|
المعارضين الطائفيين والموالين الطائفين
شباب في موضوه هام كتير وانطرخ بعدة مرات وهو انو البعض بيعارض لأسباب طائفية،من ناحية اخرى في كمان كتير عالم هي موالاة لأسباب طائفية وكنا نشوف هادا الشي من خلال كتابتن المنتدى
يعني بعض المعارضين الطائفيين بيعارضوا النظام لسبب واحد وهو بكونو الرئيس مو من طائفتين وبعض الموالين بيناصروا النظام بسبب انو بشوفو النظام حامي لطائفتن او بشكل أعم حامي للأقليات بشكل عام وهاد شفنا من تعليقات كتير من شباب أخوية شو رأيكم بالموضوع هاد أليس الموالي الطائفي مثل المعارض الطائفي؟ وهل مع المعارضين الطائفيين الحق في معارضتهم بكونهم اكثرية؟؟ وهل مع الموالين الطائفيين الحق في موالتهم بكونهم أقلية تريد حماية نفسها ؟ بتمنى المشاركة من الجميع وانو نحافظ على عدم التجريح بأي مكون من مكونات الوطن السوري |
اقتباس:
لأ أنت عم تحكي عن الطائفيين منهن.. هلأ الحكي يلي بدي قولوا مو بس عن سوريا عن أي نظام كان.. هلأ أنا برأيي نحنا مالازم نلوم موقف أي حدا بيناتهن لأن التنين موقفهم نابع من مصلحتهم يعني الموالي موافق عالنظام لأن مصلحتوا محققة والمعارض معارض لأن مصلحتو مو محققة.. برأيي يلي لازم نلوموا هو طائفيتهن لأنهنن التنين أحكامهم نابعة عن طائفية وعدم التفكير بمصلحة الآخرين يعني أحكامهم عن النظام مو صادرة عن موضوعية.. صادرة بس عن التشبث بالرأي و التفكير بالنفس وعدم التفكير بالآخر.. يعني أي نظام الو حسناتو والو سيئاتو لو الموالين اعترفوا بالسيئات والمعارضين اعترفوا بالحسنات.. يمكن كان انوجد حل للجهتين.... مجرد رأي:D |
تسجيل متابعة
ومشكور سلفا على الموضوع |
والله يا حبيب انا براي انو المشكلة اجت من وقت ما اجا النظام !!
لانو اذا بدنا انكون واقعيين وديموقراطيين ما حنفكر لا بطائفي ولا مذهبي ولا شي لانو حيكون في انتخابات مبنية على اسس صحيحة اكيد ما جيكون في شحن طائفي لانو وقتها الي بينتخبو الشعب ان كان سني او علوي او مسيحي .... الخ هو الي حيحكم!! انا براي الحل لمشكلة الطائفية هي بتغيير النظام وبعض مواد الدستور الي بتنص انو يكون الرئيس مسلم سني وللاسف ما اطبق هل الشي من 1970 وقت ما اجا حافظ !! يعني لازم يكون في احزاب علمانية بحتة واتصير الناس تنتخب الي بدون يمثلوهم على اساس الاقدر والافضل مو على اساس ابن الضيعة او قريبي او من طائفتي ! ووقتها انشاء الله يجي رئيس يهودي بس يكون وطني وبيحب سوريا وبيحب شعبو انا ما عندي مشكلة |
هلق الموالاة الطائفية او المعارضة الطائفية أكيد وبدون شك وجهان لعملة واحدة وكلاهما ينظر الى الأمور من زاوية واحدة وهي الحماية للطائفة.
لو كانت طبيعة مجتمعنا غير مبنية على الانتماء الطائفي ولو كانت الثقافة الليبرالية والعلمانية تدرس ويربى عليها الجيل كحل لحماية المعتقد وحرية الانسان وحقه في المواطنة على اساس انتماء وطني هنا كنا جميعاً رفعنا صوتنا بدون اي شك وبجرأة كبيرة. أما وأن هناك طائفية دفينة وتيارات دينية تتحرك وتنتشر ثقافياً و اعلامياً في المجتمع فـ لا بد من الوقوف قليلاً. العودة الى الوراء وزمن حكم الطائفة الواحدة أو الحكم الديني أياً يكن مرفوض (نقطة أولى ). النظام الحالي طائفي الشكل ولكن لا يحكم حكم ديني ولا يلزم أحد بمعتقدات محددة ولكنه لا يكرس الانتماء الوطني ولا يمثل نظام ليبرالي حر ( نقطة ثانية ). التقدم وحكم الليبراليين للوصول بالمجتمع الى التقدم والازدهار هو المطلب ( نقطة ثالثة). أنا برأيي لو تقاطعت النقظة الأولى مع الثانية سأختار الثانية لا لشئ فقط للحماية من فرض نظام محدد على حياتي بشكل كامل وحرماني المزيد من حقوقي الموجودة في النظام الحالي منها حرية الملبس والمعتقد والاختلاط وما شابه. أما لو تقاطعت احدى النقطتين الأولى أو الثانية مع الثالثة فسيكون الخيار الثالثة بدون شك . لي ولشركائي في هذا الوطن ومهما كانت طبيعة الحكم. عشتم وعاشت سوريا. |
ما بعرف ليش بس أنا هالموضوع ما اقتنعت فيه .... لأنو بتكوين المعارضة السورية ما بتشكل الطائفية منها ألا شئ جزئي كتير وهالشي بينطبق على عدد كبير من المعارضين السوريين العلويين
و بالطرف التاني ما منشوف أنو الموالاة هي عباراة عن الطائفة العلوية فقط ... وماني شايف أنو الطائفة العلوية مستفادة من حكم الدكتور بشار ( الي هو أبعد رجل بسوريا عن الطائفية ) و يمكن هو ما بيعرف شو العلوي و شو السني أنا بعتقد طرح الموضوع بهالتعميم هادا مبالغ فيه .. الموالي الطائفي تماماً نهايته متل المعارض الطائفي لأنو التنين هدفهم شخص طائفة مو وطن ولا قضية |
كلما تأثر الفرد او المجتمع بأثير التخلف كلما جهل عدوه وسارق لقمة عيشه ,
فالمسيحيين يعتقدون باستمرار التخلف طالما ان الإسلام يحكم والمسلمين السنة يتهمون العلويين بأنهم اخذوا القسم الكبير من الكعكة والعلويين يقولون جماعة اللاذقية اخذوا البيضة والتقشيرة وجماعة اللاذقية يتهمون القرداقة والقرداحة تقول بيت فلان وعلان والخ منذ الأزل يعيش تحت نافذة السلطان ... فقراء !!! |
والله يا حبيب اذ1 بدنا نحكي على النظام هو طائفي لانو لاحظ انت المراكز الحساسة بايد العلوية وكل افرع المخابرات بالبلد رؤسائها علوية مع احترامي لكل الطوائف بس هي الحقيقة وبعدين في نكهة خاصة على هاد النظام انو كمان غير انو طائفي انو هو عوائلي ! يعني لو اطلعنا لشفنا اصف شوكت ومجد مخلوف وحسن خلوف ومضر الاسد ولشفنا ماهر الاسد ولشفنها بهجت سليمان ولشفنا من الناحية الاقتصادية رامي مخلوف وابنو لبهجت سليمان امجد على ما اظن (كيف صار معون مصاري الله اعلم)
فمنهون منشوف انو النظام او بشار الاسد ما بيثق غير بطائفتو هي تمسك الجيش والامن وهل الشي بيصير لانو اكيد بيضل في خوف من انقلاب متل ما عمل الاب (القائد) حافظ !!!!!!! طبعا نحن بدنا حكم علماني وهل الشي ما بصير بالمطلق الا اذا صار في تعدد احزاب وصار في انتخابات حرة ونزيهة وقتها مين ما طلع لو كان من اي طائفة ما حيكون عليه اعتراض بشرط يحكم بدورتين كحد اقصى ! |
بهجت سليمان من عائلة الرئيس ؟ :shock: هي أول مرة بسمع فيها
تاني شي منرجع لآصف شوكت الي كان من المراكز المهمة بالدولة قبل ما يصير صهر الرئيس تالت شي أنت ذكرت 3 أسماء من أصل قيادة سورية فيها العشرات اذا ما قلنا المئات بقى هالـ 3 أسماء دليل على أنو الدولة قيادتها طائفية و كمان عوائلية ؟ اذكرلك أكتر من 200 أسم قيادي بسوريا مستلمينهم المسلمين السنة و كمان مراكز مهمة مستلمينها المسيحيين بسوريا يعني المراكز المهمة والحساسة بالبلد ما بيشكل الطائفة العلويةمنها ألا ما ندر و حتى لو كان كلامك بأنو بعض المراكز المهمة مستلمتها أشخاص على علاقة قوية و حتى أقرباء السيد الرئيس فهادا حق طبيعي ألو ... أي حدا بأي مركز كان بيحط ناس ثقة عندو بأماكن حساسة حتى يكونوا معو ضد أي شي ممكن يصير بالبلد |
اقتباس:
|
بهجت سليمان بيكون قريب امو لبشار الاسد وانت شفلي مركز مخابرات مستلمو انو رئيسو سني او مسيحي او اي شي ؟!
السنة ولا المسيحين مستلمين مناصب بس كلها مناصب سياسية مدنية !! وهدول الي ماسكين اهم شي بالدولة يعني شو بدك احلى من هيك نحن مالنا مملكة او امارة او سطنة مشان يحط قرايبينو ومافي حدا بالعالم بيحط على كيفو هي جورج بوش كان حاطط صاحبو وحبيب ابو رامسفيلد لما غلط حلقلو وشفلي دولة متقدمة بالعالم بيحطو قرايبينون وصحابون باهم المراكز ايه شو مزرعة هي عميقسمها ولا محل الو عميديرو هي بلد يا حبيب بلد فيها 20 مليون جوا ومتلون برى عميحكمها واحد شغل هاد اخوي لاجيبو وهاد ابن خالي وهاد ابن ضيعتي ؟!! بصير هل الحكي لو هل الحكي بغير دولة اكيد كنت حكيت غير هل الحكي !! بيعجبك الحكم بالسعوية مثلا !! انا بشبه العلوية للامراء بالسعوية او للشيوخ ببياقي دول الخليح انو صارو هنن مستلمين البلد من ناحية الحكم ومن ناحية الاقتصاد ! البلد للكل ولازم يكون في تداول للسلطة مو بس اذا حدا استلم لبين ما يموت ليجي غيرو ومن نفس العجينة بدنا تغير وبدنا علمانية ! |
اقتباس:
يعني ممكن يكونوا بالحكم لأنن بيستحقوا هالشي ولانن جزء من أفراد المجتمع ومتل ما الباقيين الن حق بالحكم كمان هنن الهن حق بس مو معك بتبرير هالشي يعني مافينا نقول حق أي رئيس يحط قرايبينو بالحكم مشان يدعمو.. لأن لازم هي المناصب تكون للمستحقين وأصحاب الجدارة.. ومين ما كان بهالمنصب لازم يدعم قرارات الرئيس لو مو من القرايبين مجرد رأي:D |
اقتباس:
الموظفين سنة بس القائد الكبير تبعون علوي يعني رئبس الافرع كلها علوي وهون المهم ولو كانو العلوية اكتر من هيك ما تخاف ما كان النظام فرط بفرع واحد ملاحظة : انا بحترم العلوية بس ما بحترم النظام |
اقتباس:
لك اصف شوكت شو اختصاصو ؟!!!!!!!!!!!! اختصاصو تاريخ صار رئيس المخابرات العسكرية !!!!!!!!! يعني هي قمة المسخرة ! يعني اذا بدو يحمي حالو بشار معناته بيعرف حالو غلطان وعميعمل شي غلط وبيخاف يصير انقلاب مع انو على اساس كل الناس بيحبو !! اذا واحد عميعمل صح ما بيخاف من حدا وكلامك دليل انو بتعرف انت انو هو بيخاف !!!!! |
اقتباس:
قسماً بالله نص الضيع العلوية ما عم تشبع الأكل وفي عدد كبير من الضيع لسا لهلأ ما وصللها المي و الكهربا يا خيي أنت شفت من العلوية هم كم واحد المستفيدين من نفوذهم و أقربائهم بالدولة أما البقية ... صدقني لولا البرتقال والليمون والزيتون و البندورة عمرهم ما بيشبعوا لقمة الخبز |
له يا حبيب !!! انا قصدي العلوية الي بالسطلة او الي محسوبين على السلطة ! اما البقية بعرف عايشين بضيعون بس مو فقرا اذا بدك تشوف الفقر روح على المنطقة الشرقية وبالاخص شمال شرق سوريا يا حبيب هنيك مافي ماي وكهربا اما سميلي اسم ضيعة علوية ما عندها ماي وكهربا خلينا انكون واقعيين وما نحكي هيك بالهوى !
انا امي من اللاذقية المدينة وكل ما انزل على سوريا بلف المنطقة كلها من طرطوس لحمص للاذقية وشايف انو احلى الضيع هي ضيع الساحل وما بتلاقي ضيعة فقيرة او تحت خط الفقر بتلاقي ضيع متواضعة بس مافي فقر ! بعدين انا بحترم جدا العلوية او اي طائفة تانية لانو مافيك تحكم على الانسان من معتقدو بس انا لما قلتلك انو متل امراء السعودية وشيوخ الخليج قصدي الي بالحكم او مدعومين من الحكم متل رامي مخلوف !! طيب بدي قلك شغلة بتعرف انو اذا بدك تشتري حديد للبناء بسوريا مافيك تشتريه الا من شركة وحدة صاحبها واحد بيت الاسد والله انسيت اسمو ! واذا بدك اتجيب فيك اتجيب بس شوف اديش بيطلع عليك جمرك !! وشوف الحديد الي هو بيجيبو بيدخلو بدون جمرك وبيبيعو اقل من المجمرك بشي بسيط !! وشوف عمو رامي كيف محتكر الاتصالات وشوف بهجت سليمان وابنو محتكرين قطاع المجلات الاعلانية متل الوسيط !! هي اذا حكينا شوي بالاقتصاد وبالسياسة بتعرف البقية هدول متل الي بالسعودية الامراء بيكون كل امير مستلم شي هدول نفس الشي |
اقتباس:
انا بظن اني كتبت كلمة "بعض" وكلمة بعض تنفي التعميم بشكل مطلق كمان أنا ما قصدت طائقة بحد ذاتها،أنا قلت الأقليات يلي انا بنتمي أرثياً لأحدها يعني لاحظنا كتير بالمنتدى أنو بعض الشباب أعترفوا بسلبيات النظام لكن قالوا أنو النظام هو الحامي للبلد وأنو البديل رح يقضي على الأقليات وهنن بيقصدو الأقليات الدينية يلي ممكن تكون مسيحية علوية وغيرها طبعاً موضوع المعارضة كمان انا شفت أنو البعض من المعارضين وهنن قلة كما ذكرت أنت بيعارضوا بسبب طائفي وانا وسبق ووكتبت موضوع عن هذا الشي بالمنتدى يعني في بعض لمعارضين وهنن قلة باكد على هل كلمة كانوا مؤيدين للدكتاتورية العراقية المتمثلة بصدام حسين ويلي ما بتختلف عن الديكتاتورية يلي بعارضوها غير انها مو من طائفتن فيعني ما بعرف كيف البعض منن كان يحكي بالديمقراطية وهنن أتباع لصدام حسين النسخة الأخرى للديكتاتورية البعثية في المنطقة حالياً بتشوف بعض المعارضين يلي مع السعودية ويلي هي سيئة جداً أيضاً حتى مثلاً بموضوع المرأة وحريتها سوريا أفضل بألف مرة،يعني تخيل بعيد الحب الماضي السعودية منعت الورود الحمر بسبب أنها تغري شوف التفاهة على الرغم من هيك في معارضين بيراهنوا على السعودية ودورها في تغيير النظام مع انو النظام السعودي قد يكون أسوأ من النظام السوري طبعاً برد بكرر وللمرة الثانية أنو هاد ينطبق على قلة بالنسبة للموالاة في كتير بوالي فقط لانن من طائقة معينة وانت بتعرف هادا الشي أكيد،في عالم بشوفو انو وجود الرئيس الحالي هو حامي للطائفة مع انن كطائفة غير مستفيدين بشكل عام غير قلة منن،أنا مثلاً كتير عالم بطلت تحكي معي من طائفتي الأرثية(بكوني لا أعترف بالدين والطائفة لهيك عم قول أرثياً يعني يلي ورثتها عن أبي) كمان في بعض الأقليات الاخى مثلاً مثل المسيحيين يلي وضعهن جيد بسوريا منذ تاريخ سوريا،على الرغم من خيك في بعضهن بظن انو الحكم الحالي حامي لإلن والامر ينطبق على بعض الأقليات الأخرى هذا واقع وموجود وطبيعي في ظل نظام ديكتاتوري حين لا يفكر أحدهم بالإنتماء الوطني وحين يطغى الإنتماء العائلي والقبلي والعشائري والطائفي على الإنتماء الوطني لي عودة |
هلأ في معارضة طائفية؟ في طبعا... الاخوان مهما حكى البيانوني طائفيين... مو بس ضد الطوائف الأخرى انما حتى ضد الناس اللي ما بتفكر متلهون... فكر أخونجي من الأساس هيك ما بأيدهون
المعارضة طائفية؟؟؟ يا جماعة في كتير فئات معارضة علوية.... السلطة طائفية؟ السلطة بيهمها الولاء أولا و أخيرا... و الولاء يمكن يجي قبل من العائلة.. ما بعرف يجوز هيك. بس انو العلوي بوابو مفتوحة أكتر من غيرو؟ لأ مو صحيح هالحكي... مفتوحة البواب للي بيعرف يلعب ع قدو و يخلي اللي أكبر منو يلعب... علوي مسيحي سني .. حتى كردي... ما بتفرق هون |
| الساعة بإيدك هلق يا سيدي 15:46 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون