|
أفكار تحشيشية
كنا انا ورفقاتي بالضيعة بين الفينة والاخرى بضم الالف الاولى نجتمع ونعمل هيك ما يشبه قعدة تحشيشية يعني كم بورية على الماشي وكم نفس اركيلة على الماشي يعني بحيث انو الواحد معد يقدر يطس اصبعو من الدخنة يعني هاي هيك على الخفيف نعملا وشغل سرعة وعبطة
وكنا نقعد نتناقش ونطق حنك بموضوع من هالمواضيع اللي بتهم مصلحة الامة والوطن يعني من احدى المواضيع انو اي احسن لالنا الشحاحيط النايلو او الشحاحيط الطبية مثلا وكتير احيان يشتد النقاش وتوصل بيناتنا للطلاق يعني والله العظيم لولا الخوف من حكي العالم وانو تطلع سيرتنا بالضيعة كنا منطلق بعضنا ونقوم بعد كل هالعياط وكل المعمعة والصرعة اللي ساويناها ننتصب على حيلنا ننفض تيابنا ونبوس بعضنا ونبلش ضرب الكاس وكاسك خيو وهات بوسة من هالخد ومع انو منعرف انو كل تمسيح جوخ بس كنا ننبسط بهالحكي حالنا حال بقية الشعب اللي ماشيين على مبدأ نفشو وشوف ما اجحشو اي والله كانت ايام ولهلأ بتزكر كم سيرة كنا نفتحن (سيرة ولاك انتي ويا مو شي تاني يلعما النية الطليانية ) اي المهم رح حطلكن انو كم سيرة من هالسير هون بس مو هلأ يعني بدكن تقول بس لتروح الفكرة وتجي السكرة ونضربلنا كم سيكارة نطرونا حياكم :D |
اي الله حيك اذا هيك
بس خيو رقيلنا المواضيع شوي (يعني الشحاطات و ما شحاطات) بركي بتقلنا شي سيرة عن القبقاب بضل اعلى من الشحاظة تحياتي |
هيك تمام .. صار بدها
 |
أيه أيام حلو ناطرين سير نحشيش بفارغ صبر
ياريت كنت معكم ايامها |
اقتباس:
يا سيدي الله حيك ... وناطرين هالسير ...اللي بتهم مصلحة الامة والوطن...:shisha: |
(تم تغيير عنوان الموضوع الى افكار تحشيشية لانو رح تختلف الردود فوجب التنويه )
يا اخي قبل ما اجي على هالبلد اللي هلأ انا في يعني اخر ايام قضيتا بسوريا وكان بيتنا طابقين فكان تطبق روحي من قعدة البيت فكنت اسحب سيكارتي واطلع هيك لبرا على هالبرندة مزمز فيها على رواق وعلى اعلى مزاج (بيت طابق تاني يعني اكيد المزاج بدو يكون عالي ) فكنت اطلع على هالشارع هيك وقت الضهيرة لاقي هالطلاب راجعة من المدرسة وكل واحد حامل شنتة على ضهرو يمكن اتقل منو ويا دوب عم يقدر يمشي فترجع ببالي ايام ما كنت ولد صغير وكنت روح على المدرسة انو من وقتا لهلأ كانت في جملة معلقة بزهني وما قدرت انساها واللي هيي انو "بدنا ياك تصير دكتور " يا اخي ما بعرف هالجملة هيك ليش انحفرت بمخي وما قدرت امحيها انو كنت صغير واسا ما بعرف شو معنات دكتور بس على كتر ما قالولي هالجملة صارو كل ما سالوني شو بدك تصير بالمستقبل قلن دكتور والله وكبرت وانا على اساس بدي صير دكتور وانو على اساس انو بس اكبر بدي افهم شو معنات دكتور بس انو لهلأ ما قدرت افهمها المهم انو لما كنت شوف هالعالم حاملة شناتيها على ضهرها وفكر انو انا بعد كم يوم مسافر انو ارجع اتزكر اللي درستو وشو كان حلمي وشو صار في انو ارجع اتزكر التاريخ العربي اللي درستو كلو يعني صرت بعرفلكن جد جدو لهولاكو او للاسكندر المقدوني او للخنساء ارجع اتزكر جغرافية العالم اللي درستا كلها يعني صرت بعرفلكن بلاد السند والهند وبلاد الهونولولو وين صارت ارجع اتزكر دروس القومية اللي درستا وقديش كان عنا مبادئ واهداف كنا ندافع عنها ورح نضل ندافع عنها وبحياتنا ما رح نوصللها كنت اتزكر كتب العلوم والفيزيا والكيميا والرياضيات واخر الشي بعد كل هدول ترجع على بالي جملة بدنا ياك تصير دكتور كنت كل نهار احمل شنتي على ضهري وروح على مدرستي مشي يعني هيي مدرستي ما بعيدة شغلة خمس دقايق مشي وكان صايرة حد الكراج تبع السرافيس وكان هيك على خط الافق قدام عيوني تلمع جملة بدنا ياك تصير دكتور انو خلص ترسخت بزهني انو بدي صير دكتور وما في شي بيردني والله وبعد 12 سنة دراسة وعلى نتائج المفاضلة ( على فكرة لهلأ ما بعرف شو يعني مفاضلة ولا بعرف شو اصل الكلمة ولا شو بيصرفوا ) انكسر الحلم وغاب الافق وما صرت دكتور بس ضلت جملة بدنا ياك تصير دكتور بزهني وبعد هادا وكلو وبعد ما تعزبت 12 سنة دراسة وقريت كتب ما استفدت منها شي غير اني قدرت جاوب على كم سؤال من اسئلة جورج قرداحي بمن سيربح المليون حملت شنتي على ضهري بس هالمرة مو شنتة المدرسة هالمرة شنتة تيابي ومشيت على طريق المدرسة مرة تانية بس هالمرة مو على المدرسة هالمرة على الكراج اللي حدا المدرسة انو سالت حالي سؤال انا وعهالطريق انو معقولة صرلي 12 سنة كل نهار كل نهار امشي على نفس الطريق ولا مرة خطرلي انو خيو خلص لهون وبس انا رح روح على الكراج دغري وبدون ما ضيع 12 سنة من عمري اخر شي استفدتو منها هوي ولا شي (لا تفكر الولا شي يعني شغلة قليلة هيي ممكن تكون كبيرة بس العطل منا نحنا اللي ما منقدرا ) انو بالله بالله بالله (تلات مرات مرفقات بكسر الهاء ) انو شو كان صار عليي لو موقف سرفيس وانا بكتب المدرسة وقايلو خدني على المطار وبدفعلك قد ما بدك لانو قد ما ادفعلك بدك تضل موفر عليي تكلفة 12 سنة مدري هالفكرة هي التحشيشية مدري فكرة انو تدرس 12 سنة واخر الشي ينكسر حلمك وما تستفيد بفرنك او بودية او بين او بيورو مصدي (مع العلم اليورو ما بيصدي ) بس نحنا قادرين بعد 12 سنة دراسة تاريخ نساوي بيصدي ومو بس هيك منقدر نساوي بترول كمان ووممكن بعد 12 سنة دراسة قومية ممكن نساوي هوي اللي يوحد امتنا ووممكن نساوي بعد دراسة 12 جغرافية يصير عملة الهونولولو كمان وشو بدي عد لعد سحبلك سحبة وانسى كلو رايح :7asheesh: |
اقتباس:
منيح ياللي اهلك كانو متفائلين فيك.. وهاي انته الحمدلله صرت دكتور .. صواريخ :7asheesh: :7asheesh::7asheesh::7asheesh::7asheesh::7asheesh: وماشاء الله عليكم انته واصحابك شغالين ومروقييييين وعال العال.. مسسسسسسسسسسسسسسسسسسسسسساء الخييير...:7asheesh::7asheesh: |
فخامة...لك فتأتلنا جروحاتنا يا زلمة ..
لسا ماصرلي فترة مخلص من هال 12 سنة دراسة ....:adal: يا أخي صدق القائل .. دخن عليها تنجلي ... وللا قللك .. اركل عليها تنجلي ...:shisha: خيو ازبط شي ... حشش عليها تنجلي ...التمساح للشاموا والمخملي ...:7asheesh: |
شو بقلك عن الي درس الـ12 وبعدها الـ 4 ,, بدون ما يحقق حلمو .
لك من شي قليل عم منـ |
اقتباس:
مساء.................. الخير ............!!!!!...... |
الله يرحم ايام زمان.
 من يوم صدور اول نسخةتبع جريدة يوريكا وانا عم اتحشش  |
اقتباس:
|
هلأ هوي كان في فكرة اليوم بس الموقع كان مسكر وما فتح غير لوقت متاخر عندي
فصارت نسبة الحشيشة عندي كتيرة اليوم وخايف اسطلكن من هالفكرة التحشيشية اللي طلعت معي خايف عليكن انا لكن شو حلو والله بكرا مسطولين ويسالكن مين سطلكن تقلولن هاني ويروح يلاحقوني عاد ويعلقو مسطلتي احلى الشي هلأ بكلمة مين سطلكن ذكرتوني بالعاب كنا نلعبا بايام الابتدائي وحدة كان اسما مين ظلمك ما بعرف اذا سمعانين فيها واذا مو سمعانين فيها بيكون اريح يعني هاي بيكون عم يلعبو خمسة او ستة حسب وبيشقو وراق صغيرة بيكتبو عليها بيي وامي وعمي وجدي وستي وخالي والعيلة يعني وورقة من هالوراق بيكتبو انا مظلوم وبيضبو هالوراق وبيفردوها على الطاولة وكل واحد بينقي ورقة وما بيقولا للتاني ما في غير اللي اخد ورقة انا مظلوم بيقول انا مظلوم بيجي الشعب ورا بيقلو مين ظلمك بيجي بيقلن حكامي :? لاء لاء يا رب بيقلن جدي او بيي او عمي او شي حدي من العيلة خلينا نقول قال بيي فاللي معو الورقة المكتوب عليها بيي بيصير في عشر دود فين (معروف وين فين ما في داعي وضح ) فتصورو انتو بكرا ساءلينكن مين سطلكن تقلولن هاني ويروح ما يخلو دودة بالعالم ما يحطوها فيني بترضوها انتو في لعبة تانية كنا نلعبا اسما جلاد حرامي هاي حلوة مشان البنات يا لطيف قديش متمنى العبا مع شي بنت باخوية هاي اللعبة بيلعبوها اربعة وفي اربع ورقات وحدة مكتوب عليها مفتش ووحدة جلاد ووحدة حرامي ووحدة ملك هلأ كمان بيضبوهن وكل واحد بيسحب وحدة هلأ اللي بيطلعلو ورقة الملك بيقول انا الملك واللي بيطلعلو المفتش بيقول انا المفتش بيكون الملك قلو يا مفتش فتش عالحرامي (هيك شوف العياط بالصف وكل العالم عم تعيط يا مفتش فتش على الحرامي ومنفيق الانسة كنا :lol: ) المهم هادا المفتش شو بدو يساوي بدو ينقي واحد من هالشخصين انو هوي الحرامي اذا نقى الحرامي الصح فالملك بيقلو للجلاد انو ضروب الحرامي (مو بالعكس متل ما بيصير بالحياة العادية الرئيس بيقلو للحرامي (معروف مينو ) ضربو للجلاد(كمان معروف مينو ) ) عدد محدد من المساطر على ايدو بقوي (هون حلاوة البنات باللعبة اذا كانو هني الحرامية ههههه) اي والله وتسمع طرق المساطر على الايدين يرج المدرسة والشاطر اللي يقوي للتاني اكتر هلا اذا المفتش ما سمى الحرامي الصح هوي اللي بياكل القتلة اما ايام اي والله بس مع هيك اسعتني مصرّ انو لو طالع على الكراج بدال المدرسة احسنلي (لانو انا كنت الحرامي على طول وانا كنت اكل القتل هههههههه) اي اي والله ما بزل عليكن بحرف هيك صار وحياتكن على الغوالي عم قلكن ولو شو عم نبيع فجل نحنا هون لك عم قلكن عنجد يللا خلص روح لعاب انتي ويا بعيد من هون حياكون :D |
ذكرتيني بلعبة كنا بنلعبها انا واختي واختي وخييي.لعبة الملك والجنود .كان كل شخص فينا عندو صحن فيه شوكولا وبونبونات الخ.. الخ...وكان خيي دايما بياخد دور الملك.مشان يكون دايما معزوم عند جنودو ياكل اكلهم اللي بالصحن ويخبي اكلو:p هوي الملك اللي لازم يعزم الجنود او الجنود اللي يعزمو الملك:? اي دنيا:pos: الله يرحم ايام زمان
وتحششنا يا امبارح صرت بعيد ارجع حياك خييي حياك دوز بخير |
هلأ في احدى السهرات مع الشباب طبعا كلكن هلأ صرت تعرفو كيف بتكون الاجواء بهيك سهرات يعني ما في داعي ارجع عيد انو الجو الضبابي والغيم اللي بالسقف ومطرة خفيفة وفشت فشت
فبينط واحد من هالشبيحة اللي ما عندن كبير وبيقول يا شباب بدي اسال سؤال مين بيحشش اكتر الشعب او الحكام والمسؤولين (بغض النظر عن المسؤولين والحكام يعني ان كانو حكام عرب او اعاجم او مسؤولين عن شركة طيران او مسؤولين عن الدكانة الصغيرة اللي كان يروح حنا يسكر عندا ويصور بنت الجيران او مسؤولين عن دكانة كبيرة لتوزيع البضاعة على الشعب )؟ وبيبلش كل واحد من الشباب يدلو بدلوو مع شوية حزر يعني بتعرف انتي هادا الحزر كيف بيكون وقت الواحد بيضعف صوتو وما بيكون عم يسترجي يرفع راسو بس عينو عم تفتل هون وهون خايفة من شي اخو شليتة يكون عم يسجل حكي ويروحو يطقلو برغي فكان من ضمن النقاش اراء يعني طبعا شو بدو يكون في يعني كلمة نقاش لازم تفهم لحالك انو في اراء ومختلفة كمان مو بس اراء فواحد تنين تلاتة او اكتر شوي قالو الشعب هني اللي بيحششو انو معقولة ولو شفت بحياتك حاكم بيحشش الحاكم عندو اجتماعات عندو طلعات فوتات صبحيات قهوات يعني مو معقولة يقعد يحشش كبيرة كتير بتصير واربعة خمسة ستة يعني واكتر حبتين تلاتة (حبتين عدس لا يروح فكرك لشي حبة فاصوليا لاء يعني حبتين عدس بيفو بالمطلوب ) قالو انو الحكام هني المحششين اصلا هني ملوك التحشيش قبل ما يكونو ملوك الكراسي او ملوك البلد او ملوك الطوائف او ذكريات الزمن القادم او عصر الجنون هلأ وفي محسوبكن طلع بفكرة تانية انو التنين محششين اكتر من بعض يعني الحاكم يحشش مشان ينسى شو عم يعملو بهالشعب اي قليلة شو عم يعمل بهالشعب عم يفتحلو الطرقات ويعمرلو المدارس وعم يعطي مصاري كب يعني تصور لو مانو عم يحشش معقولة كان لهلأ اسعتو عم يقدر ينام او يطلع على التلفزيون ابتسامتو واصلة لصبيان ادني والشعب كمان عم يحشش مشان ينسى شو عم يعمل الحاكم في يعني كمان معقولة بتلاقيها انتي بعد كل شي عم يعملو الحاكم في يروح هوي على شغلو ضحكتو معباي الدنيا وبيشتغل من تم ساكت واخر الشي بيعمل عرس لما بيقبض راتبو فهلأ شو طلع معانا ؟ انو الحاكم بيحشش مشان ينسى والشعب بيحشش مشان ينسى اي وشو يعني اي انا بعرف شو يعني يعني لف هالسيرة انتي ويا لانو اخوية الها ادان متل ما لفينا نحنا والشباب لانو الحيطان الها ادان وعلى سيرة الحيطان والادان اليوم سمعت نكتة حلوة قال ليش الغواصين ما بيحكو مع بعضن تحت المي ؟ لانو الحيتان الها ادان خخخخخخخخ بايخة بعرف بس مشان نسكر على السيرة الفوقانية قبل ما يسكرو علينا باب التحشيش وووووو ........................ حياكون :D |
الله يرحمك هاني الهيئة اخدوك:adal:
بدي حشش بدالك على ما تيجي:cry: انو قربت جامعتي و مدرستي.يوفقنا ويوفقكم الله. الجامعة وعندي اصدقائي وزملائي فيها .بس المدرسة اللي يعين هي اول سنة .من هلء برسم شكل الاساتذة والزملاء.هل الشباب والصبايا راح يكونو ملتزمين بالدراسة لانهم دافعين من جيوبهم .او راح يكون شغب امتال الجامعة و التانوية وخصوصا التانوية.الله على الايام عدو بينا اوام واحنا مش حاسين:pos: الله يرحمك يا ايهاب توفيق ونفرح بعرسك:cry: ما علينا .انا هلء بسال نفسي اذا راح ادرس مع شلة دمها خفيف او تقيل.لانو اذا دمها تقيل هالشي راح يأتر على دراستي.واذا دمها خفيف بردو راح يأتر على دراستي:? يا سيدي المهم اتعود على الجو بسرعة  بس انتو ادعولي وافتكروني على قولة مصطفى قمر:cry: اشوفكم على خير لسا ما كملت تحشيشي عندي عجقة8) حشيشك يا نيرفانا نفذ دوزو بخير |
معلم الشحاطة البلاستيك أفضل من الطبية ... مشان ما تزحلق على وج المسبح
أهلين حشيش والله ................ |
لك هاني يا ريتك مخبرني من زمان مشان لعبة الجلاد حرامي ... يا لطييييييييف شو بحب اقتل انا :lol: ... كان دايما يطلعلي الجلاد " بسلخ من قلب ورب " او الملك " بطالب باشد العقوبات " :clap:
يعطيك العافية ابو الهن عالموضوع ... وبركي بس نستمخ شي نهار بنّزللنا تحشيشة صغيرة :p |
| الساعة بإيدك هلق يا سيدي 09:40 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون