|
صرخة الم من اخوية
شباب عيوني اخواتي انا لما كنت بسورية كانو يلوموني رفقاتي اني صريح وبحكي دج
وكنت قلن طالما انا بحب الشخص اللي عم احكي معا وبتهمني مصلحتو فمعناتا لازم كون صريح معو ولذلك هلأ خلونا نحكي كلمتين من هدول جماعة اللي بيطعمو خبز ومن جماعة الكلام اللي بيجي منو بالفحص بصراحة وبشفافية ونسمي بالاسم انا بعرف انو الموضوع طويل شوي بس بما انو اخوية راكدة هالايام فاكيد عندكن وقت تقرو مشان نرجع اخوية متل ما كانت من فترة كترت الاعتراضات باخوية وكتر الحنين للاعضاء القدامى واللي رافقو كمان زيادة بالمواضيع المكررة والتافهة ما بعرف شو السبب الحقيقي لهالشغلة بس انو كان السبب المطروح هوي الاعضاء الجدد اللي دخلو على الموقع مو عرفانين الله وين حاططن يعني الموضوع ينقلو من منتديات اخرى ان كان خليجية او عربية او اجنبية ويحطو بقسم تاني غير المخصص الو باخوية هالشي سبب مشاكل لانو الموضوع نفسو يكون نازل بمحلو الصحيح فيصير عنا تكرار وضياع انا بهالموضوع اشتغلت على اني جيب امثلة عن المواضيع المكررة ونشوف وين الغلط مشان نحلو بس في عندي كلمتين قبل ما بلش 1- اخوية مقسمة تقسيم رهيب من ناحية تنزيل المواضيع يعني في قسم للكتب في قسم للشعر في قسم للاغاني في قسم للصور في قسم للرياضة في قسم النكت والضحك وفي الصالون اللي هوي عام لكل موضوع ما بيندرج تحت اي قسم من الاقسام السابقة وغيرو من الاقسام اللي كلنا صرنا نعرفا 2- كان في اعتراض على البيئة الجديدة انو في عالم كانت تحب البيئة القديمة وهيك انا معكن لانو بالبيئة الجديدة في كتير اقسام ضايع حقا كيف يعني ؟؟؟؟؟؟؟؟؟؟؟؟ مثلا قسم الخواطر والخربشات من اروع الاقسام باخوية لكن المواضيع اللي عم تنزل في ما عم تاخد حقا لانو ما عم ينزل تنبيه بالموضوع الجديد هادا لما بيقولو اخر رد بقلم فلان بصفحة اخوية الرئيسية فقليل العالم اللي عم تفوت علي يعني اللي بيعرف انو كاكابودا بيكتب خواطر حلوة بيفوت بيقراها وبس وباقي الاعضاء ولا مرة يمكن فاتو شافو شو فيا الخواطر والخربشات قسم اللغات انا واحد من الاعضاء اللي ما بفوت على اي لغة من اللغات واكيد في كتير اعضاء متلي ومع هيك في عالم شغلتا الكولكة وتمسيح الجوخ كل ما نزل موضوع منهيصلو للعضو اللي نزلو ومنغنيلو وهوي من كتر مو فهيم بيصدق حالو وبيبلش تنزيل مواضيع بطعمة وبلا طعمة وبيقلك ولو خيو انا شو فارق معي طالما في عالم عم تهللي وترقصلي يعني عم نشتغل على مبدأ نفشو وشوف ما اجحشو يعني عنجد سقى الله ايام الاعضاء القدامى قدام هالاعضاء يعني وين ايام ما كانت اخوية منتدى اخوية شباب سورية وين anmar - keko -zozo -znno وقت اللي كان التنظيم باعلى درجاتو بجوز انا ما لحقتن بس انا قبل ما بلش نزل مشاركات باخوية رجعت شوف الصفحات القديمة اللي بجوز كتير عالم نستا وشفت كيف كان المستوى ايام زمان وشفت كيف صاير هلأ يعني وحياة الله شي بيبكي يعني طيب خلونا نرجع لورا كم صفحة شوي ونعمل متل مقارنة بسيطة بين المواضيع القديمة والمواضيع اللي عم تصير هلأ انتي شو رايكن ؟؟؟؟؟؟؟ لقيتو شي فرق ولا لاء سؤال بتمنى تجاوبو علي ضمن ردودكن وين مواضيع النقاشات اللي كانت كل اخوية القديمة تتفوت تتناقش فيا انا نزلت موضوعين نقاش من حياتنا يعني ما في شي جبتو من برا والموضوعين انطرحو بجلسات نقاش بحياتنا العملية وكنت متوقع انو ياخدو اهتمام كبير مو لانن مواضيعي لاء بس لانن متل ما قلت من حياتنا وشي بيهمنا كلنا بتفاجأ انو المشاركين ما بيطلعو 10 اعضاء من اصل 200 عضو فعال او اكتر بالمنتدى طب ليش هيك ؟؟؟؟؟؟؟؟؟؟ طب انا رح اسال سؤال تاني مفتوح للرد علي ضمن ردودكن ليش نحنا منهرب من مواضيع النقاش ومنروح على مواضيع العلقات ومواضيع طق الحنك اللي ما منا فائدة ؟؟؟؟؟؟؟؟؟؟؟ انا ما بدي لوم حدا ولا بدي عاتب حدا بس السبب اللي خلاني اكتب هالموضوع انو انا غبت اسبوعين عن المنتدى وكنت مفكر انو بدي ارجع لاقي المواضيع الكبيرة اللي عليا القيمة معباي الاقسام رجعت لقيت ما في شي جديد تيتي تيتي متل ما رحتي متل ما جيتي سؤال آخر نحنا ليش اذا شفنا فلان الفلاني رادد بالموضوع الفلاني عالسريع منروح منشوف شو في ومنرد علي كمان وحتى لو كان الموضوع سخيف يا اخي بجوز اللي بيعجبك ما يعجبو ومن ناحية تانية اذا شفت واحد ما بحبو منزل موضوع ولو كان ضخم وعلي القيمة ما بفوت برد علي ولك ولا بقرا حتى ليش؟؟؟؟؟؟؟؟؟؟؟؟؟؟؟؟؟ (هادا كمان مفتوح لتجاوبو بردودكن ) يعني اسا في كتير حكي ينحكى بس لاني بعرف انو ما حدا رح يسمع وما حدا رح يفوت على الموضوع من اصلو لانو بس نفتح الموضوع ونلاقي انو طويل لهالدرجة ما رح نلتكش وانا اكيد من هالشغلة وشو اللي مخلاني عزب حالي واكتبو مو عرفان بس انو فشة خلق يمكن المهم هلأ مو كترة الحكي المهم الفعل اللي بدنا نشتغلو مشان نرد اخوية متل ما كانت ونطالعا من هالحالة كيف من كان بابرة بالوريد بابرة بالعضل بس المهم اخوية تطيب وترجع اخوية اللي كلنا منحبا واللي كانت مزينة الانترنت رح اجمع الاسئلة اللي طرحتا هون : 1- طلبت منكن ترجعو كم صفحة لورا وتعملو مقارنة بين القديم والجديد وتقولولي انو احسن لنمشي علي 2- ليش نحنا منهرب من مواضيع النقاش ومنروح على مواضيع العلقات ومواضيع طق الحنك اللي ما منا فائدة ؟؟؟؟؟؟؟؟؟؟؟ 3- ليش اذا شفنا فلان الفلاني رادد بالموضوع الفلاني عالسريع منروح منشوف شو في لاء ومنرد علي وحتى لو كان الموضوع سخيف يا اخي بجوز اللي بيعجبك ما يعجبو ومن ناحية تانية اذا شفت واحد ما بحبو منزل موضوع ولو كان ضخم وعلي القيمة ما بفوت برد علي ولك ولا بقرا حتى ليش؟؟؟؟؟؟؟؟؟؟؟؟؟؟؟؟؟ هدول الاسئلة اذا جاوبتو علين بيكون يكتر خير الله بعرف انو اسا فيكن خير للتغيير ويا ويلو ويا سواد ليلو اللي بيطلع برات الموضوع حاجتنا حكي بلا طعمة خلونا نركز شوي ملاحظة : انا الموضوع ما كنت بدي نزلو لولا ما قنعوني بعد المحبين لاخوية انو نزلو ونشوف شو فينا نشتغل بما فيه مصلحة اخوية |
اقتباس:
هيدا شي ما في جدال يعني ما لازم نتحارج علي ولازم يكون من المسلمات يعني بس نظرة وحدة للمواضيع الجديدة يللي كلها بياخة وسخافة والمواضيع القديمة يللي لا غبار عليها بأكد هالشي اقتباس:
لأنو الصراحة نحنا ناس فاضيين وما في ورانا شي ولا بهمنا شي ما منحب لا نتحاور ولا نتناقش بدنا كل شي جاهز وكل شي مزح منحب المواضيع يللي هيي بس للزناخة حتى بالأخير يا نحط "مشكور أخي" أو "ملعوبة معلم" بصراحة هاي مشكلتنا ويمكن انا كمان بعاني منا ما بقول لأ بس أنا بحب اني غيّر اقتباس:
يعني لا بعلق على الموضوع ولا شي حتى اذا علق بكون تعليقو لا بيحل ولا بيربط يعني الواحد لازم يعطي كمان وجهة نظرو بس هالشي ما موجود ليش؟ يمكن لأنو ما حدا الو خلاء انو يفكر :jakoush: او انو يحكي بشي بدو عقل ومنطق وحوار |
كلام كتير حلو ... يعطيك الف عافية ابو الهن :سوريا:
ورح بلّش انا ... اقتباس:
القديم احسن واحلى وأفيد ... يعني ما كانت تضيع كل هالساعات عالنت على حكي بلا طعمة .. كان الواحد يطلع بالاخير بموضوع حلو قرأوا وغيّرلوا تفكيرو .. بخاطرة حلوة عجبتو وحركت مشاعرو ... بنكتة جديدة سمعها وضحكتو .. امّا هلأ ،، ؟؟؟؟؟ ..... فيك تتطلع على قائمة المواضيع وتحكم بنفسك ... اقتباس:
أما بحالة العلقات ... داااااااايما الشعب جاهز للخناقات وبيصير عندو كل الوقت اللي بالدنيا ليثبت وجهة نظرو للتاني ويسمّعنا رأيو - قد ما يكون هو الغلطان والحق عليه - بس المهم انّه الكلمة الاخيرة تكون الو ... ومشان هيك بتلاقي مواضيع العلقات بتوصل ل10 صفحات بساعات .. ومواضيع النقاش لو صارت صفحتين خلال الاسبوع .. بيكون الف الحمد الله امّا بحالة طق الحنك ... هي مدري كيف بتصير !! .. بيكون الواحد كاتب رد والسلام .. بيجي بعد شوي بدو يشوف ردود الاعضاء .. بيلاقي واحد مقتبس كلامو ومعلّق عليه ... بيقوم هو بيرجع بيرد على هالشخص ... وبتشتغل القصة بيناتهم على صد ورد هييييك كذا صفحة.. وبالاخير بيضيع الموضوع الاساسي !! وذكرتني بشغلة تانية هلأ ...انو في كتير مواضيع بهالفترة ما عم تاخد حقها بالردود .. لسببين : 1- بيدخل العضو على الموضوع الفلاني .. بيقوم بيلاقيه طويل وفي فلسفة كتير .. بيقوم بيطلع دغري وقبل ما يكمّل قراءة المقطع الاول منّو ... بيقوم الموضوع بيطير للصفحات الورّانية وبينستى ... أو انو ... 2- بيجي العضو الفلاني وبينزّل كذا موضوع بنفس اليوم ... وبيبلّش كل ما دخل حدا يرد عليه بنفس الدقيقة .. مشان يبقى موضوعه براس الصفحة ... بتقوم بتروح على الشخص اللي بيكون منزّل موضوع - وعم احكي هون عن اي موضوع بغض النظر عن اهميتو - قبلو بشي نص ساعة .. وكماااااان بهالحالة بيطير الموضوع للصفحة ال 2 او ال 3 .. وبينتسى ... لحد ما يجي صاحب الموضوع تاني يوم ويشوف هيك .. ويرجع ينكشو لينبّه الاعضاء عليه !! اقتباس:
يعني بيجي فلان الفلاني المعروف ( أخوياً ) وبيكتب رد .. بتقوم انت بتقول يييه والله هاد واحد فهمان ورادد على الموضوع .. اي معناها اكيد الموضوع عليه القيمة .. يلا ونحنا كمان رأينا من رأيو ... وبالمرّة بنشكر صاحب الموضوع مع سمايلي ابو وردة ... أما لو كان كاتب الموضوع شي واحد انت ما هضمتو .. بتقول اي بالناقص من الرد على موضوعو .. خلّي ( شلتو ) ترد عليه .... والي رجعة للموضوع انشالله .. بس لتكتر الردود والآراء .. سلام |
اقتباس:
اقتباس:
|
zoon
zozo عاشق من فلسطين و و و و و و كتار راحوا يارب يرجعوا انا من جهتي كل وقتي بالارشيف ما بعلف على كل المواضيع بتمنى يرجعولنا البيئة القديمة يارب ترجع احلى واريح ويارب يكون في مسؤلية من الاعضاء الجداد :cry: :cry: :cry: |
يا سيدنا
لان بكل بساطة اكتر الاعضاء بالنهار الواحد بنزلو شي 500 موضوع (هني ما بكونو قريانينون) يعني مثلا بجي انا بدخل على الصالون فيه 15 موضوع جديد يا سلام المنبر 10 عالطاير 20 وهيك بكل مكان اي منين بدي لحق رد عليهون انا وكل واحد بيجي بيكتبلك الموضوع 20 صفحة طيب اوكي يعني موضوع عشرين فيه فائدة طيب بس مو كلو لعي وحكي فاضي لا والاحلى من هيك كل يوم كل يوم اي مين هالمجنون اللي بدو يقعد يقرا كل هالقد بعدين يعني واحد بروح على منتدى بلاقي موضوع حتى لو ما عجبو بجيبو وبحطو باخوية بس مشان انو على اساس يعني كتب موضوع طيب يا اخي هالموضوع ما بشد العضو مافيه شي بخلي العضو ينشد لالو لك حتى كاتب الموضوع ما بكون قريانو كمان هلق قريت موضوع بمنتدى عجبني حطيتو باخوية بس مو باليوم عشر مواضيع وكلهون من غير منتديات اكتبلك شي شغلة جديدة من عندك ما بيطلع معك لا تكتب بالخالص بكون احسن يعني معلش هلق كل الاعضاء (بدون استثناء) اللي عم يحطو مواضيع كتيرة بالمنتدى ناسخينهون من منتديات تانية طيب اكتبولكون موضوع بالاسبوع موضوعين او حتى تلاتة بس يعني بالاسبوع عم يوصل عدد مواضيعكون لل50 موضوع او مثلا عضو بغيب شهر بيجي بنهار واحد بحط مواضيع عن هالشهر كلو ؟؟؟؟؟؟؟؟؟؟؟؟؟ كترة المواضيع ونسخها من منتديات تانية برأيي هيي السبب بكل شي هيي جواب على كل مقالتك يعني ماني عم قول انو مثلا ما تجيبو شي من منتديات تانية بس يعني شي معقول والسبب التاني لوجود هالمواضيع هوي تمسيح الجوخ تبع الاعضاء انا اول ما دخلت عالمنتدى لحقت شوي من البيئة القديمة كتبت بالبداي موضوعين من منتدى تاني بالتنين قالولي الاعضاء انهون مكررين بطلت اكتب مواضيع من منتديات تانية طبعا يمكن كاتب شي 4 مواضيع من منتديات تانية وبس لاني حسيت انو عليهون القيمة انا بالنسبة الي ماني عم ادخل على المواضيع المكررة ولا حتى عم اقراها بس يمكن لازم ادخل واكتب مكررة يعني بكون قريانها بغير منتديات شي 10 مرات وهون شي 5 مرات حلو كتير اي من ***** رح رد عليها |
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - انا برئيي يرجع ينحط شريط اخبار اخر الموضيع وشريط كمان اهداء |
اقتباس:
لازم نسعى أنو ننزل مواضيع بالقوة القديمة .. اقتباس:
وأنا برأيي أنو في كتير مواضيع ما عم تاخد حقا من العجقة ... مواضيع كتير يعني أنا كل يوم عالنت ومابلحق أأقرا ربعا ... ما غطلي يومين شو بيصير :? وأغلبا مواضيع وجمل ممكن تنحكى عالمسنجر ... عالتليفون بين تنين .. بس مو بالمنتدى .. كل موضوع بيتحول لردود شخصية وبيموت الموضوع الأصلي طيب والحل ؟؟؟ نقول للناس ما تنزل مواضيع ؟؟ شو نعمل ؟؟ لأنو جد في مشكلة غزارة وما في نوعية ... ومقالات مكررة ومنقولة والأغلب قريانا .. فكيف منحافظ عأخوية من أنو تتحول لنسخة عن كل المنتديات التانية .. أنا بقترح أنو يمنع النقل والمواضيع المنقولة ... اللي حابب ينزل موضوع يكتبو هوي .. نحنا منحب نتناقش معو بأفكارو .. مو بقدرتو على النسخ .. إذا توقفت المواضيع المنقولة .. بيرتاح المنتدى شوي من الكترة ومنصير نقدر نركز أكترعمواضيع جدية اقتباس:
اقتباس:
كمان كترة الأشخاص واحد بيبحث يقرا للأشخاص اللي بيعرفو ن هيدا مو مشكلة أنا بشوف المشكلة أنو بيرد ( حلوة وملعوبة وبرافو ) حتى لو ما شايفها هيك احتراما للشلة و بيصفق لكل المواضيع اللي بتنزلا ... أنا بعترف في أشخاص بدور كل يوم شو ردو :oops: افكارون بتعجبني وبرد عليا .. بس وقت ما بتعجبني مابرد .. وأكيد كوني بحب أأقرا لأشخاص معينين مابيمنع أني أأقرا لغيرون ورد على غيرون ويا ويلو ويا سواد ليلو اللي بيطلع برات الموضوع حاجتنا حكي بلا طعمة خلونا نركز شوي بتمنى كون ما طلعت برا الموضوع ... وهاني هي مني ألك وردة :سوريا: |
بالله العظيم ضيفولي سؤال لقائمة هالاسئلة
ليش صار عدد المشاهدات 61 مشاهدة وعدد الردود بس سبعة مو بس بهادا الموضوع بكل المواضيع اللي عليا القيمة |
ابو الهن يسلم ايديك عالموضوع ( مو تمسيح جوخ :pos: ) المهم من زمان بدنا هيك نكشة وصح متل ماحكيت انو مدري كم واحد صارو فايتين عالموضوع وسبع ردود بس مع انو برأيي كل واحد بيحب اخوية لازم يرد هون وكلنا سوا منقدر اخوية لاخوية زمان اخوية عن صحيح
منجي للنقط اللي طارحها انت اقتباس:
بس نحنا ماعم نساعد حالنا ولاعم نساعد الموقع شباب انا قبل ماكون مشرفة هون كنت عضوة متلي متلكون وبحب الموقع من كل قلبي وبالفعل بيهمني يرجع متل ماكان لانو شيلو المزح ع جنب انا من وقت ماسجلت باخوية لليوم ( يعني رح يصير شي عشر شهور ) يوميا في ست سبع ساعات هون وبصراحة مابخفيكون كتير بيهمني اني استفيد منهون لانو بالفعل ماعندي وقت ضيعو وهاني بيعرف منيح كيف عم يضيع الوقت بالماضي كنت عنجد استفيد مواضيع مطروحة مهمة كتير خلتني غير آرائي بكتير شغلات في اشيا كتير كنت دافع عنها وبدون ماحس وطوشة عرب ومدري شو شوي شوي تعلمت اسمع تعلمت انو انا مو دائما صح غيرت رأيي وقناعاتي بكتير شغلات ( اكتر ماتتخيلو ) من ورا هالموقع هلأ لاحدا يسألني شو دحش هالحكي بالاقسام لانو مابعرف بس اللي بعرفو انو الانسان دائما بحاجة لتنظيم والا بيضيع بالفعل يعني عنجد بس تخيل اوضتك قايمة قاعدة ومافي غرض بمحلو ولك اي والله بتحس مافيك تقعد وهون صاير نفس الشي اخوية متل بيتنا بس قايمة قيامتو كتير كتير ولازمو ترتيب مع انو تقسيمو كتير منيح اقتباس:
ياجماعة والله البيئة الجديدة فيها شغلات كتير منيحة ومفيدة طيب بالبيئة القديمة كان يصير مدايقات عبر الرسائل الخاصة ( ومتل ماكلكون بتعرفو الادارة مابتتدخل بالامور الشخصية للاعضاء ) وكانو الكل يطالبو انو يصير في خاصية انك تعمل بلوك للي مابدك ياه بالبيئة الجديدة صارت الخاصية موجودة بالبيئة الجديدة في خاصية انك تقيم الموضوع وصاحبو يعني موضوع ماعجبك مافي داعي للرد اللي بيجرح فيك بكل بساطة تقيمو انو موضوع سيئ وماترد عليه او ترد عليه بنقد بناء وهيك صاحبو بيعرف وين غلطو ( وهون لازم كلنا ننتبه انو ماحدا الو محمل شخصي عالتاني وماحدا لازم يزعل من النقد ) وهيك بيصير فيه يصلح هالغلط مرة الجاي في شغلة تانية تنبيه عن مشاركة سيئة كنا من قبل اذا حدا حكا كلمة عاطلة والمشرف مو منتبه يضطر الواحد يبعت رسالة خاصةومدري شو او لحتى المشرف الله يهديه ويقراها هلأ صار في عنا شي اسمو تنبيه عن مشاركة عاطلة وهي عبارة عن مثلث ذهبي تحت اسم الشخص بس ماتعجبك المشاركة فيك تبعت للمشرف تنبيه عليها وبهالمناسبة في عنا خاصية التنبيهات او العقوبات وانتو كلكون بتعرفو اديش في ناس تأحطلها من ورا زيادة عداد التنبيهات بس بنفس الوقت كمان في اقسام ماحدا منتبهلها وهالشي بشع شوي بس بيتصلح اقتباس:
انا بيجوز معدودة من الجيل القديم تبع اخوية واللي ضالين معي من هداك الجيل بينعدو عالاصابع ريتا وكريم ومجد وسيزار واسامة ومجود وزين وجيني وهنون وابو السوس ضيفو على هدول ضعفون بخمس مرات اللي تركونا بدون مانحس ومابدي اذكر اساميهون بس رجعو لورا ولحالكون بتعرفوهون هلأ السؤال انو ليش نحنا منحب نبكي كتير عالاطلال وانو تركهون اخوية هوي اللي رجعا لورا بيجوز كان في عامل مساعد انو 90 بالمية من اعضاء اخوية بيعرفو بعض شخصي وعايشين بنفس الحارة بس هاد مو سبب ليش نحنا اللي هون هلأ ما منشتغل على حالنا ومنرجع مستوى المواضيع للي كان عليه والله مو صعبة بس بدال مانقضيها طق حنك وسوالف بالمواضيع فينا نفكر بشي فكرة نقاش حلوة بشي مسابقة تنعمل اي شي بيخطر عبالكون والبريد مفتوح للي عندو اقتراح وحابب يوصلو للادارة اخوية اكبر كتير من انها تكون موقع عالنت وبس في تلت شباب كانو رفقاتنا هون متلون متلكون اغلبكون مابيعرف غير ابو طريق بس الشبين البقية سهل كتير تلاقو اساميهون ومواضيعون هدول الشباب بالحبس هلأ وسبب من الاسباب اللي ودتهون لهونيك هوي المنبر الحر بالنسبة الي هاد فخر كبير بعتبرو للموقع اخوية قطعت شوط كبير من حلما خلوها تكفي هالحلم اقتباس:
اقتباس:
في نقطة الشللية تبعكون هون كتير صايرة قوية حلو الواحد يكون عندو رفقة ويحبون ويدافع عنون ومدري شو بس كمان حلو يشوف الطرف التاني اللي مابيشبهو لانو كتيـــــــــــــــــــر رح يتعلم شغلات جديدة وفهمكون كفاية لعيت كتير بعرف بس العتب على قد المحبة اخوية متل بيتكون اعتبروه وكيف بتحبو يكون بيتكون ساوو اخوية والحكي مني وجر كلنا لازم نرجع نشتغل لانو انا اول وحدة مقصرة وبعرف حالي مانها صعبة شباب كلنا عنا افكار حلوة وخرج الواحد يتناقش فيها وخاصة كلنا من نفس الاعمار تقريبا وطالعين من نفس البيئة يعني كلنا منفهم على بعض في نقطة قالتها فراشة انو بيجوز نحنا مامناقش لانو ماعنا الجرأة نفوت للعمق بنقاشاتنا ياترى شو السبب؟ السبب برأيي انو ماعنا المعرفة الكافية لنفوت بهيك نقاش ( بغض النظر عن الموضوع ) انك تكون ماتعرف شغلة مو عيب عندك جهل بناحية معينة ادب سياسة فن طب اي شي نزل موضوع سؤال والكل بيساعد اللي عندو معلومة بيحطها لانو اكيد اكيد مو بس انت اللي مابتعرف هالشي في كتير متلك وهيك بتكون استفدت وفدت لاتزعلو مني طولت عليكون كتير كتير بس بظن هيك احسن |
هاي لكل الموجودين :سوريا:
انا قرات الموضوع ولاحظت انو الردود كتير منيحة ومتل ما بتريد :ok: بس اللي عمينتقد الواضيع اللي عالطاير والردود اللي عالطاير يعني كلمتين ـ حلوة و ملعوبة وغيرا...ـ ما الكل عميكتب هيك حتى انتو ؟؟؟:confo: ....انا ما رجعت لورا لحتى شوف الفرق بين هلق وقبل بس رح ارجع واقراها .بس سؤال شو الحل برايك:!: وصفت المشكلة بس ما اقترحت الحل غير انو نقتفي الاسلوب القديم ونسير على خطاهم :pos: ما بعرف شو كتبت الافكار بسرعة براسي ما عملحقا سورري للركاكة بالترتيب وميرسي 8) |
انا حكيت فوق كتير وما برف شو حكيت بس عندي ملاحظة ايجابية:سوريا: هالشللية والناس اللي بيعرفو بعضون لما بيحكو مع بعض وين راحو و بدون يروحو وبقوا اسماء الاماكن انا كتير بنبسط وبتذكر الوطن والناس وبشتاق كتير لك حتى للناس اللي مابحبون يعني الروح المرحة البسيطة والاخوية واحيانا العائلية كتير حلوة انا عمبحكي عن حالي يعني عن جد الاخوية بكل المواضيع مهما كانت انا بحس حالي بحارتي او مدرستي بسوريا وبنسىانو انا بالغربة يمكن وجعتلكون راسكون سامحوني بس :pos:
|
اقتباس:
انا ما قلت انو ننكش مواضيع قديمة او نمشي على خطا القديمين ليش القديمين احسن منا؟عندن افكار اكتر منا ؟ لاء مو صح هالحكي نحنا عنا افكار كمان ونحنا منعرف نناقش كمان بس المشكلة ما بعرف وين صايرة ممكن انو كون خايف من النقاش ممكن يكون ما عندي معلومات بالموضوع المطروح ممكن بس انا كمان عندي افكار اطرحا واحكي فيا في عندي مواضيع كتيرة بيصير في اختلاف بالراي بالحياة العملية بيني وبين رفقاتي طيب ليش ما بطرحا هون وباخد راي الكل فيا |
do you think. thanks for your answer
اللي خلى الاعضاء اللي تركو الاخوية الو علاقةباللي قراتو بقسم الادارة و النقاش الساخن هونيك ؟؟؟؟سؤال عالهامش يعني للفضول هلق قرات الموضوع ؟؟؟ بتمنى انو تكون الاخوية متل ما لازم تكون اخوية عن جد سلام |
اقتباس:
ومزبوط متل مو مزكور بالموضوع انو تركو اخوية بسبب المشاكل بس هالشي ما بيخلي حتى الاعضاء الجدد يتركو بسبب عدم كفاءة المواضيع والاشخاص اللي باخوية |
thanks and see you tomorow
|
لما دا لا تقرا موضوع اسباب فشل هدا المنتدا الدي وضعته فلة
باختصار اهمال المشرفين وعدم تدخلهم في الوقت المناسب هو السبب الاكبر. وعدم احترام الاعضاء بعضهم البعض. |
مرحبا شباب وميرسي هاني عالموضوع كتير حلو وسوري عالتاخير لاني ما شفت الموضوع ....
اما بالنسبة لاخوية فرح قول انو انا ما لحقت اخوية القديمة ... وفتت لما تحدث الموقع .. وما بدي عيد اللي حكيتو لانو كل شي معكن حق في ... بس في شغلة كمان بدي علق عليا انو ليش بكل موضوع عم يدخّلوا الطوائف ؟؟؟ يعني والله صرت اكره الفوتة ع شي قسم فيه هيك شي ....:cry: والمشكلة وين ؟؟؟ انو هالعالم اللي عم تفوت ما عم تعرف شو معنى الموقع اخوية :cry: :cry: ..... وخصوصي باخر فترة هاي الشغلة اللي صارت مع توكول فريند وسيلين وبعض الاعضاء ..:( كمان في شغلة ...انو بتحس كتير من الاعضاء فايتين بس لحتى يقاتلوا ويخلقوا مشاكل ...ليش كل هالعدوانية ما بعرف؟؟؟...:? |
| الساعة بإيدك هلق يا سيدي 01:27 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون