|
لماذا حلب ؟!!
اعتدت على تصفح موقع سيريا نيوز بانتظام للوقوف على أحوال البلد بحكم إقامتي خارج سوريا .. و منذ فترة ليست بالقصيرة ساءني ازدحام صفحة الحوادث بأخبار الجريمة و السطو و (التشليح) باستخدام السلاح و التحرش … لكني لاحظت أن مدينة حلب (مدينتي) معنيّة أكثر من غيرها من المحافظات بهذا الانفلات الأمني .. و هذا يدهشني كثيراً و يرعبني في الوقت نفسه لأننا في السابق كنا نضرب المثل بسوريا في الأمان و الاطمئنان ، و لطالما كان هذا العامل هو المرجّح لكفّة سوريا عند أي مقارنة تتم بينها و بين بلاد المغترب من أميركا و أوروبا .. لكن الآن أشعر بأن كل هذا تغيّر .. حتى الناس تغيّرت …. كان (الحلبية) مشهورين بنخوتهم و هبوبهم للتصدي ل(الزعران و السرسرية) حتى أني لأذكر أنه خلال مراهقتي شهدت مراراً و تكراراً فصول (دق و دوس) لعجيان حاولوا يلحقوا بنات و يتحرشوا بهن (و أحياناً كلاماً فقط) من قبل بعض الشباب (القبضايات) حتى لو البنت ما استغاثت أو تذمرت … بينما الآن .. يتم التحرش بالكلام و بالأيدي و مرّات يتطوّر التحرش إلا ما هو أعظم و نرى الفتاة (أو حتى السيدة لأنو ولاد الحرام ما عادوا ميّزوا بين صبية و مرا كبيرة) تستنجد و تصرخ و ما من أحد يتجرأ و يتدخل للمساعدة .. و تسمع من يقول لك : *اي معلش جبان .. ألف كلمة جبان ولا كلمة الله يرحمو* أو مثلاً *بتستاهل .. مشان تحرّم تلبس بنطلون ضيّق* أو *لا عمّي أنا ما دخلني هلق بيطلع وراه عشيرة بتاكل راس الحيّة و بروح من كيس حالي* …....... للأسف … هذا هو الواقع اليوم .. و موضوع التحرش هو أهون الشرور .. من يومين قرأت في الصباح (عالرّيء) خبر عن جريمة تقشعر لها الأبدان .. و صدقاً يومها شعرت بالغثيان و لم أتغدّى من القرف .. لن أنشر الموضوع كي لا يصيبكم ما أصابني ولكن من كان واثقاً من قوة أعصابه فليدخل و يقرأ : - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و للأسف لا تزال الجرائم بازدياد مخيف نظراً لجبن الناس و تقاعسهم غالباً عن تبليغ الشرطة : *شو بدي بهالعلقة و روح و تعا عالمخافر و رشرش حبك يا جميل .. الله يسامحو للحرامي انسرقت مرة غصبن عني ما بدي أنسرق مرّة تانية بكيفي و مزاجي* … و هذه روابط جديدة لجرائم أخرى : مقتل صائغ و إصابة 4 مواطنين آخرين بينهم أطفال في عملية سطو مسلح - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - مقتل عضو مجلس شعب سابق و زوجته في عملية سطو مسلح على منزلهما - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - إصابة 3 أشخاص بجروح في عملية سرقة بمنطقة الجلوم بحلب - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - عصابة تسلب المواطنين باستخدام سيارات الأجرة في حلب - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و كثيرة هي هذه الأخبار و لكن سأكتفي بهذا القدر حفاظاً على مسائكم من التعكير … فماذا نفعل ؟؟ *ماما تؤبريني لا توقفي تكسي من الشارع اطلبي تكسي من المكتب* (مع العلم أن أقل توصيلة لتكسي مكتب تسعيرتها 100 ليرة و تصور أنك بحاجة لأربع خمس توصيلات باليوم .. طار الراتب العوض بسلامتك) … *بابا لشو تسوقي السيارة هلق و يطحشوا عليكي شوفيرية المكاري و السرافيس تبع الريف و انتي بنت لحالك و مانك قد هالعلقة!!* … ماشي و هي بطلنا نسوق و هي قعدة بالبيت .. لكن يا ترى هل الناس اللي في بيوتها مرتاحة من الشر ؟!!؟ من فترة سمعت قصة عن امرأة مسنة قريبتنا .. أرملة مريضة تعيش لوحدها ، يزورها أولادها و أحفادها باستمرار للاطمئنان عليها .. ذات يوم أتاها شخص ادعى من وراء الباب أنه جابي الكهربا أو أجير اللحام أو ما شابه و لما فتحت له الباب .. اعتدى عليها بالضرب ليخيفها ثم هددها بسكين إما أن تخرج له كل ما لديها من مال و مصاغ و إما أن يستمر بضربها إلى أن تموت .. و ظلت المسكينة تحلف و هي تصرخ و تنتحب بأن كل ما تملك من مال هو مودع في حساب مصرفي بالبنك ولا تحتكم على شيء منه في المنزل .. إلا أن استطاعت أن تنفذ في غفلة منه إلى الباب و تخرج إلى الدرج و تصيح بكل ما لديها من قوة منادية الجيران ليسارع الرجل بالهروب .. لكن هل لكم أن تتخيلوا أنه و بعد كل الأذى الجسدي و النفسي الذي تعرضت له تلك السيدة العجوز أن أولادها لم يبلغوا عن الحادث ؟!!!؟ نعم للأسف .. فكثيرة هي القصص التي نسمعها اليوم عن الضحايا و أصحاب الحقوق الذين تحولوا إلى مجرمين و معتدين في المخفر بفضل ذوي العشائر (اللي قتل القتيل عندن متل فصفصة البذر) و المتنفذين و ذوي الواسطات ... أطلت عليكم .. لكنها (فشّة خلق) و كثيراً ما يقول لنا بعض الرفاق في البلد : *أنتم المغتربين تبالغون كثيراً و هذا الكلام اللي تقرؤون (حكي جرايد) و البلد منيحة و عال العال*... ما رأيكم يا جماعة ؟؟ هل الوضع فعلاً مثل ما أراه .. أم أن الرفاق في سورية على حق ؟!!؟ يا ليتهم على حق .. واللهِ و بكسر الهاء ما بزعل ..! |
للاسف يا أم الجود كلامك صحيح ..والقصص اللي عمنسمعها تقشعر البدن...
بدنا ناخد بعين الاعتبار انو حلب هلاء مو حلب اللي من قبل 50 سنة أو 70 سنة .. المدينة هلاء صارت شي 5 مليون بني أدم يعني تقريباً أكبر مدينة بسورية و لا تنسي وضعها التجاري و الصناعي و الرجِل الغريبة الداخلة عليها... هجرة أهل الريف بأعداد هائلة..انتشار الفقر المدقع (هالظاهرة انتشرت بالفترة الاخيرة كتير) و ضعف القبضة الامنية الجنائية ... كل هالعوامل أدت لتفشي الجريمة بشكل واسع و بطرق بشعة .... والله يسترنا من الاعظم.... |
انا بصراحة كنت ملاحظ هالشي بالايام الماضية.. و مستغرب انو حلب تحديدا... فكرت سيريا نيوز هيي لمركزي ع حلب!!
الله يستر.. |
والله الوضع تعبان وفعلا زايدة الجرايم بحلب عقولة رفيقتي كل مالا الدنيي عم تحلا
اقتباس:
|
حلب بظل حكم العشاير والقبائل وتحت وطئة الفساد والكبت الجنسي يلي فرويد بذاتو ما ممكن يتخيلو تحولت من مدينة عريقة لخيمة عربان كبيرة تحكمها تقاليد القبائل
|
والله مو بس حلب ..
من 4 تيام واحد مزعوج من واحد بالطريق وقف السيارة قدامو وسحب عليه مسدس ولولا المسدس مانو مامن كان طلع الضرب ... غير السرقات والتشليح والضرب اللي صاير بمحافظتي كمان .. |
فقــر .. وعشاير .. وشوية كبت .. عشوية جهل وتخلف وامية وتعصب .. وحكومة سلامتك ..
وسيطرة شوية بلطجية زعران وفرعنتن لان مافي مين يردن .. اجمعلي كل هالشغلات بلد وحدة بتلاقي ابشع من هيك .. وادق رقبة بقى مرحبا حلب |
اقتباس:
ما فهمت شو معناتا هي الكلمة اللي بالاسود .. بحكم كوني بنت ريف يعني... |
بحس السبب انو الجريمه او الاحداث اللي مو منيحه فيها عدوه خفيه متلا ممكن تسمعي عن مشكله بعيله وضل هالمشكله تتكرر بنفس العيله وهيك
يعني هلا حلب بحالة عدوى بدها وقت لتصح بس بتكون انتقلت هالعدوى لمكان تاني ليتصدر اخبار سيريانيوز |
لو في سيطرة أمنية ع هالشي, و عقوبة الاعتداء اللفظي أو الجسدي "الخفيف" بيتم تطبيقها بحذافيرها, كان ما صار اللي عم يصير...
المشكلة انو الشرطي أول واحد يبصبص :lol: |
اقتباس:
|
اقتباس:
هلأ كمان يجي حدا بيقول هدول الشوايا (و محسوبك شاوي و يفتخر يجي بدو يقلع عينو) :lol: و بالمبدأ مو نفس الشي اللي يجعر بسرفيس الحيدرية و اللي حرق دواليب الزوم 6 و هو يشفّط و يعاكس و مسجلتو مسموعة بالرقة؟ أنا برأيي نفس الـ*** بس ليش الأول بشكل عام نقرف منو (بشكل عام مش قاصد حضرتك) أكتر بشوي؟ المحصلة انو معك حق: مفهوم "المدنية" بسوريا فايت بالحيط لأسباب يطول شرحها و نقاشها, بس يمكن الحق مو ع أهل الريف, حتى لو ريف حلب, و حتى لو توادفة :frown: |
اقتباس:
المصدر لو سمحتي ..:p |
كل فترة والتانية منشوف جثة معلقة بساحة باب الفرج لـ " تربية " العالم
بس الهئية العالم ما عما تنفع معها " التربية " بالشكل هاد بالمرة .. لا بل صرنا نسمع بالاحداث بطريقة شبه يومية ... ما حلن يشوفوا طريقة " تربية " جديدة ؟ |
اقتباس:
|
اقتباس:
كلمتي ما بتكفي ؟!! :larg: |
اقتباس:
اقتباس:
|
اقتباس:
ثانياً : القضية مو قضية سفيرة و الشهباء ولا قضية جاعور معاون سرفيس ولا المشفطاتي أبو الزوم6 و مين منقرف منو أكتر .. أنا إذا بدك كل شخص بينظرلي نظرات وسخة بقرف منو لو مين ما كان يكون .. بس بزمانو كان ما في غير جماعة التشفيط و المسجلات يلطشوا و يتمايعوا قلنا ماشي الحال بيعيننا الله .. أصلاً هنن فئة محدودة من الحلبية و معروف وين بيتواجدوا .. بس لما تكملنا بالنمر اللي عم تجي من الحيدرية و من طريق الباب و مدري وين ، و اللي السبور الهاي فيون يا دوب شايف بطة اجر أمو و اللي مو بس بيلطش لأ كمان بيمد ايديه و أشيا تانية إذا بدك شي ما شاف بنت ماشية بالفيلات أو بالعزيزية ولابسة بنطلون ضيق أو كنزة حفر .. هون بيكون الوضع زاد كتير عن حدو و ما عاد ينطاق ... ثالثاً : المشكلة بكل اللي عم يصير انو الناس ما عادت تعبّر الشرطة و الأمن أو تحسبلن حساب من بياع اليانصيب للغني و قرايب المسؤول و العالم عمتنهش ببعضا و صار الجبن و الهريبة كل المرجلة مو تلتينا ... انشالله تكون فهمتني عن جد هالمرة :D |
| الساعة بإيدك هلق يا سيدي 19:07 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون