|
الديموقراطيّة بين التّخلّف والتّقدّم...
في كثير من الأحيان نتكلّم عن التّخلف الحاصل في بلادنا وعن أسباب هذا التخلّف الحاصل وعن كيفيّة النهوض بمجتمعنا وبالتّالي فإننا نلقي بالّوم على الديموقراطية ونحمّلها الجزء الأكبر من المسؤوليّة ولكن ماذا عسى الديموقراطيّة أن تفعل..
في جميع الدول التي تتمتع بقدر جيّد من الديموقراطيّة نلاحظ أنها دول متقدّمة في جميع المجالات(الإقتصاديّة والسياسيّة والثقافيّة...) أما الدول المتخلّفة(النّامية)فإنها لا تتمتع بهذه الديموقراطية.. والسبب لأن الديمو قراطية لا يمكن فرضها بالقوة وإنما هي شكل من أشكال التطور والتقدّم والحضارة وبنفس الوقت لا يمكن أن يحدث تطور ولا تقدّم ولا يمكن أن تنشأ حضارة من دون وجود ديموقراطيّة.. إذاً ما هذه الحلقة المفرغة وكيف السبيل إلى إيجاد الديموقراطيّة في هذه المجتمعات التي تفتقر لها؟ :D |
عادة ..يجدر بنا عند المحاولة على الاجابة عن مثل هذه الاسئلة النظر الى التجارب الاقرب إلينا.. وأرى دائما أن التجربة التركية هي الاقرب الينا على كل الاصعدة..
رغم التحفظات التي قد يراها البعض في طريقة تطبيق الديمقراطية في تركيا الا انها كما أراها ديمقراطية مناسبة تماما للشعوب التي لم تجد الطريق.. هناك شعوب قد تنتخب ديكتاتورا اذا خيّرت.. وبذلك قد تفقد فرصتها بالحصول على الديمقراطية مرة ثانية.. وهذا ما يمنع العسكر حصوله في تركيا |
اقتباس:
واذا انفتح هالباب ممكن يسبب تضاربات كبيري! عصعيد تاني..المشكلي مو بس بايجاد نموذج ديمقراطية يناسبنا.. المشلكة ايضا انو بكل محاولي لتطبيق نموذج ديمقراطي بنلاحظ انو بنوقع بالحلئة المفرغة يلي حكا عنا الموضوع.. |
اقتباس:
أصلاً أنا رأيي الخاص ( بكرر الخاص ) إني ضد الديمقراطية ... و خاصة بمجتمعات متل مجتمعاتنا و مبارح اكتشفت أنو المجتمعات يللي برأينا هي في رأس قائمة الرقي و التقدم .... ما بتلبقلا الديمقراطية متل ما شفنا بالاستفتاء يللي صار مؤخراً بسويسرا شو هيي الديمقراطية ..؟ هي رأي الاكثرية طيب ماذا لو كانت هالأكثرية على خطأ .؟ البعض بقول أنو مع رأي الاكثرية مهما كان ... أنا ضد هالرأي بالمجمل ...... أنا مع الحرية ... الحرية الكاملة بس ماني مع الديمقراطية .... عالأقل بهيك ظروف في أمثلة كتيرة عن مجتمعات ازدهرت و تقدمت و تطورت ... بدون هالشي يللي بسموه ديمقراطية |
اقتباس:
انما كمان الديمقراطية بتعني التعددية الحزبية والقدرة على ازالة الحكم بدون الحاجة لاراقة الدماء.. والديمقراطية كمان بتعني تداول السلطة بين الاتجاهات المختلفة.. الي رجعة.. |
اقتباس:
و في دول كمان فيها تداول للسلطة .. و فيها تعدد أحزاب .. بس ما فيها ديمقراطية ..... متل إيران هي بسميها ديمقراطية الكبار .. ما خص الشعب فيها يعني الدولة عبارة عن كعكة ... و لكل حزب كبير ( أو لقيادة هالحزب )الحق بأخذ قطعة من هالكعكة .. بما يتناسب مع حجمو بس إذا منرجع على فكرة الموضوع الاساسية .. في كتير دول ما فيها تداول سلطة ... ولا ديمقراطية .... بس الانسان فيها مو متخلف ... بالعكس عم يتطور أكتر من غير شعوب الديمقراطية فكرة كتير حلوة ... بس كفكرة كتطبيق بدا كتير أشيا لتكون تجربة ناجحة و هالاشيا شبه مستحيلة و على فكرة كتير من الدول حاملة لواء الديمقراطية .. بس هي بعيدة عن الديمقراطية ... بعد أي دولة من دول العالم التالت لما بتدخل المادة بخياراتنا فنحنا غير أحرار لما بيدخل العصبيات و الدين بخياراتنا ... فنحنا غير أحرار و عدي قد ما بدك مؤثرات |
اقتباس:
وبهالحالة بتكون الديموقراطية ما عطت حريّة التبعية للفئة يلي كانت نسبة الأصوات تبعتها مو كبيرة نفس الحالة بسويسرا.. المعنى لكن أنو الديموقراطية ما بتدعم الحرية والحرية ما بتجسّد الديموقراطية... الا بحالة وحدة أنو يكون الشعب من عرق واحد ودين واحد وتوجه واحد...والخ (بتمنّى تكون وصلت فكرتي) |
الديمقراطية كذبة كبيرة ... معادلة مستحيلة التطبيق ، إن كان بالسياسة أو حتى بالحياة العملية .. إذا كانت الديمقراطية بتعني اتخاذ القرار الذي يرضي جميع الأطراف فهاد شي صعب التحقيق و بتزداد صعوبتو كلما كتر عدد الأطراف المعنية .. و برأيي المتواضع ما في دولة ديمقراطية ، في دول أكتر أو أقل إشراكاً لأقطابها في إتخاذ القرار. و كمان متل ما قال سامر مو بالضرورة الرأي "المزعوم ديمقراطياً" يكون بيخدم المصلحة العامة ... من خلال إقامتي بفرنسا و اللي تعتبر -على ما أظن- دولة ديمقراطية اقتنعت أكتر و أكتر باستحالة تطبيق نظرية الديمقراطية : الحكومة الحالية يمينية -فرنسا تضم العديد من التيارات السياسية لكن كلها ممكن تصنيفها إما يمين أو يسار- و مع وجوب الرئيس إشراك وزراء يساريين في الحكومة إلا انو هالإجراء ما عم بيغير بمصير القرارات و القوانين المتخذة لأنو هالوزراء هدول عم يضطروا يميلوا لليمين إرضاءً للحكومة و لضمان استمرار مناصبهم ... و بالتالي فاليساريين مو راضيين عن تمثيلن بالسلطة ولا عن سير الدولة و القوانين و برأين انو الوضع بالبلد ما ممكن يتغير إلا بفوز مرشح يساري بمنصب رئاسة الجمهورية ... |
أنا لهلاء ماعمبلاقي تعريف شامل كامل للديموقراطية ....
وكأنو كل نظام و تيّار و فكر بيفسّر المعنى على هواه و اهدافو .... |
اقتباس:
|
اقتباس:
|
اقتباس:
بس قصة الشيوعيين مرفوضة من مبدأ ديني عندون مو كتير زابطة أنو المرشح موسوي مثلاً .... تم اختيارو من قبل الولي الفقيه و نادراً بإيران ما نشوف رئيس حكم لأكتر من ولاية وحدة بعدين يعني الوضع بالغرب مو أحسن بكتير أنو يعني بتتخيل بأمريكا أو بفرنسا تشوف حزب اسلامي يقدر يمارس نشاط سياسي ..؟ إذا سمحولو بالوجود فبكون نشاطو اجتماعي و ما بكون حزب أصلاً بتكون عبارة عن جمعيات أوباما بحد ذاتو ... حاربو ترشيحو و كانت الحملة مبنية على كون أصولو إسلامية ... بالمجمل .. كذب ما في ديمقراطية بالعالم في دول عندها حرية كلام بس ديمقراطية ... ما بظن و أصلاً مو غلط هالشي غير إذا بتعتبر أنو رأي الأكترية هو الصح مهما يكن ....... فهادا حديث آخر |
اقتباس:
الديمقراطية هيي حكم الاكترية .. حتى لو كانت هالأكترية 51% ... اقتباس:
أو أسس سياسية .. اقتباس:
|
اقتباس:
معلش تتحملني في عندي كم سؤال على هالحكي بتقدر تقلي شلون ممكن تجي الجرية بلا ديمقراطية؟ سمعت عن شي بلد في حرية بلا ديمقراطية او العكس؟ و اي تقدم ممكن يحصل بظل غياب الحرية و الديمقراطية وايمتى برايك رح يجي الظرف المناسب اللي ممكن يخلينا نفكر بالديمقراطية كحل لمشاكلنا؟ |
اقتباس:
|
اقتباس:
بالمجمل يعني .. هي وجهة نظر أنا بشوف الديمقراطية ... متل الاشتراكية ...هي عبارة عن نظُم حياة مثالية زيادة عن اللزوم لتقدر تكون ناجحة ... لازم يكون عندك شعب و مجتمع مثالي لتضمن يكون رأي الأكترية هو الصح ... لازم يكون عندك مجتمع على درجة عالية من الوعي و الثقافة و الوطنية و الـ ... هالدرجة بتتناسب طرداً مع حجم الاكترية المطلوبة لإحداث تغيير معين |
اقتباس:
ما بيصير يكون مصير الأقليات مربوط برأي شارع ...متل الشارع العربي يللي التأثير فيه و تحريك عصبياتو كتير سهل يعني هلأ ضمن أي مدينة عربية مسلمة فيها أقلية مسيحية .. أو مسيحية فيها أقلية مسلمة ... بتقدر مثلاً و انت طرف تالت تحرق دار عبادة واحد ... لتخللي كل أكثرية هالمدينة تقوم على أقليتها .... و تصود لطردها إذا بدك |
اقتباس:
|
الديمقراطية
تستند إلى إرادة الشعب المعبر عنها بحرية، كما أنها تتصل اتصالاً وثيقاً بسيادة القانون وممارسة حقوق الإنسان وحرياته الأساسية والديمقراطية تعد عملية من العمليات بقدر ما هي هدف من الأهداف، ولا يمكن لمثال الديمقراطية أن يتحول إلي حقيقة واقعة يحظي بها الجميع في كل مكان إلا من خلال المشاركة والمساندة الكاملتين من قبل المجتمع الدولي والهيئات الوطنية الحاكمة والمجتمع المدني والأفراد أيضاً. وبما اننا نعيش ونتعايش في بلدان مازالت تتخبط بين هذه النظم وخصوصاً من ينصبون أنفسهم على كراسي دائمة وينادون بالديمقراطية فكيف لشعب يرضى أن يعيش بهكذا ظروف وأوضاع وهو ينادي وينادي وصوته لايسمع لا بانتخابات ولا تمكينه للمشاركة في تعزيز التحقق والموازنة من أجل ازدهار هذه الديمقراطية ومن يشجع حقوق الانسان ويتبنى هذه القضية على أساس أنه في بلد يدعو بالديمقراطية يرى نفسه في ساحات القضاء والشعب مغلوب على أمره ويريد أن يكون مثالي لكنه محكوم بقمع الأفواه سواء نادى بالاشتراكية سابقاً والأن بالديمقراطية لاحقاً لنصل إلى المطلوب لابد من تكثيف الجهود لفرض الثقافة والعلم والبت بالنظم السياسية والاقتصادية والاجتماعية والثقافية، فضلاً عن تكريس الاحساس بالوطنية // |
اقتباس:
منصب رئيس الجمهورية مختلف في ايران عنه في باقي الدول لأن الرئيس الايراني موظف عند سلطة اعلى ألا وهو ولي الفقيه الذي لا نراه يتغير كل فترة. السبب في عدم وجود أحزاب اسلامية في امريكا او فرنسا هو قصور بنشاط المسلمين السياسي في تلك المجتمعات مو لانو القوانين ما بتسمح, على سبيل المثال بلغاريا دولة غالبيتها من المسيحيين ونسبة المسلمين فيها 9% غالبيتهم من اصول تركية ولديهم حاليا حزب سياسي يدعى حزب حركة الحقوق والحريات وهو ثالث اكبر حزب في البرلمان البلغاري ومشارك في الحكومة الائتلافية ويمثل المسلمين الأتراك في بلغاريا. في ألمانيا حزب التجمع الاسلامي أو تنظيم رؤيا الملة الذي يدعي تمثيل الاسلاميين الاتراك في المانيا ويرأسه محمد صبري اربكان ابن شقيق رئيس الوزراء التركي الاسبق نجم الدين اربكان وهو حزب يدفع المسلمين في المانيا نحو العمل السياسي من وجهة نظر التنظيم العالمي للاخوان المسلمين. بالنسبة لأوباما خلينا نتطلع للنهاية ونشوف كيف انو غالبية الشعب الامريكي اختاره كرئيس رغم اصوله الاسلامية, وهذه الاكثرية تتحمل مسؤولية اختياره, فإن لم يستطع تحقيق برنامجه الانتخابي خلال مدة ولايته او كان لحكمه نتائج سلبية, فإن هذه الاكثرية بكل بساطة لن تنتخبه في الانتخابات القادمة. هذه هي الديمقراطية سيد مادماكس , صدقني ما بتخوف او على الاقل هي احسن بخمسين مرة من نظامك البعثي الاسدي. |
اقتباس:
وخلينا نرجع لبلغاريا ونقرا هالخبر اللي عم يحكي عن ادانة زعيم حزب سياسي بلغاري لتطاوله على الاقلية التركية في بلغاريا: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - أدانت محكمة في العاصمة البلغارية زعيم احد الاحزاب السياسية الفاعلة وحذرته من عدم التطاول في كلامه على المواطنين من اصل تركي. وتعتبر هذه القضية مهمة في حماية الاقليات في بلغاريا التي تشهد حساسيات قومية وإثنية. واعتبرت المحكمة ان النائب في البرلمان البلغاري فولين سيدروف القومي المتشدد، زعيم حزب «اتاكا»، ومعناها (الهجوم)، يثير من خلال تصريحاته النعرات القومية وان تلك التصريحات من شأنها نشر الحقد والعداء. ومنعت المحكمة السياسي سيدروف من اطلاق تصريحات مماثلة. اذا القانون في دولة ديمقراطية متل بلغاريا يحمي الاقليات وحقوقهم السياسية والفكرية فالأتراك في بلغاريا لديهم مدارس باللغة التركية ومحطات تلفزة ناطقة بلغتهم وحزب سياسي يمثلهم في البرلمان والحكومة , فلذلك برد وبقلك ما في شي بخوف بالديمقراطية بالعكس هي من ارقى اشكال الحكم واحترام الانسان وما برفضا الا اصحاب العقول المنغلقة والمنتفعين والطائفيين |
اقتباس:
لأنو ما مرقت معي ولا بمرجع تطرّق مصطلح الديمقراطية للأقليات الديمقراطية بتعني حكم الاكترية شئنا أم أبينا معتمدة أنو اي شي بتختارو الأكترية فهو صح .. أو أي شي بيصير صح لأنو الاغلبية اختاروه و هالكلام من منظوري خطأ اقتباس:
بس هالأحترام ما اجا من مبدأ الديمقراطية .. هالاحترام مستمد من الدستور و القانون بغض النظر إذا هالدولة ديمقراطية أو لا اقتباس:
اهاا يمكن أنا صاير طائفي و عم اقبض من السلطة .. ما عاد أذكر .. بس أنو غريب يعني أنا ببداية حديثي قلت أنو هي وجهة نظري و يللي على اساس بيآمنوا بالديمقراطية ما تقبلوا رأيي بالرغم من أني نوهت أنو وجهة نظر شخصية |
كأنو حاسة أنو في خلاف بالأصل على تعريف الديمقراطية وعلى فهم الديمقراطية
الديمقراطية نوعين ديمقراطية مباشرة بتقرر الحكومة القوانين والقرات وبيتم التصويت على القوانين من قبل جميع أفراد الشعب"متل سويسرا" ديمقراطية نيابية : وهيي الديمقراطية الاكثر انتشارا في العالم.. وهادا النوع من الديمقراطية بيكون فيه تمثيل نيابي عن الاحزاب أو الكتل البشرية بالدولة الديمقراطية الليبرالية: وهيي النوع الاهم والموجود بدول أوروبا.. هوي احد اشكال الديمقراطية النيابية .. بيكون في تمثيل للأكثريات بالبرلمان ومن ثم في الجكومة ولكن وجود االليبرالية "الدستور الليبرالي" بيمنع سيطرة الاكثرية والكتل النيابية الكبيرة وبيمنع هضم حقوق اأقليات بحكم كون الليبرالية همها الاول تقديس وحماية حرية الفرد بكل أشكالها |
أعتقد بل صرت بهالفترة متيّقن من كون الشعب السوري "خاصة" و الشعب العربي "عامة" ليس على استعداد ليعيش أي تجربة ديمقراطيّة .. مش لـ عطل في هالشعوب لأ .. أنما لغسيل الدماغ اللي تمت ممارسته على هالشعوب .. على مر الأعوام و الأزمان و الأجيال .
تحيّة . |
اقتباس:
أو أنو هالشعوب ما عندها استعداد نتيجة عدم الوعي للحرية المفروض تكون من حقها بالأصل |
اقتباس:
بدولة متل سوريا يعتبر ضرب من الخيال انك تفكر بتوعية الناس, لك حتى النشاط الاجتماعي ممنوع.... أي نوع من أنواع العمل الجماعي يقابل بالاعتقال و التنكيل و السبب هي قاعدة الحكم الشهيرة اللي بتقول انك تحكم شعب جاهل و متخلف و متطرف دينيا اسهل بكتير من انك تحكم شعب فهمان وواعي. وفي ظل هيك ظروف انا مع رأي نهال بانو مستحيل التقدم خطوة وحدة على طريق الحرية و الديمقراطية في ظل الاوضاع الحالية, في ظل وجود ناس في الحكم هدفن الوحيد هو البقاء في السلطة على حساب مصلحة الشعب و الوطن |
بتصور الديمواقراطية مرتبطة بعوامل كتيرة لازم تكون محققة متل الحريات المدنية و مفهوم المواطنة و الاقتصاد الحر الحالة الاقتصادية ...الخ
بظن انو الديمواقراطية بدون هالعوامل , رح تكون اسمها فوضى يعني مثلاً ... انو لبنان عندو ديموقراطيّة .... وين هالديموقراطية ازا ولاء الفرد و انتمائو موجّه لطائفتو أو عشيرتو ... وعند أول امتحان بتتحول لانفلات أمني و ممكن كتير يتطوّر لحرب أهليّة .... مو راكزة ...أبداً |
اقتباس:
|
اقتباس:
ايضا لا اقتصاد حر بسبب هيمنة الفاسدين من ازلام وعائلة رئيس النظام على الاقتصاد السوري وفي ظل هذا القمع من الصعب تعزيز روح المواطنة, فالمواطن الذي يمضي سنتين مذلتين من حياته في الخدمة العسكرية رح يقرف من كل شي اسمو وطنية او مواطنة, نفس الشي بسببوا الفساد المستشري في الدوائر الحكومية والفقر المدقع وعدم توفير فرص العمل وانتشار الواسطة, هذا كله رح يؤدي لتقوقع المواطن ويأسه وقد يؤدي لمشاكل عديدة متل التطرف الديني على سبيل المثال او المشاكل الجنائية وبالتالي غياب كلي للشعور بالمواطنة لذلك الحل اخي الكريم يكون اسعافيا فوري وذلك باسقاط النظام قولا واحدا وبأية وسيلة ممكنة, فهو العائق امام كل هذه الامور وبالتالي الديمقراطية |
اقتباس:
فيك تقلّي كيف بدّك تعلم الناس ديموقراطيّة ونص الشعب أمّي ..النسوان فيه بتقتل باسم الشرف ..ألاف القتلى بالتارات بين العشاير ..أغلب الشعب انتمائو لطائفتو ..لقوميتو بالدرجة الاولى ...وبعدين لبلدو ... كيف بدك تعمل ديموقراطية و في ناس ...بالوقت الحالي ... بتعتبر كل شي اسلامي بالبلد هو احتلال و نتائج فتح من 1400 سنة ولازم يرجعوا عالصحرا....وانو المسيحي هو صاحب الارض الاصلي ... كيف بدّك تعمل ديموقراطية لبشر فهمانين الاسلام انو كل واحد مو متلنا فهو كافر .... لك الله شلون بدك تعمل ديموقراطية ازا لهلاء نحن مامنعرف كيف نوقّف على دور الخبز ...وبتشوفنا عمنتقاتل مع بعض كرمال كيلو سكّر على بواب التموين ....واتفه شغلنا منحلّها بالهوبرة و العياط و الدفش و الرفس عمّو ...ازا ماتعلمنا كيف نصير بشر و نتقبل الاخر و نتعلّم منّو و نعلّمو و نحرر فكرنا من فسافس و تفاصيل اش صار من 700 سنة بين هدول و هدول ...ومن 1600 سنة اش عملو هدوليك مع هدول ...ونطلّع للامام ...للامام بس .. ...ما رح تكون ديموقراطية هداك الوقت .... اقتباس:
طيب أسقطنا النظام و بعدين ... بيفلت الجيش و بتفرق لطوائفو اللي اجا منها ...أعمال انتقامية ضد العلوية ...اعمال انتقامية مضادّة للجيوب المعادية الموجود بمناطق العلوية... بيهجمو السنّة على شيعة ضيع حلب ..وعالمسيحية بمناطقون....السمعولية حولين حماة بتعمل ميليشيا و بتهاجم تخوم حماة السنيّة انتقاماً لشيعة حلب .......الاكراد بيشوفوها فرصة ...بيعلنو انفصال الشمال السوري منطقة الجزيرة و اتحادها بكردستان العراق ...الارمن مابيرضو حكم كردي عليهون وخصوصي في تارات من 150 سنة مانسيوها "ولارح ينسوها" وكزالك التركمان ...مابطيقو الاكراد و بيعتبروهن اعداء طبيعييين...بيعملو ميليشيات وبيبلشو مفخخات و حرب شوارع وكمان الارمن و التركمان مو هالصحبة الزيادة ..بتعرف ...حزازات قديمة والاسى مابنتسى...بالاضافة لعرب الشمال السوري و عرب الجزيرة رح يقاتل الاكراد ...بهالوقت بيكونو عرب دمشق عملو هجومين شاملين ...واحد انتقامي على أكراد الشام لانو جماعتن انفصلو ....والتاني استباقي على المسيحية منشان مايفتحو تمّون ....مسيحية حمص مابتسكت ...بدّها تنتقم ...اي بتطحش على مسلمي حمص و شوايا البادية بتعمل مراكز عسكرية و حقول تدريب مقاتلين وبتأجر للي بيدفع أكتر .... ولسا في أشوريين و دروز و سريان...وباقي الملل اللي نسيتا ....اي اي وكمان مالازم ننسا فلسطينيي فتح و فلسطينيي حماس و فلسطينيي كوكتيل باقي التنظيمات ..والاخوان ...وجماعة خدّام ...وجماعة رفعت ..والشيوعي ..والقومي السوري ...والقاعدة ..حزب الله بيفتحلو فرع كمان....وأكيد مارح ننسى مليشيات البعث الي رح يتجمع و ينظم صفوفو و يقاتل من جديد.... وبتلاقي السلاح عمبيدفّق من كل الجهات ...و كل الجهات الاقليمية رح "تدحش " انفها بالشأن السوري ...هاد ازا بقي سوري بتحبّ تشوف بلدك هيك ...! انا من ناحيتي ...مابدّي :D |
اقتباس:
أنا ما عم قول انو لازم الديمقراطية فورا بيوم و ليلة تصير , الشعب لازمو حكومة انتقالية حكومة انقاذ وطني تنتشل الوطن من المحنة الحالية. نحني مشكلتنا مو بس مع الديمقراطية , نحني صفينا بالقاع بكل المجالات, دول تانية كنا نضحك عليها صار هلق تضحك علينا, تحول الشعب لقطيع همو الوحيد الاكل و الشرب و الجنس ماعندو مطالب ما عندو حاضر ما عندو مستقبل. أنا ما بنكر انو كل اللي حذرت منو فوق ممكن يصير بس هدا شي طبيعي من مجتمع الو 40 سنة عايش تحت البسطار, مجتمع دولتو بتستخدم العلوي أداة لقمع الطوائف التانية........ نظام بيرسخ باذهان الناس فكرة السجان العلوي ضد السجين السني ...... نظام ما بيهمو شو رح يصير بهالبلد من بعدو و شلون الناس عم تخبي الحقد و تتناقلو من جيل لجيل بس هدا الشي للاسف ثمن غالي رح يدفعوا اولادنا نتيجة تنبلتنا و رضوخنا للوضع الحالي. ما في دولة بالعالم شعبها بيتمتع بالحرية الا و بتلاقي شعبها دافع كتيييير لوصل لهي الحرية يعني نحني ما عنا الا خيارين يا اما نضل هيك لحتى بالاخير نصير متل شعوب افريقيا(وعلى هالحالة مو مطولين كتير) يا اما انو شعوب اوربا الشرقية اللي رمت ديكتاتورييها بزبالة التاريخ مو احسن مننا بشي. |
اقتباس:
سيد أبو نجبو : واضح انك بتعتبر التعددية الطائفية والقومية في سوريا كمصدر خراب ودمار وتفكك, بينما انا اعتبرها عامل قوة وتماسك وفسيفساء جميلة تميز المجتمع السوري سابقا تعرض المجتمع السوري لديكتاتورية دينية طائفية سنية استمرت 4 قرون وهم العثمانيين, وبعد خروجهم عام 1916 لم اسمع او اقرأ عن هذه الاهوال التي كتبتها! لا والاكثر من ذلك ان الشعب السوري انتخب مجلسا وطنيا في ظل الاحتلال الفرنسي بشكل ديمقراطي وانتخب رؤساء بشكل ديمقراطي في فترة الانفصال مثلا على الرغم انه لم تمض فترة طويلة على خلاصه من الاحتلالين العثماني والفرنسي. فهل من المعقول ان تنتج ديكتاتورية تدعي العلمانية واستمرت 40 عام ( البعث الاسدي) أهوالا وفظائع اكثر مما قد خلفته ديكتاتورية دينية طائفية سنية استمرت 400 عام؟ بعدين اخي للنظر الى تجارب الأمم والشعوب الاخرى لنتعلم منها ومن نتائج تجاربها, مثلا موريتانيا دولة ذات مجتمع عشائري متعدد متناحر والسوية الثقافية والعلمية لسكانها لا أظن أنها تزيد عنها لدى الشعب السوري. تعرض الشعب الموريتاني لديكتاتورية ولد الطايع لمدة 20 عام وفجأة وأثناء وجود ولد الطايع في اجتماع القمة العربية بالرياض سمعنا عن انقلاب في موريتانيا وتشكيل حكومة انتقالية استمرت سنتين وبعدها تم اجراء انتخابات حرة نزيهة. صحيح انه بعد ذلك حدثت مشاكل وانقلابات اخرى ولكنني لم اسمع او اشاهد حربا اهلية بين الموريتانيين او ميليشيات او انفجارات او اشياء كالتي ذكرتها. الشق الثاني من ردي هو تساؤل شبيه بالذي طرحه الاخ ايهم, فما الحل الان برأيك؟ |
اقتباس:
أنا من ناحيتي - يمكن تقول عني اني مواطن ما عندي طموح حتى كون حر - بس ما عندي استعداد اتحمل الخسائر يلي بتنتج عن اسقاط النظام |
اقتباس:
مشان هيك انا قلت انو الاجيال اللي رح تجي بعدنا رح تدفع ثمن تقاعسنا و سلبيتنا, بالنسبة لجيلنا و اعني الجيل اللي ولد بالفترة بين اواسط السبعينات لأواخر الثمانينات أنا قاطع الامل في..... هدا جيل الثورة.... جيل بدنا سلتنا بلا عنب ...... جيل أقصى أماني قسائم المازوت و زيادة الراتب على العيد. الأمل الوحيد لهالوطن هو الأجيال اللاحقة و اللي ممكن ثورة الاتصالات اللي عم تصير بالعالم تخليها تطلع مختلفة عنا و ممكن تقدر تغير شي بهالواقع المر. |
اقتباس:
اقتباس:
العراق المحروق المحتل المنتعل رفّو !! ولالبنان المحكوم بعشيرة و طايفة و قومية ..بأشخاص أقل وصف انهون ألعاب و بيادق بأيد القوى الخارجيّة!! اينا دول عمتضحك علينا و نحن بالهم سوا ... ياحبيب البلد مابتحتاج لحكومة انتقالية ...البلد بحاجة الى تأهيل شامل كامل ...ولاتظن انو هالشي بتحمّل مسؤوليتو النظام لوحدو .. فيك تقلي وين دور النخبة الثقافيّة "محامين - اساتذة - ادباء -مفكّرين - علماء " ؟ مسؤولية المثقّف هي فتح العيون وتحرير العقول عالواقع ...كشف الخلل بالمجتمع و النضال لتغييرو ...هاي هي مسؤوليّة المثقف الحقيقية ...مو صف حكي شعاراتي بجرايد و مدونات ماحدا بيشوفها غير اللي متلو أو اللي بمستوا ثقافتو .. المثقف لازم ينزل لتحت ...للشارع ..يشوف الناس و يتخالط معهون ...يرصد الاخطاء و يحكي عنها ...يتقرب من الناس لحتّى يوعّيهون ....و يصبر على خيبات الامل...ما ييأس ... أغلب أدبائنا و مثقفينا اذا طلع معو شي ابداعي و انشهر شوي بيصير ببرج عاجي فوق ...مابيرضى يتنازل و يحكي مع العامّة ... انا مابشوف دور الكاتب و الاديب انو يقعد يكتب اشعار غزل و قصص حب و هيام ..بيكفي ...من ايام عنترة و نحن عمنجترّ هالمشاعر و منعيدها بصيغة تانية ...أو يكتب شعر سياسي مقصقص بطريقة مزرية.. منشان الرقابة ...واذا كان هربان برّة البلد بيكتب قصائد سب و وتحشيك ...شو بدو يفيدني هالحكي ...بالعكس ...رح يشعرني بالذل أكتر و أكتر ....رح يدمّر ماتبقّى من نفسي ... أنا بدّي أديب يعلمني كيف اقرا ....كيف احبّ القراءة ...يعلمّني كيف ازرع باولادي حب الادب و المعرفة والقراءة... وين الدور الحقيقي لرجال الدين مشايخ و قساوسة ؟ مسؤولية رجال الدين أكبر و أكثر تأثيراً ...بدل مايصرفو و قتون و جهدون لتكريس ثقافة الكراهية و المجادلة و النقاش بفسفسات و مقارنات و شغلات عفا عليها الزمن ..يوعو الشعب ...مئات القضايا التي تحتاج الى حلّ ...تقاليد بالية - التعليم-التربية-الاسرة-العنف الاسري-العنف ضد الاطفال-احترام البني أدم بيجي عالم دين بقعدلو سنتين زمان و هو عمبيألف كتاب عن الفرق بين الفرقة النجبويّة و الفرقة الايهميّة و مين رح يدخل النار و مين رح بدخل عالجنّة ...ياترى لو هالرجل استثمر الوقت اللي قضاه بتأليف هالكتاب و استعمل العلم اللي متعلمو بقضايا تهمني انا الانسان الدرويش مو أثوبلو ...و أفيد الي ! أو بجينا شيخ بيقعد ساعتين و هو عمبيصرخ و يوصفلنا كيف بأخر الزمان رح يجي "الاصيلع الافيلع" اللي طولو سطاعش متر و طول ذراعو سبع متار منشان يهدم الكعبة ...اي انا شو بيهمني بأخر الزمان ...فهمني شو أعمل بحياتي هلاء ...كيف اتعامل مع البشر اللي حوالي...وخيو يبقى الكعبة الله بتولاها ... دور جمعيات المجتمع المدني شبه غائب ....سوى بعض حملات الخجولة من حين الى أخر .... الجمعيات الاهلية أغلبها يعمل باسم طوائف ..جمعية للسريان - جمعية للارمن - جمعية الشيخ الفلاني- جمعية الامام عليتاني...وكلهون بيشتغلو لصالح طايفتون و قوميتون .... ضياع النخب و تعطيل دورون ببناء الانسان هو اللي عمبيفرز التخلّف و يكرّس مفهوم الانقسام و الولاء للجماعة و ليس للبلد هلاء منجي لاهم المشاكل و الامراض اللي منعاني منها كسوريين : 1-التخلّف : واللي بيندرج تحت وصفو كتير شغلات " الجهل - التقاليد البالية-التربية-الاسرة-النزعة الطائفية-ثقافة العنف الخ " ومتل ماحكيت فوق هي مسؤوليّة المتنورين و الطبقة المثقّفة و رجال الدين و الجمعيات المدنية و الدولة ... 2-الحريّات : حجب و قمع و اعتقالات و ارهاب ... عمندفع ثمنا...من حريتنا من ولادنا من عمرنا ..لكن بالاخير رح نوصل للهدف ....لازم نوصل ...قبل كانو يوزعو منشورات بالليل و اذا بدّهون يعملو اجتماع بطريقة كتير معقّدة و خطرة..لكن هلاء ...بظرف ربع ساعة ممكن تجمع عشر تالاف شخص بكبسة زر و تعمل حملات و عرايض و تجمع تواقيع و تفضح الدنيا وانته قاعد ورا الشاشة ...الزمن بتغيّر و الاخبار اللي كانو يلقوننا ياها من القناة الاولى قبل خمسطاعش سنة مارح ترجع...هلاء تصير حادثة بالفلبين بعشر دقائق الدنيا كلها بتعرف ...والنظام بيعرف انو ماعاد يقدر يسيطر ...ومارح يبقى الوضع على حالو ....التغيير بدّو يجي ....بالرضى بالغصب بدو يجي .... 3-الفساد : المحسوبيات و الرشوة و الواسطات ... لما رح يصير عندك هامش حريّة معقول و يصير في مسائلة و قوانين شفّافة , مارح أقلّك انو رح ينقضى عليه ..انما رح توقف انتشارو ...ويبلش ينكمش و يتضائل 4-الاقتصاد المتدهور : أغلب المصايب نتيجة الفساد و السرقات اللي اهلكت الحرث و النسل ...اصلاً الاقتصاد هو قوانين صارمة , مرونة و شفافية ...لما بتحقق هالمناخ الاقتصادي المناسب , تلقائياً رح تترجم النتائج عالواقع .. بعد مانحضّر حالنا و نهيئ انفسنا ونحل تلت المشاكل اللي فوق ...تفضلو ... عطونا ديموقراطيّة ... انا مؤمن انو كل الامراض اللي بتعاني منها البلد مرتبطة ببعض ... والاساس هو الانسان ...تفكيرو و نمط معيشتو و منهج حياتو هو مفتاح الحل للتغيير صدقني لما بنبلّش نتقبل بعضنا و نتحرر من سجون تخلّفنا وننفض الغبرا من أدمغتنا... بيكون أول و أشرف خطوة في طريق التغيير ... بيكفي توصيف و تنظير و صف حكي عالواقع المرّ و الذلّ اللي عايشينو ...كلنا منعرف شو الامراض اللي منعاني منها ....وحاطّين ايدنا على خدنا ...عمننظر شي معجزة من السما ...أو قوى خارجية تجي تحتل البلد و تشيل النظام و تحط بدالو أنظمة ...واذا كنّا هلاء عمنصفق لقائد واحد ....هداك الوقت بدنا نصفق لخمسين قائد و زعيم.. صرلنا زماان كتير ونحن عمنحكي و منحكي ...لازم يجي الوقت اللي ندوّر فيه على حلول ....ونبلّش نشتغل لعل و عسى أولادنا ...أو احفادنا.. يقدرو يوصلو ..ويعيشو بحريّة و هنن رافعين راسون ...هداك الوقت بيصير "انا سوري اه يانيالي" سلام |
اقتباس:
على الهامش : كلامك هاد خطير كتير أخي أبو نجيب أنت قاعد في الصين و عما تقراء ما يجول في خاطري على بعد ألاف الأميال بيناتنا :o ليكون أنت من أهل الخطوى دستووووووووور :larg: على راسي أخي أبو نجيب :D |
اقتباس:
اقتباس:
اقتباس:
اقتباس:
اقتباس:
المثقف هو بالنهاية جزء من الشعب و الشعب مرعوب من شي اسمو عمل جماعي لانو اي نوع من انواع العمل الجماعي حتى لو كان ثقافي يصنف من قبل الامن على انو محظور اقتباس:
يا أما بيقطعوا عنو الهوا و حتى خطبة الجمعة بشي جامع صغير ما حدا سمعان في بيحرموا ياها تذكرت شو صار بالشيخ عبد الرحمن كوكي؟ دخلك عرفتلي هدا ليش اعتقلوه؟ رغم انو ما قرب على سياسة و لا على اي خط احمر, و رغم هيك اعتقلو قال لانو اهان شيخ الازهر علما انو بشار الاسد نفسو سبق و بخطاب علني انو اهان رئيس مصر ووصفوا بنصف رجال. طيب شو بتفهم من هالحكي؟ انو المبادرة بهالبلد ممنوعة لانو الواحد ما بيعرف على شو عم يعتقلو هالعالم. اذا هدا الشيخ الساذج اللي واضح انو ما الو علاقة بشي صار معو هيك شلون لكن لو شيخ عندو فعلا برنامج اصلاح طموح لهالمجتمع انا ممكن كون شيخ جامع و قرر اعمل درس كل يوم مشان وعي الناس على قصة جرائم الشرف, برأيك لو عملت هالشي بمبادرة شخصية مني كم استدعاء أمني رح يجيني؟ و اذا أصريت على هالشي كم برمة على بساط الريح رح يطلعلي؟؟ اقتباس:
عنا نحني قال الشباب مو فاضين لحل مشاكل الشعب لانو مشغولين مع أحمدي نجاد في افشال المخططات الامريكية في المنطقة, طيب انو عطوا هامش حرية ولو هالقد لمنظمات اجتماعية لتحل مشاكل متل العنف الاسري متل جرائم الشرف متل قصص نظافة الشوارع و غيرها .........بس لاء كل شي بتلاقي مربوط بالامن و الاستدعاء ........... هلق انت كمغترب جرب ترجع على بلدك و تعمل جمعية سميها جمعية تعليم الناس عدم رمي النفايات في الشارع..... اي بس هيك سميها و شفلي بالله رح يصدقوك جماعة الامن؟؟ رح يخلوك تفتتح مقر لجمعيتك و تجتمع مع هالناس و تحاول تصلح سلوكن الاجتماعي؟؟ لك بزمانها المنتديات اول ما بلشت بال 2000 قالوا لحالن كم واحد علاك مسمين حالن مثقفين منخلين يطئوا حنك شوي بس بعدين لما انتبهوا انو هالمنتديات بلشت تجتذب ناس كتير و خاصة من فئة الشباب سكروها و دكوا كل اصحابها و اعضائها بالسجن اقتباس:
اقتباس:
اقتباس:
خود ابسط مثال, ما رح قلك تظاهر للمطالبة بحقوق سياسية او غيرو .....لاء هدا حلم في بلدنا العزيز..... خلينا ناخد موضوع شركة الخليوي اللي عم تنهب الناس علنا و مو فارق معها حدا. بذكر صارت محاولة مشان عمل احتجاجي و كانت محدودة لانها اساسا انتشرت عبر الانترنت يعني ضمن فئة معينة, طيب هلق لو فكرت مجموعة تعمل منشورات تشجع العالم انها تقاطع الخليوي حتى تتحسن الاسعار و الخدمات شو رح يصير فين برأيك؟؟ أصلا هالشي بديهي بسوريا مشان هيك ما حدا بفكر في أصلا. اقتباس:
المشكلة يا صديقي هي متل قصة البيضة و الجاجة مين فين لازم يجي اول؟ لازم الشعب بالاول يصلح حالو و يتحضر للديمقراطية..... طيب حلو بس شو بدك تعمل اذا في ناس مو من مصلحتها انو الشعب يتحضر للديمقراطية و شايفة الوضع الحالي كتير مناسب الها طالما هني متحكمين بهالبلد و مصالحن ماشية و اذا قلت لاء بالاول مرحلة انتقالية فالناس مرعوبة و اللي بيكرهوا النظام بيخافوا من التغيير يمكن قبل اللي بيحبو طولنا عليك لا تأخذنا خاي :D |
اقتباس:
كما هو معروف عندما تتعطل كليتي الانسان ويصاب بالقصور الكلوي’ فان ذلك يؤدي لمجموعة من الأضطرابات مثل: ارتفاع الضغط الشرياني تخلخل العظام فقر الدم اعتلال الدماغ ولكن عندما يجري هذه الانسان عملية زرع كلى جديدة فان هذه الاضطرابات تختفي تلقائيا بمجرد زرع الكلى الجديدة وهذا هو الحل اخي الكريم, يجب ان نكنس الزبالة البعثية الأسدية من سوريا اولا وقبل كل شيء وستجد كيف ستحل باقي المشاكل تلقائيا بالنسبة للنخبة المثقفة انا بقلك هن وين: إما في السجون أو في المنفى او تحت الارض بتقلي محامين؟؟؟ ليكو عميد الحقوقيين في سوريا الاستاذ هيثم المالح عمره 80 سنة في السجن لمجرد انه انتقد ظاهرة السكن العشوائي بدمشق على قناة بردى!!! بقى على مين المسؤولية هون؟؟ على النظام او على هيثم المالح؟ كمان عندك المحامي انور البني والمحامي مهند الحسني بالسجن والاستاذ عارف دليلة خرج لتوه من السجن والمفكر عبد الرزاق عيد وغيره من المثقفين السوريين في المنفى. اي واحد بحكي كلمة برات الطريق النظام بنهي مهما كان عمرو شب صغير او ختيار كبير وهالشي اكيد النظام لوحده يتحمل مسؤوليته. شوف شو صار بمنتدى الأتاسي, شوف شو صار باعلان دمشق, هدول مو احزاب سياسية, هدول نخب مثقفة كان عندن برامج تهدف لتوعية المجتمع السوري ورصد الاخطاء والنقاش حولها بكل حرية كما في منتدى سهير الاتاسي ولكن النتيجة كانت اغلاقن ورمي الاعضاء بالسجون, بمختصر الكلام ابو نجبو النظام ما يعطي حدا مجال ليتنفس, النظام لن يسمح بتوعية الشعب السوري . بالنسبة لدور رجال الدين فمع الأسف غالبية رجال الدين في سوريا حاليا هم خريجو المؤسسات المخابراتية السورية, اما رجال الدين الحقيقيين فهم خارج البلاد هاربين من قمع النظام د او تحت الارض مثل الشيخ مرشد معشوق الخزنوي الذي قام النظام بقتل والده قبل سنوات. واعلم اخي الكريم انو مافي خطبة تلقى في منابر يوم الجمعة الا بتدقيق وتمحيص من المخابرات السورية ولا يطبع كتاب ديني الا بعد ان تتم مراجعته وتعديله من الفروع الامنية, أي ان هذه الخزعبلات والسخافات عن اخر الزمان اللي عم يصرعونا فيها المشايخ هلئ هي بموافقة ومباركة المخابرات السورية. بتقول انو دور جمعيات المجتمع المدني غائب!! مين غيبوا؟؟ الشعب او قمع الاجهزة الامنية؟ بالنسبة لمشكلة الحريات, مين قلك انو المعارضة ما عم تستخدم التقنيات الحديثة لفضح النظام؟ لما تم اعتقال المحامي هيثم المالح, كان المسؤولين الدوليين الكبار عم ينددوا بهالشي في غضون ساعات قليلة من الحادثة, هناك عشرات المواقع للاحزاب السورية المعارضة ومجموعات خاصة بها على فيسبوك وتويتر, حتى ان قنوات المعارضة كزنوبيا وبردى ارعبت طغاة دمشق الذين وظفوا كل قوتهم وجبروتهم واوراقهم لاغلاق هذه القنوات المشاكل الاخرى اللي ذكرتها من فساد واقتصاد متدهور النظام مسؤول عنها مو الشعب. |
اقتباس:
تركيا ...حلو هالكلام ...شوف تركيا بالخمسينيات و الستينيات ...كيف كانت و كيف صارت هلاء ...تركيا بالخمسينيات دولة علمانية بالاسم فقط ..القمع الفكري و الغاء الاقليات و سيطرة العسكر "حماة العلمانية" ... وهلاء تركيا تطورت كتير و صارت أكتر نضجاً ....لكن كيف صارت هيك ....دعم خارجي !!..انقلاب عالنظام ..!! صارت هيك بفضل كفاح و تضحيات النخب السياسية و الثقافيّة التركية .... عزيز نيسن...يساري التوجه و علماني الافكار .... كم مرّة اندك بالسجن ...كم مرّة يسكّرولو جريدتو و يرجع يفتح وحدة تانية بغير اسم ... نجم الدين اربكان ...كم حزب اسس ...كل مرة ...بينحظر حزبو و يدخل السجن ...بيطلع و بيعمل حزب جديد و بيرجع للكفاح والعمل السياسي.... رجب طيب و عبد الله غول نفس الشي ..لاحظ انو هالشخصيات السياسية ذات توجّه اسلامي ... شفلي كيف قدرت هالنخب السياسية تغيير سياسة البلد و توجهاتها لصالح أفكارون و مبادئون , الانفتاح و قيادة العالم الاسلامي ...تحقق هالشي بدون ما تمس نظام الدولة و بدون اراقة دماء ...بدون انقلاب .... بقو يكافحو و يناضلو طوال تلاتين سنة حتى وصلو لغاياتون...مو سنتين تلاتة أو عشرة سنين... وهاد اللي كنت عمبقولو بالمشاركة السابقة ...انو الكفاح من أجل التغيير, يتطلب الكثير من العمل و الصبر و الاصرار و المثابرة ....انته عمتغيّر مجتمع ..شعب كامل ....طريقة منهج التفكير..بدّك تنسجن و تتعذب و تنطرد برّة البلد و مع ذلك ما تيأس ...وتبقى مصرّ على اهدافك و ماتحيد عن مبادئك....مالك عمتعارض و تشتغل طمعاً بالحكم أو لغايات خاصّة ...متل المعارضة العراقية اللي صارو هلاء بالحكم و طلعو اوسخ من صدّام و نظامو .... موريتانيا ...انقلاب على حكم ديكتاتوري ...جابو رئيس جديد ...رجعو عملو عليه انقلاب ...وعملو انتخابات ...مابتعرف بالمستقبل كم انقلاب بدّو يصير ..... بتبقى موريتانية حالة خاصّة و غريبة نوعاً ما..غريبة بالنسبة للوسط العربي انو يجي عقيد يعمل انقلاب و يسلم السلطة بعد انتخابات ديموقراطية ....مبروك الون و بتمنّى نصير متلون يوم من الايام.... اقتباس:
او بيحبسو واحد بيحكي عن جرائم الشرف أو الزواج المبكّر أو الثأر أو تشغيل الاطفال ! ولا بيحققّو مع صحفي لانو حضّ على حق البنت بالتعليم و الاختلاط و التحصيل الدراسي ...!! برجع بقول دور النخب ليست المطالبة بالحرية و الديمواقراطيّة و التغيير بالوقت الحاضر.... حالياً المطلوب و بالحاح ... توحيد رؤى و اهداف النخب الاجتماعية ...كيف يعني .. انو المثقفين بمختلف توجّهاتهم ورجال الدين بمختلف انتمائاتهم, الكتّاب و روّاد الكلمة بمختلف مشاربهم, هالشريحة من الناس كتير بيكون الهون تأثير على الاشخاص و العامّة ....لازم يتفق الاغلبيّة منهون على مجموعة نقاط مشتركة تكفل الارتقاء بعقلية الشعب و انماط تفكيرون ... يعني ....كتير من الكتّاب و المثقّفين و رجال الدين بيحرضو عالطائفية و العنصرية ...عالعنف...تبرير الجرائم...تطرف ضد المرأة ...تكريس سلطة الرجل .....الكراهية الطبقيّة....الخ من الامراض الاجتماعيّة المستشرية بالناس ...ويوجد كمان بعض الاراء النخبوية تبالغ في طرح افكار التحرر الاجتماعي و التخلّص من قيود الدين و العادات و الاخلاق ..الخ هدول النوعين من النخبة ما بيساهمو و لا بشكل من الاشكال بواجبهون المفروض عليهون من حيث التوعية و ايجاد اسس تطور التفكير و العقليّة للناس ....بينما الملاحظ هلاء انو دور هالنخب منحصر ببث أفكارو و أيجاد أي دليل على صحتها و الانتقاص من الاخر و اقصائو ... وتوجد قلّة من المتنورين اللي فهمو ماهيّة الصراع و ادركو أسباب الانحدار ...هي النخبة المفروض تكبر و شعبيتها تزيد بين الناس ...هالقلّة العاقلة الحكيمة من العلماء و المفكرين لازم تزيد قاعدتون الشعبية و تزيد افكارون بين الناس ...لازم نتخلص من ثقافة الكراهية و تحلّ محلها تقبل و محبّة الاخر ...نفهم انو المرأة هي نص الشعب ...ولمّا بنهمّش دور المرأة معناها عم نسقط نص الشعب من حساباتنا ..لما بنوصل لحقيقة انو البنت هي انسان عندو ارادة و ذكاء و بيقدر يحاكم الامور وليست كتلة شهوة متحركة...او عار لازم نخبّيه من العيون ....لمّا منعرف انو ست ولاد مابيقدر اي أب و أم يعطيون اهتمام و رعاية و تربية و انو رح يكونو تكملة عدد ليس الا...لما منعرف انو كلمة جحش أو ضرب الكف بتأذي نفسية الطفل و بتأثّر على شخصيتو وثقتو بنفسو و تفاعلو مع محيطو ... اقتباس:
مو ضروري يكون بصفة رسميّة ......بين الشلل و الاصحاب ....بالاجتماعات الخاصّة.....أغلب الشباب بتجتمع منشان تلعب تركس ...لو هالوقت الي بيضيعوه على شب الكوبة و بنت الدينار , عوضوه بتبادل الافكار و الطروحات والنقاش ...من أصل خمس اشخاص لو في واحد استفاد هالواحد رح يأثر على تنين و هالتنين على اربعة الخ الخ برجع بقّلك المشوار طويل و صعب ..النتائج مارح تظهر لا بخمسة و لا بعشر سنين ...ازا الواحد بلّش هلاء اقتباس:
هلاء الشي الحلو انو انا عرفتو و اقتنعت فيه و صرت أنقل قناعاتي لاشخاص تانيين ...منن اللي اقتنع و منن اللي صار يناقش ...وبرأيي النقاش كان كتير مفيد ..خصوصي انو كان في بشر مستمعين فقط وهاد شي جيد كونون فهمو و عرفو معلومات ماكانو بيعرفو شو بتعني ....أو كانو متخوّفين منها ... اقتباس:
ليش عندنا مالون حاجبين مواقع متل عكس السير و موقع نساء سوريا و غيرون كتير ....مع انو أغلب هالمواقع هدفها هو تسليط الضوء على الامراض التي يعاني منها المجتمع السوري... منين الواحد كان بدّو يعرف مساوئ أو محاسن قانون الاحوال الشخصيّة الجديد لولا هالمواقع و هالمتنورين اللي فنّدت و درست القرار ... وطرشت المواقع فيه .... اقتباس:
عندك تلات حلول يا أما تقعد طول الوقت تبكي على حالك و ضعفك و هوانك على الناس و تسبّ النظام و الحكومة ... أو تحرّض امريكا و اسرائيل على احتلال البلد لتخليصك من قمع و استبداد النظام ...بس بهالحالة مابعرف كم مليون سوري ممكن يكفّو وقود لهالحتلال ... أو تفكر كيف بدنا نغير حالنا ....وكيف لازم نتطوّر ....للوصول بالنهاية لمجتمع منفتح و شعب واعي ... اقتباس:
بس بتعرف ...بالخمسينات و الستينات كانت فترة نهوض قومي شامل بكل الدول العربيّة ..ولاتنسى انو الحماس الشعبي كان يغطّي المشاكل , الاعتزاز بتاريخ العرب و انجازاتون و الالتفاف حول الزعيم المهرّج عبد الناصر عمل عَمَل المخدر أو البنج ... ولما صحي المواطن على حقيقة الاحباط و الذل و الكذب اللي كان عايش فيه أدى الى تشخيص مشاكلو و حقيقة ضعفو و محدودية فكرو و عقلو .... اقتباس:
أكيد بدك تتحارب و أكيد بدك تنظلم ......أكيد في جهات بدها تحاول تقضي عليك لتبقى هي المسيطرة ... لكن ..باعتقادي و ايماني.. نبل الغاية يستحق كبر التضحية... طولنا .. سلام بقى. |
اقتباس:
ليش مايصير فينا متل العراق مثلاً...؟ اقتباس:
كنت عمبقصد انو دور النخبة بتوعية الناس و محاربة الامراض الاجتماعية المستفحلة بين البشر من طائفية لعنصرية لحقد طبقي الخ .....هاد الدور غايب ....وكنت عمبقول انو قبل ما ننادي بالديموقراطية ...يجب علينا و على النخبة اعادة هيكلة الانسان لكي يكون مستعداً لاستقبال شئ اسمو ديمواقراطية ... يعني بردّي السابق كنت عمبتسائل ..اذا انا هلاء قلت انو ياجماعة ...ياناس...يابشر .... تشغيل الاطفال تحت سن ال12 خطأ ...يا أب لمّا بتشغل ابنك الصغير بتكون عمتعرضو لتحرشات ولا سمح الله يصير اغتصاب ..ياصاحب المحل أو الورشة ...اذا اجاك حدا بدّو يشغل ابنو عندك لاتقبل ...اذا صرلو شي للولد رح تكون انته مسؤول امام ضميرك ...شو فيو هالحكي ...عمبسب حدا أنا ...عمبضرّ حدا .... معقول بجي الامن بيشحطني على كلامي هاد...!! |
| الساعة بإيدك هلق يا سيدي 07:27 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون