|
مشان موضوع الدعارة و الإنحلال الأخلاقي و انعدام العفة بالغرب ...
أول شي الخيانة الزوجية مرفوضة قطعاً وما في مجال للنقاش بخطورتها عالأسرة , مع التأكيد على ضرورة إلتزام الرجل متل المرأة بالعلاقة الزوجية.
كمان لازم نفصل بين ممارسة الحب و ممارسة الجنس و اللي من أشكالها الدعارة بالغرب الدعارة مرفوضة لكن العلاقة الجنسية قبل الزواج شي طبيعي وخصوصاً لما بتكون نتيجة علاقة حب صادقة. نحنا بالشرق الشريف العفيف الطاهر المبارك السامي , قيمنا و عاداتنا و شواربنا و بواب حاراتنا المسكرة و ليالينا الشامية المقمرة بتمنع أي علاقة جنسية خارج إطار الزوجية و بما أنو الممنوع مرغوب ... ف فهمكن كفاية المهم ... بإذن الله نحنا الشعوب الشرقية الشريفة العفيفة رح نصمد بوجه الإنحلال الأخلاقي و الغزو الثقافي الغربي ... إي نعم منصمد و منكسر راسن كمان. خليهن يحتلوا دولنا و يقتلوا شعوبنا خليهن يخترعوا روبوتات و يتنعموا بالنووي خليهن يحلوا مية البحر و يزرعوا الصحرا خليهن يعمروا أبراج و ناطحات سحاب خليهن يطلعوا عالقمر و المريخ كمان ... بس بيضلوا بلا أخلاق و نحنا منضل أهل الشرف و الأخلاق و المروءة (كما ورد في شارتي مسلسلي باب الحارة ج5 و حمام القيشاني ج13 ) و لسه كل واحد بيلف و بيدور و بيهلك ليلاقي شي يذم فيه الغرب و ما بيطلع بإيدو غير إنن بلا عفة و بلا شرف و بلا بطيخ مبسمر و كل هالشي حقد و غيرة لأنن سبقونا بألفين سنة و نحنا مو قادرين نلحقن هلأ متل ما الشرق بيستهجن الجنس قبل الزواج هني بيستغربوا تتزوج البنت أو الشب من دون ما يكون إلن أي علاقة جنسية سابقة!!! يا جماعة هيك ثقافتن و هيك تربوا (عفواً ماتربوا) وهيك تعودوا , وهاد مو شي نعيبن فيه . و إذا حبينا نعيبن لازم نكون أحسن منن بكل شي .. إجتماعياً و إقتصادياً و عمرانياً و معيشياً و لازم يتوفر عنا ديمقراطية و حرية و أمن و ثقافة و وعي و أكيد أخلاق ... بس مو الأخلاق اللي أغلبية الناس الفهمانة بتربطها بما يسمى "عفة المرأة" ؟؟؟!! لاء أبداً , الشرف و الأخلاق إنك تعيش بكرامة وسيد نفسك و صاحب قرارك و قادر تلبي كل احتياجاتك و احتياجات ولادك من دون ما تشحد أو تكسر نفسك . الشرف يعني إنك ما تقبل بالذل و الإستغلال الشرف يعني إنك ما ترضى محتل جاي من الغرب(المنحل) يسرق ثرواتك و يتحكم بمصيرك و يقسم بلادك على هواه الشرف يعني إنك ما ترضى اسرائيل تن## عرضك وأرضك ستين سنة وبعدا تروح تبوس ايديها لتوقعلك سلام بيجيبلك شوية مساعدات أميركية و أوروبية ؟! الإسبان "و هم أحد الشعوب المنحلة أخلاقياً" طردوا العرب من بلادن بعد 800 سنة وكانوا منتظرين فرصة يستردوا وطنن من الغزاة العرب قصدي الفاتحين ، وما فكروا أبداً بمبدأ متل الأرض مقابل السلام .. كأنو الأرض اللي بدن يرجعوها اليهود أرض اللي خلفوهن !! الشرف إنك ما ترتشي و تسرق بلدك وكأنو مال مباح أو ورثة متل ما صار للأسف مبدأ متعارف عليه "حلال عالشاطر" الشرف إنك تنتفض لتساعد واحد محتاج بدل ما تشمت فيه تقول خرجو الله لا يقيمو الشرف كل هدول مع بعضن , وبما إنو ما بيتوفر عنا شي من هدول.. و بما إنو فاقد الشيء لا يعطيه ... بشوف إنو نطلع على عيوبنا و نحاول نصلحها قبل ما نقعد نوزع شهادات الشرف على شعوب العالم. |
حبيبي اذا استلطفتك انسانه ببار ممكن تدع
يك لـَ تكملو السهره ببيتا بيمارسو و الصبح اذا لقو شي موضوع مهم بيحكو في و إلا كل واحد راح بحال سبيله مع العلم ممكن هي العلاقه بتطور و ممكن يبو بعض |
يا عزيزي خليك على الموضوع وشو علاقة إسرائيل بالشرف والأخلاق
يعني والله ما عم بفهم لشوا خلط الحابل بالنابل وشعبان برمضان الأخلاق والشرف أنك ما تسوي شي غلط وما تسوي شي تخجل فيه أمام الناس وعلى فكرة في معيار بسيط أي شي بتخجل فيه أمام الناس هو من أنواع الغلط وأي شي ما بترضى لأختك تعمله لازم ما ترضاه لنفسك يعني سؤال بسيط حضرتك عم تدافع عن المارسة قبل الزواج ويمكن إنتا عملتها وبتحكي بالموضوع بلا خجل حط إختك محلك تماماً بتقبل عليها تمارس قبل الزواج؟؟؟؟؟؟؟؟؟؟؟؟؟؟؟؟ وإن صار ومارست بيضل الموضوع سر وسر خطير لحتى يتلاقى شي "إبن حلال" مشان يقبل يتزوجها و "يستر عليها" هذا مجتمعنا ليش بنحب نتشبه بالآخرين على فكرة إنوا كل شي غلط لازم تطلع إسرائيل مسؤولة عنه؟؟؟ شو هالحكي اللي ما عاد يشبع خبز نفس الحجة السخيفة اللي فقدت مصداقيتها، لسا إسرائيل إسرائيل ، والله فهمنا ولوه يعني سبب إنتشار الممارسات هو تأخر سن الزواج وسبب الأخير هو الفقر والبطالة ورفع المهور و و و ..... يعني مو ناقص إلا تقنعنا حضرتك إن إسرائيل مسؤولة عن فقرنا وعن بطالتنا وعن فساد وسرقة أموالنا من قبل مسؤولينا وعن وعن وعن.... يا صاحبي الدعارة منتشرة بسورية ومعظم الداعرات مرخصات ومن كم يوم صدر تعليق من المفوضية السامية لشؤون اللاجئين في سورية(الأمم المتحدة ..... أحسن ما تفتكر إسرائيل) أُعلن فيه أن بعض العراقيات يمارسن الدعارة عن طريق الزواج لمدة أسبوع وهي وسيلة وجد فيها الشباب السوري المسكين منفذاً _ يعتبره بعيدا عن الحرام_ لممارسة الجنس. ما بدي طول أكثر من هيك على كل هذا رأيي وهو يحتمل الخطأ والصواب وأتمنى أن نراجع آرائنا وحضرتك أولهم لأنوا مو معقول تطلع إسرائيل مسؤولة حتى عن الدعارة في سورية. على فكرة جارنا طلع مع بنته إيدز (الله يبعد عنا وعنكم وعن كل الممارسين بزواج أو بدونه) ممكن أعطيك رقم هاتفه وتحكي معه بركي بيرفع دعوة على إسرائيل. |
خدلك سيكاره وروق شوي ليش هل العاطفية كلها . المشكلة في جميع المواضيع التي تطرح في منتدى أخوية "عدا الجدّية منها والتي تحذف بدورها" تطرح بشكل مبتور وناقص وهي غير صالحة أصلاً لأن تكون أرضية جيدة للنقاش والحوار إن اختلفنا أو اتفقنا المهم أن نعلم على ماذا نختلف وعلى ماذا نتفق . الموضوع أصلاً يدور حول الأخلاق فليكن النقاش حول مفهوم الأخلاق من أين يستمدها الإنسان وهل هي جامدة ساكنة أم متغيّرة متحركة . هل مفهوم الأخلاق واحد لدى جميع الشعوب التي تدين بدين واحد أم أن الدين يشكل جزء من الأخلاق الإنسانية ويستمد الباقي من حضارة المنطقة وإرثها الإنساني . دعونا نصوغ أي موضوع يطرح للنقاش ونصوبه أي نضع له أرضية جيدة ننطلق منها كي نتحاور . ثم مقارنة أخلاق الغرب مع أخلاق الشرق لا تتم بالمنطقة السطحيّة أو القشور بدون تحديد لمفهوم واضح للأخلاق . وشكراً |
اقتباس:
|
بفهم من كلامك انو طالما احنا ناس متخلفين وبعاد عن الحضارة والتكنولوجيا مفروض كل شي بنآمن انو غلط نبطل نحكي فيه لأنو بأي عين بدنا نحكي ؟
حسيتك خلطت كتير أمور في بعض واشي لاو علاقة واشي ما الو ! هم حرين بالاخر شو بدهم يآمنو شو بدهم يعملو شو تعريف الاخلاق عندهم وشو مسموحلهم وشو لأ بالنسبة الي بشوف انو طبيعة المجتمع الشرقي بكل علاتو ومشاكلو وأمراضو الاجتماعية طبيعة فيها اشيا ايجابية يجب احترامها ومن ضمنها انو العلاقات الزوجية خارج اطار الزواج مرفوضة ! وهاي بشوفها بصالح البنت اول ع اخر لأنو شوي شوي بيصير لحمنا رخيص وبتصير الوحدة مجرد عابة ع سرير واحد اشتهاها ! ما بعرف بس احس انو في قصص مترابطة بموضوعك برجع عالاكيد |
الأخلاق ليست مفهوما مطلقا كما أنها ليست حكر على شعب من الشعوب
المشكلة أنكون عم تقارنو غلط.... البنت بالغرب مانها متل البنت بالبلدان العربية. البنب بالغرب كيان مستقل و ذو قوة تحديد و اختيار بكل شي بالحياة و ليست مجرد أداة جنسية كما يتصورها البعض, بعدين ما بعرف ليش يعني معتبرين بالغرب الكل مع الكل و متل الأرانب عم ************** كل النهار دون أحم و لا دستور!!! لا أخي غلطااااااااان.. هون الزواج مقدس متل ما هو مقدس بالبلدان العربية. الفرق هو انو هون ما في داعي لل (ما باس تما غير اما) و ما في زواج بدون مخالطة و معرفة سيئة من قبل... و ما في هالرقابة الخانقة عالبنت. هاد الفرق |
اقتباس:
هاد اكبر غلط برأيي انو منقارن حالنا بالغرب من ناحية الاشياء الظاهرية بس ما حدا بياخد بعين الاعتبار الظروف و البيئة و المجتمع و تقاليدو و عاداتو و كيف بيفكر و كيف طريقة حياتو |
اقتباس:
أكيد لقد أصبت كبد الحقيقة . مفهومنا عن الغرب مغلوط وخاضع لأحكام مسبقة وخلفيات إستعمارية وصراع حضاري ديني . ومفهوم الغرب عن الشرق أيضاً مبني على نفس الخلفية أضف عليها مصلحته في إبقاء الشرق متخلف ليضمن سطوته عليه ونهب ثرواته . نحن نرى في المرأة الغربية تلك المرأة المتجردة من كل القيم والقابعة في البار أو على قارعة الطريق تنتظر الفحل الذي يشتهيها , هذه الصورة التي تصدر لنا كي نتبناها بدون فكر ووعي وقدرة حقيقية على التحرر وتحمل نتائج قرارات التحرر أي باختصار المراد لنا إمرأة تفقد قيمها الشرقية وتتبنى قشرة غربية جوفاء خالية من كل قيمة . المرأة الغربية هي إمرأة متحررة مسئولة عن نفسها متعلمة مثقفة عمليّة تبحث عن شريك حياة يتكامل معها وتتكامل معه ولا تبحث عن معيل ولا تقول ظل رجل ولا ظل حيط . نريد من المرأة العربية أن تكون بتحررها الفكري هكذا وأن تكون قادرة على الفعل وليس التمني أما ما تبقى من قناعات شخصية سواء إتبعتها أم لا فهذا عائد لها وهي التي تدير شؤون حياتها بلا وصي أو معيل وهو حل لا تحبذه الغالبية من نساء الشرق لأنهن يبحثن عن الحلول السهلة مهما كانت الخسارة . والأخلاق لا علاقة لها بالحرية الجنسية وهذا لا يعني الإنحلال كما يخطر على البال أو نتمنى لا ليس هكذا . فالدعارة يمكن أن تكون بل هي قائمة فعلاً بين الرجل وزوجته الإغتصاب قائم فعلاً بين الرجل وزوجته وتغليف الموضوع بأي قشرة لا يستطيع أن يطمس جوهره . كيف نستطيع أن نجري هكذا مقارنات ونحن لم نحسم بعد قضية مثل قضية الخلوة بين المرأة والرجل ."لا أريد أن أتشعب أكثر من ذلك " "وأنا أكتب ما أكتب أستمع إلى قضية فتاة القطيف في السعودية " وشكراً |
اقتباس:
يعني انا قريت الموضوع ورجعت قريتو مرة تانية بعد ماشفت ردك هاد لحتى شوف وين الموضوع عم يلوم اسرائيل او غيرها على وضع غلط بمجتمعنا بس ماشفت ذكر اسرائيل هون ماكان ابدا لحتى يلومها صاحب الموضوع على تردي الوضع الاخلاقي ببلادنا وانما كان القصد (على الاقل متل مافهمتو) انو من قلة الاخلاق لما بنقبل اسرائيل تضل محتلة بلادنا ونحنا عم نتذلل الها لحتى ترجعلنا شقفة ارض مع انو الارض النا :D |
| الساعة بإيدك هلق يا سيدي 11:19 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون