|
هل للجولان ثمن؟
بت اتساءل ...الان بوادر مفاوضات علنية بين سوريا واسرائيل!!
مفاوضات عن تبادل الجولان مقابل شيئا ما!!! السؤال الذي يلمع بمخيلتي هو ...ماهو هذا الثمن؟ سوريا منذ الازل عدو اسرائيل وامريكا ... وقفت سوريا لاول مرة في خندق الشعب ...اهو رغما عنها ام انه اختيار الحكومة ؟ الان سوريا بين مفترق طرق...ولدينا هذه المتغيرات... سوريا تريد الجولان.... اسرائيل تريد سلام بالمنطقة...واي سلام؟ السلام عند اسرائيل هو تدمير حماس وحزب الله ومعروف ان هذين الفصيلين لهما علاقات وطيدة مع الحكومة السورية....هناك اسئلة عديدة تحتاج لاجابات هل لاغتيال عماد مغنية دخل بالموضوع؟ ماتأثير السلام مع اسرائيل في ظل المعاهدة الامنية مع ايران التي تتبادل جمل "ازالة عن الوجود" مع اسرائيل؟ هل تقبل سوريا مقايضة مبادئها في هذه الصفقة؟ هل بدأ العد التنازلي في نظام الحكم السوري؟ كل هذه الاسئلة واسئلة عديدة تحيط بمياه سوريا العكرة هذه الايام... ترى هل تساعدوني في حل طلاسم هذا اللغز؟ |
ما بعتدق بعد كل هالسنين سوريا رح تاخد الجولان ناقص أو بمقابل سوريا ما بتريده ..
سوريا حملت على مسؤوليتها الكتير من حركات المقاومة الوطنية لعدد من الدول ( لبنان - العراق - فلسطين ) وشو أجاها منهم ؟ ولا شي غير وجع الراس ما مننكر أنهم كانوا أوراق مفاوضات سورية بس هالشي أنعكس على الشعب . هلأ اذا بتسأل أي مواطن شو بتريد من الحكومة بيقلك .. عيشة كريمة و هالعيشة الكريمة ( بالوقت الحالي ) ما رح تتحقق ألا بحال تم السلام بالمنطقة وأتجهت اهتمامات الحكومة من الخارجية الدولية إلى الداخل و المواطن ما بعتقد أنو أغتيال مغنية ألو علاقة بالموضوع ... و حتى كمان جملتك بأنو اقتباس:
أما الشي الوحيد الي بيخلي الواحد يفكر و يحذر من هالسلام ( المفترض ) هو العلاقة السورية الإيرانية و لوين عم تتجه و شكراً على هالموضوع القابل للنقاش الواسع و منتظر تعليقات الشباب |
اكيد النظام بدو هلق السلام اكتر من اي وقت مشان يخرج من عزلتو الدولية وحتى العربية جتى الاهم من هل الشي بالنسبة للنظام هو المحكمة الدولية بغض النظر ان كانت مسيسة او لأ هو بيعرف اذا ما سمع كلام الدول الكبيرة اكييد التحقيق حيتهم مسؤولين مهمين بالنظام
بس اذا صار سلام النظام حيخسر كتير لانو مستحيل ترجع الجولان كاملة مع بحيرة طبرية خلينا انكون واقعين والنظام تصريحاتو الاخيرة بطل يقول الجلوس مع الاسرائيلي على مبدأ الارض الكاملة مقابل السلام او يوضع شرط الارض مقابل السلام قبل الجلوس على طاولة المفاوضات وهي نقطة مهمة انو من سنة لهلق كل التصاريح عمتقول المفاوضات بدون شروط !! يعني اكيد في تنازل ولو صار في تنازل وصار سلام واتطور البلد والنظام بلش بتغير القوانين التعسفية والغى حالة الطوارئ واصلح قضائو ومؤسساتو وسمح باطلاق الاحزاب ان كانت وطنية او حتى لو كانت عميلة في صناديق اقتراع هي الي بتحدد وسمح بانتخابات حرة ونزيهة باشراف دولي اول مرة بس بعد هل الشي ما حدا حيزعل وكل الناس حتهتف باسمو اما اذا صار سلام وضل الوضع من اعتقالات وكبت ومحسوبيات وفساد ونهب الدولة فاكيد وضعو حيكون صعب والشعب هو الي حيطلع مظاهرات ويردد ويقول حاجتنا كذب هي رجعت الجولان ناقصة وهي ساويت سلام وما غيرت لانو قبل كان الذريعة انو عنا ارض محتلة بعد التحرير شو في حجج ؟! |
طبعا بتمنى من كل قلبي يصير سلام و يرجع الجولان... و تنتهي القصص اللي كان لازم تنتهي من زمان و اللي ما كانت سوريا أبدا مسؤولة عن عدم نهايتها...
بالنتيجة بلا وحدة صف بلا بطيخ.. على مر الـ40 سنة أو اكثر كل جهة عملت اللي اعتقدت انو بيناسبها دون الالتفات الى أي أمور اخرى... و اعتقد ما ننلام اذا عملنا نفس الشي.. اذا يرجع الجولان و يحلو عن ربنا خلص صلى الله و بارك.. أرضنا و تحررت و ما بدنا من حدا شي و لا حدا بدو منا شي.. أكيد ما راح نكون حبايب مع اسرائيل و لا نص باقي الدول "المطبّعة" هلأ و راح نستمر على دعمنا لحقوق الشعب الفلسطيني لكن مو على حساب حقوقنا كشعب سوري لأنو ماننا رهبان المنطقة نقتل حالنا كرمال الكل... صار وقت نكون أنانيين شوي متل ما غيرنا كان اناني بزمانو هاي النتيجة و المحصلة النهائية... و ساعتها ننتهي من الخطر الخارجي و نلتفت للداخل... تنتهي القبضة الأمنية و أحكام الطوارئ و كل هالقصص و تدريجيا ترجع الأمور الى مجراها الطبيعي و ترجع سوريا الى مكانها الطبيعي سياسيا و اجتماعيا و اقتصاديا... مانقول غير انشالله ربيع السنة الجاية نطلع رحلة على مجدل شمس... و نسبح ببحيرة طبرية.. ما ممنوع التمني ما هيك؟ تحية |
بعتقد المفاوضات مارح تكو نبهي السهولة
يعني مش من مصلحة سوريا توقع اتفاقية مفردة مع اسرائيل وتتخلى عن حلفاءها (حزب الله _ حماس_ ايران) وسوريا بتعرف تماما انو العدو ما بيحترم اتفاقيات ولامعاهدات وبامكانو خرق اي اتفاقية باي وقت لهيك مابتوقع سوريا توقع على معاهدة سلام تعيد الها الجولان بدون ما تكون عاملة حساباتها الاقليمية اما كيف بدها تعمل هالحسابات فما بعرف بالتحديد لهيك مابتوقع يكون السلام بهي البساطة وحاسة كانو الامر ما هو الا هدوء ماقبل العاصفة |
اقتباس:
أنا أطمح لسلام عادل وشامل في المنطقة ولكن الا يكون تحقيق السلام مبني على حرق اوراق شعوب أخرى الصيف صيف احتضار أحد ما ربما السلام |
اخواني ...
لم تكن سوريا في موضع اتهام ...انما كانت في موضع متميز عربيا لذلك سلطنا وسلط العالم كله الاضواء عليها... من يظن ان سوريا تضحي بحقوق شعبها من اجل شعوب اخرى اظن انه بعيد بعض الشئ عن الصحة... لان سوريا جرت للدخول في هذه الميمعة دون ان يكون لها "اختيار" بمعنى ان دخولها في مواجهة مع الكيان الصهيوني هو مواجهة جوار مثلها مثل الاردن ومصر... الجواب لهذا السؤال هل تريد سوريا ان تتخذ نفس اتجاه مصر والاردن لحل مع اسرائيل؟؟ وما رايك بحال شعوب هذه الدول ؟؟؟ لايختلف اثنان على ان حال الشعب العربي السوري هو افضل بمئة مرة من احوال الشعوب في مصر والاردن... اذا فخيار سوريا للمواجهة بدلا من اراقة ماء الوجه في النهاية صب لمصلحة الشعب وليس على حسابه...والواقع هو البرهان. |
اعتقد انه حتى ولو كانت اسرائيل جادة في اعطاء الجولان مقابل السلام فان الجولان لن يرجع لانو جماعتنا هون ما رح يقبلوا, كلنا بنعرف انو حجة هالنظام في ذبحنا و سلب حريتنا و نهب اموالنا واستمرار قانون الطوارئ كانت ومازالت بحجة الصمود ومواجهة اسرائيل وهالحكي الفاضي , فاذا صار سلام رسمي مع اسرائيل , بشو رح يتحججوا؟؟؟
|
اقتباس:
ليش هلق سوريا عمتواجه اسرائيل ؟!! من 1974 ما انطلقت رصاصة وحدة وين بقى هي المواجهة ؟؟ شكلك بتسمع اخبار الفضائية السورية الي بضل بتقول انو سوريا دولة المواجهة وسوريا بحالة حرب مع اسرائيل ؟!! انت يا اخي بتشوف انو سوريا عمتحارب اسرائيل ؟! بعدين مصر رجعت كل سيناء وما خليت شبر واحد وين المشكلة ؟ هاد امر واقع ما حدا بيحب اسرائيل وكلنا مع انو سوريا اتحارب اسرائيل بس وين هي الحرب ؟!! نحن بحالة هدنة صرلنا 35 سنة وتروات البلد عمتروح بحجة الحرب طيب وين هي الحرب ؟! حبيب خليك واقعي وفكر منيح وين مصلحة بلدك وشعبك ؟؟ انا براي اذا النظام لازم يا اما يحارب يا امي يوقع سلام باسرع وقت لانو مصر والاردن الي عمتحكي عنون للاسف صارو احسن منا بكتير !!! ما عنا خيار يا سلام يا حرب واذا شايف النظام انو ما بيقدر يحارب خلي يوقع سلام لانو مافي فايدة بالعكس كل ما اتاخرنا الظروف مو لصالحنا |
هذا تلاعُبٌ في المَسارات هذا نِفاقٌ سِياسي. فسر لي تزامن إعلانْ " أولمرت " بـِ تنازلهِ عن جولاننا مُقابل السَلام وَ إعلان الإدارة الأميركية عن وجود مُفاعل نووي في سوريا قصفته ُ إسرائيل السَنة الماضية. إنْ كانتْ تريد إسرائيل السَلام لا بُدَ من ثمن وَ ثمَنٌ كَبير - التنازل عن التحالف الاستراتيجي بينَ سوريا وَ إيران وَ حزب الله - ضبط الحركات المعارضة للكيان الاسرائيلي المُغتصب داخل فلسطين " سَحب يد سوريا عن المعادلة الداخلية الإسرائيلية " - التطبيع المباشر أو غير المباشر وإقامة علاقات إقتصادية وَ ثقافية بَينَ الحكومتين وَ الشَعبين إنَ إعلان الولايات المتحدة الأميركية عن وجود مُفاعل نووي في سوريا هوَ بمثابة الضغط على سوريا للموافقة على تلكَ التنازلات وَ إعطاء إسرائيل خيار آخر من شأنه إضفاء القوة لعرض " أولمرت " وليسَ الضعف كما يزعم المراقبون وَ المحللون السياسيون. مَودتي الخالصة نوار |
اقتباس:
|
اقتباس:
دخلك النظام الليبي بشو بيتحجج ليقضي على معارضيه ؟ كمان بالصمود ؟!!! يعني بكل شي لازم نحكي بنفس الاسلوب .. الجولان أرضنا . استعادتها بالمفاوضات انجاز للوطن .. طبعاً أكيد الصفقة ما رح تكون بالسهولة الي منتخيلها . والقيادة السورية غير مستعدة للمساومة بهالموضوع نهائياً وتوضح هالشي بكل المفاوضات السابقة. منتمنى تكون اسرائيل جادة بالمفاوضات ويتم السلام وفق مصالح سوريا . |
اكيد في للجولان ثمن ..
يعني اسرائيل ما بتفاوض على اعادة الجولان بدون ثمن .. وهالثمن رح يكون مقابل تدمير ايران وحزب الله والفصائل الفلسطينية .. وطردها من سوريا .. وحراسة للحدود السورية ... يلي اليوم الطير الطاير ما بقدر يدخل من سوريا لاسرائيل .. بس على ما اعتقد اعادة الجولان بالتفاوض والسلام .. صعب كثير .. خصوصا انو الشعب الاسرائيلي متعلق في الجولان كثير .. واولمرت ما بقدر يقرر لوحدة .. بس اذا صار سلام ورجعت الجولان ... رح اشعر بالسعادة والحزن في نفس الوقت .. بالسعادة لانو رجعت الجولان للشعب السوري الي من حقة يرجعها بأي طريقة .. وكمان بصير بامكاني اروح على سوريا مثل ما بدي .. وبالحزن .. لانو يتم التخلص من المقاومة العربية الوحدية .. حماس وحزب الله .. |
'طبعاإذا صار سلام ... معناتا أي اسرائيلي مسمحلو يدخل لسوريا ويشتري فيا أراضي ع كيفو ويفوت عوين ما بدو عأي مدينة .. أي ... خراب سوريا وتفشي الجواسيس عينك عينك ...
|
الشيئ الاكيد انو السلام اذا صار رح يكون ثمنو كاالتالي
1- الانسحاب من التحالف الايراني 2- تدمير حزب الله وحماس عن طريق سورية وطرد مكاتبهم من الارضي السورية 3- رضى اميركا على النظام الاسدي لكي يصبح ابديا في سوريا هو الحاكم الناهي 4- ان يعود الجولان دون بحيرة طبريا وطبعا سيكون الجولان بؤرة فساد ومنتجعات سياحية فاسدة ومكان تناول المشروبات الروحية والصحبة النسائية الاسرائيلية من الشبان السوريون ( ابشع بالف مرة من سيناء ) ما عدا الحشيش والمخدرات 5- واخيرا وليس اخرا هو اطلاق اميركا يد النظام لتدمير احزاب المعارضة السورية بدء من التجمع الوطني الديمقراطي الى اعلان دمشق وجميع الشخصيات السياسية الفردية والفكرية المعارضة للنظام |
| الساعة بإيدك هلق يا سيدي 10:02 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون