أخوية

أخوية (http://www.akhawia.net/forum.php)
-   عناوين الأخبار (http://www.akhawia.net/forumdisplay.php?f=71)
-   -   إطلاق نار على حافلة سورية شمال طرابلس (http://www.akhawia.net/showthread.php?t=132445)

DARKNESS 22/12/2009 15:12

ممم

يعني منستنتج انو غلط يموت شب بس مو غلط عشرات سنين من النهب و السرقة اللي صارت بلبنان

الحقد بيولد حقد

دم هالشب مو شي ادام الدم اللي انسفك بحرب لبنان

مو تسفيه لدموا او لروحوا بس يعني الواحد يكون منطقي مو عاطفي

جاد81 22/12/2009 15:37

طولوا بالكن شوي يا شبيبة ... يعني هل المنطقة من طرابلس للحدود السورية كل عمرا هيك و على طول بيصير فيها هيك مشاكل ..كمان ليش نزلتو باللبنانية هيك ...متل مافي زعران هونيك في زعران بسوريا

أنا بعرف مع كل يلي صار أثناء تواجد القوات السورية بلبنان و لهلئ العلاقة بين الشعب اللبناني و العمال السوريين مانها سيئة ..

و خاصة بالضيع اللبنانية و لا حدى في يخبرني عالبنان لاني فاتلة من طرابلس بالشمال لبنت جبيل بالجنوب

بنترك الموضوع للحكومة السورية و السلطات اللبنانية و انا بنصح كل العمال السوريين يفوتو لبنان من حاجز المصنع عن طريق الشام

لانو مجرد المرور بطرابلس بيوجع الراس

و الله يرحم الشب يلي توفي و يشفى البقية

ياسمين_الشآم 22/12/2009 15:52

ولسا ماشفتو شي والآتي أعظم

وجية هالحريري وراها بلاوي بس على مين :sly:

والله مابينعطو وجه لأنهم بميت وجه وعندن احساس بالنقص تجاه أي سوري

والشب اللي راح شهيد في سبيل قضية كرامة هالوطن رحمه الله عليه

marochka 22/12/2009 16:30

في كتير أغلاط من الجهتين، ومازالت الأغلاط مستمرة، لأنو ما حدا عم يتعلم من الماضي، يا بيعادو لأبعد الحدود، يا بيتآخو أكتر من اللزوم. وبالحالتين في مين بيحرض العالم على بعضا.
بس بالنهاية هي الحادثة ما لازم تاخد أكتر من حجما... رغم الأسف على الدم البريء

وردة نيسان 22/12/2009 18:13

ايييييييييييييييييييه على الله :(:cry:

Nihal Atsiz 22/12/2009 18:40

لولا هالحرمية البعثية الاسدية مو ناهبين اقتصاد البلد, ما كان اضطر مليون مشحر سوري انو يشتغل ببلد صغير متل لبنان.
بعدين في شغلة عجيبة كتير.
بس يصير شغلة بلبنان بتأثر سلبا على النظام السوري فورا بتهموا اسرائيل وبخترعوا نظرية مؤامرات ( اغتيال الحريري مثلا)
واما شغلة قتل العمال السوريين فاسرائيل هون مستبعدة نهائيا ولا مؤامرة ولا بطيخ
عنجد شي غاية بالقرف
على كل حال الله يرحم جميع شهداء الشعبين السوري واللبناني

MadMax 22/12/2009 19:53

اقتباس:

كاتب النص الأصلي : Nihal Atsiz (مشاركة 1369030)
لولا هالحرمية البعثية الاسدية مو ناهبين اقتصاد البلد, ما كان اضطر مليون مشحر سوري انو يشتغل ببلد صغير متل لبنان.
بعدين في شغلة عجيبة كتير.
بس يصير شغلة بلبنان بتأثر سلبا على النظام السوري فورا بتهموا اسرائيل وبخترعوا نظرية مؤامرات ( اغتيال الحريري مثلا)
واما شغلة قتل العمال السوريين فاسرائيل هون مستبعدة نهائيا ولا مؤامرة ولا بطيخ
عنجد شي غاية بالقرف
على كل حال الله يرحم جميع شهداء الشعبين السوري واللبناني

يا زلمي انت ما تركت موضوع بكل أقسام المجتمع .. إلا نزعتو بكم فكرة حاملون براسك و ماشي ..

و عامللي قصة ( الاحتلال الاسدي و البعثي ) متل قصة الجمل يللي ما عندك غيرها

يعني هلأ إذا حدا نزل موضوع معايدة بمناسبة عيد الميلاد .... رح تنطلو و تقلو وين العيد و الاحتلال البعثي بالبلد





يا ريت تتقيد شوي بمحاور المواضيع ككل

marochka 22/12/2009 20:02

يعني حتى الأميركان بيشتغلو برات بلدن أحياناً، ولبنان ملان أوروبيين تاركين بلادن وعم يشتغلو هون، يعني السفر بداعي العمل موجود بكل البلدان ومهما كان شكل النظام، يعني أنا مع سامر أنو هي صارت غير موضوع وغير قصة. وبعدين مين استبعد اسرائيل من أي شي؟ بس مو شرط اسرائيل تنفذ بإيدين يهود ، في تقاطع مصالح بكتير أشيا. بس حجم الحادث ما بيوحي بهل الشي، وصعب إنك تقارنو باغتيال الحريري بدون التقليل من قيمة حياة أي شخص.

شامي للنخاع 22/12/2009 20:14

اقتباس:

كاتب النص الأصلي : Nihal Atsiz (مشاركة 1369030)
لولا هالحرمية البعثية الاسدية مو ناهبين اقتصاد البلد, ما كان اضطر مليون مشحر سوري انو يشتغل ببلد صغير متل لبنان.
بعدين في شغلة عجيبة كتير.
بس يصير شغلة بلبنان بتأثر سلبا على النظام السوري فورا بتهموا اسرائيل وبخترعوا نظرية مؤامرات ( اغتيال الحريري مثلا)
واما شغلة قتل العمال السوريين فاسرائيل هون مستبعدة نهائيا ولا مؤامرة ولا بطيخ
عنجد شي غاية بالقرف
على كل حال الله يرحم جميع شهداء الشعبين السوري واللبناني

والله؟؟!!:shock:

حلبي 22/12/2009 20:42

اقتباس:

كاتب النص الأصلي : MadMax (مشاركة 1369059)
يا زلمي انت ما تركت موضوع بكل أقسام المجتمع .. إلا نزعتو بكم فكرة حاملون براسك و ماشي ..

و عامللي قصة ( الاحتلال الاسدي و البعثي ) متل قصة الجمل يللي ما عندك غيرها

يعني هلأ إذا حدا نزل موضوع معايدة بمناسبة عيد الميلاد .... رح تنطلو و تقلو وين العيد و الاحتلال البعثي بالبلد

يا ريت تتقيد شوي بمحاور المواضيع ككل

من شوي كنت عما أتصفح العم غوغل و أذا بموضوع يتحدث عن الكلاب الشاردة في محافظة دمشق على موقع كردي

الموضوع في البداية كان كتير أنساني و عبر عن المأسات التي يعاني منها السكان في دمشق

ما لاحأت أتجاوز الست سطور أخونا بالله حولي الموضوع على حال الأكراد في عفرين و بصراحة أنا كتير بحب الأكراد و أحترمهم و لكن في هذا الطرح لم أكمل الموضوع لأنه أصبح نوع ما من التعقيد يعني أصبحت عقدة لدى البعض في كل شيئ أنا لا أدافع عن الحكومة في بلدنا و لكن هذا لا يعني أن نحمل الحكومة أسباب كل فشل في حياتنا الخاصة و العامة

خلينا شوي نكون واقعيين

بنفسجة 23/12/2009 01:15

اقتباس:

كاتب النص الأصلي : DARKNESS (مشاركة 1368931)
ممم

يعني منستنتج انو غلط يموت شب بس مو غلط عشرات سنين من النهب و السرقة اللي صارت بلبنان

الحقد بيولد حقد

دم هالشب مو شي ادام الدم اللي انسفك بحرب لبنان

مو تسفيه لدموا او لروحوا بس يعني الواحد يكون منطقي مو عاطفي

لك ياصديقي ماحدا قال مو غلط عم احكي وقول لو ضربو على عسكري مابزعل لانو كان موجود ببلادون
الغلط ياصديقي لما بتجي بتحملني مسؤلية كل شي صار وتنسى انو في من الناحية التانية ناس بيتحملو المسؤلية معي كمان
مابدنا نرجع نفتح احاديث التعاون الفظيع السوري اللبناني بهديك الفترة
المنطقية ياصديقي ما بتقول تحط الحق على هالعامل السوري ولا المنطقية انو الواحد يتمرجل على واحد رايح يشوف رزقو
شفنا المنطقية لما رجعو انتخبو نفسون يلي قتلوهن بالحرب الاهليه ونفسون يلي فوتو السوري على بلادون
ونفسون يلي سمحو لجزمة العسكري السوري تدعس على رقابون
اي منطقية هي؟
وين العاطفية هون؟
طيب ليكون ماتركولنا كلمة من ال2004 لهلق ولسا منقول معلش مقهورين معلش الجيش ياما عمل
وبيجو لعنا وبنستقبلون ولاكنا متلون
(كشعب عم احكيك)
ليش هنن كشعب لازم يستمرو على هالمنوال طيب يروحو يحاسبو قادتون بالاول ويجيو ياعمي بس ينزل مسؤؤل سوري لعندون يدبحوه
ما خلال وجود الجيش وبالحرب صار في قتلى سوريين كتير كمان وياما ناس رجعت محملة بالتابوت من هنيك
طيب هلق العلاقات عم تحاول ترجع طبيعية ليش حتى تتخرب؟
وليش لنسمح لنظرية( المؤامرة) تشتغل وليش عم شوف انو تلات رباع اللبنانيين طلعو عملا اسرائيلين؟!!
كل هاد عاطفي؟ ولا منطقي؟

MadMax 23/12/2009 02:14

اقتباس:

كاتب النص الأصلي : حلبي (مشاركة 1369081)
من شوي كنت عما أتصفح العم غوغل و أذا بموضوع يتحدث عن الكلاب الشاردة في محافظة دمشق على موقع كردي

الموضوع في البداية كان كتير أنساني و عبر عن المأسات التي يعاني منها السكان في دمشق

ما لاحأت أتجاوز الست سطور أخونا بالله حولي الموضوع على حال الأكراد في عفرين و بصراحة أنا كتير بحب الأكراد و أحترمهم و لكن في هذا الطرح لم أكمل الموضوع لأنه أصبح نوع ما من التعقيد يعني أصبحت عقدة لدى البعض في كل شيئ

اي مزبوط

هيك دائماً بتنتهي النقاشات العربية ... كل واحد بيحاول يستغل أي تفصيل ليدعم وجهة نظرو .. و رأيو .. حتى لو كان هالرأي ما خصّو بموضوع النقاش

اقتباس:

أنا لا أدافع عن الحكومة في بلدنا و لكن هذا لا يعني أن نحمل الحكومة أسباب كل فشل في حياتنا الخاصة و العامة
حتى لو كانت الحكومة مسؤول عن الجزء الاكبر من معناة الشعب السوري ... بس المفروض بهيك مناسبات .. الشعب يوقف جنب بعضو


بعدين إطلاق النار صار عالباص بدون ما يميز غرض سفر هالشباب

يعني الشهر الماضي نزلنا حضرنا حفلة ببيروت
لو صار إطلاق نار على الباص يللي راكبينو .. كنا رح ننصاب ....بدون ما يكون لحكومتنا ذنب بسفرنا

أم الجود 23/12/2009 02:46

اقتباس:

كاتب النص الأصلي : MadMax (مشاركة 1369247)
بعدين إطلاق النار صار عالباص بدون ما يميز غرض سفر هالشباب
يعني الشهر الماضي نزلنا حضرنا حفلة ببيروت
لو صار إطلاق نار على الباص يللي راكبينو .. كنا رح ننصاب ....بدون ما يكون لحكومتنا ذنب بسفرنا

شو عم تحكي انته يا رجل ........! كيف مالا ذنب ؟؟؟!!!
لو نظامك الأسدي البعثي العفن عم يهتم بالفن و يرعى الثقافة كان جبلك الفنان اللي على كيفك و مزاجك لعندك يعملك الحفلة
و ما تركك تعتاز تسافر لبيروت بهديك الساعة الناقصة و يقوصك المواطن اللبناني البريء ...
يعني بصراحة كمان وقتا بيكون خرجك الله لا يقيمك
لأنو كما تكونوا يولّى عليكم و الوضع صار شي بيقرف كتير للصراحة ....................................

3ajeeb 23/12/2009 05:54

حدا بيقلك نسبة ذكاء؟

يعني لو في واحد من هالمتواطنين اللبنانيين اللي عملو هالعمل (على اساس انن لبنانيين)
بيفكر و بيقول انو اي الماضي هيك والحاضر هيك
شو مشان المستقبل ؟

يعني مع عدم وجود الجيش السوري . العداء ما إلو أي سبب
يا أخي 1+1 = 2
كيف بدك تعادي الدولة الوحيدة اللي مجاورتك (غير عدوك)
بيجيك كم مخ بشوية افكار دينية انسانية عاطفية تاريخية بيخليك تقتل مراهق مدني.

يعني معليش قولة زياد : هي تسطيلة مش تسطيلة الحشيش تسطيلة.

الله يرحم الجميع.:D

3ajeeb 23/12/2009 06:06

اعتقال مطلق النار على الحافلة السورية
 
تمكنت مخابرات الجيش اللبناني، ليل أمس ، من إلقاء القبض على مطلق النار على حافلة الركاب السورية على طريق دير عمار ـ المنية في الشمال.
وقالت مصادر امنية إن فرع الشمال في مخابرات الجيش نفذ منذ الاعتداء على الحافلة فجر الاحد - الاثنين, عملية رصد واسعة في منطقة الحادث بشكل خاص, وعلى امتداد منطقة الشمال، حيث القى القبض على بعض المشتبه فيهم وقدر عددهم باثني عشر شخصاً.
وبحسب المصادر الامنية ان تحقيقاً مكثفاً جرى مع المشتبه فيهم, تم في نتيجته الافراج عن عشرة موقوفين, فيما ابقي على شخصين رهن التحقيق, وتم التركيز على احدهما للاشتباه في صلته بحادث آخر سبق وتعرّضت له الحافلة نفسها للرشق بالحجارة وفي منطقة تبعد نحو مئة متر عن الموقع الذي تعرضت فيه لإطلاق النار.
وأشارت المصادر الى انه بنتيجة التحقيق اعترف الموقوف بإقدامه على إطلاق النار على الحافلة, ويُدعى شوقي الناظر مواليد العام 1984, يحمل جنسية قيد الدرس, ومن سكان بلدة الشيخ عياش في عكار.
واشارت المصادر إلى أنه سيتم نقل الموقوف الى بيروت اليوم, لاستكمال التحقيق معه, والوقوف على الدوافع الحقيقية التي حملته على إطلاق النار.
وفيما قالت المصادر إن التحقيق الأولي استبعد فرضية أن تكون الخلفيات سياسية, وربطها بأسباب متصلة بالتهريب, حيث أقرّ الناظر انه يعمل في تهريب المازوت, دعا مصدر أمني بارز إلى التريث، وقال ان الصورة تتضح نهائياً بعد استكمال التحقيق. وبالتالي يجب انتظار النتائج النهائية وما سيظهره التعمّق بالتحقيق وصولاً إلى معرفة الدوافع الحقيقية وما إذا كانت على خلفية التهريب أم أمور أخرى.
ولفت المراقبون إلى أن الجريمة ترافقت مع حوادث أخرى تثير الشبهات، حيث جاءت بعد نحو 24 ساعة على حادثة إحراق مركز لحزب البعث العربي الاشتراكي في محلة الكولا (في بيروت) ليل السبت، أي بالتزامن مع توجه رئيس الوزراء سعد الحريري إلى دمشق.


المصدر:

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -



برأيي : ابعتوه لسوريا خليهم يتفاهمو معو :pos:
الشب لازم يروّق مزبوط :shock:
شوقي الناظر , خليه يناظر نجوم الظهر

بيطلعلك كل طبل !!!!!!!


الساعة بإيدك هلق يا سيدي 10:51 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.03458 seconds with 11 queries