|
بين الدب الروسي ... و الامريكي
ميدييف يقول للعالم عدنا و يريد الرد من العالم و العود أحمد اسرع من البرق ! اليوم ميدييف - بوتين .. بعد اجتياح جورجيا .. و الأعتراف باستقلال اوسيتيا و ابخازيا .. و التبرير كوسوفو ... ! هل نريد عالم الثمانينات من جديد ... عالم حلف وارشو و حلف الناتو . ! عندما يلعب الكبار ... يكون الصغار هم ورق اللعب و هم القمار ... و هم مصرف القعدة ككل ! كان العراق و يوغسلافيا .. احد ضحايا الحرب الباردة ... و تقسيم يوغسلافيا في بداية التسعينات تحديدا هي الرد الامريكي الامثل على الروس ... و جعل الفرق كبير بينهم كمثال المانيا الشرقية و الغربية .. و جدار برلين بين الشرقية و الغربية ! و مسلسل قصف البنى التحتية و الحصار و اسلحة الدمار الشامل و اجتياح العراق ....كله حسب رأيي الشخصي بسبب نتائج الحرب الباردة و تخلي الروس الاضعف من السوفيت عن الكل و ابقاء الساحة للاميركان فهل نريد التضحية بالعالم من جديد بسبب اهواء الحمار الديقمراطي و الدب الروسي ؟!! |
لا يسوئني انو يكون في في ازدواجية قطبية.. لكن مو من منطلق انو "صحابنا" صارو أقويا.. انما لأنو لما بمسطح مائي في دوامتين... فـ بتشوف انو بين الدوامتين في منطقة راكدة لأنو دوامة عم تدور باتجاه و الدوامة التانية عم تدور باتجاه ثاني.. فيلغو بعض بالنص... فبلكي العالم يوصل لهالمنطقة الهادية...
عدا انو ثبت تاريخيا انو التوازن الوحيد الممكن في العلاقات الدولية هو توازن الرعب |
العالم يللي بيمشي على رجل وحدة ........ أكيد رح يسقط
الـ 18 سنة يللي مرت أكدت ضرورة التوازن ( أو بعض التوازن ) |
تكمن المشكلة الأساسية في تحليلنا لوضع أميركا اليوم بعدم الموضوعية... فكون أميركا اليوم هي الدولة العظمى والتي تتحكم إلى حد معين بمسار الأمور في هذا الكوكب ليس بعار ولا عيب ولا شيئ قد تخجل منه أميركا بل هو فخر لها...
قوة أميركا ليس بعار عليها... بل ضعفنا هو العار علينا __________________________________________________ _________ اليوم نحنا قدام قطب وحيد بالعالم... اليوم الوضع هيك عجبنا أم لم يعجبنا... المشكلة الحقيقة بكون نحنا أهدرنا 100 سنة بمحاولة مواجهة أميركا بالخطابات والشتائم ونسينا انو المواجهة الحقيقية بتكون ببناء دولنا ومجتمعاتنا حتى تكون قادرة على هالتحدي والمواجهة... ياعمي طول عمرو القوي بيتحكم.. لك بالبيت القوي بيتحكم بالضعيف.. بالمجتمع القوي بيتحكم بالضعيف... بالعمل القوي بيتحكم بالضعيف... شو المطلوب من أميركا؟؟ تصير ضعيفة مشان نحنا نرضى؟؟ اذا تحتا ما بدنا نقوى أكيد مارح تجي أميركا تقوينا... بالنهاية لازم يكون واضح انو بطريقة تقسيم مناطق النفوذ اليوم وطريقة تحكم أميركا بموارد الكرة الأرضية... وانتشارها العسكري وقدراتها العسكرية ستبقى إلى حد طويل القطب الأوحد ولا روسيا ولا أوروبا ممكن يقدرو يعملو شي.. مع الزمن ما منعرف شو ممكن يصير... بس بالوقت الراهن هي المعطيات وهي الحقيقة... أميركا وعلى مستوى الممارسات الخارجية لم تكن أبداً عادلة بل وببعض الأماكن كانت سياستها وحروبها أشبه بقطاع الطرق منها للسياسات الدول... بالنهاية الجماعة بدهون مصلحتون.. عجبنا ما عجبنا نسطفل... عدل مو عدل مابيهم... إجرام مو إجرام هاد الحاضر... إحترمناهون ما احترمناهون أخر همون... حكم القوي يا عمي... القوي الظالم المفتري المجرم... بس بيضل قوي |
اقتباس:
يمكن لو تتؤسس قوى جديدة مبنية على اسس اقتصاديا مثل اوربا ... تكون هي عامل التوازن اقتباس:
التوازن هو الحل .. انا معك ... بس انا اشوف طريقة الصحوة الروسية .. مو صحيحة جدا ! |
اقتباس:
اي سيدي ... على كيفك على كيفك ... اميركا هي القوة العظمى ما احتلفنا ... بس مو صحيح الخنوع لهم روسيا اذا تريد ترجع مثل قبل رح تكسر من شوكة اميركا ... بس هل نحنا رح نستفاد ؟؟ المطلوب من العرب النهوض بدل الحطابات ... و محاولة البناء تبدي من البيت .. بس تبقى جرائم اميركا عار .... لان الجريمة هي جريمة حتى لو كانت من القوي |
كتير من الناس شاية يلي عم يصير مخطط أميركي أنا شايفو مخطط روسي ومالي قدران حدد أهدافهم النهائية وخطتهم المستقبلية على الهامش مع أنو أنسانيا مابيصير بس بتمنى منطقة تانية بالعالم تحمل شوي صراعات القوى العظمة عن كتف الشرق الأوسط خاصة بعد ماصرح أوباما ببيانو الأنتخابي على أنه سيعمل على إنهاء حاجة أميركا من نفط الشرق الأوسط خلال عشر سنوات |
اقتباس:
الرد متاخر صح بس معلش .... معلاقي ما بيخليني ما رد ممكن تشرح كيف ممكن تكون الصحوة الصحيحة ؟؟؟؟ خطابات استنكار؟؟ شجب؟؟؟ ولا سياسة ضبط النفس؟؟؟ بعالم كلو خطا ومحكوم باللامنطقية ما ممكن انك تحكي بمنطق بعدين روسيا لها اكتر من سنتين مكشرة عن انيابها وكان العالم حابب يعرف جدية الامر هي وصلو الرد... ولو كان غير هيك لكانت روسيا خسرت تماما روسيا مهدت لعودتها من حوالي 8 سنين وما طلع صوتها لبعد ما اسست لعودتها والغبي يلي ما صدق انها عم تبني وانو روسيا يلستن لساتها حية صح بحروب الكبار الخاسر الاكبر دائما هني الصغار بس غباء الصغار وعدم قدرتون على القراءة السياسية الصحيحة هيك دائما نتائجها جورجيا كانت كبش الفداء لمعرفة صدق روسيا من كذبها بتصريحاتها المتوالية خلال عامين والاحمق هوي يلي بيعيش على الوعود وما تعلم يتعلم من غيرو ليعرف انو اولا واخيرا هوي كبش فداء مغرر به فما لازم نغطي الغباء السياسي باللوم على الاقوى .... ماني مع العدوان باي اشكالو .... بس العدوان بالمطلق .. لانو كمان جورجيا بدات بالعدوان العسكري وما حكت بالدبلوماسية لدفعت ثمن غالي جدا. حلنا نتعلم انو تحقيق غاية وطنية بيكون حدا مؤمن فيها ما بتتحقق عن طريق الدعم الخارجي وانما بالعمل الداخلي والبناء الداخلي وحاج بقا اعتماد على الغير لانو الغير ما رح يساعد الا حسب مصالحو ولما بتتهدد هي المصالح ما عاد بيهتم بشي تاني واكبر دليل على ذلك حال دول الاتحاد الاوروبي ما عم تقدر تاخد موقف حاسم لانو مصالحها بتتضرر.. لنشوف شو رح يطلع من مؤتمر بروكسل اليوم |
يعني من المعيب اعتبار كوسوفو هو كسر عين الروس فقط دون يوغسلافيا ... و لذلك لايزم يدروا باوسيتيا الجنوبية و أبخازيا ...
الروس ما يحموا حلفائهم و يتخلوا عنهم مثل ما تخلوا عن صربيا سوى بباينات الشجي و التنيكبر ... و طبعا تخلوا عن العراق ايام بوتين بذاته ! ثالث شي .. اذا جورجيا غلطت ... سكان جورجيا ما لازم يدفعواالثمن بالتهجير القسري و الفصل العنصري اللي رح يحدث مثلما حدث في يوغسلافيا ... بالنهاية .. صحوة الدب الروسي مو لازم ببطولات على الصعفاء ... خلي تصير بوجه المدفع الامريكي مباشر ... لان طريقة المافيات مو صحيحة .. و تخيلي نفسك من سكان اوسيتيا ! |
اقتباس:
كلامي انفهم كاني عم دافع عن الرد الروسي .. ما كان هيك القصد القصد انو الروس صارو متل كل الدول يلي بتجير حروبها عم تستغل الخطا السياسي وعم ترد عليه التحدي الامريكي الروسي واضح والاتنين عم يعملو وكلاء يقومو بهالحروب وبرائيي انا انو هالوكلاء اغبياء سواء كانو مع الروس او مع الامريكان سواء لانو متل ما وضحت اولا الغبي هوي يلي بيصدق الوعود وبيعتمد عليها بدل من اعتمادو على بنيتو الداخلية الدول اكبرى صراعها ابدي وللاسف دائما في دول بتنجر لهيك صراع وانا بحملها كامل المسؤولية وهيي يلي بتقود شعوبها لهيك دمار وما جديد انو الشعوب هيي يلي بتدفع الثمن اكيد بتعرف كتير هيدا الشي باعتبارك حسب ما فهمت عراقي المافيا ما يوما ما اتواجهت الا بمافيا ...واحد قاتل كيف بواجهو؟؟ بالاقناع ؟؟ ما هوي قاتل وهيدا المبدا يلي بيفهمو.. والامريكان والروس صاروا عم يلعبو نفس اللعبة ما بدون مواجهة مباشرة خلي هالاغبياء يبلشو وتعا نحنا ندعمون بس الدعم الروسي طلع صحيح والدعم الامريكي طلع طق حنك وهيدا من سوء حظ الجورجيين !! بجملتك الاخيرة بتوقع انو في غلط .. قصدك حط حالي محل الجورجيين موهيك؟؟ لانو اوسيتيا هيي يلي صار عليها الاعتاداء بالاول واجا الرد الروسي من شانها وهيي معتندة على الدعم الروسي... ولا؟؟؟ برجع بقلك يا صديقي متل ما قلتلك مرة بالسقيفة بحياتها السياسة ما كانت مباشرة .. المباشرة والسياسة ضدان والسياسي يلي ما بيعرف الاساليب الملتوية هوي فاشل فكيف بدك رد مباشر بهيك ازمة؟؟ |
أكيد نحنا مستعدين للتضحية
لأنو بالنهاية الحمار الديموقراطي رح يحاول بشتى الوسائل يحكم العالم .. بينما اذا كان الدب الروسي واقف بالمرصاد ورح يقدر يغير الوضع فلا بأس من بعض التضحية في سبيل عودة روسيا كقوة عظمى وداعنمة للعرب والعالم ... يعني على القليلة بتدعمنا ما بتعمل علينا حصارات وحروب سونا شكراً كتير لكلامك الحلو وأكيد كلشي مفهوووووووووم |
| الساعة بإيدك هلق يا سيدي 20:46 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون