|
اسماء الاسد تدعو لان يكون المواطنون جزء من الحل وليس فقط ينتقدون ويشتكون !
أعلنت السيدة أسماء الأسد أنها سترحب بزيارة للرئيس الأميركي باراك أوباما مع زوجته ميشيل اوباما إلى دمشق في المستقبل القريب. وأجابت عن سؤال لمراسل سكاي نيوز إن كانت ترى نفسها تستضيف الرئيس اوباما في القصر الرئاسي بدمشق، بأنها ترى نفسها تستضيفهما في المدينة القديمة وتلتقي معهما بالناس لمعرفة كيف يعيشون ولمعرفة ماهي سورية الحقيقية.
وأضافت في لقاء خاص بالشبكة البريطانية: "حقيقة أن الرئيس أوباما رئيس شاب... والرئيس الأسد شاب أيضاً ولذلك ربما يكون الوقت ملائماً لهؤلاء القادة الشباب لإحداث التغيير في العالم". ووصفت سكاي نيوز على موقعها الالكتروني بأن ترحيب السيدة أسماء هذا يأتي كإشارة أخرى في سلسلة إشارات على تحسن العلاقات السورية الأميركية بعد سنوات من التوتر. وفي الحديث عن المشروع الشبابي مسار والذي ستطلق مرحلته الأخيرة اليوم، وفيما إذا تحول التفكير النقدي الذي تشجع الشباب واليافعين عليه إلى أسئلة وانتقادات سياسية قالت السيدة الأسد لمراسل المحطة: أتمنى الا تظن ان الناس هنا لا ينتقدون ولا يشتكون من المحكومة، أو لا يشتكون من الخدمات أو من الأزمات الاقتصادية... هم هنا يشتكون كثيراً كما في كل مكان في العالم. وأوضحت أن ما تحاول الوصول إليه هو ليس مجرد الشكوى أو الانتقاد فقط بل أن يصبح الناس جزءاً من الحل ويكونون مشتركين بهذا الحل. وعن رأيها فيما إن كانت سورية تغيرت في السنوات الأخيرة وإن تغيرت بالقدر الكافي، قالت السيدة الأسد، أن سورية تغيرت جدا، لكننا طموحون فالتغيير عملية مستمرة وليست شيئاً تفعله ومن ثم ننتهي... عن نشرة كلنا شركاء |
اقتباس:
سيدتي , كيف يكون الانسان شريفا وجهاز الامن يمد يديه بكل مكان والقادم أخطر. |
اقتباس:
|
الجزء الأول من المقابلة كان في سنة 1790 في فرنسا:
وقد نقلت وكالة أكي حينها أن بعض الصحافيين قالو لها أن الشعب لايجد خبزاً ليطعم أطفاله فأجابتهم: ولماذا لايأكلون الكيك؟؟!! إغفري لنا ياسيدتي أن هذه الشعوب لم تتغير أبداً ومازالت تشتكي وتتأخر بحل مشاكلها بيدها. |
هلق حكيكون مزروط بس انتو اطعلو عالشي الايجابي بحكيها : اقتباس:
يعني تعو قارنولي هالحكم هاد بالحكم تبع حافظ الاسد اي فرق من السما للارض ولو :D |
اقتباس:
عم دور على شي ايجابي ما عم لاقي , يعني هي شو بعرفها بسوريا ايام حافظ الاسد لتقول انو سوريا تغيرت كتير؟؟ بعدين شو اللي تغير برايك للاحسن بظل هدا الحكم؟؟ طبعا غير انو صار في موبايل وانترنت :lol: |
اقتباس:
استعادتك هون لجملة ماري انطوانيت الشهيرة مو بمحلها .. كون السيدة الأولى بنت عز ما بيلغي كونها متواضعة و قريبة من الناس .. و إذا منطّلع على اجندة نشاطاتها الاجتماعية و الثقافية منشوف اديشا عم تعمل أشيا حلوة و إيجابية .. تذكروا انو سورية ما شهدت من قبل حضور حقيقي لشخصية نسائية بهالحجم .. أنا كمواطنة سورية بفتخر فيها و بحسا واجهة حضارية للبلد .. و ماني مع الانتقاد لمجرد الانتقاد و نكسّر بشغل المخلوقة لأنها محسوبة عالنظام ... |
اقتباس:
السيدة اسماء الاخرس مو محسوبة على النظام, بهيك تصريحات هي صارت جزء من النظام الانشطة الاجتماعية و الثقافية الرائعة اللي عم تحكيلنا عنها كتير حلوة, بس بتعرفي ايمتى؟ لما بتصدر مثلا عن افراد العائلة المالكة بشي دولة اوربية شعبها عم يتمتع بكل حقوقو وامتيازاتو اما ببلد بيفتقر لابسط حقوق الانسان وبيفتقر الانسان في لادنى درجات حرية التعبير فاسمحيلي قلك انو التغني بفضائلها على اساس عندها نشاطات اجتماعية اسمو استهبال للناس يعني بدك تقنعينا هلق انو هي مابتعرف حالة القمع اللي عايش تحتها الشعب بسوريا لما بتجي بتقول لازم الشعب مو بس ينتقد لازم يشارك؟؟ انا شايف المثل اللي حطوا vivasyria بينطبق تماما عليها, قاعدة في قصر منيف وعاملة حالها مو عرفانة بوضع الانسان السوري تحت حكم زوجها و عم تنظر . |
شعب لا بيعجبو العجب و لا الصيام برجب...
عفوا يعني عالحدي بالكلام, بس هيك المتل.... أنا من الناس يلي بحترم هالسيدة و بفتخر فيها... و مستواها مو عالي على المستوى العربي.. وانما على المستوى العالمي... و بتمنى هالطرش يلي بالوطن العربي يتعلم منها و من جوزها الاكابرية... |
اقتباس:
شايف يا معلم , لك شعب اوسخ من الصرماية , الله من غامض علمو بعتلن هيك رئيس فهمان ومثقف و دكتور وفوق هدا كلو عندو مرا عم تحاول تحسن صورة هالشعب الجحش قدام الاجانب و مو عاجبن , قال شو بدن حرية و ديمقراطية شعب ما عد استحى فعلا الله يعين سيادتو على هيك شعب, ماني عرفان شو اللي مخلي يقبل يحكم هيك شعب , قولتك بيقرر شي يوم يستقيل ;) |
اقتباس:
اقتباس:
استهبال شو ؟؟؟ و شو خص حرية التعبير بالنشاطات الاجتماعية ؟ كرمال الله لا تفوت عباس بدباس .. يعني إذا البلد ما فيها حرية تعبير منروح منسبا للمخلوقة و منقلا انضبي ببيتك منيتك على حالك و بالناقص منك و من اللي عم تعمليه ؟!! اقتباس:
و معليش يعني .. شو كفرت المخلوقة إذا قالت انو الشعب لازم يشارك ؟ مين قال انو التغيير بإيد الدولة وحدا ؟؟ أكيد الشعب الو دورو ، و هي بكلاما ما خاضت بالتفاصيل و اللي قالتو ممكن يتفسر بعدة تفسيرات متعارضة .. فاللي كرهان النظام و بدو يجمع ضدو أكبر قدرمن المستمسكات رح ياخد الكلام من باب التهكم و سوء النية ، و اللي شايف بهالشخص من كذا سنة و لهلأ رغبة و سعي للأمام بدو يفسرو بطريقة إيجابية و يشوف فيو توعية و نضج . |
اقتباس:
اقتباس:
هلق انا ماطرحت نشاطاتها الاجتماعية للنقاش لانها مو مهمة برايي, انا طرحت فكرة محاولتها اقامة حملة علاقات عامة لتبييض صفحة واحد من اشد الانظمة الديكتاتورية قمعا بالعالم اذا بلد ما في حرية تعبير, والمواطن في بيتعبى على اقل انتقاد للسلطة الحاكمة منقلها للمخلوقة ارجوكي اذا ما بتقدري تغيري هالواقع المر اللي فرضو زوجك على الشعب فيعني على الاقل تحترمي مشاعر الناس , مشاعر الشعب اللي ما بيسترجي يفتح تمو في دولة اجهزة الامن فيها اكتر من الجمعيات الخيرية , يعني ارجوكي بدل ما تعطينا دروس بضرورة المشاركة بالتغيير ياريت تحكي شوي لزوجك عن الديمقراطية البريطانية العريقة اللي تربيتي فيها بلكي يعني شوي بيحن قلبو على هالشعب. اقتباس:
برايك التغيير مو بايد الدولة والشعب لازم يكون الو دور؟؟ كيف ؟؟ ممكن تشرحيلي ؟؟ انت عملتي متل جماعة , لازم تعارضوا باحترام, ولما منبوس ايدين اشرحولنا بهالدولة شلون الواحد بيقدر يعارض باحترام ما منشوف حدا منن . منجي لقصة اللي كرهان النظام واللي بدو يجمع مستمسكات, انت عم تحكي عن جد؟؟ ليش في داعي الواحد يجمع شي , ما الوضع المزري بالبلد بيكفي وبيوفي, بس اقري صحفات الاخبار المحلية باي موقع حتى لو كان موالي للسلطة لتعرفي انو الواحد ما في داعي يجمع شي ولا حتى يحاول يثبت شي لانو الطابق مكشوف وكل شي مبين. و تحياتي |
بالفعل ..السيدة الأولى واجهة حلوة للبلد ...
و الأطفال المشردة بالشارع و الناس يلي عم تبصق رئاتها بالباصات و المحرومين و المسجونين ...متخبايين روا الواجهة الحلوة هي .. احيانا بشوف من تصريحاتها و مقابلاتها و اخبارها بالمجلات ...انو الواجهة هي لساتها عايشة بغرب لندن ...!! |
اقتباس:
اقتباس:
برأيك زعيم أحد أشد الأنظمة الديكتاتورية قمعاً في العالم بدو يحن قلبو على الشعب من ورا كام كلمة بدها تقلوا ياهون مرتو ؟!! يعني و إذا حضرتك مو شايف بشغل السيدة الأولى أهمية فهاد شي بيرجعلك .. مو معنى هالشي انو هي ما عم تشتغل أو انو شغلا مالو طعمة .. بس ممكن تكون أنت اللي ما حابب تشوف ... اقتباس:
أنا ما قلت التغيير مو بإيد الدولة .. أنا قلت : اقتباس:
كلمة الدولة وحدا بتعني انو هي المسؤولة عن التغيير .. بس مانا الطرف الوحيد المعني فيه و أكيد لازم الشعب يكونله دور ... لأشرحلك كيف و من دون ما تبوس ايدي ... في كتير عيوب بالبلد المواطن مسؤول عن وجودها إلى جانب الدولة : مثال بسيط على ذلك الشوارع الوسخة ... ضلينا نقول البلدية ما عم تشتغل من قلب و رب و ما في حاويات زبالة كفاية و مدري شو ... طيب من فترة مو بعيدة صار في حملة نظافة قوية و انحط سلات بأغلب الشوارع و المناطق و زاد عدد عمال التنظيفات و إعلانات عالتلفزيون و ملصقات بالطرقات ، و مع هيك ضلينا نشوف وسخ هون و هون ... ليش برأيك ؟؟ لأنه اي مسؤولية البلدية تنظف الشوارع بس كمان مسؤولية الشعب يحافظ على نظافة هالشوارع هي .. و شعبك لهلأ بيكب زبالتو من البلكون و من شباك السيارة و على جناب الرصيف إذا كان ماشي ... و على هالمقياس قيس شغلات كتيرة ، و إذا كنت متابع التتغيرات اللي عم تصير بالبلد من كم سنة و لهلأ بتلاقي انو في كتير قوانين جديدة طلعت ، كانت ممكن تحدث تقدم لولا انو الخلل صار من جهة المواطن في التطبيق .. و التربية كتير الها دور بهالموضوع ... يعني أنا كأم من حق بلادي علي انو علّم ولادي يحافظوا على نظافة بلدهن و ما يقبلوا أو يعرضوا رشوة و يوقفوا بالدور و و و و .... و إذا كل الناس عملت متلي بيصير في تغيير ولا لأ ؟؟ اقتباس:
اقتباس:
|
اقتباس:
بظن لو كان الشعب هو اللي انتخب الناس اللي خلتنا نصير في اسفل قائمة الدول النامية كنتي بتقدري تحطي الحق كمان علي. |
اقتباس:
لساك مصر تجتزئ كلامي لتفهم منو اللي بيبرر لك تتهكم علي و تسخّف أفكاري ... مو مشكلة .. ما علينا من ناحية واجب الدولة في توعية المواطن و محاربة الفساد و السعي لتأمين الموارد لحياة كريمة للمواطنين ، فأنا كمان بنتظر هالشي .. هاد مطلب الشعوب كلها و نقاشها اليومي في الدول الأكثر تقدماً في العالم من مستوى الراتب و التأمين الصحّي و مناقشة القوانين اللي بتأثر مباشرةً في حياتن و حياة أولادهن ... بدك تقلًي شعب مسحوق و كم أفواه و .......... مشروع قانون الأحوال الشخصيًة الجديد و ردود الفعل اللي استدعاها أظهر قدرة هالشعب على مواجهة رغبة مجهولة الهوية في التأثير على حياته سلباً .. ما يظهر قدرة الشارع على التحرك عند الضرورة. إذا اعترفنا بواجب الدولة تجاه المواطن لازم نعترف كمان بواجب المواطن تجاه نفسه وتجاه وطنه و إلا منكون عم نبرر له عدم تحركه لتغيير الواقع ضمن الإمكانيات المتاحة بحجة انو اللي فوق ما بيخلوك ... التاريخ يثبت أن الحكومات تغيرت و إرادة الشعوب بقيت و انتصرت في النهاية . و واقع أوروبا (اللي عرفت ناس متل هتلر و موسوليني - و الكل بيعرف مدى القمع و الإجرام اللي ارتكبوه) بعد الحرب العالمية أكبر دليل . على كل أنا بشوف انو تغيير أي وضع لازم ينبع من نظرة واقعية تترافق بأن يتحمل كل طرف مسؤوليته ضمن الممكن و دون أحقاد و إلا فاللعبة اللبنانية بالشتم و السب هي البديل . و أكيد يوم الدولة رح توزع كل الموارد للشعب و تجبر أصحاب المصانع على توزيع أرباحها عالعمال و التجار يكتفوا بربح بسيط و الكل يشارك بالحكم رح نلتقى انشالله في جمهورية أفلاطون السورية . سلام |
[quote=أم الجود;1291430]
لساك مصر تجتزئ كلامي لتفهم منو اللي بيبرر لك تتهكم علي و تسخّف أفكاري ... مو مشكلة .. ما علينا لاء ما عم سخف افكارك بس مستغرب منها كتير اقتباس:
ياعيني انت قلتيها نقاااااش , والنقاش بدو هامش حرية ولو كتير صغير وهالشي مو موجود عنا , مشان هيك قلتلك بدون نية حقيقية من السلطة لاصلاح النظام السياسي الرهيب اللي مفروض على الشعب من 40 سنة لهلق رح نضل متل مانك شايفة , عم نرجع لورا اقتباس:
القصة كلها تدخل باطار اختلاف اراء ضمن الفئة الصغيرة اللي عم تدير البلد , لانو لا انعرف مين اللي حط القانون ولا مين اعطى الصلاحية للي حط القانون ولا مين اعطى اوامر بسحب القانون من التداول لو بدو يصير تحرك بالشارع, الاولى كان يصير ضد غلاء المعيشة اقتباس:
اقتباس:
اقتباس:
اقتباس:
اقتباس:
مو هي على اساس مبادئ البعث اللي مشانها صار قائد الدولة والمجتمع :lol: اقتباس:
|
مرحبا إم الجود... كيفو جود؟؟:p أول شي بدك تروقي علينا وماتعصبي
شوفي ياستي الفكرة باختصار هي التالي: وقت السيدة الأولى أو عقيلة الرئيس أو مابعرف شو أخر إسم إعتمدوا عليه بتقول انو بدها المواطنين يكونوا جزء من الحل بدو يكون على الأقل هالمواطنيين مسموح إنو يشاركو بأي شي طيب كيف واحد متل ميشيل كيلو بدو يكون جزء من الحل اذا وقت فتح تمو حطوه بالسجن؟؟ كيف شب بيكتب شي كلمة على منتدى إلكتروني بينتقد فيها الفساد أوالمحسوبية أو شي شغلة بيفوت عالسجن وبعدين بيتطالب يكون جزء من الحل؟؟ طيب أنا وقت بدها ياني كون جزء من الحل مو لازم يسمحولي إني شخص الوضع بموضوعية وما ياخدوني المخابرات؟؟ هلأ اذا رحت وقفت بالشارع أو على باب البرلمان وإعتصمت ضد الفساد مابياخدوني المخابرات؟؟ إذا قلت رامي مخلوف سارق البلد وجزء من الحل إنو هالشخص يتحاسب مابيحطوني بالسجن؟؟ يعني ياعيني باختصار وقت يتطالب المواطن انو يكون جزء من الحل على القليلة بدو ينسمحلو بهامش حرية معين ليعبر عن المشاكل بوجهة نظرو.. أما نقلو تعا كون جزء من الحل بس اذا فتحت تمك بدنا تخفيك منكون عم نقلو مقسوم لا تاكول وصحيح لاتقسم وكول لتشبع... وتحياتي إلك :D |
| الساعة بإيدك هلق يا سيدي 03:32 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون