|
من يمثل ؟
مرحبا
سؤال بسيط من المسؤول عن تمثيل الشباب في سوريا ؟ كل دول العالم لك حتى الثالث عندون اختراع اسمه وزارة الشباب او الهيئة العليا للشباب او بيكون في منظمات غير حكومية مستوعبة الشباب الا نحنا هلا بتقولوا انو في اتحاد شبيبة الثورة او اتحاد الطلبة اوالهلال الاحمر او الجمعيات او الكشاف لا اسمحولي اولا منظمة الشبيبة بالتعريف : منظمة تربوية سياسية ( ضروري السياسة ما عنا غيرها) رديفة لحزب البعث العربي الاشتراكي(طيب الحزب ولو كان بيضم الاغلبية من السوريين طبريقة او باخرى ومش بوارد اني اشرح او هاجم او دافع بس بيبقى في خلق مو اعضاء بالحزب شو مشانون؟؟؟؟؟؟؟؟؟؟؟؟؟؟؟؟؟؟؟ ؟) ثانيا : اتحاد الطلبة : مو كتير احسن اذا الدخول اله بالاجبار ثالثا: الهلال الاحمر: على رغم انو بالفترة الاخيرة لمع نجمه كتير وخاصة خلال حرب تموز والقصص اللي صارت بعدين بس بيبقى فرع دمشق حلب وحمص هني الفعالين والباقي لاشئ رابعا : الجمعيات : منغلقة على نفسا او وفق طابع طائفي بحت واغلبا جمعيات خيرية خامسا الكشاف: الغي سنة 80 لاسبابمش بوارد ذكرها بس وقت رجع هلا اتاخر كتير ولسا بدون اعادة هيكيلية بمعنى اخر من يمثل الشباب بسوريا ومن دون خروج عن الموضوع |
ليش في تمثيل بسوريا؟؟ الشباب مو ممثل, و الختايرة مو ممثلين.... كلنا منعرف مين بمجلس الشعب, وللا اتحاد العمال, وللا الفلاحين.... أو النقابات
مافي تمثيل شعبي بسوريا تحياتي |
ما حدا خيو ...
اي ما حدا بمثلون ... هنن بس بيمثلو حالون .... يعني مجهود شخصي ..... ومع الاسف في بعض الاحيان يتهموا باقامة تجمعات ديموقراطية :shock: وهاد احد الاسباب يللي بتخلق الانحراف عند الشباب كافة .... بتلاقي الشباب ما عندون شي يتسلو فيه ( طبعا مو الكل ) وهون بيصير انو يلجأوا لشغلات غير اخلاقية وغير تربوية ...... وفي شغلة مهمة كمان هي الاسرة بتلعب دور كبير .... يعني مثال الاتحاد النسائي .....يللي اهدافوا غير تطبيقاتوا ما بتلاقي فيه غير المطلقات او الحزبيات ...:shock: وشغلات كتير كمان عم تلعب دور بالشباب عننا بسوريا ..... قلة الشغل .... عدم تكافؤ الفرص .... تدني المستوى التعليمي عند البعض .... الغلاء وين الاشتراكية ؟ بلا ما نحكي ...... خلينا ساكتين |
ههههههههههههههههه
بتعرف ليش عم اضحك لاني انا متسجلة بكل هدول المنظمات يلي ذكرتون ومش ناقصني تمثيل حكومي كمان:lol: |
اقتباس:
يعني حتى هدول يلي عم تحكي عنون جايين يتسلون هني بيشكلو شريحة من المجتمع ومن حقون انو يعبرو عن افكارون مهما كانت منحرفة او هدفها التسلية فقط انا لاني كتير منخرطة بهيك منظمات كتير بشوف فيهااستيعاب لكل فئات الشباب وبمختلف توجهاتون وافكارون وحتى درجة ثقافتون او سطحيتون بالنهايه هؤلاء الشباب جميعا موجودون واقعيا |
اقتباس:
الهلال الاحمر والله حرام تظلمنا بجد انو نحنا بالساحل عم نشتغل كتيييييييير تمام وبهالايام في توزيع معونات وقرطاسيةللطلاب العراقيين والشغل لفوق راسنا الكشاف صح بدو اعادة هيكلة وبدوز شغل منيح بس صار هلا في مخيمين وطنيين وكانو كتير رائعين وبقلك هلا في مرحلة لدخول مرشدات سوريا الى المنظمة الارشادية العالمية من فترة اجو قائدات المرشدات بالمنظمة العالمية يلي مقرها لندن واتفاجأو بيلي صاير عنا من نشاط كشاف ومرشدات غير معقول وشكلون عطو انطباع رائع رح يخلينا ندخل المنظمة العالمية:clap: ومع هيك لسا في كتير شباب مش ممثلينوهيدي وين ماكان مش بس عنا يعني حتى الدول يلي فيها وزارة شباب مافيها هالشرائح الكبيرة الممثلة |
لك يا عمي طلاع من راس هالشباب
الشباب السوري ما بيحب التمثيل , وما بدنا نمثّل نحنا , ليش لحدا يمثّـل عنا .. قال تمثيل قال .. و اللهي عال .. :lol: |
لك طارق انت ما عم تمثل بالمسرح شو بدك احسن من هيك :lol::lol::lol::lol:
يعني ما احلاك و هنن عاملينلك منظكات تمثل فكر الشباب يعني :pos: |
اقتباس:
على كل انا عرضت تجربة شخصية بس مو اكتر وكانو باي موضوع حواري ان كان الو علاقة بالساسة او لا بتحط بيت الاسد بالنص وانا يامحترم بنت يعني الى الفخر تسميني رفيقة مش رفيق هيدا اذا كنت بعثي اما اذا ماكنت بعثي فبلاها هي التسمية ما بيلبقلك تكون رفيق والمهم اني ما عم اعرض رايي لافحم حضرتك اوك كل مرة بندور على حوار شوي حضاري بيطلع كم واحد وبينزلو قلة احترام وهدول طبعا المشرفين مش شايفينون ابدا |
اقتباس:
اقتباس:
طيب انو ملاحظ انك طلعت برا السيرة كلها ونسفت الموضوع من اساسه شو مشان موضوعي عن تمثيل الشباب |
يمثلنا الفلاح يلي عمرو شي 80سنة وملزق على كرسي مجلس الحكو....(قصدي على اساس الشعب)....:p
الفلاح هو سورية ...سورية المتحصرة سورية دولة المعلوماتية :lol:!!! |
  اقتباس: كاتب النص الأصلي : بنفسجة  بالنسبة للشبيبة مظبوط متل ماعم تحكي لكن بدي قلك على سر فيها كتير قوميين سوريين وخدها مني انا بعرف بس بتبقى عم تستوعب كتير شباب ونشاطاتا كتير حلوة يمكن عندك بنفسجة صح بس بمرحلة من المراحل عندي كان ما في ولا نشاط طبعا حسب كل مكان ونشاطه بس يعني أبعدونا شوي عن السياسة الهلال الاحمر والله حرام تظلمنا بجد انو نحنا بالساحل عم نشتغل كتيييييييير تمام وبهالايام في توزيع معونات وقرطاسيةللطلاب العراقيين والشغل لفوق راسنا والله كمان هاد اللي بعرفه واذا هيك الله يعطيكون العافية وميرسي بس كمان الي مآخذ على الهلال الأحمر الكشاف صح بدو اعادة هيكلة وبدوز شغل منيح بس صار هلا في مخيمين وطنيين وكانو كتير رائعين هلا الكشاف بترك الحكي لاهل الاختصاص بالكشاف وبقلك هلا في مرحلة لدخول مرشدات سوريا الى المنظمة الارشادية العالمية من فترة اجو قائدات المرشدات بالمنظمة العالمية يلي مقرها لندن واتفاجأو بيلي صاير عنا من نشاط كشاف ومرشدات غير معقول وشكلون عطو انطباع رائع رح يخلينا ندخل المنظمة العالمية بنفسجة عزيزتي انا معك بس نحنا بحاجة لوزارة او هيئة وطنية تستوعب الشباب بمختلف انتماءاتهم السياسية والفكريةوالدينية ومن دون الترغيب بدرجات عالية او كليات اعلى او اي طريقة تانية يعني شباب سوريا مثلا لا الهلال الاحمر دافع عن وضع الامهات السجينات او جرائم الشرف ولا تنظيم الاسرة تدخلت بمنع تسليم الاطفال المعرضين للتعذيب لاهلون ولا اتحاد الطلبة دافع عن تظلم الطلاب بالعلالمات معك بكل كلمة لكن والله مش قادرة ابخس هالمنظمات حقها لانها عطتني كتير اشياء وتاني شي انا بعرف تماما انو في مشكلة بالحرية السياسية وفي عني مشكلة كمان لاني انا من دعاة الحرية السياسية لكن بدنا تكون واقعيين انو مش كل حياة الشباب سياسة في اشياء كتير بهي المنظمات بتشد الشباب الها وانا من يلي انجذبو لكتير من هالمنظمات وبالتاكيد لازلنا بحاجة الى المزيد لكن باعتقادي انو وزارة لاتمثل الحل ولا التمثيل الرسمي هو الحل لان التمثيل الرسمي للشباب في الحكومة لن يعطي الحرية للشباب انما بتوقع يعطيه تقييد اكتر بامور روتينية نحنا هلا قادرين نتخطاها |
يمكن ما فهمتي قصدي قصدي انا كمان انو مو كل حياة الشباب سياسة بس لازم تكون حياة الشباب انتاج
صح؟ بنفسجة شو لازم يصير برايك؟ |
اقتباس:
مو بالضرورة يكون الانحراف متل ما بينفهم بالعادة .... المهم فيكي تشبهي الحركات الشبابية يللي عننا متل الحركات الشبابية بغير بلدان ؟؟؟ طبعا انا ما عم طالب انو نعمل متلون او نستورد افكارون ... بس انو لو في منظمات ترعى الشباب مزبوط وتساهم بدفع المعنويات والطموحات ما كنا شفنا وضع شبابنا بهي الحالة .... وانا سبق وقلت انو لما بصير هاد الشي بكون على مستوى فردي واجتهاد شخصي من مجموعة واعية وقادرة تبني مجتمع ولو كان صغير ... بس انو وين الدعم الها ؟؟؟ وين التبني ؟ |
بيقولوك انو بتخالف القوانين والباقي بتعرفه
|
اقتباس:
طيب انت جربت تفوت بشي منظمة من هالمنظمات شفت شو فيها انتاج وشو عم يشتغلو الشباب طيب مش رح قلك فوت عالشبيبة فوت عالهلال الاحمر روح عالكشاف وشوف ابداعات الشباب فيون الشبيبة متل ماقلت سياسية بعثية لكن في فكرة كتير غلط عنها يعني هي صح سياسية لكن والله مافيها الا جانب واحد سياسي وهو جانب الاعداد القيادي السياسي في جوانب تانية شفت مثلا البيئة الفن المسرح العمل التطوعي المعلوماتية الاعلام فيمخيمات اسمها مخيمات التشغيل خاصة بالشبيبة مهمتها متنوعة بيعملو عقود مع شركات معينة من اجل حملات تنظيف او رصف طرقات انا مارح احكيلك نظري بحبش عن الموضوع انا بعرف عنو كتير اسال شباب شاركو بهيك اعمال اسال ناس منخرطين بهيك تجمعات ابدا التمثيل الرسمي مانو حل لانكاصلا اذا تقيدت بوزارة فانت مش رح تقدر تطلع برا هالتمثيل بالنهاية هي وزارة ممثلة بحكومة وهالحكومة ممثلة لنظام معين الحل انو في عنا سلبيات على هي المنظمات بس خونا نشوف هالسلبيات من جوا مو من برا يعني نفوت ونشوف احسن ما نسمع وناخد عالسمع نحنا دائما بنروح ندور عالسلبي بكل شي وبنكبرو طيب اكيد بكل شي في سلبيات وفي ايجابيات بس نحنا لما نشوف السلبي بس رح نكون نحنا سلبيين مش هالمنظمات |
اقتباس:
بس بتعرف وين المشكلة عنا انو بدنا كل شي لقدامنا نحنا ما بنعذب حالنا بشي وبنقنع انفسنا انو مافي شي يلبي طموحنا وبنقعد نحكي بسلبيات وسلبيات وسلبيات ياجماعة والله مش هيك انا مش عم قول انو عنا منظمات شبابية كتير توب بس كمان نحنا يلي بنصنع هالمنظمات يعني اذا كل واحد فينا قعد ببيتو وقال انو هالمنظمات ما بتلبي طموحي شو استفدنا نحنا يلي بنصنع طموح هالمنظمات وين المشكلة اذا كان اجتهاد شخصي دائما الجهود الشخصية بتصنع نجاح يمتد الى مسافات واسعة |
انا بعرف انو الكشاف فتحوا بالتسعينات و انا شخصيا كنت فيه
يرحم هديك الايام مايسترو |
| الساعة بإيدك هلق يا سيدي 23:03 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون