أخوية

أخوية (http://www.akhawia.net/forum.php)
-   أخبار العالم (http://www.akhawia.net/forumdisplay.php?f=73)
-   -   الحكومة الأسبانية تنوي الأعتذار عن طرد العرب و المسلمين (http://www.akhawia.net/showthread.php?t=131756)

حلبي 27/11/2009 13:19

الحكومة الأسبانية تنوي الأعتذار عن طرد العرب و المسلمين
 
عبر الحزب الشعبي اليميني المعارض في إسبانيا عن استيائه من مشروع قرار يعتذر عن طرد العرب والمسلمين، والمعروفين باسم «الموريسكيون» عام 1609. وهذه هي «وجبة» الطرد الثانية بعد ما حدث بعد سقوط غرناطة عام 1492.

البرلمان الإسباني يناقش حاليا هذا المشروع بتأييد من الحزب الاشتراكي الحاكم و«تجمع اليسار المتحد»، في وجه معارضة صريحة من اليمين. وقد طلبت الناطقة باسم الحزب الشعبي المعارض في البرلمان سراجا سانشيث دي سانتا ماريا، أول من أمس الثلاثاء، من رئيس الوزراء الاشتراكي خوسيه لويس رودريغيث ثاباتيرو أن «ينشغل بشؤون إسبانيا الداخلية بعيدا عن البحث في بطون التاريخ قبل أربعة قرون»، وتابعت: «على الحكومة الاهتمام بالحاجات الحقيقية لملايين العاطلين عن العمل في إسبانيا». بينما قال الناطق بلسان الحزب الاشتراكي في البرلمان خوسيه أنتونيو آلونسو إن الهدف من هذا القرار «هو تعزيز العلاقات بمختلف الطرق، الاقتصادية والاجتماعية والثقافية، مع الشعوب التي تنحدر من الموريسكيين الذي طردوا من إسبانيا في القرن السابع عشر، ويسكنون حاليا في المغرب العربي وأفريقيا.. وهو اعتراف رسمي بالظلم الذي تعرض له الموريسكيون المطرودون». كما رأى ممثل تجمع اليسار المتحد غاسبار ياماثاريس أن مشروع قرار الاعتذار «يعد تعويضا رمزيا للموريسكيين».

مما يذكر أن اتفاق تسليم مملكة غرناطة العربية مع الملكة إيزابيلا عام 1492، كان ينص على حفظ جميع حقوق العرب والمسلمين إذا ما سلموا غرناطة، لكن هذا التعهد نكث، ومنعت اللغة العربية وجرى إجبار المسلمين على التنصر، وأحرقت كتبهم، وقمعت بشدة كل تحركاتهم حتى عام 1609، عندما قرر الملك فيليب الثالث طرد جميع العرب والمسلمين الباقين في إسبانيا. فخرجوا متجهين نحو شمال أفريقيا، وتعرض كثير منهم للنهب والسلب، في مأساة تاريخية تعد من أكبر الكوارث الإنسانية. ولقد رفضت إسبانيا على مر السنين الاعتراف بهذا الخطأ، على الرغم من كثير من المحاولات في هذا الشأن، ومنها محاولات الدكتور عبد الجليل التميمي رئيس مركز الدراسات والبحوث العثمانية والموريسكية، الذي راسل المسؤولين الإسبان مدة طويلة حول هذا المشكلة.

الشرق الاوسط

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -


ورده بغداد 27/11/2009 14:30

بشو راح ينفع الاعتذار .............

مجنون يحكي وعاقل يسمع 27/11/2009 14:52

اقتباس:

كاتب النص الأصلي : ورده بغداد (مشاركة 1361287)
بشو راح ينفع الاعتذار .............

