|
شوية قراءة
في ناس مابتقرا ابدا
في ناس بتقرا وبتحفظ وبتخزن اللي قرته براسها وبس...... يعني انتقلت الأفكار من الكتاب لراسها وخلصت المهمة في ناس بتقرا وبتحلل وبتنقد وبتقارن اللي عم تقراه هلأ مع معلومات قديمة وبتطلع من خلال اللي قرته بافكار جديدة برأيكن أي نوع من هالناس احسن شي؟؟؟ وانتو من اي نوع منون وبصراحة؟؟؟؟ انا برأيي انو النوع الوحيد المفيد هوي النوع التالت وللأسف بظن انو هيك ناس نادرين بمجتعنا..... بس برأيكن ليش؟؟؟؟:cry: |
وأنا معك .. اهم نوع هو التالت ..
هلق أنا من النوع التالت بس مو بكل المواضع .. بالأمور الي بتخص اهتماماتي فقط .. |
مرسي كتير صياد عالمرور...... وعظيم كتير نكون قادرين نحلل وننقد ونطلع بافكار جديد حتى لو ضمن نطاق مواضيع محددة ......بس بيكفي انو نكون قادرين انو نطلع بشي جديد :سوريا:
بس بتنمنى منك جواب على سؤالي الاخير انو ليش برأيك اغلب الناس فقدت القدرة انها تهضم فعليا الافكار اللي عم تقراها وبتكتفي انها تحفظها بمخها متل ماهيي بدون استيعاب كبير الها رأيكن عن جد بيهمني:سوريا: |
مافي نوع تاني الا اذا كان عم يدرس ومو عاجبو المنهاج او ما عم يفهمه
اما بالنسبة للقراءة اللي بمحض ارادتنا بنمارسها اكيد لازم يكون عنا شي من التحليل والنقد والمقارنة بمعلومات سابقة والا بلا القراءة كلها شو الله جابروا الواحد |
اقتباس:
بس صدقني في كتير ناس من النوع التاني...... يعني اذا عم تتناقش مع شخص منون بيدوخك السبع دوخات مثلا وهوي عم يكرر الفلان قال هيك بكتابو الفلاني والفلانية حكت هيك بمقالتها الفلانية بس بتحسو انو ماعندو اي فكرة خاصة فيه ....... وهيك شخص بيقرا شي اذا ناسب الافكار المسبقة اللي عندو بيقبل اي فكرة مكتوبة اما اذا ماناسب الافكار المسبقة الي عندو بيرفض الافكار بالمطلق وبيفكر انو مجرد قبولو او رفضو لهالافكار هوي نقد |
كلام سليم بس هاد الحكي عند كل الناس بس بتتفاوت الدرجات ومن النادر ما تلاقي انسان متجرد بكل معنى الكلمة
|
اقتباس:
يعني الواحد ما بقى فاضي متل ما كان بالقديم ... حتى القراءة من باب الثقافة صارت قليلة كتير ... وبعدين وسائل التكنولوجيا العصير كتير عم نشلف عليها ... بأصغر مثال .. قبل 5 سنين كان الواحد منا حفظان أرقام هواتف كل جيرانو وقرايبينو ومعارفو .... بلمح البصر بيمسك سماعة التلفون بيدق الرقم هلق .. اختلف الوضع .. صار المبايل بيشيل عنا هالمهمة ... وما بقى حفظانين إلا أرقام نادرة وكمان بالنسبة لسؤالك ... يعني متل جوابي نص الناس .. انو أكتشافات العالم صارت كتيرة ... وكل يوم في شي جديد .. صار كل واحد بياخد من الدنيا الي بيهم فيه وبيهمل الباقي .. متل عنا هون بالأخوية .. ما فيك تفوتي على كل الأقسام .. لهيك بتكتفي بالأقسام الي بتهمك .. وبتهملي الباقي بس أنو حتى الي بيهتم فيه بيعمله ..( كوبي بيست ) بالدماغ ... هي ما زبطت معي أما ليش ممكن يعملوها ... يمكن أسهل .. أو أسرع ... أو ما بدهن يشغلوا عقلهن زيادة |
والله يا صياد صار الكتاب مهجور هالايام بوجود هز يا وز
|
""""""""انا برأيي انو النوع الوحيد المفيد هوي النوع التالت وللأسف بظن انو هيك ناس نادرين بمجتعنا..... بس برأيكن ليش؟؟؟؟""""""""
ما حبيتها هي "المفيد" مومعقول يكون كل الناس بسوية ذهنية وحدة ولا معقول أنو يكون اللي مو هيك للكب او غير مفيد .. معقول يكون قصدك غير اللي أنا فهمتو ... لأرجع للموضوع : أنا كل هدول" الأنواع" . |
شكرا كتير مرة تانية ابو مزيد
وشكرا كتير صياد على تركيزك مرة تانية على فكرة الاختصاص او الاهتمام متل ماانت حكيتها يعني كل شخص عندو مجال او مجالات قليلة كتير وبيتركز كل اهتمامو فيها وهاد برأيي مو شي سلبي ابدا بالعكس ايجابي كتير بس بظن في ناس كتير حتى ضمن اختصاصها ماشية كوبي بيست والنتيجة اللي عم تطلع عنا بدول العالم التالت بشكل عام انو بتشوف خريجين جامعة واحيانا دكاترة بالاختصاص تبعون ومع ذلك ماعندون اي قدرة عالابداع ونادر مايطلع منون واحد مبدع..... هلأ بظن التكنولوجيا لعبت دور مو قليل بهالشي والها تأثير هائل ويمكن متل ماقلت نوع من الكسل مشان مايشغل مخو ........ بس اكيد في اسباب تانية الف شكر والف وردة على مروركن عالموضوع :سوريا: |
اقتباس:
فعلا انت فهمتني غلط انا عم احكي بس على مستوى القراءة بمعني انو النوع التاني القراءة تبعو غير مفيدة اما هوي كانسان ممكن كتير يكون من نواحي تانية معطاء ومنتج واخلاقي و و و و ...... ومفيد اكتر من اي انسان تاني ويمكن يكون على المستوى الانساني بيسوى مليون من القراء المثقفين وبالعكس ببعض الاحيان الانسان اللي عم نحكي عليه وصنفناه بالنوع التالت ممكن تكون الأفكار اللي طلعت معو مدمرة ومؤذية |
|
اقتباس:
|
يا جماعة من شي عشر سنين كنت مدمن كتب كنت اترك الدراسة واقعد اقرا بس هللأ ما عم يصحللنا نفتح كتاب
|
اوكي
هلأ بما انكن كلكن اتفقتو انو النوع التالت احسن نوع ( من ناحية القراءة ) فمعد في شي ضيفو انا لانو انا رايي من رايكن وبجوز انا على قدر قليل من النوع التالت بس انا ما باخد شغلة مو قنعان فيها عن عماها هلأ بالنسبة للنوع التاني واللي صاير بمعظم الناس هوي اظهار مقدرة فكرية بحفظ واستذكار هالكتب او هالمقالات او او او اللي قروها ان كان هني وصغار او هني وشباب الخ الخ انو يعني ليكو يبا انا حافظ هيك هيك هيك انا مشى حياتي متل ما بيقول فلان الفلاني بس مشان يبين انو هوي عندو مقدرة على الحفظ البصم وانا بعرف كتير من النوع التاني وهيك بيكون تفكيرن موضوع حلو كتير بحييكي علي :سوريا: |
شكرا كتير مريوما وهاني عالمرورو
ومية وردة لعيونكن :سوريا: :سوريا: :سوريا: |
كنت عم فكر بشغلة انو عم نحكي على انواع القراء
ليش ظل في قراء متل الاول شايفلكون انو كل الانواع بهاد الوقت مقبولة وبالنسبة للنوع التاني الا ما الحياة تعلمهم انو يصيروا من النوع التالت وانا بنادي النوع التاني انو يحاولو يصيروا من النوع التالت احسن ما يبطلو القراية لانو في نوع ما بيعرف شو هو الكتاب ومتل ما بيقول المثل الكحل ولا العمى |
اقتباس:
مشكور:سوريا: |
| الساعة بإيدك هلق يا سيدي 20:05 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون