أخوية

أخوية (http://www.akhawia.net/forum.php)
-   أخوية الإقتصاديّة العامة (http://www.akhawia.net/forumdisplay.php?f=33)
-   -   العلاقات العامة (http://www.akhawia.net/showthread.php?t=83928)

Syrian Gay 22/10/2007 15:21

العلاقات العامة
 
العلاقات العامة Public Relations:

تعريفا: هي جهود إدارية مخططة بشان تعزز وتوصّل تفاهم بين المنشأة والجمهور , أو بمعنى تاني هي نشاط متل (صناعة – هيئة – حكومة – مهنة) بتنشئ وتعزز علاقات منيحة بينا وبين جمهورا متل (عملاء – مساهمين – موظفين – جمهور عام).

يعني هي مو بس بتكون بعلاقات المنظمة مع جمهورا الخارجية (عملاء – جمهور خارجي ..) بل بتكون كمان بعلاقات مع جمهورا الداخلي كمان (موظفين ..).




أهداف العلاقات العامة Objectives of P.R:

صارت العلاقات العامة مؤخراً وظيفة من الوظايف الإدارية اللي بتتمارس بكافة المستويات الإدارية بالمنظمة أو المنشأة .. وأهم أهدافا هي:

1.بتعرف جمهورا بأهدافا وسياساتا ومنتجاتا من السلع والخدمات وهلشغلات ..

2.بتقول للإدارات العليا (متل المدير العام) عن اتجاهات الجمهور وعن أراء الجمهور بالمنشأة.

3.بتساهم وبتعمل على انو تنهي المشاكل الداخلية بالمنظمة أو المنشأة وتحاول تتخطى الاسباب المؤدية لهل العرقلة .

4.بتحاول تقنع الجمهور وتحاول ترضيهون بنشاطات المنظمة وخدماتا وسلعا ومنتجاتا ..

5.بتنصح وبترشد الإدارة بأتخاذ القرارات المنيحة وبوضع السياسات السليمة.

يتبع ..

Syrian Gay 22/10/2007 16:55

مبادئ العلاقات العامة Principles of P.R:

باعتبار وسائل الاتصال بتأثر بشكل كبير على الجمهور فصار لازم ينحط ضوابط على أنشطة العلاقات العامة , أهم هالمبادئ هي :
  • المسؤولية الاجتماعية: بالنظريات الإدارية الحديثة بتقول انو المنظمة هي نظام مفتوح مع البيئة الخارجية اللي حولا فبتتأثر فيا وبتأثر عليا . بشان هيك في مسؤوليات بتكون على المنظمة بتتعلق بالمجتمع يللي بتعيش فيه. وما رح نفوت بموضوع المسؤوليات لأنو موضوع كبير ورح نضيع فيه.
  • احترام رأي الفرد: لازم ترتكز شغل العلاقات العامة على مبدأ انو تحترم قيمة الفرد وحقوقو الاساسية اللي نص عليا القانون, ولازم تراعي واجبات الفرد ومسؤولياتو بالمجتمع. لأن (الإيمان بالشيء هو خير دافع للاهتمام به).
  • عدم إخفاء المعلومات عن الجمهور: اذا الواحد خفا المعلومات عن الجمهور بيصير في شك من جهة الجمهور وبتفسح المجال للشائعات وبيصير في عدم ثقة بين المنظمة والجمهور . بشان هيك لازم عل العلاقات العامة انو تكشف كل المعلومات اللي يريدا الجمهور بس كمان لازم تنتبه أو بشكل أفصح لازم تأخذ بعين الاعتبار ضرورة عدم البوح بأسرار العمل وهالشي بيضر بمصلحة المنظمة قدام المنافسين.
  • الالتزام بمبادئ الأخلاق السليمة: بتقول فلسفة العلاقات العامة انو لازم المنظمة تلتزم بمبادئ الأخلاق الكريمة متل النزاهة والصدق والعدالة. هيك فهي ما عم تضحك عل الجمهور ولا تغشوا بل عم تقوم بكسب ثقتوا بالشغلات المنيحة مو بالأقوال بس.
  • إتباع الأساليب العلمية في البحوث: أهم وظيفة من وظايف العلاقات العامة انو تجري بحوث وتقيس اتجاهات الرأي العام لجمهور المنظمة. فهون لازم على موظفي العلاقات العامة انو يبعدوا عن التحيز الشخصي لشخص معين ولازم يتصفوا بالموضوعية بعملية إجراء البحث بشان يوصلوا للنتايج المزبوطة.
  • العلاقات العامة تبدأ من البيئة الخارجية: بشان المنظمة تحقق أهدافا لازم يكونوا الموظفين يعرفوا اهداف المنظمة منيح ولازم يعرفوا دورون فيا . لأن المنظمة بيصير أداءا أحسن إذا كان موظفينا بيعرفوا ولو شوي بإنجازات ومشاكل المنظمة. فالعلاقات العامة بيتجه مسارا من الداخل للخارج يعني للجمهور الخارجية, بشان هيك لازم يصير اهتمام بالموظفين والحصول على تعزيزون وتاييدون لأدارة المنظمة وسياساتا.

يتبع ..


Syrian Gay 22/10/2007 23:07

مجالات العلاقات العامة :

بتفوت العلاقات العامة بعدة مجالات رح قول اهما :
  • المجال السياسي: بيكون على مستوى الأحزاب السياسية والسياسيين وخصوصي بالدول يللي بتأخد بالنظام الحزبي إن كان حزب حاكم أو تعدد الأحزاب السياسية, وبيكون للعلاقات العامة هون دور كبير بشان تجذب العالم أو الجمهور وبتأثر عليا بشان تكسب تأييدون وأصواتون بالانتخابات , يعني هون العلاقات العامة هي حلقة وصل بين السياسيين والجمهور.
  • مجال الوزارات والدوائر الحكومية: هون بتقوم العلاقات العامة لتوعية الجمهور وارشادون عن طريق شرح وتفسير القوانين والأنظمة بشان تكسب تأييد الجمهور للسياسات والقوانين الحكومية.
  • مجال الإدارة المحلية: هون العلاقات العامة تلعب دور كبير بلشغلات المتعلقة بالشؤون البلدية والمجالس المحلية واللي تديرا مجالس بلدية أو محلية.
  • مجال المؤسسات العامة: هللا المؤسسات العامة تعتبر أجهزة إدارية بتتمتع باستقلال إداري ومالي. ولما بيكون عددا كبير بالدولة هادا بيدل على انو الدولة فيا توسع بأنشطتا الإنتاجية والخدمية والاجتماعية بشان تواجه العصر الحديث.
  • مجال القطاع الخاص: وبيشمل كل المؤسسات لخاصة وشركات الأشخاص وشركات الأموال الموجودة بالبلد وبيكون دور العلاقات العامة هون بأنو بيقوم بعلاقات منيحة مع المستهلكين والموظفين والموردين والمؤسسات المالية والخ.. وهون لا ننسى انو نستعمل الصدق والأمانة بشان نكسب ثقة الجمهور.
  • المجال التعاوني: وبيشمل مجال الجمعيات التعاونية يللي بتقدم الخدمات لأعضائها بسعر التكلفة وبلا ربح , وبيكون دور العلاقات العامة هون انو بتخلي الأعضاء بهل الجمعيات انها تضل بالجمعية وانو تعرف متطلباتون ونوعية الخدمة وجودها وهلشغلات..
يتبع ..

Syrian Gay 22/10/2007 23:18

2 ملف مرفق .
هياكل تنظيمية :

في كتير هياكل تنظيمية ممكن تنرسم ..

وكل هيكل على حسب طبيعة المنظمة أو المنشأة ..

وبهل الرسمتين يللي رسمتلكون ياهون بينت وين دور العلاقات العامة بالمنظمات ويمكن كتير منكون بيجهل أهمية العلاقات العامة ..














وهيك بيكون خلصت شرحي لـ العلاقات العامة ..
ياريت يكون فهمتوا شو هي العلاقات العامة وأهميتا ..

:D

nada22 24/10/2007 22:24

تسلم ايدك
وشكرررررررررررررررررررررر رررررا

Syrian Gay 24/10/2007 22:32

اقتباس:

كاتب النص الأصلي : nada22 (مشاركة 797318)
تسلم ايدك
وشكرررررررررررررررررررررر رررررا

انو استغربت اول شي عل الرد ..

انو ما توقعت حدا يفهم شي من هالموضوع مع انو حاولت قديش ما فيني أبسطو ..

وانو غير المختصين بهل المجال ما رح يلفت نظرون الموضوع ..

قام انا الحشري :pos: طلعت عبروفايلك لشوف شو القصة ..

قام شفت :

اقتباس:

شغلتك بالحياة:طالبه علوم اداريه
قام قلت: اهااااااا :lol:

فـ اهلين زميلة .. ويا ريت يكون استفدتي ..

ندى
:D

sweetbaby 28/10/2007 02:53

روعة الموضوع رامي ومهم كتيير...
وبعدين انا فهمتو:pos:
مخي اقتصادي انا:gem:

:D:Dميرسي عالموضوع

Syrian Gay 28/10/2007 17:07

اقتباس:

كاتب النص الأصلي : sweetbaby (مشاركة 800390)
روعة الموضوع رامي ومهم كتيير...
وبعدين انا فهمتو:pos:
مخي اقتصادي انا:gem:

:D:Dميرسي عالموضوع

اي طبعاً مهم بس مو عنا بدول العالم التالت .. هالمجال شوي عنا محدود ..

عندكون بأميركا قوي كتييير وبيصرفوا عليه نص عائدات الشركات من الأرباح

ودخيلك مخك انا ما احلاه وما اطيبو :p

:D

nada22 29/10/2007 02:10


قام قلت: اهااااااا :lol:

فـ اهلين زميلة .. ويا ريت يكون استفدتي ..

ندى :D[/quote]
ايوه عشان هيك فهمت موضوعك ميرسي ليك:shock:

sweetbaby 29/10/2007 03:08

اقتباس:

كاتب النص الأصلي : Syrian Gay (مشاركة 800771)
اي طبعاً مهم بس مو عنا بدول العالم التالت .. هالمجال شوي عنا محدود ..

عندكون بأميركا قوي كتييير وبيصرفوا عليه نص عائدات الشركات من الأرباح

ودخيلك مخك انا ما احلاه وما اطيبو :p

:D

معك حئ
وعنجد المجال هاد من اهم المجالات هوووون
وميرسي ع الموضوع مرة تانية:D

alshuaibi 11/02/2008 09:08

مشكككككوووووورررر


الساعة بإيدك هلق يا سيدي 08:13 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.03452 seconds with 11 queries