|
زنوبيا, ملكة تدمر
1 ملف مرفق .
زنوبيا,شغلة كبيرة كانت زنوبيا روعة بالجمال, وصوتها كان قوي, كان عندها عبقرية عسكرية. يقال انو كان تقدر تمشي مع الجيش لمسافة اميال من دون ما تتعب. زنوربيا اصلها عربية واغريقية. فكانت عربية من جهة. ومن جهة تانية كانت تقول انها منحدرة من زنوبيا, ومارك انتوني. كمان قالت انها منحدرة من اليسا (ديدو) اول ملكة لقرطاجة. كمان يقال انها منحدرة من الملكة سميراميس الاشورية. زنوربيا تثقفت بالثقافة الهيلينية, وكانت تعرف كل من اللغة الارامية, اللاتينية, القبطية, والاغريقية. كانت متزوجة من اذينة, واللي هو كان ملك على سوريا, وكل الاراضي الرومانية باسيا. لكن بعد موتو وبطريقة غامضة سنة 267. زنوبيا استلمت الحكم بسبب ابنا, حكمت تدمر بطريقة رائعة, فازدهرت تدمر. لاكن سائت العلاقة بينا وبين الامبراطور الروماني, قام هيك الزلمة عصب. وبعتلها جيش, لاكن هالجيش ما قدر يضاين قدام قوتا. وهزمتو بسهولة. بعدها زنوبيا هاجمت مصر وضمتا لمملكتا. وبسنة 269 ضمت كل سوريا. واعتبرت انو مملكتها منفصلة عن روما, وبعدين عملت مصاري, مع صورتها عليها. هالشي جنن امبراطور روما اللي كان بهالوقت (اورليانوس) ومع الاسف زنوربيا ضافت اراضي كتير, زيادة عن قدرتها عن الدفاع عنها. المهم اورليانوس بعت جيش لمصر مشان يسترجعا بقيادة بروبوس سنة 271. وتوجه هو بنفسو بجيش ضخم لاسيا الصغرى (تركيا), على اساس انو يلتقو بتدمر. فالتقى جيش اورليانوس مع جيش زنوبيا بانطاكيا. وصارت معركة دامية, نوعا ما متكافئة بين الطرفين. ويمكن كانت ربحت فيها زنوبيا لولا الخيانات. فانسحب جيش زنوبيا على حمص. وصارت بينون معارك شرسة, لكن جيش زنوبيا انسحب. وتراجع على تدمر. بهالاثناء جيش بروبوس كان رجع مصر لحكم الرومان. فحاصرو تدمر. لبين ما خلصت المؤنة تبع المدينة. واخيرا قدرو يحتلوها. لكن زنوبيا هربت, ووصل لعند نهر الفرات, بس قدرو يمسكوها. هلق اورليانوس عاملها معاملة منيحة, بحكم انها مرا, وانو كانت ملكة عظيمة, واخدها على روما مكبلة بالدهب, ويقال انو تزوجت من سيناتور روماني. وعاشت بمدينة تيفولي لنهاية حياتها. هلق مؤرخين تانيين بقولو انو هية سممت حالها متل كليوباترا. بس مافي ادلة كافية على هالشي. |
شكرا علي المعلومات الحلوة
لكن باظن انها قتلت نفسها لان هناك جملة مشهورة عنها و هي (بيدي لا بيد عمرو) |
هو المشكلة انو التاريخ صعب كتير تعرفيه بشكل دقيق. لانو صاير عم يعتمد يا اما على الحكايات والقصص, او بعض المخطوطات اللي عم يلاقوها. ومكتوب عليها هالتاريخ. او انو ادلة وابحاث تاريخية.
وصعب دايما تلتقى الادلة بشكل كامل. ودايما في مجال للغلط بالابحاث. بحكم انو الشي صار من زمان. (مو بالضرورة غلط, بس ممكن تردد كمان) فغالبا عم يكون في شي ناقص. وكل مؤرخ بيطلع بنظرية شكل. انا قريان عن النهايتين. يعني انو سممت حالها من خلال نبتة, بعتت خادمتا لتجيبا. والتانية انو راحت على روما وتزوجت سيناتور. وعاشت لنهاية حياتا, كمان بقولو انو ضلت ذريتا. للقرن الرابع بعد الميلاد. |
يسلمو جاد عالموضوع ... بس صار وصارت ... ونازلة عليي وحي الاقتراحات هالكام يوم
ممكن أقترح أنو تعمللنا موضوع اسمو نساء من التاريخ ...يعني منبدا زنوبيا ومنكر .... كيلوباتر .. مدام كوري ... الأم تيريزا .. خيو هيك تشكيلة يعني |
حلو كتيير...شكرا جاد...زنوبيا قدرت انو تبني حضارة عظيمة و قوية....برغم انو روما حاولت انو تقضي عليا...بس الاثار الباقية لهلا بتشهد بقوة حضارة تدمر و عظمتها...
|
اخ وائل ما قلتلك اني انا حملت التاريخ مرتين في السانوية يعني في التوجيهي وانا اعاني منه الى الان
والله يا معلم ما رادي يعلق بعقلي مشكور الله يعطيك العافية الدنيا ليل يا وائل ;-) ;-) |
اقتباس:
حاكم العظما منقرضين هالايام مشكورة عالمرور سرسورة اقتباس:
انو لك شلون بترسب بالتاريخ. مافي احلا من التاريخ. |
مشكور على موضوعك
بس اية هو اصل مقولة بيدى لا بيد عمرو |
شخصيا
اول مرة بسمع فيها |
وانا هيك قريت.امتصت شي نبتة سامة.مشكور جادو عالمعلومات الحلوة:D
|
اقتباس:
|
اقتباس:
بس ما بعرف شو مدى صحة هالمعلومات |
اقتباس:
|
اقتباس:
بس شي طبيعي انو يقولو انها انتحرت. ما رح يقولو انها راحت على روما وعاشت حياتا بشكل عادي. يعني اذا نهوها ب (Happly ever after) ما بيطلع حلو كتير. |
بس ع حسب ما منعرف و اللي قريناه بكتب التاريخ..انو زنوبيا كان عندا عزة نفس و كبرياء كتيير فهل من المعقول انو تقبل تروح ع روما و تتزوج و تعيش حياتا بشكل طبيعي؟
|
كلشي ممكن, خصوصي متل ما قلتلك انو مافي ادلة تاريخية كتير, بتأثبت انو ماتت انتحارا.
ماني عم قول انو ما انتحرت, بس ما حدا بيقدر يجزم شو كانت نهايتا لزنوبيا |
اقتباس:
على كل شكرا جاد ع الموضوع مرة تانية:D |
شكرا الك لمشاركتك:D
|
| الساعة بإيدك هلق يا سيدي 08:41 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون