اللي مهتم بدراسة CMA بطريقة ذاتية يشرف لهون بالله
 

سلام للجميع,
يا جماعة, CMA من أكثر الشهادات أهمية هي ومثيلاتها مثل و, CFM , CFA , CPA وبالتالي كل الشباب اللي بيفكروا صح بمستقبلن بيهمن أمر الحصول على هيك شهادات, بنجي ع دراسته, CMA هي عبارة أن أرع كتب, خفيفة نظيفة مابدها وجع راس, معلومات ع الغالب مارة معنا بالكلية أيام الدراسة, أربع كتب بأربع امتحانات, وراتبك بيدوبل, وبدن مبالغة, فيك تدرسها بطريقة فردية أو شخصية self-studying أو تنتسب لمعهد وبتحط هديك الحسبة ع لفاضي لأنو مافي شي رح ينحكي بلمعهد جديد عليك.

فاللي مهتم بالموضوع, ياريت يعبر عن اهتمامو هون, مشان انشكل حلقة دراسة ونحن بنساعد بعضنا البعض, اللي فهمان شغلة بيشرحها للي مو فهمانها, وبنعمل لحالنا معهد داخل أخوية بس موقائم ع المادة, لأ قائم ع الأخوية.

شو صار معكن يا جماعة

هلا بدكن اتفوتوني بالحيط إنو,بسورية كلها مافي حدا مهتم بهالشهادة, العمى إذا صحيح:shock::shock:

بدك تعرف العالم الاول شو هي ال cma وبعدين وقتها يمكن تلاقي حدا بدو يدرس معك ،

وبدك تكتب بالاول عن الاربع كتب وموضوعاتها وهيك !
طبعا هاي مجرد وجهة نظر فيك تعمل فيها او تتركها .

وشكرا على موضوعك :D

لك يا أخي CMA هي شهادة عالمية معترف فيها من كل الشركات على مستوى العالم وأشهر من النار ع العلم, بس تكرم عيونك رح جهز كم كلمة عن هالمووضع مضيفو

أنا أضفت موضوع عن بعض أشهر الشهادات العالمية وخاصة المحاسبية منها ع هالرابط هاد بتلاقوها

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

هلاء العالم عرفو معلومات عن الشهادة بس ماعرفو شو هي الموضوعات اللي بالكتب الاربعه ,

على كل حال انا من المهتمين بشهادة الCFA
وال cma ممكن افوت اشارك معك بدراسة وشرح بعض الموضوعات الادارية والغير محاسبية او المشتركة بين الجانبين . وشكرا

يا أخي الكريم الشهادة أشهر من إنو تم تغافلها من شبابنا, وببحث بسيط ع النت فيه الواحد يحصل على كلشي بدو اياه.
بالعموم الكتب الأربعة هن كالتالي:
1- تحليل اقتصادي ( بيحوي الجزئي والكلي وماشابه من المواضيع )
2- ادارة استراتيجية.
3- محاسبة ادارية.
4- قضايا اقتصادية.

أما بخصوص حضرتك فأنا متلك كنت بفضل هديك الشهادة,خاصة وإنو اختصاصي علوم مالية ومصرفية, بس ع أرض الواقع لقيت إنوCMA أسهل بكثير من CFA وخاصة من حيث الإمتحان وطبيعتو والكتب وماشابه, بعدين في فائدة بـ CMA إنو بس تحصل عليها في مادة إو مادتين ( لأني ماني متأكد ) بتقدمن لتحصل على شهادة مدير مالي معتمد CFM واللي هي قريبة كثير من CFA وبالتالي بتكون مدخل ممتاز إلها.

ع العموم بيسرني التعامل مع واتشرفنا.

كنت سمعت من زميل باحد الكورسات في رمضان اللي فات بمعلومة تؤكد اللي قلتو انت من انو في ماديتن مشتركين بينهم ولذلك كتبت اني على استعداد للاشتراك ببعض الموضوعات الادارية او المشتركة بين الادارة والمحاسبة .

على كل حال بدي اعرف كيف شو الفكرة اللي براسك من حيث خطة الدراسة ؟

أخي اشب اللي ساكن معي عم يدرسها, لأ المنهاجين مختلفين تماماً بس مثلاُ في التحليل الإقتصادي مشترك بين الإثنين بس مو نفس النقاط المطلوبة مشتركة بين الإثنين, وبالتالي إذا بدك تدرس CMA فلازم تعتمد على منهاج معين مو نفس المنهاج الموضوع للـ CFA

أما خطتي فهي بسيطة, انحدد منهج من المناهج الموجودة ونبدأ فيه دراسة وبحث وأسألة وبننشئ قسم ضمن أخوية خاص بهالموضوع ومراجعو وأسألتوا ..... الخ ومنو نستفيد من أهل اللغة الإنكليزية فيما يصعب علينا شرحو, شو أيك أخي محمد؟ بس الموضوع بيطلب تفاعل الكل.

أنستي الموضوع مو موضوع 3 أشخاص, أنا بطمح إنو يكون في قسم لهالشهادات والكل يساعد الكل, يعني أنا ولا إنتي ولا الأخ محمد لشو بدنا نتعب حالنا ونترجم إذ ماكان في حدا رح يتعب معنا ويستفيد, بعدين الشهادة باللغة الإنكليزية ودراستها كمان لازم تكون بالإنكليزي والإمتحان بالإنكليزي فموضوع الترجمة هو فقط لتسهيل الأمر على البعض بالفترة الأولى أما بالعموم لازم يكون حتى تواصلنا باللغة الإنكليزية, لأنها لغة الكتاب, فلما حدا يطرح سؤال بيكون بالإنكليزي والجواب كمان وهيك.......

العقدة مو بالمعلومات العلمية بالشهادة لأنها مارة مع الجميع ممكن مو بالشكل المثالي بسع ندو فكرة أولية, المشكلة باللغة الإنكليزية مشان هيك اللمة بتفيد الكل.

شكراً ع مرورك, بس إذا قدرنا نجذب الأعضاء بعدد جيد لنبلش سوا, بيكون كثير كثير ممتاز.

اصلا مارح يفرق معي المنهاج لاني مابعتقد رح اقدم للاختبار (رح اعتبرو من باب التجديد للي بعرفو ومن باب العلم باللي مابعرفو ) انا معك على كل حال .

* من ناحية انشاء قسم خاص : انا هون من فترة طويلة وبعرف شو بيصير بالمواقف المشابهة ، فكرتك مفيدة جدا ولكن لو كل 4 او 5 اتفقوا على فكرة جيدة وطلبو انشاء قسم مستقل لتنفيذ الفكرة ، ممكن عدد اقسام المنتدى يصير فوق ال500 وطبعا هاد عمليا رح يشتت المنتدى باكملو ،

اذا بدك رأيي ما في داعي هلاء من انشاء قسم جديد مستقل ( نحنا نبدأ بعمل موضوع رئيسي لكل فرع او محور وكمثال يعني نعمل محور للمحاسبة الادارية وهاد يكون الو موضوع رئيسي ونحط فيه عناوين الموضوعات اللي رح ندرسها (مثلا : مراكز المسئولية ،المخزون السلعي ، هكذا) وبعدين نعمل موضوع مستقل لكل عنوان (يعني نعمل موضوع مستقل لمراكز المسئولية ولما ننتهي من مناقشته ودراسته نعمل موضوع جديد للمخزون السلعي ، و اذا مع الوقت زاد عدد الاعضاء المشاركين معنا وزاد عدد الموضوعات بطريقة ملفتة للانتباه واغرقت القسم ، وقتها رح اكون اول المطالبين معك بضرورة انشاء قسم مستقل ،

وفيك تلاحظ مع الوقت انو هالقسم اللي بنكتب فيه هلاء مختلف عن كتير من الاقسام ، مابينزل فيه موضوعات كتير وفيك تعتبرو من هلاء قسم مستقل بينك وبين حالك :D

بناءا على طرحك هون بدي قول التالي:

بقترح انو مثلا شخص واحد يستلم محور وليكن المحاسبة الادارية ويكون هو المسئول الرئيسي عن الشرح وبنفس القوت ممكن يتفاهم مع اي مشارك او احد من غير المشاركين انو يشرح الموضوع بدلا عنو لاي سبب
يعني مثلا على فرضاني انا هو الشخص اللي مسئول عن المحاسبة الادارية ، بالتالي بكون المسئول عن شرح اي موضوع بالمحاسبة الادارية على فرض اني بعرفو او عندي خلفية تمكنني من شرحو واذا لاي ظروف ما رح اقدر يبقى بتفاهم مع احد المشاركين بالبرنامج معنا او خارجو انو يشرحو للي مابيعرفو (هاد في حالة وجود حدا بدو ينشرح الو الموضوع )

انا ما عندي مشكلة باني اشارك بالشرح باي محور من المحاور الاربعة بصورة مبدئية :D

انا مؤمن جدا باهمية هالشهادة من الناحية العلمية وبعرف انو الراتب الشخصي ممكن يوصل ل10 اضعاف بعدها
بس انسى انك تلاقي عدد كبير يتابع معك وباللغة الانكليزية !!!

انا شخصيا ما كنت رح تابع بالانكليزية (لو في حدا بدو يفهم فكرة او جزء او نظرية ) وانا بعرفها رح اشرحها الو بالعربي ، انا مارح يهمني انو العالم تفهم مني بالعربي او بالانكليزي المهم يفهمو ولما يكون بدي اعرف شغلة او فكرة رح يهمني اعرفها منشان العلم (ومارح يهمني اعرفها بالعربي او بالانكليزي ) انا صعب اشرح لحدا بالانكليزي ومارح اضيع وقتي بالترجمة (انا مستوايا باللغة الانكليزية متوسط ) وباخد وقت بالترجمة لاني بترجم على 3 مراحل ولما يرتبط الموضوع بالعلم وبدي دقة بترجم على 4 مراحل ، مستحيل اشترك لو اللغة انكليزية
كوني مارح ادخل اختبار ال cma اصلا . ولكن على كل الاحوال تاكد انو في شخص هون مستعد يساعدك اذا كان بيقدر على المساعدة (باللغة العربية ) باي وقت :D

* في ملحوظة للعالم هون : ممكن اتمامك لدراسة موضوعات الاربع كتب تاخد من عمرك سنين (على حسب تفرغك واجتهادك وقدرتك عالتحصيل ومستواك باللغة الانكليزية)
ممكن تخلص ب3 سنين وممكن 10 وممكن اكتر :D

لك يا جماعة والله ع راسي إنتو, وأنا معك بأنوا انشاء قسم شغلة بكير كثير عليها بس الأساس مهم, أخي محمد, بشكر دعمك وبقدرو بس المشكلة إنو الموضوع مو موضوع عربي, أنا والحمد لله كنت الثالث ع دفعتي, فبالعربي بغزل غزل متل مابيقولوا, بس الشهادة بالإنكليزي والفحص كذلك و بالواقع الشغل كمان بالإنكليزي, يمكن هلا إنت عم تقول لأجل العلم بس بعدين يتقدر قيمة الشهادة مزبوط مزبوط. بكل الأحوال, الموضوع مابيتطلب منك لغة انكليزية ممتازة لأكثر من سبب, الأول إنو المعلومة اللي قدامك إنت بتعرفها بالعربي فلما تقراها بالإنكليزي رح تتعرف عليها بسرعة وبسهولة وتعمل اسقاطات فتقوى لغتك لحالها. وثانياً إنو بهيك أحوال الخطوة الأولى أصعب شي, بس بعدين بيصير الموضوع كرج.

الشهادة مابدها متل ما حكيت أخ محمد سنين أو ماشابه, بالعكس بتاخدها بأشهر قليلة, لأنو هي مصممة لتكون كسبر لمعلوماتك وليس امتحان لمعلومات جديدة عم تبحث فيها.

أنا حابب اعمل شغلة مع ولاد وصبايا بلدي, حابب انبلش موضوع CMA وبعدها أو خلالها نلتفت للتحليل المالي الفني والأساسي وخاصة إنو بين ليلة وضحاها ممكن يقولونا إنو هي فتحنا سوق دمشق للأوراق المالية. بس بدي حدا يشتغل معي لأنو الإيد الوحد مابتصفق.

انا مابدي اقف في وجه فكرتك حتى لو وقوفي بوجها رح يجي باني اتركك هالموضوع واخرج برا ،

انا مابقدر اوعدك اني اكون موجود دايما هون او عندي وقت كافي لاستكمال المشروع ، انا معك حسب ظروفي وباللغة الانكليزية متل مابدك :D

واله يامحمد إنت كفو, الله يسلم قلبك, انشالله بتكون هالمشاركة كبداية حلوة إلي وإلك ولطفولة ولك الأصدقاء اللي حابين يتعلموا شي مفيد على أرض الواقع.

وأنا هون بدي قول كلمة, يا جماعة, CMA أهم بمية مرة من الماجيستير والماجيستير بتاخد من وقتك سنتين أما هي فكم شهر مو أكثر, الماجيستير متعلق بالجامعة المانحة أما هالشاهدة فهي عالمية, الماجيستير وهاد الأهم نظري أما هالشهادة فهي مصممة لتكون شهادة فنية عملية يعني من أرض الواقع. ع القريب رح انبلش باذن الله.