|
من يدافع عن مجرمي "الشرف"؟
هؤلاء...
 عمر محمود العلي جرائم انعدام الشرف اقتباس:
شب عتيق لازم براءة اقتباس:
سؤال لرجال الدين اقتباس:
براهيم شي متل الكزب اقتباس:
منتوف الله يهدي الجميع و يهديني أولهم اقتباس:
مجموعة تعليقات على الأخبار المتعلقة بالملتقى الوطني حول جرائم الشرف في موقع سيريا نيوز. نقلا عن مدونة - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - شخصيا أنا عاجز عن التعليق... هل من معلّق؟ |
انا شايف انو التقدم الي حققناه هو انو صار في هناك من يجرء على رفض جرائم الشرف ببلدنا . هذا بحد ذاته تقدم حقيقي لأنو لحتى وقت قريب لم نكن نسمع هذه الاصوات الرافضة بوسائل اعلامنا وبمجالسنا وحتى دور العبادة.
هذا النوع من الجرائم متأصل في الفكر العربي البدوي وفي العقلية التي لم تنشأ وتتشكل بلحظات بل نتيجة ظروف مر بها خلال عقود . بتصوري هناك امل بالتغيير الفكري الذي هو اهم من التغيير القانوني الذي كان طوال سنين ومازال الى الان يقدم التسهيلات الى المجرمين. الحل الحقيقي يحتاج الى وقت وهكذا تعليقات لا تفاجئني ابداً لأنها تظهر الفكر الحقيقي للسواد الاعظم من شعبنا. وللأسف سوريا ما تزال تتربع على قائمة اكتر الدول جرائم شرف على وجه كرتنا الارضية فهذا هو الحال على حقيقته ولا نسطتيع اخفاءه. |
اقتباس:
الا لعنة الله على هذا الشرف التنكي |
طيب يعني على هيك حكي شو بدي قول
هدول ناس ما في مجال للحكي معهن وما بدي قول شي تاني.... ما عم بفهم شو هي العقلية الي عندهن والمصيبة ادا بكونو هدول بعدهن شباب عم بستنى اليوم الي بنبطل فيو نسمع عن هيك شي بس بالوقت الحاضر يا ريت تسمو هي الاشيا جريمة تياسة او جريمة حيونة بكون احسن ............ |
شو بدو الواحد يحكي , تخلف تخلف تخلف
الواحد منن بتلاقي منداس على شرفو وكرامتو من قبل شرطي ممكن يضربوا بالشارع وما بيطلعلوا يرد او يعترض على كرامتو المهدورة , بس شرفو بيطلع على هالمخلوق الضعيف اللي اسمها انثى |
طيب .... برأيكون ..و بصراحة ...
شو السبب ..؟؟ و ليش منشوف هيك ثقافة بمجتمعنا ..؟؟ |
اقتباس:
لأقتلكم جميعا... دفاعاً عن شرفي لأنكم أنتم من دنس شرفي .. وليس زنا أهليتي وليزنوا ما استطاعو اليه سبيلاً ... لأنكم من دنستم شرفي و.. هــــــزُلت |
اقتباس:
انا جدا متشائم بهي النقطة .. خصوصا بفكرة الثقافة والوعي الاجتماعي للشارع العربي حل القصص ما حيبدا من هون وحتى تنحل في كتير اشياء لازم تتغير .. |
اقتباس:
في عدة اسباب من ضمنها أن المجتمع الشرقي الذكوري تربى على عادات وتقاليد معينة توارثها من الآباء والأجداد هاي العادات والتقاليد تتضمن التعصب الشديد بأي موضوع يمس المرأة وشرف المرأة وردة الفعل العنيفة على أي مساس بتلك المواضيع ... خط أحمر لارجعة عنه أنا شخصياً لست مع أو ضد ... لاتعصب تام ولاانفتاح تام .. لاقدر الله ان وقع أحد بتلك المشكلة فهنالك حل سهل لكي يضمن مكانته بالمجتمع ولا يتكلم احد عن عرضه بالعاطل الا وهو التبرء من البنت وأعلان البراءة منها على الجمهور لكي يعرف الجمهور أنه قد قام بواجبه في الحفاظ على سمعته ومكانته الاجتماعية ... هذا حل مناسب لمنع قتل الشرف واهدار دم أمرأة يمكن أن تتوب من فعلتها وتصحح غلطها لاحقاً ... سؤالي لك مادماكس ... تخيل نفسك قد وقعت بتلك المشكلة بأحدى قريباتك لاقدر الله ... ماذا ستكون ردة فعلك تجاهها .. وماذا ستكون ردة فعلك تجاه زملائك واصدقائك ممن علموا بما وقع لك وماذا ستتوقع ردة فعلهم تجاهك بهذا المجتمع الشرقي ؟! انتظر منك اجابة صريحة انا اسئلك هذا السؤال لكي اعرف ماهي ردة فعلك كانسان منفتح وعلماني واقارنها بردود افعال المتعصبين والمتزمتين بمجتمعنا آسف عالاطالة :D |
اي عنا موروث نحنا مهم يعني .و الحمد لله ....ما حدا قدنا عنو موروث بالعالم كلو ...متفوقين جداص بموضوع الموروثات ..و التقاليد و المستحاثات و هيك قصص ....حتى انو في احتمال يعطونا ISO 2009 , اي بشرفي .
هلأ انا شخصياً بعتقد انو اليهوج هني ورا هالموضوع ...نعم اليهود هني من يقف وراء جرائم الشرف و من زمان يعني ...لانو من اكتر من 2000 سنة و قت و قف المسيح و قال : من كان منكم بلا خطيئة فليرمها بحجر ) ,كان عم يحكي يهود , و اليهود هني الوحيدين اللي عندن حكم برجم الزاني , و على خلاف الاسلام , و على خالاف ما يعتقد غالبية المسلمون , و على خلاف ما يطبق بعض المسلمون ...مافي ولا حتى اشارة لرجم الزاني بالقرآن ....ابداً يعني ...و على ما يبدو أنو يهود خيبر طلعوا من خيبر و تركوا وراهن عاداتهن المقرفة لتتخبى بالعباءة الجديدة ..و ليدخل الرجم و الشبح و هالحركات اللي ماالها علاقة لا بالانسانية و لا بالحيوانية حتى و تستقر ضمن الاسلام !!!...و الخلط القائم لدى العامة بين الدين و الموروث هو خلط طبيعي , لانو غالبية شعبنا ما بيعرفوا يفرقوا , أصلاً ما بيعرفوا يقروا ...هني اي مانن أميين يعني ..بس ما بينفع يقروا..و عنترة بن شداد هو نفس الشي يعني متل صلاح الدين ..و ابو شهاب ع شوي بكون نبي ..و اللي بقولوا الزعيم تقريباً منزل ..و قيسوا على هالمسطرة...و بالتالي بدنا نتحمل النتائج , ما بكيفنا يعني , بس بدنا نتحمل . و الله أعلم يعني ! |
اقتباس:
حكي نظيف مسيو أب نهلة.. حتى بدون دخان بتظلك كبير يعني:larg: لأ جد.. معك حق كبير بقصة الدين و الموروثات.. و طالما هالشي محفور حفر براسنا, فصعبة.. بدا شغل... |
لو قلبنا الآية ... وشي بنت هيي الي قامت بجريمة القتل -يعني قتلت زوجها اذا شافتو مع وحده تانيه او اذا شكت فيه - هل يا ترى كنا بنشوف نفس الروح من التعليقات؟
|
اقتباس:
|
اقتباس:
|
اقتباس:
بتوقع انو المشكلة كل مانها عم تاخد ابعاد اكتر ولك مانها عم تكتر كون مجتمعنا بشكل عام عندو الاحساس بالعجز بالشرف سواء بالعمل او المجتمع ... يعني عنا جالة عجز واحساس بانتقاص للرجولية بسبب سحق المجتمع للانسان ... يلي بيتبهدل كل يوم شي من شرطي شي من رئس عمل.. لك احيانا حتى من عامل الخدمة بيحاول انو يثبت وجودو بشي تاني تافه بس بهدف الاحساس بالنفس .. وللاسف غالبا المراة هيي يلي بتدفع الثمن لانها المجال الوحيد يلي بوفرو قانونا للرجل ... اكيد في حالات اخرى هيي التعصب او التخلف بس هي الظاهرة منتشرة حتى ضمن بعض الفئات يلي بطلق عليها متعلمة .. و للاسف مسحوقة |
اقتباس:
اقتباس:
|
الحل بايدنا نحنا ومسؤوليتنا نحنا
مو بس هون باخوية لاننا كلنا متفقين انو هي عادات خطأ مسؤوليتنا بالشارع وبشغلنا وبمدرستنا مع جارنا او زميلنا بالشغل . لو صار وتكلمنا عن هالموضوع نعلمو الفرق بين الدين وبين العادات بين الصح والخطا . بيجوز بدو وقت بس كل واحد بيغير شخص حواليه وهيك لحتى نصل للصح والمشوار بيبدى بخطوة وانا شايف انو قربنا لنصل مو بعيد .... |
اقتباس:
هلأ لحتى ما يصير أزمة مصطلحات و كل واحد يغني على ليلاه ( مع انو انا بحب غني على ليلاليي بشكل عام يعني ) . بس قبل ما نفوت بالمصطلحات بدي حط هالحديث : اقتباس:
هلأ منجي للمصطلحات : الزنا: شو هو الزنا .بالنسبة للشريعة الاسلامية الزنا هو :وطء من مكلف في فرجٍ حرام في قبل أو دبر , يعني ببساطة هو وطء المرأة من غير عقد شرعي . أما بالقانون المدني لفرنسي مثلاً فالزنا هو : اتصال جنسي أو معاشرة جنسية بين شخص متزوج وشخص آخر أياً كان هذا الشخص، وأياً كان نوع هذا الاتصال الجنسي،و هي تصنف تحت خيانة أو نقض عهود الزواج . اذاً و بدون ما كتير نفوت بالتفاصيل فالزنا هو مختلف بين المفهوم الشرعي و المفهوم القانوني, من وجهة النظر الشرعية أي شخص مكلف ( يعني واعي و راشد ) ممكن يزني اذا حقق الشروط ( اللي رح نحكي عنها بعدين ) و بيتعاقب حسب الحالة , و الزنى هو فاحشة من الفواحش ...بس هو فاحشة كبيرة يعني. بالقانون العلماني , الزنى هو فعل لازم تكون متزوج اصلاً لحتى تكون مؤهل لارتكابه , و غير هيك ما بكون زنى ..و بينطبق مفهوم الفاحشة على أمور تانية الها علاقة بالقرابة و العلاقة مع قاصر مثلاً ..بس يعني هاد ما هو الزنى اذا بدكن , بيدخل بباب الجريمة اكتر يعني كمفهوم غربي علماني . هلأ لنرجع أنو كيف منحكم أنو هاد زنى أو لاء , بدنا نمير بين الشرعي , و القانوني العلماني . شرعياً لحتى يثبت الزنى بغير الاعتراف لازم يكون في اربع شهود شافو بنفس المكان و الزمان عملية دخول حشفة الذكر داخل فرج الانثى الاصلي بين شخصين محرمين لبعض و مكلفين و بدون اكراه . و هاد هو الزنى اللي بيستوجب الحد , اساساص الزنى هو فقط اللي بيستوجب الح , و ما بقية الفواحش اذاً هاد هو الزنى تقريباً , يعني انا ماني مفتي ولا شيخ بس انو هيك شي الموضوع .و غير هيك بكون مانو زنى , يعني مثلاً , واحد و وحدة من غير هدوم و ع تخت , و واصلين لهزة الجماع مثلاً بس ما دخلت حشفة الذكر بفرج الانثى , اي ما بكونو عم يزنو ...الله وكيلكن يعني , بكونو عملوا فاحشة , او سيئة , او هيك شي , و ما حدا الو معن شي , و لا بيتحاسبو.و مثال على هالشي مشهور يعني : اقتباس:
و الحد هو 100 جلدة و تغريب عام , في حال كان الفاعلين غير متزوجين , و الحكيم هو 100 جلدة و الرجم في حال كان الفاعلين متزوجين . و هون نقطة الخلاف بموضوع الرجم , نظرا لكون النص القرآني واضح بهالموضوع , بينما مؤيدي نظرية الرجم بيعتمدوا على احاديث و سير نبوية . اما بالنسبة للقانون العلماني , فتحديد وقوع جريمة الزنى بكون عن طريق المحكمة , و التحقيقات , عن طريق شهود , بالاستجواب , عن طريق تنصت ع مكالمات هاتفية , تحاليل طبية , اي شي بينفع بعلم الجريمة يعني , و في حال تم فعلأ اثبات انو احد طرفي العلاقة الزوجية عم يخون الطرف الاخر بعلاقة جنسية بطريقة او باخرى يعني, بكون في احكام قضائية ضد هالطرف و بتتنوع بين الطلاق و الغرامات المالية , و السجن , و هيك قصص يعني . اما ما يتعلق بالعلاقات الجنسية خارج اطار الزواج ف هيي شرعية بمعظم الدول العلمانية بشروط العمر و و خلافو , بس انو يعني هي لا تدخل في اطار الزنى , هي اما علاقة شرعية ما بتخالف القانون , او انو فغي جنحة او جناية بالموضوع , بس مافي زنى و الحمدلله يعني :lol:. هلأ منجي عاد للخلاصة: 1- الزنى بالمفهوم القانوني \العلماني\ الغربي : ينحصر بالمتزوجين و لا ينحصر بالجماع و عقوبات احكامه لا تصل الى القتل 2- الزنى بالمفهوم الشرعي الاسلامي : لا ينحصر بالمتزوجين و لكن ينحصر بالجماع و ليس ما دونه , و عقوبات احكامه تصل الى القتل رجماً في حالة المتزوجين , مع الاشارة ان حكم الرجم محل جدل من قبل علماء المسلمين نظراً لكونه يخالف النص القراني . 3- جرائم الشرف في سوريا تأتي في اطار لا علاقة له لا بالعلماني و لا بالديني الشرعي , و تطبق فيها معايير و مفاهيم من قبل مرتكمي الجرائم و مخففي العقوبات على السواء لا يعرف مصدرها ,ولا أصلها , و ليس لها نص مكتوب, أو معايير دقيقة . :shock: 4- الحقيقة الواضحة الوحيدة هي ان جرائم الشرف تتعلق بالشرف وحده و ليس بالدين او القانون , و إن عملية تحديد مفهوم الشرف في هذا الاطار تبدو مهمة صعبة للغاية :lol: 5- رأيي الشخصي المتواضع أنو الفقرة المتعلقة بتخفيف الاحكام بقضايا الشرف هي فكرة أبو شهاب , من حيث انو هو ما بيحكي شكلين يعني , و من حيث انو الزلمي شواربو بهدي عليهن النسر .و هو مضطر و ما عندو اي خيار تاني غير انو يقتل مرتو او اختو او امو او ستو اذا غلطت و مسكت ايد شب , لانو ما بعود عندو مجال يرفع راسو قدام عضوات الحارة , و بيتنكس عقالو , و بصير ينحكي عليه انو عكروت :frown:..و طبعا الف كلمة الله يرحمها ولا كلمة عكروت . و ختاماً لا يسعنى الا ان نستذكر قول الشاعر: لا يَسلَمُ الشَرَفُ الرَفيعُ مِنَ الأَذى حَتّى يُراقَ عَلى جَوانِبِـهِ الـدَم اي هلأ بكون في واحد عم يهز براسو , و مبوز هيك و اخد موقف ,. و عم يقول مزبوط...هي من زماان كتير حكاها الشاعر و قال لا يسلم الشرف الا اذا سال الدم ..اذا ما دبحتا بكرا بتفلت و بتفلت غيرها , لازم تنقتل ( سمايلي حمار ) هاد الواحد اللي عم يفكر هيك , بحب وجهلوا رسالة شخصية ....: ليك حبيب قلبي . الشرف الرفيع اكيد هاد ما شرفك يعني , و حتى اذا فرضنا انو شرفك , ما حدا عاطيك رخصة تغسلو بدم اختك او مرتك ,او امك , و اذا بدك تفهم شو معناة بيت هالشعر , ف هو يوسف العظمة وقت كان بميسلون ,و كان عم يحارب بشرف , و استشهد وسال دمو هو وكل الشهداء الابطال اللي معو ليدافعو عن وطنهن ..ليدافعو عن اخواتهن , وامهاتن , و زوجاتهن ....يا بجم ., يا كركدن , يا متخلف :jakoush: |
| الساعة بإيدك هلق يا سيدي 09:15 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون