|
أيها النظام... مللنا لعبة الطرابيش
لايخفى على أحد أن التغييرات التي يجرييها النظام السوري بين الفترة والأخرى لاتأتي بأي جديد على الأرض ولاتأثر في السياسات الخارجية أو الداخلية... لكن الجديد الذي تفتقت عنه عقول جهابذة حكومتنا هو عدم إقالة أي مسؤول مهما بلغ حجم الإستياء الشعبي "المكبوت" منه ومن تصرفاته والجديد الجديد هو تعيين مسؤولي الإستخبارات "الذين يعشقهم الشعب" في مناصب مدنية بحتة أو عسكرية أو مناصب جرت العادة في كل دول الأرض أن يشغلها مسؤول مدني أو حقوقي ضماناً لحقوق المواطن بالحد الأدنى... بجردة سريعة للتغييرات الكبرى في الفترة الأخيرة نجد أن وزير الداخلية الحالي أتي به من رئاسة أحد أفرع المخابرات في خطوة من شأنها خبرنة "على وزن خصخصة من الأصل مخابرات" وزارة الداخلية وأجهزتها... وأتي بأخر إلى منصب نائب رئيس أركان الجيش في خطوة مماثلة وهمش ثالث إلى منصب بالإطفاء وأبعد خامس وسادس وسابع إلى سفارات أجنبية وعربية وكأن منصب السفير هو جائزة ترضية عن عملهم كضباط مخابرات أذاقوا شعبهم الويلات وإستحدث للأمنيين مناصب خيالية الإسم كمعاون نائب رئيس الجمهورية "في حالة محمد ناصيف" وغداً سيحتدث منصب مساعد معاون نائب السيد الرئيس لشؤون حماية الشعب المرجانية في المحيط الهادي... وأما عادة إستحداث المناصب فلم تعد مقتصرةً على القيادة العليا بل بدأت بالإنتشار حتى على مستوى الوزارات فبعد أن إستحدث منصب لبثينة شعبان "بمرتبة وزير" وأخر لنجاح العطار وثالث ورابع وخامس وكأنهم ثروات وطنية لا ينفع التفريط بها... انتقلت العدوى للسادة الوزراء فاستحدث منصب لمدير الجمارك "المقال" هو منصب مستشار وزير المالية لشؤون الجمارك وأخر لمدير مؤسسة تكرير النفط هو مستشار وزير النفط لشؤون النفط "المفارقة أن إسمه وزير النفط ويحتاج لمستشار لشؤون النفط" وليعين مدير مؤسسة الإتصالات الفاشل والذي أعتبر فشله فشلاً ذريعاً لوعود بالتطوير المعلوماتي مستشاراً لوزير الإتصالات... ماهي الإستشارات التي سيقدمها هؤلاء السادة الفاشلون لوزرائهم الفاشلين من دون مساعدة !! كيف لشخص لم يستطع حل مشكلة "الإنترنت" في سوريا مثلاً طيلة عشر سنوات أن يشير بشيئ فيه مصلحة الوطن !! أردت بالأمثلة السابقة إستيضاح فكرة التطوير والتحديث التي يتحدثون عنها... كيف لأشخاص يتقاسمون السلطة كأنها غنيمة حرب أن يتكلمون عن تطوير وتحديث... كيف توزع المناصب في سوريا ووفق أي معايير؟؟!! كيف يقال الشخص من منصبه ثم يستحدث له منصب جديد وتعدل القوانين والأنظم؟؟!! هل هذه الأسماء هي فقط النخبة القيادية في بلد يعد سكانه 22 مليون نسمة؟؟!!! هل ببقاء هذه الشخصيات تستمر مسيرة التطوير والتحديث؟؟!! كيف لأشخاص إرتبطت أسمائهم بالفساد والقمع والفشل أن يطوروا أو يحدثوا؟؟!!هل يعقل أننا لانملك في سوريا طاقات شابة شريفة غير هذه الأسماء والوجوه المستهلكة؟؟!! هل باتت المناصب توزع وفق الإعتبارات الشخصية الضيقة ودون أي أخذ بالاعتبار لمصلحة الوطن أو المواطن؟؟!! ياقيادتنا من المؤكد أنك أدرى منا بمصلحتنا... لكن هل لنا أن نعرف مالسر الخطير وراء تمسككم بهؤلاء الأشخاص "لدرجة تحنيطهم"... هل تخافون عليهم نتيجة وضعهم الصحي مثلاً؟؟ هل هؤلاء هم فقط الذين تهمهم مصلحة الوطن؟؟ أم تراهم هم فقط من لاتهمهم مصلحة هذا الوطن وهذا سرهم وسركم !!! ودمتم... |
اكبر تجسيد لحالة الركود و الجمود ببلدنا هي سياسة توريث او تدوير المناصب ...المعروف دايما بالأنظمة الشمولية انو التعيين بالمناصب المهمة بيعتمد بالأول و الأخير على مبدأ الولاء للحاكم و التفاني في سبيل تحقيق رغبات الحاكم ...و لأنو المناصب المهمة بتحتاج لأشخاص ذو ولاء كبير لهيك يمكن بالفعل بشار الأسد ما يلاقي غير اشخاص قليليين مؤهلين للمناصب هي ....من اصل اكتر من عشرين مليون شخص ..ما بظن هادا شي غير معروف للكل ...هاد شي بديهي جدا ...
موضوع تدوير و توريث المناصب مهم جدا لأنو بقاء دولة كبيرة متل سوريا بتخضع لسياسات اشخاص قليلين و من بعدون ولادون بيستلمو كمان ..بيأدي انو البلد تعيش بحالة جمود بكافة مستويات ...يعني ,,نفس الأشكال و السياسات و الأمراض نفسها على مدى عشرات السنيين ...ما في اي شي جديد ..ما في اي فكر جديد ...ما في تفاعل من الناس لأنو بالأصل ما في شي ليتفاعلو معو ....بتخلي البلد يعيش بركود ..و فكرنا بيتبلد ..و منرجع لورا ....لك حتى شخصيتنا بتتأثر |
اقتباس:
تانيا توزيع المناصب . قرا دستور الجمهورية العربية السوريي قبل . لان بالنهاية بيرجع لانتخاب الشعب . والحزب الحاكم عنا هو حزب البعث العربي الاشتراكي وفاتح الانتساب للقاصي والداني . وفي اسبوعيا اجتماع هادف وبناء وبيخلي فكرك متجدد وغير بليد ونظرتك اوسع . |
اقتباس:
بس تجي عسوريا بشتريلك كتاب الدستور العربي السوري او كتاب القومية الاشتراكية تبع ال 20 ليرة وبقريك ياه . وبتلاقي كل اجوبتك فيه .. وبتلاقيه كمان ازا بدك باي مكتبة عالمية .. دستور الجمهورية العربية السورية .. وين ما بدك بتلاقيه ازا حبيت كمان ببعتلك ياه بال دي اتش ال مشان تلاقي كل اجوبتك فيه . |
اقتباس:
ملينا منها ... و من الناس يلي بتحكي بهيك طريقة . و شكرا للدعاية الحزبية يلي حضرتك عم تقدمها ....مجانا .. |
الواحدمن هالبشر بدو ينق ويسق بطعمة وبلا طعمة و وكل ما صار شي من اللي بدو ياه بيقول (بكرا بيخرب), عطيني اسم نظام بهالدنيا بيطبق الديمقراطية , او ما بيقمع المعارضين ,شغلة بديهية انو الحاكم يسكت المعارضين يلي بدون كل شي يصير بكبسة زر.
شي يلي بيعارض مذهبيا لانو ما بيصير اقلية تحكم اكثرية, وشي يلي بدو حزبو , وشي اللي بدو حالو , والخاسر الاكبر هو البلد, كتير من الناس بالمناطق البعيدة شوي عن الشام(وحتى بالشام) بياخدو مصاري عانتخابات مجلس الشعب(مثلا بالرحيبة بيوصل الصوت لالف ليرة ) وللاسف الشباب هنن يلي عم يساوو هيك, واخر شي بيقولوا وين العضاء ووين البلدية ومن هاللعي . حاج بقا شعارات حرية وديمقراطية الناس ملت منكن ,لسا صحافة ومنتديات وتخبيص , الناس بيهمها الموقف السياسي اكتر بكتير من الاوتيلات والكافتريات والتنظير , بيهما وجود مكاتب حماس اكتر من تزفيت شارع كل كم يوم , منطقكن بيهوي وشعاراتكن مستهلكة ,وحاحتكنلعي هالبلد بدا ناس تحبا من قلبا(انا ما عم شكك بوطنيتكن ولا عم اعمل حالي وطني عليكن) بس كلامكن بيعصب , النظام عم يسعى لتقوية الموقف السياسي وما عم يقمع الا الناس اللي عم يخربوا البلدبحجة الحرية , وانا وكل الناس مع القيادة بهالخصوص,وانتوا عم تدوروا على شي تتمسخروا عليه , خلص عاد,ملينا منكن وبدنا نعمر سورية عاساس واقعي مو شعارات وحكي جرايد, كلامنا مو معلبات متل ما عم تقولوا ,نحنا سوريين للابد ومع بشار الاسد سورية الله حاميها منكن ومن كل شي متلكن بايد بشار الاسد ,عزنا وتاج راسنا. وما بقول غير اسفي عليكن, وتحيا سورية ,سورية الاسد,وسورية سعادة , سورية المقاومة. |
اقتباس:
بقا بس تتعلم كيف تحاور وكيف تناقش متل الكبار عمو . ساعتها تعا فوت لهون . يا ناقش يا طلاع . |
مع انو كلامك صحيح مية بالمية... بس بصراحة.. و الله ملينا يا اخي
يعني كلنا منعرف وضع بلدنا السيء و بالحضيض... و من كافة النواحي. يعني عنا نظام الحزب الواحد و الرئيس الواحد... وقفت على وزير داخلية و لا على وزير السياحة؟ ما هدول كلهم ما بيحطوا و لا بيشيليو.. ما في عنا مؤسسة وحدة بالبلد يمكن بتشتغل من حالها و لاهدافها الخاصة. كل المؤسسات بتتلقى الاوامر من فوق يعني صباح عبيد و على اساس شغلة كبيرة و نقيب الفنانين و حرم الفنانات اللبنانيات من الغناء بسوريا.. بيطلع اخر شي هادا قرار من فوق.. يعني شغلة مدنية و تافهة لهل درجة, حتى هيك ما إلنا قرار فيها.. و بتجي من فوق بسبب شي قرار سياسي... بقى وين طاحشين نحنا الخلاصة... هادا الطرح صار جدا جدا جدا ممل و حتى بيعمل مغص. يعني لما اقراه.. بحس نفس الشعور لما اقرا مؤلفات و أدبيات حكومتنا العتيدة... طريقة التسمية تبع "النظام".. ما بعرف.. قديمة صارت و انتهت موضتها مشكلتنا الحقيقة مو بالحكومة او بنظام الحكومة.. بل بانو معارضتنا دقة قديمة و هي نفسها ما عندها طرح حقيقي او شي حقيقي تقدمو غير العربشة على اخطاء و سلبيات الحكومة الحالية.. و هادا بصراحة اسلوب صار ممل و بالشارع السوري بضمنلك ما رح تلاقي اي شخص يوافق مع هيك طرح او حتى إلو خلاق يقراه.. لانو كلنا منعرف.. كلنا منعرف انو خبيصة و عوجا.. بقى بدنا حلول. ما بدنا تشخيص |
بخصوص كلمة "نظام".. انا شايفها غلط كبير و جزء كبير من مشكلة المعارضة
المعارضة عم تتعامل مع "المشكلة السورية", خلينا نقول, كانها لساتها حديثة.. كانو من سنة بس صار في ثورة و استلم حزب البعث.. و كانوا لسا لهلق عبارة عن نظام حديث عم يستلم مقاليد الحكم .. بينما الشعب السوري الأبي و الواعي عم يحارب و يحاول ينهض هادا التصوير بيخلق حالة وهمية.. من انو في شي اسمو نظام سوري .. بينما المعارضة و الشعب بخانة وحدة بينما الحقيقة انو النظام صار جزء من الشعب او الشعب جزء من النظام.. ما بعرف كيف بتحب تشوفها.. ما فرق بس جزء كبيرة من "المشكلة السورية" هي الشعب. الفساد متغلل باوساط الشعب متل مانو متغلل بالحكومة. هلق صح الحكومة عادة بتملك القدرة نوعا ما على تحريك هيك قضايا.. بس درجة العطل بالشعب صارت مخيفة ثم النظام هادا مانو بس عبارة عن مجلس عسكري مخابرات.. عندك مؤسسات حكومية طويلة عريضة بتوظف مئات الالاف من المواطنين.. من الشرطة للجامعات للوزاراة و المعامل للقوات المسلحة إلخ إلخ يعني القصة مشربكة كتير و المعارضة حتى تنجح لازم تتعامل مع هادا الواقع.. و بلاها هي كلمة النظام لانو كتير صارت قديمة و بتلعي النفس المعارضة حتى تنجح و تلاقي مين يسمعلها لازم تقدر تعطي بديل. جزء مهم من هادا البديل هو تقديم صورة عصرية عن شو يعني اني انا سوري... شو هويتي.. رح نضل نتمسك بالخط العروبي؟ شو حقوق الانسان السوري و وضع الطوائف و الاعراق المختلفة؟ في كتير قصص لازم يتجاوب عليها شعبنا مندمج جدا مع هادا "النظام" و صار عندك اجيال جديدة خرجت من الشعب و انضمت للحكومة و "للنظام"... الحرس القديم شبه انعزل عن الساحة و صار عندك اجيال جديدة و تحالفات جديدة.. بقى المعارضة لازم تتعايش مع هادا الواقع تحياتي |
اقتباس:
انا بالي ان الرئيس بيتدخل بتوزيع المناصب و انو الدولة بتحكما عصابة من المرتزقة و انو لما بيعفو واحد من منصبو بدو يروح على منصب أعلى ...الا المغضوب عليهم و الضالّين .....وانو حزب البعث صار حزب خشبي بيحكمو اصنام صرلا اربعين سنة ورا الطاولة ...يابتروح على طاولة أكبر ...يابتروح عالقبر....وانو اي مسؤول من أرفع واحد لاتخن واحد لازم يكون أول شي حزبي تاني شي مكولك حتى يترشّح للمسؤولية ....وانو قوانين الاقتصاد و المالية و التصدير و الاستيرد بتنحط تفصيل كرمال الغول الفلاني و الحوت الفليتاني....و طزّ "بصغار الكسبة"... ما بعرف كيف بدّي أتشكرك لانو فتحتلّي عيوني على الحقائق الوردية اللي بتعيشها بلدنا .... ولووو انته شغلة كبيرة تقبل تحياتي الحارة جداً جزيلاً .....:deal: |
اقتباس:
هلاء الرئيس مامدّ ايدو للاسرائيلين متل باقي الخونة.....جميل طيب كيف عمبتصلنا أخبار "مابعرف ازا كانت أخبار مغرضة" انو عمبيدّ ايدو من تحت الطاولة برعاية تركية .....؟ وعلى هوا ما عمبيقولو....ماتاخد منّي الا الكزب ها.....انو الجولان راح بصفقة شخصية متلو متل اللواء.... وانو هالحركات الهلوانية والتصريحات المعلّباتية من قبيل..السلام العادل و الشامل ..قرارات الامم المتحدة ...اعلان جنيف ...:na3san:..كلها حكي فاضي لايهام الشعب انو لسّا في قضية تستنزف طاقات البلد و ثرواتو لتروح عالجيش و التسليح و التعبئة و المابعرف شو...وبالتالي لجيوب الظاظات ...... جاوبني معلمي.... |
اقتباس:
طبعا ..كلامك صح مية بالمية ..لازم نلاقي حلول ..بس ..بظن بوضع سوريا ,,ايجاد الحل بنفس صعوبة ايجاد الحل للغز فرسان الهيكل وكنز سليمان يلي جابوه من القدس ! انو صرلنا اكتر من اربعين سنة و ما حدا حكى بحلول قابلة للتطبيق بسوريا ...ليش ? ,,لأنو باختصار كل ما بتحكي بحل ,,بتصتدم بحيطين ...الحيط الأول ,,هو العقلية المتحجرة لشعبنا و شفنا بالموضوع هاد كيف في اخوة سوريين عم يطالبونا نخرس و ما بقى نق ..و الأمر بيتعدى الشي هاد ..للطائفية ..و العشائرية ..و حتى توصل للمصالح الشخصية الضيقة و الحيط التاني ..هو النظام نفسو . التشخيص مهم جدا ..لأنو للوقت هاد ,في كتير من السوريين مقتنع انو ما يسمى بالنظام هو مصدر امان و قوة و عز للشعب ..طيب بهيك حالة .. كيف لازم نجيب حل ,,اذا بالأصل نحنا ما متفقيين على التشخيص ! طبعا بعد اربعين سنة ..النظم جعل الفساد يتغلغل بالشعب لدرجة خطيرة .. بس مهما كان المجتمع مريض ..انو نصنفو مع النظام بخانة وحدة ...بشوف فيه ظلم للشعب ...لأ الشعب قادر يستمر و يعالج الأمراض كلها ...بس وقت بينسمح للحلول المبنية على التشخيص الصحيح انو تتنفذ على ارض الواقع . |
اقتباس:
بلا هالسؤال, بعمرك سمعت عن معتقل سياسي ببريطانيا مثلا, او بالمانيا او باميركا او بكندا ؟؟ بلا هدول لك حتى بتركيا حليفتنا الجديدة ما بتلاقي عندن مصطلح اسمو الاعتقال السياسي , اي يازلمة شو هالمنطق هدا؟؟ اقتباس:
انا بقلك الناس ملت من هالشعارات الفاضية , عالم ناهبين البلد و محولينها لخرابة وجاي تقلي بالاخير معلش المهم عنا مكتب لحماس. اقتباس:
 اقتباس:
بالنهاية مشكور على هالمحاضرة الحزبية القيمة , اللي حتى باجتماعات الحزب بسوريا بطلوا يحكوها. ملاحظة: انو خيو طالما عم نرفعلك ضغطك بافكارنا الامبريالية الصهيونية, ليش اصلا عم تفوت على موقع محجوب و مغضوب علي متل أخوية؟؟ |
اقتباس:
|
اقتباس:
طب لاوصل لمكتب حماس ما بدي طريق مزفت ؟ بعدين سؤال النا اللي عم تحكي فيها تابعة لمين؟ |
اقتباس:
يا سيدي اذا بتطبق هالحكي على حالك بالاول رح نكون مبسوطين كتير |
اقتباس:
اقتباس:
اقتباس:
اقتباس:
اقتباس:
اقتباس:
اقتباس:
في شي مشترك ..بينا كلنا ...كلنا عم نشتكي من الملل !! و كأنو .......صرلنا ميتين سنة عم نتحاور ...و نمارس السياسة ! ........ :D |
اقتباس:
|
| الساعة بإيدك هلق يا سيدي 23:43 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون