو مدعوم.... بالعكس أنا مع أنو عمي عندو مركز كتير مهم بالدولة عم أحكي هالشي ......... وبعرف -مابحسن قلك اني بعرف كل شي- بس يعني على الأقل بحسن قول اني بعرف شلون سياستنا بتشتغل......... |
كيف بدها تكون السياسة الخارجية ناجحة خيي أبو حلب والداخليو ملتعن سلاف سلافها , كيف بدها تكون السياسة الخارجية ناجحة وأنا كإنسان سوري عندي إمكانية أحصل على أجر شهري بيعادل رواتب الشرف لنص الوزارة وبنرفض لأنو جنسيتي سورية , كيف فيك تفصل سياسة البلد لداخلية وخارجية وكل وحدة ماشي باتجاه , كيف البلد ملعون ربها وسياستنا الخارجية ناجحة , دخلكون حدا يقلي شو الغاية من كل السياسة , إذا كان الغاية أنو يصير المواطن السوري متسول على أبواب أنصاف الرجال بعد اللي الرجال الكاملين خلصو كلشي حتى لقمة العيش
ومقارنة عم مين عم نقول إنو الساسة الخارجية ناجحة , مقارنة بموزامبيف ونيكاراغوا والصومال ميك ناجحة وأجت على بالي قصة بتأكد أنو ناجحة بامتياز ورح أكتبلكون القصة بقسم القصة , إذا لا سمح الله أنصاف الرجال اللي هون ما سكروا الموقع متل الرجال ونص اللي مسكرين الموقع من سوريا , ورح سمي القصة "تفوق " |
اقتباس:
اقتباس:
اقتباس:
بالبداية شو رأيك تثبت على موضوع واحد لنتناقش فيه لأنو كل رد ألك بدها موضوع كامل ... تاني شي ... أنا مؤيد تماماً للسياسة الخارجية السورية ( معارض تماماً للسياسة الداخلية السورية ) يعني سوريا أثبتت للكل و بدون استثناء أنها عم تشتغل صح و سياستها صح و حققت كل نتائجها و كانت كل تحذيراتها و كل مخاوفها بمحلها اللعبة السياسة الي بتلعبها سوريا بالنسبة للعلاقات الخارجية عاجزة أكبر دول العالم على لعبها المدرسة الدبلوماسية السورية محترفة و بتعلم الكتير من الدول و السياسيين بس طبعا لما بيكون الشخص معارض للحكومة بشكل كامل بدون ما يعطي أي مجال لرؤية الإيجابيات و السلبيات فأكيد ما رح تعجبوا السياسة السورية مو من ناحية شي بس من ناحية المبدأ أنو أنا لازم عارض وفي كتير مواقف و سياسات اخدتها سوريا و الكل عارض و ما عجبتو ( و منهم أنا ) بس بالأخير توضحت أمور و أكتشفنا أنو .... الحق معنا و التصرف كان سليم الحنكة بالسياسة السورية ممتازة و ما في شبيه ألها |
ياريت من الشباب يلي عم يمدحوا السياسة الخارجية . وكأنو الحكومة حكومة الشعوب الخارجية . مو حكومة سورية . يذكرولنا شو أستفاد الشعب السوري من هالسياسة المحنكة الفظيعة . يعني أي أتجاه المفروض يبين أثرو على الشعب لأنو هاد الشعب هو المهم . وهو يلي بينجح بالأنتخابات . والسياسة الخارجية بتكون ناجحة لما بتحقق لمواطني البلد بعد أقتصادي تجاري معرفي عالمي . مو مجرد تدخل بشؤون الدول المجاورة . أو أقامة تحالفات ضد كل ماننادي به من قومية وعروبة وأمة واحدة الخ الخ
|
اقتباس:
وكمان يسلمولي الفهمانين مافي احلى من سياستنا الخارجيه |
اقتباس:
ممكن توضحلنا كيف كنا ننادي بتلازم المسارات وبعدين ماعاد في تلازم . ممكن تفرجينا وين الصوابية كنا ندعم كل فريق 14 أذار ولحنا يلي كنا ننجحهم بالانتخابات وعملنالهم زعامات . وبعدين أنقلبو ضدنا ممكن تفرجينا وين الصوابية حاربنا كل الدنية مشان نعيد أنتخاب لحود . وبعد بفترة قلبنا برئيس نتوافق عليه مع الباقي ممكن تتفرجينا وين الصوابية عملنا أحتفالات مجلجلة لما أجا شيراك لعنا . وعملناه حفيد ديغول اللي مالو مثيل . بعدين صار هو حامل لواء محاربة سورية . كمان مرة وين الصوابية نادينا لأنتخاب سيغولين رويال بأجهزة أعلامنا . وكأنها سورية مرشحة للأنتخابات الفرنسية . ولما زارنا ساركوزي صار هو الرئيس الفرنسي يلي مالو مثيل . مو متل سلفو شيراك يلي كان حقير متل ماقالت وسائل أعلامنا وخاصة بدعاء أخترعوه بيجي مكتوب لممثل أبله . وبيلبش يولول فيه . حتى مسمى دعاء أبو درويش . فممكن نعرف وين الصوابية وغيرها عشرات الامثلة بقال بدل مانسكت يلي بينتقد وطبعا هو بيحكي محبة لبلدو . وبيحكي من وجهة نظرو . ونتهموا أنو بيعارض لمجرد المعارضة . مع أني ماقدرت حدد مكاسبو من المعارضة لمجرد المعارضة ياريت تحكيلنا عن المكاسب المحققة من نجاحات السياسة الخارجية |
اقتباس:
هلأ أنــا بحترم وجهة نظرك و رؤيتك للموضوع من زاوية إنو جينا بالعين الحمرا و .. و .. لكن أنـا مالي شايف هاد الشي .. شايف أنو حاول الغرب يفرض علينا أمور بالفرض ، ونحنا رفضناها كون ممكن كانت تتعارض مع مواقفنا و تتعارض مع إحترام سيادة الدولة .. حاليــاً لما عرف الغرب أنو مافي أي أمر بينحل إلا عن طريق سـوريا ( وبشهادة وسائل إعلام غربية) أتى إلى ســوريا .. و بالحكي و التفاهم وبالصفقات و .. و .. إنحلت كل الإشكــالات. وهيك بتكون سـوريا كسبانه ، و بتكون لعبت الدور المهم و الله محيي الثـــابت وياهلا. :D اقتباس:
أنــا معك و أوافقك الرأي :D اقتباس:
سبق و جاوبت وقلت .. أنو مو شرط يكون إستفاد ماديــاً !! أنـا واثق أنو هالمواقف يلي وقفت عليها سـوريا .. أبعدت عنا مخططات كـانت رح تدمرنا و تدمر المنطقة وغير هيك .. صدقني غالبية الشعب العربي بيعتبر سـوريا الأمل الوحيد للعرب بعد ما فقدوا الأمل من حكوماتهن الصهيوعربية |
| الساعة بإيدك هلق يا سيدي 20:22 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون