|
قيمنا...... تناقض وازدواجية!!!
يضع المجتمع النساء في تناقض حاد، ففي الوقت الذي يجري لهن عمليات جسمية ونفسية ليفرض عليهن العفة ويعدم احساسهن بمتعة الجنس... يطالبهن بامتاع ازواجهن وارضاء شهواتهم وقتما شاءوا وكيفما شاءوا... فاذا عجزت الزوجة عن تلبية رغبات زوجها، طلقها او تزوج غيرها او خرج ليعربد خارج البيت مع المومسات او غيرهن من النساء... وفي الوقت الذي يبيح فية المجتمع لاسباب تجارية واقتصادية اذاعة الاغاني الملتهبة بالشبق والتأوهات وعرض الافلام والرقصات الجنسية المثيرة للغرائز... يحرم على البنات والنساء التأثر بهذا السيل الذي لا ينقطع من وسائل الاعلام... واذا كان المجتمع حريصا على العفة التي يدعيها، واذا كان حريصا على الحفاظ على القوانين الاخلاقية التي يتظاهر بالحفاظ عليها من اجل الشرف، فكيف يفسر اذا تنازلة عن هذة القيم الاخلاقية باباحته اجساد النساء عاريات فوق المجلات المصورة وفوق غيرها من الاعلانات؟؟؟ المرأة العربية تعيش هذا التناقض بحدة فهي يجب ان تكون باردة عفيفة طاهرة لا تحس الجنس، وهي يجب ان تكون اداة متعة وتشبع زوجها حتى الثمالة... وجسدها عورة يجب اخفاؤة بمقاييس الاخلاق، وجسدها مباح ويجب تعريتة بمقاييس الرواج التجاري والاعلانات عن البضائع... ولا اظن ان هنالك استغلالا اشد من هذا الاستغلال ولا امتهانا اشد من هذا الامتهان الذين تعيشهما المرأة، فهي تصبح فريسة بين قوتين متنازعتين متضاربتين كقطعة اللحم بين فكين ضاريتين... وكل هذا طبيعي في مجتمع فقدت فية المرأة مكونات شخصيتها وافرغت من انسانيتها وتحولت الى شيء او اداة... فهي تارة للاعلان، وتارة اداة للشراء او الاستهلاك، وهي تارة للامتاع وخدمة الشهوات، وتارة وعاء للاطفال وتارة سلعه تباع وتشترى في سوق الزواج، ويسري عليها ما يسري على الاشياء والاغراض، فهي اكثر قيمة عندما تكون جديدة لم تستخدم من قبل، ويهبط ثمنها بالاستخدام السابق او الزواج السابق... وتصبح امرأة لا تجد في الاستخدام من يتزوجها الا رجل من ذوي العاهات او الامراض يعد نفسة مناسبا لها... واستمد الشرف مفهومه من هذة النظرة... شرف البنت متل عود الكبريت يولع مرة واحدة وبعدها تنتهي البنت وتلقى في القمامة كعود الكبريت المستهلك... اما شرف الرجل فيمكن ان يولع الاف المرات او ملايين المرات ولا يستهلك ابدا... ويبقى السؤال الاكثر تحييرا لي على الاطلاق هو... لماذا التعامل يكون كأنما "امي واختي وزوجتي وابنتي في الحفظ والصون........................... والباقي عاهرات" ؟؟؟ |
شرف البنت متل عود الكبريت يولع مرة واحدة وبعدها تنتهي البنت وتلقى في القمامة كعود الكبريت المستهلك... اما شرف الرجل فيمكن ان يولع الاف المرات او ملايين المرات ولا يستهلك ابدا...
اصبت الهدف مجتمعنا مبني من القش كبيت العصافير اضم صوتي......لا للذكورية |
عزيزتي ...
مجتمعنا .. متخلف ... ربي .. وتعود على هذه العادات والتقاليد البالية .. والتي تشبه إلى حد ما .. قرارات الأمم المتحدة التي تطبق على دول دون اخرى .. فإن أردتي الحل .. عليكي بالعودة للأصل .. وانتزاع هذه الأفكار من أدمغة البشر .. موضوع جريء ... ولي عودة .. THE PUNISHER " ... :D |
لنناقش كل قضية على حدى ...
