|
أبو زيد والفايس بوك وإسرائيل ونحنا
إن الشخصيات الورادة في هذا الحوار هي من محض الخيال ولا تمت للواقع بصلة
المكان: سوريا….الله حاميها. الزمان: ليلة أمس. الأب: محرر في صحيفة تشرين، صحافي يعني بلا زغرة، الله يعين العالم. الأم: ربة منزل، لت وعجن وحكي فاضي. الأبناء: خريجي جامعات عاطلين عن العمل، يقضون معظم أوقاتهم على الإنترنت، أنشئوا حسابات على الفايس بوك، يعبوا وقتهم فيها، شقيقين: زيد وعمرو. المشهد الأول: زيد: لك مين هاي البنت اللي حاطط صورتها على الفايس بوك؟ عمرو: شفت شفت ملا شقفة؟ما راح قلك مين هاي، بعدها جديدة معلم، ما زبطت لسا!. زيد: لك قلي إسمها بس، شو راح آكلها؟ عمرو: لا حبيبي، بكرة بتروح تعلمها آد، أنا خصوصي ما علملتها “Tag” كرمالك، بكرة بتضيفها عندك أنت ورفقاتك وبتنفضح البنت. زيد: بدك تقلي هلأ مين هاي… عمرو: ما حزرت… كسر راسك، ما راح قلك. الأب داخلاً إلى المنزل مقطوع نفسه لأن المصعد عطلان: لك شوفي أصواتكن واصلة لأسفل البناية، لك فهموني شو عم بصير. الأم: ما في شي تقبرني، متقاتلين على بنت على الفايس بوك. الأب: شو؟ بنت على الفايس بوك؟؟ لك يخرب بيتك وبيته، لك أنتوا بلا شرف، بلا ضمير، يا عيب الشوم عليكن، لك ضيعان الترباية فيكن، لك تفوووو عليك وعليه. الأب: تعا لشوف أنت وإياه، الفايس بوك الليلة بيوقف، سمعانين؟ زيد وعمرو: لك والله البنت رفيقة بس، لا يروح فكرك لبعيد. الأب: لك مو مشان البنت، تنفلقوا إنتوا وإياها، مشان المصيبة التانية. زيد وعمرو: لأ بابا هي بنت وحدة. الأب: عارف هي بهيمة وحدة، عم بحكي على المصيبة الكبيرة. زيد وعمرو: مين ماما؟؟ إطمئن، عرفت وما حكيت شي. الأب: مو أمك، تضرب منك إله شو بلا ترباية، عم إحكي عن الفايس بوك، شو الظاهر مالكن خبر يا حضرات، ما بتقروا شو بيكتب اللي بزركن بالجريدة. زيد وعمرو: خير بابا، شوبه الفايس بوك؟ فرضوا عليه رسوم؟؟ لا تقلي صار بدنا ندفع؟ والله كنا عارفين هيك من الأول. الأب: لك مو هيك، الموقع ممنوع، شو ما بتعرف أنت وإياه. زيد وعمرو: ممنوع، ضحكتني، ليش شو مو ممنوع عنا. عنا كل شي ممنوع، ممنوع على المساكين، هون المخ عندك بيعرف كيف يفوت على مواقع محجوبة، ولا يهمك أبو زيد. الأب: لك مو بس محجوب، الموقع حسب ما وصلتنا معلومات، صاير شبكة لتجنيد عملاء لإسرائيل، للعدو الصهيوني يعني، لك خوذ أنت وإياه، تفضلوا أقروا شو كاتب اللي خلفكن اليوم الصبح. زيد وعمرو يقرآن المقال على الرابط التالي: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - زيد: إيه حط بالخرج أبو زيد، هدول الصحافيين علاكين وكثيرين غلبة، خصوصاً تبعون تشرين، بحياتكن ما كتبوا شي بطعمة. عمرو: لك هس يخرب بيتك، شو هالحكي، لك مو عيب تقول… زيد مقاطعاً: لأ مو عيب، حدا منهن كتب عني أنا خريج الهندسة من 3 سنين وقاعد بالبيت، أو عن حضرة جنابك خريج أدب عربي، قاعد تعلم أولاد الجيران. هدول الصحافيين بلا طعمة..شي حمير أجلك. عمرو: لك هاي أبوك كاتبها، يخرب بيتك، سكوت، هلأ بصادر الكمبيوتر كله مشان حضرتك تحكي. الأب: إحم… من بكرة بتوقفوا لي حساباتكن على الفايس بوك، سمعانين؟ العالم عم تندبح بغزة، والله مو ناقصكن إلا تفوتوا على مواقع إسرائيلية. زيد: بابا الموقع مو إسرائيلي، بس هون بقولوا عنه هيك، بيكرهوه. الأب: شو تفضلت حضرة جنابك، بيكرهوه، وليش لحتى يكرهوه؟. زيد: يمكن غيرة، هون بغاروا من كل شي ناجح، يمكن بفكروا مثلاً ليش السيد الرئيس مو هو اللي صممه، مو هو كان رئيس الجميعة المعلوماتية قبل ما يصير رئيس، وقتها ما كان الفايس بوك طالع لسا، ليش ما صممه هو؟. عمرو: لك هاد شو فهمه، حطه على خطابات ووعود وحكي، هاد بده يصمم. الأم: يا أمي الله يرضى عليك بلا هالحكي، لك إذا حدا سمعك بتخربلنا بيتنا، لك بتضر حالك وبتضر أخوك وأبوك، والله اما بتعودوا تتوظفوا بألف سنة. زيد: إنوا يعني نحنا هلأ موظفين؟ الشغل مقتل بعضه؟ الأم: لك يا أمي الله كريم، والله إذا حدا سمعك كل العيلة ما بتعود تتوظف، إذا ما طردوا أبوك من شغله، مو بس نحنا، لك حتى الجيران ما بيعودوا يلاقوا شغل. عمرو: أحسن، الله لا يقيمهن، هاي بنت الجيران عم حاكيها ما بترد علي، خليها، بركي بيتهموا أبوها بـ وهن نفسية الأمة يا رب. زيد: طيب يلا سكر تمك وبلا كتر غلبة. عمرو: تمي حسكروا، بس حساب الفايس بوك ما راح سكروا، بعدنا ما زبطنا المخلوقة، يا لطيف من عينك… ليلاً في غرفة نوم الولدين: عمرو: زيد، راح تسكر حسابك على الفايس بوك؟. زيد: إيه، ما سمعت أبوك شو قال. عمرو: لك يقول، شو بدي أعمله، اصلاً هو شو راح يعرفه إذا الحساب بعده ماشي. زيد: لأ، لازم تكون صادق مع أبوك. عمرو: والله؟ شو صاير مطيع، شو بعمل إذا أبوك ساذج. زيد: عيب تقول عن أبوك هيك. عمرو: هيك ونص، لك أبوك حمار، لسا في حدا بصدق الحكي اللي بتقوله الحكومة، دخلك منين طالع بهاي المعلومات تبع السي آي إيه والموساد. زيد: بكون قريان شي تقرير بالأجنبي وناقلهن منه. عمرو: لاه؟ لا يكون عنده مصادره بالسي آي إيه والموساد مثل الصحافيين الكبار، قال قريان تقرير بالأجنبي، ليش هو بيعرف يقرا أجنبي، لك نام نام إنت التاني، هاي الحمرنة اللي عندك وراثة، هلأ تأكدت. سهر زيد طول الليل، يبحبش على الإنترنت. الصباح: الأب: شو بابا سكرتوا حساباتكن على الفايس بوك. عمرو، لأ بابا، ما بصير باليل، الموقع بسكر باليل!!! الأب، طيب سكروهن هلأ يلا، الله يرضى عليكن. عمرو: أنا ما راح سكر حسابي، لك مين عرفان فينا. الأب: لك يا بابا مو حلوة بحقك، مشارك بموقع بديروه الإسرائيليين، يا بابا نحنا بلد العروبة والممانعة، يا بابا نحنا آخر معاقل العروبة، ستبقى سوريا قلعة الصمود والتص…. الأم: أبو زيد، أبو زيد، أنت بالبيت حبيبي، مانك بالجريدة. الأب: بالبيت بالجريدة بدك تسكر الحساب، لك ما قريت مبارح شو كاتب أنا؟؟ عمرو: قريت، مشان هيك ما راح سكره، حكي جرايد. الأب: ولاه، عم تكذبني، لك أنا ما بكتب غير المعلومات الموثوقة، لك الجريدة كلها هيك ما بتنشر إلا أخبار موثوقة، أنت واحد بلا ترباية… عمرو: لك حاج تعيط يا زلمة، ما بتكتب إلا الموثوق، هاي مو مقالتك كمان؟؟؟ تطلع فيها منيح: الاب وعمر يقرآن المقال على الرابط التالي: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - الأب: منين جبتا هاي ولاه؟ عم تلعب بأرشيفي؟ عمرو: حاجتك أرشيف يا زلمة، الجريدة أون لاين بابا، المعلومات ما عادت تتخبا. الأب: هاد الموضوع قديم، من شي سنة. عمرو: إيه، من سنة كان الموقع عروبي، وهلأ صار للعدو الصهيوني؟ شو؟؟ جاوب بابا، هاي مو مقالتك كمان، دافع عنها، إنتا ما بتكتب إلا الموثوق. سكون قصير، تنفر دمعة من عين الأب ويبدأ بالكلام: والله ما بعرف شو قلك يا بابا، هيك بقولوا لنا اكتبوا، بيجي واحد من الشباب معه تعميم من الأمن وبوزعوا علينا، مبارح إجا الشاب وقال عيد ميلاد الفايس بوك الخامس كان أمس، لازم نكتب على الموقع شي سلبي، وأعطاني هاي الورقة تبع التقرير القرنسي. لك كل الموظفين الشباب والبنات بالجريدة عندهن فايس بوك. بس شو بدنا نعمل يا بابا، حكم القوي على الضعيف….سامحني يا بابا، وخبر رفقاتك على الفايس بوك أن الموضوع مو أكيد، فلا يسكروا حساباتهن. زيد: بتعرف شو، قعود وشوف.. أنشأ زيد مجموعة على الفايس بوك “مجموعة أبو زيد”، نشر فيها المقال القديم، وشرح للناس موقف أبو زيد، وكيف تملى المعلومات عليه. بعد يومين ظهراً: عدد أعضاء المجموعة تجاوز الألف. بعد أسبوع: عدد أعضاء المجموعة تجاوز الخمسة آلاف. بعد 10 أيام قرع الباب: إنت أبو زيد. أبو زيد: نعم أنا، خير، أنتوا مين…. الشباب: نحنا من اعضاء المجموعة تبعك يا عميل يا موساد، إمشي لشوف لتعرف نحنا مين….!!! إيييييييه…. الله يرحمك يا أبو زيد شو كنت منيح…. |
نقلا عن مدونة محمد العبد الله
رايح ومش راجع - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - شرفونا يزيارة شباب |
و هــكذا . . .
|
والله ضحكتني يا اخ محمد, بالفعل هدا هو الاعلام الشمولي
اول ما طلعت قناة الجزيرة كانت كمان صهيونية, و نفس الشي بينطبق على كل شي بيعبوا راس المواطن في, والمواطن الصالح ما علي الا يقول حاضر ويصدق. بس انا مشتهي اعرف سر العداء الشديد ضد موقع فيس بوك؟؟ مشكور اخ محمد, مقال رائع :D |
وكما قلت لك مسبقاً اخ محمد ..
ما ورد في أحلام ناصر الماغوط ما كان مجرد حلم عابر ، وهيهات كم من أبو زيد ... بتصادف تحياتي :D |
ملعوبة جدا
والأحلى من هيك أنو رابط المقالين مافتح عندي . حتى جريدة تشرين محجوبة لتكون طلعت ***** :lol: |
اقتباس:
ازا بدك هلئ ببعتلك المقالين برايفت :) بالنسبة لحجب تشرين ... ما بعرف شو التحشيشة بس كمان اليوم فتت عموقع وزارة التربية لشوف اخر موعد للتسجيل بالبكلوريا وإذ ما بيفتح الموقع .. يعني مو شغلة حجب .. شغلة تحشيشة من المخدم لحتى فتنا من كاسر بروكسي لحتى فتحت :lol: هاد عماحكيلك عمستوى الوزارات ، وبالمناسبة اخر موعد للتسجيل للاحرار هوي 26/2/2009 يعني ازا حدا بيهمو الامر :lol: |
ملعوبة باحتراف
منور محمد |
محمد ما راح تظبط القصة عنا
لانو محجوب :lol: حلوة :D |
«فيس بوك» شبكة تضليلية تجند العملاء لإسرائيل دمشق صحيفة تشرين الصفحة الاولى الثلاثاء 10 شباط 2009 سعياً لتجنيد العملاء، أسست وكالة الاستخبارات المركزية الأميركية «سي آي ايه» وكذلك الموساد الإسرائيلي صفحات خاصة بهما على موقع الـ «فيس بوك» الاجتماعي الإلكتروني. وكانت صحيفة فرنسيّة نشرت في وقت سابق ملفاً واسعاً عن هذا الموقع، مؤكدة أنّه موقع استخباراتي صهيوني مهمته تجنيد العملاء والجواسيس لإسرائيل. وتضمن الملف الذي نشرته مجلة «لوماغازين ديسراييل» معلومات عن أحدث طرق الجاسوسيّة تقوم بها المخابرات الإسرائيلية الأميركية عن طريق أشخاص عاديين لايعرفون أنهم يقومون بهذه المهمة الخطيرة من خلال ظنهم أن الأمر مجرد تمضية وقت أمام صفحات الدردشة الفورية، واللغو في أمور قد تبدو غير مهمة، وأحياناً تافهة. وطرح تقرير المجلة مزيداً من الشكوك حول استفادة الاستخبارات الإسرائيلية من الكم الهائل من المعلومات المتاحة عن المشتركين من العالمين العربي والإسلامي وتحليلها وتكوين صورة استخباراتية عن الشباب العربي والمسلم. والخطير في الأمر هو أن الشباب العربي يجد نفسه مضطراً تحت اسم مستعار ودون أن يدري للإدلاء بتفاصيل مهمة عن حياته، وحياة أفراد أسرته ومعلومات عن وظيفته وأصدقائه والمحيطين به وصور شخصيّة له، ومعلومات يوميّة تشكل قدراً لابأس به لأي جهة ترغب في معرفة أدق التفاصيل عن عالم الشباب العربي. وكشف تقرير المجلة الذي عرضه موقع «محيط» الإخباري الكثير من المعلومات السرية عن موقع «الفيس بوك»، بعد تمكن المجلة من جمعها من مصادر إسرائيلية وصفتها المجلة بالموثوقة. وأفزع الكشف عن هذه المعلومات الحكومة الاسرائيلية ودوائرها الدبلوماسية، حتى إن السفير الإسرائيلي في باريس اتهم المجلة بأنها «كشفت أسراراً لايحق لها كشفها للعدو» على حد قوله. -------------------------------------------------------------------------------------- «فايس بوك» موقع الكتروني دولي لفضح السياسة الإسرائيلية عواصم صحيفة تشرين الصفحة الاولى الاثنين 27 آب 2007 اسس حوالى ثمانية عشر ألف شاب وشابة من مختلف دول العالم مجموعة على موقع فايس بوك الالكتروني تطالب باعتبار إسرائيل كيانا غاصبا لا دولة. وتهدف المجموعة الى إطلاع المتصفحين على تاريخ فلسطين وتوضيح الفرق بين الصهيونية واليهودية والسامية حيث جاء في مقدمة الموقع،:ا«سرائيل ليست بلدا احذفوها من لائحة البلدان الموجودة على موقع فايس بوك». والى جانب العرب تضم المجموعة اعضاء من جنسيات وأديان مختلفة واللافت هو وجود اكثر من ثلاثة آلاف اميركي وعدد كبير من اليهود غير الصهاينة. ويقول ديفيد كوهين الشاب اليهودي الروسي: على اسرائيل ان تزول، فاليهودية دين وليست جنسية.. ولكل يهودي جنسيته الاوروبية او الاميركية او العربية التي عليه ان يحترمها ويعيش بمقتضاها.. بينما يرى الشاب الاميركي جاي اكس ان المشكلة في الشرق الاوسط هي نتيجة السياسة الاميركية السيئة تجاه العرب. يذكر ان موقع فايس بوك هو موقع اجتماعي يصل بين ملايين الناس ويقدم خدمة تشكيل المجموعات اضافة الى روابط تصله بمجموعات كبيرة من شبكات التفاعل الاجتماعي عبر الانترنت . ----------- هي المقالتين المعنيتين بالموضوع :D |
اقتباس:
فقالوا بيحجوا موقع الوزارة والجريدة صارت القصة إدمان :lol: ع سيرة البكالوريا ايمت أخر موعد للتسجيل :? |
منورة بوجودكن يا أكابر
أخجلتم تواضعنا.... |
خوفي بكر يطلع الرب عميل............
|
الله يرحمك يا ابو زيد والله كان مغلوب على امرك :cry:
انو مبارح بالضبط .... مدري اليوم ما عاد اتزكر :lol:.. قرتني امي مقالة ناسختها مدري من انو جريدة يا تشرين يا الثورة ... عن نفس الموضوع .. قلتلها كلو لعي فاضي ... وكان بدي ورجيها الموضوع بس ما صحلي :lol: بس انو يا زلمي .. جريدة تشرين مو حكومية .. العمى .. ما عم فتح بدون برنامج كسر بوركسي !:? اي بيعين الله :pos: اقتباس:
|
الله يرحمك يا ابو زيد ، كلو بسبيل النضال الثوري المحشور بيهون مالحنا بلد الصمود والتحدي
الفيس بوك صهيوني أما يتوب فهوي امبريالي وموقع الامازون التجاري هوي بيضر مابيقبل يتعامل معنا كون سوريا من محور الشر فلحنا حجبناه ، اما ويكبيديا هي انبطاحية ورمز من رموز الرجعية ، بس ردو رجعو رجعوها شو السبب الله اعلم رائع محمد |
رائعة جداً . :D ما عرفت اضحك ولا ابكي . |
لأ لأ شريك
اضحك أكيد.... شر البلية ما يضحك |
اقتباس:
برايك هالديباجة ايمتا رح نخلص منها ... يخرب بيتهم كل شغلة مابتعجبهم بيقولو عنا امبريالي وصهيوني وانبطاحي وراسمالي و و و و الخ ... مو حرام موقع ويكيبيديا الموسوعة الحرة يحجب في سوريا اخواني بالجامعات بدهم يطلعوا مقالات وابحاث مو قادرين :cry: مابدهم الناس تتثقف :jakoush: |
| الساعة بإيدك هلق يا سيدي 06:16 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
