|
ما رأيك بالجنس قبل الزواج وما هي أبعاده ؟!
مرحبا ياجماعة الخير :D
في موضوع كتير خطير بالنسبة لشبابنا المراهقين.. وهوي موضوع الجنس قبل الزواج ... يعني الشب عنا بيلحق البنت وبيوعدها بشي معين متل الخطبة أو الزواج وبيعلقها وهييييييك لحتا ياخد الشي يلي بدو اياه وبعدين بيلحشها لحشة الكلاب وتروح اتدبر راسها . وبنفس الوقت في شباب أكابر كتير يعني مو كل أصابيعك متل بعضون . أنا بدي أعرف رأيكون بموضوع الجنس والعلاقة قبل الزواج إذا هوي صح أو خطأ وأنا أول واحد رح أعطي رأيي : ^ ^ ^ ^ ^ أنا برأيي موضوع الجنس قبل الزواج خطير كتير وخطأ 100% ... من الناحية الأخلاقية والدينية ومن جميع النواحي . يعني أول شي نحنا السيد المسيح بيقلنا أنو من نظر إلى امرأة ليشتهيها في قلبه فقد زنا فكيف اذا عمل معها علاقة أو ماشابه قبل ما تتكلل العلاقة بسر الزواج المقدس أو ماشابه ... وأكيد هاد الشي بظن نفسو بالنسبة للشريعة الاسلامية ... وبعدين الواحد منا إذا عمل علاقة مع البنت اللي بيحبها قبل مايصير شي رسمي وبعدين تركها بيكون قتلها وقتل حياتها كلها وهيي بربيع عمرها .. ومن ناحية تانية .. يعني اذا عمل علاقة معها وخلينا نقول اتزوجها بعدين وهي النسبة القليلة كمان بيكون قتل خصوصية الحب والزواج قبل وقتو بكتير وعاش مرحلة مبكرة من الحياة وغالباً بهالحالة بتفشل الحياة الزوجية وبيتم الطلاق بين العروسين اللي فينا انقول عنون المراهقين .. لأنو رح تكتر الخلافات ليتوصلو للحل الوحيد واللي هوي الطلاق ... فيا شباب ويا صبايا لازم كل واحد فينا يحترم حالو ويحافظ على كرامتو وكرامة الطرف الآخر حتى الزواج بعدين أنا شخصياً برأيي أنو اللي بيعمل هيك مع البنت بيكون ما بيحترمها لأنو لازم يحافظ عليها ويخاف عليها حتى تتكلل العلاقة بالزواج المقدس (ولازم البنت اتدير بالها من الزواج على ورق)... ولازم ما نضعف أو يسيطر علينا الشيطان ومانتبع شهواتنا وملذات الحياة ونخلي الله قدامنا على طول :D |
انا برايي انو خطير وكتير كمان ونتائجه كتير غير مضمونة
اما انو خطا فهيدا شي نسبي يعني احيانا الاتفاق بين الشريكين والحب الصادق بيناتون بيعطي ضمان للشريكين ببمارسة الجنس عن قناعة انو رح يتم الزاوج اما هيك كيف ما كان اي علاقة حب بين شب وبنت يكون الجنس في صلبها فيهدا بيرتب كتير اخطار على الشخصين والمجتمع يلي عايشين فيه يعني فرضا صارت العلاقة وبعدها تم الانفصال البنت ليست عذراء بالمعنى الشرقي للكلمة وهاد شي مش مقبول بالجتمع على الاقل حاليا هاد رح يوقعها بمازق كتير خطير هاد اذا ما حملت وعلقنا الوضع النفسي رح يتردى وممكن تنتحر اذا ما نحروها اهلا فليش المخاطرة لاحقين اصلا حلاوة ليلة الدخلة انو بتكون اول اتصال جسدي بين الحبيبين وبشكل امن فليش العجلة |
ما رأيك بالحب قبل الزواج الجنس هو الحب الجنس الذي تكلمت عنه انت ليس له صلة بالحب ابدا انا اتزوج من عشيقتي كل يوم اراها فيه اعلن ارتباط روحي بها في نفسي وان كان الزواج لغرض المعاشرة الجنسية والشهوات المؤقتة فقط فاذا لن اتزوج ما حييت انا سأتزوج عندما اعلن لحبيبتي اني احبها وعندما تعلن هي لي نفس الشئ حينها يتم زواجنا على الورق الروحي وليس على ورق المجتمع |
اقتباس:
بس هي اكتر جمله لفتتلي نظري انو شو يعني نحترم حالنا ونحافظ على كرامتنا؟ وشو يلي بيقرر هشي؟ اعمالنا؟ اشيا منقدمها لغيرنا؟ اشيا منعملها كرمال مجتمعنا؟ او شي مخفي ومحصور بفرج صبيه؟ ومين قال انو الجنس عهر وكفر واثم؟ يمكن ممارستو فيها خطوره اجتماعيه بس بدون اي شك الجنس رباط مقدس واسمى واطهر من اي ارتباط رسمي لانو الحب... والحب ارقى من انو ينحصر بين كام سطر وشاهد |
اقتباس:
شكرا أخى على الطرح المتوازن لموضوع هام جدا وبيحصل كتير فى الوطن العربى بين المسلمين والمسيحيين كمان بس المشكله أنه شباب كثيرا ما تعرف تميز بين الحب والرغبه الجنسيه فيسطير عليها فكر خاطئ يحاول بكل قوته إحتلالنا وتدمير هويتنا العربية وخصوصيتنا الشرقيه التى تميل الى الطهر والعفاف بكل شي وبالحب أكثر شي موضوعك هام أخى وأنا معك 100% وموافقه على رأيك وأنه أكيد شي خطير وخاطئ |
مساء الخي
الموضوع قيم جدا و مفيد بنفس الوقت عزيزي سيريا مان الحب الذي تحدثت انت عنه لا علاقة له بالجنس هل نحن نتزوج فقط من اجل المعاشرة الجنسيه و لاشباع غرائز فيزيولوجية يتطلبها جسدنا سواء كنا ذكورا ام اناث طبعا لا الزواج شي مقدس و فيه اشياء كثيرة اهم جدا من التقاء جسديي الجنس في مجتمعاتنا اكيد شي مرفوض لانه حرم من قبل الدين و التقاليد و الاعراف ايضا و لكن لو افترضنا ان الدين لم يحرمه ماذا كان ردة فعل المجتمع نحن دائما نربط الزواج بالجنس و هذا هو خطانا القاتل |
هلق انو انا كلمة و كم قطعة دهب
و كم غنية و كم زمور لح يخلي الجنس حلال لا يا خيي الجنس من الاساس حلال و يلي بحللو شي واحد هوي الحب هلق اذا انتو مقتنعين انو الجنس هوي تلبية لغريزة متل الاكل لا انتو غلطانين الجنس هوي اعلى درجات المحبة لما بيلتحموا الجسدين مع الروحين _________________ * الجنس : كلمة الجنس فوق هوي مو الجنس يلي بيصير ببيوت الدعارة |
أوف قديش الموضوع اللي فاتحو خطير وخاصة في المجتمع الشرقي....وطولو بالكون علي لأنو خمسطعش ألف فكرة عم تركض براسي
اولا حتى نتكلم عن الجنس يجب ان نعرف مفهوم الجنس ماهو؟؟ وماهي الثقافة الجنسية المتوفرة عند الأفراد؟؟ وماهي الصورة المرسومة عند كل فرد ذكرا او انثى تجاه الجنس الآخر لأن هذه الكلمة تحمل كثير من المعاني والدلالات وبحسب موضوعك هنا فهمت اوتوماتيكيا الممارسة الجنسية العملية ....همممممممم طيب باأخوتي كل واحد فاهم وراسم صورة للجنس بمخيلته ..... انا مع الممارسة الجنسية قبل الزواج!!!! طولوا بالكون ماتبلشو تضربوني لأنو انا مفهوم الجنس عندي لا ولن ينفصل عن مفهوم الحب لذلك الجنس عندي بمعناه الشامل(وهدا رأيي أنا ) يشمل امساك اليد والضمة والقبلة وتختم بالممارسة العملية للجنس طيب لهون منيح .. يعني بالنسبة لألي لما بمسك ايد حبيبتي هدا جنس ولما اقبل يدها او خدها او حتى فمها هدا جنس .. لأنو بهالعملية عبرت عن حبي لها بطريقة حضارية وسلسة والحب والشهوة والجنس ثلاثة في واحد لايمكن الفصل بينهم ابدا عرفتو ليش انا مع الجنس قبل الزواج؟؟؟:larg: وكمان في شغلة لازم الكل يعرفها انو قمة الحب هو الممارسة الجنسية والتي تتجسد بالأولاد الذين هم نتاج هذا الشعور المقدس بين شخصين نذر أحدهما نفسه للآخر في هذا الرباط المقدس. ومن هون انا بفهم القصة انو ممارسة فعلية قبل الزواج مرفوضة عندي لعدة اسباب: اولا حفاظا على خصوصية الزواج ثانيا حفاظا على مفهوم الحب في الحياة الزوجية ثالثا الإبتعاد عن الخوف والقلق (أي احترام مشاعر الحبيبة) قبل الزواج رابعا التمسك بمفهوم الأشتياق للّقاء الجسدي بالرباط المقدس خامسا ازدياد الثقة بين الطرفين مهما كانت الشهوة كبيرة(بأنه لايستغلني) سادسا اتحاد الشخصين معا ليصبحا جسدا واحدا يتألم الأول بتألم الثاني وكتير أسباب الواحد مابيقدر يتذكرها فرددفعة لأنو بصراحة ياجماعة وما عم بجيب شي من عندي هون بكرواتيا الجيل الطالع اكيد بيدور على رفيقة او صاحبة بس المشكلة عم يتفاجئوا من حالات الإنفصال والخيانة بعد الزواج لأنو صارت القصة تعويد وبعد الزواج بيصير عندون ملل من الطرفين وبيبلش يدور كل واحد على شخص جديد لأنو مل ولازم يجدد ويجرب مع طرف جديد وبالمجتمع الشرقي الرجال عندنا بيبرروا بهالجملة (اي شو كل يوم الواحد بدو ياكل مجدرة) وانا كنت اطق من هالحملة طيب وين حبك راح ياولدي والحبيبة اللي كان ريالك يشط عليها وقاتل حالك لتشوفها وعاندت اهلك كلياتون كرمالها صار اسمها مجدرة؟؟؟ عجبي يعني مابتعرف انو الجنس هو اندماج ومنح جسدك للطرف الثاني!! فأنت تعطي شي من نفسك بالمختصر المفيد ياأخوتي الممارسة قبل الزواج فكرة غريبة لأن الطرفين بيقدروا يفرغوا الشحن اللي عندون بمسكة ايد ببوسة اوحتى بمداعبة اذا فهمانين الجنس مظبوط شكرا لك اخي سيريامان لأنو فعلا موضوع حلو بيخلي الواحد يرجع يعيد حساباتو انو شو بيعرف عن الحب والجنس :deal: |
تخيل نفسك أنك تزوجت يوماً ما فلن تعجبك بالتأكيد فكرة أن زوجتك قد مارست الجنس مع شخص آخر قبلك أو أن شخصاً قد قام باستغلالها.ماذا عنك أنت هل تروق لك فكرة أن زوجتك قد كانت على علاقة جنسية مع رجل آخر قام باستغلالها. إذا كانت لديك صديقة الآن وتمارس معها الجنس فماذا سوف يكون شعورك لو كانت زوجتك في المستقبل هي صديقة لشخص آخر الآن. من الممكن أن تفكر بذلك من وجهة نظر أخرى أن هذه الفتاة التي تقوم أنت باستغلالها هي بكل بساطة أبنة أحدهم ولكن بماذا كنت ستشعر إن قام أحد الشباب باستغلال إبنتك يوماً ما فكر في ذلك ماذا لو حدث ذلك لشقيقتك فهل سوف تسمح لأحدهم بإستغلالها فهؤلاء النساء هن بنات وأخوات وزوجات المستقبل .الجنس من أكبر النعم التي أنعمها الله علينا لكنه سبحانه و تعالى وضع لها قواعد و قوانين يجب التقيد بها. :deal: |
هلا بعيدا شوي عن فكرة الموضوع ..
اقتباس:
البنت الي بتمارس الجنس مع الشب , بتمارسو برضاهــــــا , يعني خلونا نطلع شوي من فكرة أنو البنوتة كتير يا حرامـ و إلا منسميه إغتصاب .. ! اقتباس:
:? هايـ جديرة بالصفن .. ! |
همممممممممممممممممممممممم
فكرت كتير قبل ما اكتب بهالموضوع وكان في براسي كم شغلة بدي اكتبهن ولما بلشت بدي اكتب نسيت شو كان براسي (قديش بكره هالشغلة :pos:) تنبيه من اول الرد رح اسحب يا اخواتي ورح اشطح على مواضيع وقصص وقضايا اولا : الموضوع ريحني كتير اليوم ورح قول ليش بهالكم سطر التانيات بس اول الشي عندي سؤال كم واحد بيحب وحدة عنجد وما براسو او مانو مفكر انو يخدعا او يغشها او يلعب عليها عندو الجرأة انو يفتح معها موضوع الجنس ؟ ممكن يكون في عالم عندهن الجرأة وممكن عالم يكون لاء انا واحد من الناس اللي ما عندي جرأة اني افتح هالموضوع مع حبيبتي مع انو من المواضيع الاساسية اللي بعتقد لازم ينحكى فيها بين الحبيبين وخصوصا اذا في مخطط انو يكفو حياتهن مع بعض اليوم وبعد ما انطرح هالموضوع فتحت الموضوع مع حبيبتي وحكينا في وخصوصي انو متل ما قلت انا بعتبر هيك موضوع من الضروري انو ينحكى في ويتفق علي وصرلي فترة عم فكر كيف بدي افتح هالموضوع وما كنت لاقي طريقة اجا هالموضوع وساعدني فالموضوع اجا بوقتو الاسباب اللي بتخليني ما احكي بهيك موضوع مع حبيبتي ( او بتخلي اي حدا ما يحكي مع حبيبتو ) هيي انو البنات عنا تربو على طريقة انو يا بنتي ما تخلي حدا يبوسك او يلمسلك ايدك لانو بتنتزع سمعتك ومعد حدا بيتزوجك (هلأ هيك كانت الحالة قديم بس كيف صارت عن جديد ما بعرف ) طبعا انا عم احكي بغض النظر انو المجتمع بيعارض حالات الحب اللي بتصير بين الشباب والبنات بكل انواعها حتى لو ما صار بين الشب والبنت اي شي جنسي ( بعرف ممكن عالم يعترضو انو ناقضت حالي بين هالجملة هاي وما سيتبع بس انا هون عم احكي مجتمعيا وليس شخصيا ) وبيعتقدو البنات انو اي شخص بدو يفتح معاهن هيك موضوع او انو يلمس ايدهن او يبوسهن مثلا انو هادا ناوي على نية غير صافية او عم يضحك عليهن لهيك بتلاقي الحبيب حتى لو ما بزهنو انو يغدر بحبيبتو بيلاقي صعوبة من طرح هيك موضوع لمجرد النقاش وبدون اهداف اخرى ثانيا: سمعت كتير من بنات وشباب انو الحب بينتهي بعد اول ليلة بالزواج (ما بعرف قديش منكن بيتفق مع هالجملة بس بعرف انو اللي ما رح يتفقو رح يخنّقو ويعصبو من هالجملة ) انا كنت اول واحد بيخنّق وبيعصب من هالجملة هالجملة بتعني انو تنين حبو بعضن شهر شهرين سنة سنتين تلاتة اللي هني وبعدها تزوجو و مارسو الجنس بليلة الدخلة وانتهى الحب صارت علاقتهن رسمية صار المرا الها مسؤوليات منزلية (تنضيف البيت والطبخ والجلي و و و ) طبعا اضافة اذا لشغلها اذا كانت بتشتغل والزلمي الو مسؤولياتو بتأمين حاجات البيت ومتطلباتو بس الحب انتهى مع نهاية اول عملية جنسية بداية خلينا نعرف شو يعني حب ؟ شو يعني زواج ؟ وشو يعني جنس ؟ من هون رح بلّش احكي كوجهة نظر شخصية و كحالة شخصية عم عيشها الحب : الحب مو دقة قلب ولا احمرار خدود وقت بتشوف الشخص التاني او تحكي معو الحب هوي التفاهم الاتفاق الاندماج بكل شي مع الطرف الاخر انو تتقاتلو تتصالحو تتزاعلو تتراضو تبكو تضحكو تختلفو بالرأي تتعايطو الحب انو رغم كل المشاكل اللي بيناتكن بتتاكدو انو هالمشاكل رح تنحل ورح يكون الكن سند تقدرو توقفو علي الحب انو تتاكدو انو في شخص عم يدعمكن عم يوقف معكن الحب انو تفكرو كواحد ما تفكرو كتنين انا بعتقد حاليا انو عايش حالة حب كاملة (ممكن كتير عالم لو بتعرف كيف وضع علاقتي ما تتفق معي ) بس انا بعرف انو انا وحبيبتي متفقين على كل شي ومنفهم على بعض من دون ما نحكي منتخانق؟ اي منتخانق منتزاعل؟ اي ممكن نتحسس من بعض بس كل مشاكلنا بتنحل قبل ما نقوم عالنوم ليش؟ لانو انا بعرف مين هيي وشو بدها مني وهيي بتعرف مين انا وشو بدي منها - الزواج : ورقة بتسمح للبنت انو تروح تسكن مع الشب اللي بتحبو بدون اعتراض من اهلها هههههههه هل الزواج بيعني حب ؟ ممكن اي ممكن لاء هادا السؤال ما الو جواب معمم يعني كتير بتلاقي شخصين متزوجين بس ما في بيناتن حب وما بيطيقو بعضهن وكتير بتلاقي اشخاص بيحبو بعضهن بس مو متزوجين هل الزواج بيعني الجنس؟ لاء ولاء ولاء ليش انا ما بقدر روح نام مع بنت ومارس الجنس معاها بدون ما كون متزوجها طبعا بقدر من جهة تانية ما في كتير عالم متزوجة وما عم تمارس الجنس ؟ طبعا اكيد في قريت تعليقين من شوي رح انسخهن لهون اقتباس:
بممارسة الجنس بيكون قتل خاصية الحب والزواج ؟ معناتا انتي بحكيك هاد صرت من جماعة الحب بيموت بعد اول ليلة بالعرس معناتا اذا مارست الجنس قبل الزواج او بعدو خاصية الحب عندي رح تموت بما انها مرتبطة بالجنس بعدين كم حالة طلاق صارت لانو الزوجة او الزوج اكتشف العجز الجنسي تبع الطرف التاني بعد الزواج ومن هون بدي اسال سؤال يترك معلقا بدون اجابة هالحالات هاي ما كان الزوجين فيهن يحمو حالهن من الطلاق لو مارسو الجنس قبل الزواج ؟ اقتباس:
لنفترض انو ما مارست الجنس لحتى تزوجت قديش ممكن تضل متزوج ؟ سنة تنتين عشرين سنة تلاتين سنة لو بدك تمل او لو انو براسك انو رح تمل تلاتين سنة زواج و "جنس" مع نفس الشخص ما رح يمللوك ؟ لو انا اكلت المجدرة قبل ما يطلعلي سنان وضليت عم اكلها بعد ما يطلعلي سنان لمدة تلاتين سنة او لو ما بلشت اكلها لحتى طلعلي سنان وضليت عم اكلها لمدة تلاتين سنة بالحالتين رح مل (انا ما عم برر حالة الملل الجنسي بهالمثال لاء بالعكس الملل الجنسي بيرجع للشخصين وقديش هني قادرين يتمتعو في ) الملل الجنسي بين الزوجين ما الو علاقة بايمت مارسو الجنس قبل الزواج او بعدو - الجنس : تكملة للحب الحب هو اتحاد روحي وعقلي ونفسي وبيكملو الاتحاد الجسدي ايمت بيصير هالاتحاد ؟ وقت بيوصل الاتحاد الروحي والعقلي والنفسي لاعلى درجاتو وبتعرف انو مستحيل تفرق بين هالشخص وهالشخصاية هل وصول هالاتحادات لاعلى درجاتها متعلق بالزواج ؟ لاء لانو الشي الوحيد اللي صار قبل الزواج وبعدو هوي شقفة ورقة بيني وبين مرتي وانو صارت بتقدر تجي تنام عندي بدون ما حدا يقلها وين رايحة غير هيك لاء ما تغير شي انو كان في حكي كتير (بعد كل هالحكي واسا في حكي ) بس رح انطر بلكي شي حدا بيرد وبيرفرشلي زاكرتي بس رح قول رأيي الشخصي انا مع ممارسة الجنس قبل الزواج لانو ما رح تفرق عن بعد الزواج بس لازم نكون واصلين لمرحلة محددة من الحب انا وحبيبتي ولازم تكون مع رضاها وموافقتها رح اختمها بسؤال شو اللي بيجبرني انا وحبيبتي على ممارسة الجنس بعد الزواج ؟ بمعنى تاني هل كلمة "انا تزوجت" بتعني انو اجباري عليي مارس الجنس مع حبيبتي ؟ قد اكون سرحت عن الموضوع كتير بس حبيت وضح مفاهيم اساسية انطرحت بهالموضوع من وجهة نظر شخصية بحتة هاموش: بقص ايدي اذا حدا بيقرا ردي :lol: |
بالزمانات انحكا جدا بهالموضوع هون ..
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
انا معك هاني بكل حرف وبدي عالماشي احكي رأيي لانو خمس دقايق وبتبلش المحاضرة ,,, انا بشوف انو اي تنين بحبو بعض وصادقين في الحب الا انو يصير في جواتهن رغبة في الاتحاد الجسدي لانو همو متحدين روحيا ونحنا روح وجسد فكيف بدنا نفصل بين التنين لمجرد تقاليد او دين او غيرو؟؟؟ يعني الجنس شي اسمى بكتير من نظرة كتار الو هوي انعتاق للجسد من قيودو هوي الحب لما يكون تملك الانسان وفيني كفي بس بعد المحاضرة ما بدي انطرد منها لأنو,,,, وعجبني تلات اراء وانا معهن سياف وهاني وابو وليام وطبعا مع احترامي لباقي الردود |
الجنس لا كلمات لا تفسيرات لا قوانين ولا حدود الجنس اغماض صمت وسفر |
أنا رأيي ضد أنو الواحد يمارس الجنس قبل الزواج .. أولاً: أنو إش بكون خليت لبعد ما أتجوز؟ كل شي بوقته حلو .. كل شي بوقته حلو ثانياً: من الناحية الدينية .. كمان هالشي محرّم و أعتقد البنت الشريفه و المحترمة ، ما بترضى ع حالها تعمل هالشي مع أي شب قبل الزواج و أنـا شخصياً .. ما عندي إستعداد أفتح هالباب (إن كان بالكلام أو بالفعل) مع أي بنت .. بضل عندي خوف أنو بمجرد ما أفتح هالباب .. ثقة البنت فيني رح تنهز .. وهاد شي ما برضاه ، حلو موضوعك .. و أنـا رح ضل متابع حتى شوف بقية الردود و الآراء |
اقتباس:
انو الواحد ما بيتجوز غير ليشبع رغباتو الجنسيه! |
اقتباس:
لأ مو هاد القصد ، الواحد ما بيتجوز كرمال رغبة جنسية فقط .. (ولو أنو الجنس هوه سبب كمان من أسباب الجواز وما حدا بينكر هالشي) بس لـ هالموضوع بالذات إله خصوصية ، و خصوصيته بتجي بعد الزواج ;) و صدقيني كل شي بوقته حلو .. هيك أحلى:D |
اقتباس:
اذا هو في تنين بدن يعملو جنس قبل الزواج بيعملوا برأيي و بونو و برأيك و بدونو ..و إذا ما كانو بدن يعملوا فما رح يعملوا ...ان أخدو رأيي أو أخدو رأيك ! شغلة بين تنين ..شخصين يعني ..هني بقرروا سوا شو بدهن يعملوا ..إي لا أنا و لا أنت و لا المنتدى كلو فارق معهن ..و ع الحالتين. يعني ! |
| الساعة بإيدك هلق يا سيدي 13:58 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون