|
علي العبد الله: لندرس التجربة الديمقراطية اللبنانية
وصف ناشط سوري معتقل الانتخابات اللبنانية بأنها "عرس ديمقراطي"، ودعا السوريين إلى دراسة هذه التجربة من أجل "رفع نسبة الوعي بالديمقراطية" في سورية.
وقال علي العبد الله، عضو الأمانة العامة لتجمع إعلان دمشق للتغيير الوطني المعارض "أهنئ الشعب اللبناني الشقيق على نجاحه في الانتخابات البرلمانية، التي تحولت بفعل الممارسة السلسة لحق التصويت والقبول بنتائج المباراة الديمقراطية إلى عرس ديمقراطي، وأنحني لوعي اللبنانيين الوطني والديمقراطي" وفق تعبيره. .وكالة الأنباء الأيطالية .................................................. . هامش : كنت ناوي اذكر كلام عضو الأمانة لأعلان دمشق يلي هو مسجون مع ابنو بسوريا بموضوع المنبر ..بس تفاجأت انو الموضوع مغلق ..على اي حال ..كلام الأستاذ علي العبد الله بيعطي فكرة انو الأستفادة من الأنتخابات اللبنانية لنزيد وعينا بشي اسمو ديمقراطية مانو كفر ولازندقة هدا كان كل شي حبيت قولو ...و ماشي ,,,قصرناها للسيرة .. |
الديمقراطية فعلاً هي شيء جيد، ولكن رجاءً لا يضحك أحد علينا بتسمية ما جرى في لبنان انتخابات ديمقراطية، ففي النهاية فازت المعارضة ب 54% من الأصوات وخسرت، وفازت الموالاة ب 45% من الأصوات وربحت!!! باٌضافة إلى قانون انتخابات عجيب غريب لا يمت إلى الديمقراطية بصلة، والرشاوى العلنية والتهديدات، والتجييش الطائفي. أنا أعيش في لبنان وما أقوله ليس ترداداً لأخبار الصحف أو المحطات التلفزيونية وأنما ما رأيته بعيني أثناء الانتخابات، لذلك رجاءً فليبحث السوريون عن تجربتهم الديمقراطية ويبنوها بأنفسهم ولكن ليس على النموذج اللبناني المعتمد فقط على البروباغاندا.
|
اقتباس:
اسف اذا كان سؤالي شخصي ...حضرتك سوري و عايش بلبنان ..او لبناني ...اذا حضرتك سوري ...ما فيني احكي شي ..هي بتبقى وجهة نظرك متل وجهة نظر كتيير من السوريين هون ...و اذا لبناني ...بحب قول انو من الأحرى تترك المعارضة تبعيتها للنظام السوري ...قبل ما نتكلم عن البروباغاندا ..او قانون الأنتخاب ...لأنو برأيي..التبعية هي ..كانت سبب الخسارة و شكرا |
اقتباس:
|
حلو المزج بين الديمقراطية والطائفية
فعلا شي حلو هالتجربة بهنيون كيف قادرين يكونو ديمقراطيين والطائفة هيي يلي بتحركون ديمقراطية ياعمي يتهنو |
انا مع دراسة التجربة اللبنانية .. مو من باب تقليدا او ايجاد صيغة مشابهة الها
من باب التعلم من التعفيس الصاير فيها النموذج اللبناني فريد من نوعه بيعتمد على الطائفية بشكل اساسي لدرجة انه بدل ما يتحرر من الطائفية وينتقل لنموذج المواطنة منشوفه عم يشتغل على مفهوم الطائفية اكتر من المفهوم الديمقراطي آخر الخلطات اللبنانية الطائفية وآخر التحديثات شفناه بالانتخابات الاخيرة وقت مصير فوز النائب " المسيحي " من عدمه معتمد على معدل الاصوات اللي رح يحصل عليها من الناخب "المسلم " كون المسيحيين منقسمين سياسيا وصوتن غير محسوم ونعم التطوير ونعم الديمقراطية .. |
برأي الشخصي المتواضع..يلي صار بلبنان شي كتير عظيم وبهنين من كل إلبي..
انتخابات حرة..مرئت بدون مشاكل امنية..بدون عنف.. اظهرو مستوى حضاري بالانتخاب..وهني يلي ميطلعو من حرب ميفتو بلي بعدها.. شي عظيم فعلا..بهنيين.. بس ابدا ما بظن انو الديمقراطية بلبنان مثل يحتذا فيه..ما بتصير مثل يحتذا فيه حتى يصير في بلبنان رجال سياسي.. وحاليا بلبنان.. مافي غير رجال الحرب ورجال الدين. |
هلق انو الديمقراطية الللبنانية مليانة عيوب هي ما بيختلفو عليها اتنين, وانو لبنان صاير بسبب طبيعتو الطائفية شبه بلد كمان مظبوط وانو هالديمقراطية تبعن مو خرج تكون مثال يحتذى به صح
بس بتخيل لو واحد لبناني شافنا عم نتمسخر على ديمقراطيتو رح يقلب على ضهرو من الضحك بلد من 1963 ما صار فيها ولامرة انتخاب لبرلمان حر, ولامرة انتخاب حقيقي لرئيس الدولة , بلد ما بتعرف اي نوع من انواع حرية الاعلام او حرية التعبير ومع هيك منقعد نتمسخر على اللي حوالينا, يعني متل الاعمى اللي عم يضحك على الاعور |
وين الديقراطية يلي الصوت فيها ب 150 دولار او شو مكان الرقم يكون؟
اللبنانيين يلي عايشين بسوريا قسم منهون انتخب للمعارضة وقسم انتخب الموالاة يلي انتخب الموالاة رجع و بجيبتو 150 دولار تقريبا راتب شهر هي ديمقراطية هي:o:o:o |
اقتباس:
أخي أنا ما بعرف ليش عم ينفهم كلامي انو نحنا أحسن أو هيك شي... فقط و فقط عم قول انو النموذج مانو قدوة, و سياسيين لبنان مانو لا قدوة و لا رمز لشي أبداً ! بعتقد مالو علاقة قصة بالتانية يعني... قصدي انو الجزء المقتبس فوق لا يتناقض مع: اقتباس:
قصدي اللي بالأحمر... نحنا لازمنا نتعلّم, مزبوط ما منختلف, بس نروح نتعلّم من المزبوط, او نخلق تجربة مبنية على قدوة أو مثل أو شو ما كان.... مزبوط, مو نروح نقتدي بلبنان! يعني بالنهاية بعتقد حكينا متوافق مع بعضو لو بس مقتبس حكييك و كاتب "أنا معك" كان وفرنا كوم حكي :lol: |
اقتباس:
معلش تشرحلي شو هي الديمقراطية لكن؟؟ |
اقتباس:
مو هاد حيكنا ومو هاد اللي عم نعلق عليه القصة قصة الديمقراطية المبنية على الطائفية شو رح يكون السقف تبعها ؟ مع أول تصادم آراء رح ترجع الطائفية للسطح وهلشي شفناه بصورة مباشرة وبغير مباشرة بأكتر من مرة بتاريخ لبنان الحديث بس مع هلشي مو غلط واحد يتطلع على تجارب البقية بالنهاية التجربة اللبنانية فيها نقاط ايجابية ممكن نستفيد منها -إذا- مع الأيام صار مشروع مشابه للحكومة اللبنانية |
اذا بتسمحو الي شارك على استحياء مشاركة رمزية
العالم بتسأل عن الديموقراطية (الديموقراطية هي حكم الشعب ) بالنسبة للانتخابات : الديموقراطية بالانتخابات انو لما يكون بدك تعطي صوتك لمرشح ما ، صوتك يروح الو بدون اي تلاعب او منع وهاد صار بالانتخابات اللبنانية ، ليش مابدكون تقتعو انها كانت انتخابات ديموقراطية !!!؟ مشان التجييش اللي صار وحشد الاصوات ؟ مشان الدعوات الطائفية اللي كانت موجودة ؟ مشان بعض الدوائر تم شراء اصوات فيها ؟؟ والى اخره ؟ كل هاي تحفظات على التجربة واشياء سلبية بس بالنهاية كل انسان عطى صوتو لمرشح بالفعل وصل الصوت الو وهاي بحد ذاتها انجاز صعب تحقيقة بغالبية الدول العربية . لا اريد الخروج عن فكرة الموضوع الرئيسية كثيرا بس مايحدث بباقي الدول العربية بعيد تمام في اغلب الاحيان عن الديموقراطية ، فصوتك لايذهب لمن تعطيه له بل يذهب لمرشح الحزب الحاكم بل يحدث ما هو اكثر من ذلك لقد امنت تماما ان الاحزاب الحاكمة تحيي وتميت مثلما يفعل الله فتجد اصوات الاموات داخل صناديق الاقتراع فتقف مذهولا امام عظمة تلك الاحزاب فلقد وصلت قدرتها الى حد بعث الموتى من جديد واصوات الاخياء الذين اعطو اصواتهم لمرشحين من خارج الاحزاب الحاكمة يقومون بقتلها وخنقها . اللبنانيون سيتعلمون من اخطائهم وسيتعلمون من تجربتهم ولاشك في ذلك ، لا تولد الشعوب على افضل نحو وصورة بل تسعى جاهدة للوصول الى تلك الصورة عبر التعلم من اخطائها بالتجارب السابقة . |
اقتباس:
مو نقعد نتمسخر علين متل ما شفت البعض عم يعمل, ونحني ما عنا اصلا شي اسمو ديمقراطية |
اقتباس:
|
اقتباس:
برأي الشخصي المسيرة اللبنانية على الخط هاد لازم تتوقف اليوم قبل بكرا لأن ما منها نتيجة بالمرة .. الشعب اللبناني بحد ذاته يعتبر من أكتر العالم المتطورين فكريا وثقافيا ، بس المنوذج الديمقراطي المتبع حاليا بلبنان ما بيتوافق ابدا مع ثقافة ووعي الشعب اللبناني خلينا بفكرة الانتخاب نفسا على ايا اساس الرئيس اللبناني يجب ان يكون ماروني مثلا؟ على عيني الموارنة كلن بس يعني الله خلقن وكسر القالب ؟ يمكن .. لا ياسيدي مو يمكن .. أكيد في أشخاص من بقية الطوايف بيحملوا مؤهلات أكتر من المرشحين الموارنة وبيمتلكوا كفاءة لشغل هلمركز .. شو يعني لانه من غير طايفة ما عاد بحقله يترشح على هلشي ؟ يا عم ما هوي لبناني متله متل الرئيس الحالي الماروني فالتشكيك بهلشي ممكن نسميه ديمقراطية وعدالة بالحكم ؟ السياسيين اللبنانيين طلعوا بشي اسمه اتفاق الطائف ومشيوا عليه على مبدأ انه الحل الوحيد للتعايش ولتهدأة الاوضاع ، لو سألنا حالنا بالاساس مين اللي شعل الاوضاع ومين اللي علق الطوايف ببعضا ؟ ما رح افتح ملف الحرب الاهلية لأن اذا انفتح ما رح يتسكر .. بالنهاية الشعب اللبناني والوعي اللي بيحمله قادر وبجدارة على الخوض انتخابات ديمقراطية بكل معنى الكلمة بعيدا عن ايا صبغة طائفية .. القصة بهلكام سياسي اللي عم يضمن استمرارية وجوده عن طريق النزعة الطائفية .. النزعة اللي ضمنتلن مكانة سياسية ورتانها عن والده وعم يحاول بكل الوسائل يحافظ عليها ليضمن توريتها لابنه بس يحلوا عن رب الشعب اللبناني هداك الوقت منشوف ديمقراطية بكل معنى الكلمة . لا تواخذونا على الرد الطويل بس انحمئت وما بعرف كيف فلتوا اصابيعي علكتابة ( على مبدأ فلت لساني بالحكي ) :D |
اقتباس:
بس الي تعقيب ، شعوب المنطقة المجاورة لايفصلها عن التطور الفكري والثقافي اللبناني فارق كبير او مدى بعيد على الاطلاق ، هي قريبة ولكن انظمة الحكم تحد من حريتها ومن انطلاقها وهذا شيئ جلي واضح شعوب المنطقة تحتاج الى فرصة حقيقية لتظهر مدى وعيها وثقافتها . اقتباس:
اذا الاغلبية ارتضو انو يكون الرئيس ماروني ورئيس الوزراء سني ورئيس مجلس النواب شيعي فهاي ديموقراطية لانو باي دولة بالعالم الديموقراطية انو يصير اللي بدو الاغلبية (بغض النظر عن كونو صح او خطأ) وهاي احد عيوب الديموقراطية بنظري ، هلئ لو 60% من الشعب اختارو رئيس جاهل غبي غير حاصل على اي مؤهلات دراسية ، هاد ديموقراطي وحقون بغض النظر عن صحتو او خطئو اقتباس:
ولايهمك ابو شريك قدس الله يمناك |
اقتباس:
انا بشوف انه اللبنانية بحكم احتكاكن المباشر والمتكرر مع الغرب كون عنده ارضية فكرية ما بتلاقيها بغير المحلات اللبناني قادر على انه يختار بموضوعية ويقيم بموضوعية اكتر من غيره حاليا وبظل الطائفية بتلاقي اللبناني قادر على استيعاب الآخر بشكل غريب ، عم حاكيك شي عشته وشفته على ارض الواقع ولا تحسب دائما القادة بينقلوا صورة دقيقة للشعب ، اللبنانية فعليا مستوعبين فكريا على الأقل فكرة وجود الآخر والمشاركة باتخاذ القرار وهلشي صعب كتير تلاقيه ببقية دول المنطقة . اقتباس:
السيناريو اللي تم اعتماده مافي منه مخرج غير باتفاق الطائف ، بس هاد ما بيعني بأن اللبنانيين يفترض يقولوا خلص انحلت الأوضاع وخلينا نرفع رجلينا ، الاحداث اللي عم اتدور حاليا بتاريخ لبنان الحديث عم تعمق بالشارع اللبناني فكرة ( شايف الشيعي كيف عم يدخل بالبلد بالحروب ؟! تعال صف معنا ) ( شايف السني كيف عم يتعمل بالغرب وبايع وطنيته ؟! تعال صف معنا ) وهلشي مو جديد ابدا .. مسرحية زياد الرحباني _ فيلم أميركي طويل _ بتحسها عم تحكي على احداث صارت امبارحة واليوم .. مو احداث صايرة بالتمانينات . برجع بقلك القادة عم تعزز هلفكر بالمجتمع اللبناني وانا عندي ثقة بأن الفكر اللبناني قادر على كسر كل الحواجز المحطوطة قدامه . اقتباس:
:D |
| الساعة بإيدك هلق يا سيدي 06:51 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون