أخوية - سفارة أخوية ب البحر الأحمر

سلامااااااااات ،
هذا احنا بعتنا مندوبنا الدائم بالأمم المتفرقة على البحر الأحمر يفتحلنا سفارة هونيك شي من قريبو يعني ، و اليكم تفاصيل الميشن !!

اي هذا كنت من فترة على آخر نفس -انا- ، و بعد مشاورات كثيرة لقيت احسن شي بعملو اطلعلي شي اسبوع على شرم الشيخ شغل تسالي و تصييف و تغيير جو و ريلاكسيشن ،

كان بفترتها عندي بيت عمي جايين استجمام كام يوم على القاهرة وسبقوني على شرم ، حصلتهم انا قعدت معهم تلات ايام وبعدها هني رجعو سوريا وكان المفترض ارجع انا القاهرة، بس بيني وبنك الجو بشرم كتييييييييييير مغيري ، وهذا الي صار يا حبيب ،..

هلق انا من فترة طويلة كل مرة بطلع شرم و بوشف الغواصين هني وناتعين هالإسطوانات على ضهرون ولابسين الشغلات التسالي هاي وهيك كنت انغري يعني و اتحمس ، و بقبل آخر طلعة رحت فعلا قلت يا اخي ما حدى احسن من حدى رح روح استأجر هدول المعدات و روح اعملي غطسة و على الله ..
اي المهم وقتها رحت وفهمت انو ما بينفع هيك من الباب للطاقة اغطس لازم تعمل كورسات و شغلات هيك يعني دورات بالغوص وبعدين بتاخد على اساسها شهادة بتمكنك من الغوص لاحقا بأي محل ، (في كذا مستوى للشهادات او على حسب شو بتدرس وعلى حسب شقد وقت الكورس و خبرتك ، بس بشكل عام الشهادتين المقبولات هني Open Water Diver و ال Advanced Open Water Diver ، فيك تشبهون بشهادة سواقة ، بس عاد شهادة سواقة تحت الميي هاهاهااها ، الأولى متل شهادة السواقة الخصوصي والتانية متل العمومي ، بال Open Water Diver .. بتقدر تغوص بأي محل بالعالم لعمق لا يتجاوز 18 متر (65قدم)، والتانية بتمكنك من الغوص لغاية 40 متر (وهوي الحد الأعظمي المسموح لأي غطاس يغطص ليه ، لأنو اعمق من هيك بتصير الغوص خطر جدا على الحياة لتفاصيل ما رح ادخل فيها هلق ، طبعا اخصائيين بيغطسو لكذا ميت متر، بس احنا عم نحكي عن الغوص العام هون .. ) ،

المهم يا سيدي طقينا اول كورسين و بعدها عملينا نص الكورس التالت تبع ال advanced بس عاد اضريت بآخر يوم ارجع للقاهرة كان جاي رفيقي لهون ، فما خلصتها فاضلي تلات غطسات متقدمين و بخلص الكورس التاني ، (انا بالنسبة الي الموضوع هوي آخد السيرتفيكيشن هاي منشان بوقت لاحق اقدر اغطس بأي محل من غير ما حدى يقلي هووووب ، وين طاحش ، مش اكتر لانو كعلميا او هيك ، الى حد كبير بتصير المواضيع لاحقا كلها خبرة وما كتير الجزء النظري لاحقا ليه اهمية ، اهم شي بالأول البيزك ، وبعدين بيصير الموضووع كتب بتقراها فبتعرف شو الوضع و بتاخد فكرة و بتغوص على الله هاهااها )

من الآخر هيك ، الغوص هذا شغلة فظيعة جدا جدا ، و بنصح ايتها حدى بيصحلو يعمل كام كورس ويشك بهال المحيط انو ما يقصر ، يعني شلون صايرة شعور جديد غير المشاعر التقليدية، (وخاصة انو تحت الميي بمساعد المعدات الي معك بتفقد وزنك ، بتصير بدون وزن متل رواد الفضاء ، بس الفرق انو بالفضاء مافي مقاومة بالميي في مقاومة مياه ، بس الشعور تبع الاجازبية والتنفس تحت الميي لا يقاوم ، كتير هيك شغلة تسالي يعني ..)

المهم بقبل آخر يوم عملنا غطستين اهم تنتين (بالنسبى الي لهلق) لانو كان المنطقة كتيييييير حلوي، ولانو غطست فيهم لعمق 27 متر ، بالوقت الي مش مسمحلي كان غير لل 18 بس لانو الإنستركتر الي معي كتييييييير حبابي ورهيبة فخلتني آخد راحتي ..

قبل بيوم كنت راجع جوعات و طلع لحظي السعيد بماك عم يعطو مع وجبة معينة المقاس الكبير كمية مائية ، فطرقنا الوجبة وطرقنا الكميرة، (كميرة للتصوير المائي يعني) ..

فبيوم الغطسات صورت كام صورة ، بس الفكرة انو الكميرة مافيها فلاش ++ تحت الميي كل ما يزيد الغطس بتروح الأولان (بتترشح الألوان مش بتغمق وانما بيقل التمايز فيها و بتميل كلها وفق خط لوني معين نحو الأزرق ، وهذا سبب انو المحيطات والبحار لونها ازرق على اخضر، مع انو المياه نفسها شفافة، بس لانو الضوء بس ينزل بالميي على الإنكسار والعمق بيصير يتشرح بطريقة معينة و بيصير يظهر كلو على انو ازرق .. بدرجات (طبعا كل عمق بيترشح درجات لونية معينة ، بس بشكل عام كلو بميل نحو الأزرق .. بالنهاي متل لمن تحط مرشح اصفر على ضوء ابيض فبيفضل الأزرق وهيك ..)

هدول الصور المرفقات صور اخدتون تحت الميي بمنطقة اسمها ال paradise "الجنّة"
وهيي عبارة عن جرف صخري عميق جدا ، (drift) ..
هيي مش احلى شيئ بشرم الشيخ طبعا ، في منقطة اسمها رأس محمد ، ومنطقة اسمها تيران ، هدوليك لسع احلى بكتيييييييييير ، بس هونيك في تيارات مائية قوية ، و يوميها ما كان فينا نروح هونيك ، فنزلنا بمنطقة الجنة ، و منطقة اسمها "حائط القرش" المفروض انو قال فيها اسماك قرش كتير ، بس عمليا مافيها او لمن كنا ما شفنا ولا سمكة قرش ..

بترككم مع الصور ........

هاي الصورة للبوت الي كان معنا يوم الغوص، وهاي اول ما نزلنا بالميي كنا جروب شي 10-15 و كان معنا جروب ياباني شي 5 رهيبييييييين ، كل واحد ناتعلك معو تلات اربع كميرات مائية من النوع الي يعني ما طبيعي

هاي الصورة لشيئ اسمو ال bluespotted stingray وهي سامة بتلدغ

الي هيي
هاي

* الصورة التانيي مش بكميرتي صورة للتوضيح فقط ، :gem: -توضيح خطورة الموقف هاهاها-

هذا انا هون و كانت عم شوف سمكة اسمها سمكة العقرب (مش طالعة بالصورة لأنها بضهري) ، و بعدين لمن عم بتصورني الإنستركتر الي معي بالغلط انا رجت شوي لورا من غير ما حس فهجمت عليي وطلعتني لقدام وو بختني .. كان السمكة هاي سمكة العقرب (سمكة ليها اشواك او ابر هيك حواليه سامة) قال كان على شوي ور تلدغني ، بس انا اساسا ما عرفان انو هاي سمكة ضارة ، بس تسالي ..

هاي هون كنا كتييير عميقين حوالي 70 قدم،

هلق تحت على عمق 60-70 قدم اجتنا سلحفات كبيرة كتير كان طولها حوالي متر وشوي ، من نوع Green Sea turtle وهوي نسبيا اكبر سلاحف الميي .. كانت سحلفات رهيبة ، وخاصة لمن يكون عندك انطباع انو السلحفاة بطيئة و فجأة بالميي تلاقيها اسرع منك وما عم تقدر تلحقها :lol:
السلحفاة سحبت لتحت و لحقناها كلنا ، بعدين مدري وين زحلت بين الجروف المرجانية فما قدرنا نحصلها ..

هاي الباقي شوية صور منوعة يمين وشمال ..

هذا أنا ، هاي الإشارة باليد هيك بالطريقة الي عاملها تعني انو Okay انا اوكي ، كلو تمام عندي ، بالمناسبة في لغة خاصة باليد لتحت الميي لانو طبعا مافيك تحكي ، هاهاهاهاها .. هيي نفس لغة اليد العسكرية بس بشوية تحويرات (لأنو بالاساس معظم تقنيات و علوم الغوص هيي من اعداد ال U.S. NAVY الجيش و البحرية (الإسطول) الأمريكية ومعظم القوانين الرياضية والجداول تبع مدد السماح بالغطس و مستويات النيتروجين بالجسم على كل عمق و الوقت المصرح وهيك .. معظمها ان لم يكن كلها من شغلون ، هني كانو بالأصل عاملين هال العلوم للإستخدام العسكري ، وبعدها امتد للشعب وصار في منظمات مستقلة للغوص فإشتقت كل علومها من الي كان قد اعدو سابقا الجيد الأمريكي وهيك .. )

نراكم في حلاقات لاحقة من تغطيات فعاليات سفارتنا بالبحر الاحمر .. :clap: