|
الغاية تبرر الوسيلة!!!
هلئ انو كنت انا وكم شخص وشخصاية قاعدين اليوم عمنتناقش
المهم من سيرة لسيرة ..... وصلنا لسيرة .... انو الام اللي بتبيع حالها كرمال ولادها بالمشرمحي بتزني !!! في كم واحد كان مأيد هالشي وبيعزرها انو كرمال ولادها بتضحي بأي شي وبكل شي كمان بينما انا كنت من المعارضين لهالفكرة ال الغاية تبرر الوسيلة ال على اعتبار الخطأ بيجر اخطااااااااء وراه وعمبدأ _(مع انو بعيد شوي عن الفكرة) بس متل ما بقولو اللي بيسرق بيضة بيسرق جمل وانا بقول اللي بضحي كرمال اي شغلة اد ما كانت كبيرة ومهمة وبتلزم تضحية وببيع حالو مشانها مستعد يبيع حالو وكرامتو كرمال اي شي تاني ان كان اهم او اقل اهمية لانو هالطريق معروف انو لا عودة منو وحتى لو كان في نقطة عودة مستحيل يرجع صحيح متل ابل كمان كان برايي انو طالما تدنت نفس هالام مرة ... حتى لو تراجعت فهية قابلة لترجع لهالشي مرة وتنين وتلاتة وعشرة وكمان طرحو فكرة انو بمجتمعنا لازم نسامحها بس هون تطرقو لهالنقطة بشكل ديني وانا ما بحب خوض باالنقاشات الدينية ..... انا هاد كان رأيي بالنسبة الي .......وانتو شو رأيكون؟؟؟؟؟؟ |
مابعرف انا شخصياً ولا مرة سمعت ب هيك حالة .. فا ندهشت
وبما اني لساتني مدهوش .. فا مابقدر عبر عن رأيي نشالة بس يفك الانهاش بعملي مرقة |
شوف..
بيع الجسد وامتهان الدعارة من أسوء المظاهر المسيئة لحقوق الانسان بالعالم. أنا رأيي دايماً ممكن ايجاد مهنة أقل اساءة لكسب الرزق من وراءها. وأكيد ممتهنات الدعارة أغلبهن مارات بحالات انسانية صعبة لكن الطمع بسهولة وسرعة الكسب أدى الى استرخاص الجسد الا باستثناء بعض الحالات. شكراً ع الموضوع. :D |
الدعارة من الظواهر اللي انتشرت منذ القدم
يعني مانها ظاهرة جديدة بالمجتمعات ومافي مجتمع بيخلى منها بالنسبة لموضوع بيع المرأة جسدها في سبيل اطعام ابناءها أنا ما بيحقلي انتقدها بس لازم انتقد هالمجتمع اللي اغتصب حقوقها واللي خلاها تعيش بالفقر يعني لو هالمرأة قدرت تلاقي شغلة شريفة كانت التجأت للدعارة ؟؟؟ هون السؤال المهم أنا ما بقول غير الله يحمي البنات ويحمي كل امرأة بتمر بظروف صعبة لان ولاد الحرام كتار |
لازم نسأل ثريا ....... لنعرف الجواب الصحيح ( بما انها مجربة الحالة )
بس عموماً ...... يللي ايدو بالمَي مو متل يللي ايدو بالنار و ما بيقدر واحد مرتاح ومتوفرلو كل شي أنو يحكم أو يدين واحدا ملعون نفَسو و ظروفو بتهوي التنظير بالنهاية سهل بس يللي بعيش الظرف .... غير يللي بيسمع عنو |
اقتباس:
صحي .. بس الغريب إنو نحنا آخدين فكرة .. إنو كل الي بيشتغلو بهاي المصلحة ظروفون بتهووي و مارين بحالات معيشية فظيعة هلـ الكلام مو دقيق , في نسبة لابأس منها عاملتها ( هواية ) مربحة .. شغلة خفيفة و بتكسب مصاري .. بس للأسف بس توعى عحالها بتحس نفسها أوسخ مخلوق بالعالم .. فبتنتحر .. لتورت الهواية للي بعدها .. |
عزيزتي مايا كلامك صح
أكيد مو كل اللي بيمتهنو هالمهنة مظلومات وبالمقابل مو كلهن بنات عم يدوروا عالربح السهل بس الموضوع المفتوح هو عن المرأة اللي بتبيع حالها مشان ولادها مو عن كل البنات اللي بيشتغلو بالدعارة ولهالشي الكلام مخصص عن هالفئة ويا هلا :D |
هي تعتمد على قدرة التحمل و الصبر لكل انسان
كثيرين مروا بظروف صعبة جدا ... بس لا سرقوا و وقعوا بالزنا ... و البعض انجرفوا لهذا الواقع بسبب الظروف وبنفس الوقت تعرضوا للاستغلال من قبل ناس معينين و استغلال شرف الناس احقر بكثير من المهنة برأيي ! بس نفس الوقت مجتمعنا ما يرحم .. يعني على قاعدة اللي يعمل مرة يعمل الف مرة .......... فاللي تريد تترك هي الشغلة الحقيرة ... ما تشوف احد يقف جنبها و يساعدها على ترك هذه المهنة و العيش بكرامة من جديد نرجع و نقول هي تعتمد على ظروف الشخص و قدرة التحمل للشخص ... و طبعا كثيرين من هذول .... ما مجبورين عليها اصلا مثل ما قالت الاخت مايا |
انا بالنسبة الي اكيد هااحكي مو منيح وما منه نتيجة لاكتر من سبب
الاول انه المال اللي رح تجنيه هالمرة من هالشغلة هو حرام يعني بتأكل اولادها مال حرام لانه بالاصل هاي مو شغلة ... التاني انه حتى لو هالمرة ربت اولادها من ورا هالشغلة وبعد هيك كبروا هالولاد وعرفو حقيقة امهم رح يضلو طول عمرهم روسهم بالارض وما بيقدروا يعملو شي يعني بالمختصر المفيد انه رح تشوه سمعتهم ولا كأنها عملت شي هيك ...... وبس يعني هدول يمكن اكتر سبببين وبعدين مستحيل مافي شغلة تكسب رزق غير هالشغلة حتى ولو شو ماصار وغير هيك انه لو هي نفس المرا هاي ما بدها هالشغلة ما بتعملها لو مهما صار فيها وبولادها لك البسة وهس بسة ازا ماتت من الجوع وما قدرت تطعمي ولادها بتاكل ولادها ولا تخليهم من دون اكل.........وبتقولولي الغاية تبرر الوسيلة اي روحوا يااااااااااا....;) شكرا عالموضوع الحلووووووو والواقعي....:D |
اقتباس:
كل كلامك صحيح بس المهم كيف نساعد الراغبات على ترك هذه الحياة ... و اذا فهمنا الظروف اللي وصلتهم لهذا الحال ممكن مساعدتهم بشكل اكبر و ايضا نحاول نمنع تكرار حدوثها و اهم شي نقضي على الاستغلال |
اقتباس:
اي فهمانة عليك ِ أنا .. لهيك إقتبست كلام ابو سمرة بس .. أنو الي إيدو بالمي مو متل الي إيدو بالنار .. !! |
اقتباس:
لانها مبنية على ارادة واللي بدها تترك هالشغلة ببتركها لو على موتها وبعدين ما في اكتر من الايدز اللي همه بعرفوه وما يرتدعوا مشانه وما فيك تمنع تكرار حوثها لانه اللي اتعودت صارت متعودة وصار عندها متل الدخان والمخدرات وما فيها تمتنع عنو ...كل وحدة بتعرف وين مصلحتها ........;) |
الحالة الذي يعشها المهاجرين أكبر برهان
ذكر الموسيقار نصير الشما أنه وجد سيدة كانت في العراق مديرة جامعة و زوجها كان دكتور معيد في الجامعة أشتشهد الرجل و هاجرت السيدة مع الأولاد الى سوريا أتعرفون ماذا تعمل هذه المديرة في سوريا غسيل الأدراج نعم هذه السيدة العظيمة تغسل السلالم في دمشق أقول الذي يريد الربح الحلال يجب أن يتحمل نوائب الدهر هذا المثل الذي يفخر به كل شاب و فتاة من أبناء هذه السيدة أرجو ممن يقرأ عن هذه السيدة العظيمة أن يدعو لها أن يجبر الله خاطرها ودمتم :D |
اقتباس:
فعلا ممكن هي تدور في حلقة مفرغة بس لازم المجتمع يساعدها حتى تترك يعني كثيرين يحتاجون فرصة جديدة للحياة بكرامة ... لان حتى المخدرات ممكن الشخص يتركها اذا كان عنده ارادة و وجد دعم معنوي كبير و يسلموا على مرورك :D:D |
اقتباس:
بس متل ما قالت ساندرا .... الموضوع عم يحكي عن فئة معينة ..... يللي هني مضطرين لهالشغلة هلأ أكيد أنا ما عم دافع .... و لا عم برر خَيارون بس مثلاً ..... ما بيقدر واحد غني يلوم الفقير اذا سرق .... أو ينظّر عليه بالأخلاقيات ... و ما بصير كمان ..... تقولي فلان أكرم من فلان ...... اذا كان فلان الاولاني مريّش ..و فلان التاني عايف سماه من الفقر يعني الشغلة نسبية و ظروف كل انسان .... بتفرض علينا المعايير يللي لازم نحاسبو من خلالها |
يا أخي هلق ماعاد في غير الزنا لتمشي امورها ؟؟؟
في الجمعيات الخيرية هادا طبعا اذا ما لاقت شغل مع انو ممكن تشتغل اي شغلة حتى و لو شغالة و عندك الشحادة متلا في رفيقي عندو محل كل يوم بتجي الشحادة لعندو بتعطيه الف ليرة فراطة و بتاخد مكانها شقفة وحدة (خضرا) يعني عم تعمل 30 الف بالشهر ازلم من ازلم رجال في الف شغلة تعملها بس اللي بتختار هادا الطريق انا بقول مو منشال ولادها و انما منشالها يا اما شهوة يا اما متل ما قالو شي سريع و خفيف بس اثارو على ولادها اكبر بكتير من الفقر |
صحيح أنو الأم مستعدة تضحي بحياتها كرمال أولادها بس أكيد مو أنو تبيع حالها
بالعكس لازم إذا بتحب أولادها فعلا ما تغلط طبعا غلط عن غلط بيفرق بس أنو تبيع حالها هي أكبر غلطة في ناس ببررو هاد الشيء أنو مضطرة ... هاد مو كلام ... في ناس عم يعانو الفقر والمرض الشديدين وما فكرو بهاد الشيء لو على الموت ... في أمهات عم يبيعو حالون من دون ما يكونو مضطرين:? |
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - ® |
| الساعة بإيدك هلق يا سيدي 15:52 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون