|
مسابقة قسم التاريخ, ترا فيها جوائز محزرة. قرب عالطيب
هاد اي والله بعد تفكير عميق قررنا (حضرتونا) انو نعمل مسابقة بقسم التاريخ. بعنوان " اللي بيمشي على اربعة, ممكن يكون حمار"
لا عم امزح اسمها المسابقة التاريخية المسابقة هية رح تكون عبارة عن اسئلة واجوبة. اجوبة الاسئلة موجودة بقسم التاريخ. يعني رح نسأل سؤال ورح يكون جواب هالسؤال موجود بموضوع من مواضيع النادي (مافي اسهل من هيك) رح ينحسب علامة السؤال لاول شخص بجاوب صح (كتير ممكن يكون الاول مجاوب خطأ فعلى اللي بيجو بعدو يتأكدو من الجواب, لانو ممكن كتير يكون غلطان فيه, وهيك بيسرقو علامة السؤال منو) المهم بعد ما نخلص الاسئلة منجمع علامات الاعضاء. واول واحد رح تكون جائزتو زيادة صندوق الرسائل الخاصة تبعو ليصير بيساع 200 رسالة, اضافة لصفة تحت اسمو, بتدل على انو هالعضو ربح مسابقة قسم التاريخ. التاني رح ينزاد صندوق الرسائل الخاصة تبعو لل 150 رسالة التالت رح ينزاد لل 100 اما اللي بيجي بعد هدول فهو ما بيستاهل جائزة :jakoush: . انشالله المسابقة اللي بعدها بكون منبين التلاتة الاوائل. المسابقة رح تبلش بعد شي يومين تلاتة, لبين ما الكل يكون شاف الاعلان تبع المسابقة. اللي بحب يشارك يا ريت يحط اسمو هون (مو ضروري اذا ما بتحب) بس هية نوع من الاستباق لشوف اديش رح يكون الاقبال عالماسبقة يلا ناطرينكون |
أنا حابة اشترك
مع اني سطلة بالتاريخ:lol: |
انو متل ما قلت الاجوبة موجودة بقلب قسم التاريخ.
اذا شاطرة بالتدوير بيمشي حالك هية المقصود منها انو المشترك يستفاد من المعلومة, اللي رح يلاقيها بالقسم. بحال انو ما قرا المواضيع. واهلا وسهلا فيكي لا تتركي مجال لحدا انو يربحك هاه |
ماشي عمي
ولا يهمك;-) |
ايه منشوف .. عالفضاوة ..
|
اي ... أنا بشارك .... و رح فوز كمان :adal:
|
وانا وانا... بس يعني..في شي.... شو الي بيضمنلا الجوائز...بدنا تاكيد من الحكيم 8)
|
طيب تاكيد مني انا ما بيمشي الحال وهيك منكون تنين مشرفين عم نحكي
يعني الموضوع جدي مو لعب |
اقتباس:
طبعا في ثقة الك ولجاد...بس بتعرف...ما حد بيشتر سمك بمي :o |
وانا وصلت ... :clap:
بس في شغلتين بدي جواب عليهم قبل ... انّو عم تقول الاجوبة موجودة بقسم التاريخ ، اوكي عظيم كتير ... بس مو بكرا تنكوش مواضيع من سنة جدّي !! وهالشي بياخدني للشغلة التانية اللي بدي قولها ...انّو سنة جدّي او لاء،ما بيهم... بس مادام موجودة بالقسم مو كأنّو هيك بتصير كتير سهلة؟! يعني فرضا سألت سؤال .. بنجي نحنا بنحط الكلمة "المفتاحية " بالبحبشة وبتلاقي الموضوع كلّو قدامك ولحتى ما تعزّب حالك بالقراية بتلاقيها - للكلمة المفتاحية - معلّمة بالاخضر الفسفوري - لحتى الاعمى يشوفها - ... يعني بالمختصر ... صارت الشغلة مين اللي بيكون عالخط وقت بتنزّل السؤال وبيسبق بالتدوير ! مو مين بيقرأ لحتى يجيبلك المعلومة ! هلأ بناءً على ما سبق ... خطرتلي فكرة - كاقتراح - ... انّو ليش ما تنزّل السؤال الو فرعين مثلاً .. فرع جوابو موجود بالقسم وفرع انت بدّك تدوّر عليه من برا المنتدى ... اوووو اقتراح تاني .... يوم بتنزّل السؤال من المواضيع الموجودة بالقسم ويوم لاء ( هاد التاني اقتراح شرّاني بحت لانّو اللي بيدوّر باوّل نهار عالجواب بسهولة وبيطلعلو بيقللو ليكني ليكني .. بتاني نهار رح يضطر يقرا 100 موضوع لحتى يوصل للمعلومة :p ) اي المهم .. ردّلي خبر عن اسئلتي واقتراحاتي قبل ما تبدأ المعركة :yahoo: |
اي انا مع ديما بهالحكي ... :?
وكم يوم المسابقة ؟؟ وكم متسابق ؟؟؟ وكم سؤال ؟؟ وكم ... وكم ؟؟؟ .. وكم كف بدو يجيني ؟؟:lol: لاء جادو بس شوية شرح ...او نموذج عن المسابقة خيووووو 8) وبعدولي بعدولي انا اجيت :adal: |
كراكان الويط الملتمس ومعهم سيدهم الدكتور طاهر اخو وطفي
مروا من هنا وسوف يشاركون مع اجمل تحياتي للمسابقين |
بقدر شارك باقتراح
متل ما قالو كون الشي موجود بالقسم رح يخلي الموضوع كتير سهل انا برأيي المشاركة تكون بسؤال مو موجود بالقسم وتاريخي .. والرابح بيحط موضوع بالقسم بخصوص موضوع السؤال... منكون استفدنا بمواضيع جديدة ونشطنا القسم :D |
لكككك احزري شو طلع معي ؟؟...
طلع معي انو ( تعي نحط اقتراحك ع اقتراحي ونعمل اقتراح كابل couple ) :lol: هلأ بالنسبة لاقتراحك .. كتير حلو ، بس المشكلة انّو هيك رح يصير في مواضيع " مكدّسة " تكديس بالقسم .. يعني صح رح يتنشط بأوّل فترة بس بعدين رح يصير معجووووء و بزيااادة كمان !! فــ اللي خطر ع بالي انو .. ناخد الجزء الاول من اقتراحك مع الجزء التاني من اقتراحي = تراااا المسابقة صارت جاهزة للتقديم :clap: لاء عنجد ... شو رايكون ؟!؟ وخلينا نستنى جاد ليدخل بكرا ويردّلنا خبر ... احسن ما هلأ يجي يخانق اذا حكينا كتير بالموضوع :pos: |
اقتباس:
أو صفقعات تاريخية ( حبيتا هي صفقعات :yahoo: ) كل يوم بينزلو الأسئلة ... ومقطع شي بحدود العشر سطور عن الجواب ... وهيك ما بتصير عجقة |
اي هيك تمام ... ;-)
لك وينو جاد ساعة اللي بدنا ياه !! خلص عمّي ... استبيناااااااا :lol: |
وانا بدي شارك كمان...بس ردا ع حكي ميمو...انو بيجوز يكون الجواب ما بدو عشر سطور بيجوز ينقضى بكلمتين....
الفكرة انو ما ضروري نحدد قديش حجم الجواب...كل سؤال على قدو |
طيب هلق بالله مين طلب منكون اقتراحات؟؟؟
يعني مين قال انو تعو اقترحو اشياء للمسابقة؟؟؟ بالنسبة لاقتراح ميمو بخصوص انو اللي بجاوب صح بنزل موضوع (اي ما عاد حدا يجاوب بهالحالة) بخصوص سؤال ديما عن انو الواحد رح يلاقيها سهلة. بالضبط. هية سهلة. هية من نوع التعريف على مواضيع القسم. كمان اذا الشخص عمل بحبشة عن السؤال. رح يطلعلو اكتر من موضوع. وبهالحالة رح يضطر يقرا ليعرف شو هو الجواب الصح. يعني رح يلاقي الموضوع بسهولة. بس الجواب بدو يقرا شوي ليطلعو. |
| الساعة بإيدك هلق يا سيدي 15:14 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون