|
نداء عاجل
هادا النداء وجههو الدكتور "عاصم زهران" و أنا عم انقلكون يا
أي حدا بيعرف أهل " جوزيف بركيل" (مابعرف شو لقبو....دكتور.... مهندس) يخبرون أنو جوزيف بعدو حي يرزق في أحد السجون السورية عرفتوا ليش مبارح طاش حجري ع العموم رح احكيلكون القصة من أولها و القصة حقيقية ما فيا كلمة ملفقة أنا ما بعرف لا الدكتور عاصم زهران و لا جوزيف بركيل و مبارح أول مرة بسمع فيون كنت مارق بالحريقة قام وقفني زلمة ختيار و سألني وين سوق الصاغة... أول شي فكرتو شحاد من منظرو و ملابسو و تأتأتو بالحكي بس مدري ليش شفقت عليه و سألتو شو بدك من الصاغة عاصم: بعرف أنو الصياغ مسيحيين و المسيحيين بالشام تقريبا كلون بيعرفوا بعضون وأنا نازل لحتى وصل رسالة لشي حدا بيعرف أهلو لجوزيف بركيل و خبرون أنو الزلمة بعدو عايش بالسجن أنا: و مين أنت عاصم: اسمي الدكتور عاصم زهران و أنا كنت مع جوزيف بالسجن و طالعوني من كام يوم (دكتور!!!!!!!!!) قلت لحالي، هلأ هادا منظر دكتور بعدين قلت لحالي ليش كتير مستغرب هوي صحيح دكتور بس بسوريا وشكلو كان بيحب بلدو...... خجلت اسألو كم سنة صارلو بالحبس بس خبرني أنو لما طلع بالتاكسي طلع ع العداد 40 قام عطا الشوفير المزوق ليرة و نطر يرجعلو الكمالة (كل فكرو أنو 40 قرش) طبعا الشوفير المزوق احترم سنو كتير و ما طحبشو ع الآخر... يعني بس كفين ع الناعم و هدول بالنسبة للدكتور عاصم متل التحلاية فتخيلوا أديش صارلو مسجون ما رح أحكيلكون كل الحديث يلي دار بيني و بين الدكتور عاصم لحتى ما سببلكون أزمة نفسية متل يلي صايرة معي بس يلي مفكر أنو المساجين السياسيين قاعدين بالسجن و حاطين هالشطرنج بيكون عم يحلم...... بدكون ياني طول بالي بدكون ياني ما أبكي ما رح سميون موزمبيقيين لأنو أكلة لحوم البشر أرحم من الأندال يلي قاعدين ع قلوبنا ما رح سميون أخطبوطات لأنو أكيد فيا شفقة أكتر أقرب شي لهيك سفلة هو الجراثيم و الفيروسات لذلك رح اعتمد هاللقب ما رح ادعي عليون لأنو هي مو مشكلة الله هي مشكلتنا نحنا مو ظلم أنو اهلون ينحرموا من حنانون مو ظلم أنو رفقاتون ينحرموا من حضورون مو ظلم أنو نحنا ننحرم من علمون و ثقافتون و فنون لك شو ما كانوا عاملين ع القليل يخبروا أهلون اذا عايشين واللا ميتين أنا و عم اكتب هالكلمات الدمعة عم تغرغر بعيني مو لأنو قلبي رقيق بس لأنو حاسس حالي مسؤول عن سجنون و عن تعذيبون و مسؤول أكتر أنو ما حدا من ولادنا يمرق بهالمسخرة بعدني متفائل أنو هالفيروسات رح تسقط شغلتنا مو أنو انعجل بسقوطها شغلتنا أنو نخلي سقوطها مدوي لدرجة أنو تصير عبرة لمن اعتبر |
|
اقتباس:
|
اقتباس:
اتـــألــم |
اقتباس:
الله يطالعك بالسلامة ياكريم.. ويرجعلنا ياك ويرجعك لاهلك |
سنرجع يوماً إلى حيينا يا كريم،سيرجع كل المسجونين وكل المنفيين لنعيد في شامنا الجميلة
الحرية لك يا كريم وليسقط الإحتلال الأسدي لسوريا |
اقتباس:
سنرجع بس اييمتا كريم كان عم يتألم وهوة في الخارج .... حدا قدر يتصور هلق شو شعور؟؟؟؟ فعلا يندى الجبين ..... الحرية لك ولنا يا كريم ولسوريا :D |
اقتباس:
اقتباس:
|
| الساعة بإيدك هلق يا سيدي 06:48 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون