|
لماذا تفشل التجارب الديموقراطية في العالم العربي؟
سؤال ظل عالقا بلا إجابة شافية طوال عقود مضت, بل إن أكثر المفكرين العرب أخذوا يتحاشون ألم الخوض في جوهر المسألة, وأخذ بعضهم يكتفون تارة بلوم الطغاة على جورهم, وتارة يحثونهم على منح الشعوب نزرا آخر يسيرا من حقوقهم السياسية لا يسمن ولا يغني من جوع, حتى عندما يضاف إلى فتاتهم اليومي الضئيل المتمثل في الصحافة الشعبوية أو الزعيق الصاخب في الفضائيات. فالديموقراطية تفشل في الوطن العربي في ظني, لأن قوام الفكرة الديموقراطية بما فيها حرية رأي وتفكير واعتقاد واختلاف ونسبية ورضا بحكم الأغلبية أيا كانت، إذا أتى بها التصويت الشعبي, لن تتمكن من عقول وقلوب غالبية أهل البلاد. العبرة هنا ليست بالقلة الليبرالية المستنيرة، بل في جيش من العوام يعتصر عقولهم الخطاب الديني المتزمت ويعصف بخيالهم أحلام التفوق الطائفي, وما رواج الدعاوى السياسية للأصولية الدينية التي طالما روجت للدجل السياسي بديلا عن التنوير, إلا شاهدا على عمق الوهدة الثقافية التي يعاني منها الوجدان العام. نشأت الديموقراطية في الغرب ابنة لأبوين ــ لا لقيطة ــ هما الإصلاح الديني والتنوير الفكري. فحينما كفت يد المؤسسة الدينية عن قمع حرية الاعتقاد والتفسير والتفكير والخيال, وحينما نجح أمثال فولتير وروسو و مونتيسكيو في إزالة البؤس القديم بأفكار أكثر تقدمية وإنسانية, كانوا في الواقع يحرثون الأرض التي ستبنى عليها الأجيال القادمة نهضتها وتقدمها. لماذا لا نعترف أن هذا الحظ من التأييد الشعبي العارم لم يتوفر لمثقفينا العظام ومصلحينا الدينيين التنويريين من أمثال طه حسين وقاسم أمين ومحمد عبده. ولسوف يعترينا الأسى حينما نقارن بين قوة التأثير التاريخي والشعبي للمصلح الديني مارتن لوثر, وبين ما لاقاه علي عبد الرازق, ويلاقيه جمال البنا من تهميش وازدراء لحساب خطاب فقهي غليظ رجعي وأحادي يستأثر بمعظم المساحة المكتوبة والمرئية والمسموعة. فلنقارن ـ عدديا فقط, ذلك أن الحسم في صندوق الانتخابات هو حسم كمي وليس كيفيا ــ بين أتباع التقليديين وأتباع المجددين, لنعرف كم من الأميال يجب أن نسيرها, قبل أن نتوهم رؤية الصباح. لا نجاح للديموقراطية قبل أن تؤمن الشعوب بمبادئها, وتحميها بأرواحها, وتجاهد سلميا من أجلها, وألا يكون الحديث محض تمويه, أو توهم ساذج. لا حديث عن صندوق من زجاج قبل أن نحل مشكلاتنا مع الحداثة والمواطنة, لا بكلمات في دستور لا يؤمن بها أحد (وبالمناسبة أعلن الإخوان المسلمون في مصر عن نيتهم تغيير الدستور إذا شكلوا الغالبية النيابية ذات يوم) وإنما بمبادئ مستقرة في نفوس الغالبية بصرف النظر عن انتماءاتهم الحزبية وأطيافهم السياسية. هذا لا يعني أي ترحيب أو صبر على الأوتوقراطية, أو الموات السياسي, ولا يعني أيضا ترك القضية التي لا مستقبل من دونها للزمن. علينا أن نخلص العمل دائما لإحياء الحزبية, لا الطائفية لتكون وسيلتنا للاختلاف والتنافس ولتغيير البيئة الثقافية والفكرية لمواقع أكثر تقدما. أسامة عزت إسماعيل مصر newsweek |
ليك باختصار من وجهة نظري انو الشعب مش مهيئ للديمقراطية والامثلة كتيرة متل الواسطة طالما في ناس كبار وصغار راكدة ورا الواسطة بعمرنا مارح يصير عنا ديمقراطية
|
كتير بتزعجني الفكرة تبع أنو الشعب ما بيلبقلو ديمقراطية ، ما خرجو ديمقراطية .. إلخ :pos: (قال رعاع ) ما عرفت أنا إي مورثة هي اللي بتجيب الديمقراطية ومفقودة عند شعبنا ؟ أزبط شي .. عملتو أنظمة الحكم الشمولية بالمنطقة ، أنها طفشت جزء من النخبة في مجتمعاتها خارج البلد واعتقلت جزء تاني وخلت الجزء البقيان يحسب حالو أفضل من باقي الرعاع اللي ما خرجن ديمقراطية :sly: |
طريقة عرض المقال غاية في السطحية ..
التجارب الديمقراطية في العالم العربي تفشل.. من اللذي حكم على فشلها.. برأيي التجربة في لبنان ورغم كل المنغصات والمعوقات اللي عم توقف بوجها ..الا انو تجربة غاية في الجمال .. |
ممم يعني نحنمن عاني من مشكلة موجودة و هي مشكلة التفرقة الناشئة عن ظروف الطائفية و الانتماء الديني او الفكري اللي
مخليتنا كل واحد بمحل و كل واحد ما بطيق التاني بالزمانات كانو يقولو العراق بدها ديمقراطية طيب شوفو الديمقراطية بالعراق بعد ما راح صدام شو عملت ١- الأكراد بالشمال صار بدن يستقلو و يعملو كرد ستان. ٢-التيار الديني صار بدو يسوي العراق إمارة أسلامية. ٣-كل حزب بالبرلمان العراقي صار بدو يستأثر بالحكم و يتهم الحزب التاني بالعمالة ٤- الطائفية زادت تأثيراتها ألف مرة عما كانت ايام صدام. طيب منطقيا اذا طلعو الأمريكان و ضلت العراق لحالها بتقدر تواجه هالمشاكل بالديمقراطية؟ ولا لبنان اللي عاملة ديمقراطية و نقد و حرية أجت شي حومة حققت أمال الشعب أو حسنت أوضاعها٠(بالرغم من أنو لبنان جيدة عا هوات غيرها بس الدابحها هوي الطائفية) المشاكل الطائفية بتستفيد من الديمقراطية كوقود لها بخليها تزيد و تكبر المشكلة انو تنحل الطائفية أول شي . |
الديمقراطية ليست عمليه تنفيس ،وانما هى اراده تغيير.
في اراده عند الشعوب بس مافي ايديلوجيه بالتطبيق والسبب معروف وواضح متل عين الشمس |
اقتباس:
:D الك. ما عم اعرف انو تجارب ديمقراطية عم يحكي عنها المقال, ماعدا لبنان من شي خمسين سنة لهلق ما في شي اسمو تجربة ديمقراطية محترمة باي بلد عربي من جهة تانية الديمقراطية مو مرسوم ولا قانون لازم نطبقوا بفترة معينة هي شغلة بتجي بالتدريج و ما بصير الها دور الا لما الشعب ببلش يفهم اهميتها, اما اذا اخدنا العراق كمثل فهو صاير في متل اللي بيجيب واحد أمي ما بيقرا ويكتب وبقلو تعى ادخل على الجامعة. |
الديمقراطية في ظل مجتمع يميني ... ما ممكن تتطبق
لان كل واحد يريد الاستئثار بالسلطة و فرض مبادئه على انها قوانين لا تتجزا و لا ممكن ان تخضع للنقاش و يجب الكل اطاعته كل واحد يريد يفرض نظرة فكرية الزامية على ابناء الطائفة الواحدة لازم نطالب بالدميقراطية في المجتمع .. يجب ان نناضل من اجل الحرية الاجتماعية قبل اي شي |
اقتباس:
وبرأيي اذا كانت الديمقراطية رح تقسم البلد فليكن.. منرجع للتجربة الديمقراطية الاوروبية اوروبا تقسمت دويلات صغيرة كنتيجة للديمقراطية وارادة الشعوب بعد الحروب الاهلية اللي عانت منها وقتها وبعد مرور وقت وممارسة غاية في الجمال للديمقراطية تم توحيد اوروبا وزالت كل النعرات الطائفية او الدينية او العرقية اللي كانت موجودة سابقا.. وحتى أمريكا ما كانت تجربتها الديمقراطية سهلة كمان عانت من حروب وتقسيمات وسيول من الدم لحتى حصلت على الديمقراطية الخلاصة ما حدا أحسن من حدا والشعوب للي عم تتمتع حاليا بالديمقراطية دفعت ثمنها سابقا غالي كتير.. |
اقتباس:
اليوم اللي بيحكي عن التغيير بيسمو "علاك" او قاعد عم ينظر علينا من برا و للاسف الاغلبية برايها الحديث عن الديمقراطية هو نوع من ال" luxury" اللي ما عم يفهموا مبرراتو. همن الوحيد الحديث عن زيادة الراتب وقسائم المازوت و انتظار الوزارة الجديدة. بالنسبة لمثال العراق, انا قصدت انو كتير بكير نقول انو العراق صار في ديمقراطية هلق بس بالمبدأ انا شايف انو اللي عم يصير رغم فظاعتو بضل احسن من لو بقي صدام بالحكم وورثوا بالاخير لاولادو |
الديموقراطية وللاسف كل شخص يمارسها بطريقته ..
صدقوني حتى في الولايات المتحدة لايوجد ديمقراطية ولا بريطانية ولا فرنسا .. نعم يوجد حرية تعبير ولا اكتر ولا اقل ... بعدين يمكن لحتى الشعب الربي يكون عندو ديمقراطيةة اول شي لازم يكون في امان في عالم تنام شبعانة ولا شو .. |
بتذكر مرة حوار بين مجموعة أشخاص عم يشتكو من الوضع أيام الثمانينات وقت اللي كانت العالم تصف عالمؤسسات كرمال كيلو بندورة وكيلو ليمون، بس الكل كانو ناطرين مين يجي يغير الوضع، بس ولا واحد كان مستعد هو يطلع حتى مظاهرة ضد النظام، يعني ما حدا بدو يكون هو اللي عم يوقف بي وش المدفع، واللي بينطر مين يموت لحتى هو يتحرر رح ينطر كتير...
|
اقتباس:
يعني مثلاً شعب موناكو ما رح يقوم يعمل ثورة ليغير نظامو لنظام ديمقراطي لأنو مو ناقصو شي واحتياجاتو مؤمنة وأكتر وبالتالي ما رح يدور أديش العائلة المالكة عم تربح على ضهرو. |
اقتباس:
|
اقتباس:
انو يكون في امكانية لتلاقي حزب أو حركة بتشبهك وبتمثلك وتقدر تمنحها صوتك.. ويكون صوتك مؤثر.. ما كتير بتعنيني قصة الديمقراطية الطائفية .. او الديمقراطية المأجورة.. لأنو المهم هوي الديمقراطية واحترام الحريات .. والوقت بيكفل انو كلشي ينحل ويتم فهم آليات العمل و أخلاقياتو كما يجب ما حسيت انو الحديث الو طابع أكاديمي مشان هيك حكيت رأيي ببساطة واذا في داعي بوضح أكتر.. :D |
اقتباس:
|
اقتباس:
بس بخصوص سؤالك .. اي بلاقي أنو في احترام للحريات لحد كبير .. وفي قيمة لكل الاصوات .. في مجتمع أهلي وفي قيمة للصوت الشعبي.. وهادا كتير مهم ببداية أي تجرية |
شوف اخي مو الحق على الشعب يعني على الحكومات وعلى شعب الحق لانو اذا زبطنها من هون بتخرب من هون وهذا الشي الي بصيرر في البلاد العربية انشاء الله تزيط تجارب الديمقراطية في اليلاد العربية بس لازم تتغير تفكير الحكومة والشعب عشان اصيرر هيك شي
|
الديمقراطية الاوروبية ما اجت فجأة من العدم.. سبقها علمانية و ثورة علمية و صناعية.. تصدير الديمقراطية للعالم العربي بهالطريقة بظن صار واضح للاعمى انها عملية محتومة بالفشل بظل التخلف و الغباء و الطائفية و الفساد و وو وو
نحنا متأخرين جدا بكل حقول الحياة و العلم و ما بعرف كيف هيك شعب بيقدر يستلم قدر نفسه بصراحة |
اقتباس:
دايما لازم ناخد ابعد طريق لنوصل للهدف !!!.. طيب ليش مطالبين بثورة صناعية و علمية و ثقافية و تغيير جذري بفاهيمنا سواء بفهمنا للمواطنة او علاقة الأديان و القوميات ببعضها قبل ما نحاسب المجرم و نقلو اترك الكرسي و اسكن واحد من سجونك يلي مليت فيها البلد !! ... اصلا لو قدرنا نغير بحالنا للدرجة الكبيرة هي ..و الديكتاتور موجود ....براهنك جو انو هاد مو ديكتاتور |
هلا صديقي اللدود :hart:
مشان ما يكون رأينا متحيز كوننا عم نحكي عن سوريا, خلينا نحكي بشكل عام عن كل الدول يلي وضعها متل سوريا.. و خلينا نحكي بالعملي.. انت بتعرف عن اي دولة اجتمع فيها الثلاثي المرح (فقر, تخلف, دين) و قدرت عن طريق الديمقراطية المستوردة انها تحقق شي بالنهاية؟ انا شخصيا.. ما عندي علم. بس انا جاهل بالسياسة العالمية مقارنة بالكثير منكم.. بقى نوّرني بس حسب معرفتي المتواضعة.. لما الثورة الفرنسية قامت كانت مترافقة مع ارادة شعبية جامحة و افكار جديدة ثورية بكل معنى الكلمة.. شو بتحمل الشعوب العربية من فكر جديد لتقوم عليه اي ثورة؟ مفاهيمنا كلها قديمة و مستوردة و مسبقة التعليب |
اقتباس:
الثلاثي المرح ( فقر و تخلف و دين ) كان موجود بكل الديمقراطيات الحالية ...و هون النقطة ...انو الثلاثي المرح هاد بكل دول العالم كان عامل مسرع بزوال الملكية او الديكتاتورية إلا عنا بسوريا ,,الثلاثي المرح عم يساعد الديكتاتور و ليش عنجد ما بعرف ...يعني كل ما رجعنا لورا اكتر كل ما زاد تعلقنا برأيسنا و كل ما جعنا و انذلينا كل ما حبيناه اكتر ,,,هلئ بظن الموضوع ابسط من هيك ...السبب هو نفسو ليش انا و انت ما فينا نحكي الكلام هاد بسوريا بشكل مفتوح للكل .. و حل المشكلة بسيط كتير ...نوقف كلام و نبدا بالشغل ! |
مو القصد التقليل من اهمية اي شخص هون لا سمح الله
بس مصطلح الديمقراطية المستوردة مانه مصطلح خيالي. في ديمقراطيات بتنشأ من ثورة داخلية و في ديمقراطيات بتنشأ من دعم و تبني خارجي و في ديمقراطيات بتجي (او بيكون مشروع ديمقراطية) عن طريق تدخل عسكري مباشر خارجي و انا بظن سؤالي مانو فلسفي كتير و سؤال ملحّ و حقيقي.. كيف بدك تخلي "الكل" يصير ديمقراطي لما الجزء يلي هوي المواطن العربي بالاساس مانو مواطن ديمقراطي.. مواطن بيمارس القمع على اصغر المستويات. الأب بيقمع الأولاد و الأم.. و الأولاد بيقمعوا بعض و بينقمعوا بالمدارس.. و هالشي مالو علاقة بسياسة الدولة. الدولة ما بتفرض على حدا يقمع الطالب او الاهل يقمعوا الابناء او الاخوات الشباب يقمعوا اخواتهم البنات.. هي هيك بتجي من التركيبة الحالية بسبب الظروف الحالية ثم ما قلتلي.. مين هيي الشعوب يلي انتقلت فورا من حالة فقر و تخلف و دين لحالة مجتمع مدني متطور؟ الأمثلة الشهيرة متل الدول الأوروبية و اميركا و كندا كلها مرّت بثورات دموية و انقلابات فكرية رهيبة جدا و ثورات علمية.. تخلصوا من الدين و بعدين بالعلم و الصناعة تخلصوا من الفقر و الجهل بعدين صار عندك ديمقراطية.. انت بدك اقصر طريق بس حسب رواية ليلى و الذئب فأقصر طريق محفوف بالمخاطر :pos: |
الديمقراطية حلم ضائع لن يحققه العرب أبداااااااااااًً
وسيبقى حلم.............للأسف |
انا بكل صدق و صراحة شايف مشكلة كبيرة بجعل الديمقراطية هي الغاية و الوسيلة بنفس الوقت
الديمقراطية بحد ذاتها ما بتعمل شي اذا الناس يلي رح تنتخبهم بشكل ديمقراطي رح يكونوا جحاش و الناخب اجحش انا عايش بكندا من سبع سنين و مارست حقي و واجبي الانتخابي بكل فرصة و ما شعرت بأي فائدة بصراحة بل على العكس كندا بلد سياساته الداخلية متخبطة و غير واضحة و سياسته الخارجية فضيحة و عار انساني كل شيء بياخد سنين لحتى يتحقق ببلد لازم يكون من اكبر بلدان العالم الصناعي.. الديمقراطية الزائدة عم تكون عائق بدل ما تكون عامل مساعد. في امثلة كتير بقدر احكي عنها.. كندا البلد الوحيد مثلا يلي قانونيا و "ديمقراطيا" اذا بدك.. ممكن مقاطعات معينة تحصل على استقلالها بشكل قانوني من الفيدرالية. تخيل؟ معقول توصل فيك الديمقراطية بالنهاية لتدمر نفسك كدولة؟ من وقت ما انتهت اخر ولاية لكريتيان بال2003 و البلد تقريبا بدون قيادة واضحة و استراتيجية واضحة و الانتخابات عم تكون بلا طعمة و نفس الوجوه عم تكرر و دائما رئيس الوزراء لازم يكون من احد حزبين كبار متل بأميركا مجرد محاولة تخفيض كلفة الدراسة بالجامعة عم يفشلوا بتحقيقها الطلاب الكنديين رغم مظاهرات متعددة كل سنة.. الديمقراطية ما عم تقدر تخدم الطلبة.. (مافي سياسي مستعد يلتفت لمشاكل الطلبة لانهم بيعرفوا انو الطلبة ما بينتخبوا).. الحل الوحيد الحقيقي هو العنف بس مين بيقدر يحكي هالحكي؟ الديمقراطية اكيد شيء رائع و مطلوب بالنهاية و مافي اسمى من قدرة الانسان على انتخاب الممثلين عنه.. بس بالنهاية هالشي كلو بدون معنى اذا ما ترافق مع ثورة فكرية حقيقية |
تحية
يعني انا برأيي المتواضع انو الديمقراطية صايرة عند الأشخاص يلي بيهمون هالموضوع غاية عمياء يعني انو صار الواحد بيفوت ينام بالتخت و هوي عم يفكر كيف بدو يفيق الصبح يلاقي انخلاق أو انبعاث للديمقراطية في كافة مجالات الحياة من حولو سواء بالمدرسة سواء بالبيت سواء بعلاقتو مع مرؤسو وين ما كان و هالشي بظن مستحيل شوي أما مجموعة أخرى بتفتح كتاب تاريخ بتقرا عن تجربة ديمقراطية ناجحة بجزر لاوس بسنة 7000 قبل الميلاد مثلا و انو في واحد كان لابس كنزة حمرا و شحاطة خضرا عمل مظاهرة و حصل عالديمقراطية فصاحبنا بينزل عالشارع يدور على واحد لابس شحاطة خضرا و كنزة حمرا مشان يحقق الديمقراطية ببلدو سنة 7000 بعد الميلاد:lol: يعني بالاخر و بهالظروف الحالية أنا بشوف انو الوصول للديمقراطية شيء شبه مستحيل الااااااااااااااااا اذا تحولت الديمقراطية أو ما تحولت رجعت لأصلها و صارت أسلوب حياة في حياة كل مواطن أو كل جلمود ضخر حطه السيل من علي أما بالنسبة لتحولها لأسلوب حياة هون برجع لفكرة كاتب المقال و بفكر شوي و بكتئب و دمتم :D |
هلق الديمقراطية شو بتجيب؟؟ بتجيب أمان سلام إعمار رفاهية مساواة قـــــــــــــــــــــوة اقتصادية عسكرية اجتماعية ........ الخ وطبعا هالإشيا بتخوف أمريكا والغرب ,, نحنا بس لو نستخدم عقلنا وقوتنا وثرواتنا ونفطنا بالشكل الصح عن جد بنخوف العالم كلو وبنحكم الأرض للأبد لذلك بيحاولو دايما يثيرو الفتن ويشجعو ويدعمو الأنظمة العربية تقوى ,, مو عالعدو ,, عالشعب إذا ضلو هيك يعملو فينا ونحنا ضلينا متل القطيع نمشي مع هالفتن وهالطائفية والتضليل بنستنتج إنو الديمقراطية بعيدة عن سمانا |
اقتباس:
خلي الواحد يحلم بانشاء ثورة مشابهة لثورة لاوس .. وين المشكلة و التاريخ اثبت انو شرق اسيا مثل غرب آسيا ... و يمكن يشابه باقي العالم ... اتفق معك انو الديمقراطية لازملها شغل ... بس االشغل الحقيقي يبدي بالارادة و الرغبة ... و ما لازم نحبط اي رغبة حقيقية بالحرية ... و بعدين نقول وين الارادة ! |
اقتباس:
وممكن الديمقراطية الشكلية تجيب شغلات اخرى ... تخدم مصالح الامبرياليات الغربية و غير الغربية (بكافة اشكالها و اطيافها) اقتباس:
و نعرف نحترم كل الاراء و نفكر بالانسانية ... في تلك الساعة رح نكون خطونا خدمة نحو الامام لذلك ما رح نخلص من المشاكل الطائفية و العرقية ... طالما ما زال الفرد العربي اسير التفكير بالجماعة (اللي موجود قبل قرون طويلة) |
الديمقراطية
شي جميل و حلو منسمع فيه كتير بس ما منشوفو فشلت التجارب الديقراطية !!!!!!!!! مين قال انها فشلت و بالعالم العربي كمان غلطانين كتيييييييييييير كتيييييييييير ما فشلت ابدا لانو بالاساس مافي |
شكراااااااااااااااااااااا اااااااااا على الموضوع
|
....طيب ماشي ما بدنا ديمقراطية ....و لا ضرّاب السّخن ...اذا الوضع ميؤوس منو ..هاد ما بيعني انو خلص ما عاد عنا مسؤوليات ...على الأقل ..حدا فينا لازم يعمل شي لمساجين الضمير .... و الأعتقال التعسفي ....يعني بكلام تاني ...ما بدنا ديمقراطية ..و اذا الديكتاتورية هي قدر محتوم ...ليش حتى على الأقل ما تكون ديكتاتورية على شاكلة ديكتاتورية مبارك ..او الملك حسن ..( بمحل مافي شبه قانون احزاب و شبه صحافة حرة)...لأنو ديكتاتورية كوريا الشمالية .....طلعتلنا روحنا ....
و من جهة تانية ....الوضع الميؤوس نحنا لي منصنعوا ..و للي بيشوف انو الوضع ميؤوس ...من الأحسن انو ما يروّج لحالة الأحباط.... يلي الحكومة السورية نفسها على مدى عشرات السنيين حاولت تكرسها بقلوبنا |
اقتباس:
مافي.ز التجارب بلبنان والعراق.. مافيك تسميها تجارب فاشلة او ناجحة.. انما هيي محاولات انا بحرترمها انما ما فيي احكم عليها ولا بأي شكل.. |
| الساعة بإيدك هلق يا سيدي 16:28 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون