أخوية

أخوية (http://www.akhawia.net/forum.php)
-   ملطوشات (http://www.akhawia.net/forumdisplay.php?f=118)
-   -   معتقدات شامية (http://www.akhawia.net/showthread.php?t=131779)

Nasserm 28/11/2009 22:10

معتقدات شامية
 

معتقدات شاميه





* اذا انكسرت كاسة بيقولوا: انكسر الشر (تقولوا الشر مخلوق من الزجاج)



* اذا مر حدا فوق الطفل ما بقا يطول ( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!! و متل ما بقول المتل فشخة حية ولا فشخة بنية)



* قص الاظافر بالليل مو منيح (لا تسألو ليش ما بعرف ولا حدا بيعرف بس مو منيح و خلص )



* مراششة الميه فراق (ما بصير حدا يرش رفيقو بالمي لان بعدين بيتفرقوا اي شو عم يرشه بالزيت كاز )



* للي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين (واللي بيعمل غير هيك بيتحول لسعدان !!)



* اذا اجت الكندرة فوق الكندرة يعني رايحين مشوار (واذا اجت تحتها يعني راجعين من المشوار ؟؟!!)



* اذا زحف الولد او زقزقت العصافير معناها جاينا ضيوف (وبهيك حالة لازم توقفوا ورى الباب لانهم بكونوا طالعين عالدرج)



*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل (واذا طنوا مع بعض معناتها طرشت عليك العوض)



* اذا كان في خناقة بيقولوا اقلبوا الصرامي لتحمى الخناقة (شماتة ) الله لا يشمت حدا فينا



* اذا رفت عيني اليمين بيكون جاينا خبر طريف



*اذا رفت عيني الشمال بيكون جاينا خبر مو منيح(اما اذا رفوا سوى فأنت اكيد احول)



* اذا حكني حاجبي معناها بدنا نستقبل حدا جاي من السفر




*إذا حكني كفي اليمين معناها بدي أقبض مصاري



*و إذا حكني كفي اليسار معناها بدي أدفع مصاري (اما اذا حكك شي تاني بقى فأنت اكيد جربان روح تحمم)



* و ما بصير الحمام بالليل (طبعا شي بديهي لأن اكيد المي بتكون مقطوعة)



*و ما بينفع كب المي بالبلوعة بالليل من غير التسمية بالله و الاستعاذة أولا (يالطيف مشان ما يأذونا ولا نأذيهن) بس عرفتوا مين هدول؟؟؟؟؟؟؟؟؟؟؟؟؟؟........... ولا انا !!!!



*واذا شفت مقص مفتوح لازم فورا تسكرو ( لانو المقص الفاتح تمو بيعمل خناق )




*وإذا عمل العصفور تحتو على الأواعي يعني جاييكون رزقة (وما لازم تغسل ملابسك شي سنة مشان الرزقة)



*و دلق القهوة رزقة وكمان نفس الحكي خليها مدلوقة لا تمسحها



*و شرب المي بعد القهوة قلة زوء (حتى لو اتشردقت موت ولا تشرب مي )




*و اذا الولد الصغير كتير ابن الشهور عم يضحك لحالو بيقولو الملايكة بتكون عم تحاكيه بس ابصر شو ؟؟؟!!!


* و كمان في اعتقاد انو اذا البنت اول ما خلقت وطوطوها ( يعني دهنوها بدم وطواط ) ما بيعود بيطلعلها شعر بجسمها أبداً (عرفتوا ليش بعض البنات عندهم شعر كتير )


* كمان يلي حامل بصبي بتتباشع واذا حامل ببنت بتحلا



* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هاد اذا ما طلع حرامي كمان )


* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص



*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة (بس اكيد في عالم اذا بتقرأ القرأن كله بيضلوا لزقة فلا تحاول)



*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقرأ المعوذات وتقول من عين افلان و تنفخ... وفي حل تاني انك تروح تشيل عيونه وبلا وجعة هالراس



*والي بيعدّ النجوم بيطلعلو تالولات بايدو (بس اذا حسن يحصيهم ما بيطلع شي)



*وبعد ما نخلص صلاة نطوي السجادة مشان الشيطان ما يصلي عليها (خلّيه يصلّي بركدن يتوب ويصير يوسوسلنا بالخير!!)


بنفسجة 28/11/2009 22:18

كانو حياتنا كلا عادات؟!

Nasserm 28/11/2009 22:30

اقتباس:

كاتب النص الأصلي : بنفسجة (مشاركة 1361745)
كانو حياتنا كلا عادات؟!

هو في شغلات كتيرة منتعوّد نحكيها.. وقليل ما منفكّر فيها..

هلق توقف ع الحكي.. ماشي الحال..

بس ع قولتك.. في شغلات منعملها على سبيل العادة.. وإذا منفكّر فيها.. بتطلع بلا طعمة (بدك تسألي إم الجود عنها)


هلا بالبنفسجة..

كيف العيد معك؟ (انتبهي إنو "العيد".. جاية من "عادة" هه :) )

بنفسجة 28/11/2009 22:35

اي صحيح بكل شي معك حق
وكتير من عاداتنا عم نكررها متل ببغاوات وصدقا بكتير من الاحيان ما بنعرف شو مفهوم هالعادة ولا ليش عم نساويا
والعيد منيح تقليد متوارث


الساعة بإيدك هلق يا سيدي 18:17 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.02757 seconds with 11 queries