|
هل سيولد غيفارا تاني في سورية؟؟؟؟؟؟
هل سيولد غيفارا تاني في سورية؟؟؟؟
انا حطيت هالموضوع لنشوف فينا نعيد مفهوم الثورة يلي قام فيها غيفارا وبنفس الوقت المعطيات تبع هال الثورة رح تكون ايجابية ولا سلبية طبعا ما بدنا استنساخ من غيفارا ولا بدنا يجي لعنا على بساط الريح متل سندباد وعلى دبابات اميركية او انكليزية ولا حتى روسية ويا ترى رح تكون مسألة الولادة محصورة بطائفة معينة ولا من كل فئات الشعب مشكورين |
هل لديك المؤهلات اللازمة حتى تكون إنت (كوستا) جيفارا تاني؟؟؟
جاوبني وإذا قررت أنا معك. وهادا السؤال يمكن فيو طرافة بس بدنا حد يكون البادئ وهادا شي كتير صعب .. انو الواحد ياخد موقف ويتصرف على أساسو فما بالك ثورة؟ ولساتني بطالب برد من قبلك. |
اقتباس:
ربما انا لست مؤهلا واعتقد انه يوجد من هو افضل مني ولكن صدقوني انا اول واحد مستعد قدم كل ماعندي من مؤهلات وحتى اني مستعد شارك بالمقاومة الشعبية بس انا ما بدي يكون على حساب روحي ودمي اتفاقيات وتنازلات الثورة تولد من رحم الاحزان والثورة تولد من الشرارة الاولى |
اقتباس:
متل ما باعو بيرجعو يبيعو ويغتنو عحساب المساكين ... وواحد خاين بيخرب الدنيا باللي فيها... والأمثلة كتيرة !!! |
اقتباس:
يعني بكون في قوانين جديدة وصارمة وسياسة داخلية وخارجية على مستوى عالي والخاين معروف شو مصيرو لانو وقت يكون الشعب كل شي مأمن له ما رح يقدر حدى يقوم بخيانة الى يلي نفسو مريضة ومتعود عل الرشاوي والسرقة وهاد الو حسابو هلأ موبالضرورة انو نبلش بالسلاح بس اذا ماكان في حل تاني فما في غيرو بديل ونحنا ما بدنا نعيد مرحلة الخمسينات والستينات لانو العالم تطور وبدنا نواكب التطور ونحط حد للفساد لما من بلش من انفسنا |
اقتباس:
يعني أكيد ما رح تقدر تحقق هالشي علني لحتى تبني قاعدة وأساس متين ..وهادا شي معقول بس هل ممكن يتحقق، والوقت اللي بيحتاجو ليتحقق هو عامل مهم لأنك كقائد ثورة ورمز لازم تكون متواجد لتحقق هالشي، وعلمك مع هالشعب ما في تغيير بصير بلمح البصر؟ أو بالسلاح بس هادا صار واضح فشلوا ، لأنو إمكانيات الشعب مو قد إمكانيات الدولة ، واذا الجيش ما تعاون معك فراحت عليك وعلي معك عالفاضي، واذا قدرت تتغلب علي جوا شوف بقى شو راح يعمل اللي برا ... (فلسطين ، لبنان ، العراق ، أفغانستان، وما شابه ) |
يا جماعة في شي اهم من الثورة ,,, شعبنا جوعان و مانو متحمل اي تضحيات و دم عن جديد
يعني عنا كتير شغلات نعملا قبل مانفكر بالثورة ,, القضاء على الجوع مثلا و استئصال الطائفية من مخ هالجيل الطالع و استرداد قيمة الثقافة و العلم و مكانة المواطن كأنسان عندو حقوق و واجبات ,, يعني هالمواطن اللي بيشرب قنينة بيرة او بيبسي و بيرميا بنص الشارع كيف بدنا نقنعو بحب بلدو و الحرص عليا قبل ما نقنعو انو لازم يحارب و يمكن يضطر يموت كرمال حريتوووووووووو بعتزر اذا طلعت عن الموضوع ,,, تحياتي و مية وردة لكاتب الموضوع ,,, |
اقتباس:
|
اقتباس:
تحياتي ,,, |
فيلم اميــــــــــركي طويــــــــــــــــــــــ ـــــــــــــــــــــــــ ــــــــــــــــل :yahoo:
|
اقتباس:
بس مو أمريكي :jakoush: |
اقتباس:
بس كيف رح تتجسد الخطوة الاولى ؟؟ وهل اذا بلشت بتستمر؟؟؟؟؟؟ |
حلو هالموضوع...
قريتو مرتين هو و الردود تبعيتو , و عندي كم سؤال حابب اطرحهون و بعتقد أنو ضروري نجاوب عليهون قبل ما نكمل.. شو معنى "ثورة" ؟ شو معنى "خيانة" ؟ شو معنى "سلاح" ؟ شو معنى "قوانين صارمة" ؟ شو معنى "خطوة أولى" ؟ شو معنى "مقاومة شعبية" ؟ بعتقد ضروري أنو هالمصطلحات تكون واضحة أو عالأقل نكون كلنا عم نستخدمها بنفس الاتجاه , عشان ما نضيع تحياتي |
رح جاوبك بس ع شغلة الخطوة الاولى لانها اول ما خطر ببالي
بعتقد اذا بدنا نمشي وفق تجربة غيفارا فالسلاح والقتال هوي الخطوة الاولى ونادرين اللي بيتركو حياتهم ومكاسبهم كرمال هيك خطوة حتى لو بتفيد البلد واذا بدنا نمشي وفق تجربة غاندي ف التوعية لمعنى الوطن هي الخطوة الاولى وكتار اللي بيبادرو للتوعية بس بدك مين يفهم ويطبق اللي فهمه |
وشغلة القوانين الصارمة كمان كتير ضروري انو ما حدا يكون فوق القانون
لانو مهما كان القانون ظالم بس يتطبق عالكل بيصير عادل |
اقتباس:
لا غيفارا (مع اعجابي الشديد فيه) سوري , و لا غاندي سوري ... بعتقد أنو قسم كبير من الفشل السياسي العربي ناجم عن تبني قوالب منهجية جاهزة من دول أخرى مختلفة تماما عنا.. ما بعرف اذا عم عبر منيح عن الفكرة؟ |
اي عبرت منيح
طيب انت قلي شو بفكرك لازم نساوي بهيك حالة مثلا |
نفكر نحن لحالنا , بدون قوالب جاهزة
حالة سورية مختلفة = حل مختلف |
| الساعة بإيدك هلق يا سيدي 17:45 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون