|
شي بيخجّل!! سوريا تحتل مركزاً متأخراً كالعادة؟؟!!
إخوتي الكرام
هذا نداء لكم ولكل من تعرفون!! وأخص بالذكر جميع المشرفين... كما نعلم جميعاً فإن الغرب يعتمد في سياساته على الاستفتاءات واستطلاعات الرأي العام... لذلك وباختصار.. أحد الاستطلاعات يطلب ممن يدخلون الموقع معرفة من يدعم، إسرائيل، أم فلسطين (لا غزة ولا عباس على رأي شاعرنا أحمد فؤاد نجم)؟؟ ولأننا لا نستطيع نحن المغلوب على أمرنا أن ندافع عن فلسطين المحتلة بأيدينا فلا أقل من صوتنا نمدهم به عبر هذا الموقع - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - انظروا إلى هذه الجدول والذي يعبر عن نسبة المصوتين من كل بلد، اللون الأزرق لإسرائيل واللون الأحمر لفلسطين  سترون أن النسبة الكبرى من المصوتين لإسرائيل هم من إسرائيل نفسها ومن الولايات المتحدة الأمريكية وبنسبة لا تقارن بالدول العربية!! والشيء المخجل هو أن الأصوات القادمة من سورية جاءت في المرتبة 94 من بين 137 دولة مشاركة بالتصويت عن أبي سعيد الخدري رضي الله عنه قال : سمعت رسول الله صلى الله عليه وسلم يقول : ( من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان ) رواه مسلم . الشكر لكم جميعاً والمطلوب هو المشاركة بالاستطلاع والنشر وجزاكم الله خيراً |
الغرب بيبني مواقفو على استطلاعات رأي؟؟
لا والاحلى انو بالاستفتاء حاطين اسرائيل X فلسطين ...اي شو هي مباراة قدم والله عيب هالمسخرة |
معك حق!!
اقتباس:
لازم اتفق معك بإنو عيب هالمسخرة بس شيت إنو الغرب بيبني مواقفوا على استطلاعات الرأي فهالشي مظبوط لحد ما.. وإلا ليش عدد المصوتين من إسرائيل وأمريكا بيجي قد كلشي صوتوا؟؟!! سؤال للعارفين!! |
يعني شو بدك ياني أجاوبك ..
طيب مشكووووووووور ..بارك الله فيك ...يسلمو كتيييير عالموضوع اذا هيك بتنبسط خلص اعتبرا هي اجابتي المهم : يعني هلاء اذا صوتنا وجبنالنا مية مليون صوت وصارت فلسطين أكتر من اسرائيل..شو بدو يصير رح يطلع مجلس الامن بقرار عقوبات على اسرائيل يالله وبكل الاحوال ما فتح الموقع حسبي الله ونعم الوكيل |
انا رح قلك ليش هاد الفرق بالعدد
لان احنا كسوريين عارفين الوضع تماما وانه هاد الاستفتاء وحتى لو فازت فيه فلسطين 5 - 0 فهو كلام فاضي لان بالاخر في عوامل كتير عم توصلنا لهي المرحلة من عدم توازن القوى منها اقتصادية واجتماعية ووووووو ومو استفتاءات حبيب اما الامريكان غيرهم فهما عايشين بحلم الديمقراطية الي عم يضحكو حكوماتن عليهن فيها فلهيك بيدخلو وبصوتو على اساس انهن غيرو شي وبالاخر رح يصير متل ما الاقوى بده يعني مثال تواجد الامريكان بالعراق اكيد بما انك من العارفين بتعرف شو رايي الشعب الامريكي وشو بده بس بما انه كلهن مجرد نائمين في حلم الديمقراطية فعم بصير الي بده ياه بوش وكل يوم جنود امريكين عم يموتو بالعراق مشان شو ما حدا بيعرف بقى بلا ما نزاود على بعض ونقول واحسرتاه و يا عيباه خلينا نحكي واقع وما بقصد بالواقع انه نهين بعض لمجرد اختلافنا بالراي :D |
على راسي إنت
اقتباس:
بالتأكيد ما رح يطلع مجلس الأمن بهالقرار بس نحنا كتير مقصرين بإظهار الوجه الحقيقي لقضيتنا اليهود بكل مكان بالعالم بيشتغلوا لصالح اسرائيل لك حتى الفلافل سووها أكلة تراثية إسرائيلية بس نحنا همنا غير همون يا ريت كل واحد يعمل بحث عن فلسطين وعن اسرائيل بأي لغة غير اللغة العربية ويشوف نتائج البحث ويشوف أي مواقع عم تتصدر هالنتائج نحنا كلامنا منا للإلنا بينما هني كلامون لكل العالم لك كتوب Golan وشوف البحث وين بياخدك باللغة الإنكليزية اللي كل العالم بيقراها العالم كلوا بيعرف إنو اليهود المساكين عم ياكلو قتل ليشبعو من هالإرهابيين الفلسطينيين وإنو هني عم يدافعوا عن العالم الحر لهيك عم يضطروا آسفين لقتل هالإرهابيين وهالإرهابيين عم يتخبو بالجوامع والمدارس والمشافي لهيك عم يقصفوهون أخواني بالأخوية ما بدها إلا يكون إلنا رأي ولو باستطلاعات الرأي |
نوم في العسل
اقتباس:
لهيك على الأقل حتى يعرف العالم اللي بتعرفوا ما بيضر إذا شاركت بالاستطلاع!!! |
خيو ..احتلت بالتصويت ولا ما احتلت ...
شو بدو يطلع يعني ..الشباب عم يشرحولك انه متل قلتو ..التصويت وفخار مكسر كمان ...مالح يفيد بشي |
اقتباس:
بس انا حاولت صوت بس الموقع محجوب :p |
اقتباس:
يا أخي لو كانو بيعرفو (الإسرائيليين) هيك ما كان في داعي يصوتوا أو يشاركو بالتصويت من أصلو |
اقتباس:
بعتذر منكون لأنو الموقع محجوب بسوريا ولكن هذا أضعف الإيمان |
اقتباس:
انا بنت خيو ...:frown:... بعدين ...شو بدك بربو للتصويت ... هي طلع قرار بمجلس الامن ..ومتل قلتو ....فا حاج ولو ..نضحك ع حالنا مشان الله ... |
اقتباس:
إيوه بالضبط "حاج ولو ..نضحك ع حالنا مشان الله" رح منضل نضحك ع حالنا |
إخواني بالأخوية
شي بيخجّل لما واحد بيقرا الردود وبيشوف حجم الإحباط واليأس الموجود بشبابنا أضعف الإيمان إذا الواحد ما بدو يشارك بالاستطلاع يقرا ويمشي وألله يجزيه الخير بس إنو يحمل السلم بالعرض ويحكي شروي غروي فهاي ألله ما قالا بشكر كل اللي شاركو وكل اللي بدون يشاركو بس رجاء بلا إحباط!!! |
انا مقيم برة و ببلد أجنبي يعني مو عربي
من قبل ماتبلش الحرب ومن ايام الحصار صرت أفتح النت على مواقع الاخبار و أخلي كل الحوليي من موظفين و اصدقاء يشوفو هالاخبار و أشرحلن شو عمبيصير و أفهمن شو أسرائيل و شو فلسطين و شو هي جذور الصراع أحلى شي مرة كنت عمبتناقش مع وحدة بهالموضوع وهي عمتشوف صور الشهدا سألتني : الفلسطينيين عرب؟ قلت : نعم قالتلي : وانتو 22 دولة عربية كمان ؟ قلت : نعم قالتلي : أهل دبي والخليج عرب ؟ قلت : اي والله عرب قالتلي : عجيبة طيب ليش ما بتكونو كتلة وحدة بوجه اسرائيل...:? بشرفي بلجمتني و ما عرفت شو بدي أجاوبا اذا نحن ما منعرف شو بدنا بدنا... بدك الاجانب يعرفو |
اقتباس:
شرحو ...صار معي :pos: وللاضافه ..مديري البريطاني كنت عم اتناقش معو ....ع نفس الموضوع ...قلي كلمه وحده بس ...انه السعوديه ليش ماعم تحكي ..لان بكلمه وحده ممكن تنهي الموضوع .....وجبلي امثله وفتح حديث معي كرهت رب الحكام ... دفاعي الوحيد انه الشعوب ما دخلها ...بس هدا ما بفيد شي .. غزه باعوها وقبضو حقها .. |
اقتباس:
الحكام العرب باعوها بأرخص الأثمان وأكبر مشكلة عانت منها القضية الفلسطينية إنها كانت بين أيدين غير أمينة بين أيدين ناس بتعبد الدولار ومتعدين ليبيعوا حالهون بالسوق إذا حتاج المر وبهيك حوّلوا أعدل قضية بالعالم لبضاعة بسوق النخاسة يعني نظام الفصل العنصري بجنوب أفريقيا بتحطوا إسرائيل بجيبتها الصغيرة ومع هيك كل العالم (الحر) بيدعم إسرائيل !!! ليش يا حذرك؟ لأنو بجنوب أفريقيا كان في عالم عم تناضل من قلب ورب مشان بلدها! أما فلسطين فأول من غدر فيها شعبها اللي هرب منها وبعدين الحكام العرب اللي قبضوا تمنها من زمان ولسا عم يبيعوا ويشتروا فيها وشو الواحد بدو يحكي لا حول ولا قوة إلا بالله |
اقتباس:
صار لازمنا نعرف العالم بقضية العرب وحكامهم قبل ما نعرف العالم بقضية فلسطين.. التانية سهلة شرحها بس الاولى والله بدها شغل كتير |
| الساعة بإيدك هلق يا سيدي 09:08 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون