|
مأساة مغربيه في سوريا
 فتاة مغربية تروي قصة عذابها بعد أن خدعت من قبل تجار الرقيق الأبيض في سورياالمشهد كان مثيرا جداً , عندما دخلت " ن ع " ( 24 ) عاماً إلى مكتب "عكس السير" في حمص , وهي بحالة يرثى لها و تحمل بين يديها طفلة صغيرة . التقطت انفاسها وبدأت بالحديث الممزوج بالبكاء , قالت " أنا فتاة من المغرب كنت أعيش حياة طبيعية مع أهلي رغم الفقر كنا سعداء , فخطر لبالي أن أسافر لأعمل وأعيل اهلي وأحقق أمنياتي كما تحلم أي فتاة وبالفعل حضرت إلى سورية بعد أن وقعت عقد عمل خياطة مع أحد المكاتب . في المطار وتابعت الفتاة حديثها " عند وصولي عام 2004 مطار دمشق كان بانتظارنا أنا وبعض الفتيات اللواتي حالهن من حالي رجل , وهو صاحب الفندق الشامي على أساس أنه صاحب العمل , وهنا بدأت أول خطوة من خطوات التعاسة مع أول خطوة لي بالمطار, حيث بدأ الرجل باتصالاته مع رجل في مدينة حمص صاحب فندق (ك) وباعنا له وأخبرنا ان العمل في مدينة حمص وبالفعل توجهنا من المطار إلى مدينة حمص " . فوجئنا في حمص بأن عملنا سيكون في " الرقص الاستعراضي " جففت دمعتها , وأكملت "عند وصولنا إلى فندق " ك " في حمص , طلب إلينا صاحب العمل أن نجهز أنفسنا للعمل وبالفعل بعد أن جهزنا انسفنا توجهنا معه لمكان العمل وإذ هناك حفلة باستقبالنا فقلت في نفسي إنها حفلة خاصة للشركة التي اعمل بها ولكن تبين انه هذا هو العمل (الرقص الاستعراضي ) ومرت الأيام وسيطر علينا صاحب العمل من خلال السلف المالية التي قدمها لنا " . وتابعت بالقول " وعندها وقع الفأس بالرأس وبعد فترة سجنت ظلما بتهمة سرقة ولكني خرجت من السجن ببراءتي وبفكرة الزواج لكي أرتاح من هذا العمل المخزي وبالفعل تزوجني صاحب العمل زواجا قانونيا ولم يمض أيام قليلة حتى صدر قانون منع المغربيات والأجنبيات من العمل وفي هذا الوقت كنت حاملا من زوجي الذي بدا يتهرب مني " . الأطفال هم الضحايا " كالعادة " وقالت بجرعة عالية من اليأس " والآن أنا احمل هذه الطفلة بين يدي التي لم يتعرف عليها ولو بعلبة حليب مع العلم أنها مسجلة قانونيا , وأنا أعيش في بيت بالآجار فكيف لي ان أعيل هذه الطفلة مع متطلباتها وآجار المنزل ومتطلبات الحياة ولا أملك عملا ولا رجلا وحتى الآن لا أعرف لأي هدف تزوجني " . و تتابع الحديث الذي قطعه سؤال ألح علي كونها لم تطلب الطلاق والانفصال عن زوجها , هنا تنهمر دمعتها وتجيب بحرقة " حالي كأي امرأة لا أريد ان يخرب بيتي فأنا أريد الستر ولكنه يريد أن يطلقني الآن بعد ان أتنازل له عن الطفلة وعن جميع حقوقي ولكن لا أستطيع فمن المعروف إذا طلقني سيتم بتسفيري إلى بلدي وكيف وانا لا املك شيئا ولا حتى تذكرة سفر , كيف وانا خرجت من بيت أهلي لأعمل وأعيلهم بعد ان كنت بمفردي أعود وأنا احمل ابنتي فأهلي ليس بمقدورهم هذا " نصيحة .. لو ينفع الندم .. في نهاية الحديث , قالت قبل أن تغادر: " أنا نادمة على سوء تقديري للآلية التي قدمت فيها دون ضمانات أو وعي مسبق للنتائج فقد حرمت من أهلي وناسي , وهو ما يدفعني من خلالكم أن انصح جميع الفتيات أن لا يندفعوا برغبتهم بالسفر دون أسس وهدف واضح وألا يغادرن بلادهن في لحظة حماس واندفاع حتى لا تكون النتيجة كما أنا عليه الآن .. ولقد لجأت لكم علي أجد من يساعدني ويخلصني من هذه الحالة " . |
اي شو يا ؟؟؟
لك يا الله شو بدك ترحم لترحم ... لك عملتا طويلة عريضة و جايي هلق تبكي ؟؟؟ و لمين تبكي؟؟قبل ما تعمل عملتا السودة استشارت حدا؟؟ هي هيي نتيجة افعال الجهال ... مافي سفارة تروح تراجعها؟؟ما في جمعيات ؟؟؟ما في قضاء؟؟؟ حاسة حالي بالعصر الجاهلي و بزمن الرق و العبيد لاء و شو ع قولتا طلع فرعون اهين من هالزمن .. |
يا صديقي في كل بلد يوجد ملاهي ليلية وَ راقصات ونساءُ ليل ٍ أحمر ثمَ إن هذهِ الفتاة في الأصل " مُخطئة " ماذا تحمل مِنْ شهادة لتسافر وَ تبحث عن عمل ثمَ ماذا تتوقع من سوريا " أفي سوريا المُحاصرة عمل أكثر من المَغرب ! " ثمَ لولا كانَ لديها ميول للإنحراف لما وافقت من الأول على الرقص وَ الهز بينَ أحضان ِ الرجال اللاهثين إنَ هذا العمل الوحيد الذي الذي أتقنته وَ الذي تتقنه وَ عندما شَعرت بالندم وَ نفاذ الصبر من متطلبات العمل وَ شعرت باستهلاكِ أنوثتها في سبيل لاشيء قررت الذهاب لمكاتب عكس السير الذينَ يَنتظرون قصة من السماء كي ينشروها تروجياً لما يروجوه هذهِ القصة المُلفقة لم تـُحبك كما يجب هناكَ حلقة مفقودة تمَ إخفاؤها إنْ وجدتها أخبرني ! تحياتي :D |
البنت بتهاجر لدولة اوربية, مشان تكمل دراستها وتشتغل =>الله يوفقها, بتعلي راس اهلها ,وتكون حالها بعملها وشغلها.
البنت بتهاجر لدولة عربية: مع اهلها او زوجها =>اي الله يوفقها بتدرس او بتشتغل او تقعد بالبيت المهم مع اهلها رايحة لوحدها=>اذا شغل رسمي*مهندسة ,مضيفة طيران, استاذة*ما تخاف على حالها رايحة لوحدها=>مو عارفة وين الله راح يحطها المهم رايحة تشتغل, هي متوقعة الشغلة راح تكون خياطة, او كوافير رايحة تشتغل خياطة او حلاقة ببلدان الخليج=هي فهمناها بما انو اسم الله devise اكبر من عملة بلدها. رايحة تشتغل خياطة او حلاقة ببلدان تانية متل سوريا=>هي ما فهمتا على قلة شغل الخياطات ببلدها اذا ناوية تشتغل شغل شريف ليش وقت بتتصدم يالواقع وتلاقي انو شغلها راح يكون رقص و... ما تحاسب نفسها وتضب حالها وتروح للسفارة وترجع لبلدها . قبلت الشغل يعني تتحمل النتيجة بحالها ومابينفع ندمها واذا في بنات بيفكرو بتفكيرها فالله يعين المجتمع. |
اقتباس:
اي ممكن تكون هربانة من زوجها أوعندها كبت عاطفي حبت تفرغه بسوريا شو محظوظين هالسوريين حرام تجي عالسودان :lol: |
حكياتي كوبي باست زات حكيات غزلان
انا معك غزلان هاد هوي الحكي يعني هيي وقت وصلت عرفت انو الشغلة رح تكون رقاصة فكيف رضيت ع حالها بهالشغلة؟؟ ليش ماراحت ضبت غراضها ورجعت ع بلادها ومتل ماهو معروف انو بالمغرب كمان في محلات للخياطة والنسوان عندن بيشتغلو هالشغلة هلااء من بين كل البلدان نئت سوريا ؟؟ الله يدهديها وقت وصلت معها للشيطان هلاء بتستنجد اي يقطع عمر اللي بيفكر هيك |
اقتباس:
هلئ صارت شريفة وَ هي بمأساة في سوريا وين كانت المأساة وقت كانت عبترقص و بتشرب و بتفرح للصبح |
اقتباس:
|
اقتباس:
شو بدنا نعمل إذا كنا جذابين ومؤثرين في قلوب العذارى :lol: |
اقتباس:
اقتباس:
شو مهند افندي؟؟ تاثرت الهيئة القصة مش قصة وسامة او هيك بس هيي كانت رايحة لهونيك وعارفة شغلتا بقا هالقصص ما بيمرقو علينا ايواه |
اقتباس:
لا تئولي مهند علي .. هلئ بتسمع فيني هيفا وهبي وبتتعاقد معي على شي شغلة :lol: |
اقتباس:
|
اقتباس:
|
اقتباس:
راضي بهيفا راضي الله يرضى علي :lol: |
للأسف في مافيات كتيرة تشتغل ع هالنسق... نفس الطريقة اللي يعملوها مافيات الرومانيين و الكولومبيين عنا.. الظاهر استوردوها جماعتنا..
أول شي هدول غالبا عرضو عليها الغالي و النفيس و ضحكو عليها,غالبا في فتاة مغربية متفق معها انو يبعتولها الضحايا ببلد المنشأ ع أساس لتحكيلهون تجربتها معهون و انو قديه كانو مناح معها و قديه كيفت بالشغل و تنصحهون يروحو يعملو متلها (طبعا مع جميع أساليب البهورة مثل انو هالفتاة التانية اللي يفترض انو اشتغلت معهون تكون لابسة أغلى الثياب و اللي يفترض انو بيتها يكون فخم و سيارة و هيك قصص).. هدول المساكين تحت وطأة الفقر و اللهفة لحياة أفضل يقنعو العيلة انو هنن قدها للشغلة و بيطلعو.. المافيات بيدفعولهون كرت الطيارة و غالبا يعطو مصاري كدفعة أولى ببلد المنشأ... لما بيوصلو على البلد التانية بفيزا سياحية طبعا أول ما يطبو المطار بيلاقو حجة ليسحبو منها جواز السفر و جميع الأوراق الثبوتية و يجبروهون بشكل ما يوقعو على سندات أمانة بمبالغ خيالية (هنن بيقلولهون انو حق التذكرة و السلفة اللي أخدوها و مصاريف فيزا العمل و الاقامة اللي ع أساس رح يعملوها) .. بعدين تطلع قصة الشغل وهمية و يجبروهون يشتغلو باللي بدهون ياه هنن بحجة انو "لازم تدفعيلنا المصاري اللي حطيناهون عليكي" و بتخويفها بأذاها و أذى أهلها ازا هربت و طبعا بدون أوراق و بدون جواز وين بدها تروح المخلوقة... تنجبر تعمل ما يريدون في سبيل تخلص من دفع المبلغ اللي بدهون ياه مقابل يرجعولها جواز السفر و يخلوها تتيسر... ما بعرف حيثيات هالقصة بالضبط لكن هالسيناريو نفس نمط اللي ينعمل هون .. و فوقها ببلد عربي يعني يمكن بعد ما يعرفو شو اللي صار يمكن حتى الأهل ما رح يساعدوها الله يعينها... |
اقتباس:
إي بحمص كلها مافي هيك فندق ! الموضوع كتير ممكن يكون صحيح .. عم نسمع شغلات لسى أفظع ؛ بس الي بستغرب منو أنو كلون بيشهقو بالبداية لما بيشوفو المصاري عم تكبّ عليهون , و بعدين بيفطنو أنهون إنباعو و إنشروا .. |
كمان نفس النقطة اللي علقت عليها مايا .. انو ما في فندق "ك" بحمص
يعني عم عدّون ما في ولا واحد .. المهم بالنسبة للموضوع .. ازا اجيتو من زاوية انسانية .. بشع . اما ازا اجيتو شوي بالعقل .. مثلا ياس قال .. انو عرضو عليها الغالي والنفيس .. بس بهالحالة هي كمان هيي وافقت انو تبيع عرضها .. واللي بيبيع عرضو مقابل الغالي والنفيس .. لازم يستحمل الذل اللي بيجي انا هيك بشوفها .. |
اقتباس:
ما حكيت انو عرضو عليها الغالي و النفيس كرمال عرضها... يكونو عرضو عليها شي مغري جدا لحتى تقبل تروح تشتغل كـ خيّاطة... و هي عن جد مفكرة حالها مسافرة لتشتغل بشركة خياطة (و يكونو مفرجينها صور للشركة الخيلة و عاطينا سلفة هدية و ضاحكين عليها بشهادات ناس يفترض انو اشتغلو معهون و كانو كتير فرحانين).. لما توصل على بلد الوجهة تكتشف شو صار.. بعد أيش.. بعد ما يكونو تحايلو عليها ليسحبو منها جواز السفر و يطالبوها بالمصاري اللي عطوها ياها و حق التيكت و يهددوها انو رح يقتلو عيلتها مثلا ازا هربت.. و يجبروها تشتغل اللي بدهون ياه بدافع انو ماعندا غير خيار لحتى تدفعلون المصاري اللي يفترض انو الهون عليها... عبودية حقيقية نسيت كمان بالرد السابق انو بالحالات اللي شفتها (لما كنت متطوع بالصليب الأحمر من سنتين) كتير أحيان كمان أول ما بيوصلو عالمطار يوهمونهون باحتراف انو الشرطة عم تلاحقهون و انو هنن مطلوبين بسبب جرم شنيع و ازا قعدو عاقلات و سمعو الكلمة فسيد العمل راح "يدبّرهون" بعلاقاتو و معرفتو.. لكن ازا هربو منو راح تمسكهون الشرطة |
| الساعة بإيدك هلق يا سيدي 21:52 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
