|
اقتباس:
|
بعد الدرس الاول
طلع الاستاز سامع من بيت الاستاز غيث وهوي مقفعة معو وواصلة لعند الله انو كيف ولد صغير متل غيث بيعمل في هيك بس من جهة تانية كان ما بيعطي فرحتو لحدا صار بجيبتو 10000 وكمان فاتورة الهاتف اندفعت وما كان مصدق يوصل على البيت مشان يعطي المصاري لمرتو والله لولا العيب كان بلش ركيض بالشارع
وصل الاستاز سامع وابو حمدي على الحارة الاستاز سامع: حول جارنا ابو حمدي تفضل لنسقيك كاسة شاي ابو حمدي : مشكور يا جار انشالله بالافراح يللا تصبح على خير فات الاستاز سامع على البيت وبوجهو ركيض على التلفون بيرفع السماعة وبسمع التووووووووووووون بيعرف انو رجع الخط وهيك ابتسامتو بتوصل لعند داناتو وبيصيح هداك الصوت -"يا مرا " بتجي مرتو ركيض وهيي عم تنشف ايديها من المي والصابون لانو كانت عم تجلي -خير يا رجال شو في - تعي شوفي شو جايبلك وبيمد ايدو على جيبتو وبيطالع العشر تالاف ليرة وبيقلها : تفضلي بكرا بتنزلي على السوق وبتجيبي هدية لاخوكي وكان عم يطلع عليها هيك نظرة رجال رجال رجال يعني يقبر مرتو المرا بتطلع هيك وهيي مو مصدقة عيونا بتسالو من وين هالمصاري -بلا هالاسئلة البلا طعمة هلأ المهم صارت معك وانتي تصرفي وانا هلأ فايت على الغرفة غير تيابي وحط اسئلة المذاكرة للطلاب وما بدي ازعاج من حدي لا منك ولا من الولاد لانو بدي ركز ويا ويلو اللي بيفوت لعندي على الغرفة وبس خلص بدي اطلع لاقي العشا جاهز وبيترك مرتو مكيفة بالمصاري وبيفوت على غرفتو وهوي نافش ريشو وبيطبش الباب ورا طبشة بتهز البيت وبتفيق العالم اللي باخر الحارة يتبع ................................... |
:yahoo: :yahoo: :yahoo: :yahoo:
شكرا كتير ياقوي ياهاني :gem: وروووووووح شايفلك :D |
في غرفة وضع اسئلة المذاكرة
فات الاستاز سامع على غرفتو وطرق الباب هديك الطرقة القوية وراح لورا مكتبو وقعد على الكرسي وسحب كتاب الرياضيات وقعد ينكش اسئلة لهالطلاب ويدور بهالكتاب ويقلب بصفحاتو
يعني مو معقولة استاز متل الاستاز سامع يجيب اسئلة سهلة متل واحد + واحد يعني الاستاز سامع لازم تكون اسئلة مميزة بتعمللها حساب كل الطلاب وتحكي فيها كل العالم وهوي قاعد وحايص وعم يعصر مخو ويفكر بينفتح باب الغرفة وبيفوت ابنو بيقلو بابا بدي ياك تساعدني بهالسؤال ماما بعتتني لعندك هون الاستاز سامع بيقلب وجهو احمر طبعا مو هادا الاحمر :sosweet: هادا الاحمر :aah: وبيمسك هالشحاط اللي كان لابسو ودوب باتجاه ابنو يعني لولا ستر الله كان روحو للولد وبيصيح في طلاع لبرا ولااااااااااااااااااااااا اااااااااك طول بالك جاييك لافصل جلدك عن عضمك الولد يا حرام من خوفو بيطلع وبيطبش الباب ورا الاستاز سامع بيرجع على طاولتو وهوي عم يسب يلعن ابوك يا ابن الحرام انا ما قلتلك ما تقاطعني وبيرجع بيفتح هالكتاب وبيرجع يدور على اسئلة بس خلص الافكار طارت من راصو بيحاول يهدي حالو شوي وفجاة بيبتسم ابتسامة صفراوية خبيثة وبيضب كتاب الرياضيات وبيطلع مشان يتعشى يتبع ............................................. |
:lol:
اقتباس:
:D :D |
يوم المذاكرة
فاق الاستاز سامع يوم المذاكرة وهوي متنشط وغير شكل لبس تياب المدرسة اللي بحياتو ما غيرا ومسك شنتة الكتب وما نسي يتفقد ورقة اسئلة المذاكرة قبل ما يطلع ومشي على المدرسة وصل الاستاز سامع على المدرسة وهوي مقنزع هيك ونافش ريشو وعم يطلع بهالطلاب هيك وكانو عم يقلن "اجاكن الموت يا ولاد جايبلكن اسئلة من كعب الدست " وهالولاد يا حرام عيونن على شنتة الاستاز وهني عم يرجفو اي شو مو قليلة اليوم عندن فحص للاستاز سامع والله بيعلم شو محضرلن اسئلة وخطط وتكتيكات
بالصف قبل ما يفوت الاستاز سامع والله هالشباب قاعدين بهالصف وهادا اللي فاتح الكتاب عم يقرا بس ما عم يفهم شو عم يقرا من كتر الخوف وهدول اللي قاعدين عم يتناقشو بالمادة او بشي مسالة وهادا اللي قاعد عم يكتب على المقعد وهداك اللي عم يحاول يسرح بخيالو بلكي بيتوقع ابو السمع شو جايبلو اسئلة فجأة بيفوت الاستاز سامع على الصف وبيدق الباب بقوي هادا اللي سارح بخيالو بينقز واللي عم يكتب على المقعد وبقية الشباب كلها بتكون انتصبت متل الالف اللي عم ترجف من الخوف وبنطة وحدة بيكون صار الاستاز سامع فوق الطاولة وبتقعد الطلاب على انغام الجملة المعهودة قعود ولاك منك الو وبيوقف هيك فوق هالطاولة وبيطلع على الطلاب متل كانو شي اسد عم يطلع على فريستو وهالطلاب عم تتطلع علي وكلها شوق تعرف شو هالاسئلة بيصيح الاستاز عامر وباسل وجميل تعو لعندي بتنزلو على غرفة المدرسين وبتجيبو ست كراسي والله بينزلو هالطلاب وبيجيبو الكراسي وبيرجعو الاستاز سامع :" وزعون هون قدام المقاعد " وبيلش الاستاز سامع يشقلب هالطلاب بالصف ما بيخلي طالب بمقعدو وهالعالم اللي كانت متفقة مع بعضا لتنقل تفشكلت مخططاتا بس اكتر شي انفقس هوي اللي كتب على المقعد يا حرام عينكن ما تشوف وجهو وبعد هالتفشكلة هاي بيبلش الاستاز سامع يوزع ورق الاسئلة يتبع ............................ |
اقتباس:
|
اقتباس:
|
في قلب الحدث (المذاكرة يعني )
بدأ الاستاز سامع بتوزيع وراق الاجوبة اولا وهوي عم يحكي بقوانين المذاكرة :
ممنوع فتح الكتب والدفاتر او الالتفات او الحكي مع رفيقك او العطس او السعل او التنفس داخل المذاكرة الاسئلة واضحة اللي بدو يفتح تمو ويتبوجق ويسالني سؤال بدي امصع رقبتو كل واحد بيضب لسانو بحقلو وما بيحكي ولا كلمة :shock: طبعا الطلاب عم يسمعو ومو عم يسمعو لانو عقلن سرح بالاسئلة بيخلص الاستاز سامع توزيع وراق الاجوبة وبيبلش بوراق الاسئلة بس كيف بوزعها بوزعها مقلوبة بحيث ما تبين الاسئلة على الطلاب بيقلن ما حدا بيقلب الورقة وبيشوف الاسئلة لحتى خلص توزيع والشغلة الحلوة انو في نموزجين للاسئلة خلص توزيع الاسئلة واعطى الامر بالمباشرة : قلوب الورق انتي ويا ولاك وبلش جاوب والله هالشباب قلبت الورق وتطلعت على هالاسئلة هيك وبلشت تفكر تفكر ها مو تجاوب مرقت اول خمس دقايق العالم صافنة بالسؤال الاول وعم تحاول تلقط الفكرة لتجاوب عبث والله خمس دقايق تانية ها بلشت القلام تتلحلح وبلشو الشباب يشتغلو طبعا مو كل الشباب الشباب الدريسة بينما المو دريسة هادا اللي بلش يدمع وهادي اللي صفرنت ونزل ضغطا هوي قرب نص الوقت ما بتسمع الطلاب الا الاستاز سامع بيصيح ولاك تعى لهون ولاك هات ورقتك وتعى لهون انا ما قلتلكن ممنوع الالتفات والله بيسحب طالب قاعد بالمقعد الاخير بالزاوية بيطالعو لبرا وبياخد منو الورقة وهالطلاب وقفت كتابة وصارت تتفرج على الاستاز سامع كيف عم يطالع الطالب بخبط وضرب المهم والله ما في عشر دقايق تانية قلن حطو القلام من ايديكن خلص الوقت وبيبلش يجمع الوراق واسا الطلاب ما خلصت وبتلاقي هادا اللي عم يحاول يكتبلو كلمتين بسرعة قبل ما يجي الاستاز وياخد منو الورقة وهادا اللي طب راسو على المقعد و بلش البكي بياخد الاستاز سامع الوراق وبيطلع برات الصف وبيترك الطلاب عم تتخابط بين بعضها على حل الاسئلة يتبع مع تصليح وراق المذاكرة وتوزيعها .................................... |
تأخرت لحتى قريت اليوميات بس قريتا كللا مع بعضا....شي ظريف...
يلللا ناطرين الكمالة ...من امرأة من ورق أو هاني......:D :D :D |
انا خلصت الحشيشة اللي عندي ولبين ما يبعتلي الحكيم السيكارة اللي وعدني فيا اتاتشمنت على الايميل ما رح اكتب شي
ما عم يطلع براسي ولا فكرة |
اقتباس:
|
اخ لك تصليح الاسئلة هاد الي مغامرات معو كتير
وبكل مادة خيو اذا مافي ولا فكرة براسك بجرب انا احكي عن تصليح الاسئلة طبعا (اذا ما عندك فكرة) ما بعرف شو بيطلع معي بس بدك تقلي وراق انو مادة الشب عم يصلح |
كتوب تصليح الوراق وانا بكتب توزيعن يللا وروح شايفلك
الاستاز سامع عم يصلح مادة رياضيات |
يعدمني ياك نقيت المادة المفضلة عندي واللي كنت دايما جيب فيها العلامة الكاملة
هيك ما رح يكون في حقد بقلبي انا وعم اكتب :pos: يلا مو مشكلة |
هاد بقا حبيب قلبنا سامع المطنش بروح على البيت, هو وعم يفكر انو شو هالطلاب قليلة الادب والكسلانة, بدال ما يدرسو بصيرو يبكو ويغشو.
المهم بروح عالبيت هو ومهزوز بدنو, بحط هالوراق على الطاولة وبيجي ليصلح الاسئلة, اول ورقة بيمسكها بكون فيها السؤال الاول كلو شخابير ومافي اجابة عالسؤال, هاد صاحبنا شو بفكر؟؟ انو لعمى من اولتها هيك بيترك من ايدو وبروح عالتلفزيون وبقضي نهارو عليه. تاني نهار بالصف, واحد من الطلب بقلو: " استاذ شو صار بوراق الفحص؟؟ " بقوم الاستاذ بيحمر وجهو وبعصب وبقلو: " ولاك يقطع عمرك لو جاهزين الوراق كنت قلتلكون العلامات, قعود وخراس تضرب شو قليل ادب." الطالب بموت رعبة وبيسكت وبيقعد. كمان هالنهار الاستاذ سامع ما اجا على بالو يصلح الاسئلة وبروح هو والعيلة ليعمل زيارة لعالم رفقاتهون (ترفيه عن النفس يعني (حقو)). كمان بيسألوه الطلاب شو صار بالاسئلة؟ بقوم بجواب بعصبية وبقلهون انو كان مشغول وما قدر يصلحهون. وبروح الموضوع شهر وكل اليوم الاستاذ عندو حجة شكل. وبعد هالشهر سامع بقرر انو يصلح وراق الفحص. بيجيب هالوراق وبيقعد بغرفتو وهو عم يصلح, واذ بيسمع صوت عياط بالبيت. بيطلع لبرات الغرفة, بلاقي ولادو علقانين مع بعض. طبعا بيفقع كل واحد منهون بهدلة, وبيرجع على غرفتو ليصلح الوراق. شوي ومرتو بتبلش تنق على راسو انو بدها مصاري مشان تنزل تجيب غراض للبيت, بقلها في 500 ليرة بجيبتي ما معي غيرهون روحي خديها. المرا بتاخدها وبتروح. بيرجع سامع لتصليح الوراق وبقلبو حسرة انو هاي ال500 ليرة اللي بقيانة معي من معاشي راحت, شلون بدنا نكمل الشهر وانا ما معي ولا فرنغ, والشهر لسى بنصو,وبتاخدو هموم الحياة هو وعم يصلح الوراق. وبعد ما خلص نص الوراق الزلمة عصب من علامات الطلاب: هاد اللي اخد صفر, وهاد اللي اخد 1, وهاد اللي اخد 3. بقوم سامع وبروح بجيب علبة حبوب مهدئة وبجيب قنينة مي. وبعد كل ورقة بيشربو حبة, الا عدة مرات قليلة بتشلف معو وبيقدر يضاين ورقة تانية بدون ما يشرب الحبة. وبعد جهد جهيد بخلص تصليح وراق الفحص, وبحط راسو وبنام. التتمة مع هاني |
بعد اربع وعشرين ساعة بتكون كمالة القصة جاهزة :D
|
يللا..الله و ايدك هاني:D
|
| الساعة بإيدك هلق يا سيدي 21:46 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون