بوستر لأشهر المجرّات الحلزونية..


رابــــــــــــــــط لتحميل البوستر الأصلي بالحجم الكامل (622.8 كيلو بطاطا)

رابــــــــــــــــط لتحميل البوستر بحجم مناسب لاتخاذه خلفية لسطح المكتب (148.5كيلو بطاطا)


هالمجرّة بتبعد عنّا 28 مليون سنة ضوئية.. وبتمتد بالفضاء (قطرها يعني) 50 ألف سنة ضوئية (للمقارنة.. درب التبانة قطرها 100 ألف سنة ضوئية)
بس هالمجرّة.. من أكثر المجرّات "تحلزناً".. يعني أذرع هالمجرة شديدة الالتفاف حول مركزها
ومنشوف إنها "مـُـمـَـنـطـَـقة" بـ حزام من الغبار البينجمي.. عم يحجب ضوء النجوم بطرف قرص المجرّة..

الصورة ملتقطة من تلسكوب هابل الفضائي سنة 2003

هالصورة وصورة القبعة المكسيكية فظيعات :? وجزيل الشكر عالمعلومات

ونصيحة ليلي حابب يشوف الصورة يفوت على رابط المعترين :pos:

:D

بوستر لأشهر وأقرب السدم الكوكبية..


رابــــــــــــــــط لتحميل البوستر الأصلي بالحجم الكامل (583.7 كيلو بطاطا)

رابــــــــــــــــط لتحميل البوستر بحجم مناسب لاتخاذه خلفية لسطح المكتب (141.7كيلو بطاطا)


أول شي.. تسمية "السديم الكوكبي Planetary Nebula" هي تسمية "تاريخية" مانها "تسمية علمية"..
يعني هالسدم ما إلها علاقة بالكواكب متاتاً.. وإنما هي "نجوم منفجرة"..

منشوف بالصورة هالة الضو الحلقية هي مادة النجم اللي انفجر وبعثرها حولو..
أما جثة النجم.. فـ هي عبارة عن كتلة كتير صغيرة باقية بمركز السديم.. مبيّنة بالصورة نقطة صغيرة

هالسديم هيدا بيشبه نهاية شمسنا بعد 5000 مليون سنة

بيبعد عنا "ميسييه 57 " حوالي 650 سنة ضوئية فقط

الصورة كمان من تلسكوب هابل الفضائي.

الحكومة هون؟

يا مرحبا.. يا مرحبا :)


شوفي الصورة الجاية يا ساندرا

(أنا بقعد ببحلق بهيك صور ساعات.. ت جرّب إفهم شو دين رب هالكون اللي حوالينا!!)

-----------------

بوستر لأجمل السدم الناتجة عن الانفجارات النجمية..



رابــــــــــــــــط لتحميل البوستر الأصلي بالحجم الكامل (1250 كيلو بطاطا)

رابــــــــــــــــط لتحميل البوستر بحجم مناسب لاتخاذه خلفية لسطح المكتب (405.8كيلو بطاطا)


هيك سدم.. بتتكوّن نتجية انفجار نجوم أكبر من الشمس (من حيث الكتلة) بـ 3 مرات ع الأقل..
انفجارها بيكون هائل لدرجة.. إنها بتبعثر مادتها حولها بطريقة عنيفة جداً..
بالمناسبة.. الثقوب السوداء بتتشكّل من بقايا النجوم اللي متل هاي..

هالسديم هيدا إذن هو بقايا نجم منفجر.. منقدر نشوفو (بتلسكوب كبير طبعاً) بجهة كوكبة ذات الكرسي (بتبيّن بمنطقتنا بجهة الشمال الشرقي).. يمكن البعض بيعرف شكلها.. بتبقى متل حرف الـ W
إذن.. هالسديم مانو بـ كوكبة ذات الكرسي.. وإنما بيبيّن بجهتها بالنسبة إلنا.. لإنو بالحقيقة بيبعد تقريباً 10 آلاف سنة ضوئية عن هالكوكبة

شوهد انفجار النجم اللي سبب هالسديم.. لأول مرة على الأرض سنة 1600


بالمناسبة.. الألوان بهالسديم كلها ألوان حقيقية.. غير معالجة.

من هون.. قلت إني بقعد ببحلق بهيك صور ساعات!! :)


الصورة ملتقطة أيضاً بواسطة تلسكوب هابل الفضائي

وااااااااااااااو ماشاء الله كتير حلوين

اي شووووووووووووووووووووووو هاد حلوين كتير

بوستر لأشهر الحشود/العناقيد المجرّية..


رابــــــــــــــــط لتحميل البوستر الأصلي بالحجم الكامل (1890 كيلو بطاطا)

رابــــــــــــــــط لتحميل البوستر بحجم مناسب لاتخاذه خلفية لسطح المكتب (434كيلو بطاطا)


بصورة مجرّة القبّعة المكسيكية.. كل نقطة ضو صغيرة شايفينها.. هي شمس.. بينما بهالصورة هون.. كل نقطة ضو شايفينها.. هي مجرّة.. ولما نقول مجرّة.. يعني فيها ع القليلة مية مليار شمس..

فـ جرّبوا تخيّلوا -إذا قدرتوا- حجم المساحة اللي شايفينها!!

مرّة تانية

كل نقطة ضو بالصورة.. هي مجرة..
وكل مجرة فيها 100 مليار شمس (ع الأقل)
وكل شمس أكبر من كوكب الأرض بمليون مرة!!!

هاد الحشد يعتبر من أكثف الحشود المجريّة المرصودة.. وبيبعد عنا مليونين سنة ضوئية..

بالصورة منلاحظ بعض "أقواس" الضوء.. هي عبارة عن "أخيلة" وهمية لمجرّات بعيدة غير مرئية.. بيسمّوا هالظاهرة "العدسات الثقالية"..
إنو الكتلة الكبيرة (متل مجرّة) بتقدر تحني مسار الضو.. متل ما بتعمل العدسة


الصورة ملتقطة أيضاً من تلسكوب هابل الفضائي

بوستر لأشهر الحشود/العناقيد المجرّية..

رابــــــــــــــــط لتحميل البوستر الأصلي بالحجم الكامل (2740 كيلو بطاطا)

رابــــــــــــــــط لتحميل البوستر بحجم مناسب لاتخاذه خلفية لسطح المكتب (1890 كيلو بطاطا)


نفس الحكي اللي قلناه عن حشد آبل.. كل نقطة ضو شايفينها.. هي مجرّة..

ونفس الملاحظة عن "العدسات الثقالية"..

بس الفارق..

إنو هاد الحشد يعتبر من أبعد الحشود المجريّة المرصودة.. حيثو بيبعد عنا 2.2 مليار سنة ضوئية
يعني.. ألفين مليون وميتين ألف سنة ضوئية!!


حشد هابل البعيد بيضم حوالي 1500 مجرة


الصورة أيضاً من تلسكوب هابل الفضائي سنة 1995

ضل تيليسكوب هابل الفضائي عشر تيّام فاتح العدسة تبعو حتى قدر لقط هالصورة!!

يسلمو كتير ناصر عالصور الروعة
الحلو بهالتلسكوب أنّو فيه الواحد وين ماكان أنو يشارك معون بالبحث والتنصّت.
الحواسب التابعة لهالتلسكوب ما بتكفي لمعالجة الكم الهائل من المعلومات يلي بيستقبلوها يومياً، لهيك أطلقوا مشروع اسموا SETI@home مقرّو جامعة باركلي بامريكا، يلي حابب فيه يشترك بالمشروع وبهالطريقة بيصير الكومبيوتر الشخصي جزء من كومبيوتر التلسكوب.
حالياً في أكتر من 5 مليون مشترك، كمبيوترات المشتركين بالإضافة للكمبيوتر الاساسي سرعتون بتوصل لـ 80 تيرا فلوبس.
التيرا = ألف غيغا
فلوبس= وحدة قياس تعبر عن عدد العمليات الحسابية بالثانية
للمقارنة: مدّة المعلومات الي تعالجت من سنة 1999 لهلّا بواسطة هالشبكة تقارن ب 2 مليون سنة تقريباً :shock:

ما شاركت معون لهلّا بس متل ما سمعت أنو لازم ننزل برنامج خاص، هالبرنامج بيسجل مقطع صوتي عجهازنا وبيطالع نتيجة التنصت:lol:، بعدين بنبعتها للشباب تبع المشروع و فينا نتطلع عليها او نسمعلها.

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

ما المشكلة إذا سمعنا أو سمعوا شي فمكن يكون الصوت صرلو كم مليون او مليار سنة بالطريق لحتى وصل لعنّا

المشروع طلعت فكرتو مع واحد من طلاب الماجستير بعد ما انقطعت المساعدات الرسمية (المادية) عن البرنامج.. فـ ما بقى بيقدر معهد SETI إنو يستخدم كومبيوترات ضخمة (متل كومبيوترات ناسا).. فـ

الشرط الوحيد للاشتراك بالبرنامج إنو يكون الكومبيوتر موصول بالإنترنت مشان تحميل الأرصاد..
الحسابات بتصير بوضعية "شاشة التوقف".. البرنامج اللي بيشتغلها حجمو حوالي 1 ميغا.. المفروض ياخد تنزيلو تقريباً 170 ثانية على مودم 56 كيلو بطاطا (لإنو البرنامج مضغوط فـ حجمو 341 كيلو بطاطا)

البرنامج سهل الاستخدام.. وطبعاً ما في داعي يكون الكومبيوتر موصول بالإنترنت ديماً.. البرنامج بيشتغل على وضعية "شاشة التوقف"..


فـ يالله.. قولوا الله.. واشتركوا..
لإنو أيا مشترك بيكتشف إشارة فضائية.. رح ينزل إسمو جنب إسم معهد SETI