أخوية

أخوية (http://www.akhawia.net/forum.php)
-   منبــر أخويـــة الحــــــر (http://www.akhawia.net/forumdisplay.php?f=15)
-   -   لعنة الله عليكم من بين الامم (http://www.akhawia.net/showthread.php?t=125184)

Joe 03/07/2009 18:36

لعنة الله عليكم من بين الامم
 
باحث سوري : النباتات تملك عواطفا ووعيا وقدرة على قراءة الافكار

قال زاهي اسبيرو الباحث في حقل الطاقة الانساني والباراسيكولوجيا ، إن النباتات تملك عواطفاً ووعياً و قدرة على قراءة الأفكار .

إلخ إلخ إلخ.. علاك علاك علاك... إلخ إلخ

والباحث زاهي اسبيرو هو استاذ في كلية الهندسة الميكانيكية بجامعة حلب حائز على الدكتوراه سنة 1993 وهو عضو في الهيئة التدريسية ، و له اربع كتب جامعية وتسعة ابحاث علمية و 12 ورقة عمل تم المشاركة بها في مؤتمرات علمية (كذاااااااااااب و نصاب)،ويقوم الان بالتحضير لاصدار مجموعة من الكتب حول : حقل الطاقة الانساني – القدرات العقلية عند الانسان – الحاسة السادسة – عالم المعلومات الاثيري .

جبرائيل سعود -سيريانيوز





رابط المقالة

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -







و هذا رابط لتحميل ملف PDF فيه محاضرة من اول سنة 2009 للدكتور النصاب زاهي سبيرو

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -





لهالدرجة وصل الاستخفاف بعقولنا...

sandra 03/07/2009 18:45

هلا بتذكر بنقابة المهندسين بحلب من شي سنة إجا دكتور مهندس وألقى محاضرة عن موضوع الطاقة وتجارب صارت عالنباتات وهيك اشيا بس ما عم أتذكر شو اسمو لكن عالأغلب نفس المذكور أعلاه
بس للصراحة ما قدرت آخد موقف من ابحاثو ومصادرو .. خصوصي انو ابحاث الباراسيكولوجي محاطة بسرية وبالتالي صعب الواحد يطلع عليها ويعرف الصح من التخريف


Nay 03/07/2009 18:51

ما فهمت ليش عم تسب.. الدكتور اللي عم تحكي عنو مو أول حدا بيحكي عن عواطف النبات.. هي شغلة محكي فيها من زماااااااان.. ليش انت متحمس ومعصب كل هل القد..:shock:

Joe 03/07/2009 19:00

لك عيني شو هيك التجارب بتصير بالتمني و لا بالشلف و لا ضمن راسك بس... شيه.. وين التجارب وين البحث وين الكونترول

ثم شغل عقلك بليرة يعني كمان... شيه.. بدها شوية منطق لك اخي

لك نبتة لك عندها عواطف و قدرة على قراءة الافكار و وعي... لاء قدرة على قراءة الافكار هي احلى شي

زلمة نصاب بكل معنى الكلمة

ثم شوف ملف الPDF يلي حطيت رابطه... كل الشغلات يلي حاكي عنها هيي HOAXES قديمة و معروفة
بس لحالك حط اسماء "العلماء" الاجنبية المذكورة بالغوغل و بتشوف شو محكي عنهم

كلها نصب بنصب و جاي هوي عم يقدمها على اساس خلاصة ابحاث و حقائق


طبعا الحق مو بس عليه الحق على يلي بيسمح بهيك تفاهات تنعرض تحت اسم باحث سوري... هادا نصاب سوري


عندك باميركا ال National Library of Medicine و ال National Institute of Health او ال NIH عندهم داتابيز لكل الابحاث العلمية بمجالات الصحة و البيولوجيا و الفيزيا و كل العلوم تقريبا... بحبش قد ما بدك من هلق ليوم القيامة و ما رح تلاقي ولا بحث منشور بيحكي عن هالحكي الفاضي تبع الباراسايكولوجي و النباتات يلي بتقرا افكارك

شوية منطق... من مستوى انك تطلع يمين و يسار قبل ما تقطع الشارع... ما مطلوب اكتر من هيك

محمد ابراهيم 03/07/2009 19:09

انا بدي قول رأي بهالقضية بس مش من كتاب او بحث علمي ، سمعتو من مزارع ومرة اخرى سمعت شيئ مشابه من احد اقربائي .

احد الاشخاص مات ولما مات ، اتولى ابنه رعاية الارض بدون اي تقصير ، بس الزرع ساءت حالتو بعد وفاة الرجل مباشرة وبلش العالم تقول ان الزرع حزين على صاحبو ،وسمعت قصة مشابهة تانية عن نفس الموضوع .

زمان كان التجربة والخطأ والملاحظة احد اهم أدوات العلم ان لم تكن الوحيدة المتاحة بس حاليا صارت بمرتبة متاخرة بفضل التقدم اللي صار والابحاث العلمية اللي بتصير لذلك مافيني افصل الا ببحث علمي بمعلومة علمية مؤكدة .

بدي قول فكرة (مجرد فكرة اجيت على راسي) كل شيئ بالدنيا مكون من ذرات فيها الكترونات سواء كان هالشيئ حسب تسمياتنا حي او غير حي (واعتقد ان نفس اللي بيصير بذرات الاشياء الحية هو نفس اللي بيصير بذرات الاشياء الغير حية ) هي مجرد فكرة مش اكتر ، ممكن يكون كل الاشياء بتشعر بس علمنا المحدود حاليا بيمنعنا من ادارك شعورها .

Joe 03/07/2009 19:20

عزيزي شكرا على المداخلة و لكن على ما يبدو فإن ذلك الحقل ساءت حالته بسبب عدم خبرة الابن و ليس لان النباتات حزينة

النباتات هي خلايا حية محاطة بجدار من السيللولوز و ليس لديها اي خلايا عصبية او اي شيء شبيه بالخلايا العاصبية. لا يوجد عالم نبات او حيوان واحد على كوكب الارض يمكن ان يفكر باجراء تجارب لاختبار الperception عند النباتات ناهيك عن اجراء تجارب على البولي غراف

كليف باكتسر cleve bagster معروف انه نصاب و بدون مؤهلات ولا احد يعترف عليه... هو موجود بمؤسسة في كاليفورنا و لكن هذه المؤسسة ليست accredited اي ليست معترف عليها هي الاخرى و القائم عليها شخص مجنون هو الاخر


المشكلة مو بالنصاب زاهي سبيرو فقط... فهو في النهاية ناقل لهذه الاخبار عن النصابين الاميركان. و لكن المشكلة بالقائمين على جامعة حلب... عميد جامعة حلب مسؤول بشكل مباشر

فغلطة مثل هذه كافية لتدمير جامعة حلب و جعل الشهادات منها غير معترف عليها عالميا... يعني طلابنا ما بقى بيقدروا يكتبوا امتحانات للخروج لجامعات الخارج و التخصص و التقديم على وظائف لانها ستصبح جامعة نصابين

محمد ابراهيم 03/07/2009 19:52

اقتباس:

كاتب النص الأصلي : Joe (مشاركة 1290508)
عزيزي شكرا على المداخلة و لكن على ما يبدو فإن ذلك الحقل ساءت حالته بسبب عدم خبرة الابن و ليس لان النباتات حزينة

لا شكر على واجب ، موضوعاتك قيمة وتخلق قيمة مضافة ولذلك هي محل اهتمام بالقراءة او بالقراءة والمشاركة احيانا بالنسبة لي .
بالنسبة للقصة في حد ذاتها بالنسبة الي ليست ذات مصداقية علمية لانها لم تنتج عن دراسة او بحث علمي ، ولكن حبيت اوردها من باب ترابط الموضوع مع القصة . بس بنفس الوقت كل مزارع تقريبا بياخد ابنائه معه للحقل سواء ارسلهم للتعليم اولاء ، موضوع الخبرة موجود بس سواء في خبرة او مافي ، متل ماخبرتك القصة مجرد قصة وليست تجربة علمية او دراسة علمية او بحث علمي ، فليست ذات مصداقية او دلالات علمية .

اقتباس:

النباتات هي خلايا حية محاطة بجدار من السيللولوز و ليس لديها اي خلايا عصبية او اي شيء شبيه بالخلايا العاصبية. لا يوجد عالم نبات او حيوان واحد على كوكب الارض يمكن ان يفكر باجراء تجارب لاختبار الperception عند النباتات ناهيك عن اجراء تجارب على البولي غراف

كليف باكتسر cleve bagster معروف انه نصاب و بدون مؤهلات ولا احد يعترف عليه... هو موجود بمؤسسة في كاليفورنا و لكن هذه المؤسسة ليست accredited اي ليست معترف عليها هي الاخرى و القائم عليها شخص مجنون هو الاخر
اكيد انت اعلم مني بهذا الموضوع .
اقتباس:

المشكلة مو بالنصاب زاهي سبيرو فقط... فهو في النهاية ناقل لهذه الاخبار عن النصابين الاميركان. و لكن المشكلة بالقائمين على جامعة حلب... عميد جامعة حلب مسؤول بشكل مباشر

فغلطة مثل هذه كافية لتدمير جامعة حلب و جعل الشهادات منها غير معترف عليها عالميا... يعني طلابنا ما بقى بيقدروا يكتبوا امتحانات للخروج لجامعات الخارج و التخصص و التقديم على وظائف لانها ستصبح جامعة نصابين
انت بتعرف ان بترتيب افضل 500 جامعة عالمية مافي ولا جامعة وحدة عربية ، الحال بيخري من الاصل وضربو الاعور على عينو . مارح يخسر شيئ ، كل الجامعات القوية بتعمل اختبارات للوافدين على ما اعتقد .
بس اعتقد في مبالغة شوي بموضوع تدمير الجامعة ، بحث مضروب او استاذ نصاب ، بتصير باغلب الجامعات الشرقية ،
ماسمعت ان بعض الحاصلين على رسائل الماجستير والدكتوراة شاريين هالدراسات والابحاث ؟ وادارات الاقسام والكليات باغلب هالجامعات على علم بهاد ، ومو بس بالدول العربية ، في دول اوربية شرقية فيها اماكن متخصصة بتروح تشتري منها ماجستير ودكتوراة (بتشتري الدرجة العلمية مباشرة ) صحيح هي مؤسسات علمية ذات سمعة سيئة ومعروفة على المستوى الاكاديمي عالميا ، ولكن اعتقد ان الجامعات الاوربية والاميركية مش فارق شو بصير بجامعات الشرق الاوسط (لانها بتعرف مسبقا ان مستوياتها من اضعف المستويات عالميا بعد جامعات دول العالم الاخير ) اطمن .

HashtNasht 03/07/2009 20:17

اقتباس:

كاتب النص الأصلي : Joe (مشاركة 1290502)
لك عيني شو هيك التجارب بتصير بالتمني و لا بالشلف و لا ضمن راسك بس... شيه.. وين التجارب وين البحث وين الكونترول

ثم شغل عقلك بليرة يعني كمان... شيه.. بدها شوية منطق لك اخي

لك نبتة لك عندها عواطف و قدرة على قراءة الافكار و وعي... لاء قدرة على قراءة الافكار هي احلى شي

زلمة نصاب بكل معنى الكلمة

ثم شوف ملف الPDF يلي حطيت رابطه... كل الشغلات يلي حاكي عنها هيي HOAXES قديمة و معروفة
بس لحالك حط اسماء "العلماء" الاجنبية المذكورة بالغوغل و بتشوف شو محكي عنهم

كلها نصب بنصب و جاي هوي عم يقدمها على اساس خلاصة ابحاث و حقائق


طبعا الحق مو بس عليه الحق على يلي بيسمح بهيك تفاهات تنعرض تحت اسم باحث سوري... هادا نصاب سوري


عندك باميركا ال National Library of Medicine و ال National Institute of Health او ال NIH عندهم داتابيز لكل الابحاث العلمية بمجالات الصحة و البيولوجيا و الفيزيا و كل العلوم تقريبا... بحبش قد ما بدك من هلق ليوم القيامة و ما رح تلاقي ولا بحث منشور بيحكي عن هالحكي الفاضي تبع الباراسايكولوجي و النباتات يلي بتقرا افكارك

شوية منطق... من مستوى انك تطلع يمين و يسار قبل ما تقطع الشارع... ما مطلوب اكتر من هيك


يا زلمي انت ليش هيك !!! هلأ على راسي كل تقاليد الجامعات الغربية ..و بعبر عن احترامي للاساليب الدقيقة المتبعة عندهن بما يخص الابحاث , بس هالشي ما بيعني انو الابحاث ما بتنعمل غير عالطريقة الغربية .

هاد الدكتور زاهي هاد ..ما حي الله ...دكتور ميكانيك و باحث في حقل الطاقة الانساني ....و معروف منيح ..متل ما بقولوا على سن و رمح يعني . و ما بالضرورة انو اذا الزلمي ما كان عندو بحث واضح او شواهد ع التجربة او حتى نتائج للتجربة , او اذا يعني مافي مراجع و لا انو في حدا مقيم البحث و مناقشو..ما ضروري اذا هالعناصر مانها متوفرة انو البحث مانو مزبوط ....انت جرب بينك و بين حالك عميل بحث هيك و شوف بيزبط او لاء !! غالبا رح يزبط .

بعدين الزلمي عم يقول شغلات منطقية و مقنعة ..يعني انا كمهندس زراعي مثلا كتير كنت اتخاطب مع النباتات ....وياما صاير بيناتنا فصول و قصص و مشاكل و احيانا علاقات عاطفية :sosweet: ..( كان عندي علاقة مع شجرة تين , و قبلها خضت تجربة عاصفة مع نبات الصبار ) .

يا اخ Joe بتمنى منك انك انت تحكم العقل بالموضوع , و تحاول تكون منصف , انا معك انو في كتير دكاترة و باحثين بجامعاتنا هني خريجين بعثات تبادل الطلاب مع دول المنظومة الاشتراكية رحمة الله عليها ,و قسم كبير منهم اخد شهادات الدكتوراه على صدح كؤوس الفودكا طلبا للعلم , بس ما بتخيل الدكتور زاهي من هالنوع , و خلينا كلياتنا ندعيلو انو الله يحميه من شي رقاقة مزروعة تحت الجلد من قبل هالمنظمات الخفية , لانو شخص لامع متلو ممكن يستهدفوه ببساطة ليحطو حد لابحاثو , هادا اذا ما حولوه ل sex slave هو التاني .....الله يستر :cry:

Joe 03/07/2009 20:33

معك حق يا اخ حشت نشت.. و الله و حشرتني بخانة اليك

ما توقعت هيك رد مزلزل مهزهز

يعني عن جد و اذا الزلمة ما "عن جد عن جد" عمل التجارب؟ و اذا يعني بدو يخترع اسلوب بحد ذاتو... ديكارت احسن منو بشو يعني؟ خيو نحنا الميديل ايسترنرز (ما بحب قول شرق اوسطي.. بحس حالي من المحافظين الجدد) عنا عقدة نقص تجاه انفسنا

يعني ايه و يكذب و يقول انو عندو ابحاث منشورة.. طـز... انا مرة كذبت على الماما و قلت اني كتبت الوظيفة بس كنت عم احضر مسلسل VIP

Joe 03/07/2009 20:37

اقتباس:

كاتب النص الأصلي : محمد ابراهيم (مشاركة 1290524)
انت بتعرف ان بترتيب افضل 500 جامعة عالمية مافي ولا جامعة وحدة عربية ، الحال بيخري من الاصل وضربو الاعور على عينو . مارح يخسر شيئ ، كل الجامعات القوية بتعمل اختبارات للوافدين على ما اعتقد .
بس اعتقد في مبالغة شوي بموضوع تدمير الجامعة ، بحث مضروب او استاذ نصاب ، بتصير باغلب الجامعات الشرقية ،
ماسمعت ان بعض الحاصلين على رسائل الماجستير والدكتوراة شاريين هالدراسات والابحاث ؟ وادارات الاقسام والكليات باغلب هالجامعات على علم بهاد ، ومو بس بالدول العربية ، في دول اوربية شرقية فيها اماكن متخصصة بتروح تشتري منها ماجستير ودكتوراة (بتشتري الدرجة العلمية مباشرة ) صحيح هي مؤسسات علمية ذات سمعة سيئة ومعروفة على المستوى الاكاديمي عالميا ، ولكن اعتقد ان الجامعات الاوربية والاميركية مش فارق شو بصير بجامعات الشرق الاوسط (لانها بتعرف مسبقا ان مستوياتها من اضعف المستويات عالميا بعد جامعات دول العالم الاخير ) اطمن .

صحيح معك حق انا اكيد عم بالغ
بس يعني كوننا ما منعمل ابحاث شي, و كوننا منعمل ابحاث مزورة شي تاني
على كل حال بظن متل ما حضرتك تفضلت الكل بيعرف و ما حدا فارق معه

و الله اليوم انهز بدني اكتر من ما فيفي عبدو هزت خصرها بكل تاريخها الفني

HashtNasht 03/07/2009 20:46

اقتباس:

كاتب النص الأصلي : Joe (مشاركة 1290539)
معك حق يا اخ حشت نشت.. و الله و حشرتني بخانة اليك

ما توقعت هيك رد مزلزل مهزهز

يعني عن جد و اذا الزلمة ما "عن جد عن جد" عمل التجارب؟ و اذا يعني بدو يخترع اسلوب بحد ذاتو... ديكارت احسن منو بشو يعني؟ خيو نحنا الميديل ايسترنرز (ما بحب قول شرق اوسطي.. بحس حالي من المحافظين الجدد) عنا عقدة نقص تجاه انفسنا

يعني ايه و يكذب و يقول انو عندو ابحاث منشورة.. طـز... انا مرة كذبت على الماما و قلت اني كتبت الوظيفة بس كنت عم احضر مسلسل VIP

عم حاول اتصل بمكتب الدكتور زاهي , لازم ننتقل من الفكرة النظرية للتطبيق العملي , بقى خطرت ببالي فكرة جهاز ممكن يحل مشكلة الامن الغذائي , عن طريق الاتصال بالنباتات ( و ممكن تكون شركة سيرياتل راعي رسمي لهالمشروع ) ..الاتصال رح يكون عن طريق تقنيات الباراسيكولوجي مبنية عالاكتشافات المذهلة اللي توصللها الدكتور زاهي , ببساطة رح نركب بلوتوث برانشسيت Bleutooth branchset ع غصن محدد لشجرة مختارة بالبستان , و بيقدر المزراع و بدون ما يطلع برا البيت انو يتصل بالشجرة المطلوبة , و يطلب منها التبكير بالانتاج , او يحذرها من الصقيع , او ممكن يعطي نصائح عامة للنبات ...امور توجيهية يعني ..متل ضرورة العناية بالنظافة الشخصية , و اهمية نمو الجذور , و ممكن يسمعها موسيقى حسب الرغبة , و الشجرة بدورها بتتواصل مع بقية الاشجار بالبستان . و هيك منضمن الحصول على انتاج عالي و بنوعية ممتازة باوقات مرغوبة تسويقيا ً بتكليفة بسيطة ما بتتعدا ال 123 دولار لكل عشر هكتارات .

مستقبلا رح نعمل اجهزة بتنقل رغبات و مطالب النباتات للاخ المزارع , الموضوع صعب شوي حاليا من ناحية التكلفة , لانو لازم نعطي لكل نبات خط سيرياتل ...بس التجارب الحالية مبشرة , لانو اكتشفنا انو النبات عندو قدرة على استيعاب و استخدام شبكة الانترنت ,و هيك ممكن نقلص التكلفة كتير , يعني منعطيهن انترنت وايرلس للنباتات و منستخدم لابتوب لكل 24 شجرة يوميا .

طبعا الفضل كلو بيرجع للدكتور زاهي ...لانو بفضل ابحاثو قدرنا نتوصل لتطبيقات رح تخلينا بيوم من الايام نقول بكل ثقة : WE saved the world :gem:

Joe 03/07/2009 20:50

حشااااش :lol::lol::lol::lol:

محمد ابراهيم 03/07/2009 21:41

اقتباس:

كاتب النص الأصلي : Joe (مشاركة 1290542)
صحيح معك حق انا اكيد عم بالغ
بس يعني كوننا ما منعمل ابحاث شي, و كوننا منعمل ابحاث مزورة شي تاني
على كل حال بظن متل ما حضرتك تفضلت الكل بيعرف و ما حدا فارق معه

و الله اليوم انهز بدني اكتر من ما فيفي عبدو هزت خصرها بكل تاريخها الفني

حال البحث العلمي يرثى له وشيئ محزن ومؤسف ، نسبة الابحاث بالدول العربية مجتمعة مقارنة مع اسرائيل اللي هي بنفس البقعة الجغرافية شيئ غير قابل للمقارنة ابدا ، العرب اقرب الى لا شيئ وطبعا ميزانيات البحث العلمي ضعيفة للغاية بالاضافة الى الوساطات والفساد بالمؤسسات الجامعية وضعف المستوى التعليمي ،كل هاد بيخلي الجامعات العربية بلا اسم حتى مقارنة مع جامعات اسرائيل او دولة متل جنوب افريقيا (مارح نحكي على اوربا او اميركا)

- شو مشان اليوم اخدت خبرة بالهز تفوق هزات خبيرة هز شرقي لعشرات السنين
الجانب الايجابي اسمع مني : صرت خبير بشغلة لها مكانة بالشرق الا وهي "الهز" :lol:
اقتباس:

كاتب النص الأصلي : hashtnasht (مشاركة 1290534)
بعدين الزلمي عم يقول شغلات منطقية و مقنعة ..يعني انا كمهندس زراعي مثلا كتير كنت اتخاطب مع النباتات ....وياما صاير بيناتنا فصول و قصص و مشاكل و احيانا علاقات عاطفية :sosweet: ..( كان عندي علاقة مع شجرة تين , و قبلها خضت تجربة عاصفة مع نبات الصبار ) .

شيخ التحشيشات بالاخوية بلش :o
الموضوع مافيه تلاعب واتفاق مسبق بينك وبين جو ؟ شكلك مو طبيعي

على جانب اخر ، اذا مافيها تئل دم من جهتي
ممكن تشرح للشباب مو الي تحديدا او لحالي "من منطلق علمي بحت" طبيعة العلاقة اللي بينك وبين شجرة التين ؟ :sosweet:
بيجي براسي بعض التخيلات بس يعني هاي أعراض شجر والخوض بموضوع الاعراض مش مستحب .

Abu ToNi 03/07/2009 22:50

الدكتور سبيرو في معرفة شخصية بيني وبينه
وهوي اللي رسملي مستقبلي بشكل أو بآخر .. هوي اللي حطلي قائمة الرغبات تبع المفاضلة واللي بسببها دخلت بكليتي الحالية

كان الي اكتر من جلسة اجتماعية معه ( مالها علاقة بأي شي أكاديمي يعني ) والزلمة اخلاقه عالية ما بعتقد انه من جماعة الت والعجن والنصب

اللي بعرفه عنه أكاديميا انه بيعقد وبشكل دوري ندوات لنقابة المهندسين بيندعى عليها كبارية المهندسين بحلب ، بيحكي فيها بشكل عام على الجانب النفسي لتركيب الانسان وبيربط بينها وبين الطاقة ( اختصاصه الأكاديمي ) .

بمرة من المرات حكى على قوة التأثير السلبية ( كانت المحاضرة هي تزامنا مع طرح كتاب secret اللي قلب العالم وحقق أعلى نسب المبيعات )
من الاشياء اللي حكاها على الطاقة بأن مفهوم انعدام الطاقة بيعطي امكانية وجود أصوات بدائية بعقل الانسان البشري .. ملتقطة من المحيط ومرسخة بالذهن داخل اللاوعي
كصوت الدينصورات وصوت الانسان الأول و هيك شي :shock:
استدل ولو بشكل مبدئي على نظريته بأن الانسان القديم بالرغم من عدم وجود أي تواصل بين الحضارات كانت كلها عم تتجه بمنحى واحد بمفهوم القوى اللي انربط بمفهوم العبادة
الكل تقريبا مروا بفترة عبادة النار .. الشمس .. الكواكب .. هلشي بيرجع للاوعي المشترك بين الكل .

ما بعرف شو مصدره العلمي وشو هية أبحاثه .. بس محاضراته ممتعة لدرجة كتير كبيرة .

HashtNasht 03/07/2009 23:35

اقتباس:

كاتب النص الأصلي : Abu ToNi (مشاركة 1290600)
الدكتور سبيرو في معرفة شخصية بيني وبينه
وهوي اللي رسملي مستقبلي بشكل أو بآخر .. هوي اللي حطلي قائمة الرغبات تبع المفاضلة واللي بسببها دخلت بكليتي الحالية

كان الي اكتر من جلسة اجتماعية معه ( مالها علاقة بأي شي أكاديمي يعني ) والزلمة اخلاقه عالية ما بعتقد انه من جماعة الت والعجن والنصب

اللي بعرفه عنه أكاديميا انه بيعقد وبشكل دوري ندوات لنقابة المهندسين بيندعى عليها كبارية المهندسين بحلب ، بيحكي فيها بشكل عام على الجانب النفسي لتركيب الانسان وبيربط بينها وبين الطاقة ( اختصاصه الأكاديمي ) .

بمرة من المرات حكى على قوة التأثير السلبية ( كانت المحاضرة هي تزامنا مع طرح كتاب secret اللي قلب العالم وحقق أعلى نسب المبيعات )
من الاشياء اللي حكاها على الطاقة بأن مفهوم انعدام الطاقة بيعطي امكانية وجود أصوات بدائية بعقل الانسان البشري .. ملتقطة من المحيط ومرسخة بالذهن داخل اللاوعي
كصوت الدينصورات وصوت الانسان الأول و هيك شي :shock:
استدل ولو بشكل مبدئي على نظريته بأن الانسان القديم بالرغم من عدم وجود أي تواصل بين الحضارات كانت كلها عم تتجه بمنحى واحد بمفهوم القوى اللي انربط بمفهوم العبادة
الكل تقريبا مروا بفترة عبادة النار .. الشمس .. الكواكب .. هلشي بيرجع للاوعي المشترك بين الكل .

ما بعرف شو مصدره العلمي وشو هية أبحاثه .. بس محاضراته ممتعة لدرجة كتير كبيرة .

fantabulous :gem:

Abu ToNi 03/07/2009 23:37

اقتباس:

كاتب النص الأصلي : hashtnasht (مشاركة 1290637)
fantabulous :gem:

كيف :shock:

HashtNasht 04/07/2009 00:42

هي جبنالكن لسيتة الابحاث العلمية للدكتور زاهي :

مفصل الإنتاج العلمي
. الأبحاث العلمية
يتألف الإنتاج العلمي من تسعة أبحاث: سبعة منها منفرداً وبحثان بالاشتراك مناصفة على الشكل التالي :
بحث علمي بعنوان : " دراسة تأثير البارامترات الهندسية والحركية لقلم القطع في عملية قطع المعادن " نُشر في مجلة بحوث جامعة حلب 1997 .
بحث علمي بعنوان : " تحديد البارامترات الهندسية والحركية للسكاكين القاطعة في آلات صناعة اللحوم نصف المصنعة " نُشر في مجلة باسل الأسد للعلوم الهندسية 2001 - العدد 13 .
بحث علمي بعنوان : " تحسين عملية مرور المواد الزراعية السائبة في الصوامع العميقة لعنابر الأعلاف " بالاشتراك مناصفة مع الدكتور عماد انتيباس –نُشر في مجلة اتحاد الجامعات العربية للدراسات والبحوث الهندسية –العدد الأول المجلد التاسع لعام 2002 .
بحث علمي بعنوان : " تحديد معالم التوازن الحراري لعملية تجفيد بعض المواد الغذائية" بالاشتراك مناصفة مع الدكتور مارديروس آرا صابغ –نشر في العدد (37) لعام 2004 سلسلة العلوم الهندسية لمجلة بحوث جامعة حلب .
بحث علمي بعنوان : " تصميم السلاح القاطع للمحراث الحفار فاتح أخاديد والدوار" نُشر في العدد (1) لعام 2004 في مجلة اتحاد الجامعات العربية للدراسات والبحوث الهندسية.
بحث علمي بعنوان : " التشكيل الستاتيكي للبنية المفببة للحبوب الرطبة في صوامع الحبوب وأساليب إزالتها" .
نشر في العدد (41) لعام 2004 سلسلة العلوم الهندسية لمجلة بحوث جامعة حلب .
بحث علمي بعنوان : " التقنيات المتقدمة في تغليف المواد الغذائية وفق المواصفة القياسية العالمية HACCP" .تمت الموافقة على نشره في العدد (58) لعام 2007 سلسلة العلوم الهندسية لمجلة بحوث جامعة حلب .
بحث علمي بعنوان : " تحديد الخصائص الميكانيكية لكرتون الهانيكمب (خلايا قرص العسل) المستخدم في الاسقاط بالياراشوت من ارتفاعات عالية" .
تمت الموافقة على نشره في العدد (59) لعام 2008 سلسلة العلوم الهندسية لمجلة بحوث جامعة حلب .
بحث علمي بعنوان : " تشكيل ورق التغليف (الكرافت) بطريقة الطي المستمر باستخدام مسننات تشكيل MS " تمت الموافقة على نشره في العدد(66) لعام 2009 سلسة العلوم الهندسية لمجلة بحوث جامعة حلب .

المصدر :

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -



ماني شايف ولا بحث بيتعلق بالباراسايكولوجي .....الا اذا كان الباراسايكولوجي و كرتون التغليف واحد يعني :lol:

الأدهم 08/11/2009 12:58

شي بيضحك يا زلمــــة هههههههههه


الساعة بإيدك هلق يا سيدي 12:59 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.04266 seconds with 11 queries