على الأقل اعتراف بخطأ ... بجريمة بشيء ما كان ما لازم يوقع
ياترى نحنا رح نعتزر لإسبانيا عن استعبادون واحتلالون كذا ميت سنة واللا نحنا احتليناهم بأوامر إلهية وبالتالي إذا لازم يصير في اعتذار لازم يكون من صاحب الأمر بالإحتلال

قرصان الأدرياتيك 27/11/2009 15:11

ويا ترى فكر الأكراد والأتراك يوماً ما بالاعتذار عن ذبح مليون ونص مسيحي أرمني وسرياني وكلداني... إلخ وتشريد الباقين؟!
أو مثلاً فكّر العرب بالمجازر اللي ارتكبوها خلال الاحتلال القادم من شبه الجزيرة العربيّة لمناطق بلاد الشام؟! فكّروا مثلاً يعتذروا للسكان الأصليين عن هالمجازر؟!
ولا ألف حلال للعرب والمسلمين وستميت مليون حرام على بقيّة الشّعوب؟!
لك شعب احتل البلاد ولما أهل البلاد طرد هالشعب منها جاي يعتذر... أديشو الغرب سابق بلادنا بالأخلاق، ولساتنا عم نكفّر فيه وعاملين حالنا موطئ الديانات ومقرّ الأنبياء ومثوى الآلهة... لك الإله الوحيد والديانة الوحيدة والشريعة الوحيدة هيّ "الإنسان" بإنسانيتو مو بدينو وشكلو ولونو وعرقو...

مجنون يحكي وعاقل يسمع 27/11/2009 15:33

له له ياصديقي القرصان, هيك بدي اختلف معك كتير كتير وبتعرف أنا بس ازعل بتطلع خلاقي وبس تطلع خلاقي بصير متل العاقلين يعني بيرجع لي عقلي
شو صديقي الظاهر نسيت وصية الفاروق العادل عمر بن الخطاب رضي الله عنه شو وصّى الجيوش تبعو يا رجل اللاءات تبعو أشهر من لاءات المغفور له ياسر عرفات
لا تقطعوا شجرة ...لا......... لا......
يعني حتى أغنية اللالا يمكن إلها علاقة بالفتوحات الإلهية
بتحب بجبلك الوصية,أكيد أنت قاريها بس الله يلعن النسيان أو إذا بتحب بجبلك شو عملت هالجيوش وشلون طبقت هالوصية وشلون كان الفارس ينزل عن فرسو ليروح يجيب كاس ماء لطفل رح بيموت رعب بعد اللي قتلو أبوه واغتصبو أمو ...ومدري شو لسا
كانو كتير حنيّنين الشباب الله وكيلك

بنفسجة 27/11/2009 16:46

ياعيني ليك وين بعدو
على اساس نحنا كنا حاسين بالاساءة يعني وعايشين ازمات نفسية من جراء الطرد
ياحبيبي نحنا شعب بطلنا نحس بشي حتى بحالنا

ابو عمران 27/11/2009 17:14

انبسطوا يا شباب بدا تعتذر عن المجازر ..
لا حول ولا قوة إلا بالله

حلبي 11/12/2009 16:36

اقتباس:

كاتب النص الأصلي : مجنون يحكي وعاقل يسمع (مشاركة 1361301)
بتحب بجبلك شو عملت هالجيوش وشلون طبقت هالوصية وشلون كان الفارس ينزل عن فرسو ليروح يجيب كاس ماء لطفل رح بيموت رعب بعد اللي قتلو أبوه واغتصبو أمو ...ومدري شو لسا
كانو كتير حنيّنين الشباب الله وكيلك

أذا كنت مسؤل عما كتبت أرجو أن تعطيني مصدر هذه الأتهامات

و شكراً

ayhamm26 11/12/2009 19:26

اقتباس:

كاتب النص الأصلي : مجنون يحكي وعاقل يسمع (مشاركة 1361301)
بتحب بجبلك الوصية,أكيد أنت قاريها بس الله يلعن النسيان أو إذا بتحب بجبلك شو عملت هالجيوش وشلون طبقت هالوصية وشلون كان الفارس ينزل عن فرسو ليروح يجيب كاس ماء لطفل رح بيموت رعب بعد اللي قتلو أبوه واغتصبو أمو ...ومدري شو لسا
كانو كتير حنيّنين الشباب الله وكيلك

هلق لو واحد حكالك مثلا عن شي مجزرة صارت بهالبلد من شي عشرين سنة رح تصدقو؟؟ فشلون بدك تجبلنا شو عملت هالجيوش من 1400 سنة؟؟ شو اللي عرفني انا انو مصادرك هي الصحيحة وانو المصادر التانية هي الغلط؟؟

من جهة تانية لو فكرنا بكلامك عن الاحتلال العربي لبلاد الشام بيطلع معنا انو لازم هلق بسوريا مثلا شي 16 مليون يتقلعوا للسعودية مشان تبقى سوريا لاهلها الاصليين متل ما صار باسبانيا وقياسا على هالفكر بيطلع معنا انو الفلسطينيين محتلين و الاسرائيليين محررين.

من فترة شفت وثائقي عن طرد المسلمين من اسبانيا عاملتو طبعا قناة امريكية و كل المتحدثين في دكاترة تاريخ بجامعات امريكية, عم يحكوا عن امارة غرناطة اللي صمدت حوالي ميتين سنة بجنوب شرق اسبانيا وشلون تحولت لنموذج فريد من نوعو في التسامح بين اليهود والمسيحين والمسلمين بالوقت اللي الاوربيين بهديك الفترة كانو مشغولين بحرق اليهود على اعتبارن هني المسؤولين عن موت نص سكان اوربا بالطاعون سنة 1350.

يعني العرب اللي كانو باسبانيا سنة 1608 مو مسؤولين عن اللي عملوا اجدادن قبل الف سنة لما احتلوا الاندلس , هدول صاروا ابناء هديك الارض متلن متل الاسبان و هدول عملوا اسبانيا متحضرة اكتر من كل اوربا بهديك الفترة.
تخيل معي لو الهنود الحمر باميركا جمعوا حالن هلق وطردوا باقي الامريكيين اللي اجو من اوربا من 400 سنة و دمروا كل الحضارة اللي عاملتها امريكا حاليا هيك برأيك بكون منيح؟


أنا ما ني مع جماعة الفتح الاسلامي و ما عرف العالم فاتحا ارحم من العرب, بس كمان الواحد يكون منطقي و ما يتطرف برأيو بالاتجاه التاني.

مجنون يحكي وعاقل يسمع 12/12/2009 06:36

الأخ حلبي والأخ أيهم ,أتمنى وأرجو أن يقوم كل منكم بقراءة أي كتاب من الكتب التاريخية المعترف عليها والتي تعتبر هي ومؤلفيها من مصادر الثقة بالنسبة لكل المسلمين وهي كتبت بمنتهي الصدق والأمانة وذكرت كل شيء ولكننا نحن شعب لايقرأ , فمن منكم قرأ كتاب الخراج لقاضي القضاة أبو يوسف يعقوب بن ابراهيم , أو فتوح البلدان للبلاذري
أو كتاب الأخبار الطوال للدينوري , أتمنى فقط العودة إلى هذه الكتب أو أي كتاب من الكتب الي كتبت عن تلك الحروب
لأن لا أحدا منكم سيصدق ما أنقله له لهول المفاجأة , وإذا شئتم أنزلت موضوعا خاصاً بالسبي والهدم والحرق والقتل
وفقط من أمهات الكتب التي نفتخر فيها بدون أن يقرأها حتى واحد من مئة ألف من العرب 

ayhamm26 13/12/2009 20:49

اقتباس:

كاتب النص الأصلي : مجنون يحكي وعاقل يسمع (مشاركة 1365287)
الأخ حلبي والأخ أيهم ,أتمنى وأرجو أن يقوم كل منكم بقراءة أي كتاب من الكتب التاريخية المعترف عليها والتي تعتبر هي ومؤلفيها من مصادر الثقة بالنسبة لكل المسلمين وهي كتبت بمنتهي الصدق والأمانة وذكرت كل شيء ولكننا نحن شعب لايقرأ , فمن منكم قرأ كتاب الخراج لقاضي القضاة أبو يوسف يعقوب بن ابراهيم , أو فتوح البلدان للبلاذري
أو كتاب الأخبار الطوال للدينوري , أتمنى فقط العودة إلى هذه الكتب أو أي كتاب من الكتب الي كتبت عن تلك الحروب
لأن لا أحدا منكم سيصدق ما أنقله له لهول المفاجأة , وإذا شئتم أنزلت موضوعا خاصاً بالسبي والهدم والحرق والقتل
وفقط من أمهات الكتب التي نفتخر فيها بدون أن يقرأها حتى واحد من مئة ألف من العرب

شكرا على النصيحة بس أنا ما تناقشت معك على المصادر التاريخية لانو نقاش بلا معنى, انا بقدر طالعلك مية مصدر تاريخي بيحكي عكس اللي حكيتو و انت نفس الشي و كل واحد بيدور بالتاريخ على اللي بيعجبوا و بيناسب افكارو

انا مستغرب بس بالوقت اللي الناس عم تحاول تدور على صيغة وطنية للعيش المشترك في ناس متلك عم يبشروا بفكر جديد ..... انو ما بكفي التقسيمات الطائفية و الاجتماعية و العشائرية بهالبلد مشان كمان نجي و نقسم أهل البلد لسكان أصليين و محتلين وقال شو لازم المحتلين يعتذروا .............

بالفعل عيش كتير بتسمع كتير

مجنون يحكي وعاقل يسمع 13/12/2009 23:48

اقتباس:

كاتب النص الأصلي : ayhamm26 (مشاركة 1365680)
شكرا على النصيحة بس أنا ما تناقشت معك على المصادر التاريخية لانو نقاش بلا معنى, انا بقدر طالعلك مية مصدر تاريخي بيحكي عكس اللي حكيتو و انت نفس الشي و كل واحد بيدور بالتاريخ على اللي بيعجبوا و بيناسب افكارو

انا مستغرب بس بالوقت اللي الناس عم تحاول تدور على صيغة وطنية للعيش المشترك في ناس متلك عم يبشروا بفكر جديد ..... انو ما بكفي التقسيمات الطائفية و الاجتماعية و العشائرية بهالبلد مشان كمان نجي و نقسم أهل البلد لسكان أصليين و محتلين وقال شو لازم المحتلين يعتذروا .............

بالفعل عيش كتير بتسمع كتير

الأخ أيهم المحترم
أولاً أنا أبديت رأيي بالموضوع المطروح وهذا الرأي ناتج عن معرفة ودرابة , ولما كان ارأي لا ينطبق مع آرائكم
[quote]أذا كنت مسؤل عما كتبت أرجو أن تعطيني مصدر هذه الأتهامات/QUOTE]
الأخ أيهم أنا لا أطالب بعودة أحد إلى السعودية أو غيرها أنا طرحت الموضوع للمقارنة في لحظة تا ريخية معينة , ,اظن ليس أنا من يحرض طائفياً ومذهبياَ , وأنا أبعد ما أكون عن ذلك
وعندما تكلمت قلت
[quote]ياترى نحنا رح نعتزر لإسبانيا عن استعبادون واحتلالون كذا ميت سنة/QUOTE]
ولا حظ أنني عبرت بكلمة نحن يا سيدي
ولك تحياتي



suryoyo 14/12/2009 00:21

اقتباس:

كاتب النص الأصلي : ayhamm26 (مشاركة 1365172)
من فترة شفت وثائقي عن طرد المسلمين من اسبانيا عاملتو طبعا قناة امريكية و كل المتحدثين في دكاترة تاريخ بجامعات امريكية, عم يحكوا عن امارة غرناطة اللي صمدت حوالي ميتين سنة بجنوب شرق اسبانيا وشلون تحولت لنموذج فريد من نوعو في التسامح بين اليهود والمسيحين والمسلمين بالوقت اللي الاوربيين بهديك الفترة كانو مشغولين بحرق اليهود على اعتبارن هني المسؤولين عن موت نص سكان اوربا بالطاعون سنة 1350.
.

بس اذا مستشرق بريطاني حكى على الفتوحات الاسلامية يطلع مستشرق منحاز و غير موضوعي و مثل باقي المستشرقين زوروا التاريخ الاسلامي ..

بس اذا امريكي حكى عن الغرب ؟؟ يطلع رأيه ذهب


ما رح نطلع من الازداوجية بيوم من الايام ؟؟؟


بعدين الاعلام الامريكي اللي يعمل الوثائقيات نفسه زور الاحداث قبل 6 سنين .. و قال للعالم العراق يملك اسحلة نووية .. رح نثق فيه من عمل بحث على مرحلة قبل الف سنة ... ؟



بالمناسبة انا مو ضد البحث اللي حكيبت عنه و معروفة قسوة محاكم التفتيش .. .. و لكن ضد المعايير المزدوجة و تبيان ملائكية طرف و شيطانية طرف آخر

Seth 14/12/2009 02:17

اقتباس:

كاتب النص الأصلي : قرصان الأدرياتيك (مشاركة 1361294)
ويا ترى فكر الأكراد والأتراك يوماً ما بالاعتذار عن ذبح مليون ونص مسيحي أرمني وسرياني وكلداني... إلخ وتشريد الباقين؟!
أو مثلاً فكّر العرب بالمجازر اللي ارتكبوها خلال الاحتلال القادم من شبه الجزيرة العربيّة لمناطق بلاد الشام؟! فكّروا مثلاً يعتذروا للسكان الأصليين عن هالمجازر؟!
ولا ألف حلال للعرب والمسلمين وستميت مليون حرام على بقيّة الشّعوب؟!

بالنسبة للكلام اعلاه فهذا جهاد و في افضل الحالات فتح مبين و لا اعتذار عنه :pos: , اما باقي كلامك فهو ذهب خالص :D


اقتباس:

كاتب النص الأصلي : قرصان الأدرياتيك (مشاركة 1361294)
لك شعب احتل البلاد ولما أهل البلاد طرد هالشعب منها جاي يعتذر... أديشو الغرب سابق بلادنا بالأخلاق، ولساتنا عم نكفّر فيه وعاملين حالنا موطئ الديانات ومقرّ الأنبياء ومثوى الآلهة... لك الإله الوحيد والديانة الوحيدة والشريعة الوحيدة هيّ "الإنسان" بإنسانيتو مو بدينو وشكلو ولونو وعرقو...


ayhamm26 14/12/2009 08:39

اقتباس:

كاتب النص الأصلي : suryoyo (مشاركة 1365739)
بس اذا مستشرق بريطاني حكى على الفتوحات الاسلامية يطلع مستشرق منحاز و غير موضوعي و مثل باقي المستشرقين زوروا التاريخ الاسلامي ..

بس اذا امريكي حكى عن الغرب ؟؟ يطلع رأيه ذهب
ما رح نطلع من الازداوجية بيوم من الايام ؟؟؟
بعدين الاعلام الامريكي اللي يعمل الوثائقيات نفسه زور الاحداث قبل 6 سنين .. و قال للعالم العراق يملك اسحلة نووية .. رح نثق فيه من عمل بحث على مرحلة قبل الف سنة ... ؟
بالمناسبة انا مو ضد البحث اللي حكيبت عنه و معروفة قسوة محاكم التفتيش .. .. و لكن ضد المعايير المزدوجة و تبيان ملائكية طرف و شيطانية طرف آخر

أول شي انا ما حاولت فرجي ملائكية طرف وشيطانية طرف, حاولت بس قول انو في كم نقطة مضيئة بتاريخ العرب باسبانيا و منها مملكة غرناطة ما بعرف ليش انت مصر على شيطنة العرب و تصوير كل شي بتاريخن باللون الاسود
تاني شي شو دخل الاعلام الامريكي بالموضوع؟؟ انا عم احكي عن اكاديميين عملوا الوثائقي دكاترة جامعة مو محررين بالفوكس او السي ان ان, تزوير حقائق حرب العراق كان لارتباط الاعلام الامريكي تجاريا و سياسيا مع الادارة الامريكية أما فيك تقلي شو مصلحتن بتزوير التاريخ ؟

انا ما جبتلك وثائقي من قناة الجزيرة لحتى تقلي ازدواجية, انا بعرف انو لو جبتلك اي رأي عربي بهالخصوص فهو بالنسبة الك فاقد المصداقية مشان هيك الامريكي بهالحالة يعتبر محايد و خاصة انو امريكي اكاديمي غير موجه سياسيا

ورده بغداد 14/12/2009 13:24

اسبانيا لليوم لازالت تحتل اجزاء وجزر من المملكه المغربيه

ومنها جزيرة ليله وسبته ومليله ؟

ابو نجبو 14/12/2009 14:34

اقتباس:

كاتب النص الأصلي : مجنون يحكي وعاقل يسمع (مشاركة 1365287)
الأخ حلبي والأخ أيهم ,أتمنى وأرجو أن يقوم كل منكم بقراءة أي كتاب من الكتب التاريخية المعترف عليها والتي تعتبر هي ومؤلفيها من مصادر الثقة بالنسبة لكل المسلمين وهي كتبت بمنتهي الصدق والأمانة وذكرت كل شيء ولكننا نحن شعب لايقرأ , فمن منكم قرأ كتاب الخراج لقاضي القضاة أبو يوسف يعقوب بن ابراهيم , أو فتوح البلدان للبلاذري
أو كتاب الأخبار الطوال للدينوري , أتمنى فقط العودة إلى هذه الكتب أو أي كتاب من الكتب الي كتبت عن تلك الحروب
لأن لا أحدا منكم سيصدق ما أنقله له لهول المفاجأة , وإذا شئتم أنزلت موضوعا خاصاً بالسبي والهدم والحرق والقتل
وفقط من أمهات الكتب التي نفتخر فيها بدون أن يقرأها حتى واحد من مئة ألف من العرب

حبيبي مجنون ..انا وانت و الكل بيعرفو انو اغلب كتب التأريخ هي قال عن قيل عن يقول ...اي اكتر تعبير مستعمل " وقد قُتل منهم خلقٌ كثير"
وبكل الاحوال أنا معك شي مخجل اللي كان يصير ...بس كمان
يعني هي حرب ..وبزمان كان فيه المنتصر يسلب كلشي بيملكو الخاسر...السبي و الاموال مالها اختراع عربي ...هاد عرف و قانون الحرب بهديك الفترة كان هيك ......اي كان كل مملكة لما بتقوى شوي بتعتدي على جارتها و تتوسع أكتر ...لبين مايجيها مملكة أقوى منها تقضي عليها ....وهكذا

بس كمان الكل بيعرف كيف تم تصفية العرب الاشرار بالاندلس و أساليب محاكم التفتيش بالتعذيب صارت مرجع و منهاج لحد الان بيستعملوه ...هاد الحكي من هنيك ..مو من عندنا ....الغرب بيقول انو محاكم التفتيش كانت عار و شيء مخجل جداً ....

لك خيو ...!!

ازا هلاء و في امم متحدة و شرعية دولية و حقوق انسان ومنظمات انسانية مات مليون عراقي بالاحتلال ...الله بيعلم كم بنت اغتصبت وكم واحد مات تحت اقدام الاحتلال ...منشان هدف انساني و هو نشر الديموقراطية..
الصرب ارتكبو مذبحة فظيعة بسربينيتشا ...كم ألف فتاة اغتصبت و عذبت قبل ماتموت تحت حراب البنادق ...وكان الناتو على بعد دقائق من المنطقة وماحرّك ساكن ...



و الشي اللي فعلاً استغربتلو انو في البعض عمبينادي انو هالارض سوريّة للسوريين الاصليين " المسيحيين" و المسلمين هنن بقايا الاحتلال :?
يعني بلامؤاخذة ....من ألف سنة حدا بيعرف شو و وين كان ....بقول عن حالي انو عربي ..ممكن يطلع أصلي منغولي من بقايا حملة هولاكو عالمنطقة .....أو من ألبانيا جينا مع محمد علي و تركونا هو ....أو من عند نيرون من روما ....شبيعرفني
البلد هي النا هلاء ..لكل واحد بيحمل بطاقة شخصية و جواز سفر سوري ...واللي بيحسّ حالو انو انا مستعمر ...يجبلي دليل مادّي و أنا مستعدّ أرجع عالصحرا من حيث اتينا :lol:

suryoyo 14/12/2009 15:46

اقتباس:

كاتب النص الأصلي : ayhamm26 (مشاركة 1365867)
أول شي انا ما حاولت فرجي ملائكية طرف وشيطانية طرف, حاولت بس قول انو في كم نقطة مضيئة بتاريخ العرب باسبانيا و منها مملكة غرناطة ما بعرف ليش انت مصر على شيطنة العرب و تصوير كل شي بتاريخن باللون الاسود
تاني شي شو دخل الاعلام الامريكي بالموضوع؟؟ انا عم احكي عن اكاديميين عملوا الوثائقي دكاترة جامعة مو محررين بالفوكس او السي ان ان, تزوير حقائق حرب العراق كان لارتباط الاعلام الامريكي تجاريا و سياسيا مع الادارة الامريكية أما فيك تقلي شو مصلحتن بتزوير التاريخ ؟

انا ما جبتلك وثائقي من قناة الجزيرة لحتى تقلي ازدواجية, انا بعرف انو لو جبتلك اي رأي عربي بهالخصوص فهو بالنسبة الك فاقد المصداقية مشان هيك الامريكي بهالحالة يعتبر محايد و خاصة انو امريكي اكاديمي غير موجه سياسيا

اي صحيح .. في نقاط مضيئة بالتاريخ ...

و انا مو بودي ابين كلشي اسود بتاريخ العرب .. بالعكس في كثير شغلات مضيئة بتاريخ العرب .. بس هناك حملة مستمرة من مئات السنين لتزييف الحقائق سواء بالشرق الاوسط او شمال افريقيا او اوربا

نفس الشي .. معروفة هناك نقاط بيضاء في تاريخ الاحتلال البريطاني و الفرنسي .. على الاقل شكلولنا نظام دولة مدنية و دستورية ما كان ممكن يتحقق بوجود الاحتلال العثماني ,,,

بس هذا لا يعني انه انهم جاءوا من اجل الحرية و الحياة السعيدة !!
و تعرف ما طلعوا الا بعد حرب و مقاومة كثيفة ...




نجي على نقطة الاعلام الامريكي ... مو محللين ال سي ان ان انا قصدت
انا قصدت خبراء امم متحة متل ريشتارد باتلر و فريق التفتيش .. بالاضافة الى علماء اميركان كانوا مشكلين حملة مستمرة لتزييف الحقائق

القصد من كل الموضوع .. مو كل تقرير علمي امريكي لازم نعتبرو صح .. و نفس الحكي عن قناة الجزيرة او العربية


بالنهاية .. التهجير هو تهجير .. و الاحتلال هو احتلال .. و الانتداب هو انتداب ... و والابتلاع هو الابتلاع
و لكن كلشي بدرجات ..


الساعة بإيدك هلق يا سيدي 02:30 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.05990 seconds with 11 queries