|
تقنيات في التربية
جميع خبراء التربية بيأكدو على انو التربية هي شيء مكتسب.. بمعنى اخر ما حدا بيولد وهوي بيعرف يربي أولادو.. وعلم التربية تطور كتير بالقرن الماضي وفي طرق للتربية كانت متبعة سابقا صارت غير مقبولة بتاتا..
بهادا الموضوع رح حاول حط مجموعة تقنيات بتساعد الاهل على السيطرة على سلوك ابناؤهم وايجاد طرق وخطوط وصل بتحسن علاقتهون وبتخلي الحياة اكتر سهولة للأطفال اولا وللأهل ثانياً.. الموضوع عم يهتم بالاطفال من عمر سنة ونص وحتى عمر 7 سنوات بشكل رئيسي مصادر الموضوع: -خبيرة التربية جو فروست صاحبة برنامج سوبر ناني ومجموعة مهمة من كتب التربية الحديثة - متابعتي لنصائح مايا خاطر مقدمة فقرة أولادنا في تلفزيون المستقبل - حديث الى الامهات كتاب للدكتور سبوك احد أهم وأشهرخبراء التربية في القرن الماضي - مقالات مترجمة عن كتاب العائلة اولا للدكتور فيل |
بعض النصائح العامة
-اهم شي بتربية الطفل الاتفاق بين الوالدين على الاستراتيجيات والطرق.. وان تكون التعليمات موحدة وواضحة للطفل وأن يعرف الطفل أن الوالدين متفقين تماما بخصوص تربيته - أن لا تظهر توترك او حيرتك تجاه سلوك الطفل مهما كان سيئا ...لازم تكون دايما عرفان شو بدك - أن تختار الاوقات "حتى لو كانت قليلة" التي يكون فيها الطفل جيد السلوك وتعطيه ضمة كبيرة وقبلة.. وتخبره انه طفل كويس - أن لا تتحدث عن كونه طفل صعب او غبي او شيطان أمام الاخرين لأن هذا يكرس فكرة انه فعلا طفل مشاغب.. بل بالعكس امدحه دايما امام امه وما م الاخرين - كل تصرفاتنا مع الولد هيي رسائل عم نبعتلو ياها.. وهوي بيترجمها متل ما بيحس - مقولة مهمة كتير: اختار معاركك مع الطفل يعني مو كل شغلة ممنوع أحيانا بدك تمرّق.. لما بدك تقول ممنوع لازم يعرف الطفل انو انت مستحيل تتراجع عن كلمتك.. وممنوع يعني ممنوع.. ولا تقول ممنوع أصلا اذا كنت بدك تتراجع.. - انا ما بشوف انو الحب والبوسات الكتيرة والضمات واللعب مع الولد بيتعارض مع كونك صارم أبدا.. - استسلامك للبكاء والعياط والصريخ وتنفيذ رغبةالطفل اللي سبق ورفضت انت تنفيذها يعتبر رسالة واضحة منك الى طفلك " اصرخ وابكي لأنفذ لك رغباتك" يتبع.. |
وأخيراً نزل ...
يسلمو ايديك ... متابعين .. |
شكرا ابو النجب.. انت المشجع الوحيد..
:D |
رح احكي عن مجموعة مواقف.. وكيف ممكن نواجهها على ارض الواقع وبدون تنظير..
الدكان - السوبر ماركت قبل الذهاب الى التسوق لازم يعرف الطفل انو بدنا نشتري كذا وكذا وانو هوي بدو يشتري كذا فقط.. وانو المصاري اللي معنا بتكفي بس لهدول الاغراض.. بس نروح ويجن متل العادة.. لازم ننبهو مرة او مرتين بصوت واطي وصارم وبعدين اضرب طنااااااااااااااااااااااا ش.. وكأنو انطرشو أدنيك .. نوبة الغضب عند الطفل بتتصاعد بشكل خط بياني بيكون خفيف بعدين بيتصاعد وبيرجع بينزل وبتروح النوبة وبتطول او بتقصر الفترة حسب كل طفل أكتر فترة ممكن تتوقعها هيي عشرين دقيقة الى نص ساعة.. وبيكون بأثناءها الطفل عم يحاول يخليك تحكي معو وتستجيب الو.. وانت بسكوتك بتكون عم توجهلو رسالة واضحة هيي "هادا السلوك غير مقبول وانا ما بسمعك وقت تصرخ" اذا قطعت سكوتك وحكيت مع الطفل اثناء نوبة الغضب بتكون قطعت الخط البياني وممكن يرجع الطفل بالخط البياني للنقطة اللي بلش منها.. مشان هيك حافظ على سكوتك وحاول تدندن شي غنية بقلبك او تحكي مع زوجتك او مع الاخ التاني اثناء زعيق الولد.. وتعاملو كانو غير مرئي.. يعني اهمال تام.. بالزيارة التانية للسوبر ماركت او للسوق رح تشوف فرق واضح.. وخلال 3 زيارات رح تحس انو هادا الولد غير هداك اللي كان يجي معك من قبل.. |
اقتباس:
بلاحظ كتير ولاد بيحاولو ياخدون إذن من الأم بعمل شي ولما بترفض بيحاولو فوراً مع الأب لأن عادة بيمرق هيك قصص والعكس صحيح هالشي كتير غلط لأن بتأثر عموضوع الرسائل يلي ذكرتيها بنفس المشاركة ... الطفل هون ما عم تصلو رسالة واضحة عن المقبول وغير المقبول وحبيت فكرة المواقف وكيف منواجها :gem: وناطرة الباقي اقتباس:
وأنا مشجعة كمان :D |
اقتباس:
اذا شفتي شي خطأ بتمنى انو تساعديني بتصحيحو.. بحكم انو انا عم اعتمد بالغالب على ذاكرتي السمعية.. يعني الموضوع مو منقول.. شكرا الك |
تقنية العزل:
بعتبر انو تقنية العزل هيي تقنية كتير مفيدة للأطفال العصبيين خاصة.. الطفل بس يعصب بيكون غير قادر على التواصل.. وما بيسمع شي .. لا خناق ولا مسايرة.. مشان هيك لازم ياخد وقتو ليرجع يهدا.. من جهة تانية لازم الطفل يعرف انو الاهل ما رح يحكو معو اذا كان معصب.. واذا ما كان مهذب.. تقنية العزل بتعني انو يقعد الطفل بغرفة لحالو بدون ما ينقفل عليه الباب بس بيتسكر تسكير.. وبدون ما تطفي الضو.. يعزل الطفل لمدة دقيقة لكل سنة من عمرو يعني اللي عمرو 3 سنين 3 دقائق واللي 4 سنين 4 دقايق............... بعد مرور الفترة بتدخل الى الغرفة واذا كان الطفل هادئ معناها انو هوي مستعد للحديث.. واذا صرخ بوجهك معناتا هوي بحاجة لتكرار فترة العزل مرة تانية.. ممكن بالفترات الاولى تستمر نوبة الغضب مدة 20 دقيقة وانت كل 4 دقائق لازم تفوت وتشوفو اذا سكت وتقلو اذا سكتت منحكي... - خلال صريخ الطفل والعياط ... لازم يكون كلامك قليل وصارم.. ولا تكتر حكي فوق راسو لأنو هوي ما رح يفهم شي.. خدو على الغرفة بدون ما تعصب وبدون ما تورجيه انو قدر يستفزك.. - قلة الادب والوقاحة تواجه فورا بغرفة العزل وبدون تقديم مبررات مطولة منك.. فقط جملة مقتضبة بتشرح سبب العزل - بعد ما يهدا الولد بتحاول شرح المشكلة بدون كتر حكي.. وضمة وبوسة بحنية بس بدون ضحك كتير - تقف بشكل موازي لطول الطفل مو انت واقف وهوي قصير ويضطر يرفع راسو ليشوفك.. ولا تقترب زيادة وقت التوبيخ خلي مسافة لابأس بها بيناتكون.. ولا تفنجر عيونك.. ولاتعيط.. خلي صوتك واطي وصارم.. - في حالات من الشغب بيجوز انت تعتبرها لاتستدعي العزل ممكن انك تواجهها بتجاهل الطفل وعدم اعارتو اي انتباه سلبي او ايجابي يعني طنش على الاخيييييييييييير |
تقنية بقعة المزعجين او كرسي المزعجين:
هي التقنية هيي نفس تقنية العزل بالمعنى العام للكلمة.. بس ما بيكون الطفل بغرفة منفصلة.. بيكون على كرسي معين او سجادة صغيرة.. هوي بيعرف مسبقا انو هي السجادة او الكرسي مخصص للاطفال المزعجين.. وكمان لازم الطفل يقعد عليها لمدة دقيقة عن كل سنة من عمرو.. ممكن انو يكون مواجه للحيط.. واذا نزل عن الكرسي لازم يتم ارجاعو مرة تانية حتى لو تكرر نزولو عن الكرسي مرات عديدة.. |
تقنية البرنامج اليومي..
الطفل على خلاف الراشدين بيحب الروتين.. بمعنى اخر الروتين بيريحو يجب عمل كرتونة كبيرة فيها الاعمال اليومية .. وقت الفيقة.. وقت الفطور.. وقت الرسم .. وقت اللعب.. وقت الغدا.. موعد رجعة البابا.. وهيك وأمام كل موعد رسمة رمزية ليفهم الطفل هلكلام شو معناتو يعني موعد الفيقة قدامو صورة شمس ووقت الرسم قدامو الوان..وهيك.. هيدي التقنية كتير يتفيد للأمهات اللي ما بيشتغلو وااطفال اللي ما بيروحو روضة بشكل خاص.. كتير بيكون حلو اذا اشترك الطفل بإعداد اللوحة وهادا بيساعدة على فهم آلية العمل واعتبارها لعبة عم يلعبها.. تقنية النقاط او الوجوه الضاحكة هيدي التقنية بتعتمد على تجميع الطفل لنقاط لما بيمتنع عن العمل السيء.. عن قول الكلام البذيء او حتى التبول خارج الواليت او بالفراش او اللعب بالاعضاء التناسلية او نكش الانف او حتى قضم الاظافر.. طبعا التقنية تستخدم لحل مشكلة وحدة من هدول المشاكل مو الكل سوا نقوم بعمل كرتونة ملصقة على الحائط وجدول يقسم حسب ايام الاسبوع وكل يوم 3 اقسام وتلصق وجوه ضاحكة او زعلانة عند قيام الطفل بسلوك جيد او سيء.. ونقوم باعداد الوجوه بمساعدة الاطفال .. لما بيجمع الولد عدد من الوجوه الضاحكة انت بتحددو بيحصل على هدية صغيرة |
ومتل ماتحاكينا عالماسنجر ..انا طبعت هالتقنيات و ازا في استفسار رح خبّرك ....
يسلمو ناي :D |
هلاء بالنسبة لهدول التقنيات ...
بدنا نستعملون مع بعض ...!! ولا نجرب وحدة وازا فشلت نشوف غيرا ..؟ |
كلو سوا ابو نجبو
تقنية العزل.. بمواجهة نوبات الغضب تقنية النقاط متل ما حكيت من قبل بمواجهة المشاكل اللي الها علاقة بالعادة.. يعني قرط الاظافر او مص الاصبع او التبول او الكلمات البذيئة.. بس بهي الحال بدك تختار من هدول المشاكل وحدة.. واذا بتلاقي انو فيك تمرق شي مشكلة مرقها.. انا مثلا بمرق أحيانا لما بتقول بنتي حمار لرفقاتها... وبلاقي الاولوية لمشاكل تانية بشوفها اهم.. وكل أب او ام الو رأي مختلف.. تقنية البرنامج اليومي : كمان فيك تستعملها مع باقي التقنيات كلو بيمشي مع بعض.. وبيكمل بعض.. وفيك تختار اللي بتشوفو مناسب الك .. انا ما بطبق تقنية البرنامج لأنو ظروفي ما بتساعدني من جهة ولأني فوضوية بطبعي من جهة تانية.. بس لما بتخربط او بتتنازل او تتراجع بتكون هدمت كلشي عملتو وبدك ترجع من الاول.. اهم شي يكون الواحد صارم وحنون بنفس الوقت.. |
والله خايف أخبّص ...
يعني صرلون كل هالمدّة الماضية بدون توجيه... وهلاء بدنا نطبق هالتقنيات ... بتظنّي بيتجاوبو الولاد معهون ...؟ |
اقتباس:
بعدين شوي شوي.. لانو تبع النقاط والبرنامج بدون رواق.. رغم انو انا شفت ببرنامج سوبر ناني عم يطبقو كل التقنيات سوا |
ناي :D
هلا مشان سؤال ابو نجبو هو صحيح كلما كان التوجيه أبكر .. بيكون أسهل بس اعتقد هالتقنيات يلي ذكرتا ناي مجدية وخصوصاً ... اقتباس:
في حالات كنت شوف الطفل فيها عن جد خارج السيطرة بس هي من خلال تطبيقها لهالتقنيات كانت فعلاً تأثر فيه وبالأخير يتجاوب الطفل و متل ما قالت ناي هالتقنيات بدون رواق :D |
اقتباس:
هلأ مثلا انا بنوتي الصغيرة.. بغض النظر عن كل فصولها الناقصة.. :pos: اتعودت من عمر سنة ونص انو بس تفرد ألعابها هيي اللي بدا ترجع تضبهون.. وأحيانا كنا نتقاتل أنا وياها.. وتضل تلك بالالعاب أكتر من ساعتين .. وهيي مزعوجة ومعصبة.. وأحيانا بتعيط.. بس مرة ورا مرة صارت تعرف انو انا مستحيل انا ضبلها ألعابها.. وصارت ما تكركب كتير.. ونفس الشي مع الالوان.. ومع الاواعي.. وهادا الشي ريحني.. لأنو مو منطقي الام تضب ألعاب الولد 5 او ست مرات باليوم.. او انو ضل راكدة ورا فوضاها كل النهار... |
اقتباس:
وخبّركون بالتطورات أول بأول ...:lol: |
اقتباس:
لانو هيي جزء أساسي.. حلو كتير انو تخبرنا شو عم يصير.. انا متحمسة أعرف.. |
اقتباس:
في ولد ما عندو فصول ناقصة !!.. بس فصل عن فصل بيفرق :lol: يمكن أكبر غلط بيرتكبوه الأهل هو التمريق مشان يخلصو من عياط وصريخ الولد وبعدا بيتندمو ليش هيك عملو.. بيصير الولد مجلوق وعنيد بس بيضل كل شي قابل للتصحيح وتتصحح الأخطاء وهنن صغار أحسن من بعدين ...المراهقة مثلا :sick: أنتي بتعرفي رأيي بتربيتك :D اقتباس:
اقتباس:
|
شكرا ساندرا.. هلأ نحنا بشر وما بعرف ليش بحس انو دمنا حامي ومنتوتر بسرعة اكتر من الأجانب..
يعني أحيانا بعصب.. وبرفع صوتي.. وبرجع بندم.. وكمان انا بسمح لبنتي انو تنام جنبي بالليل وهادا شي معروف انو مو منيح وبيأثر على استقلالية الولد بالمستقبل.. بس كمان ما عم تزبط معي.. |
هلا في كتير ولاد ما بيحبو ينامو لحالون للتعلق بالأهل، الخوف من أنهم يبقو وحيدين ويتركوهم أهلهم، والخوف من الظلام
إذا كان السبب هو الخوف من الظلام سبق ونزلت موضوع عن برنامج سلوكي للطفل يلي عندو خوف من الظلام - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - حسب اطلاعي عليه حسيتو جيد ما بعرف إذا كان بيفيدك :D |
اي شفتو ساندرا.. وحبيتو .. الحقيق هيي ما عندا مشكلة تجاه العتم.. ونومها جنبي مو بسبب عدم قدرتها على النوم لحالها... المشكلة من عندي .. انا اللي تاركة الموضوع هيك.. وما عم حسسها انو لازم تنام لحالها..
|
بالنسبة لتقنية العزل أنا تابعتها ببرنامج سوبر ناني بس هنن كانو طالبين انو الغرفة تكون فارغة من أي شي يتسلى فيه الطفل ... صح؟ .
شو الحل شو عملتو انتو لتتجاوزو هالشي؟. من ناحية تانية النقاط والبرنامج انا عندي تلات بنات وخفت لو عملت البرنامج والنقاط يصير في منافسة وشوي شوي يوصل لحسد ومشاكل بينهم لذلك توقفت عنو... فشو الرأي عندكم؟؟. على فكرة شكرا ناي من زمان كان بودي نعمل موضوع نقاش وتبادل خبرة بهالأمر..:D |
اقتباس:
مشان تقنية العزل مو ضروري تكون الغرف فاضية بس لازم ما تكون مصدر تسلية للطفل.. يعني مثلا غرفة النوم عندي الدروج ما بتقدر تفتحها بنتي.. في بالسوق قطع بلاستيك صغيرة بتمنع الطفل أنو يفتح الدروج .. ومافي برا الدروج أي مكياج او عطر او شي بيخوف او بيلهي.. وبشوف غرفة النوم مكان مثالي.. كنت كمان استعمل البلكون.. لأنو الزريعة عالية وما في شي بيخوف بالبلكون.. النقاط حلوة كتير وبتصير أحلى لما بيكون في اخوات.. خاصة البنات الصغار بيحبو التمثيل والمسابقات اكتر من الصبيان.. وبهي الحالة ممكن ينعمل الجدول جماعي للبنات التلاتة.. ويصير سباق.. بس طبعا الاصغر بيتراعى أكتر من الكبير.. ومشاكل ما بيصير .. انتو بتحددو انو مو الهدف الجكارة الهدف انو كلكون تصيرو كويسين واللي بيجاكر بياخد نقطة سودا.. شو رأيك:D |
في متل شائع الصيت بيقول الطبع غلب التطبع
هلئ السؤال هل الطبع سلوك مكتسب أم في شي وراثي ناطر الرد اي |
اهلا جاد..
هلأ الطبع بيغلب مزبوط.. بس نحنا كمان فينا نهذب الطبع اللي ورثو ابننا .. يعني اذا كان عنيد.. منضل نشتغل عليه لحتى يبطل عند.. واذا كان نكدي او فجعان او غليظ.. كلو بينحل.. وأسوأ شي انو نقول.. "طالع لأمو راسو متل الحيط" او "طالع لخالو بيحب الاكل وفجعان" وهادا الشي بيخلي الولد يقتنع انو الصفة السيئة متأصلة فيه ومنكون هيك عم نكرس هيدي الصفات السيئة عندو شو رأيك انت؟ |
عندي أخبار جديدة ...
راجعلكون ... |
انشا الله يكون خبر منيح..
|
اقتباس:
|
بلّشنا من اسبوع بالتقنيات ...عمتواجهنا مشاكل بموضوع العزل
العزل عمبيصير لمدّة ربع ساعة لعشرين دقيقة ....هلاء الولاد عمتبكي ..مو مشكلة ...المشكلة انو عمبيخافو كتير يعني البنت صارت ,وهي نايمة, تصرخ لاتسكرو الباب ..لاتسكرو الباب ... والصبي ماعمبيحسن ينام الا ازا كنت أنا أو أمّو نايمين جنبو ...عمبيقلي بابا لاتسكّر الباب علي ..بعدين بجي "البوبع" بياكلني .....:cry: شو اعمل ؟ |
اقتباس:
العزل شيئ و النوم شيئ أخر أنا من خلال خبرتي أنصح بأن ينام الأطفال مع الأم و الأب و خصوصاً مع الأم و حسب خبرتي من خلال عشقي للأفلام الوثائقية و الأجتماعية خاصة و من خلال مراقبتي عن كثب و بحكم أني عملت لفترى في مجال الشؤون الأجتماعية فقد كنت أتردد على دور الأيتام من أكثر الأشياء التي لفتت أنتباهي لدى الأيتام أن لكل واحد منهم عادة يمارسها بشكل متكرر مثل ما ذكرت الأخت ناي عن قضم الأضافر و وضع الأصبع في الفم و أشياء أخرى لا تعد و لا تحصى من تصرفات ليست محمودة يرجح خبراء التربية أن السبب هو فقدان الحنان الدائم لدى الطفل و لا يمكن لأحد أن يمنحه ذلك الحنان غير الوالدين و خصوصاً الأم فمن عادة الرضيع أن يلتقط أي عضو من والدته و هذا صحي و غير مستغرب دع الطفل ينعم بهذا الحق أثناء بداية النوم فمثلاً أبني محمد كان يحب أن يلتقط دهنة الأذن و ليسى عنده فرق بين أمه أو أبيه أما الثاني فيحب أن يضع يده على الرقبة و لايريد ألا رقبة أمه و لكن لا يريد رقبة أبيه و على رأي الخبراء هذه ظاهرة صحية و أشكر الأخت ناي على الموضوع و انشاء الله سأشارك في المستقبل |
اقتباس:
لذا عندما أذهب الى أي محل و بصحبتي أبني الثاني أتفق معه على أني أحمل نقود و لكني أحببت أن يصطحبني الى السوق و أننا ذاهبون الى السوق من أجل أشياء أخرى هامة و ليسى من أجله بصراحة أنا كثير مرتاح معه في هذا الأسلوب و هو مقتنع و راضي و عندما أشتري له أي لعبة يكون مسروراً بها و يشعرني بأنه سعيداً بها و بنفس الوقت راضً عني و حتى أنه في بعض الأحيان يكتفي بلعبة واحدة و لا يريد أن أشتري له حلوى مع اللعبة هذا الأسلوب يحتاج الى نقاش كثير مع الطفل حتى يصل الى هذه القناعة |
اقتباس:
انا كتبت انو دقيقة لكل سنة من عمر الولد يعني ابنك 4 سنين بيقعد 4 دقايق ونحنا ما بدنا نخوفو انا قلت فيك تستعمل بقعة الملعونين يعني مو بغرفة على كرسي مثلا وفيك كمان انو ما تسكر الباب المهم الولد يقععد لحالو شوي... بس اذا ضل يقلل أدب وما رضي يعتذر وضل يصرخ ويعصب منكرر الفترة 4 دقائق تانيين.. انا قلت انو فترات تكرار العقوية ممكن توصل مجموعها ل 20 دقيقة وهادا عند الولاد الكتير بيكونو عصبيين شرط انك تفوت كل 4 دقائق لعند الولد وتعطيه فرصة ليعتذر.. انتبه لازم تكون دقيق كتير .. وبعتذر اذا انا ما كنت واضحة.. بتمنى تخلي زوجتك تشوف الموضوع مشان اذا في شي مو مفهوم تسأل هيي كمان.. بوساتي للقرود الحلوين |
اقتباس:
واليتيم بيعاني من نقص حنان بشكل عام بحياتو مو بسبب عدم نومو جنب امو... الطفل اللي بينام لحالو بيكون مستقل ومتزن عاطفيا وقادر على انو يعمل أمورو بالمدرسة ووقت يكون بعيد عن أهلو بطريقة أفضل من الطفل اللي بينام جنب امو والللي بيعتمد عليها بكل شي.. الحنان بيجي من الضمات والبوسات والوقت النوعي اللي منعطيه لولادنا.. لو كان قليل ربع ساعة لعب.. مصارعة كركرة.. قصة صغيرة.. رسم .. حديث بينك وبينو بيوصل حنان كتير للولد... ما بعرف شو رأيك؟ |
أنا ولادي بينامو بأوضة لحالهن، بس أنا ببقى جنبون لحتى يغفو، وأحيان بيعيطولي بالليل بس ليمسكو ايدي دقيقة ويرجعو ينامو، وأنا عم لاقي هالشي أحسن بكتير من أنو ينامو جنبي لأنو أصلاً صعب نام جنب تنين بنفس الوقت، وفعلاً متل ما قالت ناي الولد بحاجة أنو يحس أنو أهلو مهتمين فيه، وعم يسمعوه وهالشي ما إلو علاقة بالوقت اللي بيقضوه معو وإنما بنوعية هالوقت.
بس أنا مشكلتي أنو بنتي عنيدة كتير، وأنا بالي مانو طويل كتير، ومن أنو بعرف أنو لازم طول بالي ما عم أقدر شو بعمل؟؟ :cry: |
اقتباس:
قصة طولة البال كلياتنا هيك.. منعمل شغلات منعرف انو غلط ومنضل نعملها.. ومنطلع عن طورنا ومنعيط كمان ومنرجع منندم.. انا بحس انو بعمل اللي فيني عليه واذا طلعت عن طوري أحيانا.. بحس انو عادي.. وبتصير مع ايا حدا فلا تزعلي.. |
اقتباس:
اقتباس:
رح نجرب ... اقتباس:
أصلاً انا أغلب الوقت بالشغل ..هي اللي عمتنقلّي الاخبار ...:lol: اقتباس:
|
اقتباس:
|
اقتباس:
هلاء الولاد أول شي بينامو بغرفتون ...بس بالليل بيفيقو و بيجو لعندنا بينامو ....هالعادة يومية تقريباً ... هلاء ابني كان ينام لحالو ...بس لما حاولنا نطبّق العزل المشار اليه بالتقنية ...صار يخاف و يرفض ينام لحالو بعتذر ابو محمد ماانتبهت عالرد بالاول .... :D اقتباس:
|
| الساعة بإيدك هلق يا سيدي 03:33 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون