اليسار و اليمين
 

انا و عم اقرا بالمنبر (و حتى بالجرايد و المجلات العربية) لاحظت انو كتير ناس بيستعملوا المصطلحين (يمين) و (يسار) بصورة خاطئة

خلونا نرجع للبدايات شوي .....

بعد الثورة الفرنسية انشأ الفرنسيين اول برلمان حديث و صار في انتخابات و المرشحين كانوا مقسومين بالدرجة الاولى لقسمين: قسم يدعو للتشديد على سلطة الكنيسة الزمنية، و قسم يدعو لإلغاء دور الكنيسة
طبعا فازوا ناس من الطرفين و دخلوا عالبرلمان
يللي صار (و باعتبار انو الاتقياء يجلسون عن يمين الآب بالعرف المسيحي) آموا قعدوا الداعيين لابقاء سلطة الكنيسة على اليمين و قعد يلي ضد السلطة الكنسية على اليسار
مع مرور الزمن وتوالي الانتخابات صار المرشحين بفرنسا بحملاتهم الانتخابية يدلوا على برنامجهم الانتخابي انو اما يميني (يعني مع الكنيسة ) او يساري (يعني ضد الكنيسة) للتسهيل
و الاهم من هيك انو مع انتشار افكار الثورة الفرنسية (حرية - عدالة - مساواة) طبعا رح ينتشر معها بعض التقاليد الخاصة بهي الثورة و منها البرلمان و مصطلحات اليمين و اليسار. و دخول هي المصطلحات على عوالم الصراع فيها مو بس بين كنسي وغير كنسي صارت هي المصطلحات تعني حرفيا التالي
يمين : الدعوة للمحافظة على الوضع الراهن و القوانين الراهنة (دينيا او ملكيا او او ) يعني لما نقول يميني كأنو عم نقول محافظ تماما
يسار: الدعوة لتجديد المجتمع والقوانين و السياسيات. يعني لما نقول يساري يعني تجديدي


بذور المشكلة:
1 بالنسبة لليسار:
مع توافد افكار جديدة (متل الشيوعية على سبيل المثال لا الحصر) و اغلبها كان يدعو للتجديد و دخول معتنقي هي الافكار ع البرلمان صاروا ينحسبوا ع اليسار لأنو دعواتهم تجديدية
و ظهر ما يسمى باليسار المتطرف يلي بيدعو لثورة شاملة بتهد كل المجتمع و بتعيد بناؤو وفق اسس و معايير جديدة و تسموا يسار متطرف لأنو يدعو لقمة التجديد
بس شوي شوي (وخصوصا عنا) صار اليسار بينقصد فيه الاشتراكية و هاد خطأ ...
الاشتراكيين جزء من اليسار بس في يساريين مانهم اشتراكيين يعني برنامجهم الاقتصادي رأسمالي بحت لكن بنفس الوقت بيدعو للتجديد (متل بيل غيتس و جورج ساوروس و وارن بوفيه ... الخ)
بعدين اذا اخدنا الحزب الشيوعي الحاكم بالاتحاد السوفييتي السابق فأول ما بلش كان يساري لأنو دعا للتجديد بس بعام 1970 و طالع صار يدعو لابقاء الوضع على ما هو عليه ... يعني صار يميني
بلا ما نروح لبعيد ... حزب البعث العربي الاشتراكي الحاكم عنا كان سنة 1963 يساري لأنو دعا لتغيير شامل بالمجتمع السوري بمؤتمرو السادس بينما عام 2005 بالمؤتمر القادم هوي عم يدور على ابقاء الوضع الراهن .... يعني صار يميني

2 بالنسبة لليمين:
متل ما ذكرت مع انتشار افكار الثورة الفرنسية و دخولها لدول جديدة صار في ناس بتدعو للابقاء على الملكية مثلا و انحسبوا ع اليمني (لأنهم محافظين)
و مع انتشار المصطلح بالعالم الاسلامي صاروا دعاة اعتبار الشريعة الاسلامية القانون الوحيد ينحسبوا على اليمين
بس كمان مو معناتا انو كل انسان ديني او متدين يميني (متل الثورة الايرانية) و لا مهناتا انو كل لا ديني يساري، والدليل انو في باميركا نوع من اليمين المتطرف يلي هدفو اعادة قوانين العبودية للحياة

بس حبيت وضح هالنقطة لحتى ما حدا يتهمني اني يميني اذا لاحظ اني مشجع لاقتصاد السوق الحر (الراسمالي)

و دمتم :D

أنا هلق واقف بأقصى يسار اليسار ..... شفتني ..... هاي !!

حبيتو لهاد الموضوع لهيك نكشتو

واستغربت انو ما اخد حقو

الي رجعة عليه

للاسف ... العملة الرديئة تطرد العملة الجيدة

اي فعلا الموضوع حلو....بس يعني كخلاصة...فينا نقول انو اليسار هو الدعوة للتجديد و عدم القبول بالوضع الراهن...والرغبة في تبديله...و اليساري المتطرف هو الذي يدعو لثورة شاملة لتغيير الوضع...اما اليميني هو الشخص المحافظ و القانع بالوضع الحالي؟؟؟

وماذا عن اتجاه الوسط الذي يمثله الفكر القومي الدي يأخذ من
1-اليمين محافظته علي الثوابت القومية
2- اليسار ميله الي التغيير السريع للوضع القائم الي الأحسن بتخطيط جرئ غير مسبوق
أعتقد أن التيار القومي يمثل الاتجاه الوسط مابين اليمين المحافظ بطبعه واليسار المتغير المتسارع

طيب ممكن نسمي اليميني بانو راديكالي ونسمي اليساري بالثوري او اليبرالي؟؟؟؟؟


ولك خالص شكري

لحظة لحظة...

شو بك خطفت الكباية من راس الماعون ؟؟؟

اخي الراديكالية .. تعني تغيير المجتمع تغييرا جذريا حادا... يعني هيي قمة التطرف سواء كان يميني او يساري

يعني ازا الراديكالي (المتطرف) بدو يغير المجتمع بشكل جذري على اسس متطورة و حديثة .. بيكون يساري متطرف

اما ازا كان بدو يغير المجتمع لتحكمو اسس تاريخية (صارت من قبل و ما عاد بقي منها الكتير) بيكون يميني متطرف

مما سبق يتضح ان الراديكالي و الثوري هما تسميتان لمسمى واحد

اما الليبرالية فتعني التحررية او فلسفة التحرر من القيود ، و الها كتييير اشكال و دراسات...

و فيما يلي رابط للموضوع.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

اجمالا هيك الليبرالي بيكون يساري

و يا ريت لو تقرا الموضوع كلو (و لو عذبتك) لأنو اغلب المصطلحات مذكورة فيه، و ازا شي صعب عليك فهمو نحنا بالخدمة

تكرم

موضوع حلو كتير

مشكور :D

حلو..


وأزيد في الطنبور نغماً..


عن علاقة الشام باليسار



لما واحد بيستخدم إيدو الشمال.. منقول عنو "أشول" أو "عسراوي".. أو "يسراوي"

فـ اليسار = الشمال


والشام تسمّت بالـ شام عند العرب.. لإنها بتجي"شمال" الكعبة

باللغة العربية.. فعل "شاءَم" = "ياسرَ" (راح ع اليسار أو ع الشمال) وبالمعنى عكس "يامنَ"..
متل قول ذي الرمة (للاستدلال بالنجوم):

تياسرنَ عن جدي الفراقد في السرى..........ويامنَّ شيئاً عن يمين المغاورِ


فـ شو يعني؟


يعني إنو الشام بمعنى من المعاني هي اليسار :)








-----------


نكشت هالموضوع.. وأنا عم بتذكر كريم :akh:

ما بعرف مدى دقة هالحكي لاني كنت معتقد انو الشام مأخوذة من سام بن نوح (مشان هيك نحنا ساميين و لغاتنا ساميّة)... يمكن في عدة اراء حول اصل كلمة شام و الاحسن القول انها احدى النظريات بدل التاكيد انه هادا هو المعنى بكل تاكيد

بس فكرة جديدة و مثيرة للاهتمام.. شكرا لك

هلا

هلق من جهة "في عدة نظريات".. شي أكيد طبعاً..


من جهة دقة الحكي.. يا سيدي دقيق.. ع الأقل بجهة "الاشتقاق اللغوي"

شآم الشيء.. شماله أو يساره


وعلى ذمتي :)

خيو بوقت لسان العرب ... كانت بلاد الغال تحت حكم روما ...