|
التخفيض سعر دقيقة الموبايل و الضحك على اللحى
طرحت بالأمس شركتا الخلوي في سوريا شرائح تخفيضيه على أسعارها و جاء هذا التخفيض قبل البدء بالحملة التي يسوق لها شبان سوريون (من بينهم أنا) وهذه الحملة حملة مقاطعة لاستخدام الخلوي في اليوم الأول من شهر حزيران و سيتبعها أيام أخرى خلال الشهر .
و بالنظر إلى شرائح التخفيض و كيفية آلية عملها سنجدها سريعا أنها ليست مجرد ضحك على اللحى و تفاديا للمقاطعة استبقت الشركتان الحملة بما يشبه التخفيض و أذا أردنا محاكمة منطقية لهذا التخفيض أول ما سيتبادر إلى ذهننا من سيستفيد من هذا التخفيض ؟ فشرائح التخفيض جاءت على الشكل الآتي للخطوط المسبقة و اللاحقة الدفع ، تخفيض بما يسمى بالتخفيض التراكمي وما معناه أنه سيتم التخفيض على المكالمة بعد الدقيقة الثانية من المكالمة !!! كما تم تخفيض سعر الرسائل (sms) بطريقة تراكمية أي بعد إرسال أبع رسائل يتم تخفيض سعر الرسالة 50%. بالنظرة الأولى و الغير معمقة سنعرف أن 90% على الأقل من المواطنين لن يستفيدوا من التخفيض فالغالبية اخترعوا لغة التعليم (علمي بعلملك) تعليمة أنا بالبيت تعليمين أنا بالشارع تلات تعليمات أنا بالجامعة وهيك و الرسائل اختصروها على رسائل حاكيني وأذا حكينا بالموبايل فنحاول قدر الامكان أن لا نتجاوز الثانية الـ\59\ . لا أعرف مالذي يمنع شركات الخلوي من تخفيض حقيقي و ملموس يناسب المواطنين و شرائح الناس كافة فهذا التخفيض كما رأينا لا يفيد كل الناس و لا يفيد إلا من قرر أن يتكلم عن سيرة حياته على الموبايل لماذا لا نعمل على تخفيض حقيقي أسوة بالدول المحيطة كمصر مثلا فتحسب المكالمات بنظام الثواني . أنا أرى أن هذا التخفيض ما هو إلا طريقة لإسكات الناس على المطالبة بحقوقهم ولكي يجعلوا من المقاطعة في أول حزيران شيء لا جدوى منه و اللافت أن في الخبر المنشور في صحيفة سيريانيوز أنه قبل الشرح عن كل شريحة تخفيض يكتبون أن وزير الاتصال هو الذي وافق على التخفيض أي أنهم يبرؤن أنفسهم بطريقة أو بأخرى لكي يأخذ الموضوع بعد رسمي وأنه لا يتم إلا من خلال الوزارة وأن الشركتان لا حيلة لهما إذا لم توافق الوزارة . فهم ببساطة ضحكو علينا و يريدون أقل تأثير لحملة الماطعة وأنا أقول أننا سنقاطع بدل من يوم سنقاطع أيام متعدد وستستمر المقاطعات إلى ما لانهاية طالما يستخفون بنا بهذه الطريقة |
اقتباس:
طيب بهالحالة ازا نحنا اصرينا وهني اصرو هني لح يخسرو بس نحنا لح نستحمل ننئطع عن اهلنا ونحسس حالنا نسينا شي اسمو موبايل لفترة معينة المصيبة انو اغلى شركة اتصالات هي هالحرمية هدول يعني اتخيل ازا بدي اتصل على امريكا ارخصلي من اني اتصل على سوريا وهاد الشي فارضتو الشركتين .... يعني والله لما بشوف موبينيل عم تسهل لمواطنيها وكل يوم وليلة بيعملو دعايات تسهيل شكل بقعد بتحسر على هالشعب السوري المعتر ... ليش دايما بيتبعو سياسة التجويع والله حرام عليون ؟؟؟ وليش كل العالم ماشية الى الامام الا نحنا ماشيين لورى |
اول شي شكراً ع المعلومات
تاني شي شرائح ما يشبه التخفيض هل رح تبقى بشكل دائم او لمدة معينة؟؟ لأنه اذا لمدة معينة مننتظر يخلص التخفيض وهداك الوقت منبلش المقاطعة:gem: حتى ما يقولوا عملنالكن تخفيض |
لأ والتخفيض على خطوط ام تي ان شباب ويا هلا شباب .. يعني الخطوط العادية مو مستفيدين بشي .. بالعكس أكل هوا عالفاضي :frown:
|
اقتباس:
يعني قي طريقتين بخلو اي شركة بالعالم تخفض اسعارها وتحسن خدماتها اما يكون في تنافس مع شركات تانية والشركة بتخاف تخسر الزباين وهالشي مو موجود بسوريا نظرا لانو الدولة نفسها شريك بقضية احتكار جهة وحدة معروفة لخدمة الخليوي. او نتيجة احتجاجات من الزباين نفسن, متل قصة المقاطعة هي. انا شايف انو المقاطعة خطوة ممتازة وخاصة الاصرار عليها بعد هالمسخرة تبع تخفيض الاسعار, يعني عم يتعاملوا مع البشر بمنطق استخفاف شبيه بقصص زيادة الرواتب بالقطاع العام شغلة انو بدن الموضوع ياخد بعد رسمي , انا بظن ليخوفوا العالم مشان تبدو المقاطعة وكانها تحدي للدولة نفسها مو بس للشركة. |
ع راسي الشبية
المهم نحنا نتابع بالمقاطعة وما نكتفي بيوم ولازم تكن جدية يعني كل واحد يشتغل على عيلتو |
بس في نقطة تانية .. أنا بعتبرها على قدر معين من الاهمية
من فترة .. كنا لما نخبر حدا عن مقاطعة الخليوي بأول حزيران ... كان يجاوبنا بالسخرية من هالخطوة بس من بعد هالقرار (الشكلي ) بالتخفيض و تزامنو مع المقاطعة .... بيّن للناس أنو هالمقاطعة مانها تافهة أبداً بالعكس هي خطوة إلها رمزية مهمة ... و يمكن تطور بعدين لغير أشكال |
أنا مع المقاطعة ...و معي كل أصدقاءي
لن نتراجع عن التعبير مهما كان ثقله |
على طول مستغبيين الشعب . شو الجديد  |
اقتباس:
الجديد يا خيي انو الشعب بطل يسكت انو عم يستغبوه .... |
اقتباس:
مو ايمانا من ضرورتا بقد احترامي لمبدأها بس برأيك شركة بلعت البشرية متل سيرتيل و mtn بدا تفرق معها يوم واحد ؟! بعتقد أرباح الشركات مقدرة بالدقيقة .. وأرباحها ماشية ماشية لو شو ما صار بصراحة ما بعتقد حركة سيرتيل وتخفيض الاسعار طلعت لتسكيت العالم وتوقيفن على الاحتجاج مع اني بتمنى يكون فعلا قدرنا نتحكم بشي من الاشياء وقدرنا نضغط بشكل من الاشكال على شركة عم تنهب بسما ربنا من اول ما طلعت لحد اليوم |
اقتباس:
يعني النا كذا سنة عم نسأل ايمتى هالشعب رح يتجرأ و يقول لا ( حتى لو كانت بشكل غير مباشر ) و الحلو أنو القصة أخدت ضجة كبيرة و كل الناس تحمست للفكرة حتى لو ما أثرت ...بس انو المبدأ منيح |
يعني اذا في مقاطعة
انا من اول المؤيدين للمقاطعة لأن الفترة الأخيرة شايف الأ MTN صارت عم تعيش على كتافي من كتر الخورفة:jakoush: بس خيوو يعني اذا هل الشركات كتير حابّة الشعب و متحننة عليه اي ما يعملو الحساب على الثانية متل كتير من البلدان لا و الأنكا من هيك انو انطرحت بالشركة فكرة انو تضير كل 10 ثواني فوق الدقيقة تحسب دقيقة لك اي شو الشغلة مسخرة و لا ضحك على اللحي لك هنن الشركات الـ.......توت منطلقين من فكرة الحاجة و اننا ما فينا نعيش بلاهم و عم يتحكمو فينا فأذا فعلا بتصير مقاطعة:o الله لك اي و الله الشركات رح تيجي تبوس ايدنا لحتى نقبل انو الحساب بالثانية و الدقية بـ ليرة :shock: . . مو هيك و لا انا عم اغلط:lol: . . . . معا لمنع الخورفة .....:jakoush: |
اقتباس:
واحد ولهيك القصة مالازم توقف عند يوم واحد ولهيك عم نقول انو بواحد الشهر راح تكون البداية :pos: |
اقتباس:
|
اقتباس:
للمرة التانية بقول انه بدها تكون المقاطعة عالقليلة اسبوع اذا مو شهر ..هلق ليش؟؟؟؟؟ رح اضربلكن مثال : يلي بيكون ارباحه بالملايين ما رح يشوف الفرق اذا كان خسرله كم عشرة آلاف (مقاطعة يوم) ويمكن مايسأل حتى .. بس رح يعرف ورح يسأل عن السبب لما بدك تفرجيه كم مية ألف خسارة واكتر |
اقتباس:
انا شخصيا مقاطعة الموبايل من زمان .. واتشجعو ناس كتير من اللي خبرتون.. يعني شي خمسين شخص من أقربائي غير الشباب الصغار بقصد.. العمات والخالات ورفقات اهلي وهيك يعني.. |
ع راسي شبيبة
أنا ما فيني غير قول :إنهم يستخفون بالشعب السوري العظيم .. حقيقة إن دولا أقل كثافة سكانية من سوريا بكثير وبمنافسة أقوى على سوق الإتصالات فإن شعوبها تحظى بمعاملة أكثر أحتراما للشخصية الإنسانية الحساب بالثانية .... أسعار متدنية جدا للرسائل والمكالمات ... بريد صوتي مجاني .. كل تلك الخدمات تقدمها الشركات التي تحترم الوسط الذي تعمل به نقول إذا كانت شركتا الخلوي تظن أنها تستغبي جماهيرنا فإن هذا شيء كافٍ لتطرد خارج سوريا فهي تهين الكرامة الوطنية عبر الشعب .. تحياتي الحارة ظل جيفارا |
الله يعطينا عمر لنشوف شو رح تعمل هالمقاطعة.. او اذا رح يحسوا فيها
|
اقتباس:
بس بضل خطوة حلوة وجديدة ع بلدنا . تحياتي |
اقتباس:
و اشنقنالك انت قلتها انو ما بيحترموووا حالهون بالمرة ولهيك نحنا راح نضل نعمل حملات وقريبا راح تصير على حيطان الحارات مو بس على الانترنت بس لازم تكون باليل لانو الجماعة بياخدونا :p واذا راح نضل نقول انو يوم ما بيأثر هيك عم نضوع على حالنا فرصة كبيرة يوم ورا يوم بتصير القصة جدا مجدية وغير هيك متل ما قالت ناي ما حدا بالعيل تبعاتنا الا بيقول عن هالشركات نصابة ومحتالة فكلون راح يشاركو معناااااا ولازم نحنا نشتغل على محيطنا عيلتنا وحارتنا وحينا وعلى مناطقنا :D |
اقتباس:
الكل بيعرف هل الحكي يا صاحبي بس مو الغاية الجانب المادي المهم هل التعبير و الموقف انا بشجع الخطوة و معها 100% |
لعيونك جاد وأنا مؤيد 100%
تحياتي |
40 دقيقة ع بداية المقاطعة
|
اقتباس:
من شوي ماشي بالطريق . في واحد عم يحكي بالموبايل . وشكلو شارد عم يحكي مع صاحبتو . على شوي رح أضربو :frown::lol: |
سيدي مو كل العالم راح تلتزم من اول مرة
بس جهزولي حالكون المرة الجاية بعد شي 15 يوم فيها توزيع مناشير وتلزيق اعلانات ع الحيطان |
1.55 على المقاطعة
شو رأي الشباب لو نعملها اسبوعية؟ انا رح اختار يوم الاثنين من كل اسبوع والغي الموبايل فيه |
اقتباس:
ليكون مو سمعان بالمقاطعة؟ |
اقتباس:
ياحوينتك :cry: |
انا هلأ خارج التغطيه :larg:
قاطع قاطع مع انها شغلتي :pos: |
مقاطع معكون
|
اقتباس:
ليش شبني يا بعدي :jakoush: ليك انت خص نص جهز حالك بدك تساعدنا بهي القصة :yahoo::adal: بس لنعمل حملة جمع التبرعات مشان طباعة الوراق ونشوف مين في بالمحافظات بدو يساهم :D |
ياريتني داخل البلد لساهم معكم بعملية المقاطعة ... شوي شوي بتأثر فيهم اذا زاد الوعي الشعبي وكل شخص ساهم بنشر فكر مقاطعة هاي الشركات الاستغلالية الاقطاعية الرأسمالية .. حتى ولو انتهت فترة المقاطعة لازم كل شخص يقوم باختصار استهلاكه لخدمات شركات النصب والاحتيال لابعد الحدود ... يعني بدل ماتحكي 10 دقائق باليوم اختصرهم وخليهم دقيقتين ... بدل ماترسل 10 اس ام اس ... خليهم 3 ... بالاضافة لذلك طلعوا عيونهم بالدفع ... بدل ماتروحوا تدفعوا من أول يوم لأصدار الفاتورة لأ خلوها بعد 10 او 15 يوم ... طلعوا عيونهم ... كرهوهم حياتهم ... اقل موظف بالسيرياتل راتبو لايقل عن 25000 ليرة وكلوا من ورا مص دماء الشعب ... معقول لكن بالدول المجاورة وانا بعطيكم مثل .. نزلوا عرض بالسعودية مدتو شهر تحكي اول 3 دقائق دولي وتكمل 57 دقيقة مجاناً .. خلص العرض نزلو عرض تاني ... المكالمة الدولية ب 5 ليرات للدقيقة !! .. الانترنت 3g اول 3 شهور مجاناً ... شهر عليك وشهر عليهم .... الكونكت 1 غيغا ب 1000 ليرة بينما بسوريا 2000 ليرة !! ... الدي اس ال سرعة 1 ميغا استخدام منزلي ب 75 ريال مايعادل 800 ليرة شهرياً ؟؟ اي شو هالمسخرة قال شركة اتصالات قال ... يكفي ان التجوال الدولي بنفس قيمة المكالمة المحلية عدا سوريا !!! ليش هالانحطاط بالتخلف والنصب والاحتيال على ابو موزة ... عم يمصوا دم الشعب مص ... قاطعوا قاطعوا قاطعوا وحاولو جهدكم ان تقاطعوا الى أن نرى ملامح الخير من ورا هالمقاطعة .. يجب ان يتوعى الشعب لهاي المسألة لأن هالمسألة بتحدد مصير شعوب بأكملها على أيدي شركات الاقطاع والنصب والاحتيال ... وتحية
|
اقتباس:
تفائلو بالخير تجدوه :deal: لاتتمارضوا فتمرضوا فتموتوا ;) بدنا سوق حر فيه تنافسية بين الشركات لتقديم افضل خدمة للمستهلك ... مشغل ثالث ورابع وخامس كمان ... الاردن قد نص سوريا وعدد سكانو قد ثلث عدد سكان سوريا بشو احسن مننا 4 شركات عالمية عم تتنافس فيما بينها واسعارها ارخص الاسعار .. ومصر نفس الشي ... والسعودية ودول الخليج ... شو ناقصو الشعب السوري يحصل على أفضل الخدمات بأقل الاسعار ... خلو الشعب يتنفس بقا ... انا براهن اذا سيرياتل ربحها لايقل عن 400% ... وهاد الشي حرام لايجوز ... لذلك مافي حل غير المقاطعة لو مرة بالاسبوع ونشر فكر المقاطعة بين الشباب خص نص لأن هم أكتر فئة استهلاكاً لخدمات سيرياتل و MTN |
من الصبح مشغلو موبايلي سوبر كليب مشان ما أحكي مع حدا أجاني تلفون كتير مهم . ماقدرت غير أني أحكي من موبايل اخي :cry:. من الصبح كان عم يحكي لا مقاطع ولا دريان :cry: |
استعملت الارضي والايميل لاحكي وما استخدمت موبايلي لا لدق ولا للاستقبال
حسيت اول شي انو في شي غريب بعدين حسيتا عادي |
عم نازع :cry:
|
اقتباس:
بدكم تشدوا الهمة ونورجيهم انو منقدر نقاطع سنة مو بس يوم شدوا الهمة الهمة قوية :gem: |
صامدون ....صامدون صامدون
|
صرلي شي 22 ساعة الا نكشة .. ماني لامس الموبايل بايدي :lol:
صامدون .. صامدون :gem: |
| الساعة بإيدك هلق يا سيدي 04:05 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون