أخوية

أخوية (http://www.akhawia.net/forum.php)
-   منبــر أخويـــة الحــــــر (http://www.akhawia.net/forumdisplay.php?f=15)
-   -   السخرية و الشتم (http://www.akhawia.net/showthread.php?t=127877)

Joe 22/08/2009 01:32

السخرية و الشتم
 
شو ضوابط السخرية و الشتم بنظرك؟ عم نحكي طبعا عن مجتمع خيالي مثالي

انا عم لاقي صعوبة اني ارسم خط ما بين المسموح و الممنوع

ايمت فكرة نقدية معينة او رسمة او نكتة بتتحول من سخرية او نقد لاذع لمجرد شتيمة؟

انك ترسل صورة وجه شخص على جسم حمار, هل هي نفس الشي انك تقول عليه يا حمار؟

معقول مجرد انك قلت عن شخص انه حمار او كلب.. فهادا خط احمر, بس انك تحكي عليه جريدة كاملة و تشرح مثلا انو متذبذب و انبطاحي و متقلب و عشوائي و انتهازي.. فهي الفاظ اكاديمية, مثلا؟

و شو لازم يكون دور القضاء؟ معقول كل ما يصير في اختلاف فكري بسيط نرمي الأمر للقضاء ليقول اذا مسموح او غير مسموح؟

مهتم اسمع شوية آراء من كل الأطياف و يفضل مع بعض التعليل.. مافي ديكتاتورية بفرض الآراء هون.. و يلي حابب يتشعب بالموضوع اهلا و سهلا

Dndoshy 22/08/2009 01:53

ضوابط السخرية لازم تكون عند السخرية الجسدية متل الطول أو الشكل...أما غير هيك فبلاقي انو السخرية بتكون بالحد المعقول وما منها آثار عالمدا الطويل..
أما الشتم فبتوقع انو مو شي عليه القيمة لحتى ينحطلو ضوابط لأنو كل واحد بعبر عن حالو بهالشي وما بدقك لا من قريب ولا من بعيد..
يعني اذا حدا قال عنك حمار أو قال ** *** ****** فما بظن انك صرت حمار أو صارت *** ******


اقتباس:

ايمت فكرة نقدية معينة او رسمة او نكتة بتتحول من سخرية او نقد لاذع لمجرد شتيمة؟

انك ترسل صورة وجه شخص على جسم حمار, هل هي نفس الشي انك تقول عليه يا حمار؟
وقت بيكون فيها تعيير للشخص المتلقي للنكتة أو الرسمة



بعتقد أنو نفس الشي
متل وقت تقول لواحد يا كر..وانت بتكون قاصد أنو الكر ابن الجحش


اقتباس:

معقول مجرد انك قلت عن شخص انه حمار او كلب.. فهادا خط احمر, بس انك تحكي عليه جريدة كاملة و تشرح مثلا انو متذبذب و انبطاحي و متقلب و عشوائي و انتهازي.. فهي الفاظ اكاديمية, مثلا؟

و شو لازم يكون دور القضاء؟ معقول كل ما يصير في اختلاف فكري بسيط نرمي الأمر للقضاء ليقول اذا مسموح او غير مسموح؟

نفس الشي وما بيختلفو عن بعض..
بس مدري ليش اذا الواحد انوصف بصفات الحيوان بينزعج أكتر من أنو ينوصف بصفات البشر:?(يلي هني الصفات الأكاديمية:shock:)





القضاء الو دور اساسي بكل شي الا بالاختلاف الفكري هاد الشي ما بعتقد انو لاوم يتدخل فيه

Joe 22/08/2009 01:57

اقتباس:

كاتب النص الأصلي : Dndoshy (مشاركة 1320920)
ضوابط السخرية لازم تكون عند السخرية الجسدية متل الطول أو الشكل...أما غير هيك فبلاقي انو السخرية بتكون بالحد المعقول وما منها آثار عالمدا الطويل..

يعني مسموح نتمسخر على السود و الصينيين؟ و المعوقين جسديا؟
بظن هالقصص ممكن تكون خطوط حمرا عند كتير من الناس و المجتمعات

Dndoshy 22/08/2009 02:02

اقتباس:

كاتب النص الأصلي : Joe (مشاركة 1320924)
يعني مسموح نتمسخر على السود و الصينيين؟ و المعوقين جسديا؟
بظن هالقصص ممكن تكون خطوط حمرا عند كتير من الناس و المجتمعات

لك لأ لأ..أنا ما قلت هيك..أنا قلت أنو يكون الحد عند التمسخر الجسدي كيف ما كان وعطيت مثالين وحطيت تلت نقط يعني "الخ" لأنو هيدول يلي طلعو براسي
هالشي أكيد مو مقبول

marochka 22/08/2009 06:16

أنا بعتقد أنو من المستحيل رسم أي حدود واضحة، لأنو الموضوع نسبي وخاضع لأحكام وأفكار كل إنسان.
بس بعتقد أنو السخرية أو النقد بشكل عام ما لازم يتناولو أي شخص بحد ذاتو وإنما لازم يتناولو أعمالو أو تصرفاتو اللي هو بيطرحا على العالم، طبعاً بدون ما نزيد على هالأعمال والتصرفات أشياء ما نا موجودة أصلاً وممكن تسببلو ضرر معنوي أو جسدي (وهون عادة بيجي دور القضاء)، يعني وقت تسخر من فكرة معينة لشخص ما وحتى لو وصلت لحد استعمال ألفاظ مسيئة بوصف الفكرة، فما بعتقد في أي قضاء ممكن يتدخل بالموضوع، بس استعمال الألفاظ نفسا بحق صاحب الفكرة فممكن يكون محور قضية.
طبعاً الصفات الجسدية ما لازم تكون محور انتقاد، لأسباب أخلاقية موجودة بكل الثقافات والديانات (مع بعض الاستثناءات طبعاً) ولكن ممكن استخدام عالصفات بشكل مبالغ فيه نوعاً ما للإشارة إلى الشخص المعني (يعني متل ما بيصير بالكاريكاتور مثلاً) وهون الحدود شوي ضايعة بين المقبول والزائد عن الحد، وبيرجع الموضوع لتقدير كل إنسان ووعيه وأخلاقه.

ماشي لوحدي 22/08/2009 13:26

هلق بوافقك الرأي بأنه فيه أناس بتعرف كيف تهين الإنسان يلي قدامها

بألفاظ جارحة لكن بتحط عليها نوع من أنواع مساحيق التجميل

لحتى تظهر بمظهر حلو و إن كانت بالطبع هي نابية .

بس بالنهاية أنا ممكن اعتبر هالشي ذكاء مقارنة بالإنسان يلي بيشتم

بكلمات متل ما ذكرتها بموضوعك ..

Elephant And Castle 22/08/2009 13:56

الشتيمة بتكون بسبب مشكلة ما مع شخص او جهة معينة يعني كنوع من فش الخلق او اهانة شخص ما .. اما المسخرة ,,,ما بلاقيلها دافع غير انو الأنسان نفسو مب**** ,,او قليل اصل ...خصوصا لما بتصير مسخرة على لبس او شكل او مظهر او اسلوب ... طبعا المسخرة على اعاقة عقلية او فيزيائية بتعبر عن اقصى درجات القصور و الأنحطاط ....


انو شو نفعت المدنية اذا مو قادرين نضبط اعصابنا بموقف ما ..او ما قادرين انفرجي غيرنا الأحترام... حتى ولو بقلبنا مو محترمينو

Nay 22/08/2009 17:24

الشتيمة بتختلف من بلد لبلد.. والها دلالات مختلفة.. فمنشوف بأمريكا الحمار رمز لواحد من أهم حزبين هونيك بينما نحنا منستعملو كشتيمة.. والبقرة مقدسة بالهند ونحنا منستعمل هي الكلمة كشتيمة..
من جهة تانية بحس انو الشخص اللي بيحول نقاش جدي لمسخرة بيكون مفلس فكريا وغير قادر على الادلاء برأي فبيحاول يوجه الموضوع لاتجاه تاني على قد مستواه الفكري.. وبيتمسخر

Joe 22/08/2009 17:45

انا قصدت بسخرية شي تاني اقرب للفكاهة.. يعني مثلا رسوم كاريكاتورية. ما قصدت انو يكون في حوار جدي و واحد يصير يتمسخر و يتولدن.. بس يمكن سخرية هي الكلمة الغلط هون

Elephant And Castle 22/08/2009 18:23

اقتباس:

كاتب النص الأصلي : Joe (مشاركة 1321169)
انا قصدت بسخرية شي تاني اقرب للفكاهة.. يعني مثلا رسوم كاريكاتورية. ما قصدت انو يكون في حوار جدي و واحد يصير يتمسخر و يتولدن.. بس يمكن سخرية هي الكلمة الغلط هون


يعني بتقصد التهكم ... يعني شي Sarcastic او Ironic

بشوف هيك اسلوب حلو بالحوار ...و بيعطي متعة .بس بشرط يكون التهكم متناول افكار او نظريات او براهين ..........خصوصا لما بكون النقاش بشي طويل و ممل ,,,بس بدها رحابة صدر

Dndoshy 22/08/2009 20:54

اقتباس:

كاتب النص الأصلي : Nay (مشاركة 1321162)

من جهة تانية بحس انو الشخص اللي بيحول نقاش جدي لمسخرة بيكون مفلس فكريا وغير قادر على الادلاء برأي فبيحاول يوجه الموضوع لاتجاه تاني على قد مستواه الفكري.. وبيتمسخر

وفينا نضيف عهالشي انو يلي بيتمسخر عانسان قصير أو معاق...
بيكون عندو مركب نقص أو فقير داخليا لحتى بيحاول ينقص من قيمة الشخص التاني ميشان ينزلو لمستواه..

zen 22/08/2009 22:56

مرحبا
المسبة انا ببعتبرها تنفيس نفسي للناس وطبعا حسب الحالة بس انا مع كل مسبة ع الحكومة:p
هلاء التهكم عبر الرسوم كتير شي حلو اوانا بيعجبني
بس طبعا بحدود لانو مرة نزل كايكتر مو حلو وقتها كان رئيس دولة ومرتو والشعب
بعدين الرسم احلى يميل للرمزية اللي كتير بتخلينا نفكر يعني مو اجي حط راس حدا ع جسم حمار فالقصة باينة انو حمار
وعن المسبات بشكل عام انا بحبها تكون موجودة بنوع او باخر بس متل ما قلنا بحدود

جلنارالغالية 31/08/2009 12:56

طبعا أنا فضل ان النقاش يكون موضوعي وبعيد عن كل أشكال السب والشتيمة لكن بنفس الوقت انا مع السخرية خاصة بمواضيع سياسية متل الكريكاتير هي شغلة كتير تعجبني لانها تكون رمزية والرسام يمكن يفلت فيها من الرقابة

الأدهم 08/11/2009 12:44

شكراااااااااااااااااا على الموضوع


الساعة بإيدك هلق يا سيدي 17:15 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.04273 seconds with 11 queries