اقتباس:
ولاننكر دور الرجل في تسهيل الأمر .. إلا أنه في النهاية .. بعد موافقتها .. ورضاها .. ولكن لا يجب أن نقف مكتوفي الأيدي .. فلو ظهر شخص واحد من ذوي الشأن ووضع حدا لهذا الموضوع .. لكنا الآن بعيد عن هذه القصص ... ومن أكثر الأشياء اشمئزازا في الوقت الحالي .. هو ظاهرة الفيديو كليبات السخيفة والفارغة من المعاني والكلمات والألحان .. والتي تستخدم فقط بغرض عرض الأجساد ... يقولون المحطات الإباحية تدمر الأجيال ... بالحقيقة المحطات الإباحية محجوبة ولايمكن للكل مشاهدتها .. أما محطات الأغاني .. وخصوصا العربية .. هي على مرأى أجيالنا القادمة .. أطفالنا .. أخوتنا .. أين الاخلاق والعادات .. كما قلتي .. يطبقون القواعد على زوجاتهم فقط .. اقتباس:
اقتباس:
وبهذه الأفعال تتحول المرأة إلى وسيلة أو اداة .. تشبع الرغبات .. وتتنقل بين الرجال كلعبة .. يصنعها .. زوج المرأة .. اقتباس:
اقتباس:
انا لا أقول أن نصبح مثل الغرب .. وكل امرأة تعمل ما تريد .. إلا .. أن تتمتع بقدر من الحرية والتحرر ... اقتباس:
فلو فكر هذا الإنسان الذي يتعامل كما قلتي .. ولو لمرة واحدة .. بأخته وأمه وابنته .. وتخليهما ضمن أبسط ما يفكر به .. لكانت الدنيا بألف خير .. موضوع رائع ... :D THE PUNISHER " ,,, |
اقتباس:
و نفس السؤال بينطرح بطريقة تانية كمان أنو ليش أغلب الرجال منشوفون عم ينادوا بتحرير المرأة من القيود الاجتماعية ..و من و من .... بس لما بيوصل الأمر للمرأة يللي بتخصون ( إن كانت زوجة أو اخت او ....) بتتغير كل مفاهيمون و بيستيقظ داخلون الرجل الشرقي المتصلب المتعصب .. |
اقتباس:
موضوع رائع بس للأسف ما بعتقد رح نلمس التغيير المطلوب بوقت قريب و خصوصاً إنو بكرا رح تشوفو كتيير من الردود لذوي الأراء المتحجرة و المتعنتة و يللي رح يكون النقاش معهون عقييييييييم ...... :jakoush: و تحياتي إلك marwa :D على الطرح المميز للموضوع |
اقتباس:
بس كمان في حالات اخرى يلي بتكون فيها المرأة ضحية استغلال معين وبرأيي ماهاد هو الشي المهم يلي لازم نحكي فية... لان الاهم هو ليش هدول النساء بيعملو هيك؟؟؟ يعني مثلا ازا مافي طلب ع البطاطا.... ما حنلاقيها بالسوق!! وهيك هي الشغلة ازا الرجال ما بيطلبوها اساسا ما رح تكون موجودة... وازا الرجال طلبوها اكيد رح نلاقي نساء عم تلبي رغباتو وحاجتهن... لأن من الاصل المرأة بتربى على ارضاء نزوات الرجال بس كل وحدة بتحول هلمهمة هي للطريق يلي بيعجبها... والقصة يلي عم احكي فيها مش قصة عادات وتقاليد وعدم تطبيقها وانما ازدواجية دنيئة... يعني لما شوف كليب من الذين مابيهمني انو ما بيتوافق مع العادات والتقاليد البايخة وانما لانو كل همو بروج حالو بتسليط الضوء بس على اجساد النساء ولانو بيعتبرو النساء اداة متلها متل اي شغلة تجارية مربحة... شغلة استغلال وضيع ومقرف... والاسف انو كمان عند النساء مافي وعي لشو عم يصير... يعني من كتر ما هني مرتبطات بالرجال ما عم يقدرو يشوفو موقعهن الحقيقي وين... اهلين :D |
اقتباس:
شرقنا هو يلي بيحكم على نسائنا بالاعدام... وعلى رجالنا بالتوحش... وعحالو بالازدواجية والتناقض... اقتباس:
اقتباس:
|
هاد التناقض اللي بالمجتمع خلى المرأة تسلم حالها للرجل بتلق الطريقة المبتذلة
و خلت الرجل يتقمص صورة الوحش و يمتهن المراة لاستغلالها لتلبية شهواته كلاهما ضحية هاد التناقض اللي بالمجتمع |
اقتباس:
قالتلي بالحرف الواحد جملة ما بنساها إذا بدك تعرفي مستوى الشب الفكري لا تطلعي على شو بيقول ... اتطلعي على أخواته وأمه بعيلتو كيف عايشين وكيف بيعاملهم بالأول ما اقتنعت كتير بس هلا ببصملا بالعشرة :D |
هي الأزدواجية موجودة بكثرة عند شبابنا بكتير من مفاصل الحياة . وخاصة فيما يتعلق بالمرأة وخاصة الفرق بين الأخت والزوجة من جهة . والصديقة من جهة تانية بينقلب من رجل شرقي ومحافظ وبيفهم كل وساخات هاد العصر بالحالة الأولى . للشب الجنتل الكوول بالحالة التانية |
اقتباس:
مجتمع اعرج!!! اقتباس:
:D |
قصة الازدواجية عند الشباب معروفة الأهداف
يعني هوي بيطرح أفكار منفحة وبراقة لدرجة ممكن تصطدم البنت اللي عم حكي معها بس لمجرد انو يكسسبها ويحكي معها لانو البنات مكسب عنا بالمجتمع والمرجلة تقول كم بنت مزحلق فلهيك صايرة الأفكار اللي بقولوها منفتحة طريقة ليوقعوا البنات مو أكتر والبيت والعيلة هدول حراااااااام يطلعوا ويفوتوا ويحكوا مع شباب ولك حتى بنات هلق الكبت والحرمان ساعدو على انو هالظاهرة كتير متفشية بالإضافة للدين أو الفهم الخاطئ للأديان وبس انا مش معك مروى انو قلتي الجنس = لا عفة العفاف مادخلوا بالجنس وعلى هالحالة مافي حدا عفيف بهادنيا بس الطريقة اللي تعلمناها انو كيف نتعامل مع الجنس خلتنا نشوفوا انو شي مقزز ووسخ وهيك شي أما الجنس فهوي شي مقدس هوي شي بيصير لما الانسان بيوصل لقمة الحب ومانو شي تجاري بنوب وطبعا مالازم نلغي دور البنات اللي عم يشاركو برسم هالصورة القاتمة عن جنس حواااا ودمتم ودامت أخوية :D |
أنا رح أحكي عن هي بس:
اقتباس:
أول شي: المصيبة أنو كل الرجال بيفكروا انو ببناتون واخواتون بالحفظ والصون, وحتى نسوانهون, بس الحقيقة أنو ماحدا بالحفظ والصون, يعني غبي كل واحد بيعتقد أنو أختو مابتعرف شي عن الجنس ولاعاملة شي, ونفس الشي بالنسبة لبنتو, بس المصيبة أنو لما بيدخل ليلة عرسو على مرتو فاتحا منتصرا مفكر حالو فتح الأندلس, وهيه القصة يا أما رقعة, يا أما البنت كاينة اتدير بالها مشان ماتخسر شغلة (أنا بنظري تافهة) هي البكارة! تاني شي: أنو هاد الموضوع تبع التخلف والـ 400 سنة احتلال عثماني هوه نتيجة حتمية لتاريخ دموي بدأ من الجزيرة العربية وانتشر لوصل للصين والمغرب ووسط آسيا, هاد التاريخ دموي ضد الغير, ودموي ضد الذات, يعني الثقافة اللي بتختصر المرأة بجهاز متعة جنسية وروبوت خدمة! وهاد الشي يلي بييخلينا نحاول نخليها بهي البوتقة والحبس مشان ما تطلع وتتطور وتنافس الرجل متل ماصار بأوربة وباقي الدنية,,,, مشان هيك, لقينا أنو أسهل شغلة نعلق عليها هاد الموضوع هوه الغشاء الضعيف يلي ممكن يتمزق بسهولة وبالغلط (ركب البسكليت, ركب الخيل, الجمباز ومعظم الرياضات اللي فيها بتتطلب لياقة ومرونة عالية) وصار هاد الشي هوه السبب بكل شي, يعني: الببنت مابيصير تحب, لأنو إذا حبت رح تدخل بعلاقة جنسية وتفقد بكارتها, ومشان البنت ما تحب, مالازم تحتك كتير بالشباب, ومشان ما تحتك بالشباب, مالازم تطلع من البيت, ولأنو مالازم تطلع من البيت, مالازم تشتغل, وما لازم تدرس, ومالازم تلعب, وما لازم تتحرك, وهيك منكون قضينا على أملها و فرصتها أنها ترجع تكون أنسان!!! لأنو هيه بهي الحالة مانها إنسان, بدليل انو في جماعات (ببدون ذكر أسامي) بيعتبروها متاع بالدنية متل السيارة والبيت والكنباية والموبايل, ومتل الجمل والحصان والمعزة والخيمة و و و و و و.... الانسان مابيقدر يعيش بإيد وحدة, وإذا قدر, فما رح يكون منتج متل الانسان يلي عندو إيدتين! والدليل واضح, مجتمع يعمل فيه الجميع (ألمانيا مثلا) ومجتمع يعمل فيه الرجل فقط (بدون ذكر أسامي) تالت شي: وهيه المصيبة الأكبر, واللي بتخليني دايما قول أنو المرأة بتستاهل كلشي بيصير فيها, أنو البنت بتعيش حياة قهر وظلم بس لأنها بنت مو شب, وبتكره حياتها بسبب هاد الشي ويتحس إنها أقل بدرجات من الشب, وبالآخر, لما بتكبر وبتتجوز, بترجع بتعيد نفس المأساة مع بنتها!!! |
خليل بس بدي قلك يسلم تمك وكل كلمة قلتها صح
|
رح أعلق عالموضوع من خلاال النقاط اللي حطها (خليل) لأن شاملة لكتير افكار ببالي
أول اقتباس:
في جملة لفتت انتباهي حكالي اياها قريب لالي: بيهمني أكون أول واحد بحياة البنت اللي بدي ارتبط فيها !! استغبيت الجملة كتير لأن البنت انسانة وكل بنت حتى اللي محبوسة وما بتطلع الا ما تكون حبت حدا حتى لو ضل بينها وبين حالها !! مجتمعنا عاداتو موجودة مش من جديد من زمان، وغشاء البكارة عندو هو الدليل على عفة البنت وعلى انها كانت ماشية عالسراط المستقيم، وفي كتير بنات انقتلو ظلما لأن هاد الغشاء او كتير سميك عندهم او تمزق نتيجة حادث عرضي البنت ما الها ايد فيه!! المشكلة انو احنا ما بنعرف كيف بدنا نخلي البنت بالحفظ والصون، وبنفكر ازا سكرنا عليها الباب وحجّبناها ومنعناها تختلط بالرجال وتتعامل معهم رح تكون محفوظة من اي انحراف ومشاكل وبنغفل تماما دور التربية السليمة وبنغفل تماما اهمية انو نعلم البنت تكون واثقة من حالها وقوية لتقدر تحمي حالها بأي موقف وتحت أي ظرف !! اقتباس:
انا هاي مش معها لأنو مش عند العرب لحالهم كانت المرأة مضطهدة !! وما بدا الموضوع من الجزيرة العربية وامتد بعدين !! وضع المرأة بأوروبا ما كان احسن بس تحسن وما تحسن كتير كمان لسة بيتطلعو للست انها ناقصة وانها غير مؤهلة كفاية لتتولى مناصب ادارية عالية وكتير منهم بيشوفو انو ما بتنفع بالسياسة والتجارة :) عقول الأوروبيين اتطورت ووضع المرأة اتطور بس احنا كعرب بنرفض التجديد بكل شي لهيك بنضلنا مكانك راوح ووضع المرأة بيتقدم بس ببطئ شديد !! مشان هيك, لقينا أنو أسهل شغلة نعلق عليها هاد الموضوع هوه الغشاء الضعيف يلي ممكن يتمزق بسهولة [QUOTE]وبالغلط (ركب البسكليت, ركب الخيل, الجمباز ومعظم الرياضات اللي فيها بتتطلب لياقة ومرونة عالية) وصار هاد الشي هوه السبب بكل شي, يعني: الببنت مابيصير تحب, لأنو إذا حبت رح تدخل بعلاقة جنسية وتفقد بكارتها, ومشان البنت ما تحب, مالازم تحتك كتير بالشباب, ومشان ما تحتك بالشباب, مالازم تطلع من البيت, ولأنو مالازم تطلع من البيت, مالازم تشتغل, وما لازم تدرس, ومالازم تلعب, وما لازم تتحرك, [/quote] ولازم يضل همها الأول والأير بالحياة وهم أهلها كيف تحافظ عهالغشاء لهيك من وهي زغيرة بيخنقوها... اعطوا لهيك غشاء حجم أكبر من حجمو وخوفهم على البنت من موضوع الجنس خلاهم يختنوها وخلاهم يعملو اجواء احتفالية لما يثبت العريس ليلة الدخلة للكل انو البنت عذراء!! [QUOTE] وهيك منكون قضينا على أملها و فرصتها أنها ترجع تكون أنسان!!! لأنو هيه بهي الحالة مانها إنسان, بدليل انو في جماعات (ببدون ذكر أسامي) بيعتبروها متاع بالدنية متل السيارة والبيت والكنباية والموبايل, ومتل الجمل والحصان والمعزة والخيمة و و و و و و.... الانسان مابيقدر يعيش بإيد وحدة, وإذا قدر, فما رح يكون منتج متل الانسان يلي عندو إيدتين! والدليل واضح, مجتمع يعمل فيه الجميع (ألمانيا مثلا) ومجتمع يعمل فيه الرجل فقط (بدون ذكر أسامي) [/quote] وهيك مجتمعات بيعتبروا السيارة والبيت والكنباية مرات اهم من المرأة لأنو مش صعب كتير عليهم يتجوزوا مرة و2 و 3 اقتباس:
ما في وحدة بتحب انو "تنفضح"، ولا وحدة بتحب انو بنتها "تعنّس" لهيك بتربي بنتها من مزغرها عالاشياء اللي هي تربت عليها انها صح ولهيك الست بتتعود تكون خاضعة وتنفذ وما تناقش وبتبطل شايفة اللي بتتعرضلو ظلم او انتقاص من حقها وبتبطل تشوف انو هي انسانة مساوية للرجل وقد تتفوق عليه،، وضع المرأة سيء والمرأة اللي بتطالب بالتغير بتكون واقفة ضد مجتمع كامل حتى ضد النساء اللي بتاطلب بتحريرهم بس بيضل في أمل :D |
اقتباس:
المرأة في الجاهلية كانت تتمتع بكافة الحقوق وكانت مساوية للرجل, بدليل (على الأقل) خديجة أول زوجة لمحمد كانت سيدة اعمال ولها تجارة مع الشام! فهمكون كفاية! اقتباس:
|
اقتباس:
طبعا من كل عصر الا ما تطلع ستات بيختلفو عن بقية بنات عصرهم :) وهالكلام اللي انت بتحكيه ما بيعني ابدا انو الاسلام هو اللي وصل المرأة للحضيض اللي هي فيه هلأ.. ولا انو الجهل والتخلف اللي احنا فيه انتشر من الجزيرة العربية... اقتباس:
المرأة لازم تفهم شو حقوقها وتقتنع انو هي انسانة مساوية للرجل وانو الرجل مش احسن منها ولا باشي وما الو اي افضلية عليها.. وقت توصل المرأة العربية لهيك قناعة الوضع بيتغير.. ما اتخيل انو بتستحق اللي بيصير فيها.. بتستاهل نزعل عالوضع اللي هي فيه ونحاول نغيرو والتغيير ادم شريك فيه، يعني لو الرجال فهم بنتو ومرتو انو هي انسان بالدرجة الأولى وانها بتقدر تكون اشي عظيم بالمستقبل وعلمها تكون قوية وتتحدى هيك امور بتبدا تتغير :D هامشـ : حاسة حالي (بلعي) كتير بس تحملني |
| الساعة بإيدك هلق يا سيدي 10:58 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
