|
هل حقا إن الاختلاط أفسد مجتمعاتنا
المحامي : ميشال شماس
مازلت أذكر أنه طيلة اثنتي عشر عاماً كنت أذهب خلالها إلى المدرسة برفقة زملائي وزميلاتي، تحت المطر والثلج، وحر الشمس، وكانت أصواتنا تختلط ببعضها البعض أثناء ترديد الشعار الصباحي "أمة عربية واحدة.. ذات رسالة خالدة"، هذا الشعار الذي لم يتحقق حتى الآن، كما كنا نلعب سوية في دروس الرياضة، وكنا أيضاً ندخل إلى قاعة الدرس معاً، ونستمع معاً لشرح المدرس، وعند انتهاء الدوام نعود سوية إلى بيوتنا، هذا عدا عن الرحلات إلى المصايف وشاطئ البحر..الخ، ولم يكن يخطر ببالي انه سيتم فصلنا نحن الذكور عن زميلاتنا الإناث في يوم من الأيام. وهذا ما حدث فعلاً عندما ذهبنا من قرانا في وادي النصارة إلى مدينة حمص عام 1980 للتقدم إلى امتحان شهادة الثانوية العامة، فقد فوجئنا فعلاً لدى دخولنا قاعة الامتحان في مدرسة الخالدية بحمص عدم وجود أية طالبة من زميلاتنا، إذ اقتصر الحضور على الذكور فقط من الطلاب، وبعد الانتهاء من تقديم الامتحان سألت أحد المراقبين عن السبب في عدم وجود طالبات بيننا في هذه المدرسة، فأجابني:" هنا في المدينة يتم فصل الذكور عن الإناث في المدارس الإعدادية والثانوية، فهناك مدارس خاصة للإناث ومدارس خاصة للذكور". فسألته مجدداً عن سبب ذلك، فرد علي قائلاً :"عندما تكبر، سوف تفهم ذلك". وبعد أن نجحت في امتحان شهادة الدراسة الثانوية، ذهبت إلى كلية الحقوق بدمشق وسجلت فيها. وهناك تعرفت على طلاب وطالبات، من مختلف الانتماءات الدينية والسياسية، ولم يكن هناك أي فصل بين الجنسين حسب ما قال لي المراقب سابقاً، فسألت أحد زملائي في الكلية، لماذا يتم فصل الذكور عن الإناث في مدارس المدينة ، فأجابني:" إن الاختلاط بين الجنسين مخالف للشريعة الإسلامية.. لأن الاختلاط يفسد أخلاق الطلاب والطالبات، خصوصاً في الصغر، وسن المراهقة.. ويدفع الذكور للتحرش بالإناث،وما ينتج عن ذلك من زنا واغتصاب وفساد في الأخلاق". فاستغربت هذا الكلام ..وقلت لزميلي: أنه على مدى الأعوام الأثني عشرة التي درستها بدءاً في المرحلة الابتدائية مروراً بالمرحلة الإعدادية وانتهاءً بالمرحلة الثانوية في ثانوية المزينة الرسمية لم أسمع أن طالباً تحرش بزميلته، أو اغتصبها أو ... الخ، وأكثر من ذلك فعلى حد علمي لم أسمع أنه حدث شيء من ذلك خلال الثلاثين سنة الماضية على الأقل في المدارس والثانويات المختلطة في وادي النصارة بمحافظة حمص. يا زميلي إني أرى عكس ماتراه، فمنع الاختلاط بين الإناث والذكور في المدارس هو الذي يفسد الأخلاق, وهو الذي يحرّض على الاغتصاب, ويضعف البناء الحقيقي الداخلي لشخصية الفتاة والفتى. وذلك لأن هذا الفصل بين الجنسين عدا كونه مخالف لطبيعة الحياة ومناف للقيم والأخلاق الحقيقية ومخالف للصحة النفسية فإنه سوف يزيد من حرارة الحرمان الجنسي ويؤججه ويضخمه، ويجعل العملية الجنسية تستحوذ على تفكير الإنسان وخياله وأحلامه، مما يؤدي ذلك إلى اندفاع الشباب أفراداً وجماعات إلى التحرش الجنسي والاعتداء على الفتيات لتلبية رغباتهم الجنسية المكبوتة، كما حدث مؤخراً في السعودية عندما اختطف سبعة شبان امرأة واغتصبوها بالتناوب، وقبلها انطلقت مجموعات من الشباب المكبوت في شوارع القاهرة تتراوح بين خمسة إلي 150 شاباً شارك معهم أطفال في العاشرة من عمرهم محاولين إشباع رغباتهم ، فأخذوا يعتدون على الفتيات والسيدات من دون التفرقة بين المتبرجة والمحجبة،المهم هو إشباع تلك الرغبات الجنسية المكبوتة..إلخ أما الاختلاط بين الجنسين منذ الصغر هو حالة صحية تزيل الرهبة من الأخر كما إن ذلك سيؤدي إلى كسر هيبة الجنس الأخر وإلى الاعتياد الطبيعي على تواجد الجنسين معاً، وهذا بدوره سوف يؤدي إلى التخفيف من الرغبة الجنسية، ويحجمها كثيراً في تفكير كل من الجنسين، حيث تعبر تلك الرغبة عن نفسها في الرحلات والتجمعات والأنشطة الراقية التي من شأنها أن تنمي الشخصية وتهذبها. والسؤال الذي يطرح نفسه هنا هو أي منطق ذاك الذي يفرض منع الاختلاط في الصغر، ثم يسمح به في الكبر؟ وكيف سيكون رد فعل هذا الفتى الذي منع من الاختلاط مع زميلته في المدرسة عندما يكبر؟ والأمر نفسه ينطبق على الفتاة أيضاً عندما تكبر، وكيف سيكون شعور كل منهما حيال الأخر بعد هذا الفصل القسري بينهما؟ لقد غاب عن أصحاب ذلك المنطق الساذج أن شخصية الفرد تبنى من خلال عملية طويلة ومتكاملة تسير بتناغم على هدى من التربية الأخلاقية تزرع تدريجياً داخل الإنسان باختياره الواعي الحر منذ طفولته حتى نهاية العمر. بعيداً عن تربية أخلاقية تُفرض على الإنسان بالجبر والإكراه أو المنع والعزل والوصاية. أن المشكلة ليست في الاختلاط كما يروج لذلك دعاة الانغلاق، بل تكمن في نوعية مجتمعاتنا وبينتها المنغلقة التي لم تعرف معنى الاختلاط بشكل طبيعي أو عادي، وإن جل ما تعلمته وانتجته مجتمعاتنا هو سعيها الدائم نحو تغيب العقل استهلاك أي شيء قادم من الخارج، وإنجاب الأولاد والركض وراء النساء لاشباع الرغبات الجنسية المكبوتة.على حساب التربية والتعليم. لذلك لم يكن مستغرباً أن ينظر إلينا الغرب على أننا مجرد قطعاناً للتسمين. لقد حان الوقت لكي نتحرر من الخوف وأن ندرك حقيقتنا مهما كانت هذه الحقيقة مرة وقاسية، وأن نخرج من تقوقعنا على ذاتنا، بالمصارحة والمكاشفة، وأن نعيد الاعتبار للعقل المغيب منذ قرون، حتى يأخذ دوره في ترشيد سلوكنا وإدارة شؤوننا بتفاعل بعيداً عن الاتكال والتلقي الأعمى، وأن نعمل على توفير العلم والتربية الأخلاقية والجنسية لطلابنا في المدارس بعيداً عن الانغلاق والتقوقع. فالمجتمع لايستطيع الوقوف على ساق واحدة مالم ينهض على كلتا ساقيه، ولن يكون كذلك ما لم يقف بجهود كل من الرجال والنساء عل حد سواء المصدر: موقع الحقيقة موضوع اجتماعي هام للنقاش تحياتي |
كلام صحيح مليون بالمية
|
الاختلاط هو الحالة الطبيعية والي بتأدي لمجتمع سليم وواعي
والمنع و الكبت هو الي بيولد الانحرافات لا حدا يقول أوروبا منفتحة ومليئة بالانحلال نحنا وضعنا غير هي أولا ........أما ثانيا فنحنا ما بدنا انفتاح بمعنى الفوضى بل ضمن حدود الأخلاق والمنطق الصداقة والأخوة والزمالة لازم تكون موجوده ويتربا عليها الأولاد أنا من معارضي الفصل......... ميرسي عالموضوع المهم :D |
لا اؤمن بالفصل بتاتااااااا
والاختلاط والدين او المجتمع والتقاليد لا يتنافيان ولا يتعارضان بالعكس لبناء شرائح اجتماعية متناسبة ومتجانسة وسليمة لازم يكون في اختلاط وجو من الاخاء :) :D |
كلام سليم
التخلف هو سبب الفساد وليس الاختلاط والايمان انو لا يمكن ان يكون في علاقه زماله او اخوه بين الذكر والانثى ولا ننسى انو بالجامعه بكون في اختلاط .. لكن بعد 12 سنه من الكبت.. وهون مصيبه شكرا yass عالموضوع |
بالعكـــــــــــــس
وبالعكس تمام عدم الاختلاط بشتغل الكبت والكبت رح يدمر مجتمعاتنا اكتر مليون مرة من الدمار اللي ممكن انو يكون ع بسببوا الاختلاط .. الاختلاط هلأ اكيد مو انو صحيح 100% اكيد الو مشاكل .. بس بضل الف مرة ارحم من عدم الاختلاط والكبت |
اقتباس:
قبل كل شي وحتى نبلش نقاش هل سيتقبل المناقشون الحقيقة المرة لانو النقاش رح يكون بجدية تامة ...... هاد مستقبل ابناء الوطن يللي بدنا نتناقش فيه وتحية الك:D ومتابعة للموضوع |
اقتباس:
المفروض انو المناقشة تتم قبل كل شيء بتقبّل الطرف الآخر, مو شرط التفكير متطابق, و النقاش ليس بقصد الاقناع انما عرض أفكار مو هيك؟ |
لا وستين لا للفصل
شوف اوربا واميركا والخلاعة والفسوق والدعارة اللي عندون ونحنا لسا بالف خير انو لسا عنا شوية فصل كلو بفضل المحاولات الغربية والصهيونية لتحجيم الامة ومنعها من النهوض هو اللعب على هذا الوتر كل الاديان حضت على هالشي وامروا بعدم الاختلاط وانو الواجب فصل البنات عن الاولاد من الطفولة بل ومن الخطر انو تعلم مدرسة الاولاد بالابتدائي لانو هاد بيعلم الطفل الفواحش لانو الغرب بدو يانا نضل متخلفين عم يشتغلوا هيك ويدعوا للاختلاط طول عمرنا الشباب لحال والبنات لحال واساسا مو ضروري يتعلموا بالجامعة مو فرض عليهون دائما المرأة كلها عورة يعني ما لازم تطلع من البيت ومو شغلها بس يا حيف عليكون بدكون تدعوا للاختلاط مشان ينتشر عنا اكتر قلة الادب والفسوق والانحراف هيك تعلمنا هاد اللي علمتك ياه اسبانيا يا ياس انت والجماعة اللي معك اصحوا يا بابا بقا ارجعوا لايام زمان وعيب علينا هالحكي نرجع لاصولنا وعاداتنا ونحارب المؤامرة اللي علينا عم يشنوها اعداء الامة |
ع فكرة ..
الاختلاط لما بكون مربا عليه من الصغر ومن اوائل عمر البني ادم شي .. ولما بدخل هيك ع البنيي ادم فجأة وبعد مرحلة متقدمة شوي من عمرو رح يكون شي تاني |
اقتباس:
المهم متل ما منعرف انو مجتمعنا مبني على الخلفية الدينية ( الغالبية ) وهي الخلفية مطاطة بحسب الفتاوي والتشريع وعلى اساسها بتكون التربية الاجتماعية طيب خلينا نبلش بالتنشئة المنزلية قبل المدرسية متل ما منعرف انو الطفل لحتى يروح عالمدرسة بكون عمرو ست سنين الادراك والوعي والفهم بيبلش من عمر 3 سنوات عند الطفل وهون بيبلشو الاهل المتدينين يزرعو براسو افكار الدين على اساس انو من الطبيعي يعرف دينو لانو بتبلش عندو التساؤلات عن الحياة وعن كل شي بشوفو حولو وبيلمسو لنحكي شوي عن المدرسة وبعدها منرجع للطفل المدارس متل ما منعرف غالبيتها بسوريا عامة ( المعارف) ومعظمها غير مختلط والباقي خاصة ومختلطة طيب الخاصة بتكون كلها تقريبا اجت ونشات على اساس ديني ( اسلامية ومسيحية وكانت بالبدايات للايتام ) والعامة متاثرة بالغالبية السكانية ( الاسلامية ) وهون لب الحديث انو يابا ليش عملوها العامة غير مختلطة ؟ لانو الغالبية السكانية بترفض انو البنت تختلط مع الشب او العكس من اساس انو الدين هيك امر والحرام والحلال وهي القصص ( ما رح نخوض بالتفاصيل ) مشان هيك منلاقيها غير مختلطة لانو رجال الدين ما بناسبون كلامون يروح سدى بل يجب ان يعمل به والدولة ما بدها تعلق بمشاكل معون فريحت راسها من هالقصة وتركت الامور على حالها اضف اليها انو الوقت كان مختلف عن هاد الوقت يللي نحنا فيه وما كان هالانفتاح هلأ رجعنا للطفل الطفل يابا لما يفوت على المدرسة بكون في عندو رهبة منها لانو شغلة جديدة عليه بتكون .... وغالبية الولاد بتبكي لما تروح (اي اي هاد واقع ) بس الطامة الكبرى انو لما بلاقي نفس جنسو موجود معو بالصف وعم يختلط فيه تقريبا 6 ساعات يوميا طيب الاستهجان الغريب لما بكون الصف كلو صبيان وبكون المعلم بنت او العكس لما بكون الصف كلو بنات والمعلم شب هي كمان مؤثرة عليه مشان هيك منلاقي الطلاب بينصدمو بالواقع لما بيكبرو لانو بكون تعودو الانعزالية والانغلاق من الصغر ملاحظة صغيرة عللى المقالة الكاتب طرح المشكلة بمقالتو بس ما طرح الاسباب وما طرح الحل |
اقتباس:
|
اقتباس:
وين الوضوح عندك انت شايفو ؟ وايضا وين الحل ؟ :D |
اقتباس:
|
تحياتي على الموضوع المهم
أولا : أعتقد أن الاختلاط ما بزيل الرهبة لكن ممكن يخفف منها إلى حد كبير ثم أن الدين ما يوقف ضد و لا مع لأنو من زمان ما كان في كل هالتعقيدات و ما كان القصة كل هالقد فايتة بالحيطان بصراحة نحنا يا منطخها يا منكسر مخها و أظن أنو مع القيم الموجودة حالياً و المغروسة فالغختلاط ما حيؤدي بنا إلى متل الغرب |
اقتباس:
بعدين المدارس والعياذ بالله مختلطة بالابتدائي والتعليم الاساسي وهون راس الغلط وبيجبيوا مدرسة للشباب ومدرس للبنات ليعلموهون على الفسوق بس بالاعدادي والثانوي مفصولين وهيك لازم يكونوا دايم وين المشكلة لو كانت الجامعات كمان للشباب قسم والبنات قسم واساسا البنات مو فرض عليهون العلم بنوب من 1400 سنة ونحنا مفصولين جايين هلا تقولولنا اختلاط وما اختلاط رحم الله زمن ما كانت البنت تخرج الا من بيت اهلا لبيت زوجا ومنه للقبر |
بداية ً ... يا ريت لو تبقى الردود ضمن حدود النقاش الموضوعي .. وبعيدة عن اتــّهام الطرف التاني بالرجعية والتخلف ..
بنجي للموضوع .. برأيي ما فيك تعمــّم نمط معيـّن و تقول عنــّو خلص هاد هو الصح ، وهيك لازم يكون الوضع ... وتقول عن النمط التاني انــّو غلط ، لمجرّد انــّو بمفاهيمك او معتقداتك بتظنّ هالشي .. لانّــو بالنهاية وقت اللي بدّك تنظر لقضيـّة ما ، بدّك تتطلّع عالبيئة المحيطة وظروفا وعاداتا اللي فرضت هالشي .. كـ مثال ، انا ربيت بمدارس بتفصل بين الجنسين .. بس ما حسّيت خلال هالسنين بـ " الرهبة " من الآخر .. او غيرا من الامور اللي انذكرت .. يمكن هالشي بيرجع لانــّو الفصل كان مقتصر عالمدرسة بس ، امــّا بالحياة العمليــّة فـ كل شي عادي .. على عكس كتير من اهل البلد ، اللي عندون الفصل بيمتدّ للعيلة حتى ، بمنع الاختلاط مع اولاد العم والخال وغيرون .. بس كمان - لنبقى حقــّانيين - ، بتضلّ هالشغلة نسبيــّة ، وبتختلف من عيلة للتانية ، ومن مدينة للتانية ... هلأ اللي عنجد يمكن يحسّ بالارتباك او الخوف هنن اللي بيدخلو ع جوّ الاختلاط بالجامعة او بالشغل بعد عزلة مدري كم سنة .. فـيمكن بأوّل فترة يكون " جاية من عالم تاني " ، او انعزالي شوي .. بس بعدين بيتعوّد ... ويمكن سرعة اندماجو مع هالجوّ بتعتمد عليه بالمقام الاوّل و على مدى تقبــّلو للفكرة .. المهم مو هاد موضوعنا بكل الاحوال... اي ... التعليق اللي خطرلي وانا عم اقرأ الموضوع هو كالتالي : بمجتمعات محافظة بتمنع الاختلاط ، وبما انــّك صعب تغيّر تفكير الاهل نحو هالقصــّة .. رح يبقو الاهل امام حلّين .. يا امــّا بدّون يكسرو ع انفون بصلة ويبعتو اولادون للمدارس المختلطة على الرغم من عدم موافقتون ع الفكرة .. ( وهالشي احتمالو ضعيف ) .. لانــّو شغلة ما موافق عليها ، صعب تتقبّل انو تبعت اولادك ع هالمكان ، اللي المفترض يكون " آمن " برأيك .. او ( وهاد المتوقّع برأيي ) .. رح يقلولك وبلا التعليم والمدارس - بالذات للاناث - .. لانو بيبقى المجتمع اللي عايشين فيه ذكوري والشب اولى بالتعليم في حالة - كان ولابدّ - للاختلاط انــّو يتواجد .. وبهالحالة بنكون بدل ما نكحــّلا ، عميناها ... |
اقتباس:
اقتباس:
اقتباس:
اقتباس:
بالله و فيك تقلي منين جايب هالحكي؟؟ شو هالتخلف اللي عم تحكيه يا رجل اقتباس:
فيك بالله تقلي شي حادث منافي للاخلاق صار معك بالجامعة؟؟ يتبع |
| الساعة بإيدك هلق يا سيدي 19:12 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون