أخوية - الجزيرة الفضائية - مواعيد الفقش ع الريمتو و الإنتقال لمحطة اخرى -

كنا بموضوع سابق اتطرقنا لأحد اشهر مقدمي البرامج في قناة الجزيرة الفضائية "فيصل القاسم " في موضوع

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

ولما كان من اشارة في ذلك الموضوع لباقي المقدمين و باقي المزيعين سآتي هنا على ايجاز مواعيد التي بإستطاعتك ان تفقش على الريموت كنترول و تنتقل مباشرة بدون تفكير لمحطة أخرى _حين بتبقى فاتح الجزيرة_

لا ضرورة للقول ان كل ما أتيت به و سآتي به هنا هو رأي شخصي بحت و اخذك به او عدمه موضوع يعود لك ........

مقدمي البرامج و البرامج الحيّة

الإتجاه المعاكس : فيصل القاسم "تناولناه تفنيدا في الموضوع المشار بالرابط في الأعلى"

أكثر من رآي: سامي حداد

يا سيدي سامي حداد غريب غريب غريب .. غير انو كشكل هيك بيضرب على العصب "هوي فلسطيني" بس بتحسو بحواراتو بإسلوب حوارو "يهودي" يهدوي مش من نيح الإنتماء والإيديولوجيا .. لاء ، اصدي من مصطلح العامة بيهودي..
غير انو بيضرب على العصب بأسئلتو الغريبي (غريبة من حيث بليهة ، و بدائية ومالها نكهة) و بقلمو الي بيضل يلعب فيه ..
غير هذا الزلمي ما بيحتمر محاوريه او الي مستضيفهم ، بيعلي صوتو عليهم تارة، و بيسكت آخر تارة مقاطعا، وعلى ولا شي يعني .. هيك بس انو شخصنة .. بالإضافة لكل ما اسلفت ، بيعاني من مرض "غرور بي بي سي الجزيرة * "

بلا حدود : احمد منصور

احمد منصور بخلفيتو الإخونجية ما مزعج ، (فما بقاتو عم يبرز اخونجيتو فضائيا)، بس المزعج هوي احمد منصور بشخصيتو المؤوامراتية .. بعدو مصّر من لمن استلم البرنامج انو احنا العرب "شعب الله المختار" الي كل شعوب الأرض عم تتآمر علينا .. و متآمرة لتخلينا جهل ،وانو احنا رهيبين لو بيتركونا لحالنا ، بس كل جهلنا و بلاهتنا سببها الغرب و المؤامرات تبعتون ..
ناهيك عن ذلك شخصيتو الحواراتية و نظراتو هيك بنضارتو و رفعة حواجبو بالبوكر فيس هوي و عم يسأل بتضرب على العصب .. (اكتر دور بيحب يلعبو ، الشهيد الحي، بالمناسبة بيعاني من مرض تيسير علوني* ايضا)

حوار مفتوح : غسان بن جدو

مدرسة إعلامية كاملة متكاملة بحد ذاتو .. كيف ما زتيتو بيجي واقف ..
1- مهني مهني مهني ..
2- بيحترم ذاتو ، بيحترم المكانة الي هوي فيها "كصحفي" و بيحترم دور الصحافي بالمجتمع و الحياة العامة.
3- بيحترم الي عم بيحاوره مين ما كان يكون ، بيحترمه بالفعل بيحترمه .. مش عم بيمثل الإحترام ..
4- زلمي اخلاقي، عندو اخلاق شخصية عالية (بيفتقر لهذا الكثر الكثر)
5- زكي ، بديهة حاضرة دائما .. بيحضر برامجو من قلب و رب ولهيك بتطلع مميزة ..
6- جريئ فبيتطرق لما يعده البعض خطوط حمراء، لكن بنفس الوقت ما بيتعدى على خصوصية الآخر ، ولا بيتطرق ليها بطريقة محرجة او مهينة للآخر.. وانما بطريقة لبقة جدا ، مهنية جدا ..
7- لاحظلي انو الوحيد الي بيشكر الي ساعدوه بإعداد الحلقة فردا فردا ، من المصور، للمعد ، للمخرج ، لليلي بالكواليس .. وهذا ما بينم غير عن تواضع كبير و اخلاق عالية جدا ، و ذكاء عملاتي ..

بيعيبه شيئ واحد فقط: زوقو بإختيار التياب و الغرافيتات غريب بعض الشيئ :lol:
مع العلم انه مؤخرا ما عاد تلاحظ هال الظاهرة ، صار يلبس اشياء كول و موديرن حلوي فاشينبل يعني اكتر.. بس انو يعني ..
ايضا ما بيحلق دقنو لمن بيكون في احداث مهمة ، !! هذا كان بيزعجني بالأول بس هلق صرت انبسط لمن شوفو مش حالق دقنو ،
غالبا ما بيحلق دقنو لمن بيكون في احداث كتير متل ايام حرب لبنان الآخيرة متل هيك شغلات ، بتحسو ما عم بيلاقي وقت ليحلق دقنو اصلا .. فبيطلع شكلو مهدول على التلفزيون بس عاد هاي ميزة حلوي فيه مش سلبية ..

الشريعة و الحياة: عبد الصمد ناصر ..

هلق كان مضيف البرنامج الرئيسي الشيخ القرضاوي .. الشيخ القرضاوي كبر و صار ختيار .. يعني فيك تقول هيك حاجتو .. من حين للآخر بيجيبو شيوخ تلفزيونيين آخرين متل سلمان العودة و هيك .. هدول للآن لا بأس فيهم .. ولا غضاضة في انك تحضرلك شي حلقة "اذا مصّر" ..

من واشنطن : عبد الرحيم فقرا (حاليا هوي الي عم بيقدمو)

البرنامج بشكل عام ظريف ، و عبد الرحيم فقرا كتير زلمي منيح ، مثقف جدا ، متفاني بعملو .. بشكل عام من واشنطن برنامج منيح بس بطل متل قبل يتناول قضايا ساخنة مهمة للعرب بالفعل، _مؤخرا_ ، لسبب او لآخر صار إعادة للضوضواء الأمريكية بشؤون ما ، بس بيفضل برنامج مهم ، و انك تحضرو جيد ، خاصة اذا كان الحلقة بمحور ظريف ، لإن تقديم وادارة عبد الرحيم فقرا رح تكون حلوي، _هوي المقدم الي قبلو "حافظ الميرازي" كان اكثر حنكة _برأيي_ على الأقل بتوجيه منحى الحوار العام بحيث كيف ما كان الموضوع الرئيسي كان يعطي للمشاهد العربي معلومة مفيدة بحياته او إخبار عن خبرة ما هناك يمكن الإستفادة منها .. بس انو بيفضل منيح ..

منبر الجزيرة: ليلى الشايب..

اقلب مباشرة على قناة اخرى .. احسن ما يصيبك نكرزي ، احسن ما تبلش رجليك ترجف بمحلون مثلا ، او هيك .. الغلط مش غلط ليلى الشايب نفسها (مع العلم انها كمزيعة ممتازة بس كمقدمة برامج ما من النوع الي على كيفك ..) بس المشكلة ببرنامج منبر الجزيرة هوي المتصلين الي كلهم بين اصوليين ، و جهّل من المتحمسين يقولو اي كلام .. عاطفيين بدهم بس يبعبعو .. (بعرف انو بيمثلو شريحة واسعة جدا من العرب ، بس هذا ما بيبرر انو نخليهم يحكو على الفضائية ؟؟؟)

ما وراء الخبر: (بيقدمو كل يوم مزيع غير التاني، بس بشكل عام المزيعين الي عم بيقدموه كلهم لا بأس بيهم او اسلوب سير الحوار لا بأس بيه .. (غالبا لأن الأسئلة يتم تحضيرها جوا بالإستوديو و بيخبروهم ياها من الهيدفون فما كتير دورهم محوري بيكون _للمقدمين_ )

عموما في ما وراء الخبر ،،

لمن تكون "ليلى الشيخلي" #1 هيي الي عم بتقدم الحوار ف إحرص على حضوره ، محاورة ممتازة مهنية جدا ، مثقفة جدا .. مناطق و مخارج حروفها ممتازة ، لغتها جميلة .. وو جه حسن و طلة بهية.. :lol:

لمن "جمانة نمور" تكون عم بتقدم .. انو منيحة كتير جمانة كمان .. بس عاد بتحاول ما وجدت لذلك سبيا، انها ما تتمشكل بالحلقة و ما تحرج الي مستضيفيتو بأسئلة صعبة .. وعليه اوقات بتكون الحلقة باردي..

لمن "محمد كريشان" .. هلق كريشان بتسحو زلمي مسالم مسالم ليوم المسالمة والسلم ، يعني بيفكر الف مرة قبل ما يسأل الي مستضيفو شي سؤوال خوفا ما يحرجو مثلا او يستفزو .. غالبا حوارات كريشان بتكون باردي.. سلمية جدا .. و رح تسمع بالظبط الحكي الي بدو يقولو المُستضاف (الي محضرو) بمعنى آخر ما رح تسمع شيئ غير متوق، او ما رح يكون في سؤوال يخلي "المٌستضاف بالحلقة" يقول كلام مانو مجهز حالو ليقولو ..

لمن "خديجة بن قنة" تكون عم بتقدم.. خديجة يا صاحبي مهنية جدا ، و مخضرمة جدا جدا ، يعني بتبقى مبسوط بالحوار انت وعم تسمعه و بتبقا مبسوط بإسلوب ادارتها ليه ، وهون ايضا صوتها المميز بيلعب دور كتير مهم .. و طلتها حلوي "الحجاب الأبيض بيلبقلها اكتر من باقي الألوان و بيعطيها هيبة اكتر" .. المهم يعني خديجة ممتازة جدا ..

المذيعون

هم كثر جدا ، بس سآتى على بعضهم فقط ..

جمال ريان:

كمزيع ممتاز جدا .. بس ما تخلوه يقدم اي برنامج ، كمقدم برامج او محاور فاشل تماما ، على قد ما هو كمزيع مميز ..

جمانة نمو:

ممتازة ايضا، كمزيعة و كمقدمة برامج او كمحاورة اقصد

جميل عازر:

مخضرم جدا ، اي نعم كبر بالعمر هلق وصار يتأتئ شوي ، و بيتلبك لمن بيصير شغلة ما محسوبة ، بس بيفضل معلم .. بس لو بيخفف من مصطلح "ألا ترى ... ى ى ى ئ ئ ء ء "

ليلى الشيخلي:

ايضا تناولناها فوق، مذيعة متميزة جدا ، ذات حضور رهيب.. (ولهجتها على صوتها القوي ) بلكنة عراقية خفيفية هيك .. بيشدك للإصغاء اكثر، وطلعتها ونزلتها على الكلمات انو اصدي كارزما الإلقاء عندها منيحة

لونا الشبل :

فناني .. مخضرمة جدا ، عندها حضور مميز جدا و تأثير حلو، و ابتسامتها الي بتطالعك فيها بأول تقديمها او لمن بيصير شي هيك او هيك .. على وشها الي متل رغيف التنور السخن الطازة .. رهيبييييييييييي

إيمان عياد: :sosweet:
(باربي الجزيرة ..) ليها تأثير سلبي هاي .. انو لمن بتكون ايمان هيي الي عم تقدم النشرة مافيك تقلب ابدا مافيك تغير القناة ولا تطفي التلفزيون ، بس المشكلة انك ما رح تفهم شي من النشرة :lol:.. الصبيي حلوي لدرجة بضلك مبحلق فيها بدون ما تفهم شو عم بتقولو يعني ..

هذا انو بالمجمل..
هلق من نيح فهمنتها وادائها ، منيحة لا بأس، بس عاد كيف باردي شوي، انوما بتحرك راصها كتير ما بتعمل حركات بوشها ، ما عندها كاريزما اصدي ادائية ، بس هذا ما بيعيبها .. البنت ما بحاجي لشي لتشدك للنشرة ..

دام ايمان رح نختم بيها .فمنحكي شوي عنها ..
ايمان بنروة (اسمها سابقا) وحاليا ايمان عياد ، طبعا بنورة لإنها كانت متزوجة ولمن اتطلقت رجع اسمها للأصل ..
مشورهة بإم فراس .. اعتقدها فلسطينية .. هيك لكنتها يعني بتشير (بلحظات السهو عن الفصحة )..

اي وهاي كام صورة لباربي الجزيرة .. روقو اعصابكم فيها .. :gem:

-----------------------------
* مرض تيسير علوني:
بعد اعتقال يسير علوني و الحملة الإعلامية الشرسة الي قامت بها الجزيرة لرفعه لمصاف الشهداء الأحياء (هوي و سامي الحاج) .. صار في مرض بالجزيرة اسمو تيسير علوني، بيعاني منه جزء لا بأس به من المزيعين - مقدمي البرامج - المراسلين ، بتحس "والعيازو بالله" انو كلهم بصميم قلبهم متمنايين يصير فيهم متلو، متمنايين لو بيتم اعتقالهم لحتى يصيرو ابطااااااال.. فبتلاقي ما بيفوتو فرصة حدى نكشون فيها ليعملولك انو هني الشهداء الأحياء هني المضطهدين الخ الخ الخ ..
طبعا بتشتق من هذا المرض مرض تاني اسمو "مرض سامي الحاج"
هذا بيعاني منه المراسليين تحديدا و باقي المصورين بالجزيرة و باقي التكنيشن يعني.. انو بطريقة او بأخرى ما ظاهرة اعراض المرض على الملئ بس بيعاني منها جزء يسير جدا منهم ..

* مرض غرور بي بي سي الجزيرة:
هذا المرض بيعاني منه مقدمي البرامج و المزيعين القديمين تحديدا اكثر من سواهم ، بيتسم هذا المرض انو بيحسو حالهم انو هني الي عملو الجزيرة ، وانو هني لولاهم الجزيرة الفضائية كانت ولا شيئ، و انو هني الي بخشو الثقب الأسود !!..
اي هذا المرض بيعطي ايضا مظاهر الغرور والفوقية _على ولا شي_،
ومن اكثر الي بتصفو فيه هني القديمين بالجزيرة ، الي كانو فيها من وقت تأسيسها وخاصة الجزء الي اجا من بي بي سي العربية (كان في كمشة لمن سكرت بي بي سي العربية انتقلو للجزيرة بفترة فتحها او سحبتهم الجزيرة وقتها لعندها ، هدول عندهم احساس دائم انو هني الي اختارو اللون الأزرق للسما ، و بدونهم كان رح يكون لون السماء احمر او اخضر مثلا !!)

اقتباس:

كاتب النص الأصلي : مسطول على طول (مشاركة 621327)

ممكن تقلي رؤيتك للقناه المثاليه ؟

القناة المثالية متل سوبر مان ، شيئ بالخيال بس ..
مافي قناه مثالية حبيب، في قناة مسؤولة في قنواة بتحسب بالمسؤولية بالفعل حيال دروها بنشر الوعي و احداث فارق بالمجتمع ..

برجع بذكر بما قلت سابقا، القنوات الهادفة (كما اي مشروع هادف) لا تقاس بعدد المشاهدين ، وانما بعدد الأفراد الذي قدرت تعمل عندهم فرق، بكم التغيير الإيجابي الذي احدثته بالشارع ..

(من المعلوم ان اصغر قناة اباحية عندها عدد مشاهدين من العرب اكتر من اكتر قناة عربية اخرى ..)

بس بهذا الصدد فينا نحكي عموما:
لو بالمجمل ، فهلأ انا ما بشوف في متل ال BBC لا يعلى عليها.. (الأقرب عالميا على الإستقلالية والحيادية، مهنية جدا، حرفية جدا، و شاطرين بشغلهم من اظغر التفاصيل لأكبرها ..)
CNN كمان كتير منيحة (لو اهملنا الجانب تبع انها بتتأثر بسرعة بمجرى الأحداث الداخلي عندهم ، بس بيفضل CNNI العالمية انترناشيونال، ممتازة ، لإنو توجهها حتى يختلف كثيرا عن CNN المحلية، حتى انها بتحسها بالنهاي بتحاول تلمع الصورة الداخلية، او تدور الحواف الحادة للحكومة الأمريكية، بمعنى آخر بسي ان ان انترناشيونال القائمين عليها فهمانين الدور الريادة ليهم على الصعيد العالمي ، لهيك بيحاول لحد كبير يكونو حيادين مثلا او بطريقة او بأخرى ما يظهرو بمظهر البوق الحكومي..)
بس طبعا بين التنين هدول BBC احب على القلب..

اما في القنوات العربية،
(والكلام هنا في القواة الفضائية الإخبارية)
الحرة #1
الحرة يا سيدي الكريم، لا يعلى عليها ، يعيبها شيئ واحد ، و هذا الخطأ التاريخي الي عملوه ، انو بيبثو من اميركا .. والعرب عندهم حساسية مفرطة حيال الأميركان ، بالتالي اوتوماتيكا بطلو يشوفوها ، بدون حتى ما يعطو لنفسهم فرصة تجريبها كام يوم ليشوفو انها منيحة او مش منيحة ، اكسو XX عليها من قبل ما تفتح ، بس لإنها بتبث من اميركا ..

هلق لو بتشيل اميركا على جنب، يعني لو نفس القناة بنفس البرامج بنفس الصيغة تبعها بنفس كلشي ، و بتحطها تبث من القاهرة، من موريتانيا ، او حتى من الغرب الأوربي، فكان يا معلم رح تعمل بحالها وحدها ، نهضة عربية و تُحدث تغيير بالشارع ما شهد له التاريخ العربي مثيل من قبيل السرعة والمرونة والبناء السليم..

بحب نوه لنقاط التالية:
** باليوم بيمرق بين 4-6 سكيتشات عن معتقلي الرأي بالدول العربية: ونبزة سريعة عن كل واحد ، يوميا .. (من ميشيل كيلو، للبواني لحكم الباب.. لابرز معتقلي الرأي بكل بكل الدول العربية ...) وين الجزيرة من ذلك ؟؟؟ وينها عاملي حالها داعية حرية وديمقراطية ، وين ما شفناها جابت سيرة اي منهم غير بخبر عاجل سريع ، او بسب تايتل تحت بالنشرة !!؟؟ شاطرة الجزيرة تعملك انو هيي الي يابا مضطهدي والي عم بيسكرو مكاتبها و الي عم يعتقلو صحفييها والي والي .. وهوي كلو جعجعة بلا طحن ، بفترة قصيرة كان ليها دور ريادي بالفعل، كانت قناة جريئة بالفعل، بعد ذلك صار براغماتية ، خلص اكست على الفهم ، و صار همها الأول نسب الحضور وبس ،

** خود بالبرامج :
مثلا برنامج "مساواة" عن المرأة والرجل وما اليه .. يا سلاااااام على هال البرنامج ، يا سلام شقد في كمية وعي و بث وعي بالناس لشو يعني مساواة و شلون بتنعمل المساواة جزء من الحياة وليس منّة من الرجل للمرأة ..قمة في الرقي البرنامج .. بمعدتو و مستضافيها ..

برنامج "حكايات ..." حكيات مصرية، حكايات مغربية .. الخ .. لك الجماعة عم ينزلو على الشارع .. يعني باقي القنوات وعلى رأسون الجزيرة بيكتفو بالإستضافة للزعماء والبطيخ المبسمر و بيقتلوهم مع بعض، هدول بالحرة شو عم يعملو .. قالولك طز بالزعماء حبيب، خلينا ننزل ع الشارع ونشوف مين في بالشارة شو عم بيصير بالشارع بين الناس.. (شغلة رهيبة يا زلمي)
بيجيبولك هموم الناس الحقيقية ، مشاكلها اليومية ، البسيطة والمتواضعة (بالنظرة العامة ، بنفس الوقت هيي مصايب وبلاوي بالنسبة لهدول الناس)، مشاكل النصب و السرقة والإحتيال، و تجاهل الحكومة، و الفساد الداخلي، و فوق هذا بيلاحقو القضايا بإيدهم ، و بيضلو ورا الشغلة وورا الملفات المسكرة من سنوات وسنوات .. ليرجعو يفتحوها ..
انو بيشرفك في قناة تانية عم تعمل هيك ؟؟ كل القنوات التانية اولهم الجزيرة _وبضل لومها لإنها عندها المسؤولية الكبرى بحكم عدد المشاهدين الكبير_ ، بتلاقيهم حاطين رجل على رجل وشغلتهم يحاور فلان من الزعماء و يجيبو فلان يرد على فلان ، و فلان يلعي على فلان وفلا يراجع بوش فلان .. و بيأرفونا كلنا ..
ما فكرو ينزلو ولو ببرنامج واحد على الشارع ، يقعدو بين الناس ، يشوفو شو الناس بتحس، شو الناس رأيها ، (انو علي عيني شو رأي سماعيل هنية ، تسمعني ياه ، و تسمعني بعدو رأي محمود عباس، بس طز بالجوز .. الي متأثر فعليا هني الناس ا... الشعوب .. سمعني شو الشعب رأيو، شو الناس بالشارع عم بتعيش وتحس ، شو معاناتها .. هذا المهم )

برنامج عين ع الديمقراطية: ايضا رهيب، البرنامج بيرك بشكل عام على الخلايجة اكتر من سواهم ، و فعلا بيجبلك ناس من متنوري و مثقفي المجتمع هونيك يحكو عن مشاكل الا ديمقراطية والأنظمة .. عن مشاكل ، وعن حلول، عن شيئ ملموس مش تنظير و حكي من ورا الاساطيح ..

وغيرهم و غيرهم من البرامج ..

على فكرة انا كنت متلك و متليك ، ما بحضر الحرة بالمرة، _انو اميركية، معقو بالله اسمع للأميركان، ما الاميركان بدون يخلصونا مصرياتنا ، ما الأميركان بدهم ياخدو دررنا المكنوني .. الخ الخ من هال الحكي.. _ لحتى صرت امتعض من الجزيرة، لمن بلشت امتعض من الجزيرة وخاصة بعد حملة البرامج الوثائقية الأخيرة تبع النكهة المؤوامراتية .. (شي عن شي مدري من وين لاقطينو قال جيش الرب الي عم بيعدو ويرعاه الرئيس، عن كام واحد من الطائفة البروتستانية مدري الإنجيلية، كام ولد كبيرهم عمرو 12 سني، كشاف ، عملولك ياهم انو هني الي عم بيعدو لحرب كبرى وهني الي عم يعملو جيوش الرب ومن هال الحكي البيهوي، صار بدهم يقارنولنا بقا كام ولد ما عمرهم 12 سني، عم يتنطوطو ، بفيالق بدر، وجيوش المهدي، واحزاب الله، والطالبان انو بعبارة اخرى .. انو يا عرب شوفو .. ما تفكرو بس انتو بيطلع منكون سوس و عقولكم فيها صدي عم تنضح سلفيين و ارهابيين، لا .. ليكون بأميركا لقطناهم ، شلة طويلة عريضة اكتر من 50 واحد بين 10-14 سني .. ولا بسين مارينز .. هاه ، شفتو كيف ، حتى الأميركان بعد تجربة طويلة اكتشفو انو الحل هوي الإرهاب، قام صارو يفرخو ارهابيين .. ) :jakoush:

و عد على هال البرامج الموامراتية، شي عن تركيا (خلص صار بدهم يعلمو الأتراك الحرية، والديمقراطية، بواقع انو احفاد اتتاروك عم يعطو دروس بالعلمانية اليوم للأوربيين والأميركان .. بس الجزيرة بدها تصلحلون نهجون ، وتردون على الطريق الصواب .. لك اخي عاجبينكم اتعلمو منون و انشرو رسالتون، نشرو تجربتهم بلكت الدول العربية بتتعلملها بفرنغين منون ، بس ما تقلوبها فوق راصون و تصيرو بدكم تتفهمنو و بس شاطرين اتدورو على نكوشي صغيرة لتقولو هاه شوفو هاي الأتراك فشلو هون ، و نزعوها هونيك .. الخ .........)

اخي حاجي حكي بالموضوع ، بس شوف معلم الجزيرة لازمها تصليح مسار بأسرق وقت ، اذا ما عملت هيك رح يهجرها المثقفين بوقت قريب جدا ، و بهجرة المثقفين ما رح تخصر نسبة حضور 1% وانما رح تخسر كتير كتير كتير ..
الجزيرة اليوم ما عادت "قناة الجزيرة العربية "، الجزيرة اليوم صارت "قناة الجزيرة الإسلامية" بمعنى الكلمة، هيي بصف حماس و بصف الإخوان وبصف القاعدة و بصف كل الهوايش التانيين .. (انو في مقاطع فيديو للأشاوس حماس هني وعم بيدعوسو صور ابو عمار و محمود عباس ،.. حاطين صورون بالأرض بعد غزوة مقر الأمن الوقائي، وعم بيدعوسوها ،، الجزيرة ما جابت سيرتها .. ما حطتها ولو على عجالة.. بتفاجئ اني شوفها من BBC و CNN اليوم .. و الي من اول البارح لليوم على الجزيرة ولا جابت سيرتها .. انو يعني اذا حماس عم يرتكبو موبقات بتغضو النظر عنون .. ولمن فتح يعملو شي حركة بتنطو وما بتحطو .. اي حاجي بقا ، حاجي .. اذا فضلتو هيك ، رح تصقطو مع مناصريكم ..متل ما رح تُثبت التجربة الثيوقراطية الدينية فشلها ، رح ينسحب البساط من تحت رجليكم بنفس الوقت .. اليوم الجزيرة قوية وصوتها عالي لإنو ببساطة ما ليها منافس، بس سدقني مجرد يطلع قناة تانية عربية، بتبث من دولة عربية و بدون النزعة الإسلامية/المؤامراتية المبالغ فيها تبع الجزيرة ، رح تسحب البساط من تحت الجزيرة تشششششششك .. منغير ما يحسو ..

اقتباس:

كاتب النص الأصلي : قهوة دايمي (مشاركة 621601)

في مذيعة ما جبت سيرتها .. مع انو على مستوى عالي .. من الجمال والمهنية ... ( إلسي ابي عاصي )

اي معك حق ، بس لإنو لمن كتبت الموضوع كانت البنت عم تتزوج ، فقلت ما حلوي احكي عم مناقب الفقيد بهال الوقت يعني .. :lol:

اقتباس:

كاتب النص الأصلي : Danito (مشاركة 622441)

عجبني نقدك .. كوول : شكلك دارس إعلام و تواصل

لا مودارس اعلام ولا تواصل.. دارس بطيخ مبسمر (سمعان فيه اكيد..)

الي عم قولو ما كان بحاجي لواحد دارس اعلام ليلاحضو، هذا اي واحد بيقدر يلاحظو لو بيفتح عينو شوي، اي واحد اي واحد .. من زمان فيه يلاحظو، بس هلق صار فيك تلاحظو من غير ما تفتح عينك ولا شوي، صار عم بيبالغو فيه لدرجة انت و مسكر التلفزيون وشايف فيش الكهربا صار فيك تلاحظو :lol: