سوريا الغد...
 

اليوم محسوبكون اجا ولبس تيابو وجهز حالو هيك طالع من البيت, قلت لافتح التلفزيون انا وعم اشرب الكولاي (حاكم رحت على مكدانلدز, واشتريت تشيزبرغر, وجبت معها كولا لارج, قمت انصدمت بحجما, وما عاد خلصت معي)
المهم
شغلت هالتلفزيون.
واذ بلاقي مسرحية ضيعة تشرين (لمحمد الماغوط, بطولة دريد لحام) طالعة على محطة قطر, قمت قعدت لاحضرها, وانا عم اتحسر على بلدنا. (على فكرة هاي مرة اول بشوف المسرحية هاي)
بعض من الكلمات اللي هيك لفتتني قالوها بالمسرحية.
صار في بالضيعة سجون اكتر من مافي مدارس.
صار في لكل مواطن سجن, بالوقت اللي في الاف الولاد بالشوارع مالهون مدارس.


كان في وحدة عم تكتب على الهوا. اجا "غوار" قلا, شو عم تكتبي.
قالتلو تاريخ ضيعتنا. قلا ليش عالهوا, اكتبيه هالورق.
قالتلو بخاف يغيروه
بعد شوي تفشكل بكلمة, قلا بنصحك تكتبي هالتاريخ على ورق احسن ما تجي نسمة هوا واتطيرو.

تاريخنا نسمة هوا بتطيرو. صحيح, بس ليش؟؟

ابو النار (يمكن هيك اسمو) غير محلو من محل لبيع الكتب, لمقهى. لانو صار اللي بيفتح كتاب وبيقرا. ينحط بسجون.

اجا مختار الضيعة علق الشعب ببعضو, مشان ينسو موضوع بستان مدري شو.
والشعب عملوها. ما قصرو.


هلق باخر المسلسل. اجا قال مختار جديد من بين الشعب وبحب الشعب والشعب بحبو. ومتل ما بقولو حرر الارض. والشعب انبسط وبلش يحتفل. هون طلع اسم المسرحية. "ضيعة تشرين" وذكرو بالاخر انو متل هون صار بحرب تشرين التحريرية.


هلق هون انا انصدمت.
ما بعرف شو كان الوضع قبل تشرين اللي بسموها "تحريرية".
بس بعرف الوضع هلق.
المخابرات وين ما كان.
الواحد بيرجع على بلدو من الغربة. بخاف ما ينشحط. واولها واخرها بينشحط.
المثقفين بالسجون. الواحد بيحكي كلمة بشوف متل ما سموه بالمسرحية فلم "نجوم الضهر".
الارض ما زالت محتلة, والوعود لساتا قائمة.
الشعب مو طايق "المختار" بس مسكر بوزو. و"المختار" مو مدور عالعشب.

طبعا مع الاسف ما انذكر شي بالمسرحية عن مساعدين هالمختار "المسؤولين".

بس المهم, انو ليش هيك؟؟
يعني نحن الشعب السوري لازم نضل محكومين من قبل عيلة الضباع, عفوا الاسد؟؟
ليش بلدنا دايما باخر ترتيب مع انو شعبنا بيطلع معو كتير. واكبر دليل انو عم يأبدع ببلاد برا.
انو ليش انا مجبور كون برات بلدي. بالوقت اللي مكاني المزبوط جواتا. (وطبعا هون عم قول مجبور, لاني بالفعل مجبور).
انو لك ليش كل ما بشوف شغلة هون باميركا. بقول لك يا ريتا لو كانت موجودة ببلدي. لو موجودة شو كان صار؟؟ مين كانت ضرت؟؟
لك ليش الواحد صار على شوي رح يكره بلدو من ورا اوبة هالحرامية اللي ماسكينها وعم يلعنو بربا؟؟


بعد ما خلصت المسرحية, خطر على بالي غنية "بكتب اسمك يا بلادي, عالشمس الما بتغيب, لا مالي ولا ولادي على حبك مافي حبيب"

والله غضب عليي وقلبت على محطة سوريا. وهون محطة سوريا متل عادتها, كانت حاطة ناس عم تقرا الاوضاع الداخلية والخارجية الراهنة باسخف الطرق. سبيت كام مسبة على سوريا. وزتيت جهاز التحكم وطلعت من البيت.

ايمت بدها ترجع بلدنا متل العالم والناس؟ وايمت بدنا نخلص من هالوسخ اللي ماسك البلد؟ وايمت بدنا نشوف سوريا المستقبل, سوريا الغد؟؟ لانو سوريا الحاضر قرف.

على فكرة موضوعك سخيف وبايخ..........:pos: :pos:
والي بيقرا طريقتك بالحكي عن غربتك بيعرف انك عم تسلبها.......
واذا كنت لهلق ماشفت مسرحية متل هي للماغوط ودريد لحام وانت سوري ....هذا بيدل على ثقافتك واهتماماتك المضمحلة......:frown: :frown:
وشو هالحقد هاد البلد ومن ايمتى كنا نجرجر الناس عالمخابرات الا اذا كانوا مجرمين؟؟؟؟؟؟؟؟؟؟؟
لو كل بني ادم ماشي بالشارع بادبه جرجرته المخابرات.....لكان مافي حدا بالبلد هلق؟؟؟؟؟؟:p :p
بقى بدال ماتاكل عند الماكدونالدز روح جيب مسرحيات غربة وشقائق النعمان وشوفهم بركي بتتثقف شوي...
:ss: :ss: :ss: :ss: :ss: :ss: :ss: :ss: :ss:

لا يخزي العين عنك من كتابتك مبين عليك مثقف وبحقلك تحكي عن الثقافة.

لا ما بدي شوف شي, الله يخليك علمني انت.

والله بس ترجع من المريخ زكرني قللكـ ..

صحي .. ؟؟ سكان المريخ بني آدمين ؟


سؤال يطرح نفسو .

السؤال اللي بيطرح نفسو هل انتو بني ادمين؟؟

ناقش بالموضوع يا....... "بني ادم"
لا تناقش بشي تاني

الوضع كان انو كانت العالم عايشي بأمان الله , صراعات طائفية اقل من هلق بكتير وكانت الاحزاب المتطرفة معيشي البلد يعني كيف بليلة وضحاها عملو هالأحزاب خوينة مع انو هني نفسون كانو عايشين على بركتون ( بلا ذكر اسماء احزاب انتو فهمتو لحلكن)
بالنسبة لبعد (التحريرية) كانت تحريرية لربع الشعب و وتلت الرباع التاني صفا بالمعتقل متل ما قلت انت
الارض المحتلة نساها ... باعوها
المختار ( مسير وليس مخير ) يعني الشباب مو مقصرين فيه عم يسوقوه منيح ;-)

ما بينفع مو " الاسد للأبد "

يلي برا صارو اذا بتصير جنة ما بيرجعو غير للصيف و المناظر يلي من خلقة الله و مو من خلقة الشبيحة

موضوع مميز واكيد الي رجعا

( رح اطلع عن الموضوع الاساسي لحظة)
معليش willi بتمنى انو ما تتدايق اذا رديت عليه عنك بهالنقطة هي
معليش ما فيك تتهم شخص هيك اتهام شو الشغلة بحجم مشاهداتك بعدين بصراحة لما تشوف شخص بعمر willi واذا فتت عالمواضيع اللي بيكتبها باخوية بتلاحظ قديش هوي بيتمتع بثقافة كبيرة مقارنة مع كتير شباب من عمرو
واكبر منو حتى وبصراحة انا كتير تفاجأت بثقافتو مقارنة مع عمرو وبقدملو تحياتي
حتى ولو كنت بختلف معو ببعض وجهات نظر(وخاصة بذوقنا الرياضي:lol: )الا انو ما بيجوز الا انو نحترم الاخر
............
وهلق نعود عالموضوع الاساسي
ما في شي سهل لا اللي بالبلد مرتاحين كتير ولا اللي برا
الدني بدا كتير تضحيات لنقدر نعيشها ونقدر نطور بلدنا بس بدك مين يضحي:D

والله يا اخي المريخي اذا كانو كل البني ادمين متلك ...فانا اعترف انني مو مني ادم........:larg:
لح اعترف انا عندي تلت رجلين واربع عيون ...اما الاخ موسيقار فعنده سبع ايدين وتلت اذان.....
ونحن الاتنين واصلين للتعليم الابتدائي........:shock:
بس نسيت اسالك يا مشخصاطي: هلق الماكدونالدز وصل عالمريخ.؟؟؟؟؟؟؟
وعذرا من الاخ الموسيقار اذا تجاوزت...بس ياريت تسمعه شي لحن لاخونا الاكابر............
ومعلش حبيبي انا مالي فهمان ليش هيك كتير ارفان من سوريا والسوريين لهالدرجة وكاننا ساكنين بمزبلة؟؟؟؟
اذا كتير ارفان يا ريت تضل بالمريخ وانا بوعدك لما نترقى لدرجة البشر ببقى انا براسي بندهلك بس ياريت ماتسمعنا صوتك الشجي لوقتها.......:p
:melody: :melody: :melody: :melody: :melody: :melody: :melody: :melody: :melody:

كيف يعني نضحي ؟ اخد مسدس 9 ميل وروح حرر الجولان؟
روح عبلدي عيش عالدين والفشل؟
روح عبلدي احكي شغلة روح عالسجن مشانا ولو كانت نكتة؟
....
مشان الله حاج تبيعو وطنيات :D

بوجود امثالك بتعمر :D

لاانا ما ببيع وطنيات
انا ببيع بطيخ
التضحية اللي قصدتها هي تضحية المسؤولين بكراسيهم لاشخاص اكفأ منهم ولهيك كتبت بآخر ردي بدك مين يضحي
وصلت:D

ما كان فيك تطولو اكتر من هيك للموضوع !! ... ابدا ما طلعت عيوني وانا عم اقراه :lol:

الله واعلم ... بس يمكن مو على عمري وعمرك :pos:


صحي ملاحظة ... شباب يا ريت للي بدّو يرد يكون ردو ضمن حدود النقاش، باحترام وبدون اهانة او اتباع الاسلوب الاستفزازي لأي عضو ...
يعني هيك حبيت حطها ملاحظة حالياً لحتى ما تتطور الامور وتصير اجراءات اخرى ... ;-)

اي عيش يا كديش

بترجع سوريا وقت يصحى هالشعب من غطرسة البعث وعيله آل ضباع

بس يا حسرة يا غالي من بعد يلي اسمها الحركة البطيخية (( التصحيحة )) برمجونا متل تبع هش هش تعا تعا

المشكلة فينا انو تربينا على الجبن وكل واحد عم يمشي الستر الستر ويئول يا رب الحيط

كل كوم وتحت شعار شفتو بالمنتدى اذا الشعب يوما" أراد الحياة .. بقاءه مع البعث حتى الممات ... وأبرة بنج تعيد السبات ...

بس متل ما بيئولو مافي شجرة وصلت لعند ربها

تحياتي المعطرة :D

انت من اللي تبرمجو ونزلك برنامج البطيخ مافي حل غير تعمل فورمات
بتحكي عن المجرمين بأفرع المخابرات بس ما تنسى المثقفين والمبدعين والطلاب ( هدول بنظرك وبنظر النظام مجرمين ) وماتنسا التهم الموجودة عندك 21مليون تهمة بالأفرع جاهزة الك ولا غيرك

له له له له ياجمعة الخير ليش هيك عبتكو معو


المسكين ماقل إنو عبشر كولاته خلو ليخلص بعدين احكو

بركي طلع معو احسن:melody:

أنو معلش ..

يا ريت .. لو بتشوفي الموضوع من كل الزوايا ديموزيل ..

هاد شكلو شكل واحد بدو ... يوصل لسوريا الغد ؟

هادا بيوصل .. لصوت الشباب .. وما بيعلق معو ..

أنتي معارضة .. بس في ناس شايفين أنو الأمور عم تمشي ..

ليش التحيز ؟

هلق بعيدا عن الجرابيع.



طيب ليش بدهون يضحو؟؟
عايشين عيشة ملوك.
الواحد اذا حط عينو بعينون بيقلعولو ياها.
وما حدا عم يحكيهون, عين الله عليهون.

وانا كنت ظن انو بس يموت الكبير, رح يمشي الحال.
قام اجا اللي بعدو.
واذا الحالة هيك, مين بيعرف. الشبل بيكبر, وبياخد محل الوالد العظيم, اللي بصير قائد خالد.
والمسؤول الحرامي, بيجي محلو حرامي اكبر منو.

وليش لاء؟
مرتاحين وعين الله عليهون.